المساعد الشخصي الرقمي

مشاهدة النسخة كاملة : حاج ابكر وازدواجية المعايير


درديري كباشي
22-07-2009, 06:33 AM
في احدى مدن السودان الطرفيه وفي مدرسة ابتدائية نائية ... وفي احد الفصول المتقدمه يجلس التلاميذ في ازعاجهم المعهود ... يدخل عليهم استاذ الرياضيات الجديد ... شاب اتاهم منقول من ابناء العاصمة له جسم رياضي وقوي البنية ومعتد بنفسه ... تدل سحنته على انه تم اختياره خصيصا لهذا الفصل .. يحمل الاستاذ في يده سوطين احدهم سوط عملاق وطويل جدا والسوط الثاني صغير ورقيق .. بعد ان يدخل الاستاذ ويعم الهدوء يسلم عليهم ويرفع السوطين ويقول لهم عارفين السوطين ديل ليه ؟؟؟
ويواصل الاستاذ : اولا السوط الكبير دا للعتاوله الصعاليك الكبار البلده القاعدين ورا ديلك
والسوط الصغير دا للشطار الصغار القاعدين قدام ..
بعد ان يكمل الاستاذ جملته يحدث هرج في الصفوف الخلفيه ويبداه ابكر :

ابكر:أءأءا خلي بالكم يا جماعة الاستاذ الجديد دا عندو ازدواجية المعايير
هارون : يعني شنو ازدواجيه المعايير يا ابكر ؟؟؟
ابكر : ما تعرف زي اوكامبا المعنقد مع السودان داك
عيسى : منو اوكامبا دا يا ابكر لاعب المريخ الجديد؟؟؟؟
ابكر : مريخ شنو يا تسطيحة انت انت عايش ويين
عيسى : مانا ما سمعت رادي من قبل كم شهر منو اوكامبا دا يا ابكرونا ياخي ؟؟؟
في هذه اللحظة ينتبه الاستاذ للحوار الذي يدور في آخر الصف ويبدا يتحرك نحوهم .... موجها الحديث لابكر
- مالك ماعجبك الكلام الانا قلته طيب رايك شنو نبدا بيك انت
: اولا اسمك منو انت
ابكر : ابكر عثمان حاج اسحاق
الاستاذ : يلا يا ابكر سبعة في ثمانية بكم
ابكر : سباه في تمانية؟؟؟
الاستاذ: اايي سبعة في ثمانية ما سمعتها
ابكر : ما بتمانية واربعين
الاستاذ: تمانية واربعين يا بليد امشي اطلع بره انتظرني عند السبورة هناك
الاستاذ : قوم انت موجها السؤال لهارون : انت اسمك منو
هارون : هارون موسى عبد الله
الاستاذ : سبعة في ثمانية بكم يا هارون .... ما في واحد يتكلم والا حا اجلد الفصل كله ...
هارون :: يا استاذ يمكن ثمانية وخمسين ويمكن اثنين واربعين بس انا ما متعكد يعني...
الاستاذ : يا سلام ما متاكد امشي اطلع بره انا حا اخليك تتعكد بعدين .
موجها الحديث لعيسى بعد التعرف واكيد ما عرف الاجابة ثم كذلك على ثم تبعهم عمر الى ان تجمع الثمانية الكبار امام السبوره لم يستطيع اي واحد منهم ان يفك طلاسم سبعة في ثمانية ... في اثناء جولة الاستاذ في الصفوف الخلفية كان ابكر يدير حوارا مع الذين تجمعوا معه قرب السبوره .
ابكر :: شوفوا هنا ياشباب الظاهر الاستاذ الجديد دا حقار وعامل فيها بتاع (عنكبة ) وانا الليلة لازم (اشنكبو ) ليكم عشان يعرف حاجة .
هارون : يا ابكر ياخي ماتكون زول متهور ياخ ... انت الاستاذ الفات الجلدته داك قربنا ننفصل بسسبك كان ما اتدخل حاج عمر شخصيا وحل لينا المشكلة مع الناظر .
ابكر : شوفو هنا ما انتو عارفين انا زول جني وجن الحقارة بتاعة المدرسين .. لازم الاستاذ يدرس حصته بادب ويتخارج هو ماله ومالنا ونحن مالنا ومال سبعة في ثمانية ولا في زفت ... افرض ما عرفتها يعني القيامه حا تقوم ... يمين الاستاذ دا يجلدني الليلة اشنكبو ليكم نهاية الحصص لامن يعرف حاجة والعايز يجي معاي يجي والما عايز بطريقته انا براي اقدر اخلص الموضوع دا .
عيسى : يا بكر انت عارف نحن بيناتنا ميثاق انتفاضة عديييل كدا ياخي ونحن مارح نتخلي عنك وانت تواجه التحديات لوحدك يعني ... وعاش تحالف البلده ويسقط الشاطرين واي واحد يحفظ جدول سبعة زاتو يا خي ...
ابكر : تمام يا عيسى انا من اول عارف انت الفيها يا خي وانت العشم ذاتو ياخي (سنجي لنجي يا ابوجينا ياخي)
وبصوت جماعي الباقين ... نحن معاك يا ابكرونا قال احدهم الليلة الاستاذ الجديد دا نرجعوا الخرطوم في لفة جبس ..
الاستاذ بعد ما خلص اسئلة الصف الامامي جا الى ناحية السبورة .. واقام احد تلاميذ الصفوف الامامية وقال له اذهب الى الصف الثاني ونادي اكبر اربعة فيه عشان يشدو البلدة ديل
التلميز : لكن يا استاذ ديل اكبر اولاد في المدرسة وما في اكبر منهم
الاستاذ يلا تعال انت اتكل على الدرج دا ..
وبدا في الجلد ... تم جلد كل التلاميذ الا ان جاء دور ابكر
ابدى ابكر في الاول مقاومة وحاول مسك السوط من يد الاستاذ ولكن الاستاذ انتزع السوط بقوة من ابكر وبدا يضربه عشوائيا في كل انحاء جسده ... مما زاد من حقد ابكر وقرر الا تتوقف العملية في الجبس فقط كما اقترح احد اصدقائة ربما تصل الى صندوق خشبي عندما اعماه الغضب وهو يذهب ناحية مكانه
درديري كباشي
22-07-2009, 06:39 AM
جلس ابكر في ناحية الصف حانقا حاقدا ينظر الى الاستاذ بغضب شديد ويحسب الساعات متشوقا الى نهاية الحصص حتى يربط هو اصدفائه لهذا الاستاذ الحقار .. ويعطونه درس في قلة الادب ... لم يسمع شيئا ولم يرى الى ان اخيرا ضرب جرس الحصة الاخيرة وبدا التلاميذ يخرجون من الفصول ..
جلس ابكر واصدقائه في ظل شجره خارج المدرسة ينتظرون ان تفرغ المدرسة تماما كما ينتظرون خروج الاستاذ الجديد ... بعضهم احضر فروع من الشجر وبعضهم احضر عصا مدببة كان يحتفظ بها للطوارئ
ولحسن حظ او لسوء حظ ابكر لاندري كان استاذ الرياضيات الجديد اخر من خرج من المدرسة ... بعد ان ذهب جميع التلاميذ والاساتذة والاهم من الكل الناظر نفسه اذا العملية لن يكون فيها شهود اثبات .. كما فكر ابكر ... لم يبقى سوى استاذ فيصل المنتظر ... والذي خرج اخيرا من المدرسة يحمل في كتفه شنطته المعتاده وهو يرتدي بنطال الجنز وحذائه الرياضي ... وخرج مسرعا كعادته كانه في تمرين رياضي ...
لم ينتبه الاستاذ في الاول لابكر واصدقائه بانهم متجمعون ... وفجاه التفت لصوت ينده له من الخلف
- انت يا استاذ يا فارة عامل لينا فيها شفت الليلة تعال نشوف شفتنتك دي حدها وين ..
وقف الاستاذ في الاول ثم ابتسم لهم وانزل شنطته واخرج منها عصاتين قصيرتين موصلات بقطعة جنزير في النص ووضع شنطته في الارض.
وهنا تحمس ابكر وجماعته وهاجموا كلهم في مره واحده بعصيهم على الاستاذ ... ولكن لخيبة املهم لم يستطيع اي واحد منهم ان يوجه ضربه للاستاذ او يصيبه .. فهو اما كان يصرفها بالالة التي يحملها او يقفذ في الهواء موجها ركلة لاحدهم . وبالعكس هم بدات الدماء تتقاطر منهم واحدا بعد الاخر . كان الاستاذ يقفذ في الهواء تارة ويركل احدهم اخرى .. وقد كان الانين يصدر من ابكر وجماعته فقط ... وكثرت عباراة من نوع ...( اي انا يدي اتكسرت ) بدا بعضهم ينسحب ويجري ... اخيرا ابكر قرر ان ينسحب بعد ان كسرت يده وبدا يجري فعلا ... هو جاري
صرخ فيه عيسى : يا ابكر الحل شنو نعمل شنو مع بروسلي دا
يرد ابكر : يا اخوي اجري اتخارج بس خلي بالك دا استاذ من اليابان ما من الخرطوم ..
هارون : طيب بكره كيف يا ابكر
ابكر : نحفظوا جداول الضرب ما في طريقة بعد كدا ولا نسيبوا المدرسة .
درديري كباشي
22-07-2009, 06:44 AM
المهم يا اخوان في ذلك اليوم قرر اباء الطلاب المتضررين من هجوم الاستاذ الغاشم وضربه للحركة الطلابية في مقتل عفوا في مكسر ومجندلا ابطالها بين جريح وكسيح ... عندما درس الاباء هذا الامر وقرروا ان ابنائهم هم الغلطانين ويستاهلوا ما جرى لهم ... اخير قرروا ان يذهبوا للاستاذ ويعتذروا له ... مع وضع خط رجعه لو ان الاستاذ تمادى في الحقارة بابنائهم وازلالهم في هذه الحالة سيستعينوا بالساحر الفكي حاج خامس ... حتى يعمل له عمل يطفشه من البلده طالما لايوجد احد يستطيع ان يضرب هذا الاستاذ الياباني وينتقم منه ....
وحتى سار همس بين نساء الحي الحاجة حبصة ام ابكر قالت متحسره على علقة ابنها ...( دا استاذ شنو يا بنات امي دا استاذ الياباني ) نطقت بنتها اشراقة مقاطعة(دا ما ياباني يا يمه انتي حاتصدقي التخاريف بتاعة الاولاد ديل . دا من اولاد الخرطوم قالوا متدرب كراتيه كان في الصين كان في اليابان ما بعرفه .. وجابوه مخصوص عشان يادب اولادكم الصعاليك ديل )...
ذهب مجلس الاباء في عصر نفس اليوم الى ميز المدرسين وسالوا عن استاذ فيصل وفعلا بداوا يعتذروا له ..
حاج ابكر : والله تمسحا لينا في وشنا يا استاذ والاولاد ديل ذاتهم غلبنا النسويه معاهم
استاذ فيصل : ما في مشكله يا حاج حصل خير
حاج سليمان : ( اساسا الاولاد ديل ما اندهم بعد نزر اخلاقي منذ ان ترأرأوا في هذا الحي يا استاذ .. ومن يزرع الياس يحصد الفشل يا استاذ وانت سيد العارفين تبعا .)
استاذ فيصل : فيكم الخير وانتو اهلنا وهم اخواني قبل ما يكونوا اولادكم ونحن جايين هنا عشان نعلمهم ونربيهم وينفعوا انفسهم قبل ما ينفعوا أي حد ثاني وانا متشكر لزيارتكم دي وهي محل تقدير واعزاز لي ..
حاج هارون : يا سلام يا استاذ وانت الظاهر عليك من اصل طيب ونحن من دورنا أي حاجة تطلبها مننا نحن جاهزين ..
استاذ فيصل :: خلاص متشكر يا جماعة .. كل الانا عايزه انه الاولاد يحفظوا جدول الضرب لانه دا اساس الرياضيات والامور حا تمشي بعد داك ..
حاج عثمان : نحن راح نبدا معاهم من اليوم وليك علي الولد ابكر بكره تلاقيه حافظ كل شئ . يلا مع السلامه الله يدي العافية يا استاذ ..
وفعلا انفض الجمع الكريم وحاج عثمان قال لابنه ابكر بكره ماراح تمشي المدرسه لو ما حفظت جداول الضرب حتى لو تساهر للصباح ...
وفعلا جلس ابكر طول الليل يذاكربصوت عالي (سبعة في ..... سبعة وووو) واخيرا اقتنع بحفظه ونام .. ولكن لشدة التعب سرقته نومه ... لولا امه صحته لما قام في صباح السبت
(ابكر يا ولدي قوم انت ماعندك مدرسه الليلة ... الساعة كم ,.... سبعة .... الحق ... لبس ملابسه سريع بد ما تسوك ... خطف شنطته وجرى نحو المدرسة ... ولسوء حظه وجد الجرس ضرب والتلاميذ واقفين طابور ... بقى في حيرة من امره .. اولا في الطابور واقف الناظر ومعه جميع الاساتذه ويبدوا انهم يناقشون مهاجمة الاستاذ يوم الخميس والتي كان هو قائدها بنفسه ... ويلاحظ الاستاذ نده لاصحابه في العصابه وبدا الجلد مره ثانية ... يعني ما كفاية جلدة الاستاذ بطل الكراتيه ... ويبدوا انه المدرسه كلها تقوت بالاستاذ الجديد والناظر نفسه برزت شخصيته ... فكر ابكر قال لو دخل على الطابور في هذه اللحظة سيتحول الموضوع كله ناحيته هو اذا ما الحل ؟؟ ... اخيرا فكر انه يختبي خلف سور المدرسه الى ان يصل طابور فصله قريب منه بعد ذلك ينط السور ويقف مع الطابور ويدخل الفصل ...
وفعلا بعد ما خلص المهرجان من الجلد والتعذيب تحرك الطابور .. واول ما حاذى الطابور مكان ابكر صعد ابكر في السور وقفذ ناحية فصله ولكن لسوء حظه

