حملة للتبرع بالكلام

[درديري كباشي]

عشان انا بيكم ماليني الكلام
وعشان شاعر بطخمة في الذاكره
وعشان تتعلموا الغفران
وعشان ما في سبب
قررت انه افتح بوست للكلام الزايد في ذاكرتي وافضفض واهلوس واهضرب قدر ما اقدر وبكل اللغات واللهجات الفصحى والعمية .. وبعربي جوبا وبعربي الخرطوم وعربي دبي .. ذلك الذي تغلب عليه البهارات الهندية من نوع (سديق انت في سيمسيم انا انت ما في مسكله )
واضيف انه انا ماطالب منكم مجاملة . ولا بلوم من لم يزورني ولا من قرا ولم يعلق . غير انه اسمحوا لي افضفض واهضرب وانا اتعهد بانه هضربتي لا تتجاوز حدود اللياقه ومكانة المنتدى ..

توجد في حياتنا كثير من المواقف والقصص .. لن تجد لها مكانا او عنوانا لزجها لوحدها.. لكنها تتحكر في الذاكره وتتخذ لها مكانا وحيزا ... انت تحتاجه لكتابة امعلومه مهمة ..

وللراغبين في مواصلة هذا البوست اذكر بانه انا سافصل بين المواقف بعدة نجوم حتى لا تتداخل الامور في بعضها .. واضيف انه هذا الكلام الذي اكتبه حاليا .. هو مني للمنتدى مباشرة .. بمعنى لم يكتب قبل ذلك ولا حتى على الورد كعادتي دائما في الكتابة حتى استفيد من ميزات ورد في تصحيح الاخطاء ... لكن هذا الكلام بالذات اردته ان يكون سخنا غضا طريا .. وايضا هذا لا يعني باني لن ابحث في مذكراتي واجلب ما لا اجد له عنوانا ولا يستحق ان يكون موضوعا منفصلا لحاله ..

ويمكن نبدا :

• عندما كنا تلاميذا في الصف الخامس الابتدائي كان يدرسنا ماده ما تعرف بالتربية الوطنيه هو مدير المدرسة شخصيا . واثناء الحصة طرح علينا سؤالا ما هي السياسة ... وانا بعد رفع اليد وعدة صرخات مشتركة مع زملاء الفصل .... افندي افندي افندي والتي تتحول الى فندي فندي فندي او استاذ استاذ استاذ ... والتي تتحول الى تاس تاس تاس ... ايوة يا كباشي ......... السياسة هي الامور التي تخص الحاكومة ....... رد هو قائلا الحاكومة ولا الحكومة .. قلت الحاكومة ,,, قال ,,, لا الحكومة ... الحكومة الحكومة ... الحكومـــــــــــــه . خلاص الحكومة ..... لينتهي الموضوع الى هنا وانا الى الان رغم مرور عدة سنين على هذا الموقف لم اعرف هل اجابتي كانت صحيحة ام خطا . وهذه ما تعرف بالانصرافية بمعنى ترك الموضوع الاساسي والالتفاف حول الشئ الثانوي وتضيع الحقيقية بين تلافيف هذا الالتفاف .
• تدخل بيت مناسبة دعوة قد تكون داخلها بالصدفة (ضهبا) بعد ما تضرب صحنين كوكتيل يمكن تحضر الفاصل الاول وتبشر على الفناين ... وتسال يا اخوان وين العريس دا عشان نبارك ليه قبل ما نمشي ... يجيك رد .. يا اخينا هي ذاتها ما حفلة عرس دي حفلة نجاح ... (انت عاوز تصلحها ) ما عارفين لكن الشخص الناجح دا ذاتو ما عريس انتو فاكرين المذاكره والقراية ديل هينات؟؟؟ .... لكن هي ما حفلة نجاح امتحانات هي حفلة نجاح عمليه جراحية .... بعد كده ما عليك الا تقش خشمك من باقي البيض المسلوق اللازق فيه وتقود عجلتك وتتخارج بدون ما تتلفت لحد وراك .
• بنتي دينا بعد اول يوم لها قضته في المدرسه رجعت نهاية الدروس تسال ... يا بابا تاني في مدرسة ولا كدا خلاص ..... يا بت انتي قايلاه تطعيم ... يمين تاني يفكك الله بس.
• دينا .... بابا جيرانا ديل جو يباركوا ليك البكا وما لقوك (كان عندنا عمنا توفى رحمه الله).

• الالجن ( الاخنف) يسالوه اها انت مهنتك شنو في بلدك ... انا في بلدي كنت فنان ...... فنان تكشيلي ............لا لا لا فناااااان ... ايوه فنان بتغني يعني .........لا لا لا لا فناااان ...طيب فنان شنو ... يا خي فنان بدخل اللغيف (الخبز) في الفنن يعني .

• طلاطين طلاطة طلاطين ......... فلبيني يعد يالعربي .... كنا شغالين في شركة بالرياض فيها عدد من الفلبينين . يوم ونحن جالسين بالمعرض جا الفلبيني يحمل علبه شكلها راقي فيها نوع من اكلهم الخاص قدمها لي لاخذ منه شيئا وفي ذات الوقت كان هو يمضغ بشكل مغري وشهي في نفس الطعام ... انا رفضت وراح مقدم نفس الاكل لشاب سعودي يعمل معنا في نفس الشركة ... السعودي تناول منه وبدا يشاركه في المضغ والتلذذ بالطعام واثناء الاكل سال الفلبيني ( وشو هذا الاكل ) الفلبيني رد بالانجليزي ( Frogs ) السعودي كان ضعيف في الانجليزي اعاد السؤال لي انا ( وشو يقول يا درديري ؟؟؟) وانا ما ترجمت بسرعة حتى يبلع لقمته اولا وياكل اكبر قدر منها (نظام غتاتة سودانية) ... قلت يقول لك فروق ..قال. اييي سمعت. ويش يعني فروق ؟؟؟؟ قلت : فروق كلمة انجليزية وتطلق على الكائنات الحية التي تعيش في المياة وقرب البرك والتي تسمى ضفادع يا الحبيب ... ويش قلت ؟؟؟؟؟ وعليكم ان تتخيلوا الباقي ....
* بعض المرات تحس انك في حاجة لتاجير شئ اشبه بتاجير العجلات تستخدم للف في الانترنت لانه تحس بانك تلهث وانت تبحث عن موضوع في غياهب النت عن طريق الباحث السري قوقال . مره انا كتبت ابو الدر قلت اشوف هل هنالك ناس بيعرفوني غير الناس البعرفهم . طلع هنالك في النت اكثر من خممسمائة ابو الدر انا لست منهم ولا اعرف أي واحد فيهم . براحة لملمت حريفاتي وكبيتهم في جيبي واتخارجت . والانترت تجعلك تحس بمعنى قوله تعالى(وما اوتيتم من العلم الا قليلا ) رقما عن يقينا التام بان كل ماسجل في الانترت لا يساوى قطره في بحور علم الله . لكن هي ايضا علمتنا التواضع ومدى جهلنا وغرورنا

• هذه المجموعة الاولى من الفضفضة وجايي

[درديري كباشي]

* وبقيت اعاين في الوجوه يمكن الاقي البشبهك

ما الليل براح والشوق تعالي بيندهك

رائعة عز المزار للراحل مصطفى

شوف المعنى بن اللذين دا الشاعر قنعان من وجود محبوبته في مكان معين زي تقول كدا هي في السعودية هو مشى يكابس في الاحفاد مو عشان يلاقيها هي لانه عارفها مافيشه لكن عشان يلاقي واحدة تشبهها تعمل ليه شوية مكمدات لقلبه .

