ضيف الكرسي الساخن للاسبوع الحالي الاخ العزيز وهيب

[schizo]

معليش يا جماعة حصلت ظروف وما اخترنا ضيفنا من بداية الاسبوع

يلا نبدا ونديكم فرصة عشان تسألو وتتعرفو على ضيفنا اكتر

وببدا بالسؤال المعتاد

البطاقة الشخصية

تحياتي للجميع ولضيفنا وهيب:)

[waheeb]

اولا احب اهني جميع اعضاء المنتدى بمناسبة العيد السعيد...واقول ليهم كل سنه والجميع بالف خير
وتقبل الله منا ومنكم الصيام والقيام...

والله الكرسي حاااار لكن نبدأ:-

الاسم - وهيب نور الهدي.

العمر 30 سنه.

السكن : ابوعشر الجميله.

المهنه : مهندس تشغيل.

مكان العمل: الجيلي.

[المخلصة]

بسم الله الرحمن الرحيم
السلام عليك ورحمه من الله تعالى وبركاته

من خلال المقابلات أتيحت لنا معرفة ولو جزء بسيط من شخصيه أي عضو أو عضوة من اعضاء المنتدى وذلك من خلال طرح الأسئلة والإجابة عليها وهي فعلاً بمثابته الفرصة للتعرف 0

وسؤالي شنو هي حيلتك وقتها ؟؟؟ وكيف ح تتصرف ؟؟؟

س1: وإنت بطوف في الحارة ماشي كداري وأمطرت في وجهك سحابه
حزنانه ؟؟؟

س2: إذا صرخ قلبك من شدة الألم من أقرب شخص وبالنسبة ليك هي نسمه هجير وراحة ضمير وبهجة مشاعر ورحلة عبير ؟؟؟

س3: إذا كان هناك من احبك بإخلاص فمن تختار من أحبك أم من احببتها ؟؟؟

س4: إذا أثقلت عليك بالأسئلة ؟؟؟

دمت في حفظ الله

والسلام ختام

[waheeb]

الاخت المخلصه:
اولا كل سنه وانت طيبه.

وكلامك صحيح فالمقابلات تفتح فرصه جيده لتعارف اعضاء النتدى..
اما بالنسبه لاسئلتك:-
والله انا بكون امام الامر الواقع واحاول الاجابه بكل صراحه.

1/ والله بحاول اشوف اقرب حته امشي عليها(ودا حصل لي كتير) ...

2/ والله عندما يجرح الانسان من انسان يكن له كل هذه المشاعر تكون دي صدمه اكيده ولكن لا بد من مواجهتها بكل صلابه, وانا بقول الانسان الذي يجرحك بعد كل هذا الود لا يستاهل ان تبكي عليه...

3/ هنالك مثل يقول تزوج من يحبك لا من تحبه ولكن بالنسبه لي لا بد من الحب بين الطرفين حتي يكون الزواج اكثر سعاده واستقرار. فالحب من طرف واحد لايجدي ابدا...

4/ اكون اكثر سعاده لانك تريدين التعرف علي وانا اتشرف بذلك.

ودمتي في حفظ الله ورعايته...

[LighT^RosE]

مرحب بلأخ وهيب أولأ أزف إليك أحر التهاني بمناسبة عيد الفطر المبارك أعاده الله على جميع الأمه الإسلامية بالمن والخيرات:)
1 سؤالي ليك ممكن تحكي لينا أطرف موقف حصل في العيد؟
2/ ممكن نعرف وين درست الجامعة؟ وإذا كانت في الغربة كيف عدت سنينك فيها؟؟

[waheeb]

الاخت LighT^RosE كل سنه وانت بألف خير .. وربنا يحقق امنياتك..

والله انا طبعا معيد في الشغل ويوم العيد شغال عشان كدا ما مر بي موقف طريف لانو كنت في موقف لا احسد عليه....

اما عن دراستي انا درست في العراق -بغداد والله سنين الغربه صعبه لكن من اجل الهدف الذي تغربنا من اجله صبرنا وكلنا شوق لحضن الوطن... والحمد لله قدرنا نجتاز هذه المرحله ونعدي بسلام...

