المساعد الشخصي الرقمي

مشاهدة النسخة كاملة : فــشخره فاضــيه ..


محمد الجزولى
07-08-2009, 11:39 PM
كانت نسائم الشتاء قد بدأت تهل وهى تداعب اغصان الاشجار معلنة لها شوق ظلت تحتفظ به طيلة رحلتها الموسميه بينما اخذت الاشجار تتخلى عن اوراقها فى خجل علها تفرد مساحة للقادم الجديد ليلامس شغاف قلبها الذى ارتوى حنانا من خريف اخذ يلملم بقاياه ويمضى
المكان منزل متواضع اجتهد اصحابه كثيرا ليظهر لمن يراه انه غير ذلك ...
مرتب بطريقه تنم على ذوق ساكنيه ... وفى ظل احدى غرفه جلسن اربعة نسوه وهن يتجاذب اطراف الحديث بعد يوم حافل من اعداد الفطور وما يليه من توابع ...
بعد قليل اقبلت عليهم صبيه فلبينيه واسعة العينين على غير العاده .. دقيقه الملامح ... بها مسحة من جمال ... وهى تحمل صينيه الشاى .. وضعته امامهن واخذت تصب لهن وقد رسمت على شفتيها ابتسامه جذابة
خاطبت هيام صاحبة البيت
انتى يا نوال شغالتكم دى صينية ؟؟؟؟
برى يا يمه ... مالنه بى نجيب الصينيه ..!!! ما كفاية علينا طقم الشاى ده يا اختى!!!
معناها فلبينيه ؟؟ صاح؟؟؟
اااااى يا اختى ... فلبينيه سافر ليها عماد مخصوص وجابه معاهو
اعتماد : والله يا نوال يا اختى انا الشغالة بتاعتى منجطانى نجاط فى الدنيا دى !!..

اصبرى يا اعتماد هى شغالتكم ياها الحبشيه الزمان ديك ؟؟؟؟
اياها زاتها والله !!! يا اختى هى شغلها نظيف وتعرف كل حاجه لكن عليها جنس غتاته , وحاة الله القراصه دى بى ترميها !!!!
هيام : الحبش ديل عازات دبلوماسيه فى التعامل يا اختى !!!
اعتماد : والله انا زاتى زهجته منها ... انا بفكر اجيب لى سيرلانكيه !!!!
نوال: لا لا يا اختى ... ما بنصحك غايتو !!! اخير ليك الاندنوسيه ... رزينات وفاهمات السغل ...
انخرطت هيام ونوال واعتماد فى حديث طويل عن الشغالات وطرائفهن بينما انشغلت سعاد عنهن بمداعبة الشغاله الفلبينيه وهى مأخؤذه بلهجتها المكسره ولغتها الغريبه عليها ...


رجعت سعاد الى منزلها ذلك اليوم وهى مكسورة الخاطر وهى ترى صاحباتها وهن يمتلكن الخدم والحشم بينما هى تكنس كل صباح وكل مساء ...وتعد الطعام وتغسل الهدوم ...
انتظرت زوجها على حتى دخل المنزل وباغتته دون ان تترك له فرصه الاستجمام

