يا حليلنا .......! [الأرشيف] - منتديات ودمدني

شبارقة

30-07-2009, 12:04 AM

السلام عليكم ورحمة الله
كل ما أخش منتديات ودمدني ، بجيني احساس الزول الزمانو فات وغنايو مات :d
بستشعر على طول كرمشة والوش ...
وآلام المفاصل ...
والعكاز ......
ويا ولد جيب الأبريق ...!.!.!.!.!.!.!
وياااااااااااااحليلنا ....
أخش القى واحد ...
وبالكتير اتنين من ناس زمان ....
واطلع ولسان حالي يقول:

مشيت حفيان
على حر الجفا النشفان
وزاد خشم المحنّة غباش
يباس جوفو الصبح عطشان
براي حزنان
على زمناً مرق ما جا
أفتش في الدروب شقيان
درب قمراً فقدت سنا
أفتش وفيني حس عشمان
أقول امكن يجي وألقا
وفيني من الحزن ألوان
ومن سكك الجفا العوجا
ومن جسر الوصال الكان
رباط للخير هناك وهنا
حليلن طلة الحبان
ولمة ناس فريقنا عشا
حليل لمن يجو الضيفان
وينزلو خير، بشاش ورخا
***
فقدت زمان
ما ظنيت يعود يرجع
ولا عاد في سمانا سطع
ولا ريحة الدعاش ضوّع

فقدت زمان
محيّن بالمطر غيمو
وبرقو على فريقنا شلع
وَفد لي خير نداهو الطير
وفوق خضرة رواهو رتع

ويا زمناً مشيت ما جيت
ويا زمن المحنّة قسيت
وما حسيت
وكت ما الزول يفارق الزول
وما عانيت
فراق ناساً
مقامن في الضلوع والروح
فراقن زي طلوع الروح
ولو ما جيت
أبعت لي سمح ذكراك
عشان بالحيل معلّق بيك

أبو جودي

30-07-2009, 12:14 AM

يعني يا شبارقة قاصدنا عدييييييييييييييييييل ولا شنو ،،،،،،،، خلي الطبق مستور ،،، وإنشاء الله كل ما تدخل تشوف الجديد الشديدددددددددددددددددددددددددددددددد.

بنت الرفاعي

30-07-2009, 12:38 AM

:confused::confused::confused:
:eek::eek::eek:
شخصيا ؟؟؟؟؟؟
عارف كلامك ده كان قلتوا قبل فترة بيني وبين نفسي لما غبت عن المنتدى فترة وجيت لقيتو ( أنسى بس ) المهم طبعا بيجيك إحساس التوهان وكدة , المهم مع الأيام وشوية شوية بإحساس ال 2 أو 3 اللي من ناس زمان , بقيت أتعود على الوضع , وكل مايدخل البيت ضيف يوم يومين تلقى ببقى زول بيت ظريف وتمام , علشان كدة أرجع ساي , وصدقني الأعضاء الجديدين عليك ديل كلهم ماشاءالله فيهم الإبداع والروعة , وتعال داخل علشان تزودنا من إبداعاتك .:)

المسافر

30-07-2009, 12:44 AM

منو
الشبارقة أخوي
يا حليلك يا عشى البايتات

كده أول شيء جيب لي النضارة
دي النشوفك كاتب شنو ؟؟؟؟؟

آآآآآآآآآآي كلام صاح يا أخوي
وكمان تحت تحت كده قاعدين
يقولوا علينا ( مراحيم ) و ( من الأمس ) !!!!!

ابوالنور

30-07-2009, 01:01 AM

عاد كيفين الكلام ده يا اللخو ما اهو انحنا منصنقرين لسة
ياخي ليك وحشة وحاة الله

شبارقة

30-07-2009, 01:15 AM

يعني يا شبارقة قاصدنا عدييييييييييييييييييل ولا شنو ،،،،،،،، خلي الطبق مستور ،،، وإنشاء الله كل ما تدخل تشوف الجديد الشديدددددددددددددددددددددددددددددددد.