* كنا في الجامعة في الداخلية بجامعة الجزيرة الترفيه الوحيد كان يوم الخميس في سينما اسمها رودي . ولان السينما تقع بين الجامعة وحي شعبي ( حي الدباغة) في مدني كانت الافلام الوحيدة التي تقدمها السينما هي اما هندي او فلم كراتيه . ونحن اضطرينا نكون مدمني احد هاذين النوعين . وحتى سمينا الاكل في السفره الفول سميناه هندي والعدس كراتيه ... اها يا اخوان الليلة الفطور شنو تسمع هندي بالجبنة او هندي بسلطة الاسود . او كراتيه يعني عدس . مره شلة من الاصدقاء قرروا يروحوا الفلم كان فول يعني هندي . وانا كنت تعبان وما مشيت معاهم لكن ما نمت بدري وهم حضروا قريب الساعة اتنين صباحا . وسالتهم من سبب التاخير . واحد فيهم رد لي ياخي البطل ولدوه الساعة اتناشر . يعني لغاية ما اتعلم الرقيص والغناء والكراتيه ويرجع ينتقم من الخيانة كانت الساعة اتنين جات . وانا جاييييي

[درديري كباشي]

امهاتنا الله يطراهن بالخير اتعودن يدعن ابنائهم بكلمات مشتقه من كلامهم نفسه .. لكن هي بالتاكيد من خارج القلب .. يعني مثلا ساكيه مالك الولد دا يسكك الكلب ...بمناسبة يسكك الكلب دي . هل سكاكم كلب قبل ذلك؟؟؟ . انا اعتقد أي شخص تربى ونشا وترعرع في السودان حظى يوما ما بسكة من كلب ما . لان حوارينا في السودان لاتخلوا من بيت فيه كلب كما لا يخلوا بيت الضبع من عظم . وانا عندي عدة مواقف مع مطاردة الكلاب لي واحيانا مطاردتي لها ساروي بعضها واكيد عندكم مثلها . عندما كنت في الابتدائي . ارسلوني للفرن لشراء الرغيف . وانا اشترطت عشان امشي الفرن لازم اسوق عجلة اخي الاكبر . وهي كانت عجلة عالية وانا كنت قصير القامه فلذلك كنت اقودها في مرحلتين مرحلة اولى ابدل شديد . والمرحلة الثانية اجلس في السرج رافعا اقدامي ومستمتعا بدحرجتها الى ان ترخي السرعة واعاود من جديد . وفي الطريق للفرن كان يوجد هنالك ميدان محظور لمن هم في سننا ذلك لوجود كلب اسود ضخم شرس ويعتبر كل ميدان كرة القدم الذي امام بيته منطقة محمية (شوف المفتري ) ونحن كنا نتجنب المرور عبر هذا الميدان . اها انا ذهبت للفرن متفاديا شارع الميدان . وعندما عدت كنت سارحا ومنتشيا ودون ان اشعر دخلت ميدان كرة القدم . وانا في دائرة السنتر بالظبط (شوف الكلب الغطيط انا داخل الميدان ما سالني الى ان توسطت الميدان تماما وكل المساحات اصبحت واحدة . اولا انخلعت على صوت (هو هو هو هو ) وقفت (صداري) وابدل باقصى سرعة عندي وانا ملتفت ناحية الكلب وهو يجري نحوي بسرعة الصاروخ كانه كوره شايتها روبيرتو كارلوس . واخيرا ورغما عن بعد المسافة بيننا في الاول الا انه كاد ان يقضم قدمي . وانا متلفت ناحيته اذ فجاه اصدم جدار المنزل الذي امامي واسقط ارضا وتتدرحج الرغيفات الدائرية في كل اتجاه ( هذه ميزة الرغيف الصامولي ، او التوست او المطاول ما كان اتدحرج في الموقف دا ) وكذلك الفكه باقي المبلغ . وقمت انا يعميني الغضب والكلب نفسه سكت في الاول ووقف يتفرج في بهدلتي الظاهر هو ما كان متوقعها ولا يريدها تصل للدرجة دي . وانا عندما شاهدته ساكت يتفرج تملكني غيظ زيادة وحملت نصف طوبة وسكيت الكلب الى ان ادخلته في بيته لاول مره في حياته منذ ان احتل منا ميدان كرة القدم وخلانا نلعبها في الزقاقات . وقمت وانتفضت والجروح التي اصابتني شفعت لي ولم انال علقة بعد ان احضرت الرغيف عبارة عن سندوتشات تراب ومن غير مايونيز كمان .

[درديري كباشي]

عجبتني احدى حلقات مسلسل الاطفال الكرتوني توم وجيري ......... في تلك الحلقة يوجد فرخ بط صغير يائس من الحياة وعنده وسواس في ذهنه بانه اصبح شخص مكروه ولذلك قرر ان ينتحر . اثناء سيره عثر على القط توم . وعرض عليه عملية اكله ..... في الظروف العادية بالتاكيد القط لن ينتظره حتى يقدم له هذا العرض . ولكن الطرافه في انه القط اصبح يتعزز , وفرخ البط يترجى فيه ويحنسه . وهذا باتسامه الخجل والتواضع يتصنع التمنع . الفكرة اعجبيتني واضحكتني . وتخيلت لو ان الحياة بين البشر والحيوانات كانت مفتوحة ولغة التخاطب واحده . معنا مثلا شخص يائس ومحبط مل الحياة وذهب الى الغابة مقدما نفسه وجبة دسمه للاسد تخيلوا شكل الحوار وخاصة لو كان هذا الشخص سوداني .
الرجل داخل على الغابة اول ما ينظر الى الاسد يذهب ناحيته .
- لو سمحت يا ابو الاسود ممكن تتكرم وتسفسفنا معاك
- الاسد : ابدا واسف جدا عسع ما قبلك بكتير ضارب لي غزالتين وبعدين انت مالك زهجت من الدنيا
- نسوي شنو يا قدنفر ياخ الديون كترت علينا وقرض البنك وسيد الايجار غايتو ما في اي مخرج غير اسنانك الغالية دي .
- الاسد : لكن اشمعنا انا ماشفت النمر ولا الضبع لييه يعني
- يا ابو الاسود ديل شرسين بعدين النمر يخنقك ويطلع بيك الشجره فوق ويحك ليك جسمك بالشوك . اما الضبع انت براك عارفه يبدا ياكل من الكرعين وانت حي تعاين .
- اقول ليك شنو ياخي اعزارك كلها في محلها . لكن انتو السودانيين اكلكم كله ملح يعني ملوحة وتركين وفسيخ . قبل الاسبوع ضربت لي سوداني ضغطي وصل تلتماية من كثرة الاملاح .
- ياخي بلا لبط معاك ما الشوام ديل بياكلوا الزيتون خمس وجبات في اليوم مالهم ما برفعوا ليك الضغط .
-الاسد . لكن ديل مانص استوى يعني ما محرقين ومنضجدين زيكم كدا وبعدين ديل بيغطوا الفارق بالحلويات الكثيرة البيحبوها . اخخخ زكرتني قبل شهر ضارب لي لبناني لي هسع طعمه في خشمي لمن خليت ريقي جرا .
- يعني نفهم من كدا ما في طريقة نتسفسف الليلة .
الاسد : كدي تعالي بكره الضهر لو ما تحلت قضيتك وانا اوعدك ما راح آكل اي حاجة لمن ترجع .
-طيب جاو
الاسد جاو

[درديري كباشي]

عايز اقول جني وجن اولاد المغتربين واطفالهم . كنا عندما نسمع هذه العباره من اهلنا في السودان ونحن نقضي الاجازة نغضب باعتبار انه راس السوط هبشنا والمقصود بيها اطفالنا . ولكن rقبل فترة شاهدت عينة منهم والان اقولها بملا فمي انا شخصيا جني وجن اولاد المغتربين . كان زارتنا عائلة سودانية مع اطفالهم . والاطفال كانهم جايين في حملة تخريبية . اول انجازاتهم ضيعوا البرمجه للرسيفر وخلونا ساعات طوال من غير تلفزيون . ثاني انجازاتهم القفذ بدون زانة على الكنب والكراسي ليكون ضحايا هذه الحملة احدى الكراسي ليصبح من سكان المزبلة في لحظات . اصغر الاطفال يادوب متعلم المشي يعني (حلاته ما قادر يطلع في الكنب وينطط ) ومعقول يعدي الزيارة بدون انجازات لذلك تخصص في كبابي الشربات . والله كاسات جميلة وغالية ام العيال اقنعتني بعد تعب ان اشتريهم لها . عشان الضيوف .... هذا الصغير البطل يرفع الكاس عاليا في الهواء ويرميه على البلاط ضاحكا بكل نشوى وتشفي . وامه كل الذي تفعله من اجل حماية بيئتنا وبيتنا ( يااااااولد هنودي ععععيب كدا .. بس وترجع لونستها ) ... انا امس شعرت بان ضغطي ارتفع بل انه كلاي وصلت صدري من الغضب . وكل ما احاول اضرب او اشخط ام العيال تهمس فيني ( عيب عيب .... مع الهمس كلمة عيب تطلع (هيب هيب )... اخيرا دخلت غرفة النوم وقفلتها علي وغيرت ملابسي وحاولت ان انام عشان اشوف نتيجة عاصفة الصحراء بالصباح .. ولكن ما فشى غلي وانا بطلع في حزام البنطلون احد الاطفال اعتقد انه انا عاوز اضربه حاول يجري وضرب باب الغرفة براسه ضربة قوية .... حا اكذب واقول لاشماته وعيب والكلام الماعنده معنا يمين شماته ونص وفرحت فعلا وبعد ذلك قدرت انام بارتياح .