هوى يا راجل هوى .. انا شغل البيت ده فترت منو خلاص ... شوف ليك طريقه يا اخوى تشيل عنى شويه !!
قصدك شنو يا مره هوى .؟؟؟ عاوزانى اسيب الشغل يعنى واجى اقش ليك وامسح ليك ؟؟!!!
انا ما قلته كدى يا ارجل هوى ؟؟؟!!! لو سبته الشغل البصرف علينا منو يعنى؟؟؟؟
طيب قصدك شنو ؟؟؟ وبعدين ياهن الاوطين والبرندتين ديل الغلبك شغلهم ؟؟؟؟
انا ما عارفه غايتو .. انا عايزه شغاله ؟؟؟؟!!!
هاههها هههه هااااى !!! عايزه شنو يا مره ؟؟؟ شغاله !!! انت قايله نفسك فى مملكة النمل ولا شنو ؟؟؟
انا عايزه شغاله وفلبينيه كمان !!! ولو جبتها اندنوسيه يكون احسن !!! صاحباتى احسن منى فى شنو ؟؟؟ ما كل واحده عندها اوطين وبرندتين وبرضو عندهم شغالات!!!
ايوا كده فهمت اللعبة !!! عايزه تتمشخرى مع صاحباتك ؟؟؟ وووو ...
نقاش حاد استمر زهاء الثلاثه ساعات بين سعاد وزوجها كانت الغلبه فيه للزوجه واقتنع على بفكرة الاتيان بخادمه تساعد زوجته فى اداء اعمال المنزل... وبعد بحث مضنى عاد على الى منزله وبصحبته خادمه قدمها الى زوجته قائلا:
ابسطى يا مره !! الشغاله جات اهى !!!! اتفشخرى زى ما عاوزه !!!!
ده شنو ده يا على ؟؟؟!!! دى منو الجايبه دى ؟؟؟؟
دى الشغاله يا سعاد ؟؟!!!
بس انا ما قلته ليك عاوزه سودانيه ؟؟؟؟ انا عاوزه اندنوسيه يا راجل؟؟؟؟ يعنى عايزه واحده من اصحاب جوازات السفر !! مش واحده محليه ....
يا مره هى بطلى النقه الفارغه ... شغاله وجبناها ليك .... محليه مستورده ... ياهو كلو الشغل ...
يعنى انا اسه كان صاحباتى سألونى عن الخدامه بتاعتى اقول ليهم سودانيه ؟؟!!! برى وحات الله دى ما تدخل بيتى دى ؟؟؟؟
يا دى يا ما فى شغاله اساسا !!! سمعتى يا مره ولا اعيدو ؟؟؟؟
اشاحت سعاد بوجهها الناحيه الاخرى وهى غير راضيه عن ما حدث ولكنها وافقت على مضض ...
فى الصباح الباكر تزينت سعاد وذهبت الى الجلسه اليوميه وفى نيتها التمادى فى الفشخره امام صاحباتها ... اليس هى الان تمتلك خادمه مثلهن .. سودانيه ولا اجنبيه المهم سوف تتفشخر وتدعى ان خادمتها اندنوسيه !!! دخلت سعاد الى منزل نوال فوجدت الجمع قد اكتمل ولكن على غير العاده الصمت يلف المكان والحزن بادى عليهن ودمعه قد سالت على خد نوال اجتهدت فى اخفائها لما رات سعاد داخله عليهن
هوى يا نسوان مالكن فى شنو ؟؟؟؟
ما تتكلمن ؟؟؟ بوظتو اعصابنا يا بنات امى ؟؟!!! فى شنو يا هيام ؟؟؟؟
هيام : اصلوا .... اصلوا ........
اصلوا شنو يا اختى ؟؟؟؟ ما تقولى ؟؟؟؟
اصلو راجل نوال اتزوج الخدامه الفلبينيه وسافرو شهر العسل امبارح
وب على وب على وب على .... اتزوج الخدامه !!!! هو زاتو لزومن شنو الخدامات ؟؟؟؟ هى بيوتنه دى عازات ليهن خدامات ؟؟؟ مع السلامه يا اخواتى ... بجيكم راجعه ...
اخذت سعاد تهرول الى منزلها ووقد اضمرت طرد الشغاله فى الحين واللحظه .... برى يا اخوانى ... الزول لازم يحرص ... ما شغل البيت ده كلها ساعتين ويخلص ... لزومو شنو الشغاله ... فتحت الباب بسرعه وهى تصيح ... ميرى .... يا ميرى .... البنت دى طارت وين ؟؟؟.. يا بت انتى !!!...لمى اغراضك ومع السلامه .. استغنينا عن خدماتك ... يا بت وين انتى ؟؟؟.... يا ولد الشغاله دى طارت وين ؟؟؟
رد عليها ابنها الصغير ذو الخمس اعوام : سافرت يا ماما ...
ســجمى !!!سافرت ؟؟؟؟!!! سافرت وين ؟؟؟ ومع منو ؟؟؟
سافرت مع بابا يا ماما .... قالوا ماشين كسلا ...
كسلا !!!! ك.. ك... هوت سعاد على الارض وهى تهزى بكلمات غير مفهومه .... ولا زالت تهزى بنفس الكلمات فى مستشفى الامراض النفسيه حتى يومنا هذا ....
عبدالله محمد العقاد
08-08-2009, 12:07 AM
مبدع يا جزولي
و حقيقة انا طولت من السودان لكن قالو حتي في مدني في الفلبينات و السيرلانكيات

و طبعا ناسنا مستجدين نعمة وبيقدروا الجمال

الله يكون في عون الحريم
العاقب مصباح
08-08-2009, 12:22 AM
ود الجزولى

والله ضحكة صباحية

تعيننا باقى اليوم

فى تفكير النسوة

وكل واحدة تحمل فى يدها غويشة

وليس سكينا

السودان اتغير خلاص

يا حليل المرة البتحلب الغنم

وبتجيب العبوب لى البقرة

وتسرح بى الحملان

وبعد دا كله بيتها زينة

ورزينة

وراجلها ما بيعرس فوقها

مبسوط منها تب

وعافى منها

نسوان العولمة

رائع يا جزولى كما عهدناك

ومتفوق على نفسك

لما تكتب عن واقعنا

فى قالب جميل جدا

ومهضوم

وطاعم

زى حروفك

وهى راسمة البسمة

شكرا للبوست

فقد جعلنا نفارق همومنا

ونفترش الضحكة

ونسعد اكثر بعودتك

مشتاقين والله
ام قبس
08-08-2009, 03:11 AM
الاستاذ محمد الجزولي
والله موضوع رائع جدا جدا
وبالله الظاهرة الرهيبه دي وصلت مدني
الشغاله البسوقاها الاجازة وبقطعوا ليها تذكرة الصيف وكدا
سجمنا
كان كدا اننتظر ابو قبس ساي
بس ياحليلنا هنا
كان شغلت ليك زول في بيتك
طيارتك قامت
وهي صحي مسعول من الخير لمان الشغالة تعمل شغل البيت
المرة تعمل شنو
تفضي للقطيعة
وتدي جارتها الفارغة وجارتها تردي ليها المقدودة
بركة العرس فيها
وشاحدة ربي عليكن اي واحدة جايبها نظام فشخره يدبلوا فيها
عشان تقعدن في بطن الواطة دي وتقضن خدمتكن :p:p:p