والله يا ابوجودي ما قاصد زول ...
علا أهو دا الوضع ...
حبابك يا ولدي ... انت ود منو دحين؟؟

شبارقة

30-07-2009, 01:16 AM

:confused::confused::confused:
:eek::eek::eek:
شخصيا ؟؟؟؟؟؟
عارف كلامك ده كان قلتوا قبل فترة بيني وبين نفسي لما غبت عن المنتدى فترة وجيت لقيتو ( أنسى بس ) المهم طبعا بيجيك إحساس التوهان وكدة , المهم مع الأيام وشوية شوية بإحساس ال 2 أو 3 اللي من ناس زمان , بقيت أتعود على الوضع , وكل مايدخل البيت ضيف يوم يومين تلقى ببقى زول بيت ظريف وتمام , علشان كدة أرجع ساي , وصدقني الأعضاء الجديدين عليك ديل كلهم ماشاءالله فيهم الإبداع والروعة , وتعال داخل علشان تزودنا من إبداعاتك .:)

سمح يا مرام يا بتي ...
هو انتي لسه قاعدة بالله .... يا حليل ايامك...!

شبارقة

30-07-2009, 01:17 AM

منو
الشبارقة أخوي
يا حليلك يا عشى البايتات

كده أول شيء جيب لي النضارة
دي النشوفك كاتب شنو ؟؟؟؟؟

آآآآآآآآآآي كلام صاح يا أخوي
وكمان تحت تحت كده قاعدين
يقولوا علينا ( مراحيم ) و ( من الأمس ) !!!!!

منوووووووووووووو
ناس المعاشات ...
ياحليلك يا المسافر يا بوي ...
أها اسمعني:
جيب ليك طربيزة خلي ندور الضمنة في ضل النيمة ديك وكت بقينا من الأمس.

شبارقة

30-07-2009, 01:19 AM

عاد كيفين الكلام ده يا اللخو ما اهو انحنا منصنقرين لسة
ياخي ليك وحشة وحاة الله

أبو النور ....
إإإإإإإإإإإإييييييييييييييييييي
والله ليك وحشة ..
لي هسي ناسك البتراقصو متل بانة الطريفي ديل ما قعدوا ؟؟؟
تعال عندنا طربيزة ضمنة ..............

العاقب مصباح

30-07-2009, 01:26 AM

الرائع شبارقة

وكيف ترفض رجوع القمرا لى بلد القمارى

منور والله

وليك طلة مميزة كعادتك

هلا بيك يا غالى

المكاشفى

30-07-2009, 02:05 AM

الكتراااااااااااااااااب الفيك
سمعت الخبر طشاش والجماعه اكدوه لى بى طلاقات
اها الحجه ضربت تانى جيه شبارقه دى وراها سر
شبارقه ده يكون الا كفيلو مات اتوفى تب خت راسو صعيد
الجماعه قالو لى مامات
قلت يمين مات
قالو كان مات ماكان سمعنابو فى نشره عشره
قلت ليهم يكون سبلو
لكن ان ما مات شبارقه دا مابلقى فرقه يجيكم
الناس قالو كفيل شبارقه والعهده على الراوى
قالو مَعَدَلْ المعنى رابط كرونه كلب
وحوام زى غنمايه التايه بت وكيل الله
ونباح زى فاطنه بت على يمين مره بايت عندهم
قلت للجنى صاحبى امرقنى ياخوى كجنت الجيه ليكم
قالى انا ماوريتك انت براك كايس المحنه دى عالم يحنولها

اها فكركم كفيل زى دا اصلو ماشفنا
بخلى شبارقه يظهر

منو المستشار شبارقه
والله ياجنا مشاركه زى دى لى زمن ما كتبتها
ويمين بالله المكان دا بقيت بجيهو زى غفير الترعه
راكب فى حمارى مابنزلنى الى الشديد القوى
فرحت بى جيتك يالحبيب وعل المانع خير
والعرس بتين؟؟؟
والعروس لقوها؟؟؟
اها الشيله كم كم؟؟
دفعتو متكفى؟؟؟
اها راجينك لكل ده؟؟

أبوبكرحامد

30-07-2009, 08:03 AM

مشيت حفيان
على حر الجفا النشفان
وزاد خشم المحنّة غباش
يباس جوفو الصبح عطشان
براي حزنان
على زمناً مرق ما جا
أفتش في الدروب شقيان
درب قمراً فقدت سنا
أفتش وفيني حس عشمان
أقول امكن يجي وألقا
وفيني من الحزن ألوان
ومن سكك الجفا العوجا
ومن جسر الوصال الكان
رباط للخير هناك وهنا
حليلن طلة الحبان
ولمة ناس فريقنا عشا
حليل لمن يجو الضيفان
وينزلو خير، بشاش ورخا