[انوريكا]

عجبتني احدى حلقات مسلسل الاطفال الكرتوني توم وجيري ......... في تلك الحلقة يوجد فرخ بط صغير يائس من الحياة وعنده وسواس في ذهنه بانه اصبح شخص مكروه ولذلك قرر ان ينتحر . اثناء سيره عثر على القط توم . وعرض عليه عملية اكله ..... في الظروف العادية بالتاكيد القط لن ينتظره حتى يقدم له هذا العرض . ولكن الطرافه في انه القط اصبح يتعزز , وفرخ البط يترجى فيه ويحنسه . وهذا باتسامه الخجل والتواضع يتصنع التمنع . الفكرة اعجبيتني واضحكتني . وتخيلت لو ان الحياة بين البشر والحيوانات كانت مفتوحة ولغة التخاطب واحده . معنا مثلا شخص يائس ومحبط مل الحياة وذهب الى الغابة مقدما نفسه وجبة دسمه للاسد تخيلوا شكل الحوار وخاصة لو كان هذا الشخص سوداني .
الرجل داخل على الغابة اول ما ينظر الى الاسد يذهب ناحيته .
- لو سمحت يا ابو الاسود ممكن تتكرم وتسفسفنا معاك
- الاسد : ابدا واسف جدا عسع ما قبلك بكتير ضارب لي غزالتين وبعدين انت مالك زهجت من الدنيا
- نسوي شنو يا قدنفر ياخ الديون كترت علينا وقرض البنك وسيد الايجار غايتو ما في اي مخرج غير اسنانك الغالية دي .
- الاسد : لكن اشمعنا انا ماشفت النمر ولا الضبع لييه يعني
- يا ابو الاسود ديل شرسين بعدين النمر يخنقك ويطلع بيك الشجره فوق ويحك ليك جسمك بالشوك . اما الضبع انت براك عارفه يبدا ياكل من الكرعين وانت حي تعاين .
- اقول ليك شنو ياخي اعزارك كلها في محلها . لكن انتو السودانيين اكلكم كله ملح يعني ملوحة وتركين وفسيخ . قبل الاسبوع ضربت لي سوداني ضغطي وصل تلتماية من كثرة الاملاح .
- ياخي بلا لبط معاك ما الشوام ديل بياكلوا الزيتون خمس وجبات في اليوم مالهم ما برفعوا ليك الضغط .
-الاسد . لكن ديل مانص استوى يعني ما محرقين ومنضجدين زيكم كدا وبعدين ديل بيغطوا الفارق بالحلويات الكثيرة البيحبوها . اخخخ زكرتني قبل شهر ضارب لي لبناني لي هسع طعمه في خشمي لمن خليت ريقي جرا .
- يعني نفهم من كدا ما في طريقة نتسفسف الليلة .
الاسد : كدي تعالي بكره الضهر لو ما تحلت قضيتك وانا اوعدك ما راح آكل اي حاجة لمن ترجع .
-طيب جاو
الاسد جاو



هههههههههههههههههههه
هههههههههههههههههههه
هههههههههههههههههههه

والله يا أبو الدُر .. بالغت فيها ..
وحقيقــة أنا ما بجى العاااااام كتير ... لكن يعلم الله .. شفت حملة للتبرع بالكلام ... حايمة فوووق المنتدي وقبضتها .. وبركة القبضتها ...

حقيقة ما أسمعه عنك وفي رواياتك الجميلة وكتاباتك الثرة .. جعلتني في شوق .. للمجئ لهذا المكاااااااان .. مع غير العاااااااااااادة؟

وحكاويك حقيقة ممتعة.. ومضحكة جدا ً .. شكرا ً لما نقلته من ذاكرتك الفزة .. وأمتعتنا به .

أرجوا ان لا أكون أزعجتك بردي ..

وتقبل مروري ..
وفي متابعتك ..

[خالد 000 ابقرجة]

ابو الدرر000

جاي أحجز لي كم كبون تبرع كدة 000
لأنو أخوك زيك 000
عندو فائض كلامي كتييييير 000
ومافي مصارف خير مفتوحة ومتاحة 000
وطبعا الزي هنا راقديييييييييين 000
يعني حملتك دي ان شاء الله حا تنافس حملة أم قبس 000
عارف لمن تكون ما قادر تتكلم 000 بتحس صدرك عاوز انفجر 000

بس علي الجانب التاني 000

لمن ربنا يكتب عليك أنك تتكلم طول اليوم في شغلك 000
وتحس أنو المفروض بسمع فيك أضانو مقفولة 000
بعاين لي خشمك ما عشان يفهم كلامك 000
عشان يعرفك وقفتا كلام 000
ويبدا من نفس الحتة الوقف فيها 000

ياخي في الساعة ديك ( وجدادة ) 000
بتحس أنك دفقتا مويتك علي الرهاب 000 ( دي بالصوت العالي بتبقي رحاب 000 عكس عيب وهيب بتاعتك ) 000
أها في رحاب اللحظة العجيبة دي 000
بكون صدرك عاوز انفجر 000 بس السبب ما عدم الكلام 000

شفتا كيف 000 قسس 000

عدم كلام بفجر صدرك من الكتمة 000
وكترة كلام بتفجرو برضو بس الـــ 000 ولا أقول ليك 000 خليها دي 000

و جاييييك 000 وصندوق كلامك ده 000 بملاهو معاكا تب 000

ياخي تبرعاتك عجيبة ياخي 000

تبرعات ام قبس بتفرج كرب اخواننا المحتاجين 000

وتبرعاتك بتنفس عن أخواننا المكلومين 000 ( مكلومين دي مصدرا قلة الكلام ) وما ليها علاقة بالحزن

بجيك تاني 000

[درديري كباشي]

هههههههههههههههههههه
هههههههههههههههههههه
هههههههههههههههههههه

والله يا أبو الدُر .. بالغت فيها ..
وحقيقــة أنا ما بجى العاااااام كتير ... لكن يعلم الله .. شفت حملة للتبرع بالكلام ... حايمة فوووق المنتدي وقبضتها .. وبركة القبضتها ...

حقيقة ما أسمعه عنك وفي رواياتك الجميلة وكتاباتك الثرة .. جعلتني في شوق .. للمجئ لهذا المكاااااااان .. مع غير العاااااااااااادة؟

وحكاويك حقيقة ممتعة.. ومضحكة جدا ً .. شكرا ً لما نقلته من ذاكرتك الفزة .. وأمتعتنا به .

أرجوا ان لا أكون أزعجتك بردي ..

وتقبل مروري ..
وفي متابعتك ..


انا سعيد يا انور لاني قدرت اجرجك معانا في المنتدى العام .. وانا كمان عكسك اشترك في اي منتدى بس بركن في العام .. والحركة مش في المنتديات فقط انا حتى في الزيارات للاهل والاقارب .. عشان كدا لمن انزل السودان اقاربنا واصحابنا من النساء بيتغاظوا مني جدا .. لاني ادخل واول كرسي في الحوش او عنقريب .. وخصوصا لو كان عندهم حبوبة او جد النوع اليقضي اليوم كله في الحوش او تحت الشجره ... بركن جمبه وابدا اتونس واتحرى ... تجد ست البيت متغاظه عايزيناي ادخل جوة واشوف الفرش والستائر والاثاث الفخم واحس بالتغيير في حياتهم بعد غيابي عشر سنوات ( هي يا الدرديري .. اصلو كدا ما جايه .. ادخل لجوة الكهرباء شغاله نشغل ليك المكيف .. هي لكن تقعد في الحر دا كيف ..( تقول الحاج دا مكندش )) .. ولكن انا بكل اصرار اظل في الحوش اي في المنتدى العام بتاعهم .. وست البيت ما باقي ليها الا تكب لي العصير في راسي ..
كذلك في المنتديات ناس المنتدى الثقافي عايزيني معاهم وناس القصص .. وبصراحة انا بكره الالتزامات ولا احب ان يحاسبني احد بمعايير تخصص معين لاني غير مختص واحب التلقائية والعفوية ولا احب اي واحد ان يتخذ كتاباتي مرجعا لاي شئ .. انا عاوز كلامي يكون عام كدا ومفتوح ..
مره من المرات في منتدى من المنتديات كتبنت عن ثقافة الطعام لدى الشعوب .. يعني موضوع ثقافي .. وجدت احد المشرفين نقل المنتدى لقسم المطبخ .. وانا سالته قلت ياخي انا المطبخ في بيتنا ما بدخله لاني ما بعرف حتى السلطه اقطعها لانها ستكون مخلوطة بدم اصابع يدي ..
المهم خليك معنا في حملتنا .... نملا هذا المنتدى بالكلام .. حتى يئن

