زياره للقــمر ... الدعــوه عامــه

[محمد الجزولى]

عندما فكر احمد بالرجوع الى السودان نهائيا والاستقرار وفتح مشروع تجارى غير مسبوق يحقق به ارباحا سريعه كان قد قرر فى نفسه ان يستشير بيوت الخبره واصحاب التجارب الاستثماريه فى السودان حتى لا يدخل فى استثمار خاسر ويخسر تحويشة عمره ...
حزم امره وتوكل على ربه وانهى اجراءات الغاء كفالته سريعا ثم حجز مقعده فى اول طائره متجهه الى الخرطوم
وصل احمد الى قريته الواداعه التى ترقد على ضفاف النيل ووجدها هى هى كما تركها
... لم تتغير ولم تتبدل .. نفس الوجوه ونفس الروتين اليومى ونفس المعالم التى تركها
قبل سبعة سنوات من الغربه .... الا انه لاحظ شيئا غريبا فى القريه .. فقد لاحظ ان الكل
مشغول بامر ما ... امر لم يألفه فيهم ....
اراد ان يسال ويتقصى عن الامر ولكنه اثر الصمت عسى ان تكشف الايام ما يدور فى هذه القريه الوادعه
استيقظ احمد فى صباح اليوم التالى واستلقى على سرير يتوسط ذلك الحوش الواسع
واخذ يحتسى كوبا من الشاى ...لحظات و مر من امامه ابن اخيه الصغير وملابسه متسخه وراسه يعلوه الغبار
يا ولد تعال هنا ده!!
ايوه يا عمى ..فى شنو ؟؟؟
خش جوه امشى استحمه وغير هدومك ديل…
استحمى ... عليك الله عاين ده !!! هوى يا عمى انا بكره ماشى القمر تقول لى استحمى!!!
قمر شنو يا ولد انت مطرطش ولا شنو ؟؟؟؟ انتو الحله دى الحاصل فيها شنو ؟؟؟
فى هذا الاثناء مرت به حاجه سعديه وهى امراءه تخطت الخمسين وهى تسير مسرعه
وثوبها متسخا وفى حالة ليست باحسن من حالة ذلك الصبى الصغير
يا حاجه سعديه كيفنك ..
اهلا حباب احمد ..
انتو المويه قاطعه فى الحله ولا شنو ؟؟؟؟
ليه يا احمد يا ولدى ؟؟؟ المويه قاااااعده نحمد ربنا ؟؟؟ علا مالك بى تسال من المويه ؟؟؟
اصلو يا حاجه انا فى الحله دى لى يومين وشايف الناس ديل شكلهم كده مغبر وهدومهم وسخانه ... انتو الحمام ده مابنو مالكم ؟؟
اجى يا احمد يا ولدى ... هو زول فاضلو يومين ويمشى القمر كمان المستحمى ليها شنو

جن جنون احمد !! الناس دى جنت ولا شنو يا ربى ؟؟؟؟
قمر شنو ده الشابكننه بيهو ده ؟؟؟ وهو الماشى القمر بمشى وسخان ومبشتن !!!
ياخى انسى ياخى ... الناس دى الظاهر عليها مخها ضرب!!!
جلس احمد يفكر قليلا ثم قرر ان يبدا من يوم غدا البحث عن مشروعه الاستثمارى ..
. وتحقيق طموحه قبل ان تتبعثر الدولارات التى احضرها معه ...
فى الصباح لبس بدلته وتوجه الى محطه الباصات ... ليعرض مشاريعه المقترحه على احدى بيوت الخبره ليختار واحدا منها ...