حباب زولاً وكت إرجع إجيك متوشح الأوزان
حباب ضو القبيلة نورو يعم البوادى والسهلان
ديوانك آلدخرى تب ما انقفل ديمة مزدهى بى الضيفان
صحى العمر جارى ألهى إختمو بى حسن إيمان
أرقد قفا الدار عمرانة بى شباناً مزدانين بى وعى وحب أوطان

فى العام تشوف إبداعات والفنون ألوان
فيهو عقبة - قرجة - دسيس - عولى - حاتم وود مدثر عبدالرحمن
نون بت أبوحراز عيد ميلادا تصور كان بلسم شافى للعيّان
كان فى عنبر مسك أنفاس أطفالوا عبّق الأكوان

وكان ياما كان فى ودمدنيات ودالصول عندو دكّان

بى الشعر والنثر الثقافى منيف كما الإيوان

فى مناسباتنا للفرح نتبادل ونتشاطر الأحزان

شبارقة

31-07-2009, 10:48 PM

الرائع شبارقة

وكيف ترفض رجوع القمرا لى بلد القمارى

منور والله

وليك طلة مميزة كعادتك

هلا بيك يا غالى

حباب العاقب ...
الدار والله منورة بيك ...
وليك وحشة والله ...

شبارقة

31-07-2009, 10:54 PM

منو المستشار شبارقه
والله ياجنا مشاركه زى دى لى زمن ما كتبتها
ويمين بالله المكان دا بقيت بجيهو زى غفير الترعه
راكب فى حمارى مابنزلنى الى الشديد القوى
فرحت بى جيتك يالحبيب وعل المانع خير
والعرس بتين؟؟؟
والعروس لقوها؟؟؟
اها الشيله كم كم؟؟
دفعتو متكفى؟؟؟
اها راجينك لكل ده؟؟

هههههههههههههههههه
كشكشة حبيب قساي ...
يا حليلك آ المبروك ...
والله لكن رصيت لي جنس كلام !!
أرد على شنو وأخلي شنو ؟؟؟
والله نحمد الله بعد علوية بت الحاج ماتت لقيت العروس ..
والعرس قريب ان شاء الله ..
وان بقيت ما جيتني في عرسي بزعل منك زعل بت ود المكادي لمن سرقو (الزيزي) حقتا في الجامع ...
أها وكت الله جابك انزل تب وشوف ليك (بربندي)اربط حمارك دا واجدع ليهو (كليقة قصب) وتعال نتونس شوية.

شبارقة

31-07-2009, 11:03 PM

حباب زولاً وكت إرجع إجيك متوشح الأوزان
حباب ضو القبيلة نورو يعم البوادى والسهلان
ديوانك آلدخرى تب ما انقفل ديمة مزدهى بى الضيفان
صحى العمر جارى ألهى إختمو بى حسن إيمان
أرقد قفا الدار عمرانة بى شباناً مزدانين بى وعى وحب أوطان

فى العام تشوف إبداعات والفنون ألوان
فيهو عقبة - قرجة - دسيس - عولى - حاتم وود مدثر عبدالرحمن
نون بت أبوحراز عيد ميلادا تصور كان بلسم شافى للعيّان
كان فى عنبر مسك أنفاس أطفالوا عبّق الأكوان

وكان ياما كان فى ودمدنيات ودالصول عندو دكّان

بى الشعر والنثر الثقافى منيف كما الإيوان

فى مناسباتنا للفرح نتبادل ونتشاطر الأحزان

حباب ود حامد ، مطر الخيرسان،مطمورة الدرت، ضرغام الرجال، سيد الطاحونة، السوطو وروير، جملوا الهدير ، جلابية الحرير ...
كل التحية والتجلة والتقدير ...

بنت الرفاعي

01-08-2009, 12:57 AM

سمح يا مرام يا بتي ...
هو انتي لسه قاعدة بالله .... يا حليل ايامك...!