[درديري كباشي]

ابو الدرر000

جاي أحجز لي كم كبون تبرع كدة 000
لأنو أخوك زيك 000
عندو فائض كلامي كتييييير 000
ومافي مصارف خير مفتوحة ومتاحة 000
وطبعا الزي هنا راقديييييييييين 000
يعني حملتك دي ان شاء الله حا تنافس حملة أم قبس 000
عارف لمن تكون ما قادر تتكلم 000 بتحس صدرك عاوز انفجر 000

بس علي الجانب التاني 000

لمن ربنا يكتب عليك أنك تتكلم طول اليوم في شغلك 000
وتحس أنو المفروض بسمع فيك أضانو مقفولة 000
بعاين لي خشمك ما عشان يفهم كلامك 000
عشان يعرفك وقفتا كلام 000
ويبدا من نفس الحتة الوقف فيها 000

ياخي في الساعة ديك ( وجدادة ) 000
بتحس أنك دفقتا مويتك علي الرهاب 000 ( دي بالصوت العالي بتبقي رحاب 000 عكس عيب وهيب بتاعتك ) 000
أها في رحاب اللحظة العجيبة دي 000
بكون صدرك عاوز انفجر 000 بس السبب ما عدم الكلام 000

شفتا كيف 000 قسس 000

عدم كلام بفجر صدرك من الكتمة 000
وكترة كلام بتفجرو برضو بس الـــ 000 ولا أقول ليك 000 خليها دي 000

و جاييييك 000 وصندوق كلامك ده 000 بملاهو معاكا تب 000

ياخي تبرعاتك عجيبة ياخي 000

تبرعات ام قبس بتفرج كرب اخواننا المحتاجين 000

وتبرعاتك بتنفس عن أخواننا المكلومين 000 ( مكلومين دي مصدرا قلة الكلام ) وما ليها علاقة بالحزن

بجيك تاني 000




يلا يا خالد يا ابو الوليد

قرب تعال ما تبتعد

تعال فرح ليالينا

وتعال قول الكلام المانكتب

واجلي المقاطع بالدهب

تعال قبل السنين تجري

تعال نملا المكان كلام

تعال فضفض

[درديري كباشي]

امس بعد ما رجعت من الدوام يعني بعد ما خلصت من كتابة هذا البوست رحت البيت فتحت التلفزيون .. وكانت اقرب قناة مظبوط عليها الريسيفر هي قناة زي افلام الهندية .. وقبل ما اغير لقناة اخرى لفت نظري . .انه فلم جديد في بدايته ..
الفلم نفسه بدايته مختلفة خالص مما شدني وتابعته ..
يعني ما بدا بعصابه شريرة تهاجم اسرة رجل غلبان شجاع متمسك بالمبادئ وتبيدها وينجو طفل صغير يصبح بطل ويحب بنت يتضح انه عمها هو من اباد اسرته وينتصر في النهاية ..
الجديد في الفلم انه بدايتة تبدا من حبيبة البطل تقرا في مذراكتها وبطل الفلم قاتل ماجور .. يدخل في التزامات مع عصابات المافيا الهندية .. ويريد ان يعتزل لكن العصابة تصر باختطاف زوجته ليساوموه بمواصلة القتل .. الجديد في الفلم في الاستايلات وحتى شكل البطل والبنت اقرب للغربيين .. والجديد ايضا انه صاحب البطل ما هو اهبل وعبيط كالعادة .... لكن الاجد من كل هذا انه البطل يموت في آخر الفلم .. وهذه لو حصلت في سينما رودي زمان او كسلا الوطنية لكسر الجمهور السينما .. لانهم عندهم قاعدة ( انه بتل ما يموت .... ومال كيف يكون بتل بالمنتق كدا ياخي ودا ذاته مستهيل ياخي ) ولو مات البطل معناها ناس السينما غشوهم ولازم يرجعوا لهم فلوسهم .
.. تذكرت ايام ادماننا للافلام الهندية في كسلا ..وتمازج القبائل .. كان الهوسا والارتريين من مدمني الافلام الهندية معنا .
لكن ميزة الهوساوي انه لو دخل الفلم عشرة مرات يستحيل يحكي المشاهد للحضور بل يحضره بنفس الروح كانه اول مره .. اما الارتريين فهم لا يستطيعوا ان يكتموا القصة طالما انهم شاهدوا الفلم قبل ذلك ..
مره في فلم كارب والسينما مليانة على اخرها .. كنا نجلس في آخر جدار في البلكونة .. ويجلس قربنا هوسا وارتريين .. احد الارتريين كان يحكي اللقطة قبل ماتحدث كانه يزيع مباراه في كرة القدم ..( هسع يدربو .. وبعدين ينت .. وتاني يتير .. ويرجع يدربوا .. وفي واحد يتلع من الستوح .. والبتل يشوفه يدربو بالمسدس ) نحن طبعا متضايقين .. وفجاه يقفذ احد الهوسوايين خانقا الارتري ومهددا له بالرمي من ارتفاع خمسة امتار على الاقل ....ويتحول الناس للفلم الجديد قربنا ... لكن بعدها اعقبها صمت مكننا من متابعة الفلم باستمتاع لانه الارتري ما نطق بعدها .. ولاا اعتقده انه حكى الفلم بعد ذلك حتى للذين لم يحضروا ... وكانت ايام .

[ابوالنور]

كو كررو انهد الحيل وهشت العظام ..وتوهجت النجوم في السماء.. وهطل المطر وهمبريب الصباح ضربنا ...يجينا الليل بالآمال..وتحمل النجوم الذكريات.. الجميلة
لقيتك جووووو متوهطة ..وحاولتُ جعلك ماضيا..ليه جيتي اسي
لا أعرف ما بداخلي أشعر أنه ما تبقى سوى الرماد..رماد نار أشعلتها..وفي قلبي فجرتها كنتُ أحسب أنني في جنة مع من اختارو قلبي..
أخاف اخاف وزاخاف والباقي ما عارفو يا دره تمو لي..
أتوسل اتوسل دي حلوة جنس حلاوة لكوم بس إليك أن لا تعود..لأنني الان صرت إنسان من فراغ
يا ريي انا وين

[ابوخالد]

متجدد كعادتك .. لك صولات وجولات فى القصص الواقعية

الممتعة ....

أخى المبدع / درديرى (أبو الدر )

تحية هندية ممزوجة بحجى الحبوبات .... شايلة من حكاوينا

الزمان ... موشحة بى كركبة شفع المغتربين (الزهور الحلوة بتشيل

الشوك للحماية ) ... معطونة بى هندى بالجبنة وزيت سمسم وارد ام روابة...

وفيهو شماااااااااااااااااااااااااااااار .................................................. ...................

مرسلة ليك تقول ساكيها كلب سعران .....

وبتقول ليك :تعال عطر ليالينا .. تعال نسينا آهاتنا

تعال نتناقل الكلمات ..تنسينا غربتنا


لك كل الود أيها الرائع / درديرى

[درديري كباشي]

كو كررو انهد الحيل وهشت العظام ..وتوهجت النجوم في السماء.. وهطل المطر وهمبريب الصباح ضربنا ...يجينا الليل بالآمال..وتحمل النجوم الذكريات.. الجميلة
لقيتك جووووو متوهطة ..وحاولتُ جعلك ماضيا..ليه جيتي اسي
لا أعرف ما بداخلي أشعر أنه ما تبقى سوى الرماد..رماد نار أشعلتها..وفي قلبي فجرتها كنتُ أحسب أنني في جنة مع من اختارو قلبي..
أخاف اخاف وزاخاف والباقي ما عارفو يا دره تمو لي..
أتوسل اتوسل دي حلوة جنس حلاوة لكوم بس إليك أن لا تعود..لأنني الان صرت إنسان من فراغ
يا ريي انا وين


لسع يا ابو النور هو دا تبرع ... الشوية دا ... انت جلده ولا شنو ...انفق بالكلام انفاق من لا يخشى التمتمه ...

نحمد الله انه ما خلقنا بكم ... ونحمد الله انه خلق لنا الانترنت وعلمنا الكتابة والقراية .. والا كان كل هذا الكلام لو ظل مكبوتا في ادمغتنا اكيد .. كان ركبنا الشاراع ولحقنا خضر في مدينة المجانين ...
لذلك الفضفضة هي علاج للكاتب اكثر من القارئ ..

[درديري كباشي]

متجدد كعادتك .. لك صولات وجولات فى القصص الواقعية

الممتعة ....