عندما وصل احمد الى محطه البصات راى ازدحاما غير عادى على شباك التذاكر ....
الله !!! الحاصل شنو يا ربى ... انتو الليله الحله دى كلها مسافره ولا شنو ؟؟؟
اقترب قليلا من شباك التذاكر ووجد اناسا يعرفهم واخرين اتوا من القرى المجاوره واختلط الحابل بالنابل فى شباك التذاكر...
التفت على اول شخص قابله :
انت الليله فى شنو ؟؟؟؟ الناس دى ماشه وين ؟؟؟؟
الناس بى تحجز تذاكر عشان مسافرين للقمر !!!
مسافرين القمر !!!؟؟؟؟ وهو القمر بسافرو ليهو بالبصات ؟؟؟؟
ثارت ثائرة احمد ... يا اخوانا انتو جنيتو ولا شنو ؟؟؟؟ انتو عبيطين ؟؟؟ الناس دى بى تنصب عليكم ... وفروا قروشكم دى احسن ليكم ... التفت الى بائع التذاكر قائلا
يا زول هوى والله انا بدخلك السجن !!! انت بى تنصب على الناس دى ... اتقى الله ياخى
بائع التذاكر: يا زول هوى ما تكورك ... عايز تقطع تذكره انت كمان جيب قروشك ولو ما عاوز اختانا ياخى خلينا نشوف شغلنا
وبعدين انا ما ضربت زول على ايدو عشان يسافر للقمر ... العالم دى كلها ماشه بى رضاها يا اخى
ياخى والله انت زول بجح صحيح .... قمر شنو يا اخوى العاوز تسفر ليهو الناس ديل !!!
والله انا دربى ده بفتح فيك بلاغ ... يشوفو استهبالك ده !!!
يا اخوى كدى زح من الشباك ده!!! وامشى افتح بلاغ ... افتح بقاله ... بس اختانا ياخى؟؟؟؟
تنحى احمد قليلا ثم حدث نفسه : العالم دى الحصل عليها شنو؟؟؟ ياخى ديل عبيطين عديل كدى .... اخذ نفسا ثم تابع حديثه لنفسه
لكن يا احمد ما ممكن الناس دى كلها تكون مجنونه وانت وحدك النصيح ... !!! اسى عليك الله هضربتك مع نفسك دى ما جن؟؟؟ طيب امشى اقطع تذكره وسافر القمر معاهم !!! انت خسران حاجه ؟؟؟ على الاقل تشوف الناس دى نصيحة ولا عبيطه ... بعدين بقولو موت الجماعه عرس ... ياخى موت معاهم احسن !!!

اتجه احمد الى شباك التذاكر وقطع تذكره وقبل ان يدفع الفلوس سال بائع التذاكر: هو انت القمر ده بسافرو ليهو بالباص ده ؟؟ ولا بركبونه صاروخ بعدين ؟؟؟
نظر اليه بائع التذاكر باحتقار ولم يكلف نفسه عناء الرد عليه ...
وصل الباص فى الوقت المحدد واخذ كل مقعده فى انتظار بدء الرحله الى القمر وصاحبنا احمد يجلس وسطهم كالاهبل وهو يسال نفسه عن مغزى هذه الرحله ومن الذى خطط لها ومن يدعمها وكيف بهؤلاء الذهاب الى القمر وهم بهذا اللباس الرث .. اكيد ان من يدعم هذه الرحله هم الصهاينه .... يهود اولاد ....!!! وكمان ما بعيد على اليهود ديل يصرفوا قروشهم عشان يحققو مصلحه ... ما هم سفروا الفلاشا ... غالبهم يسفروا الناس البسيطين ديل ... مال على الشخص الذى يجلس بجانبه وساله : يا اخوى بى نصل فى كم يوم؟؟؟
نظر اليه الجالس بقربه واخذ يضحك بصوت عالى وهو يقول يا اخوى كلها ساعه ونصل شيل الصبر يا اخوى !!