عاد أمشي وين يا أبوي ماعندي بيت غيرو , بالرغم من إنك وبعض أخواني مشيتو وخليتونا , برضو بتلقاني قااااعدة;)

أها ماقلت لي إتذكرتنا كيف وجيت زرتنا؟؟:rolleyes:

عثمان جلالة

01-08-2009, 02:14 AM

عناق ام سومر البرعاها فوق للفودة
في غابة القرنفل تلقاها ضاربة بلودة
بتتوسد حرير والصندلية برودة
ما شافت شمس من القمر ميرودة

الجاهلة جابت نارا في كانونا
سوت جبنة بي زوق نضفت ماعونا
نضاف فنجانا حاكى سنونا
وكتين كبت البن فيهو حاكى عيونا

أنا التوب العشاري الباهي زيكو
و انا الدابي ان كمن للزول يعيقو
انا فراج الرجال وقتين يضيقو
و انا المامون علي نسوان فريقو

شبارقه والله فاقدنك تب .. ومكانك ما بنسده .. كدي أشرب ليك فنجان قهوة من البت الـ فوق دي .. وتعال ورينا خبرك؟؟

المكاشفى

01-08-2009, 06:03 AM

هههههههههههههههههه
كشكشة حبيب قساي ...
يا حليلك آ المبروك ...
والله لكن رصيت لي جنس كلام !!
أرد على شنو وأخلي شنو ؟؟؟
والله نحمد الله بعد علوية بت الحاج ماتت لقيت العروس ..
والعرس قريب ان شاء الله ..
وان بقيت ما جيتني في عرسي بزعل منك زعل بت ود المكادي لمن سرقو (الزيزي) حقتا في الجامع ...
أها وكت الله جابك انزل تب وشوف ليك (بربندي)اربط حمارك دا واجدع ليهو (كليقة قصب) وتعال نتونس شوية.

الحبيب والله الشوق بحور
وانا فى اللحظه ديك اتيخر من عرسك ات المبروك
يمين كان شغال اشوف لى صرفه
وهاك يالصقريه وهاك يالسوط جنس كبسى

سمح نازل تب هاك آجنا اكرب الحمار داك فوق الشايه ديك
واجدعلو كليقه قصب والسرج ده دخلو المخزن شايف المطره
دى شاااايله ... ارح ياحاج طلب دور الجبنه واها
ماقلت لى انشاءالله عافيه غايب الفتره دى كلها
تظهر مع الحساب الفردى بس؟؟؟؟

littlestar

01-08-2009, 06:27 AM

شبارقة
الزول الكباره
كدى خت الرحمن فى قلبك
وقول بسم الله
ونزل عكازك ده
وصنقر فى واطتنا دى
كدى ال نشد جبنتنا ونجيك

تصدق والله مشتاقين لبلسم حروفك
وراجيين كل الشمارات مع حبيب الكل كشه

moh_alnour

01-08-2009, 07:51 AM

مساء الخير على ناساَ وجوهم جد فرايحية
و ذكراهم ترد الروح مع النسمة المسائية
إذا عربد معانا الشوق وأصبح فينا نار حية
حضوركم إنتو لينا ملاذ يعيد لينا الصلاحية
الحبيب شبارقة : علم على رأسه نار و رقم من أرقام المنتدى التي لا يمكن أن تُخطؤها العين
مكانك في القلب و الوجدان و ذاكرة المنتدى المليئة بقصائدك النونية و طيب مشاركاتك
يا حليلك يا زول سمح و يا حليل نوناتك الفي وجناتك و يا حليل جرايدك الفي العام

أبو جودي

02-08-2009, 01:09 AM

أخي شبارقة ،،،، أنا ما قلت ليك بتلقى الجديد ،،،،،،،،، أهو أنا واحد من الناس ،،، ديل ،،،، وكان عاوز تعرفني ،،،،،،، أنا ،،،، من ناس شعبان ،،،، وحتقول لي ناس منه ،،،، أنا من ناس القبة البقنوا ليها ،،،،،،،، تحتها الشجر كابي "سعدابي" ،،،،،،،،، وكان داير أزيدك ،،،،، أنا من ناس الخانجي،،،،،،،،، وكان داير أزيدك ،،،،،،، أنا من ناس مدني وكل ناس مدني ،،،،،،، ديل أهلي ،،،،،،،،،،، لك عاطر تحياتي ،،، أخي شبارقة ،،،، ومن المداخلات الكثيرةةةةة دي ،،،،، عرفته أنك ،،،،،،،،،،،، من الناس القديميييييييييييييييييييين ،،، وحمد لله على السلامة ،،،، وكدي النشوف جديدك،،،، مع تحياتي