أخى المبدع / درديرى (أبو الدر )

تحية هندية ممزوجة بحجى الحبوبات .... شايلة من حكاوينا

الزمان ... موشحة بى كركبة شفع المغتربين (الزهور الحلوة بتشيل

الشوك للحماية ) ... معطونة بى هندى بالجبنة وزيت سمسم وارد ام روابة...

وفيهو شماااااااااااااااااااااااااااااار .................................................. ...................

مرسلة ليك تقول ساكيها كلب سعران .....

وبتقول ليك :تعال عطر ليالينا .. تعال نسينا آهاتنا

تعال نتناقل الكلمات ..تنسينا غربتنا


لك كل الود أيها الرائع / درديرى



سلام يا باش مهندس
ابشر يا اخا السودان
وابشر يا اخا الغربة
وابشر يا اخا الرياض
وطريق الملك عبد العزيز
وشمال الرياض

وشركات المقاولات

وخلال يومين فقط اكتشفنا ان بيننا اكثر من خط متقاطع وعامل مشترك

[درديري كباشي]

موضوع الطعام الذي تم جرجرته من قبل للمحاكم عفوا لركن المطبخ هذا هو

جزء من طبيعتنا ومن عناصر الحياة هو الطعام (اللكل) ربنا خلق لنا الاكل وربطه بشهوة البطن ومن نعم الله علينا ربنا ربط شهوة البطن بالحواس الخمسة واصبح الاكل يتميز بالرائحة والتي ترتبط بحاسة الشم كما يتميز بالطعم الذي يرتبط بحاسة الذوق ودرجة الحرارة والملمس التي ترتيط بحاسة اللمس .. والمنظر الذي ارتبط بحاسة البصر .. وبنفس هذا الارتباط اصبح الطعام يتميز فيما بينه بما يخص هذه الحواس.. بالرغم من انه مصادر الغذاء مهما كثرت فهي نوعين .. اما الحيوان او النبات .. والمصدر الاولي على الاطلاق هو النبات لانه النبات ياخذ عناصر التربه من معادن واملاح ويحيلها الى بروتينات وفتيمنات او العناصر التي تبنى منها عناصر الخلية الحية سوى للحيوان او الانسان .. ورغم عن ان علماء الكيمياء والاحياء اكتشفوا ان جسم الانسان يتكون من نفس عناصر التربة مما ثبت قوله تعالى ( منها خلقناكم وفيها نعيدكم ومنها نخرجكم تارة اخرى )
ولكن رغما عن ذلك لن يصل يوما ان يتناول الانسان هذه العناصرة مباشرة من الطبيعة ... بمعنى لن نذهب يوما لنتناول الافطار من محل اسبيرات .. او يجلس شخص في الارض يصلح سيارته وهو يقطم من قطعة حديد في يده قبل مايركبها في السيارة .. وياخذ شربه من زيت الفرامل ويتجشا دخان مثل السيارة .. ورغما عن ان نفس هذه العناصر موجودة في اجسامنا .. لكن بنسب ضئيلة لا تتكون الا عبر امتصاص النبات لهذه العناصر وطبخها بالتمثيل الضوئي .
هذا التنوع في الثمار والحيوانات البحرية منها والبرية ومع انتشار البشر في جميع انحاء الارض ادى الى ان كل شعب من هذه الشعوب اتخذ طريقة في طبخ واكل الطعام واصبح نوعا من الثقافة .. ودعونا نسميها ثقافة الطعام ... وثقافة الطعام افضل من مصطلح ثقافة الغذاء لان ثقافة الغذاء مصطلح علمي يعني بالسعرات الحرارية والمكونات العملية من بروتينات وسوء التغذية وفقدان السوائل .. وهذه كلها مجالات علمية ليس لنا فيها .. لكن ثقافة الطعام يعني انا اريد ان اخوض في هذا المجال من المنطلق الشعبي بمعنى .. من منصات المطاعم والمصاطب الشعبية ..
ارجو انه المشرفين ما يستعجلوا ويجروا الموضوع ناحية المصاطب العلمية ... (يمين تودو هناك لا حقي ولا بعرفوا ولا بباريه وانا لا عالم ولا متخصص في هذا المجال .. ولكن اتحدث من منطلق التجربة والمشاهدة فقط ( زول اكل بس ما اكثر من كدا)
عندي طبعة حب الاستطلاع تشمل الاكل ايضا .. اميل لتجريب وتذوق أي اكل لاي شعب اعرفه ولا اعرفه ... آخر اكل جربته كان الاكل الصيني وساعود بعد الفاصل ... عشان تعرفوا الطعم كان كيف

[درديري كباشي]

قبل ما ندخل في تفاصيل نواصل في انه تباين الطعم واللون والرائحة في الطعام مع تباين الشعوب من الناحية العرقية وكذلك تباين البيئة واللغات والاديان والعادات والتقاليد .. كل هذه العوامل ادت لان يكون لكل شعب طريقة مختلفة في صنع الطعام وحتى في الوجبات بل حتى هنالك طقوس في بعض الاحيان تتعلق بتناول الطعام نفسه .. مع اجماعنا التام ان للطعام مصدرين فقط وهم النبات والحيوان .. ورغما عن ذلك تحس باكل كانك اول مره تذق طعمه ... وقصة المطعم الصيني وهي من فجرت هذا الهوى في راسي وتسببت في هذا الموضوع .. قبل يومين انا و احد الزملاء خرجنا في فسحة الغداء الى مجمع اطعمه عالمية في احد الاسواق قريبة من العمل والساحة التي هي مخصصة للجلوس واحدة بمعنى تختار انت أي شعب في الدنيا من هندي لمكسيكي لصيني لامريكي وتاخذ وجبتك وتجلس .. ذهبنا انا وهو نتجول في الفتارينات ننظر الى انواع الاكل .. فجاه وقع نظرنا على المطعم الصيني .. وفعلا الاكل شكله مغري جدا .. معكرونة طويلة لونها اسمر تحس انها مخلوطة بعدة انواع من الخضر .. وقطع صغيرة من الماكولات البحرية .. وبدون تردد كل واحد منا عبا صحن وجلسنا .. انا شخصيا اول لقمة تناولتها حسيت بان هناك شئ داخلي بدا يرتفع اشبه بالذئبق في ميزان الحرارة .. لكن ما اكترثت رحت متناول الثانية والثالثة ... حسيت بكتمه كاني داخل في دكان تمباك ... رفعت راسي وجدت زميلي وضع الملعقة من اول لقمه .. سالته مالك وجدته فقد النطق وهذ راسه فقط ...وقفل الاناء ووضع يده على الطاولة ونام عليها ماسكا بطنه .. وانا فعلت مثله .. بعد مسافة قمنا نحن الاثنين وذهبنا لاقرب مطعم عربي هو اخذ سندوتش وانا اخذت صحن سلطة خضراء فقط وتركنا الاكل الصيني في مكانة ينتظر دوره ليكون طعاما لدابة اخرى من دواب الارض غيرنا . والانا مستغرب له انه المطاعم الصينية في الرياض مزدحمة جدا بل لا تكاد تجد فيها مكانا ...
هذا الموقف جعلني اتوقف زمنا مع مائدتنا السودانية وهي فقيرة جدا للدرجة التي جعلتنا نستغرب لاي اكل في الدنيا فهي لم تخرج من نطاق البامية والملوخية والرجلة والقرع والبطاطس وفي المناسبات يضاف اليها المحشي والضلع والمعكرونة من غير بشمله طبعا وعندما ننوع الباميه اما مفروكة او ويكة حمراء او طبيخ او ام رقيقة او تقلية لذلك ممكن من السهولة جدا ان تقف الوالدة او الزوجة في راسك من الصباح وتسالك عن غداء النهار ( عايزين بامية ولا قرع ولا فاصوليا ولا ملوخية ).. انا اول ما حضرت للسعودية هنا كنت مستغرب في محلات مكتوب فيها مندي ومظبي ومضغوط وحنيز وسالت بن عمي ماذا تبيع هذه المحلات ؟؟؟ .. قال هذه مطاعم .. يعني الاشياء المذكورة هذه هي نوع من الاكل ؟؟؟ ايوه نعم
والى الان ويمكن الى عهد قريب ولو فتحت مطعم في السودان وسميته ابو الدر للمظبي والمندي والحنيز والمضغوط لن يعرف احد ماذا ابيع تحديدا .. بعد شهر ساضيف عبارة للتقبيل لعدم التفرغ وايضا لن يعرف احد ماذا اقصد .
قبل فترة دخلت احد الاسواق الضخمة في الرياض لاشتري مقاضي الشهر وقفت عند محل الجبنة وطبعا اقرا المقرر من ورقه احملها وقلت للبائع وهو من الجنسيات الشامية .. اعطينا جبنة ؟؟؟ رد أي نوع من الجبنة ؟؟؟ قلت جبنة بيضاء .. رد ما كل انواع الجبن بيضاء.. رفعت راسي مذهول ومكسوف ومكثوف وبمسحة سريعة فعلا كل انواع الجبنة بيضاء لكن بعضها يميل للون الاصفر وبعضها ناصع ... ويادوب بدات اذاكر في اسماء الجبنة .. جبن حلوم وجبن مريوم وجبن شدر ... واخيرا اخترت نوع ابيض فعلا بعد ما اخذت قطعة وتذوقتها وتاكدت هي من نوع الجبن الذي نعرفه وطلع اسمه الجبن الدمياطي ... سنواصل