كان في هذه اللحظة الغفير رجل طاعن في السن نزل المعاش من الاشغال العامه قبل عشرين عاما مارا بين السور والطابور..سقط ابكر في راسه ليسقط الغفير مغشيا عليه ... وتتجمع المدرسة من جديد بعد اسعاف الغفير يعلن الناظر اعادة الطابور .. وتم القبض على ابكر وتربيطه بالحبال وووو
درديري كباشي
22-07-2009, 06:51 AM
بعد ان تم تربيط ابكر و تم اسعاف الغفير ... واتضح انها غيبوبة خفيفة وغالبا من المفاحاه والصدمة لانه بعدها برشة ماء خفيفة سرعان ما استيقظ عم صالح الغفير طلب الناظر قرع الجرس من جديد لاعادة الطابور... وبدا الضرب والشتائم تنهال على ابكر من الناظر والاساتذه مع الشتائم .. (يا بليد يا فاشل وكمان عايز تقتل الراجل الغلبان دا ... عمل ليك شنو ؟؟؟ .....ياحضرة النازر اديني فرصة اشرح ليك ..... اخرص يا صعلوك وعندك نفس تتكلم كمان ... ماتديني فرصة يا اصتاذ ... اخرص يا تافه ... ولازم اليوم ابوك يصل .... رسلوا أي تلميذ ينادي ابو الفاشل دا ...
واخيرا وصل عم عثمان مفزوعا مع اصدقائه حاج سليمان وابو هارون ...
حاج عثمان :في شنو يا هضرة النازر ،لأل الحاصل خير ؟؟؟؟
الناظر : ولدك الفاشل دا يا حاج عثمان ضرب الغفير في راسه وكاد يموته ..
حاج عثمان : انا كمان كنت متوقع الشي دا يحصل وكل الحاصل دا بسبب استاذكم الجديد بتاع الرياضيات ..
الناظر : واستاذ الرياضيات دخله شنو في الموضوع
حاج عثمان : ما الاستاذ اصر على الولد انه يحفظ جدول الضرب كله في يوم واحد
الناظر : وجدول الضرب علاقته شنو بضربة الغفير يا حاج عثمان
حاج عثمان : ما الولد بقى عنده شحنة زايدة من الضرب ولمن شاف الغفير حصله ازدواجيه في المعايير وقام ضربه لكن لو كان حفظ جدول الضرب واحده واحده ما كان حصل الحصل فهمت المنتق يا هضرة النازر ؟؟؟
الناظر بعد ان بدا وجهه يتلون وعضلات وجهه تتحرك ما عرف حتى يبدا من اين يبدا وينتهي هل الموقف يسمح بان يشرح لعم عثمان ماهو جدول الضرب ؟؟؟ اخيرا لم يجد حل سوى يدعي الاقتناع بوجهة نظر حاج عثمان ويصرفه ؟
الناظر : شوف هنا يا عثمان خلاص شكرا كتر خيرك وكلامك صاح ... خلاص فكوا ابكر دا واصرف الطابور يا استاذ ..
بعد ان خرج حاج عثمان ووفده من المدرسه كانت نظرات الاعجاب تنهال على حاج عثمان من اصدقائه حاج سليمان وابو هارون ولم يخفو اعجابهم بحجته القوية التي حسمت الموقف ..
حاج سليمان : افارم عليك يا حاج عثمان لكن ما افحمت الناظر اديل كدا ياخي
حاج : عثمان ما هو لازم يكون عندك منتق تعرف تستخدم ازدواجية المعايير في المكان الصحيح ياخي ...
انصرف القوم وعاد الهدوء والاستقرار للمدرسة وابكر وشلته والحي بعد هذه السلسلة من الاحداث
كندشة
22-07-2009, 08:47 AM
ياخ انت كنت وين الزمن ده كلو؟؟؟