هترشه ساكت
مسعولين من الخير السقيد : العاقب دا جاب مهضومه دي مين وين اوعا يكون شغالتهم لبنانيه
ABUZAID
08-08-2009, 03:31 AM
الغالي - محمد الجزولي

تحياتي واشواقي

لا اجد من الكلمات تعبيرا يفصح

بالاضافة الي تطرقك لموضوع هام في مجتمعنا
فانت سلكت قمة الخيال والادب والتصوير الساحر الذي ياخذ القارئ بعيدا عن عالمه


يكفيني ان اقول . . . .
فخرا لمنتديات ودمدني وجود قلمك فيه



ارجو ثم ارجو نقل الموضوع الي المنتدى الثقافي

ولك التحية وبس
ابوالنور
08-08-2009, 03:49 AM
تسلم يا ود الجزولي يا رائع وما عدمناك يا رب
حاتم مرزوق
08-08-2009, 04:40 AM
محمد الجزولي

كعادتك تطرح القضايا الهامة بأسلوبك السلس المتميز .

نخشي ان تسند مهام الأمهات الي الخادمات والسائقين وخصوصا تربية الأبناء
ونخاف ان ينشأ جيل جديد يتربي علي ايدي الخادمات فيخرج بعادات وتقاليد جديدة لا تمت الي مجتمعنا بصلة لذلك لا بد ان نستصحب معنا التجربة الخليجية.

ونطرح سؤال مهم هل يأتي يوم تقل فيه عاطفة الأم السودانية تجاه ابنائها وتتركهم للأجنبيات.
ابوخالد
08-08-2009, 05:13 AM
ياصاحب الؤلؤ المنثور ـ ود الجزولى

كلام فى الصميم .... طرح المشكلة

فى قالب درامى راقى .... يشدك عنوة ...

يتغلغل فى داخلك بكل بساطة ...

ولايترك لك مجالآ لتحريك الماوس ... حتى آخر حرف ...

تجدد دآئم ... عطور ونسائم


فلك الود أخى
محمد الجزولى
08-08-2009, 09:37 PM
مبدع يا جزولي
و حقيقة انا طولت من السودان لكن قالو حتي في مدني في الفلبينات و السيرلانكيات

و طبعا ناسنا مستجدين نعمة وبيقدروا الجمال

الله يكون في عون الحريم

استاذى عبد الله محمد العقاد
وجودك هنا هو الجمال بعينه ... فاثار عطرك لا زالت باقيه

المشكله اخى عبد الله ان كثير من الظواهر اخذت تفد الى مجتمعنا ونحن نأخذها لزوم الفشخره والمنظره .... وليس لزوم الحوجه والاضطرار ..
والتقليد اصبح ديدننا ....والله يكون فى عون الكل اخى عبد الله
شاكر لك مرورك الذى اسعدنى كثيرا
محمد الجزولى
08-08-2009, 10:03 PM
المبدع العاقب مصباح
كأنى اغنى مع المبدع محمد جباره

قايمى الصباح متكفلتى
شايلة الحليلة على المراح
والساعة ديك يا دوبو ديكنا بدا الصياح

كان حالهن ... فى ذلك الزمن الجميل
لا اشتكو ... ولا ملو ....
وبيوتنا نظيفه
وهدومنا نظيفه
وشـــاااااااااااااااطرين فى مدارسنا

عزيزى العاقب
كلماتك دائما ما تزيد البوست جمالا ..
وتعطينى الامل لى يوم باكر
كن معى دائما يا صديقى
بت أم درمان
08-08-2009, 10:25 PM
صحي زي ما قال المثل ... يا مأمنة للرجال ... بس سؤال ليكم كلكم المتداخلين ... واولكم ام قبس ... الشحدت ربها اي وحدة تجيب شغالة وتتفشخر ... راجلا يدبل فيها ... سؤالي ... انت بتنتقدو وجود شغالة اجنبية من دول شرق اسيا ؟... ولا بتنتقدو وجود شغالة بصفة عامة؟... اكيد بتنتقدو الشغالة المن شرق اسيا بس صح ؟... طيب البيوت السودانية ... طول عمرهم شغل البيت بيشتغلوهو الشغالات ومن زمااان الكلام دا ... اقل بيت وابسط بيت ... بجيب البت باليوم والولد باليوم ... بيشتغلو شغل البيت كااامل ... من غسيل عدة ... لي غسيل ملابس ... لي نظافة ... لي مكوة ... حسي الفرق شنو ... ان الشغالة بقت اجنبية ... من شرق اسيا ... واقوم الراجل يتزوجها ... دي فراغ عين ساااااي ... وهو عارف ما حا يستمر الزواج دا ... بس اذا فكرنا شوية ... حا نلقى ان موضوع الشغالة دا عادي جدا مافيهو اي فشخرة لانها حاجة قديمة عندنا في السودان ... الماعادي فراغ عين الرجال ...
محمد الجزولى
08-08-2009, 11:07 PM
الاستاذ محمد الجزولي
والله موضوع رائع جدا جدا
وبالله الظاهرة الرهيبه دي وصلت مدني
الشغاله البسوقاها الاجازة وبقطعوا ليها تذكرة الصيف وكدا
سجمنا
كان كدا اننتظر ابو قبس ساي
بس ياحليلنا هنا
كان شغلت ليك زول في بيتك
طيارتك قامت
وهي صحي مسعول من الخير لمان الشغالة تعمل شغل البيت
المرة تعمل شنو
تفضي للقطيعة
وتدي جارتها الفارغة وجارتها تردي ليها المقدودة
بركة العرس فيها
وشاحدة ربي عليكن اي واحدة جايبها نظام فشخره يدبلوا فيها
عشان تقعدن في بطن الواطة دي وتقضن خدمتكن :p:p:p