[درديري كباشي]

الاطرق او الاشتر هو شخص فاقد الايقاع الزمني ربنا خلق في الانسان ايقاعات منتظمة مثل ضربات القلب والتنفس والايقاع هو الضربات في زمن ثابت . ناس الموسيقى يسمونه الزمن . والشخص الذي يستطيع ان يرقص جسمه مع الايقاع يسمونه زمنه مظبوط . ولكن هنالك الناس الطرق والذين لايستطيعون ان يضبطوا حتى مشيتهم مع الايقاع وبعضهم صوته ايضا . وقيل انه للقبول في معهد الموسيقى اولا معاينة يعملها الاساتذه وهي اختبار كونك ليس اطرق . ويضغط الاستاذ على زر الاورقن ويطلب منك ان تجاري النغمه بصوتك ليس المهم ان يكون صوتك جميل بس لاتكون اطرق .
هؤلاء الطرق في الكره مصيبتهم اكبر وعادة يكونوا خطرين على الاخرين لانه مثلا يريد ان يشوط الكره ربما ضرب شخص في بطنه شلوت ويكتم نفسه لذلك فهم خطرين .... حكى احدهم احد المواقف مع احد هؤلاء الطرق والكباري .
وقال عندما كنا صغار قررنا ان نجمع اشتراكات ونشتري كره التي كانت تعرف بالكفر منها المثل (ياكفر ياوتر ) بمعنى في هذا الزمن ياتكون فنان او لاعب كرة قدم ... المهم قال خلال شهر استطاع كل واحد منهم ان يجمع مبلغ وبعد ان جمعت هذه المبالغ استطاعوا ان يشتروا الكفر . وقال فعلا في ذلك اليوم وهم فرحين راحوا ناحية ميدان الدافوري وانقسموا لفريقين وقال كنا مستمتعين بالدافوري الا شخص واحد وهو كان اطرق وكلما حاول يشوط الكره اما وقع على الارض او شاط الارض نفسها . وكل ما حاول يجري تكعبلت احد رجليه في الثانية ووقع في ارض سافي التراب . وقال بعد التمرين خلص ... قالهم يا اخوان انا ماعايز العب كورة عايز حقي في الكورة ... الجماعة قالوا له ما في مشكلة خلينا نجمع اشتراك ثاني وندفع لك الاشتراك بتاعك ... قال لا لا لا انا اشتراكي دخل في الكورة دي ذاتها وعايز حقي منها هي ..... قالوا ليه حقك منها حانطلعوا كيف لكن ؟؟؟؟؟؟ .... ماعارف تقطعوها بيناتكم وتدوني حقي كاش عفوا جلد ... لكن الكورة ماراح تبوظ؟؟؟... انا مالي ومالكم تبوظ ولا ما تبوظ انا عايز حقي ... وقال هو مع طروقيته وهبالته كان قوي البنية وشرير (يعني هارشهم )... قالوا طيب خليها لغاية بكره نناقش الموضوع ... قال ماعايز أي نقاش ولازم حقه في الكورة يستلمه اليوم .. والكورة دي ماراح تمشي أي مكان قبل ما يستلم حصته منها .... قال اخيرا ردخنا للامر وذهب احدهم للبيت واحضر سكينا وخططنا الكورة بالقلم وقطعناها بيناتنا بالتساوي . وطبعا اصبحت لاتنفع في أي شئ ورجعنا ثاني يوم نلعب بالبلي من جديد وهي اللعبة التي يجيدها الاطرق .وانا قلت ليه عرفليكم لكن .. لانه لو استلم نصيبه نقدا كان لعبوا كورة وتركوه لوحده . وسنعود لمواقف كثيرة اخرى .

[مدنيّة]

الدرديري اولا اسفة انني لم امر بهذا الابداع من قبل

ثانيا بالله واصل واكتب مباشرة من راسك للمنتدي

احتراااماتي دوما

[درديري كباشي]

الدرديري اولا اسفة انني لم امر بهذا الابداع من قبل

ثانيا بالله واصل واكتب مباشرة من راسك للمنتدي

احتراااماتي دوما

هلا بمدنية

هلا بالحكومة

هلا بالادارة المالية

زمان اهلنا يقولوا للعريس انشا الله تغلبها بالمال وتغلبك بالغيال .. انت هنا قالبه الحكاية غالبة الرجال بالمال طالما انت المدير المالي على كل حال القسمة ( بالنص ) .. تعالي نضرب المنتدى يوم ونهاجر لمنتدى يكون في ركن الانترنت يعني في شيلي بتاعة الانترنت ونفتح مقهى هناك .

وبمناسبة بالنص حكى لي احد الاصدقاء قصة ظريفة .

قال كان عندهم جارهم من النوع الذي يدعي التدين .. بعد ما نزل المعاش فتح ورشة حدادة لتصليح السراير والكراسي . وقال يوم هو جالس في الورشة لاحظ العامل يجمع قطع المواسير الصغيرة في شوالات وحريص عليها جدا ..ساله .. دا شنو الحديد الانت لاميه دا .. قال له بعد ما نصلح السراير والكراسي يفضل قطاع حديد من باقي شغل الناس وانا ببيعه لشركة تشتريه بالكيلو..
رد مولانا قال له دي اموال الناس وحق حرام اوعى تدخله علي..
العامل قال له حاضر يامعلم ..
يوم ما مولانا وهو جالس امام الورشة وقفت شاحنة امام الورشة تماما ونزل منها عمال رفعوا شوالات قطع الحديد ونزل السائق وحاسب العامل بمبلغ ضخم وصاحبنا يعاين باندهاش .. بعد ما اتحركت الشاحنة نادى العامل وساله .. دا شنو دا الرفعتوه في اللوري دا وقبضت تمنو .... قال العامل دا قطاع الحديد ...
حق الحرام ؟؟؟؟؟؟؟؟؟؟؟؟؟؟
ياهو ذاتو ..
بالنص.........

[درديري كباشي]