و الله ازدواجية مأايير أجيـــــبة لكن

لكن بيني أفحمو جنس فحمة

هههههههههههههههههه
عوض الكريم الخواض
22-07-2009, 10:29 AM
تسلم يا درديرى كباشى ...قصة كوميدية لطيفة وممتعة ...

تعرف ناس كنبة ورا فعلاً متعبين ...
زمان اساتذتنا ما كانوا بتعبوا معاهم ...
عشان ما يحرقوا دمهم ...
وكمان كان فى ( اذدواجية مآآيير للاستفادة منهم فى شد بقية الطلبة الذين برجى منهم )

تسلم يا درديرى .
درديري كباشي
22-07-2009, 11:28 AM
تسلم يا درديرى كباشى ...قصة كوميدية لطيفة وممتعة ...

تعرف ناس كنبة ورا فعلاً متعبين ...
زمان اساتذتنا ما كانوا بتعبوا معاهم ...
عشان ما يحرقوا دمهم ...
وكمان كان فى ( اذدواجية مآآيير للاستفادة منهم فى شد بقية الطلبة الذين برجى منهم )

تسلم يا درديرى .


ما هم
ذاتهم ناس اي عنكبة شنكبة عدلات تبش واروق شعيرية ........

ا ..
درديري كباشي
05-10-2009, 05:55 AM
حاج عثمان : يا حاج سليمان لو ما عندك منطق وانت انسان مسخف وملم بكل اوامل التعرية بتاعة ازدواجية المعايير ما استاذ زي دا يمكن من المستحيل توقفو عند حده وتوريه تلت التلاته كم ..
حاج الطاهر : أفارم اليك يا حاج عثمان لو ما انت معانا هنا في الحلة كان حدرة الناظر دا اكلنا حنك سااااااكت ورحنا اونتا زي ما تقول شمار في اقاشي ذاته ياخي . ..

سنؤووود
ودالعمدة
05-10-2009, 06:44 AM
ياسلام عليك ياحاج درديرى ود كباشى
لقد ازدانت التعابير بازدواجية المعايير

فى انتزار الأوووووووووودة
العاقب مصباح
05-10-2009, 06:55 AM
والله يا ابكر وقعت وما سميت

وقع تلاتة مرات

مرة فى يد استاذ فيسل اليابانى

ومرة فى يد راس الغفير

ومرة تالتة فى قلم درديرى كباشى

أفارم اليك يا درديرى

وبالجد بنستمتع بى كل حرف تسكبو

تمنياتى لك بالهناء وبطباعة ما تكتب فى كتاب انيق

لك المحبة كلها
درديري كباشي
05-10-2009, 06:57 AM
عدنا .
حاول ابكر وشلته ان يلتزموا ... هم لم يعتادوا على الالتزام .. واكثر شئ حز في نفوسهم انه التزام اجباري قوامه الخوف فقط . ..لذلك ظل حاج ابكر حانقا وحاقدا على الاستاذ .. صحيح انه بدا يهتم بدروسه ويحفظ جداول الرياضيات ويتحاشى الاحتكاك بالاستاذ .. بل اكثر من ذلك بل حاول بعض مرات يشارك في الحصة ..
بعد حادثة الجلدة بايام ومعظم الثمانية الكبار اياديهم مدفونة في الجبس . اصبحوا مساكين والفصل اصبح هادئا ..
بل اكثر من ذلك صغار التلاميذ الذين كان يستغلهم ابكر في انتزاع مصروفهم بعض مرات او ارسالهم في مهامه الخاصة كانهم عبيد عنده .. هؤلاء وجود الاستاذ اعطاهم دعم معنوي واصبحوا يتطاولون على ابكر ويرفضون طلباته في بعض المرات ...
مثال : تعال يا تامر روح البقالة جيب لي معاك طحنية ..
تامر : ما راح اقدر امشي انا عندي تمرين رياضيات ما خلصت منه ..
نوع هذه الردود وبكل تحدي وثقة لم تكن في الحسبان ولا في الخيال قبل مقدم هذا الاستاذ والذي فعلا زاد اهتمامه بصغار التلاميذ الشطار وكثيرا ما مدحهم ..في الفصل..
اكبر رغما عن ادعائه الاستسلام للامر الواقع الا انه اضمر شرا كبيرا وحنقا على الاستاذ .. هو من ناحية العنف استسلم لانه لا يستطيع ان يهزمه .. ولذلك خطرت في باله الفكرة الشريرة التي طرحها احد اعمامه في مجلس الاباء .. وهو عمل سحر للاستاذ ( عمل ) يطفشه من منطقتهم .. لكن ابكر لا يريد الاستاذ ان يطفش فقط .. هو يريد ان ينتقم يريد السحر ان يمرض هذا الاستاذ ويحعله هزيلا حتى يتمكن هو من الانتقام منه وفش غليله .. لكن من اين وكيف .. وكيف هو سيقنع طاهر صديقه ابن الفكي خامس لاقناع والده بعمل العمل للاستاذ .... عمل يخليه يندم على اليوم الذي اتى به في حلتهم ..
وسنؤوود
درديري كباشي
05-10-2009, 07:01 AM
ياسلام عليك ياحاج درديرى ود كباشى
لقد ازدانت التعابير بازدواجية المعايير

فى انتزار الأوووووووووودة

ممعليش يا أومده والله انا بكتب في الحلقة وانت عقبتني في الطريق .. لو انا عارف انه انت قعد تكتب مداخله ما كان انتظرتك ياخي .. يا ابوشينا ياخي شيني هاكا ياخي..
درديري كباشي
05-10-2009, 07:04 AM
والله يا ابكر وقعت وما سميت

وقع تلاتة مرات

مرة فى يد استاذ فيسل اليابانى

ومرة فى يد راس الغفير

ومرة تالتة فى قلم درديرى كباشى

أفارم اليك يا درديرى

وبالجد بنستمتع بى كل حرف تسكبو

تمنياتى لك بالهناء وبطباعة ما تكتب فى كتاب انيق

لك المحبة كلها


سلام يا أقبه يا اخي

ونحن اقلامنا شنو ياخي مع اقلامك .. يمكن ناموسة في ادان فيل ذاته ياخي ..