هترشه ساكت
مسعولين من الخير السقيد : العاقب دا جاب مهضومه دي مين وين اوعا يكون شغالتهم لبنانيه

الاخت ام قبس
الروعه هى مرورك هنا
والجمال هو حروفك التى نثرتيها بين احرفنا
المشكله يا ام قبس ليس وجود الشغاله فى حال الحوجه اليها
ولكن المشكله فى وجودها دون حوجه
وان تكون اجنبيه تصرف بالدولار
هكذا صار الحال عندنا فى السودان
استقدام .... واجراء كشف طبى ... واقامه ... وكفاله ... وعوووووك
وده كلو لزوم الفشخره وشوفونى ...

رد الهترشه: الظاهر العاقب اخوى ده بتكلم باعتبار ما سيكون ( هههه)
محمد الجزولى
09-08-2009, 04:27 AM
الغالي - محمد الجزولي

تحياتي واشواقي

لا اجد من الكلمات تعبيرا يفصح

بالاضافة الي تطرقك لموضوع هام في مجتمعنا
فانت سلكت قمة الخيال والادب والتصوير الساحر الذي ياخذ القارئ بعيدا عن عالمه


يكفيني ان اقول . . . .
فخرا لمنتديات ودمدني وجود قلمك فيه




ارجو ثم ارجو نقل الموضوع الي المنتدى الثقافي

ولك التحية وبس


عزيزى abuzaid
وجودك هنا ابلغ بيان .... فقد سرنى ما خطه قلمك ... ولعمرى انها شهادة اعتز بها
من شخص فى مثل اريحيتكم ....
زادنى الشرف اخى ابو زيد .... فلك منى اسمى ايات احترامى وتقديرى
ولك تحيه اندى اخى العزيز ...

همسه : لا يهم اين يكون البوست
المهم هو فهمكم العميق للبوست وهذا يكفى
تقبل تحياتى
محمد الجزولى
09-08-2009, 04:38 AM
تسلم يا ود الجزولي يا رائع وما عدمناك يا رب

الاروع وجودك هنا عزيزى ابو النور
فطلتك تسعدنا ... ارجو ان لا تحرمنا منها
ولك كل الاحترام والتقدير
عاطف عولي
09-08-2009, 11:30 AM
وطبعآ يا ود الجزولي صاحبتنا عاوز تفضي للبوبار وفك الزرار وجيب الرادي في بيت الايجار.
انت دحين البوبار دا مش اسم دقة خاتم
عبدالله الصديق
09-08-2009, 12:11 PM
ود الجزولي ايها الالق المشبع ابداعا وتألقا ..ما اروعك
في العام 1998 كنت في الخفجي وكانت هناك باحثة اجتماعية وموضوع بحثها دور الام في التربية وبدت في مدارس الاطفال بتقديم بعض الاسئلة بعد ان اختارت نوعية عشوائية من الاطفال كانت الاسئلة
من الذي يوقظك من النوم؟
من الذي يحميك ويلبسك؟
من الذي يجهز لك الغداء ؟فكانت جميع الاجابات الشقالة فختلصت الى ان الام لا دور لها
moh_alnour
09-08-2009, 03:30 PM
ود الجزولي فكرة و فن و هندسة
أبتدعت و الله في تصوير ظاهرة بدأت في الإنتشار في مجتمعنا السوداني
و في أعتقادي أن الارتفاع الكبير في المستوى المعيشي و في دخل بعض الأسر
هو الذي جعلهم يلجأون إلى أستقدام خادمة أجنبية بعد أن كان الأمر لا يتعدى حدودنا الشرقية
و أتفق مع من قال بأن الأمر لا يخلو أيضا ً من البوبار في شقة الإيجار و أيضا ً الفشخرة و فك الزرار
قد تكون هناك حوجة لخادمة عند بعض الأسر و لكن يجب أن يقتصر دورها على أعمال محددة
فمثلا ً من الخطأ أن يتم إسناد مهمة تربية الأطفال إلى الشغالات كما يحدث عادة في دول الخليج
لأن هذا الأمر له مسالب كثيرة تحدث عنها الكثيرون في المنتديات و و سائل الإعلام المختلفة
و تأخذ الظاهرة شكل سلبي أكبر عندما تكون تقليد أعمى كما ورد في هذا البوست
درديري كباشي
09-08-2009, 11:08 PM
ود الجزولي كالعادة تحفة من الواقع ...
بس القصة انا واخوان كثيرين محتاجين نطبعها بخط جميل ونبروزها ونعلقها في البيت عشان تكون حجاب ضد الخدامات .. اكيد اي زوجه حاتقراها تشيل فكرة الخدامة من راسها خالص والعندها راح تسفرها في اقرب طائرة .. وعباس الدسيس عندو قصص واقعية مع الخدامات .. نطلبها منه لو ما جابها هنا ... هو عندو حيل كثيرة ساعدته في عمل مناعة ضد الخدامة في البيت .. لكن حلوله كانت مؤقته وتاثيرها راح بعد فتره قصيرة ...
عباس الدسيس
09-08-2009, 11:46 PM
ود الجزولي متشكرين علي السرد الرائع لمعالجة ظاهره غريبة علي المجتمع السوداني زي ما قال الدرديري انا قبل كده نزلته بوست بس بي طريقه تانية:
http://wadmadani.com/vb/showthread.php?t=24787
محمد الجزولى
10-08-2009, 09:03 AM
محمد الجزولي

