الغربة

[محمد هاشم]

يا غربة



يا غربة يا غشاشـه يـا بكايـة يـا مستهبلـة
تغرينـا بدرهـم قـروش وتدينا قنـطـار بهـدلـة
جيناك بس نقصد سنه وحاجاتنا ناقصـه نكملـها
نبني البيوت في العاصمه نفـرش أثاثـها نجملـها
وكورلا حاره نرسلها أصلو النقـل صـار مشكلـه
ونكمل الدين بي مهل والسمحه جاهـزه نحصلـه
غير القـروش اللاهـل عبـر الشهـور بنرسلـها
والباقي يدخل في البنوك ونشـوف لينا حافلة نشغلـها
لكن حساباتنـا الغلـط فـي كـل عـام بنرحـلها
مـرت سنـه مـن عمرنـا بنعدهـا وبنفصـلـها
والحسبه وصلت طاشرات يمكن نعيـش ونعدلـها
لكن تعال نحاسبك يا وهم من غير رقم أو أمثلـة
كان للقروش نجري ونحوش لكن تقول بنشاكلـها
ما راضيه تقعد في الجيوب وتقول حرامي وبنشلها
لكن بتقعد في الضهـور بديـون تقيلـه مقيلـة
كملانه ما بتقضي الغرض وأقـل حاجـه تكملـها
كملانه بين مطار وحق وزن ومجاملات مستعجلـة
أحلامنا فيك صبحت سراب نمشي ونجر ما نحصلها
زله ومهانه وإحتقـار خلـو النفـوس متململـة
سجن كبير فيـه الكفيـل سجـان قيـوده مكبلـة
وبقينا زي كيمان لحـم جـوه الهـدوم متكومـة
وأكيـد أكـل المعلـب والجداد والكندشـه ليهـم صلـه
مصران وقرحه وإكتئاب مرض القلب ووجع الكلى
لكن أريت هم القروش يا غربه فيك هو المشكلـة
سجن العيال جـوه الشقـق ولا فـراق العائلـة
جيب العيال بجيبنا مال وجيوبنـا غيـرو مميلـه
تلقى الولد غالبوا الكـلام والبـت كبيـره مريلـه
كل المشاكل جاتهم سوا ما قدرنا أصلـوا نغيـرها
لكن خلاص هان الخلاص عدك نزل مهمـا عـلا
يا غربه أدينـاك كتيـر أدينـا خاطـرك يسهلـا
خلينا نرجـع بالفضـل نلحـق حياتنـا نواصلـها
يا غربه يا غشاشـه يـا بكايـه يـا مستهبلـة

[محمد هاشم]

والله أنا بعد ما طفش الموقع ما دخات تاني وجيت تاني يادوب سجلت من جديد وبقيت برلوم

[محمد هاشم]

كيفكم يا جماعة المنتدى مشتاقين والله ليكم ولي دردشة المنتدى

[ابوخالد]

لكن حساباتنـا الغلـط فـي كـل عـام بنرحـلها
مـرت سنـه مـن عمرنـا بنعدهـا وبنفصـلـها
والحسبه وصلت طاشرات يمكن نعيـش ونعدلـها
لكن تعال نحاسبك يا وهم من غير رقم أو أمثلـة
كان للقروش نجري ونحوش لكن تقول بنشاكلـها
ما راضيه تقعد في الجيوب وتقول حرامي وبنشلها
لكن بتقعد في الضهـور بديـون تقيلـه مقيلـة
ــــــــــــــــــــــــــــــــــــــــــــــــــ ــــ

باين عليك زولآ قديم والغربة ذاتا مقددا

غربة وعزاب وشوق كتير لى بت المنا

بس ده المصير أكان تطير تلقاو هنا

*******

لك التحية أيها الرائع / محمد هاشم

ومرحب بك ألف مرحب بين أهلك وناسك ...

ومرحب بك مرة أخرى بالمنتدى الثقافى بى هناك تجد الكثير البعجبك ...

[محمد هاشم]

لكن حساباتنـا الغلـط فـي كـل عـام بنرحـلها
مـرت سنـه مـن عمرنـا بنعدهـا وبنفصـلـها
والحسبه وصلت طاشرات يمكن نعيـش ونعدلـها
لكن تعال نحاسبك يا وهم من غير رقم أو أمثلـة
كان للقروش نجري ونحوش لكن تقول بنشاكلـها
ما راضيه تقعد في الجيوب وتقول حرامي وبنشلها
لكن بتقعد في الضهـور بديـون تقيلـه مقيلـة
ــــــــــــــــــــــــــــــــــــــــــــــــــ ــــ

باين عليك زولآ قديم والغربة ذاتا مقددا

غربة وعزاب وشوق كتير لى بت المنا

بس ده المصير أكان تطير تلقاو هنا

*******

لك التحية أيها الرائع / محمد هاشم

ومرحب بك ألف مرحب بين أهلك وناسك ...