وانت كدا مليتنا توادؤ لامن دفق ياخي

خليك قريب ..

هوي انا ماشي بيتنا
سلام
أشرف صلاح السعيد
05-10-2009, 07:58 AM
ابوالدر جاهدتا نفسى مجاهدة انى مااكتب بلهجة حاج ابكر..ماعارف السر شنو البخلى الواحد يقرا موضوع مكتوب بلهجة ومايقدر يرد إلا بنفس اللهجة جد شى غريب..ولاحظت كل الاخوة المتداخلين غلبن التحرر من ذلك..هل التأثر بمسألة اللهجات دى شى غريزى كدا وفطرى؟؟ والناس لما تلقى شى جديد عليها وتعجب بيهو بيكون عندها توجه داخلى قوىو دافع داخلى لتقليدو؟..
ما عارف استاذ الخرطزم دا بيشبه ليا الحاكم المخضرم سياسيا ومن طبقة غير طبقة الشعب مع اختلاف التأثير على الآخرين..واولاد الكنبة الطيش بيشبهو ليا الأحزاب التقليدية قوتا مستندة على قوة تخالها عظيمة ولكنها حقيقة هى هشة وهشة جدا..اما الناظر وباقى الاساتذة زى القوات النظامية قوتا وضعفها بيستند على من خلفها وماهية عقلها المدبر..قد تكون فعالة او عايشة فى الطراوة لا هاشة ولا ناشة..اما ناس القرية وحجاجا بيشبهو ليا المجتمع المستند على منطقه الخاص به وتبريره للأشياء حسب فهمو وإن كان قاصر..كثير من منطقه لا منطق له وكبير القطيع بيحدد الطريق وباقى القطيع ان لم يثنى عليه فهو متابع له ولتعرجات دربه ..وأخوانا الشوام عندهم مثل بليغ استعنتا بيو فى التحليل بيقول " الدرب الأعوج من التور الكبير".. والله صدقت لما قلتا احنا شعب بنحب نسيس اى حاجة..زى التلميذ الشاذ لما تجيهو مسألة مباشرة وسهلة بتحيرو اكتر من المسائل الصعبة وتلاقيو يوسوس بينو وبين نفسو "المسألة أصلو ماممكن تكون بالسهولة دى ..الاستاذ دا أكيد خاتى فيها trick" ..اها حالنا كدا قصتك دى ضحكتا فيها لما دختا ودا ممكن يكون حل المسألة..بس بعدا قعدت افليها لغاية ماسيستها ورمزتها"من رمزية"..بس تعرف كتير من الاحيان تصعيب المسائل بيودى لحلول "off point" ودا شعورى هسى بس برضو رافض امسح الإجابة ومصر على حلى..
بس بينى وبينك قدر ماقلبتها هذه القصة لا تنفع ان تكون للإضحاك "شفتا الهوس لوين ومصر أتصنف مع الشطار؟" وحسب..
ودالعمدة
05-10-2009, 08:19 AM
ابوالدر جاهدتا نفسى مجاهدة انى مااكتب بلهجة حاج ابكر..ماعارف السر شنو البخلى الواحد يقرا موضوع مكتوب بلهجة ومايقدر يرد إلا بنفس اللهجة جد شى غريب..ولاحظت كل الاخوة المتداخلين غلبن التحرر من ذلك..هل التأثر بمسألة اللهجات دى شى غريزى كدا وفطرى؟؟ والناس لما تلقى شى جديد عليها وتعجب بيهو بيكون عندها توجه داخلى قوىو دافع داخلى لتقليدو؟..
ما عارف استاذ الخرطزم دا بيشبه ليا الحاكم المخضرم سياسيا ومن طبقة غير طبقة الشعب مع اختلاف التأثير على الآخرين..واولاد الكنبة الطيش بيشبهو ليا الأحزاب التقليدية قوتا مستندة على قوة تخالها عظيمة ولكنها حقيقة هى هشة وهشة جدا..اما الناظر وباقى الاساتذة زى القوات النظامية قوتا وضعفها بيستند على من خلفها وماهية عقلها المدبر..قد تكون فعالة او عايشة فى الطراوة لا هاشة ولا ناشة..اما ناس القرية وحجاجا بيشبهو ليا المجتمع المستند على منطقه الخاص به وتبريره للأشياء حسب فهمو وإن كان قاصر..كثير من منطقه لا منطق له وكبير القطيع بيحدد الطريق وباقى القطيع ان لم يثنى عليه فهو متابع له ولتعرجات دربه والله صدقت لما قلتا احنا شعب بنحب نسيس اى حاجة..زى التلميذ الشاذ لما تجيهو مسألة مباشرة وسهلة بتحيرو اكتر من المسائل الصعبة وتلاقيو يوسوس بينو وبين نفسو "المسألة أصلو ماممكن تكون بالسهولة دى ..الاستاذ دا أكيد خاتى فيها trick" ..اها حالنا كدا قصتك دى ضحكتا فيها لما دختا ودا ممكن يكون حل المسألة..بس بعدا قعدت افليها لغاية ماسيستها ورمزتها"من رمزية"..بس تعرف كتير من الاحيان تصعيب المسائل بيودى لحلول "off point" ودا شعورى هسى بس برضو رافض امسح الإجابة ومصر على حلى..
بس بينى وبينك قدر ماقلبتها هذه القصة لا تنفع ان تكون للإضحاك "شفتا الهوس لوين ومصر أتصنف مع الشطار؟" وحسب..


بعد اذن أخى درديرى
أخى الغالى أشرف
الردود بتأتى عفوية دون تكلف وبدون ازدواجية تعابير
ياأشرف قلت لى حاج عثمان دا مؤتمر وطنى واللا شنو ؟؟؟
moh_alnour
05-10-2009, 04:17 PM
يا أشرف قلت لى حاج عثمان دا مؤتمر وطنى ولا شنو ؟

هيييييييي يكا ، هوا هوا هوا :eek:
تفحيطة : بقيت تلعب باص القون يا باشمهندس ولا دي إزدواجية في المأيير ;)
ابوخالد
05-10-2009, 06:42 PM
ماشاء الله ... فكى .. درديرى ...

سنو آفيه ...



كل يوم متجدد ...

يا أخوى الجماعة جو من السودان والا من الكمبو ..؟؟؟؟؟

وما تقول لى الأولاد لهجتهم إتغيرت ...

دائمآ إذدواجية المعايير .. بتخلق الإبداع ...




