طفش

[عباس الدسيس]

على غير عادة,, خرجتُ متاخرا من المنزل بعد ان تهندمتً,, وبحركه رياضيه سحبت مفتاح السيارة من الطاوله وضعت قدمي خارج باب المنزل متوجها الي العمل بنشاط يكسوه خفة روح ونعنشه زايده بعد ان ادرت محرك السياره شغلت ال أم بي 3 مشغل الاغاني جاني صوت عثمان حسين انا والنجم والمساء...... تذكرت ان اليوم نهاية الاسبوع عطله......... قلته والله الليلة ما ارجع البيت كان اطش بالشوارع .. أها العربيه اتحركت امشي وين يا ربي.. تاري الطششان ده صعب قمت سألت روحي إطش معناها شنو اشتغل العقل مع صوت الموسيقي والسرحان ...
ياخي حاجه غريبه كل مره اجيبوا لينا مصطلح جديد احنا نمسك فيهو بدون معرفت المعني لاكن اعتقد اطش بتشديد الشين من الفعل (الف) واللف هو الحوامه عند البنات بدون هدف وفلان يلف معناها بتاع سطله ويشتق من الكلمه اللطش، المسؤول الحكومي الغير نزيه قد (لطش) ما لطش من المال العام.. والام تقول لي ولدا : خلي بالك من الشارع ما تجي عربية تلطشك! واللطش هنا ليس معناه عربية تصدمك بس ، بل قد يكون في السيارة سائق يسوق وهو (لاطي) يعني سكران ، وعندما يقال لك مالك طاشي بمعني مالك زهجان والطششان هو الزغلله زغللت العيون والعيون بتزغلل لما مثلا تكون ماشي في اسواق فجأة اضيع منك الولد الصغير او البت عيونك تزغلل حالتك تبقي بالبلاء لانو ما حا تلقاهم الا بعد صعوبه لصغر الحجم وتلطش الناس للبحث تحت اقدامهم اما اذ راحت والدتهم دي ما مشكله شوف ليك اجمل بت في السوق واقعد اتكلم معاها تجي ناطه ليك زي النبله تلطشك لطشه ترجعك لي طششيك القديم داك.....
يتبع...............................

[حاتم مرزوق]

الحبيب عبس

ذكرتني ابني الصغير عندما طش مني بالحرم المكي في رمضان والحرم كان مليونيا وقتها -من عادتي ان اكتب رقم جوالي واضعه في جيب الأولاد وانبههم علي ذلك و حرصت في ذلك اليوم ان انبههم ايضا علي ان الملتقي دائما يكون عند باب السلام والأنتظار في اطمئنان.

فجأة لم اجد مصطفي - هرعت كالمجنون ابحث عنه وفجأة سمعت بكاءا شديدا تتوسطه كلمة ودوني باب السلام -بكية وودوني باب السلام - لمحته وهو علي هذا الحال وعندما وقفت امامه قال ودوني باب السلام - قلت له انت حتشحد ولا شنو ما خلاص لقيناك :d

يعني يا عبس مقطع حالك في الشغل - والله انا داير اهدي قصتك دي للجماعة جيرانا بتاعين البوست الأسمة رسالة توقفت عندها و ليه نحن كدا !!!

[عاطف عولي]

ود الشريف عباس وانا اتابع حروفك وكاني ادخل السينما دور تاني فقد تقمصتني ذات الحالة بعد ان سمعت رد المدير العام علي مشكلة تواجهني بالعمل والادارة بالدمام وانا بالرياض وتحتاج قرار اداري ومالي وكان الرد انت من يحل المشكلة وفجاة تقفز كديستي الي السطح كما يقولون





http://www2.0zz0.com/2009/07/25/14/355350377.gif (http://www.0zz0.com)




