المساعد الشخصي الرقمي

مشاهدة النسخة كاملة : المراة والراجل والنسيبه من الجهتين (للمتزوجون فقط)


ام قبس
19-07-2009, 12:39 AM
اولا للرجال لو كنت متزوج وعندك اخت متزوجة
انت داقس لو اتخيلت ان البتعملوا اختك مع نسابتها مفروض تعمله مرتك مع اهلك
هذا لايجوز في عرف النسابه ولا الحموات
للمابعرفوا التسميات
1) النسيبه هي ام الزوج او الزوجة
2) الحماة هي اخت الزوج او الزوجة
والعهدة علي الوراني الكلام دا
تسميات من تحت لي تحت
النصيبه هي ام الزوج المغلوب علي امرة من امه وطالع زيته مع مرته
الحماء او السخانه هي اخت الزوج المورياه النجوم في عز الضهر وقاعدة ليه في الزراره الاخيرة قبل الكرفته لو بلبس كرفته
اها خلونا ندخل تتتتوش في الموضوع الاول دا كان كله شروح ساي
طيب لو الراجل متزوج ومرته من النوع الصعب المترقب دخلت يده في جيبه
وطوالي دا لي منه
لو اليد اتوجهت ليها .. الضرس الاخير بيظهر
اما لو لاقدر الله بقت اليد طريقها للاخت او الام فاحتمال يدك تلقاها مافي او بي كل طرق (كيدهن عظيم ) يدك ترجع بس الفيها ماتعرفة وصل وين
خليكم جادين شويه ونتكلم بي العربي الفسيح
بعض النساء يدخلوا علي .........................
الواحدة مما تعرس الراجل عاوزة تنسيه اهله وفي بعض الاحيان اسمة
وتوهمه ليك جنس وهم انهم من بيت واحد وانهم اخوان ( دي كيف مابعرفها ) بي معني انه هو ولدهم وكدا
وتستشيط غضبا ((حلوة موش ) اذا ماعلمت انه يرسل لي اهله مصاريف او لو في البلد بيساعد في مصروف البيت
وهو مقتنع كل الاقتناع ان مايفعله صحيح لان اخته او اخاه الاخر يفعل ذلك
وطبعا المرجع في صدق ذلك الزوجة متابعة الموضوع
يعني نرجع للدارجي لانه الفسحة دي ذي الشربت لي شاي تقيييييييل
وتعالوا شوفوا البت العرست ليها راجل امه طيبه ومسكينه
نجاض ابو قبورة بتعرفة
ولا ديك العرسته واخواته مامعرسات
ولا الامه صرفت دهبها وسفرته ومرته شرته الدهب بعد قندل بس ما لي امه انتوا شاطرين وفاهمين لي منو
ولا العجب العجيب العرسها مسكينه وبعد داك بقت سكينه
ولا النسيبه البتحرش بتها لمان جابت اخرها بي يدها
ولا ديك البتتدخل في كل شي بين اخوها ومرته وليه تجيب ليها وليه تشتري دا مافي داعي
والله حاجات عجيبه
وقصص جنس قصص
ررررراجعة احكيها ليكم بالتفصيل الممل
بس ماتتهجم لو لقيت نفسك من اصحاب احد القصص
تمشي تشاكل مرتك وتقول ليها كشفتي حالي في المنتديات
esmat
19-07-2009, 01:04 AM
ما معرسين لكن اي بوست في عرس وكدا اصحابو
وقاعدين منتظرين للعرس والكيدهن عظيم
عمر حبيبي
19-07-2009, 01:10 AM
الله يكضب الشينة ..
عرسنا وقعدنا ... وكدي نشوف الفضايح بتقيف في البوست ده ولا لسه لي قدام ...

تحياتي أم قبس ..
الملكة اسماء ( ام محمد )
19-07-2009, 01:12 AM
ما معرسين لكن اي بوست في عرس وكدا اصحابو
وقاعدين منتظرين للعرس والكيدهن عظيم

انت يا اخوي البوستات دي ح تعمل ليك وحدة من اتنين
يا اما تتعلم صح ....... وتطبق عمليا بمزاج
او تجيك عقدة ازلية من الحاصل في الحياة الجاية .. وتغير رائيك في التطبيقات نهائيا



في الحالتين....... الله يعينك ويعرس ليك البتستاهلك ......... قول ااااااااااااااااااااااااااامين ( بس براحة ماتفضحنا ويقولوا متجرس:rolleyes::D:D:o)
بت أم درمان
19-07-2009, 01:14 AM
وقصص جنس قصص
ررررراجعة احكيها ليكم بالتفصيل الممل

*******************

تعالي ياختي
وزي ما قلتي القصص كتيرة

تعالي احكي
ونحن كمان بنحكي
والله هي جنس قصص غايتو
ام قبس
19-07-2009, 02:45 AM
ما معرسين لكن اي بوست في عرس وكدا اصحابو
وقاعدين منتظرين للعرس والكيدهن عظيم

انت ماقريت التنبيه الفي العنوان دا للمتزوجين فقط
والله ياخوي انا خايفالك من الكيدهن عظيم ديل زاتهم
وذي ماقالت ليك الملكة خايفالك من العقد
لانه بتيقي عقد في المنشار ودي صعبه بالحيل
مرحبابك
اسمع واتعلم
وماتخت في خاترك ياود امي
دي خترفات بس
ام قبس
19-07-2009, 02:52 AM
الله يكضب الشينة ..
عرسنا وقعدنا ... وكدي نشوف الفضايح بتقيف في البوست ده ولا لسه لي قدام ...