كعادتك تطرح القضايا الهامة بأسلوبك السلس المتميز .

نخشي ان تسند مهام الأمهات الي الخادمات والسائقين وخصوصا تربية الأبناء
ونخاف ان ينشأ جيل جديد يتربي علي ايدي الخادمات فيخرج بعادات وتقاليد جديدة لا تمت الي مجتمعنا بصلة لذلك لا بد ان نستصحب معنا التجربة الخليجية.

ونطرح سؤال مهم هل يأتي يوم تقل فيه عاطفة الأم السودانية تجاه ابنائها وتتركهم للأجنبيات.

استاذى حاتم
جميل وجودك هنا .... فحرفك يضيف للحروف معانى اخرى
الظاهره دخيله علينا اخى حاتم .... واصبحت فى عقر دارنا
واعنى بها ظاهرة الخدامات الاجنبيات .... ذوى الثقافات المختلفه تماما عن ثقافتنا
وعاداتنا .... فرياح العولمة هبت بشده على مجتمعنا المحافظ .... واخشى عليه من الانكسار ...
دمت بكل الود اخى حاتم
محمد الجزولى
10-08-2009, 09:06 AM
ياصاحب الؤلؤ المنثور ـ ود الجزولى

كلام فى الصميم .... طرح المشكلة

فى قالب درامى راقى .... يشدك عنوة ...

يتغلغل فى داخلك بكل بساطة ...

ولايترك لك مجالآ لتحريك الماوس ... حتى آخر حرف ...

تجدد دآئم ... عطور ونسائم


فلك الود أخى

اخى ابو خالد
صاحب القلم الذى ينطق شاعريه .... والاسلوب المميز
لك منى كل الود .... وشاكر لك مرورك الكريم اخى العزيز
محمد الجزولى
10-08-2009, 09:14 AM
صحي زي ما قال المثل ... يا مأمنة للرجال ... بس سؤال ليكم كلكم المتداخلين ... واولكم ام قبس ... الشحدت ربها اي وحدة تجيب شغالة وتتفشخر ... راجلا يدبل فيها ... سؤالي ... انت بتنتقدو وجود شغالة اجنبية من دول شرق اسيا ؟... ولا بتنتقدو وجود شغالة بصفة عامة؟... اكيد بتنتقدو الشغالة المن شرق اسيا بس صح ؟... طيب البيوت السودانية ... طول عمرهم شغل البيت بيشتغلوهو الشغالات ومن زمااان الكلام دا ... اقل بيت وابسط بيت ... بجيب البت باليوم والولد باليوم ... بيشتغلو شغل البيت كااامل ... من غسيل عدة ... لي غسيل ملابس ... لي نظافة ... لي مكوة ... حسي الفرق شنو ... ان الشغالة بقت اجنبية ... من شرق اسيا ... واقوم الراجل يتزوجها ... دي فراغ عين ساااااي ... وهو عارف ما حا يستمر الزواج دا ... بس اذا فكرنا شوية ... حا نلقى ان موضوع الشغالة دا عادي جدا مافيهو اي فشخرة لانها حاجة قديمة عندنا في السودان ... الماعادي فراغ عين الرجال ...

اختى بت ام درمان ... الما عادى هو وجود شغالات اجنبيات .... لاحظى اجنبيات ... مع اختلاف الثقافه والعادات والتقاليد .... صحيح من زمان كانو الناس بيستعينو بى الشغالات السودانيات يعنى بنات البلد والواحده تشتغل من الصباح ثم تذهب الى بيتها فى المساء ... وقتها كلو فى النظافه وغسيل الهدوم والمكوه .... اسى بقت الشغاله الاجنبيه ساكنه معانا فى البيت .... لديها مساحه كبيره للجلوس مع الاطفال والاعتناء بهم واكيد نقل سلوك معين الى هؤلاء الاطفال .... حتى اللهجه تتغير لدى اطفالنا ...
هذا ما ننتقده اختى بت ام درمان .... بعدين لزومو شنو اساسا شغاله من شرق اسيا فى السودان .... هل نحن فى حوجه اكيده لمثل هؤلاء .... لا اظن ...
لكى منى كل الود والاحترام .... فوجودك هنا اسعدنى كثيرا اختى الكريمه
أبوحراز
10-08-2009, 08:42 PM
هذه الظاهرة في الكثير من القرى نادرة جداً
بيتنا في القرية لم تدخله شغالة حتى الآن
والوالدة واخواتي وبناتهن يقومون لنا بعمل اي شيء
لكن في بيتي بالحصاحيصا تأتينا واحدة يوم بعد يوم
كوي وغسيل ومسح زي ما بقولوا
لكن يشهد الله 75% من الونسة لمن يأتين الينا بعضهن في البت حرقت الملابس
والبت الشغالة ماغسلت الهدوم كويس
وكل واحدة تتفشخر
والله واحد عمك كبير قريب من البيت يعمل حتى السادسة مساء بالسوق
والمدام قدر حبوبتي
لكن كل يوم مسببة للراجل الكثير من الارهاق المادي
الشغالة في البيت
وهي حايمة
يوم جاتني المدام في الصالون وقالت لي تعال وصل خالاتك ديل عندهن مشوار
طبعاً لو كان الحضور من شاكلة اريج ومخمل وسوسن وتباريح ورحيق
ناس الجنز والبلوزة ماكان واحد جاب خبرك
لكن مما الحكاية يكون فيها نسوان مشلخات ينادوك يقولوا ليك وصل خالاتك
قال خالاتك قال
اها سألتهم وين ياخالات ماشين
ردوا كلهم بصوت واحد
ماشين ناس فايزة بوباااااااااااااااااااااااااااااااااااار !!!