كثير ما نتعرض في حياتنا لخيارات في شتى مناحي الحياة ,,,وقد نصيب او نخطئ في اختيارنا .. ولكن دوما تبقى الحسرة على الفرص الضائعة راسخة في الوجدان تاتي وتؤرق منامنا لحظة الخلو مع النفس ..
الفرص الضائعة اصبحت جزء من كياننا وحياتنا اليومية ... كثير ما تسمع في حوار اثنين حتى من الكبار نلاحظ لهذا المشهد : .. يتحدث احد الاعمام ( تخيل بيت عمك عثمان عرضوه علي قبل مايشتروه ... الا انا جاني حامد السمسار داك ... الله يهديه بس ورماه لي في الواطة دي وقالي السفون ضارب والساس رويان ... حسع اها عمك عثمان اشتراه وباعو بلميار . الا يقطع السماسره النصابين.)
اوحتى الطلاب تجد واحد يتحسر على كلية كان ممكن ان يدخلها بمجموعه الحالي لكنه قدم في غيرها .. هاهو الان يشاهد من هم اقل منه مجموعا سيتخرجوا مهندسين او اطباء ..
والفرص الضائعة هي تلك الاحداث في تاريخنا الخاص و التي عادة نسبقها بعبارة لو .. والرسول صلى الله عليه وسلم قال ان ( لو تفتح عمل الشيطان ) وفعلا ان الانسان لو جلس يفكر ويتحسر على فرصه الضائعة سيمرض نفسه بالحسره ولن يعيد الماضي .. لذلك جميل جدا وخير بلسما في هذه الحالة هو مثلنا الشعبي الذي يقول الفاتك فوته ..بمعنى الاشياء التي لم تحصل عليها وعدى عليها زمن لا يمكن ارجاعه حاول ان تنساها .
والفرص الضائعة بالمناسب هي ليست مجرد حديث للاستهلاك فقط .. وان كان بعض الناس ادمنوا او يتلذذون بسرد فرصهم الضائعة .. وخاصة اذا مر مشهد نكش الذاكره واعادهم الى مربع الفرصة الضائعة .... مثلا واحد جاره ظابط شرطة تعرض له وتشدد معه او اذاه .. هنا يقول ..
(هسه لو ما الدنيا بت .. انا وصلاح دا جاتنا فرصة دخول كلية الشرطة دي مع بعض وجابها لينا خالي انا اللواء عمر كان مدير كلية الشرطة ... شوف الحظ انا اديته هو الاورنيك وشرطت حقي قلت بلا شرطة بلا كلام فارغ ... عشان هو يجي يبقى ضابط ويفتري علينا ويدخل ولدي انا الحراسة .... اخخخخخخخخ يا زمن .. اريتني لو شرطت اورنيكه هو كمان )
كما يوجد ايضا من يدمن تاليف فرص ضائعة حتى يرفع من قيمته .... ( تتصور ناس شركة كنانة ديل سنة خمسة وتمانين عرضوا علي اعمل مدير الانتاج .. قلت انا البوديني في الخلا داك شنو ... هو يكون ناس كنانة ما سمعوا به اصلا ولا يعرفون من يكون ).. الذ تاليف فرص ضائعة انه اطفال جيراننا يعمل والدهم سائق اسعاف بمستشفى حكومي .. قال الاطفال لاطفالنا ان ابوهم خيروه .. افضل يعمل طبيب او سواق اسعاف .... وهو قال طبعا سواق اسعاف احسن بلا طبيب بلا قرف بلا دم بلاعمليات ) بصراحة معاه حق .........
والفرص الضائعة موجودة في الرياضة وموجودة في السياسة وموجودة في الاقتصاد وكلها سنعود لها بالتفاصيل.. ولكن اكثر الفرص الضائعة التي تترك حسره في نفس الانسان هي فرص الحب الضائعة وخير ومثال لها القصيدة الحلمنتيشية الشهيرة :
عبدو
في الليلة ديك
القصة ذاتها بقت عليك
يا عبدو وأدوك الشريط
يوم قولنا ليك أنضم معاها وكلّمها
لكن أبيت تسمع كلامنا
قلت لا احسن اكون تقيل
انا ما جميل
وبقيت لميض
انا باكر بكهربا ليك بنظرة كتيل
وبقيت تقيل
لامن سقوك موية الغسيل
يوم جيت تنطط زي زمان
وتباري بقعورالشجر
كايس كراسي الخيزران
وقعدتَ يا زينة الرجال
كهربجي قال
ورفعواالستار
والبت تجي وتمشي و تلف
ومرات تقيف
ومعاها كان زولاً حريف
والوقفة كان وقفة ولف
وصاحبنا بالاحساس عرف
وسألتَ والناس كلّموك
ملعون أبوك
دنيا أم قدود
بقت البقت
ووقعتَ في شارع الزلط
تبكي وتجعّر والعيون اتورّمت
يد القميص ضهر القميص كُم القميص
حتى الفنيلة اتشرّطت
يا عبدو عيب
قوم يلا صلي على الحبيب
الواطه صبحت دار ننوم
ياأخوانّا لأ أنا عايز أموت
أقع البحر
يا عبدو عيب الدنيا حر ..
والموية بتسخّن عليك
ثلاثة ساعات في الطريق
وزولنا قاعد يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
شي كلام عن الدنيا أم قدود
وعلاقة بين يوم السبت وعين الحسود
ومقارنات بين الجمال والجهل وسوء الإختيار
قال شينة قال
قال شينة قلنا دا كلام صحيح
و خطيبها ذاتو ولدقبيح
بس ياخي قوم الواطة ليل..
دايرين ننوم
قام تاني جاب سيرة البحر
وقام تااااااااااااااااااني جاب سيرة البحر

[فراس]

الدرديري تحياتي
ابدااااااااع بصورة ماعادية ماشاء الله عليك تسلسل جميل لك ميزة خاصة في كتاباتك.
ابقي واصل ونحن حضور ومتابعة دائمة في حرم كتاباتك الانيقة
تسلم

[درديري كباشي]

الدرديري تحياتي
ابدااااااااع بصورة ماعادية ماشاء الله عليك تسلسل جميل لك ميزة خاصة في كتاباتك.
ابقي واصل ونحن حضور ومتابعة دائمة في حرم كتاباتك الانيقة
تسلم



مشكور يا ود القرشي بس كنا نطمع منك في تبرع اكبر من كدا ... اييه النشاف دا ياخي سطرين بس ...

[درديري كباشي]

اذكر مشهد او مقطع من رواية الكاتب الامريكي العالمي مارك توين (مغامرات توم سوير) .. ذلك الولد الشقي توم طلبت منه جدته التي تربيه ان يدهن سور الحديقة كاملا قبل ان يذهب للعب ... هو في الاول شعر بالاحباط والامتعاض وخاصة عندما تذكر سخرية اصدقائه منه .. هم يلعبون وهو منهك بالعمل في طلاء السور .. ولكنه فكر بذكاء شديد ان يستثمر هذا العمل ويحيله الى مصدر للدخل والمتعة بدلا من ان يكون مصدر للكآبة والملل والتعب المضني ... دعونا ندير الحوار بطريقتنا نحن ودعكم من الترجمة لان الفكرة وصلت ..



توم ماسك الفرشاة وبدا بطلاء السور من الخارج ..وهو يصفر ويغني متظاهرا بالسرور .. يحضر احد اصدقائه المعهودين مثلا براون وهو يحمل كرة في يده ..


براون: مرحبا توم


توم : مرحبا براون ..وهو مواصلا في الغناء والصفير دون ان يلتفت له ..


براون : هلا نذهب لنلعب الكره ..


توم: كره ؟؟ اي كره تعني .. هل يوجد احد عنده متعه طلاء سور حديقه يتركه ويلعب الكره ...؟؟؟


براون : تعني ان اليوم لن تلعب ستقضي طيلة اليوم في طلاء السور .


توم : اتمنى الا ينقضي طلاء السور في هذا اليوم حتى استمر في الطلاء غدا وبعد غد .


براون : هل تعني ان طلاء السور جميل وممتع ..


توم : الا تشاهد اني منتشي ومستمتع بعملية الطلاء ..


براون : ممكن تعطيني اجرب معك قليلا ..


توم : تجرب مجانا هكذا دون اي مقابل .


براون : انا لا املك مالا لكن لو قبلت ممكن مقابل هذه الكره ..


توم متظاهرا بالقبول على مضض : لا باس رغما عن انها كرة قديمة لاتسوى لكن هاتها .. وعلى شرط ستطلي فقط ثلاثة امتار يعني من هنا الى هنا .. اياك ان تزود لو زودت ساسجل الزيادة دين عليك ... واستمر براون في الطلاء وفعلا شعر بمتعة وفي هذه الفترة حضر باقي الاصدقاء منهم من يقود دراجة و منهم من يحمل قطة .. وشاهدوا عملية المساومة .. وبدا كل واحد منهم يدفع ما عنده لينال فرصة الاستمتاع بطلاء السور . لينقضي اليوم وينقضي معه طلاء السور ... توم دون ان يبذل اي مجهود بل في الاخر يجد نفسه حقق عدة مكاسب .. عندما انقضى اليوم جلس ليعدد مكاسبه .. اكتشف انه عنده شلن وكرة قديمة وفردة شراب وعصا .. وكلها اشياء لا تسوى شئ مقارنة بطلاء السور الذي تم طلاؤه دون اي مجهود ..


وهذا نتيجة الى ان توم رفع قيمة العمل نفسها وجعلها مغربة للجميع ... هذه القصة لها عدة مدلولات وهي انه لا يوجد اي عمل تافه او حقير ... انما يوجد اشخاص يستطيعون ان يرفعوا قيمة الاشياء وبعضهم يفعل العكس ..


مثال اخر من واقعنا ..


عندنا في العمل الساعي في المكتب وهو هندي الجنسية هذا الشخص يعطيك انطباع بانه اهم شخص في الشركة بدءا من لبسه .. فهو حريص جدا على قميص ابيض وبنطلون اسود وكرفته ... ثم انه اكتسب خبرة كبيرة نتيجة لمتابعته الفنيين في ماكينة التصوير المعقدة والطابعة المركزية .. فهو اصبح وحدة من يعرف كيف تطبع على الصفحتين وكيف تحول ورقة صغيرة الى ورقة كبيرة وكيف يصور كتابا كاملا وكيف يغلفه كما اتقن صنعة التغليف ,بل اكثر من ذلك اذا وجد شخص يتعامل مع مكينة التصوير بصورة خطا فهو لن يتوانى في نهره حتى لو كان مديرا كبيرا .. لاني كما ذكرت هو لا يعتقد انه يوجد من يفوقه اهمية في العمل .. وفعلا بدا الناس يستعينون به في كثير من امورهم المتعلقه بمجاله ... اذا هي مهنة الساعي والتي هي بالعرف ادنى وظيفة في اي مؤسسة .. ولكن هذا الشخص جعل لها قيمة بصورة جعلت العمل يسير بصعوبة من دونه او في حال غيابه ..