*************
ابو الدر ... والإذدواجية ... مروا من هنا ...
درديري كباشي
05-10-2009, 08:23 PM
ابوالدر جاهدتا نفسى مجاهدة انى مااكتب بلهجة حاج ابكر..ماعارف السر شنو البخلى الواحد يقرا موضوع مكتوب بلهجة ومايقدر يرد إلا بنفس اللهجة جد شى غريب..ولاحظت كل الاخوة المتداخلين غلبن التحرر من ذلك..هل التأثر بمسألة اللهجات دى شى غريزى كدا وفطرى؟؟ والناس لما تلقى شى جديد عليها وتعجب بيهو بيكون عندها توجه داخلى قوىو دافع داخلى لتقليدو؟..
ما عارف استاذ الخرطزم دا بيشبه ليا الحاكم المخضرم سياسيا ومن طبقة غير طبقة الشعب مع اختلاف التأثير على الآخرين..واولاد الكنبة الطيش بيشبهو ليا الأحزاب التقليدية قوتا مستندة على قوة تخالها عظيمة ولكنها حقيقة هى هشة وهشة جدا..اما الناظر وباقى الاساتذة زى القوات النظامية قوتا وضعفها بيستند على من خلفها وماهية عقلها المدبر..قد تكون فعالة او عايشة فى الطراوة لا هاشة ولا ناشة..اما ناس القرية وحجاجا بيشبهو ليا المجتمع المستند على منطقه الخاص به وتبريره للأشياء حسب فهمو وإن كان قاصر..كثير من منطقه لا منطق له وكبير القطيع بيحدد الطريق وباقى القطيع ان لم يثنى عليه فهو متابع له ولتعرجات دربه ..وأخوانا الشوام عندهم مثل بليغ استعنتا بيو فى التحليل بيقول " الدرب الأعوج من التور الكبير".. والله صدقت لما قلتا احنا شعب بنحب نسيس اى حاجة..زى التلميذ الشاذ لما تجيهو مسألة مباشرة وسهلة بتحيرو اكتر من المسائل الصعبة وتلاقيو يوسوس بينو وبين نفسو "المسألة أصلو ماممكن تكون بالسهولة دى ..الاستاذ دا أكيد خاتى فيها trick" ..اها حالنا كدا قصتك دى ضحكتا فيها لما دختا ودا ممكن يكون حل المسألة..بس بعدا قعدت افليها لغاية ماسيستها ورمزتها"من رمزية"..بس تعرف كتير من الاحيان تصعيب المسائل بيودى لحلول "off point" ودا شعورى هسى بس برضو رافض امسح الإجابة ومصر على حلى..
بس بينى وبينك قدر ماقلبتها هذه القصة لا تنفع ان تكون للإضحاك "شفتا الهوس لوين ومصر أتصنف مع الشطار؟" وحسب..


سنجي لنجي يا اشرف يمين عجبتني لامن كيفتني من نفسي ظاتو ياخي ...
وقطع شك انت انت عندك ازدواجيه في الفهم لامن تحير ..... ياخي ما إرفنا انت سايق رقشة ولا قناة الجزيرة ذاتها ..
وحاج ابكر لو اخذ الموضوء من وجهة نظرك دي ما كان بقى مدير برلمااااان ادييييييل كدا ياخي ازدواجية المآآآآير بتاعتك دي خلي معاها شوية بعد نزر كمان..
------------------------------------------------------------------------
الفوق داك كان رد ابكر

لكن ردي انا شنو يا باش مهندس انت بترجرجر فينا عاوز تودينا وين بالله عليك الله ركشتك دي غير ليها قماشات الفرامل خليها تفرمل لينا فوق السطح ما في داعي تدخل بها كل مره تحت السطور وتهيج علينا عجاج السلطة نحن عايزين ننزل اجازة ياخي .
درديري كباشي
05-10-2009, 08:30 PM
هيييييييي يكا ، هوا هوا هوا :eek:
تفحيطة : بقيت تلعب باص القون يا باشمهندس ولا دي إزدواجية في المأيير ;)

شايف يا ابو النور الجماعة ديل لو قلت ليهم السلام عليكم يطلعوا ليها معني تانية غير السلام المعروف ..... نسكت ولا نسوي شنو بس نحن يعني ؟؟؟
درديري كباشي
05-10-2009, 08:36 PM
ماشاء الله ... فكى .. درديرى ...

سنو آفيه ...



كل يوم متجدد ...

يا أخوى الجماعة جو من السودان والا من الكمبو ..؟؟؟؟؟

وما تقول لى الأولاد لهجتهم إتغيرت ...

دائمآ إذدواجية المعايير .. بتخلق الإبداع ...




*************
ابو الدر ... والإذدواجية ... مروا من هنا ...




كيفك يا ابو شينا ابو خالد

بيوتنا في كسلا السواقي الجنوبية وسط المزارع ومجاورة لحي غرب القاش حي ناس ابكر فهم عندنا في البيت طيلة اليوم نساءا ورجالا .... الرجال يعملوا في المشروع والنساء والبنات في البيت ( ابو القدح يرطن بطلاقة كانه واحد منهم ) ونحن على خفيف بعض الكلمات .. ويعني انت نقرتها وجبت التايهه ..

وسنجي لنجي وشيني هاكا ياخي ..
أشرف صلاح السعيد
05-10-2009, 08:52 PM
ابو الدر عوافى..
يااخى لو سبتوك فى الميطار عشان الموضوع اعلاه..اعمل تكنيك الراجل الكل يوم بيطشم ويقعد ينبذ فى الحيكومة قدام البغبغاء بتاعو..وفى يوم البغبغاء طار من القفص وقعد ينبذ فى الحيكومة من شجرة لشجرة وناس الأمن متابعينو لما رجع البيت تانى..دخلو على الزول وهرشو : الغبغاء دا بتاعك؟..زولك عرف البغبغاء عملا كبييييرة وضقلا يكركب قال ليهم : شوفو ياجماعة من حيث البغبغاء بتاعى فهو بتاعى..بس انا وهو مختلفين سياسيا تمام..
عمل العمل ودا القصة من مرحلة الصدام المسلح الى مرحلة الكيد الساسى حتى التمكن من العودة للصدام المسلح..ودا نفس الحاصل بالساحة السودانية الآن..الجماعات المسلحة بتعمل شنكبات وكر وفر ولما الحيكومة تضرب فى المليان بيجرو للفكى الامريكى ولا الفكى الاوربى ..الفكى يعمل ليو كم حركة كدا ويشغل ليك الحيكومة فى الدفاع عن نفسها والجماعة بهناك يرتبو صفوفن من جديد..والله يستر للجاى..
الكيد سلاح الضعفاء والمستضعفين..المرأة..السياسين..ابكر وامثاله..والمستهدفين لحقوق غيرهم..
متابعين وفى خطرات القصة..
ابوخالد
05-10-2009, 10:22 PM
كيفك يا ابو شينا ابو خالد

بيوتنا في كسلا السواقي الجنوبية وسط المزارع ومجاورة لحي غرب القاش حي ناس ابكر فهم عندنا في البيت طيلة اليوم نساءا ورجالا .... الرجال يعملوا في المشروع والنساء والبنات في البيت ( ابو القدح يرطن بطلاقة كانه واحد منهم ) ونحن على خفيف بعض الكلمات .. ويعني انت نقرتها وجبت التايهه ..

وسنجي لنجي وشيني هاكا ياخي ..



http://up.arb-up.com/upfiles/9Ca87515.jpg

هسى أمانة فى ظمتك ... دى شينة ....؟؟؟؟؟

كتر من البصل .... ياعمنا ....


**************************

(ما خاتية عليك مدنية )

وما تجو تقولوا عايزين نناسبكم ... والا نشرب قهوة معاكم ...
درديري كباشي
05-10-2009, 11:10 PM
http://up.arb-up.com/upfiles/9Ca87515.jpg

هسى أمانة فى ظمتك ... دى شينة ....؟؟؟؟؟

كتر من البصل .... ياعمنا ....


**************************

(ما خاتية عليك مدنية )

وما تجو تقولوا عايزين نناسبكم ... والا نشرب قهوة معاكم ...