صدقني يامحمد الجزولي والقراء الكرام هؤلاء السودانيين لو ربنا أداهم قروش
والله يسووا البدع
والله ممكن يجيبوا خدامات من أمريكا واليابان
المشكلة الواحدة تلقاها مستاجرة بيت
وقطعة ارض مافي
والدخل محدود رزق اليوم باليوم
والراجل المغلوب يمكن فجأة تااااااااااااااااااااااح يقع يمووووووووووت
بعدين صاحبتنا تقعد تتلفت يمين وشمال
ياجماعة الخادمة في الوقت المناسب
وفي حالة الضرورة القصوى
هن النسوان بيفتكرن نحن زعلانين من القروش
لكن والله كما تدين تدان
أحياناً تأتي الخادمة بنتائج عكسية جداً
اعرف ثلاثة منهن حملن سفاح وفي التحقيق اتضح إن الزوج أحياناً هو من يقوم بذلك
أجمل { اللقمات } إن جاز التعبير هي من تقدمها اليك شريكة حياتك
ومن تصنعها بيديها


هجمة متردة

لدينا بودربيعة { اقرباء اثنين } تجاوز كل واحد منهما الخمسين عاما
والله حينما ياتون لأي مناسبة
لا أحد يشرب القهوة عند ناس المناسبة
الا حينما تأتي زوجته للمناسبة وتقوم بعمل القهوة له
الحلة كلها تعرف ذلك
والمشكلة نسوان ناس ابوحراز ومن لف لفه يعتبرون هؤلاء مضرب مثل
قلنا ليهم ياجماعة ديل مابيدخلن خدامات بالبيت
انتبهن الى بيوتكن 00 حقاً 00 والله
لم اقل هذه الصرخة
الا للوضع الإجتماعي والحكاوي التي اسمعها
نعم لنساعد الآخرين
ولكن وفق ضوابط !!!!
محمد الجزولى
11-08-2009, 10:25 PM
وطبعآ يا ود الجزولي صاحبتنا عاوز تفضي للبوبار وفك الزرار وجيب الرادي في بيت الايجار.
انت دحين البوبار دا مش اسم دقة خاتم

والله يا عاطف البوبار ده ليهو اسامى كثيره ... دقة خاتم ... واسم فنانه .... واسم توب ... واسم غويشه ... ياخى حاجه غريبه ... سر الاسم ده شنو ما عارف
تسلم جارى العزيز ... فمرورك هو الالق ..
محمد الجزولى
11-08-2009, 10:32 PM
ود الجزولي ايها الالق المشبع ابداعا وتألقا ..ما اروعك
في العام 1998 كنت في الخفجي وكانت هناك باحثة اجتماعية وموضوع بحثها دور الام في التربية وبدت في مدارس الاطفال بتقديم بعض الاسئلة بعد ان اختارت نوعية عشوائية من الاطفال كانت الاسئلة
من الذي يوقظك من النوم؟
من الذي يحميك ويلبسك؟
من الذي يجهز لك الغداء ؟فكانت جميع الاجابات الشقالة فختلصت الى ان الام لا دور لها

الغالى عبد الله الصديق
شكرا لك وانت تضئ بطلتك هذا البوست .. فتعطيه من جمال كلماتك وحلو حديثك بعدا اخر
فعلا اخى عبد الله اخشى ان تتحول المسأله الى بروز جيل بحالة يعتمد على ثقافة الشغالات ... واتمنى ان لا يصل الامر لهذا الحد
شاكر لك مرورك الكريم اخى العزيز
وجمت بكل الود
محمد الجزولى
15-08-2009, 04:26 AM
ود الجزولي فكرة و فن و هندسة
أبتدعت و الله في تصوير ظاهرة بدأت في الإنتشار في مجتمعنا السوداني
و في أعتقادي أن الارتفاع الكبير في المستوى المعيشي و في دخل بعض الأسر
هو الذي جعلهم يلجأون إلى أستقدام خادمة أجنبية بعد أن كان الأمر لا يتعدى حدودنا الشرقية
و أتفق مع من قال بأن الأمر لا يخلو أيضا ً من البوبار في شقة الإيجار و أيضا ً الفشخرة و فك الزرار
قد تكون هناك حوجة لخادمة عند بعض الأسر و لكن يجب أن يقتصر دورها على أعمال محددة
فمثلا ً من الخطأ أن يتم إسناد مهمة تربية الأطفال إلى الشغالات كما يحدث عادة في دول الخليج
لأن هذا الأمر له مسالب كثيرة تحدث عنها الكثيرون في المنتديات و و سائل الإعلام المختلفة
و تأخذ الظاهرة شكل سلبي أكبر عندما تكون تقليد أعمى كما ورد في هذا البوست