وتعتريني حالة من الهزيان الهستيري.
لا احس الا ونفسي بعد اخذ دش بارد في عز الشتاء وانزل من الغرفة( اخوك الوقت داك فرج الله وكدوسوا كما يقول احد كباتنتنا في سودان لاين يعني عزابي) وادرت محرك السيارة ووضعت شريط كاسيت ولا ادري الي اين ووجدت نفسي بحائل التي تبعد عن الرياض 700 كيلو مع ابنت عمي وزوجها

[moh_alnour]

اما اذ راحت والدتهم دي ما مشكله شوف ليك اجمل بت في السوق واقعد اتكلم معاها تجي ناطه ليك زي النبله تلطشك لطشه ترجعك لي طششيك القديم داك



لمحته وهو علي هذا الحال وعندما وقفت امامه قال ودوني باب السلام - قلت له انت حتشحد ولا شنو ما خلاص لقيناك :d

:D :D :p :p :D :D
قصة و أخرا لسه
;) تجيبوا لينا في المِحن يا ناس الرياض ;)

[ابوخالد]

سلام وتحية طفاشيه ....

أها يقولوا ليك فلان داك لطشته كهربا ... دى معناها الكهربا

واقفة لط والا شنو ؟؟؟؟؟

[نزار حسن محمد]

عباس الظريف ...
غايتو الله اجازى محنك ...هههههههههه
النبى فيك الكلام دا بتجيبوا من وين
كدى ورينى غايتو انا بقيت محل ما اشوف
اسمك تحت بوست بشرب كوز مويه
عشان ما اتشرق وتوش بدخل على
البوست تسلم لنا يالحبيب وادائماً
خليك قريب.

[عباس الدسيس]