ي يا حبيب ابو شينا بلغة الهوسا تعني صديقنا Abochina

همسة :

هو في حد يقدر يقول لولا شينا كمان ماشاء الله عليها ..
درديري كباشي
06-10-2009, 12:30 AM
ابو الدر عوافى..
يااخى لو سبتوك فى الميطار عشان الموضوع اعلاه..اعمل تكنيك الراجل الكل يوم بيطشم ويقعد ينبذ فى الحيكومة قدام البغبغاء بتاعو..وفى يوم البغبغاء طار من القفص وقعد ينبذ فى الحيكومة من شجرة لشجرة وناس الأمن متابعينو لما رجع البيت تانى..دخلو على الزول وهرشو : الغبغاء دا بتاعك؟..زولك عرف البغبغاء عملا كبييييرة وضقلا يكركب قال ليهم : شوفو ياجماعة من حيث البغبغاء بتاعى فهو بتاعى..بس انا وهو مختلفين سياسيا تمام..
عمل العمل ودا القصة من مرحلة الصدام المسلح الى مرحلة الكيد الساسى حتى التمكن من العودة للصدام المسلح..ودا نفس الحاصل بالساحة السودانية الآن..الجماعات المسلحة بتعمل شنكبات وكر وفر ولما الحيكومة تضرب فى المليان بيجرو للفكى الامريكى ولا الفكى الاوربى ..الفكى يعمل ليو كم حركة كدا ويشغل ليك الحيكومة فى الدفاع عن نفسها والجماعة بهناك يرتبو صفوفن من جديد..والله يستر للجاى..
الكيد سلاح الضعفاء والمستضعفين..المرأة..السياسين..ابكر وامثاله..والمستهدفين لحقوق غيرهم..
متابعين وفى خطرات القصة..


يا باش هي طريقه مختلفة شوية للتعبير عن اعجابي بخيالك العجيب ولانه وللامانة ولاجل حفظ حقوقك الادبية والعربية .. والله تحليلك قط ما خطر على بالي وانا بكتب .. هي فقط كم من الجمل والمواقف الحقيقية .. تعرف انا كتابتي بشبهها بشخص يقص جمل وعبارات من الصحف ويلصقها مع بعض ويصنع منها قصة ولكن القصة لا تنتمي لاي صحيفة قصت منها الجمل .. بس فقط انا بدل الصحف باستخدم الواقع ..

احكي ليم موقف لم اقتبس جملته حتى الان وهو خام

ايام كنت بعمل بالمنطقة صناعية كسلا بمطبعة كباشي .. لصقنا مباشرة مخبز رغيف .. ونحن عادة وقت البريك للفطور نتجمع عمال وموظفين في ظل شجرة امام المطبعة نشرب شاي الفطور .. كان من ضمن العمال واحد هوسواي من جماعة ابكر ... واذكر في ذلك اليوم كان فيه ازمة رغيف وزحمة شديدة في الفرن .. معروف انه الهوسا اكولين جدا ولكن لانه اجسامهم رياضية وقوية ( عضلات تبش زي ما بيقولوا ) .. جات امراه كبيرة في السن ما استطاعت ان تزاحم في الفرن .. وقالت لنا مترجية ..
يا اولادي ما بتقدروا تجيبوا لي رغيف من الفرن انا ما قدرت ..
تصدى لها بالرد محمد الهوسواي قائلا ,,
( تأرفي ياهجه نحن ذااااااااااااتنا مالا قين تريقه .. وانا من السباح اكابس اكابس اكابس .. يا دوب تلعت لي بخمسة رغيفات ... اتسبرت بيها اسوي شنو ) لاحظ في ذلك الوقت انه الرغيفة كانت ربع متر ... الحجة تناولت قفتها ونست الموضوع خالص ومشت .
أبوريلان
06-10-2009, 12:54 AM
ربنا يسعدك دنيا وآخرة يا درديري علي زرع البسمة علي شفاهنا .
الفلاته حبائبنا وأعتز بصداقتهم جداً وسوف أحكي لك قصة بلهجتهم أيام الإنتخابات في مدني ( قريباً )
وكانت مجرياتها في نادي الموردة الرياض بمدني والكائن بالقرب من موقف الدباغة سابقاً ويتوسط أحياء ديم أزهري وحي فلاته
وأتشرف بأني كنت أحد لعيبته أيام كان له شنة ورنه في دوري كرة القدم بمدني .
درديري كباشي
06-10-2009, 01:12 AM
ربنا يسعدك دنيا وآخرة يا درديري علي زرع البسمة علي شفاهنا .
الفلاته حبائبنا وأعتز بصداقتهم جداً وسوف أحكي لك قصة بلهجتهم أيام الإنتخابات في مدني ( قريباً )
وكانت مجرياتها في نادي الموردة الرياض بمدني والكائن بالقرب من موقف الدباغة سابقاً ويتوسط أحياء ديم أزهري وحي فلاته
وأتشرف بأني كنت أحد لعيبته أيام كان له شنة ورنه في دوري كرة القدم بمدني .

في انتظارك يا استاذنا وابن استاذنا يا ياسر الله يخليك
درديري كباشي
06-10-2009, 01:45 AM
وفي مكان اخر
امام دكان حاج عثمان كان يعقد هناك مجلس اباء مصغر غير معلن يضم حاج سليمان وحاج هارون وبالطبع حاج عثمان صاحب الدكان ووالد ابكر .. لينضم ليهم حاج موسى ولاول مره يشرف المنتدى الفكي ادم خامس ... وعمر ثاني .. كان من المفترض ان تكون جلسة ونسة عادية تحت ظل الشجرة امام دكان حاج عثمان لولا انها تحولت الى اجتماع بعد ملاحظة القاها حاج سليمان ..
حاج سليمان : انتو ما ملاحظين يا اخوان انه اولادنا بقوا مساكين من حادثة الاستاذ ديك ؟؟ وانا تاهر ولدي بقى بس عبارة عن غنماية في البيت ما يتلع ما يرفع راسه من الكتاب وبصراحة انا الحكاية دي ما اجبتني ..
حاج موسى : حتما ولا بد نفس الكذلك عمر ولدي يا حاج سليمان وبعدين انا جني وجن كسرة الراجل .. انا خايف الاولاد ديل يكون بقو خوافين كمان لا سمح الله .
وعمر ثاني : ما تدخلونا معاكم في الصورة ما نحن كمان عدو ( عضو) مهم في الحارة دي ولا انت شايف نزره مش ولا بد يا حاج عثمان وانت راجل صاحب منتق واندك بعد نزر .. يعني نحن عشان ولادتنا كلها بنات ما تفهمونا معاكم ؟؟
حاج عثمان : الافو يا ابوشينا ياخي وزي ما قال المسل المسري العين ما تعلى على الحاجب ابدا .. كل ما في المودوء انه الاولاد جابو ليهم مدرس رياديات من الخرتوم وحبوا يعملوا معاه عكنبة لكن الولد تلع بتاع كراتيه وشنكبهم ليك لامن عرفوا حاجة .. اها من يومها الاولاد بقوا مساكين ونحن نتناقش في الموضوء من وجهة النزر المختلفة .. وانت ممكن تدلو بالدلو بتاعك برضو ما في اوجه ..
عمر ثاني : انا يادوب كدا بقيت معاكم في الصورة وانا ممكن من وجهة نظري المتواضعة انه حتما ولا بد نعقد اجتماع على مستوى القاعدة بتاعة الحارة ونناقش الموضوع من كل جوانبه التربوية والاخلاقية .. لان دا موضوع حساس وبيمس مستقبل الاولاد .. كل شئ واهم شئ انه رجل المستقبل ما يكون خايف من اثار الماضي مهما كانت جوانبه المختلفة .
حاج عثمان :يا سلام عليك يا حاج عمر نحن من زمان فاقدين الناس الاندهم منطق حضاري زيك كدا وعندو قدرة عظيمة على استدعاء الماضي لاستشراف المستقبل بالقدرة التحليلية العجيبة العندك ونحن جد كسبناك رجل ولا كل الرجال ..
حاج سليمان : وانا كمان عندي وجهة نظر مختلفة .. انتو ملاحظين يا جماعة انه حضرة الناظر انه بقى ما زي الاول زمان يجي ويتونس معانا في الدكان ولازم نحن نعرف شنو غيرو مننا ولا كمان بقى يتعالى علينا .
حاج عثمان : الناظر مشكلته هينة ممكن انا بكرة امشي له واساله وزي ما يقول المثل العربي ان غدا لناظره غريب .
حاج سليمان : فئلا انا كمان قلت الناظر دا بقى غريب ..
في هذه اللحظة كان الفكي ادم خامس يلتزم الصمت ولم يشترك في الحديث ولكي لا يفوته شئ حب يشارك في الحديث .
حاج خامس : يا اخوان وانتو ماتنسوا انه نحن كلنا اباء وحتما ولا بد ما نتحمل اي انكبة تحصل لاولادنا وانا ممكن اقوم باي دور تطلبوه مني .
حاج عثمان : فكي ادم انت ما سلاحنا الاستراتيجي ذاتو ياخي هو نحن نقدر نستغنى عنك .. بس نحن نخليك للنهاية لو كل الطرق اتقفلت والاستاذ دا ما نفعت معاه الحلول السلمية حنقول ليك دور معاهم اسلحة الدمار الشامل توااااااالي ..
مايسة
06-10-2009, 01:53 AM
درديري ازدواجية المعاييير دي نظرية مريحة جدا - سلمت وسلم قلمك -
درديري كباشي
06-10-2009, 05:12 AM
درديري ازدواجية المعاييير دي نظرية مريحة جدا - سلمت وسلم قلمك -

