حوار ناقص - لكن مفهوم

[درديري كباشي]

يقال ان الفرنسيون تعودوا ان يتجاوزا الحروف الاخيرة من كلماتهم دون نطق ورغما عن ذلك تصبح الكلمة مفهومة لهم بل يمكن لا يفهمك احدهم لو نطقت الكلمة بكامل حروفها لكن نحن عندنا حوار من نوع اخر .. فنحن لاناكل الحروف كما يفعل الفرنسيون بل نبلع كلمات بحالها ورغما عن ذلك نظل متفاهمين يا لعبقريتنا المهملة ربما ورثناها من العرب ... قيل ان العرب وحتى عهد الخلفاء الراشدون كانوا يكتبون الكلام بلا نقاط .. وحتى لو جدت صور لمخطوطات قديمة للرسائل تجدها مكتوبة بالخط الكوفي وبدون نقاط... ولكن السؤال الذي يطرح نفسه كيف كان يفرزون بين كلمات مثل بنت وبيت وبين بدون نقاط ... قيل بالبداهة وموقعها من الجملة والموضوع.. لكن خلونا في موضوعنا مع حوارنا الناقص :
الاول : ويينك يا فردة كيفك امس فقدناك ماجيت ال
الثاني: يا راجل سيبك بلا لبط معاك هو انت عزمتنا ولا نجي ملح زي ناس
الاول : يا راجل كنت محتاج عزومة وانت معاي لغاية الخميس نحضر لل
الثاني: ياعمي بهزر معاك امس ما جيتك لانه كان معاي ضيوف من اهل ال
الاول : ياخي ماكان تكشحهم بفول وعدس وتقولهم رايح ل
الثاني: يا اراجل ما انت عارف المره مابترضى في اهلها وبعدين ما
الاول: على كل حال فقدناك وكان يوم جميل اجمل من
الثاني : ما تقول لي اجمل من رحلتنا بتاعة ناس
الاول : يا خي احلى منها بكتيير وغنى فيها كمان
الثاني: ما تقولي جاكم تاني هو انت ما لاقين فنان غير ال
الاول : ياخي انت ما طايقه لييه ياخي دا كل الشباب معجبين ب
الثاني : ما تقول لي صوته لانه صوته زي فرامل ال
الاول : المهم كان اليوم جميل ولكن امس الهلال عمل شنو مع
الثاني : كالعادة الهلال ما يفوز الا ما بعد يرفع لينا ال
الاول :اصله كل انديتنا تتاهل بالمباصره لمن يصلوا النهايا ينكشف ال
الثاني : ياخي سيبنا من الكورة والرحلة جبت معاك مستندات ال
الاول : كنت جايبها معاي لكن اترددت وغيرت راي لاني
الثاني : انت مصر نغير المحامي دا ولا
الاول : ياخي صاحبك دا لا محامي ولا
الثاني : ياخي الراجل مؤهل جدا ومسجل وكسب عدة قضايا مع
الاول : قضايا شنو وهو ما يمسك الا القضايا الميتة والمضمونة زي المريخ ما
الثاني : تاني رجعتنا للكورة ياخي خلينا مع ال
الاول : طيب خلينا ندخل جوة نناقش ال
الثاني : مافي مانع بس اول حضر لينا جك مويه و
الاول : الشاي جاهز ورسلت الولد الدكان يجيب ال
الثاني : ياخي مافي داعي ل
الاول: كيف انت هين وجياتك لينا ما
الثاني : ياخي انا بجيكم اكثر مما
على كل حال يستمر الحوار بين ال
وفي مره ثانية بكمل ال
ولاتذهبوا بعيدا

[درديري كباشي]

عندنا بعض الناس تجد الحوار معهم في شكل اسئلة بمعنى انه واحد يونس فيك ويقدم لك جمل ناقصة بحيث انه انت تعبيها كانك مشترك في مسابقة او داخل معاينة عمل او تعبئ في استماره . مشهور بهذا النوع من الحوار كبار السن غالبا . والطريف انه بعد ما تكمل له انت جملتك الناقصة يمدحك بعبارات ثابتة من نوع (عليك نوووور او عفارم عليك .... او دا الكلام .. او برافو عليك ). وبعض الناس مشهورين بالكلام الكثير ويحبو ان يلتف حولهم الاخرين .. يعني نخوض امثلة حتى تتضح الرؤيا ..
الاول : اها مشينا ليناس عباس وقلنا ليهم الكلام دا ما شنو
الثاني : ما بينفع
الاول : عليك نووور
الاول : وقلنا ليهم لازم اول ترجعوا لينا شنو
الثاني : القروش
الاول : برافو علييك .. ما هو اكان ما رجعوا لينا القروش يا انا يا
الثاني : هم
الاول : ممتاز يا انا ياهم لانه الموضوع بطريقتهم دي حقارة و
الثاني : قوة عين
الاول : ممتاز
الى ان نعود نكمل شنو
الموضوع : عفارم عليكم

[درديري كباشي]

عندنا ايضا بعض المفردات تستخدم للتمويه وهي تشبه السين في الرياضيات وهي العباره الشهيرة سين حيث سين عدد اكبر او اقل او اي شئ ... والكلمات هي
هناي ..... بتاع ..... فلان ..... مع تانيثهم بمعنى ... هناية ... وفلانه ... وبتاعة ... وكذلك الفرده .
في هذه الحالة الكلمات المستخدمة تكون الجملة مفهموة بين الطرفين المتحدثين فقط اما باقي الناس قد يفهمون الخطوط العريضة للموضوع لكن دون تفاصيل ...
يعني مثلا في بص سفري لو واحد رفع الموبايل واتصل ..
- يا جوكي ... قول للفرده دا يخبي البتاعات في الهناي .. بدون فلان ما يشعر بيه .... لانه حيلاقيكم تفتيش في كبري حنتوب ..
انت من استمعت للمحادثة تحس بان الموضوع فيه ممنوعات واشخاص مشبوهين لكن لاتعرف ما هي الممنوعات هذه ولا من هم هؤلاء المشبوهون ...
وايضا هذه المفردات يستخدمها النساء في الغيبة ( القطيعة )
- ما شفتي صاحبتك فلانة ... سايبة البتاعات جنب الهناي في الصالة ولا خجلت لمن شافتنا ..
من حديثهن انت ستحس بالغثيان لكن لا تعرف ما هو هذا الشئ الذي ترك في الصالة ..