[محمد الجزولى]

شيل الصبر!!! يا اخوانا الناس ديل مجانين ولا انا المجنون ؟؟؟؟ هو انا كان ما شايل الصبر كنته ساكت عليك لى هسى ؟؟؟
سارت العربه مسافة ساعه وفجاءة توقفت وطلب السائق من الجميع النزول
يا اخوانا وصلنا ... شتتوا بالله .... خلونا النرجع ...
نظر احمد خارج البص فوجد تجمعا من الناس يقفون طابور كانهم فى مارش عسكرى

نظر الى جاره وقال له هم الجماعه ديل ح يسفرونا القمر طوالى ولا بى نبيت هنا ؟؟؟
جاءه الرد : يا اخوى انت نصيح ولا بتستهبل ؟؟؟ انزل ياخى قبال ما ارتكب فيك جريمه!!!
عالم مجانين صحيح !!
انا برضو المجنون ؟؟؟ احتمال والله ... يا اخوانى هو الرجعنى البلد دى شنو ؟؟؟
نزل احمد مع الجماعه وهو كالاطرش فى الزفه وقف فى طابور طويل فى انتظار المجهول !!! فحقيقةهو لا يدرى ماذا يجرى ... ولا احد يريد ان يقول له ....
مضت اكثر من اربع ساعات وهو يزحف فى ذلك الطابور الطويل حتى وجد نفسه فى مقدمة الصف وشباك صغير يجلس عليه رجل مفتول العضلات خاطبه قائلا

نعم يا اخوى ؟؟؟ قروشك وينه ؟؟
قروش شنو يا اخوى ؟؟؟
لا حول ولا قوه الا بالله ... يا اخوى نحن ح نستعبط من اوله كده ؟؟؟ عاوز تخش مجان يعنى؟؟؟
يا زول استهدى بالله كدى ... اخش وين يا اخوى؟؟؟!!!
اللهم طولك يا روح ... يا اخوى انت عاوز تعمل فيها تفتيحه ؟؟... عاين فوق وشوف مكتوب شنو ؟؟؟
رفع احمد نظره الى الاعلى ليجد لوحه كبيره كتب عليها باللون الازرق ( محل القمر) حمام بخار وساونا لجميع الاعمار ...تدليك طبيعى ....
انفجر احمد ضاحكا بصوت عالى ثم تحول ضحكه الى هستيريا غريبه .... وهو يتمتم :
قلتوا لى ماشين القمر !!! القمر يا وهم ؟؟؟ القمر بوبا .... لكن ما بالغتو ... والله بالغتو عديل كدى .. قال القمر قال ..!!!. قمر دين زاتو ياخى !!!
بعد ان هدا احمد قليلا وافاق من المفاجأه التى لم تكن تخطر له على بال اتته فكره جهنميه
لماذ لا يفتح حمام بخار ويحقق مشروعه الاستثمارى الذى سعى اليه سنين غربته ... فهو مشروع مربح وسوف يدر عليه دخلا هائلا ... لماذا لا يفتح حمام بخار فى المدينه التى تجاور قريتهم ..ويوفر على الناس مشقة السفر الطويل . فكره جهنميه ...

فى الصباح شرع فى اجراءات فتح المحل واصدار التراخيص اللازمه لذلك ثم ثبت لوحه كبيره وكتب عليها (زحل ..) حمام بخار ... تدليك طبيعى... تبييض ...
وبعد ان اطمان الى ان كل شى جاهز ذهب الى منزله وهو يعد نفسه ليوم عمل طويل فى الصباح الباكر ...
استيقظ باكرا اخذ دشا باردا وذهب الى محله وهو يمنى نفسه بطابور طويل من الزبائن
.
فى الطريق فكر ان يوظف احد العمال لتنظيم الصفوف واخر لتحصيل الرسوم ... بينما يجلس هو فى الاداره ...
حلم احلاما جميله ووبخ نفسه لاضاعته سنين من عمره قضاها فى الغربه من دون فائده ملموسه ...
. لو كان فتح مثل هذا المحل قبل سنتين لكان الان لديه اربعه محلات مثلهم !!!
ولكن ملحوقه ياخى .... سرح طويلا وحلم طويلا !!!!
وعنما وصل الى المكان الجمته المفاجاه ...!!!
فقد كانت هنالك عدة لوحات كتبت بالخط العريض وثبتت اما م محلات تجاور محله
( محل عطارد ) للساونا .حمام بخار لجميع الاعمار...
محل (المريخ ) للساونا .. حمام بخار لجميع الاعمار ....
( محل المشترى ) ..حمام بخار لجميع الاعمار .
(محل الزهره) للساونا ..حمام بخار لجميع الاعمار.