والف شكر ليك وربنا يرجعك انتي بالسلامه....

[ابراهيم]

أخى العزيز ... وهيب

تحية طيبة

وكل سنة وانت بألف خير .. وربنا يحقق الأماني الجميلة

وعقبال تتحلى من الكرسي الساخن

انا بسألك لكن ما حسي بس جيت اعيد ليك

لك خالص المنى بقضاء اسعد الاوقات

[waheeb]

الاخ العزيز/ ابراهيم

كل سنه وانت مميز يا غالي..
وان شاء الله ربنا يوفقنا ونجاوب بكل صراحه..

وانا منتظرك يا غالي...

والف شكر ليك...

[ابومرام]

اولاً كل عام والجميع بالف ملييييييييييييييييييييييييون خير
والقالبلة على الامنيات مادايرين نحدد لان الامنيات تختلف وربنا
يحقق لكل شخص امنياته ويدينا ويديكم الصحة العافية وللمرة الثانية
نرحب بضيف الكرسي الساخن اخونا وهيب وربنا يبرد عليك الكرسي
مع بركات العيد واكيد الناس جاية من العيد بشوق خليه ساييييييييييييييييي
الف مرحب بيك كالعاده في البداية بتكون الاسئلة خفيييييييييييييييييفة
س/ في البطاقة الشخصية لم نتعرف على الحالة الاجتماعية واكيد الكثير
لاحظ
س / على حسب مافهمت مهندس تشغيل!؟ ماهي الورى المستقبلية للوضع
النفطي في السودان وماهي الانجازات المتوقعة لها 0

كل التمنيات لك اخي بالتوفيق وربنا يقدرك على الباقية
وعد

[waheeb]

الاخ الغريز ابومرام.

كل سنه وانت طيب وربنا يحقق ليك امنياتك..
بالنسبه لسؤالك الاول والله خليها بطيخه مقفوله...
اما سؤالك الثاني والله البلد دي باذن الله ماشه في تطور وخاصه في مجال النفط فالحمد لله الانتاج في زياده مستمره والبلد موعود بخير كثير ان شاء الله...

[غيورجدا]

الاخ المناضل وهيب
سلام ممزوج برائحة النفط السوداني وسلام بقامة جمال مدني
وسلام من ابو عشر الى الجيلي
اخي والله انا هنا ماحا اسالك ومن الفروض كل واحد يسالك ما كرسي ساخن والاخ ابراهيم المفروض يسالك انشاء الله يقول ليك انت متزوج ولا لا اللهم سوال ربنا يكتر من جنس ناس ابراهيم
ديل مريحين خلاص تعرف انا ما بسالك ليه لانو انت عارف انو انا كرهتك ليلة تاني ايام العيد وعلى ما اعتقد انك كنت شغال يا هندسه في الليلة ديك وبالمناسبة يا ناس المنتدى وهيب دا اكتر واحد الكرسي الساخن ما بأثر فيهو وبيجاوب بكل راحة تعرفو ليه يا خي ده الليل كلو ما عندو خلاف الكيبورد والماوس وناس المنتدى نائمين ما جايبين خبر .
اخي انا بسالك سوال واحد وانشاء الله الرد عليهو ما اكون انا .
ما هو اغلظ واحد في المنتدى؟
وكل سنة وانت طيب وربنا يحقق الاماني يا هندسة

[ابومرام]

وهيب ماهو وجه الشبه بين ابو عشر وودمدني بالتحديد في سخصك انت
اما بالنسبة لسؤالي في الوضع الاول لازم حتى لو في رسالةخاصة (دا ماشمار ذي مابقولوا ) لك التحية اخي وهيب ونتمى دائما نراكم ف قمة السعادة

[waheeb]

اخي غيور جدا..
سلام من ارض المليون ميل الي ارض ماليزيا الخضراء....
انت كان تكتب (كرهتك دي) بتشديد الراء عشان الباقين ما يفهموها غلط..
اما انا والله ما زهجتني ولا حاجه والواحد لقا واحد زيك ودردش معاهو ودا والله مكسب لي انا...
وبعدين ظروف شغلي هي الخلتني اكون مع الماوس والكيبورد لحدي الصباح..
اما عن سؤالك والله بكل صراحه مافي اي واحد من اعضاء المنتدى يحمل الصفه دي كل اعضاء المنتدى دمهم شربات وكلهم بيشرحو القلب...
وكل سنه وانت طيب وربنا يرجعك بالسلامه

[waheeb]

اخي ابو مرام تحيه خاصه لك..