نزار حسن محمد

02-08-2009, 01:17 AM

مرحب بالعضوء شبارقه انا من الاعضاء الجدد ممكن نتعارف

المكاشفى

02-08-2009, 11:39 AM

مرحب بالعضوء شبارقه انا من الاعضاء الجدد ممكن نتعارف

جدا ياسيدى
ليى مانتعرف
هو انا لاقيا العرف
ولا العرفى
هى لا
اتعرف قصدى
انا
البتول بت على ود وكيل الله
وبدلعونى بقولو لى البتيله
وكلن غلبك قولى بوتى
اللخو منو ؟؟
ساكن وين ؟؟
بتلبس جنز ولا تى شيرتات ساااااااااى
اللخو مالو ظاهر باللبس القومى ياى
انت بلدى خالص؟؟

بئد البحر بى شويه ماهفروهو نزار ود حسن كبس؟؟؟

شبارقة

05-08-2009, 10:18 PM

عاد أمشي وين يا أبوي ماعندي بيت غيرو , بالرغم من إنك وبعض أخواني مشيتو وخليتونا , برضو بتلقاني قااااعدة;)

أها ماقلت لي إتذكرتنا كيف وجيت زرتنا؟؟:rolleyes:

المره ادتني 10 دقائق فسحة ، جيت (هابر) بي جاي (فللي) ...
أها يا مرام لو غلبك مصطلح من المصطلحات دي أغشي المكاشفي يوريك ....
كدي كبي لي فنجان جبنة ، قالوا جبنتك كااااربة ...

شبارقة

05-08-2009, 10:19 PM

شبارقه والله فاقدنك تب .. ومكانك ما بنسده .. كدي أشرب ليك فنجان قهوة من البت الـ فوق دي .. وتعال ورينا خبرك؟؟

جلالة سمح القول ، حالي الكلام، خاتي الملام ، عشا البايتات ، مقنع الحوبات، صنديد الرجال ...
الخبر من مشيت منكم يا الليلة إياهو الخبر ... بس ......
ليكم وحشة والله ...

شبارقة

05-08-2009, 10:22 PM

تظهر مع الحساب الفردى بس؟؟؟؟

المكاشفي آخوي نحن بيناتنا حساب فردي ولا زوجي ؟؟؟
أختر على المطورة الليلتنا ، و خم قدر خرجك البهيل ، وحمارك ما يشيل ...
أها ما كلمتني آزول خبر الصعيد شنو ، نعل ما ضربتو الصبنة؟؟؟
ولا ممطور مطرنا؟؟؟

شبارقة

05-08-2009, 10:27 PM

تصدق والله مشتاقين لبلسم حروفك
وراجيين كل الشمارات مع حبيب الكل كشه

يانجمنا الصغير ....في صدر السماء تربع
بيني وبينك فرجة الشوق العظيم المترع
يا برقك الوضاء دون الكواكب، والكواكب لمّع
شوقي تفرق في الجهات الأربع ..

شبارقة

05-08-2009, 10:32 PM

شاركاتك
يا حليلك يا زول سمح و يا حليل نوناتك الفي وجناتك و يا حليل جرايدك الفي العام

الزول ان كبر محكوم، و ليهو أحكامو
ان بقى في الجرايد، اتشرطت أيامو
وان بقى في الكلام ، ما بيسمعوهو كلامو
بس قولت سلام ، لو ردو ليهو سلامو ...!

ازيك يا ود النور، والله ما شاء الله عليك ، مازلت ممسكاً بجمر القضية ، فلك التحية

شبارقة

05-08-2009, 10:35 PM

أخي شبارقة ،،،، أنا ما قلت ليك بتلقى الجديد ،،،،،،،،، أهو أنا واحد من الناس ،،، ديل ،،،، وكان عاوز تعرفني ،،،،،،، أنا ،،،، من ناس شعبان ،،،، وحتقول لي ناس منه ،،،، أنا من ناس القبة البقنوا ليها ،،،،،،،، تحتها الشجر كابي "سعدابي" ،،،،،،،،، وكان داير أزيدك ،،،،، أنا من ناس الخانجي،،،،،،،،، وكان داير أزيدك ،،،،،،، أنا من ناس مدني وكل ناس مدني ،،،،،،، ديل أهلي ،،،،،،،،،،، لك عاطر تحياتي ،،، أخي شبارقة ،،،، ومن المداخلات الكثيرةةةةة دي ،،،،، عرفته أنك ،،،،،،،،،،،، من الناس القديميييييييييييييييييييين ،،، وحمد لله على السلامة ،،،، وكدي النشوف جديدك،،،، مع تحياتي

أبوجودي كيف حالك ، وان شاء الله طيب .... وكيف العقاب والأهل جت ........ وسعالات كتيرة لي آخرة المطايبه ...
الله يسلمك ويسلم أيامك ويبارك فيك ...
اشكر مرورك ولك كل التحية ... وتقبلني صديقاً جديداً(قديماً) لك ...