وياهو ده السودان ...

[عبدالرحمن مدثر]

اننا ياصديقى ادمنا على المشاريع الجاهزة

وابتعدنا عن الابتكاااااار

تفتح محل غاز

الدنيا كلها تولع بعدك

تفتح اتصالات تلقاها على قفا من يشيل

تعمل محل تركيب عطور تركب التونسية

عليك نور ياهو دا السودان

[درديري كباشي]

حلوة يا الجزولي القصة واكثر حاجة عجبتني فبها حمام المريخ بس هي بتشديد الميم ولا فتحها او كله شغال

[بنت الرفاعي]

والله صدقتوا , قبل كم سنة واحد في فريق ناس جدي فتح محل موبايلات , إنشاءالله أسي صفين متقابلات كلهم موبايلات , الواحد ذاتو يحتار يدخل لمنو فيهم!!!!!:confused::eek:
الواحد بالله مايفكر في مشروع ويعملو إلا يجي غيرو يعملو وكمان متطور أكثر منو!!!
غايتو الله يهون.

[ابوالنور]

الواحد بالله مايفكر في مشروع ويعملو إلا يجي غيرو يعملو وكمان متطور أكثر منو!!!
غايتو الله يهون.
طيب ما تشوفو لينا مشروع عرس يا مرام
حمد الله علي السلامة بالمناسبة
تحياتي يا ودالجزولي

[غلباوى]

تمام يا ود الجزولي هو الحاصل بي عينه
حتي في الزراعه
بس في واحدخريج جديد مقلب ليك المزارعين جنس مقلب
خلاهم كلهم زرعو طماطم كان سوقو حار (وزرع بامبي)
شوال البامبي باعو ب كم وتلاتين
قبلو علي البامبي (زرع شطه)
وكده كان حديث الموسم
تحياتي

[محمد الجزولى]

اننا ياصديقى ادمنا على المشاريع الجاهزة

وابتعدنا عن الابتكاااااار

تفتح محل غاز

الدنيا كلها تولع بعدك

تفتح اتصالات تلقاها على قفا من يشيل

تعمل محل تركيب عطور تركب التونسية

عليك نور ياهو دا السودان

ابو مزن صاحب الحرف الانيق
يحكى ان الجماعه ارادو ان يعملو مسابقه يكرمو الخمس الاوائل الذين ادخلوا الامجاد فى السودان ... اعلن الفائز الاول ... اما الفائز الثانى فطلع 100 شخص مشترك فى الثانى
حكم والله ( بكسر الحاء)
ممتن لك مرورك هنا يا صديقى

[محمد الجزولى]

حلوة يا الجزولي القصة واكثر حاجة عجبتني فبها حمام المريخ بس هي بتشديد الميم ولا فتحها او كله شغال

ههههه .. والله ضحكتنى يا درديرى ... يعنى ما شايف لون الخط ده ولا شنو ؟؟
وعشان الجماعه ما يزعلو خليها كلها شغاله
شاكر لك مرورك هنا

[محمد الجزولى]

والله صدقتوا , قبل كم سنة واحد في فريق ناس جدي فتح محل موبايلات , إنشاءالله أسي صفين متقابلات كلهم موبايلات , الواحد ذاتو يحتار يدخل لمنو فيهم!!!!!:confused::eek:
الواحد بالله مايفكر في مشروع ويعملو إلا يجي غيرو يعملو وكمان متطور أكثر منو!!!
غايتو الله يهون.