وجه الشبه بين مدني وابو عشر هو وجه الشبه بين الاب والابن.. ابو عشر مدينه هادئه جميله وقد غني الكاشف روعة حميده ابو عشر التي كتبها عندما سافر من ابو عشر الي الابيض وداعا روضتي الغنا وداعا معبدي القدسي..
اما سؤالك الثاني والله الحمد لله انا متزوج ولي طفلان.. ان شاء الله كدا أكون أرضيتك..

مع تحياتي..

[aborawan]

كل عام وانت بالف خير اخوي وهيب ومرحب بيك في الكرسي الساخن الانا ماشافو سخن لحدى هسه


بما انك شغال في الجيلي ومن ساكني ابو عشر ما وجه الشبه والاختلاف بين اهلنا في ابو عشر واهل الجيلي

وياريت تدينا شوية عن قصة اول حب ليك كيف كان وكيف انتهى ؟

[waheeb]

اخي ابو روان أولا كل سنه وانت طيب...





سمات اهل السودان عموما متقاربه ووجه الشبه بين ابوعشر والجيلي كبير يمكن في كل العادات والتقاليد ومافي فرق بين ابو عشر والجيلي الا في عدم وجود الاهل والاصدقاء رعم اننا لم نفتقدهم كثيرا لان الاخوان الذين وجدناهم في الجيلي لم يحسسونا بهذا الفرق...
اما عن اول قصة حب فهي كانت في مدني ولم يكتب لها الله ان تستمر وحالت الظروف دون ان تتوج بالزواج ...

[روميساء 2004]

وهيب ...

كل سنة وانت طيب ...

فقط اخبرني عنها ...

من هي ؟؟ ( اكيد فاهمني ) ,,

أم وافي ...

[elshaigi]

اخيى وهيب اهلاً ومرحب بيك في هذا الكرسي الساخن واشهد لك بتبريده حتي هذه اللحظة ...

أما سؤالى لك .. كيف تري بغداد اليوم؟ وما رايك في صدام ذلك بحكم الفترة التي قضيتها فيها ؟

الشايقي

[waheeb]

رميساء ..
وانت طيبه..
نعم افهمك..
انها قدري..
انها الواحه التي استظل بها من هجير نار اشواقي الملتهبه...

[waheeb]

اخونا ود فداسي سلام عليك


اولا بغداد اليوم في موقف لا تحسد عليه تضرب وتنهب ولا احد يحرك ساكنا..
ااااااه يا بغداد اااااه...
اما عن صدام فلا اقول اكثر مما تعرف ويعرف الجميع..!!!!!!!!

[LighT^RosE]

مرحب بيك يا أخ جيتك أنا تاني:)
رأيك إيه في المقولة المعروفة( الحب الأول ما بتنسي) هل إنت موافق الكلام دا ول لأ؟

[waheeb]

الأخت العزيزه

كل الاماني الطيبه ارسلها لك ...

الانسان عنما يحب يهب كل مشاعره واحاسيسه لمن يحب وخاصه اذا كان هذا الحب حبا صادقا بين الطرفين .. فهذا لا يمكن نسيانه مهما كان لا بد ان تسترجع قليلا من الماضي يوما ما ....اما اذا كان حبا هشا او من جانب واحد فهذا لا يستند علي اي ركيزه عاطفيه فهذا سرعان ما يمضي مع الزمن

[ahsar1970]