الرائع محمد النور
نورت المكان
واتفق معك عزيزى فى كل كلمة قلتها
فالظاهره لا تعدو ان تكون ( بوبار ساكت)
شاكر لك مرورك الكريم عزيزى محمد النور
محمد الجزولى
15-08-2009, 04:41 AM
ود الجزولي كالعادة تحفة من الواقع ...
بس القصة انا واخوان كثيرين محتاجين نطبعها بخط جميل ونبروزها ونعلقها في البيت عشان تكون حجاب ضد الخدامات .. اكيد اي زوجه حاتقراها تشيل فكرة الخدامة من راسها خالص والعندها راح تسفرها في اقرب طائرة .. وعباس الدسيس عندو قصص واقعية مع الخدامات .. نطلبها منه لو ما جابها هنا ... هو عندو حيل كثيرة ساعدته في عمل مناعة ضد الخدامة في البيت .. لكن حلوله كانت مؤقته وتاثيرها راح بعد فتره قصيرة ...

الرائع درديرى كباشى
لك التحيه والاحترام
وجودك هنا له نكهه خاصه
فانت الاديب الاريب
صاحب القلم المدهش
تسلم اخى الدرديرى على مرورك الكريم
محمد الجزولى
15-08-2009, 04:47 AM
ود الجزولي متشكرين علي السرد الرائع لمعالجة ظاهره غريبة علي المجتمع السوداني زي ما قال الدرديري انا قبل كده نزلته بوست بس بي طريقه تانية:
http://wadmadani.com/vb/showthread.php?t=24787

عزيزى عباس الدسيس
اهلا بك هنا ايها الرائع صاحب القلب الذهبى
وجود ك هنا اضفى لمسه جماليه على هذا المكان
ولك العتبى حتى ترضى اخى عباس اذا كان هذا البوست اتى مشابها للبوست الذى ذكرته
فدائما ما نستقى افكارنا من كلماتكم
وانت السباق دائما صاحب الفكر الذى لا يضاهى
لك اعتذارى مرة اخرى اخى عباس ... ارجو ان تقبله ..
الاميره
15-08-2009, 08:33 AM
صحي زي ما قال المثل ... يا مأمنة للرجال ... بس سؤال ليكم كلكم المتداخلين ... واولكم ام قبس ... الشحدت ربها اي وحدة تجيب شغالة وتتفشخر ... راجلا يدبل فيها ... سؤالي ... انت بتنتقدو وجود شغالة اجنبية من دول شرق اسيا ؟... ولا بتنتقدو وجود شغالة بصفة عامة؟... اكيد بتنتقدو الشغالة المن شرق اسيا بس صح ؟... طيب البيوت السودانية ... طول عمرهم شغل البيت بيشتغلوهو الشغالات ومن زمااان الكلام دا ... اقل بيت وابسط بيت ... بجيب البت باليوم والولد باليوم ... بيشتغلو شغل البيت كااامل ... من غسيل عدة ... لي غسيل ملابس ... لي نظافة ... لي مكوة ... حسي الفرق شنو ... ان الشغالة بقت اجنبية ... من شرق اسيا ... واقوم الراجل يتزوجها ... دي فراغ عين ساااااي ... وهو عارف ما حا يستمر الزواج دا ... بس اذا فكرنا شوية ... حا نلقى ان موضوع الشغالة دا عادي جدا مافيهو اي فشخرة لانها حاجة قديمة عندنا في السودان ... الماعادي فراغ عين الرجال ...


القصه ياختى فى شكل الشغاله من شرق اسيا ..بيضاء ..وشعرها مسبسب.. ومهندمه ..يعنى زى العروسه..
ومساك الله بالخير..
محمد الجزولى
22-08-2009, 12:24 AM
[b][size="4"][color="red"]هجمة متردة

لدينا بودربيعة { اقرباء اثنين } تجاوز كل واحد منهما الخمسين عاما
والله حينما ياتون لأي مناسبة
لا أحد يشرب القهوة عند ناس المناسبة
الا حينما تأتي زوجته للمناسبة وتقوم بعمل القهوة له
الحلة كلها تعرف ذلك
والمشكلة نسوان ناس ابوحراز ومن لف لفه يعتبرون هؤلاء مضرب مثل
قلنا ليهم ياجماعة ديل مابيدخلن خدامات بالبيت
انتبهن الى بيوتكن 00 حقاً 00 والله
لم اقل هذه الصرخة
الا للوضع الإجتماعي والحكاوي التي اسمعها
نعم لنساعد الآخرين
ولكن وفق ضوابط !!!!