طبعا السودانيين حنان شديد ... عشان كده ما بخلوا الزول يغرق براهو ... لازم يشاطروهو الاحزان والافراح ...
شاكر لكى مرورك اختى moram

[محمد الجزولى]

طيب ما تشوفو لينا مشروع عرس يا مرام
حمد الله علي السلامة بالمناسبة
تحياتي يا ودالجزولي
ابو النور يا ظريف
مشروع العرس ده الحاجه الوحيده التشيل فيها شيلتك براك ... بدون ما حد يقلدك
لكن بينى وبينك مشروع مربح ...
شاكر لك مرورك اخى الكريم

[محمد الجزولى]

تمام يا ود الجزولي هو الحاصل بي عينه
حتي في الزراعه
بس في واحدخريج جديد مقلب ليك المزارعين جنس مقلب
خلاهم كلهم زرعو طماطم كان سوقو حار (وزرع بامبي)
شوال البامبي باعو ب كم وتلاتين
قبلو علي البامبي (زرع شطه)
وكده كان حديث الموسم
تحياتي

هههه .. والله يا غلباوى صاحبك ده عندو عقليه تجاريه جباره ...
لكن الكلام ده ما بمشى فى المشاريع الدائمه غير الموسميه
لك تحياتى واحترامى اخى غلباوى

[مايسة]

دي مشكلتنا احنا السودانيين وفي الفترة الاخيرة ذادت بشكل ملحوظ

حتي في القنوات الفضائية وفي الشوارع وفي كل ما يحيط بنا

- قصتك روعة -

بتخيل انو التقليد اذا كان في حاجة ايجابية ما مشكلة - تبقي المشكلة اذا كان التقليد بشكل غبي واعمي في الاشياء الغير صالحة .

همسة : زمان فتحنا لينا محل اتصالات وعملناهو الدقيقة بمائة - تعال شوف بعد فترة الشارع كلو بقي مائة

[محمد الجزولى]

دي مشكلتنا احنا السودانيين وفي الفترة الاخيرة ذادت بشكل ملحوظ


همسة : زمان فتحنا لينا محل اتصالات وعملناهو الدقيقة بمائة - تعال شوف بعد فترة الشارع كلو بقي مائة


المشكله انه بهذا المسلك الجميع خسرانين .. ولا ادرى اهى نوع من المنافسه ... ام التقليد الاعمى
شاكر لكى مرورك الكريم

[نزار حسن محمد]

محمد الجزولى الرجل الفنان ...سرد بديع لواقع معاش
كــــــــــــدى ادينى رائك فى المشروع دا
رائك شنوا نعمل مشروع عصير كيوي
وانت رسل من الامارات ... وانا ما بقصر بالسودان .
وبعد ما المشروع انجح نقلبه بتاع طعميه :p

[ابوخالد]

غايتو ناس السودان يجيهم مغترب راجع نهائى

يعملوا فيهو عمائل ........ يدردقوا ويمصوا العندو

فى النهاية يقعدوا فى ضلهم القديم داك ويسفوا

فى الصعود (التمباك ) ... وكان مرا صاحبنا بى جنبهم

وسلم عليهم بحرارة تلقاهم يعاينو ليهو كويس ويرد

واحد منهم ( بهذ الراس) وكلمة ( اهلآ ).. إحتمال تسمعا

وإحتمال ما تسمعا ذاتو ... وبعد مايمشى قدام شوية ...

واحد فيهم يقول للجماعة ( إنتو الزول ده ما راجع والا شنو )...
دى حال السودان ما بيتغير ولا الناس بيتغيروا ......

وذى ما قلت أخى /محمد الجزولى .. تعمل مشروع يمسخوا

عليك .... وتقعد تحرق فى أعصابك ساكت ... وتكره اليوم الرجعك

نهائى ....

** وديل أهلى ***

ولك الشكر الكتير على لحظات المتعة الإصطحبتنا فيها للقمر ...