اول ما جيت السعوديه جديد كرت كنت نازل مع اختي نايم في الشقه ماسك سبحت المغتربين زي ما بقولوا (( الريموت)) ادور في القنوات لما اكون طفشان انزل البقاله تحت اشتري لي عصير بي ريال.. الناس ديل انواع العصاير عندهم ما بتكمل قلته يا جماعه كان باريت العصاير الكثيره دي اقامتي الطلعوها لي دي تنتهي انا اكون لسع ما كملته انواع العصاير اشكال والوان طيب مع الطفشه دي نعمل شنو عندي واحد دفعه جاء السعوديه قدامي شيلته تلفونوا من السودان اتصلت عليهوا قالوا ترك الشغل سألت اختي ممكن القي السودانيين وين قالت لي في شارع اسموا غبيرا العام بس اعمل حسابك ما تطلع في البلد دي تروح ما تعرف البيت... اتوكلت قلته يلا نكسح في البلد العجيبه دي مع العلم انا ضاربني السلك (( يعني مفلس)) مشيت شارع غبيرا العام سالت عن احسن محل كوارع بعد وصفوا لي مشيت وقفت جمبوا قلته امكن ربنا اهدي صاحبي ده اجي محل الكوارع دي الزول ده من السودان مشهور بي حبوا للكوارع اها ديك يا قنصه قانص لي صاحبي في عتبة المطعم اعاين ده ماشي ده جاي ده بتكلم برا ده باشر بي يدينوا والله المغتربين ديل غاشيننا غشه تاري نصهم مجانيين.... اها عليك امان الله كان اشوف ليك كورلا فضيه راكب فيها زولي الما بغباني قلته اعمل ليهوا مفاجاة اجي من وراء واضربوا في ضهروا تاني عدلت رأي الزول ده احمق اقوم الخني بي بنيه اكسر فيني سن.... مشيت عليهوا حق الله بق الله سلام واشواق جيت متين حكيت ليهوا معاناتي مع الشقه والنوم دخلت معاينتين طرشقن.. قال لي يا فرده بعد نشيل الكوارع يلا شيل شنطتك انا وفيصل ماجرين سوا.... مشينا الشقه ياخي دي مريحه بي طريقه عجيبه قعدته ليك بي سروالي الطويل في نص اللوضه ماسك لي كراع سرير مكسور هاك يا الونسه زي المأجر الشقه انا... طيب يا جماعه الشغل كيف الاخوان مشكورين عملوا لي عملية ترميم اشتروا لي بدله جديده من اسواق الهرم علي فكره دي ارخص اسواق .... قال لي يازول كاتب سيرة ذاتيه بالعربي انت عايز تشتغل في مشروع الجزيره اقلب الكلام ده كلوا انجليزي.. قاعد في نص السرير مع الجرايد كل يوم اكتب لي مجموعه ارقام فاكسات الجماعه اشيلوا ارسلوا من المكتب يوم جاني فيصل قال لي الشرك قبض ده الوصف خلي عمر امشي معاك تعمل المعاينه انا مشغول لبسته البدله زي العريس صلينا المغرب في المسجد بره من المسجد في واحد ببيع عطور بي رماد القروش عمر اشتري عطر بي خمسه ريال وقتين قربنا لي محل المؤسسه شلته فتيل الريحه اتعطرته بي قريب ربع الفتيل لانو هي بتتطلع بي سرعه... دخلته المعاينه طلعت عمر قال لي انشاءالله خير قلته ليهوا خلاص الجماعه شغلوني قال لي والله كان ما بدلتي دي تفتش سنة ما تلقي ليك شغل.... قلته ليهوا الكلام الشماعه..... اها الراتب كم .. بعد ما قلته ليهوا. لا ما بصدق انت محظوظ حظ يا خي يهودي........ استلمت الشغل بعد تدريب لمدة شهر كنت بحلم بي كورلا زي عمر جابوا لي كامري اوتوماتيك يا ولد اتجدع في شارع غبيرا جمب محل الكوارع..... المصيبه الشغل المؤسسه عندها برنامج عايزه تبيعوا لاصحاب ورش السيارات صاح انا ظهرت بي مظهر كويس من ناحية اللبس بتكلم كويس فهمت البرنامج بس خبرتي في البيع صفر.. هاك يا طششي كل بتاع ورشه امشي ليهوا اقول لي يا زول انت ما عندك شغله برنامج شنو الامور ماشه معاي قرف بصوره سيئه رجعنا لي حالة الطفش ثاني... الناس في المؤسسه يطلبوا تقرير زيارات دي هينه التقرير بتكتب الكلام بغلبنا بس المشكله يتم مقارنة التقرير مع صرف البنزين يعني كيف تكتب تقرير وما تكون لفيت التنك بتاع العربيه مليان طيب دي حلها كيف.. بقيت كل يوم بالليل تلفزيون بي النهار بعد اطلع الصباح من المؤسسه اعبي التنك فل واطش عندي محله كده بنوم فيها اخلي ليك السياره شغاله والمكيف شغال فوووووووا انا ضارب النوم........ مندوب مبيعات نوم خمسة اشهر طافش بالخلا حتي تم فصلي من الخدمه ....

[عباس الدسيس]

:d :d :p :p :d :d
قصة و أخرا لسه
;) تجيبوا لينا في المِحن يا ناس الرياض ;)

هههههههههههههههه

[عوض الكريم الخواض]

ماسك سبحت المغتربين زي ما بقولوا (( الريموت)) ادور في القنوات
...


السبحة مااااااا عندكم ...:d:d

[عباس الدسيس]

مرحب بي مرورك يا حبيبنا الخواض واهو قاعدين نسبح نشوف اخرتا لي وين

[صهيب البصير]

رايع يادسيس

طبعا دسيس بكثر الدال هي ايضا مصطلح معناهو حاجه حلوه او سمحه وليس دسيس بفتح الدال وهوا اسمك
والله ليك حق عصمت اكون اخوك
انتوا يابتاعين سجارات لان الكلام البطلعوا دا بى خدرا مااطلع
او مجانين
والخيار لك
تقبل مرورى

[عباس الدسيس]

هلا يا صهيب يا دسيس بكسر الدال علي مرورك بتاع سجارة احسن من مجنون .