ومرحب بك مرة أخرى بالمنتدى الثقافى بى هناك تجد الكثير البعجبك ...


سلام كتير وكتير كتير أخونا أبوخالد والله نحن الغربة طلعت عينا وخلتنا نكورك كان الكوراك يحلنا
لكن الحمد لله ربن يجمعنا بي أهلنا الحنان هناك في أرض المحنة عما قريب

[محمد هاشم]

والله لو لقيت لي يوم في ودمدني من الصباح تمشي جامعة الجزيرة الكلية الاعدادية والساعة اتنين تخش السوق تشتري ليك شوية سلطة كمان لو لقينا لينا موليتة والله عز الطلب وتمشي تتغدا في البيت وتصلي المغرب في جامع الصايم وتشرب جبنة عند ادروب في الصايم مع الشباب عتيق وعبدالله وعزو قروش وتتعشى بالليل فول من عماد في شارع المحطة والللللللللللله حياة جميلة ومليانة بالاحداث وما فيها رتابة

[محمد هاشم]

يا أهلنا الحنان في مدني العزيزة داير أسألكم عماد بتاع الفول في شارع المحطة وأدروب بتاع الجبنة وبوش بتاع التمباك وحاجة عواطف بتاعة الكوارع وشانزيليزيه الجماعة ديل قاعدين لسه

[محمد هاشم]

يا طيور ودمدني المهاجرة إنتو تعبانين نفسيا زينا كدة ولا الوضع عندكم أحسن شوية

[عوض الكريم الخواض]

يا أهلنا الحنان في مدني العزيزة داير أسألكم عماد بتاع الفول في شارع المحطة وأدروب بتاع الجبنة وبوش بتاع التمباك وحاجة عواطف بتاعة الكوارع وشانزيليزيه الجماعة ديل قاعدين لسه

مرحب بيك محمد هاشم المنتدى نور بى طلتك ...
أها يا الحبيب
عماد بتاع الفول قااااااااعد أدروب أسأل منو أبو النور ...
بوش أسأل منو ( كبروس )
حاجة عواطف ما بعرفا ...
الشانزليزيه موجووووووووووووووووود ...
عوداً حميداً .

[محمد هاشم]

مرحب بيك محمد هاشم المنتدى نور بى طلتك ...
أها يا الحبيب
عماد بتاع الفول قااااااااعد أدروب أسأل منو أبو النور ...
بوش أسأل منو ( كبروس )
حاجة عواطف ما بعرفا ...
الشانزليزيه موجووووووووووووووووود ...
عوداً حميداً .


المنتدى منور بيكم أنتو ياناس ياذوق
والله يا أخونا عوض الكريم مشتاقين بصورة ماعادية ومشتاق لي مدني والخريف والدعاش وربنا يجمعنا في ساعة خير

[عباس الدسيس]

هي يا محمد هاشم لاكن انت كان كده مصقرت عديل في الغربه تاني رجوعك صعب كان ودوك مدني تجي راجع لي الصحراء دي تاني اما التعب النفسي دي عايزه سؤال يا ود هاشم


الدنيا ليل غربة ومطر ..
وطرب حزين..
وجع تقاسيم الوتر
شرب الزمن فرح السنين ..
والباقى هداهو السهر
يا روح غناى ..
الغربة ملت من شقاى وغربتى
وبقيت براى .. حاضن أساى
الوحشة ملت من أساى .. ووحدتى
لاغنوة لا موال يبدد حسرتى ..
غير الدموع يا ملهمة..
الغربة مرة و مؤلمة
الغربة مرة ومظلمة
*******
قولى للنيل ضفة .. ضفة
و العشيات لما تصفى..
والنسيمات البتاخد
من عفاف ريدتنا عفة
إنو شوقى يفيض بحر
شوقى شوق إنسان معذب
ضيعو الليلو السفر
لا ينابيع ريدى جفت
لا ولا أشواقى خفت
كل يوم فى غربة زايدة
وبيها كل الدنيا عرفت

[محمد هاشم]

هي يا محمد هاشم لاكن انت كان كده مصقرت عديل في الغربه تاني رجوعك صعب كان ودوك مدني تجي راجع لي الصحراء دي تاني اما التعب النفسي دي عايزه سؤال يا ود هاشم


والله يا عباس أخوي أسكت ساي حالة صعبة جدا جدا وأخير منها العرس بالدين مع أنو أرتباطي بي مدني فوق الوصف واسي أنا في إجازة وقاعد لابد في البيت لأنو المرة على وضوع رسلت جبت والدتي ونسيبتي من السودان وبقيت لابد بي جاي تاني إلا السنة الجاية كان الله ادانا عمر

[عاطف عولي]

محمد هاشم.

لك التحية وعودآ حميدآ ياخي عملو ليك تسنين وزعلان.