[العاقب مصباح]

سافرنا إلى القمر وأخذنا حمام باخر طازج وسافرنا بقلم مبدع يشبه الجزولى وأخذنا جولة خيال بصحبتك وأفكارك المُدهشة دائما ما تتطرق لمجال لم يطرقه احد قبلك فى فن الكتابة فتسحرنا بفكرك وقلمك معا حين يُشكلان ثنائية... فنجلس ونصفق ونمنى النفس كالعادة بخاتمة نُحددها قبل أن نُكمل ولكنك تخيب أملى فى كل لحظة وتختار نهايتك من لون خاص يجعل الدهشة سيدة الموقف... لك دهشتى يا مبدع واحترامى وحبى لقلمك الساحر دمت بخير

[ودالعمدة]

الرائع محمد الجزولى
اكثر ماأعجبنى فى قصتك ( القمرية ) ثنائية مزج الخيال بالواقع
الى درجة يصعب الفكاك بينهما او التمييز بينهما ...
ومايعجب أكثر ( الرمزية ) التى تجعلك تسرح الى أن تفكر فى :
(( المشــــــــروع الحضــــارى الاستثمــــارى ))
لك التحية والتقدير ..

[moh_alnour]

ما طار طائر و أرتفع إلا كمار طار وقع
ما قام مشروع و نجح إلا كما قام فشل و السبب المحاكاة و التقليد الأعمى
ودا السودان ياهو دا السودان

[محمد الجزولى]

محمد الجزولى الرجل الفنان ...سرد بديع لواقع معاش
كــــــــــــدى ادينى رائك فى المشروع دا
رائك شنوا نعمل مشروع عصير كيوي
وانت رسل من الامارات ... وانا ما بقصر بالسودان .
وبعد ما المشروع انجح نقلبه بتاع طعميه :p

ههههههههههههه
قلته لى عصير كيوى .... وده نفتحو جنب ادم شيه ولا شنو ؟؟؟
والله يا نزار عندى اخوى قبل فتره فتح جزاره فى مكان اى زول شافو قال الزول ده مجنون ولا شنو الزول ده داير يبيع لى منو .... تصدق بعد شهر واحد كان جنبو اتناشر جزاره
اها يا اخوى نزار ده يقلبو محل طعميه برضو ولا شنو ؟؟؟
لك ودى وتحياتى اخى نزار ...

[محمد الجزولى]

غايتو ناس السودان يجيهم مغترب راجع نهائى

يعملوا فيهو عمائل ........ يدردقوا ويمصوا العندو

فى النهاية يقعدوا فى ضلهم القديم داك ويسفوا

فى الصعود (التمباك ) ... وكان مرا صاحبنا بى جنبهم

وسلم عليهم بحرارة تلقاهم يعاينو ليهو كويس ويرد

واحد منهم ( بهذ الراس) وكلمة ( اهلآ ).. إحتمال تسمعا

وإحتمال ما تسمعا ذاتو ... وبعد مايمشى قدام شوية ...

واحد فيهم يقول للجماعة [size="5"]( إنتو الزول ده ما راجع والا شنو )...

** وديل أهلى ***

[color="greenل ...

ابو خالد
الرجل الانيق
اجمل ما فى الاغتراب انك حينما ترجع السودان تجد الاستقبال الحاشد من الاهل والجيران ... وعزومه بى هنا وضبيحه بى هنالك لغاية ما اجازتك تخلص وترجع ...
لتجد نفسك انك بادى من الصفر ... وقروشك الكنته شايله معاك بح .... اما اذا فكرت فى العوده النهائيه ... فهاك يا تنظير ... لغاية ما تلقى قروشك برضو بح ... والساقيه لسه مدوره
والله يكون فى العون
لك ودى واحترامى اخى ابو خالد على هذه الطله الجميله

[خالد 000 ابقرجة]

الجزولي 000
الذي يأخذك بترو الي حيث يريد 000
ودون مقاومة منك 000
صاحب القلم المغناطيسي 000 الذي ينوم الاحساس 000
ولا يترك لك خيارا غير المتابعة 000

رغم انني فكرت اكثر من مرة 000 أثناء متابعة رحلة القمر 000
أن أفعل كما كنت صغيرا 000 حين يزيد تشويق القصة 000 أن أعود لقراءتها من الخلف 000
فكرت أن أسحب البوست لآخر سطرين لأعرف من المجنون 000 صاحبنا أم زوار القمر 000