مشكورة يا مايسة ونورتي حوش مدرستنا

كوني بخير
بنت الرفاعي
06-10-2009, 05:56 AM
أخي درديري أعجبتني طريقة تفكير أشخاصك في القصة وردودهم فبعضها يبين أن هناك منطق بين هؤلاء البسطاء بالرغم من بعض أفكارهم التي تنبع من الجهل ، ولكن أعتقد أن مثل هؤلاء لو سمحت لهم ظروفهم بتكملة تعليمهم ( كان خربوا البلد ;):p ) ، وبالتأكيد في الحقيقة هناك أناس مثلهم أو على الأقل يشابهونهم في أغلب أفكارهم ومنطقهم .

متابعة صامتة مني في إنتظار البقية .

ولك كل الود والتقدير:)
درديري كباشي
06-10-2009, 06:17 AM
أخي درديري أعجبتني طريقة تفكير أشخاصك في القصة وردودهم فبعضها يبين أن هناك منطق بين هؤلاء البسطاء بالرغم من بعض أفكارهم التي تنبع من الجهل ، ولكن أعتقد أن مثل هؤلاء لو سمحت لهم ظروفهم بتكملة تعليمهم ( كان خربوا البلد ;):p ) ، وبالتأكيد في الحقيقة هناك أناس مثلهم أو على الأقل يشابهونهم في أغلب أفكارهم ومنطقهم .

متابعة صامتة مني في إنتظار البقية .

ولك كل الود والتقدير:)


تشكري يا مرام

كوني متابعة لسع في مزيد من التنظير و الفلسفة
moh_alnour
06-10-2009, 03:52 PM
تعرف يا أبو الدُر و أنا بقرأ في بداية البوست و الله على طول خطر في بالي غرب القاش
فقد أقمنا بها يومان في داخلية جامعة كسلا عندما جئنا إليها في رحلة علمية من جامعة الجزيرة في نهاية التسعينات
وقد لاحظت أن أغلب سكانها من الأخوة الفلاتة و الهوسة و قد أقمنا رحلة و حفلة نهارية من أجمل ما يكون في السواقي الشمالية




اعمل تكنيك الراجل الكل يوم بيطشم ويقعد ينبذ فى الحيكومة قدام البغبغاء بتاعو
وفى يوم البغبغاء طار من القفص وقعد ينبذ فى الحيكومة من شجرة لشجرة وناس الأمن متابعينو لما رجع البيت تانى
دخلو على الزول وهرشو : البغبغاء دا بتاعك ؟ زولك عرف البغبغاء عملا كبييييرة وضقلا يكركب
قال ليهم : شوفو ياجماعة من حيث البغبغاء بتاعى فهو بتاعى ، بس انا وهو مختلفين سياسيا تمام



تأرفي ياهجه نحن ذااااااااااااتنا مالا قين تريقه .. وانا من السباح اكابس اكابس اكابس .. يا دوب تلعت لي بخمسة رغيفات
اتسبرت بيها اسوي شنو ) لاحظ في ذلك الوقت انه الرغيفة كانت ربع متر ... الحجة تناولت قفتها ونست الموضوع

:p :p :p
:p :p :p
درديري كباشي
06-10-2009, 08:08 PM
تعرف يا أبو الدُر و أنا بقرأ في بداية البوست و الله على طول خطر في بالي غرب القاش
فقد أقمنا بها يومان في داخلية جامعة كسلا عندما جئنا إليها في رحلة علمية من جامعة الجزيرة في نهاية التسعينات
وقد لاحظت أن أغلب سكانها من الأخوة الفلاتة و الهوسة و قد أقمنا رحلة و حفلة نهارية من أجمل ما يكون في السواقي الشمالية





