المساعد الشخصي الرقمي

مشاهدة النسخة كاملة : ليه اطفالنا ما لديحين


مفيد الوحش
24-07-2009, 08:34 PM
الشــــــــــــــافع أو الشافعة اللديح/هـ بترفع الضغط لكن الشافع/هـ الفصيح بكون حضور جميل وتعليقاته أجمل والناس دائما بتتلم حوله في المناسبات أبوهـ عادة بقشر بيه وبدردق ليه الاسئله عشان يوري الناس ولده دى تفتيحه كيف الأم عادة بتكون خائفة من العين عشان كدي طوالي بتنهرو ياولد امشي من هنا 0000

مقارنه بأطفال العالم من حولنا المصريين والسوريين مثلا نحن أطفالنا (هُبل) وما يعرفوا الكلام والفصاحة إلا من رحم ربي
زمان في المدرسة سألنا ولد استأذنا المصري الحاكم مصر منو قال الرئيس السادات وسألنا ولد أستاذ الطاهر قال السودان حاكماهو أمي

يوم ألجمعه حضرت لي برنامج بقدمنوا بنيتين هن حلوات بس عويرات الشقاوة ألفي فصاحة الأطفال ديل ماعندهن كلامن كله دراب

ليه أطفالنا ما فصيحين ؟؟؟
محمد الجزولى
25-07-2009, 12:27 AM
صدقا لكلامك اخى مفيد كان هنالك برنامج فى التلفزيون المصرى اسمه لعب عيال
كنت استمتع وانا اشاهده لخيال الاطفال الواسع ... وسرعتهم فى الاجابة بدون تلكؤ او تفكير ... ما بعرف يمكن نحن السودانيين شعب يحب الصمت وما بتكلم فى الفارغه والمقدوده ...
على العموم الموضوع فعلا عاوز دراسه وتحليل ..
لك ودى اخى مفيد الوحش .. فالموضوع يستحق المناقشه العميقه
مدنيّة
25-07-2009, 12:34 AM
زمان في المدرسة سألنا ولد استأذنا المصري الحاكم مصر منو قال الرئيس السادات وسألنا ولد أستاذ الطاهر قال السودان حاكماهو أمي



غايتو دي بااااااااالغت فيها :cool:


ياوحش اطفال الزمن دا احسن كتير من طفولتنا احنا
كنا عويرين جنس عوارة
والكلام ما بنعرفه

لكن هسي الاطفال غير

بس احتمال رهبة الكاميرا ليها اثر سلبي
لانها بتخلي الزول الكبير فينا يتكلف فما بالك بالطفل ؟!!
ابوخالد
25-07-2009, 12:50 AM
تعرف يامفيد يا أخوى العيب ما من شفعنا لكن العيب الحقيقى

منى ومنك ومن أبائنا ... قول لى ليييييييييييييه ...

يا أخوى نحنا مشكلتنا الحقيقية عايزين أولادنا ( وهم شفع لسه )

يكونوا مثاليين فى كل شئ ــ بمعنى :

1/ لازم يكون مؤدب قدام الضيوف .

2/ لازم مايخلى واحد يحقر بيهو .. إذا فى المدرسة والا لومشيت

لناس او جوكم ناس ( مع العلم إنو لسه صغير وما بيعرف حقارة

وصرة يعنى شنو ) .

3/ لازم يكون مرتب فى حاجاته ونظيف فى ملابسه فى المدرسة

او البيت .. ولما يلعب مع العيال مايوسخ ملابسه ومايقطع جزمته

ومايكسر ألعابه .. وما يكورك .. واذا قعد فى كرسى او مرتبة لازم

مايتململ عشان مايخرب الملاية والا المخده وما يوسخ الكرسى

وما يشرط يدين الكرسى ....و......و.......و......و.......و.......و

وطبعآ مسلسل الأوامر الجوا البيت دى الكاتب والمخرج المنفذ

لها هو وزارة الداخلية عشان النضافة وكده ..( التقول أمهاتنا زمان

ماكانوا بيحسوا بالتعب لما الواحدة فيهم تقش الحيشان الاربعة

والاوض والراكوبة والحمامات والمطبخ وتملأ الأزيار وتغسل العدة

وتملأ التلاجة وتغسل الهدوم وتكوى للمدارس وتخيط الزراير وتلمع

الشبط أو الجزمة وتعمل شاى الصباح والفطور قبل مانمشى المدرسة

و .......................و...................و...... .......الخ).. مع العلم إنو الشقة

الساكنة فيها ماتساوى ليها صالون وبرندته من بيوت السودان .....

والله ياأخوى الوجع شديد والعلاج ماساهل وداير صبر علشان تقنع

نفسك وتقنع الحوليك إنو البنعمل فيهو مع أولادنا ده بيخليهم إنطوائيين

ولسانهم تقيل ... وخجلهم بزياده عن عيال العرب التانيين .....