الغربة جوال طاشي شبكة طاحونة بدون دقيق باص مزاد بدون فرملة طين بدون معجنة ويامطر عز الحريق يا كواديق الطريق ويا كفيلآ ما بحس لشوقنا لبنيات الفريق.
( مستلفة من واحد صاحبنا ش ع بجامعة الجزيرة عضو من اعضا الخندق بالنش ايام عزها)

[محمد هاشم]

محمد هاشم.

لك التحية وعودآ حميدآ ياخي عملو ليك تسنين وزعلان.

الغربة جوال طاشي شبكة طاحونة بدون دقيق باص مزاد بدون فرملة طين بدون معجنة ويامطر عز الحريق يا كواديق الطريق ويا كفيلآ ما بحس لشوقنا لبنيات الفريق.
( مستلفة من واحد صاحبنا ش ع بجامعة الجزيرة عضو من اعضا الخندق بالنش ايام عزها)


عاطف عولي ياعجيب أمورك كيف كل في محله
اليومين ديل الخالة رجاء حسن عبدالرحيم معانا هنا في الدوحة وبتقريك السلام

[عبدالحفيظ]

الاخ محمد هاشم
كيف الاحوال و الله مشتاقين و كيف ناس البيت
يعنى ما سالت من خالة عشة بتاعت الشاى فى الاعدادية ولا من الخالة فى الbhc بتاعت الفطور
عموما الجماعة كلهم تمام التمام
و انا زاتى برلوم و ما عارف عندى الحق فى انى ارحب بيك واقول ليك الحمدلله على الظهور من جديد ولكن بقول
مليووووووووووووووون مرحب

[محمد هاشم]

الاخ محمد هاشم
كيف الاحوال و الله مشتاقين و كيف ناس البيت
يعنى ما سالت من خالة عشة بتاعت الشاى فى الاعدادية ولا من الخالة فى الbhc بتاعت الفطور
عموما الجماعة كلهم تمام التمام
و انا زاتى برلوم و ما عارف عندى الحق فى انى ارحب بيك واقول ليك الحمدلله على الظهور من جديد ولكن بقول
مليووووووووووووووون مرحب


عبد الحفيظ يارائع كيف انت والله مشتاقييييييييييييييييييييين ومشتاقين لي كل شبر من ست المدائن مدني أمورك كيف وسلامي الشديد لكل من معك ياعبدوش

[عاطف عولي]

عاطف عولي ياعجيب أمورك كيف كل في محله
اليومين ديل الخالة رجاء حسن عبدالرحيم معانا هنا في الدوحة وبتقريك السلام

التحية لك ود هاشم معروف والتحية الي كل افراد الاسرة والغالية ام النسب ولك ولها ولهم الف تحية.

المدام ترسل التحايا الي نسيبتك وخالتك

[أبو جودي]

أهلن بيك محمد هاشم ،،، والله الحمد لله أهو الواحد لقى ليه مدافع معاه ،،، عشان نحث أنفسنا وإياك والباقيييييييييييييييييييييييييييييين على العودة ولو التفكير الجاد فيها ،،،، لأنه لو في العمر بقية ،،،،، الواحد يستمتع شوية بي الحاجات السمحة ،،، من بتاع الفول ,,, وأكيد مدني فيها حاجات أكثر من دي ،،،، بتخلي الواحد ،،،، لم يتزكرها كل أعضاءه تتععععععععععععععععععععععععععععععععععب شديد ،،، وألف مرحب بيك ،،، وتعال نعمل مع بعض ،،،، ونكتر الشلة ،،،،،،،،،،،،،، وأكرر ألف ألف مرحب بيك بين أهلك وناسك ،،،،،

[محمد هاشم]

أهلن بيك محمد هاشم ،،، والله الحمد لله أهو الواحد لقى ليه مدافع معاه ،،، عشان نحث أنفسنا وإياك والباقيييييييييييييييييييييييييييييين على العودة ولو التفكير الجاد فيها ،،،، لأنه لو في العمر بقية ،،،،، الواحد يستمتع شوية بي الحاجات السمحة ،،، من بتاع الفول ,,, وأكيد مدني فيها حاجات أكثر من دي ،،،، بتخلي الواحد ،،،، لم يتزكرها كل أعضاءه تتععععععععععععععععععععععععععععععععععب شديد ،،، وألف مرحب بيك ،،، وتعال نعمل مع بعض ،،،، ونكتر الشلة ،،،،،،،،،،،،،، وأكرر ألف ألف مرحب بيك بين أهلك وناسك ،،،،،


مرحب مرحب بي أهلنا السمحين الطيبين الماسحين دموعنا والكاتلننا والله بي معدنهم النفيس ده
وهذا المعدن قلما يتوفر لابناء غير هذه الأرض الطيبة

فجزاك الله خير أخي الكريم