وهيب
كل سنة أنت وهي بخير.............
لماذا لا تريد أن تخبرهم عنها,,,,,,,,
أتخشي أن يزاع السر .....
أم تغار عليها من النسيمات........
سؤالي هو...
كيف تري أفضل الطرق لتحقيق النجاح في شتي مناحي الحياة؟
وهل الخوف من الدخول في تجربة جديدة يؤدي الي الفشل؟
ما رأيك في ما صار اليه العالم الآن؟ هل توافقني أنه صار أكثر رعبا"؟
///أبومحمد///

[aborawan]

وهيب من المواقف الصعبة المرت بيكم وانت في العراق ؟؟
طبعا انا عارف كم موقف كده حصلوا لي بعض زملائك الكانو في الدفعه القدامك عايز اشوف مواقفك انتا ؟

طبعا مرة الدفعه القدامك جابوهم السودان راجعيين صح :):)

[waheeb]

أخي صلاح..
اشكرك علي هذا الكلام العذب...
1/ اولا الثقه في النفس والتوكل علي الله هي اهم عوامل النجاح..
2/ نعم يؤدي الي الفشل ان الانسان المتردد لا يمكن ان يسير بخطى ثابته..
3/ العالم اليوم اصبح مثل الغاب القوي علي الضعيف ولكن نسأل الله ان يقوينا بالايمان..

[waheeb]

أخي ابو روان

التحيه ليك وان كلك ابداع وتحياتي لك ولي اخونا ود القاسم....
المواقف الصعبه كثيره ولكن اصعبها عندما كنا راجعين في الاجاره عن طريق عمان واستقلينا بص من بغداد الي عمان وفي منتصف الطريق نام سائق البص وكلنا كنا لحظتها نيام ولم نصحو الا والبص يرتطم بالجدران يمينا وشمالا باقصى سرعه وقمنابايقاظ السائق وامرناه ان ينام حت يرتاح ثم نواصل المشوار.. وحقيقه نجونا من موت محقق لانه عندما نظرنا الي اسفل وجدنا اننا علي ارتفاع بعيد من الارض فحمدنا الله كثيرا علي السلامه.....

[aborawan]

الف حمداً لله على سلامتك وربك ستر ولطف

طيب اطرف موقف مر بيك في الجيلي وبالذات مع اى مواطن من مواطني الجيلي ؟؟؟
وكمان برضو اصعب موقف قابلك في الجيلي مع اهلا ؟؟؟
لو بتاع مشاغلات اكيد بتكون المواقف كتيرة :):)

[بابكر]

الاخ وهيب تعرف واحد كان شغال فى مستشفى ابو عشر اسمو ود الصول؟؟

[waheeb]

اخي ابو روان حياك الله..
اولا والله مافي موقف صعب حصل لي في الجيلي المدينه لاني ما قعدت في الجيلي الحله كتير انتقلنا الي المير داخل الشركه ...ولا أستحضر الان اي موقف طريف ..ووعد اذا استحضرت اي موقف سأرويه لك ان شاء الله..


الاخ بابكر.. كل سنه وانت طيب والله الاسم ما غريب علي لكن ما بستحضرو الان ولكن اذا سألت ليك أكيد بعرف اخبارو..

[ابومرام]

مرحب بيك اخوي وهيب لكن قد يلاحقني السؤال كثيرا
واسمع الكثير يتسال عنه
اختيار التخصص المعين مثلا طب 0 هندسة 0 طيران 0 صيدلة 0
اذا كان برغبة غير الشخص نفسة كانت الرغبة هي من الاب
او الام او الاخ او 000 هل ترى ان النجاح يون بنفس القدر دون ذلك

لك التحيةاخي وهيب

[waheeb]

وحياك الله اخي ابو مرام..

والله حسب راي الشخصي اي شئ متعلق بالانسان ومستقبلو لا بد ان يكون نابع من داخل الانسان نفسه.. واذا كان اختسار المهنه حسب رغبة الاهل فذالك يجعل هنالك عدة احتمالات التوفيق او الفشل.. اما اذا كانت لك الرغبه الاكيده في اي وظيفه حتما ستتقنها وتبدع فيها.. وكل شئ مقدر ومكتوب نسأل الله ان يوفق الجميع...