ياأخوى والله عايز أفضفض لكن الشغل ... وبجيك بى رووووووووواقة كدة ...
ـــــــــــــــــــــــــــــــــــ


(وتقول لى ريموتى أنا صينى ... حرم العيال مكسرين ولاعشرين ريموت)

حسى ريموتى صينى حمته خفيفه ... لكن العقول الصينيه دى نعمل فيها

شنو ........................(الزينة ماوشوش .. الزينة فهم)

ولك كل الود والإحترام
بت أم درمان
25-07-2009, 12:59 AM
اطفال السودانين بالذات زي ما قلت لاحظت عليهم الهبل والعوارة ... ودا راجع لتعامل الام والاب معاهم طبعا... يعني اطفال بقيت الاجناس تلقاهم نجيضين لمن احيروك ... تعاين ليهم وانت ساكت ... لي ؟؟؟ لأنهم اهاليهم بتعاملو معاهم برقي اكتر ... بتونسو مهاهم ... بيدوهم من وقتهم للدردشة ... وبردو على اسئلتهم بفهم ووعي ... التعامل مع الاطفال فن ... والاطفال في حد ذاتهم فن ... لبراءتهم ... عشان كدا دايرين البعرف يوجهم ويعتني بيهم ويتصرف معاهم بوعي وفهم
مدنيّة
25-07-2009, 01:15 AM
تعرف يامفيد يا أ خوى

ياابو خالدالباقي مكتوب الحبر السري ولاشنوووو :(
ابوخالد
25-07-2009, 01:49 AM
ياابو خالدالباقي مكتوب الحبر السري ولاشنوووو :(



الأخت الرائعة / مدنية

والله أخونا مفيد نكت لينا جراح قلنا نتناساها تب ...

لاأنا ولاإنتى ولا هو .... ح نقدر نعمل فيها حاجة....

ومشيناها خطآ كتبت علينا ومن كتبت عليه خطآ مشاها


ولك كل الود والإحترام
لحظة :
المشاركة لما كويتا بالجرح ده حتى ظهرت .
مفيد الوحش
25-07-2009, 09:09 PM
صدقا لكلامك اخى مفيد كان هنالك برنامج فى التلفزيون المصرى اسمه لعب عيال
كنت استمتع وانا اشاهده لخيال الاطفال الواسع ... وسرعتهم فى الاجابة بدون تلكؤ او تفكير ... ما بعرف يمكن نحن السودانيين شعب يحب الصمت وما بتكلم فى الفارغه والمقدوده ...
على العموم الموضوع فعلا عاوز دراسه وتحليل ..
لك ودى اخى مفيد الوحش .. فالموضوع يستحق المناقشه العميقه

اهو المصريين ديل شفعهم الواحد يلدوه" بخشمين"وسته وعشرين لسان

واطفالنا لسانه يطلع بعد السبع طاشر ليه
البراء
26-07-2009, 02:27 AM
مع تقديري لكل الاراء الني كتبت الا ان النشاه هي التي حددت شخصيه كل منا لذا يفترض كل مانراه بمثابه خلل في شخصنا تعديله لكي ناتي بثمار صالحه ودمتم
مفيد الوحش
26-07-2009, 02:46 AM
مع تقديري لكل الاراء الني كتبت الا ان النشاه هي التي حددت شخصيه كل منا لذا يفترض كل مانراه بمثابه خلل في شخصنا تعديله لكي ناتي بثمار صالحه ودمتم
البراء

اول شي مشتاقين ايها الامير

ثانيا نعم اوافقك الراي
النشاة

ودي الحته المفروض نقيف عنده كتير
عوض الكريم الخواض
26-07-2009, 03:10 AM
يا أخوانا هووووووووووووووووي ...انتو بتتكلموا عن ياتو شفع ...

لو قاصدين شفع زمان بقول ليكم كلامكم صاح ...
لكن لو قاصدين شفع الزمن دا ...
عيييييييييييييييك ...

أقول ليكم ( ما عارفين ساي) ...
شفعنا أسى بقى عندهم رأي فى أي حاجة ...

يآخى ديل عارفين حاجات ...
نحن لامن ( شنيباتنا ) قامن ما عرفناها ...
كدى راجعوا الكلام دا تانى .
مفيد الوحش
26-07-2009, 03:25 AM
يا أخوانا هووووووووووووووووي ...انتو بتتكلموا عن ياتو شفع ...

لو قاصدين شفع زمان بقول ليكم كلامكم صاح ...
لكن لو قاصدين شفع الزمن دا ...
عيييييييييييييييك ...

أقول ليكم ( ما عارفين ساي) ...
شفعنا أسى بقى عندهم رأي فى أي حاجة ...

يآخى ديل عارفين حاجات ...
نحن لامن ( شنيباتنا ) قامن ما عرفناها ...
كدى راجعوا الكلام دا تانى .


الخواض

تصور اولاد الزمن دي رغم توفر كتير من التكنولوجيا ووسائل الحياة العصرية لكن برضو عقدة اللسان وختة الاصبع في الخشم دي عندهم

كدي نسمع باقي راي الناس

جهة نظر مقدرة ولمست جانب مهم ياخواض

ودي