شبارقة

05-08-2009, 10:37 PM

مرحب بالعضوء شبارقه انا من الاعضاء الجدد ممكن نتعارف

هي يااااااااااااااااااا خالتي مدينة ...
انت يا ودحسن من حفرو البحر ....
لي الليلة قاعد .....؟؟؟
مخير الله ومختار السيد ...
لكن ما ليك وحشة ...!
تعال في طربيزة الضمنة ، عارفك زي كل مرة (بتقفلها طرشاء) :d

عوض الكريم الخواض

05-08-2009, 11:13 PM

مساء الخير على الناس القُدَام ... ;)

ناس الفزعة دايماً فى الخُطُوب قِدَّام ...

الزول الكلس فوق الضيوف مابْنَام ...

شبارقة الخير سَطَعْ ... شوفتك صِبْحَتْ علينا وِسام .

أها رأيك شنو فى النجرة دى يا شبارقة...
دحين دى بنجرا زول جديد .

شبارقة

08-08-2009, 01:42 AM

مساء الخير على الناس القُدَام ... ;)

ناس الفزعة دايماً فى الخُطُوب قِدَّام ...

الزول الكلس فوق الضيوف مابْنَام ...

شبارقة الخير سَطَعْ ... شوفتك صِبْحَتْ علينا وِسام .

أها رأيك شنو فى النجرة دى يا شبارقة...
دحين دى بنجرا زول جديد .

قولة زول فصيح عارف الكلام ، نضام
غرقان تب بشاشة وللخلق بسام
عتيق يا العويضة أخوي وفي القُدام قِدام

عصام الدين عموش

08-08-2009, 10:26 AM

السلام عليكم أولاً ..

إنت يا شبارقة تغيب على كيفك زيي بالسنين وداير الدار تكون هي الدار
ديل الشفع الخليتن صبحوا كبار وأصحاب دار .. واللمة القبيل في النسمة والهبابي صبحت في زمنا غبار ... وينك يا شبارقة ووين أيامك .. كلامك افتقدناه كأنك تغسله قبل أن تكتببه وددت لو كان كل جسدي في يدي لصافحتك بحرارة الرؤيا وشوق اللقيا وتباريح الفراق

المشتاق لك دوماً عموش ..

للتواصل: 0565270632

ام قبس

08-08-2009, 10:48 AM

انا جديدة في الجدادة جديد
سيد ريدي القلم عاشقاه بحبه شديييييييييييييد
مابعرفك ياشبارقة اكيد
بس عشان منتدانا بقولك بركة الجيت
وكان مارحبت بينا انت يالصنديد
مالينا قعادا فيه يالرايك قويم وسديد

خالد 000 ابقرجة

08-08-2009, 01:56 PM

اها فكركم كفيل زى دا اصلو ماشفنا
بخلى شبارقه يظهر

شبارقة الكلس ولدا رزين بالحيل
نوارة منتدانا سارج الكلام زي خيل
تراس الدميرة عشاي ضيوف الليل
ماهو التكيسة البقلق منامو كفيل

شبارقة سيد المجادعة
وديوان علي خفيييييييييييييف

كشة ذكرني الكفيل
وجدعة رميتا ليك هنااااك في مجادعتك العجيبة
قاعدة في ركن نافوخي لسع

سائلين منك ويوماتي رحيل
وبلغنا عنك شرطة العاقب

http://www.wadmadani.com/vb/showpost.php?p=303046&postcount=56

علا يا للخو
صحي قالو النسي قديمو تاه
بس دحين خياتك الجنيات الجداد الزينا ديل
عايز تبقي عليهم جدادة الحلة الطردت شبارقة المنتدي

ما تخلينا نصدق حبيب الكل ويكون الكفيل حاميك الجية
وبتدور تدرعا فينا
أبقا داخل

نحنا دفعة 2008
السرحوهم مع السيل
وسعوهم (جداد) في 2009

راجينك في الكريبة

وكريبة منتدانا مستنية جديدك زي ما قالك ابو البنية