الجزولي 000 جميل هو التشويق الذي يصاحب السرد 000
لكن الأجمل الإنسيابية التي لا تترك لك الفرصة للمارسة عادة مجنون بالقراءة بالمقلوب 000

واحد صاحبي يوم قال لي عارف أحسن فكرة لعمل مشروع في السودان شنو 000

قال لي تطلع عشرة في المية من راس المال 000 تعمل بيها مشروع خسران 000
وتستني لحدي ما المقلدين يقعو في المقلب 000 ويدقو الواطة 000
بعد داك تنفذ مشروعك 000
وتقعد تتفرج فيهم 000

[محمد الجزولى]

سافرنا إلى القمر وأخذنا حمام باخر طازج وسافرنا بقلم مبدع يشبه الجزولى وأخذنا جولة خيال بصحبتك وأفكارك المُدهشة دائما ما تتطرق لمجال لم يطرقه احد قبلك فى فن الكتابة فتسحرنا بفكرك وقلمك معا حين يُشكلان ثنائية... فنجلس ونصفق ونمنى النفس كالعادة بخاتمة نُحددها قبل أن نُكمل ولكنك تخيب أملى فى كل لحظة وتختار نهايتك من لون خاص يجعل الدهشة سيدة الموقف... لك دهشتى يا مبدع واحترامى وحبى لقلمك الساحر دمت بخير

اديبنا القامه
العاقب مصباح
دائما ما اقف محتارا وتعجز الكلمات امام اريحيتك التى تغمر المكان
استجدى الحرف فيظل عصيا ... واعصر الفكر فيتضأل امام كلماتك ..
ولا يسعنى هنا الا ان اقول لك شكرا صديقى العزيز ... فقد عطرت هذا المكان
وشكرا لك لكلماتك التى اعتز بها بشده
وسلمت من كل شر

[محمد الجزولى]

الرائع محمد الجزولى
اكثر ماأعجبنى فى قصتك ( القمرية ) ثنائية مزج الخيال بالواقع
الى درجة يصعب الفكاك بينهما او التمييز بينهما ...
ومايعجب أكثر ( الرمزية ) التى تجعلك تسرح الى أن تفكر فى :
(( المشــــــــروع الحضــــارى الاستثمــــارى ))
لك التحية والتقدير ..

الرائع ود العمدة
اولا حمد لله على سلامة الطله ياخ
وشاكر لك مرورك الرائع هنا اخى العزيز
قصة الاستثمار صارت هاجس لدى كل السودانيين
ومن يربح هو من يأتى بالعجائب والغرائب
شكرا لك مرة اخرى عزيزى ود العمدة
فكلماتك تاج على رأسى
ودمت بكل ود

[محمد الجزولى]

ما طار طائر و أرتفع إلا كمار طار وقع
ما قام مشروع و نجح إلا كما قام فشل و السبب المحاكاة و التقليد الأعمى
ودا السودان ياهو دا السودان

تسلم مشرفنا اللذيذ على المرور الراقى
ونحلم باليوم الذى نجد فيه السودانى يتخلى عن عادة التقليد الاعمى
لك شكرى اخى محمد على مرورك الجميل

[محمد الجزولى]

[QUOTE=خالد 000 ابقرجة;343823]
الجزولي 000[/]
رغم انني فكرت اكثر من مرة 000 أثناء متابعة رحلة القمر 000
أن أفعل كما كنت صغيرا 000 حين يزيد تشويق القصة 000 أن أعود لقراءتها من الخلف 000
[color=blue]فكرت أن أسحب البوست لآخر سطرين لأعرف من المجنون 000 صاحبنا أم زوار القمر 000[/color
]r][/size] [/QUO

والله يا خالد ضحكتنى شفقتك دى
قلت لى داير تقرأ من الاخر
تعرف انا لحدى الان بقراء الجريده من الصفحه الاخيره
واى كتاب بقع فى يدى اول شئ بقرأ اخر خمس صفحات
والمسلسلات بتابع اخر ثلاث حلقات
شاكر لك مرورك الجميل وكلماتك المعبره