:p :p :p
:p :p :p
سلام يا ايو النور يعني شرفت كسلا وللاسف نحن خارج السودان من نهاية التسعينات والا كان يمكن جمعتنبا بيك صدفة جميلة ..
درديري كباشي
07-10-2009, 12:11 AM
وانفض مجلس الاباء المصغر
في عصر نفس اليوم فكر حاج عثمان ان يسال ابنه ابكر بعد ما لاحظ الى صمته وهدوءه وخاف فعلا انه ابنه يكون اصبح خائفا ومرعوبا بعد ان كان مرعبا والحلة كلها تعمل له حساب وكان مصدر فخر يضمره حاج عثمان ولا يبوح به لاحد خوفا من حنق اهل الحي .. ولكن كان كلما جاء اب او ام يشتكي من تحقير او ضرب ابكر لابنهم كان هو يشعر بالرضا والسرور ولا يظهره ورغما عن انه كان يعاقب ابنه فعلا لارضاء الاهل ولكنه كان يتمنى الا يفعل .. وفي ذلك اليوم زاد همه وخاف ان يذهب ابنه في اتجاه آخر غير الذي رسمه له في قيادة وزعامة الحارة من بعده ..ولكي يتحقق او يكذب ظنه نادى ابكر وساله ..
حاج عثمان : ابكر ولدي تعال نتناقش شويه والمره نخليه كلام راجل لراجل لازم تعرف انه انت ما ولد صغير انت كبير اخوانك وانا حتما وقطع شك بعتمد عليك كتير .
ابكر : ايوا يا ابوي اتفدل اسال .
حاج عثمان : الاستاذ الجديد عامل معاكم شنو ولسع بيضربكم ولا خلى الضرب .؟؟
ابكر : خلانا شنو يا ابوي الليلة انا ضاربني .. رافعا قميصه .... شوف الضرب يا ابوي ..
حاج عثمان .. اعوذ بالله هو مالو الراجل دا عاوز منكم شنو برضو في نفس الموضوء بتاع جدول الضرب والكلام الفارغ الماسكين فيه هو والناظر داك ؟؟
ابكر : ايوا يا ابوي هو نفس المودوء ..
حاج عثمان : دا كلام فارغ يا ولدي ارح معاي نحن لازم نطلب اجتماء مستأجل مع حضرة الناظر .. ارح نقابل اعمامك ونروح الناظر في بيته نطلب معاه اجتماء فورا .
وفعلا يعود حاج عثمان للدكان ويرسل لكل جلساء الظهر ويقول لهم لازم نطلب اجتماع مستعجل مع حضرة الناظر غدا صباحا ونحسم فيه امر هذا الاستاذ .
وافق الجميع وارسلوا للناظر ووافق الناظر على مقابلتهم في مكتبه غدا صباحا ليعرف اساس الموضوع منهم ,,,
والى العودة
درديري كباشي
07-10-2009, 09:54 AM
في الاجتماع
في صباح اليوم التالي لبس الحجاج كامل زيهم ومن له عباية تلفح بها او شال وضعه في كتف مع تعليق العصي المعكوفة على اليد وكانوا عبارة عن مجموعة من النواب يتجهون الى قاعة البرلمان ..
يتزعمهم ويتقدمهم الحاج عثمان والد ابكر ..يستقبلهم الناظر في حوش المدرسة ويتجه بهم نحو قاعة الاجتماعات وتبدا الجلسة بعد الجلوس والاستقبال والحفاوة .
الناظر : السلام عليكم .
الجميع : واليكم السلام يا هضرة النازر ..
الناظر : نعم نعرف ما هو الموضوع المهم الخلاكم تجتمعوا بي ؟؟.
ينبري للحديث الحاج عثمان : اولا يا هضرة النازر نحن نشكر روحك الطيبة وقبولكم الكريم في دعوتنا لسيادتكم لعقد هذا الاجتماع الهام والمتعلق بمستقبل اولادنا وفلزات اكبادنا ..
الناظر : اتفضل يا حاج بدون مقدمات مالهم اولادكم ..
حاج عثمان : تعرف يا هضرة النازر انه استاذ الرياضيات الجديد اتهض اولادنا والهب ظهورهم بالسياط حتى اصبحوا خامدين وخائفين لايهشوا ولا يجيبوا الهجاره .. كما تعلم يا حضرة الناظر انه الراجل راسماله قلبه .لو مات القلب انتهى كل شئ .. ونحن اذا كان اولادنا راح يتعلموا على حساب قلوبهم يغور التعليم في ستين داهية ..جاهل قلبه حي ارحم من مليون عالم جبان .
حاج سليمان : افارم اليك يا حاج عثمان لقد اثلجت سدورنا ..
الناظر : تفتكروا يا اخوان انه الاستاذ هدفه انه يخوف الاولاد ويقتل قلوبهم .. ابدا ودا اتهام خطير منكم .. لكن انا واثق انه الاستاذ قصده انه الاولاد يتعلموا ويحفظوا دروسهم لا اكثر ولا اقل .
حاج عمر : لكن كيف تفسر انه الاستاذ كل يوم يرتب للاولاد علقة بدون اي مبرر ؟؟
الناظر : يا اخوان انا راح انادي الاستاذ وتسمعوا منه بانفسكم .
حاج عثمان : ياهضرة النازر قبل ما تنادي الاستاذ اسمع طلبنا الاول .. نحن نطالب بنقل الاستاذ الجديد وطلب استاذ اخر او تبديله مع استاذ مدرسة البنات ..
الناظر : اولا نقل الاستاذ هذا لايمكن لانه جا هنا بقرار وزاري وتبديله مع مدرسة البنات مستحيل لانه البنات عندهم مدرسة انثى وليست رجل ..
حاج الطاهر : طيب مالوا الانثى ما تدرس الاولاد ما هي زي اختهم .
الناظر : يا راجل قول كلام غير كدا اولادكم ديل رجال ما قدروا عليهم نجيب ليهم مدرسة ؟؟ على كل حال انا رسلت للاستاذ ونشوف رايه شنو ؟؟
بعد قليل يدخل القاعة الاستاذ فيصل ويبادره حضرة الناظر :
يا استاذ فيصل هؤلاء اباء التلاميذ في فصلك واشتكو منك قالوا انت بتضرب اولادهم بدون مبرر حتى اصبحوا مرعوبين رايك شنو في الكلام دا .؟؟
استاذ فيصل : عفوا دا كلام ما صاح شنو انا يخليني اضربهم بدون مبرر نحن بنعمل من اجل مصلحتهم .. وانا لو شعرت انه اي تلميذ مقصر عن اداء واجبه ومتراخي صحيح اضربه عشان اقومه واصحح مساره ودا جزء من التربية كما تعرف يا استاذ سيد احمد ..وانا الاولاد ديل ما عاوزين يحفظوا جداول الضرب وانا ممكن امتحنهم قدامكم الان عشان تقتنعوا .
حاج عثمان : كدا عين العقل يا استاذ نادي الاولاد واسالهم قدامنا انا متاكد ممكن يكونوا حافظين .
وفعلا يرسل الفراش الى الفصل وياتي بابكر وشلته ,,
ويبدا الاستاذ بابكر : يلا يا ابكر قول سبعة في اربعة بكم ؟؟
ابكر بعد تعتعه ولفيت : يكون يا استاظ يمكن بخمسة وتلاتين ويمكن باربعين ..
قبل ما يعلق الاستاذ او الناظر يفاجا الجميع بصفقة الحضور ..
افارم اليييك يا ابكرونا ..
الناظر : شنو هو العفارم عليه الاجابتين غلط ..
حاج عثمان : ما شفت يا استاذ قال ليك يمكن بخمسة وتلاتين ويمكن باربعين ليه لانه الاسعار ما ثابته .. يمكن الليلة تكون بتلاتين بكرة تكون بخمسة وتلاتين .. نحن ناس سوق ونفهم في الحاجات دي .
الناظر : شنو هو ما ثابته سبعة في اربعة دي بتمانية وعشرين من الله خلقها ما اتغيرت ..
حاج سليمان : دا كان في زمننا نحن يا هضرة النازر لاكين الزمن دات كله شئ اتغير وما في شئ ثابت .. يعني خمسة في خمسة النهار دا بتلاتين فجاه بكرة يمكن تلاقيها نزلت بعشرين حسب السوق زي ما قال حاج عثمان .
حاج عمر : يا هضرة النازر الزمن دا زمن الاولمة والعالم بقى قرية صغيرة والكتوف اتلاحقت ..
حاج سليمان : انت عاوز الامور تكون زي ما هي يا هضرة النازر من الخمسينات .. اطلع بره من المدرسة دي وشوف السوق .. ولا تعال اقعد معانات في الونسة .. زمان كنت مسخف اها هسع من خليتنا فكت منك وبقيت حتى سبعة في اربعة ما عارفه بقت بكم ..
الناظر مخاطبا استاذ فيصل وبصوت شبه هامس ..
تعرف الجماعة ديل انا كان جاريتهم حايجنوني معاهم شوف عاوزين يطلعوني انا ماعارف سبعة في اربعة بكم احسن حاجة نوزعهم ...
مخاطبا الجمع .
الناظر : خلاص يا حجاج وجهة نظركم سليمة والظاهر نحن مقرراتنا قديمة من زمن سبعة في اربعة بتمانية وعشرين .. وانا حا ارفع رايكم للوزارة يمدونا بجداول الضرب الجديدة اخر تسعيرة بعدين نحفظها لاولادكم خلاص شكرا على الزيارة ورسالتكم وصلت .
وانفض المجلس مرة اخرى زائدا شعبية حاج عثمان بمنطقه القوي وتشكيكيه في جداول الضرب البالية التي لم تحدث من الخمسينات وتواكب الاسعار الجديدة مع العولمة .. او كما قالوا .
درديري كباشي
23-11-2009, 05:54 AM
أودنا

أنفض الاجتماع مع حضرة الناظر وخرج الحجاج من المدرسة وهم تغمرهم السعادة بعد ان اقنعوا الناظر والاستاذ بان جداول الضرب التي هكلوا بسببها ابناؤهم ضربا قد تجاوزها الزمن ..
حاج تاهر : وجودك كان المهم ياحاج عثمان وكالعادة افحمت الجماعة بالمنطق العجيب بتاعك ذاتو ياخ .

هارون : من اليوم مافي داعي انه الاولاد يضيعوا زمنهم في التسعيرة القديمة لجداول الضرب دي ..

حاج عثمان : انا كمان قلت كدا
moh_alnour
23-11-2009, 04:54 PM
من اليوم مافي داعي انه الاولاد يضيعوا زمنهم في التسعيرة القديمة لجداول الضرب دي

;) ;) ;)
:) :) :)
;) ;) ;)
درديري كباشي
24-11-2009, 01:40 AM
;) ;) ;)
:) :) :)
;) ;) ;)

يا محمد نور دي نظام تيست وكدا .انا قلت لعلوا الكرسي الساخن ما كمل الفينا .. ولكن جربتها هنا ولقيتها لسع شغالة والحمد لله ..