هذا الشئ لا يتوقف على العمل فقط بل في كل مناحي الحياة بيتك اسرتك سيارتك كل ممتلكاتك في امكانك ان تجعلها مهمة لك انت شخصيا وكذلك في نظر الاخرين .... تجد بعض الناس وهذه الطبعة بالذات في اهلنا السودانين تجده مثلا يسب عمله ويبخسه بعضهم يعتقد انه بذلك قد يبعد الحسد والعين عنه .. والبعض الاخر ربما لا يكون راضي عن وضعه فعلا ... لكن انا اعتقد الافضل ومثل ما فعل توم سوير مهما كان عملك مملا ممكن ان تتوهم او حتى تتظاهر بانه ممتع واعتقد انك ستنجح في ذلك .. الى ان نعود للنقاش ولامثله اخرى ربما تتضح الصورة اكثر .

[درديري كباشي]

منتداكم نفسه طويل بشكل
انا لي يومين واكتب واعبي في هذا البوست وللحين ما قلبت الصفحة ... انا شكيت قلت يمكن البوست فيه خرم ويسرب الكلام للمنتديات الثانية ... عملت بحث ونفخته وبنشرته وكله سليم في السليم ... مش ممكن الصفحة الواحدة طويلة طول ... يعني الموضوع لمن يصل خمس صفحات معناها اصبح كتاب من مايتين صفحة على الاقل ..

[فراس]

مشكور يا ود القرشي بس كنا نطمع منك في تبرع اكبر من كدا ... اييه النشاف دا ياخي سطرين بس ...

اخي الدرديري
مساء الورد
انت عارف السطرين ديل طلعن بي خراج روح والله لمن اجد الاشياء الجميلة والكتابات
الراقية الرائعة بتقيف كل اللغات وماممكن نجاريك عشان كدا مرور واستمتاع حد الانتشاء
وانا اصبحت من المدمنين علي هذا البوست
لك مني عاطر التحايا والاحترام
ودالقرشي

[درديري كباشي]

اخي الدرديري
مساء الورد
انت عارف السطرين ديل طلعن بي خراج روح والله لمن اجد الاشياء الجميلة والكتابات
الراقية الرائعة بتقيف كل اللغات وماممكن نجاريك عشان كدا مرور واستمتاع حد الانتشاء
وانا اصبحت من المدمنين علي هذا البوست
لك مني عاطر التحايا والاحترام
ودالقرشي

زوقه حلوة ومقبولة منك يا ود القرشي وانا جاهز لازال والحمد لله يطخمني الكلام بس الملم قدرتي الباقيه واشد ساعد على المجداف
علي راي الكتيابي

[درديري كباشي]

عندي صديق شخصي كنا نسكن سابقا في عماره واحده بالرياض ... غير انه متلحني ( اي متسلط علي للناطقين بغيرها) بالايملات الفظيعه .. قبل فتره ارسل لي ايميل فيه صور شباب سعوديون كانوا مخيمين في الصحراء .. اي رحله برية .. هاجمتهم ذئاب ليلا والتهمتهم وهم نائمون كما يلتهم الاطفال قطع الشوكلاتة ولم يبقى منهم شئ سوى حزاء برباط به قدمين باقيين .. يبدو انهم لم يستطيعوا فك الرباط .. او راس .. المهم الصور كانت فظيعه شاهدها الاطفال عندي وغلبهم النوم عدة ايام ؟؟ ولو لا خوفي على مشاعركم لعرضت لكم هذه الصور ..
ولكن بعد فتره تطور الامر وارسل لي مقطع فيديو هذه المره لاسود تلتهم بني ادم حيا امام اطفاله ...
يبدو انه قرا الاسكتش الصغير الذي كتبته بين الاسد والسوداني والذي ترفع الاسد عن اكله متعللا بامتناعه عن اكل الاملاح ..
سيناريو الفيدويو عوائل اروبية رجال ونساء في رحلة سفاري افريقية .. وجدوا قطيع من الاسود فالتموا حولهم وبداوا يصورونهم وياخذون في اللقطات والاسود في الاول وديعة وتتلاعب بزيلها.. الا انه احد الرجال شاهد الاسود اكثر وداعة ولطافة فطمع و اقترب اكثر لياتي احد الاسود من خلفه ويرميه وسطهم .. لم تجدي صرخات الصغار والكبار لمنع الاسود بالمضي قدما فالتهامه ...

الفيديو رغم فظاعته الا انه فيه عبر كثيرة تدل على عجز الانسان رغما عن غروره وصلفه .. هذا الرجل سقط وسط الاسود لم تفلح كل التكنلوجيا والاختراعات في ان تنقذه من براثنهم ... كما يدل على ان الحيوانت المفترسة والبرية لن تتخلى عن طبيعتها مهما تم ترويضها وتدريبها .

[درديري كباشي]

كلنا عندما وصلنا السعودية دخلنا في مقلب الجدل الازلي بين الحليب واللبن .... وخاصة مع العذابة يقولوا نفسنا راغبة في شاي اللبن لينبري لهم الوافد الجديد متبرعا باحضار اللبن ... بعد قليل يتفاجا الجميع بان ما احضره هو روب وتبدا المغالطة ... يا اخوان دا لبن ياخي انت مابتضوق دا روب ياخي مكتوب فيه لبن ..... وما اللبن هو الروب ... كيف يكون اللبن هو الروب عمركم شربتو شاي بالروب ؟؟ ...
او دجل بين عامل البقالة الهندي والوافد الجديد ...
- صديق انت هذا ما في لبن
- كيف ما في لبن انت ما في معلوم عربي اقرا هنا ايس مكتوب
- صديق هنا مكتوب لبن لكن جوة علبة ما في لبن
- ايس في جوة علبة
- جوة علبة في روب
- ايس روب انا ما في معلوم روب انا في معلوم لبن كل سعودي يبقى سيم سيم لبن انا يعطي هذا وبعدين مافي رجع
ممكن يقول قائل ولبن البودره ما اسمه ... اسمه حليب بودرة .... كيف يكون حليب بودرة عمركم شفتو بقرة حلبت بودرة اللهم الا تكون فاقدة سوائل للنهاية ..
المهم انا الجابني لهذا الموضوع ليس الدجل الدائر بين اصل الحليب واللبن .. والامر لا يحتاج لدجل او تعصب اهل الخليج لانه محسوم بالقران ربنا يقول لنا ما يخرج من بين فرث ودم لبنا سائقا للشاربين .. بمعنى الذي يخرج من الانعام هذا اسمه لبن .... وعمركم شفتو بقرة حلبت روب...
لكن ما دعاني لكتابة هذا الموضوع هو موجة الزعر التي سادت العالم بعد ظاهرة انتشار امراض الحيوانات ...
زمان في السابق كانت توجد امراض معينة مرتبطة بالحيوانات ونادرة الانتشار ... وهي داء الفيل وداء القطط وحمى القرد والذئبة الحمراء والثعلبة ... اما الان ظهرت انواع فتاكة وهي كلها انواع انفولنزا التي بدات بالطيور ولتعقبها انفلونزا الخنازير .. والتي جعلت الكل يترقب وخائف ..في السابق لو عطست في مكان عام تنافس الناس في تشميتك وطلب الرحمة لك لكن الان لو عطست في مكان عام وخاصة صالات المطارات ستجد الكل هرب من قربك قافلا وجهه بقدر الامكان ..
وهذا غير الظواهر الاخرى والتي يبدو في معظمها كيد شركات في بعضها .. تجد مثلا شوكلاته الماركة الفلانية مصنوعة من زبدة حليب الخنزير ... وشعيرية ماركة كذا مصنوعة من عظام الحيوانات المذبوحة ... وقبل ذلك كانت انتشرت اللقاءات مع عالمة التغذية الشهيرة الدكتورة مريم نور والتي لم تبقى لنا على شئ صالح للاكل وهاجمت كل شركات الاغذية بل قالت ان بعض الشركات ممنوعة من التسويق في بلاد منشاها ..
ونحن لا ندري حتى الان الى متى والى اين سيقودنا هذا الرعب المستمر ومتى سينتهي