الرائع ابو حراز
رمضان كريم وتصوم وتفطر على خير
دائما ما تعطى مداخلاتك بعدا اخر للبوست الاصلى
تعجبنى جدا افكارك المرتبه
دمت بالف خير اخى ابو حراز
محمد الجزولى
22-08-2009, 12:26 AM
القصه ياختى فى شكل الشغاله من شرق اسيا ..بيضاء ..وشعرها مسبسب.. ومهندمه ..يعنى زى العروسه..
ومساك الله بالخير..

شكرا اختى الاميره على الاضافه
ودمتى بالف خير اختى الاميره
ود الجعلي
22-08-2009, 03:02 AM
انا عايزه شغاله وفلبينيه كمان !!! ولو جبتها اندنوسيه يكون احسن !!! صاحباتى احسن منى فى شنو ؟؟؟ ما كل واحده عندها اوطين وبرندتين وبرضو عندهم شغالات!!!
ايوا كده فهمت اللعبة !!! عايزه تتمشخرى مع صاحباتك ؟؟؟ وووو ...
نقاش حاد استمر زهاء الثلاثه ساعات بين سعاد وزوجها كانت الغلبه فيه للزوجه واقتنع على بفكرة الاتيان بخادمه تساعد زوجته فى اداء اعمال المنزل... وبعد بحث مضنى عاد على الى منزله وبصحبته خادمه قدمها الى زوجته قائلا:
ابسطى يا مره !! الشغاله جات اهى !!!! اتفشخرى زى ما عاوزه !!!!
ده شنو ده يا على ؟؟؟!!! دى منو الجايبه دى ؟؟؟؟
دى الشغاله يا سعاد ؟؟!!!

محمد الجزولي المبدع الرائع من زمان بفتش ليك ما لاقيك

عموما نسجك للقصة فيهو حرفية عالية و تتابع الافكار سلس و المقدرة على الحبكة القصصية عالية واقتراب كبير من الواقع يبهر القاريء بجماليات التصوير ودقة الوصف


نصيحتي لك ان تواصل وتجمعها في كتاب وتكون لاكبر عدد من القراء

والفشخرةفي الخدامات دي يا ود الجزولي ما بعرف عنها حاجة حاجة لانو لي تلاتة سنوات من السودان

لكن الحاجة العارفها نحن السودانيون شينين وسود ودشنيين

عشان كده عادي ممكن تلقا الخدامة احلى واكثر بياضا" من ست البيت

وهذا ما يفضله الرجال
ولك محبتي
محمد الجزولى
29-08-2009, 02:27 AM
انا عايزه شغاله وفلبينيه كمان !!! ولو جبتها اندنوسيه يكون احسن !!! صاحباتى احسن منى فى شنو ؟؟؟ ما كل واحده عندها اوطين وبرندتين وبرضو عندهم شغالات!!!
ايوا كده فهمت اللعبة !!! عايزه تتمشخرى مع صاحباتك ؟؟؟ وووو ...
نقاش حاد استمر زهاء الثلاثه ساعات بين سعاد وزوجها كانت الغلبه فيه للزوجه واقتنع على بفكرة الاتيان بخادمه تساعد زوجته فى اداء اعمال المنزل... وبعد بحث مضنى عاد على الى منزله وبصحبته خادمه قدمها الى زوجته قائلا:
ابسطى يا مره !! الشغاله جات اهى !!!! اتفشخرى زى ما عاوزه !!!!
ده شنو ده يا على ؟؟؟!!! دى منو الجايبه دى ؟؟؟؟
دى الشغاله يا سعاد ؟؟!!!

محمد الجزولي المبدع الرائع من زمان بفتش ليك ما لاقيك

عموما نسجك للقصة فيهو حرفية عالية و تتابع الافكار سلس و المقدرة على الحبكة القصصية عالية واقتراب كبير من الواقع يبهر القاريء بجماليات التصوير ودقة الوصف


نصيحتي لك ان تواصل وتجمعها في كتاب وتكون لاكبر عدد من القراء

والفشخرةفي الخدامات دي يا ود الجزولي ما بعرف عنها حاجة حاجة لانو لي تلاتة سنوات من السودان

لكن الحاجة العارفها نحن السودانيون شينين وسود ودشنيين

عشان كده عادي ممكن تلقا الخدامة احلى واكثر بياضا" من ست البيت

وهذا ما يفضله الرجال
ولك محبتي


عزيزى ود الجعلى
اولا حمد لله على السلامه وبركه الجيت ..... بركه الجيت

ثانيا تجدنى غى غاية الاسف لتأخرى فى الرد عليك وذلك لظروف قاهره منعتنى من الخول للمنتدى
عزيزى ود الجعلى
جميل جدا ما سطره قلمك فى حقى
فهى شهاده اعتز بها خاصه وانها تأتى من مثلك يمتلك ناصية الحرف ووضوح الفكره
لكن والله يا ود الجعلى رغم شناتنا وسوادنا لكن حلوين حلاوه ما عاديه فى عيون بعض
والفشخره الفاضيه فقط هى ما تؤدى الى نتيجه عكسيه
تسلم اخى ود الجعلى على مرورك الرائع ودمت بكل خير