تحياتي أم قبس ..
انت ياخوي لسع في مرحله عمر حبيبي
لو بتتقال ليك معناها انت لسع في مرحله ناس الطرق ديل ببالغة ومايصلحه الشوارع دي
واحسن تبقي مارق من البوست دا وتعيش في الانت فيه
ولسع ماوصلت لي مرحله اعمي ماشايف قدامك
اما لو انتي او انت بتقولها او بتقوليها لي ولدك
انسي لانه الجواب باين من عنوانه
مشكور يا ام عمر او ابو عمر او
واشك في ذلك..................
مرة عمر
ام قبس
19-07-2009, 02:54 AM
هلا بالملكة والله شرفتي
كلامك في محله
واصعب شي للناس المامعرسه الهجمة
وللمعرسه ودخلت البوست دا
الهجمه المرتده
الله يساعدنا جميعا
ام قبس
19-07-2009, 02:56 AM
[
تعالي ياختي
وزي ما قلتي القصص كتيرة

تعالي احكي
ونحن كمان بنحكي
والله هي جنس قصص غايتو[/quote]

انت مستعدة لو متزوجة شكلك منجضاهم
ولو لسع مابديك اخوي
مشكورة بت ام درمان
وسني لي قلمك
بت أم درمان
19-07-2009, 03:02 AM
انت مستعدة لو متزوجة شكلك منجضاهم
وسني لي قلمك

النبي فيني لا منجضة زول ولا زول منجضني سمنة على عسل ياختي بس باعتبار ما شفت وسمعت برا برا يعني
عبدالله الصديق
19-07-2009, 03:13 AM
احكيلكم قصة حكاها لي واحد سعودي
رجل ومرتة وام الزوج من خلفهم شايله احد اطفالهما
دخلوا محلات دهب ..اشترى الرجل دهب لمراته بعشرين الف
ولما جاء للحساب وجد المبلخ عشرين الف ومائتين ريال
سأل الزوج عن سبب الزيادة
قال الصائغ : العجوز اخذت خاتم
تخيلوا معي ماذا حدث بعد ذلك
@@@@@@@

$$$$$$$$$


&&&&&&&&


%%%%%%



*********



########




قلع الابن البار الخاتم من يد امه وقال ايش دخل العجائز بالدهب
فقالت له الحرم المصون :بالله عليك اتركه لها منو البشيل لينا اولادنا
ام قبس
19-07-2009, 03:16 AM
اها النحكي ليكم القصة الاولي
قبل الناس دي ماتجي متلبه تنسيني عايزة احكي شنو
جميله وعاجباها روحها وكدا عرست واتعززت
راجل ضكراني اخو اخوان
لا ضبح كديسه ولا يحزنون
امه مرة كبيرة لا ليها في الذرة ولا الطحين كل برنامجها انها تشوف اولادها واولاد اولادها
دخلت العروسه الجديدة
واظنها مابرجلها اليمين
وبعد داك عينك ماتشوف الا النور ................زز مالنور بتاعنا دا الفي المنتدي
دا نور البيجي لمان تطقك حاجة فجاء وتشوف حاجات ذي النجوم كدا في عز الضهر
الشابه مناكفات شديدة مع ام الزول
ولو الحاجة قالت شيء البت تنط ليها في حلقاه
وهو يمشششششششششششششششششي ويمشششششششششششششششششششششي
وماعارف مشيه دا بخلي الامور تستفحل (( حلوة تستفحل دي ))
اها ياجماعه الامنته ليكم
المرة تخلي الراجل يطلع بي جاي وهات ياتهزئي وبشتنه شديدة للحاجة (( مابتخاف الله فيها))
الما واعيه لو اتذكرت امها مابتعمل جنس العمايل دي
المهم المرة ولدها يجي من الشغل يلقي ليك الحاجة وشهها متغير
مالك يا امي مافي شي
مالك ياحاجة مافي شيء
طبعا المسكينه تقول لو قلت ليه حتحصل مشاكل والولد عندة اولاد
احسن اسكت ما اخرب علي ولدي
الحجة طيبه شديد
والمرة قدر شديد بي ضم الق
والراجل مستهبل شديد
قولو لي كيف
كييييييييييييف
عاوز يريح اضانه عااااااارف الزعل الحجة منو
لكن في احتمالين
ام خايف من المرة اذا فتح معاها الموضوع
اما بيقول امي دي بتكبر المواضيع
ما هو عارف الزعل الحجة منو يعني حتكون العمرة
اها قول طول ماتطول
تابعة المرة عمايلها دي والراجل ساكت والحاجة ساكته
لمن وافتها المنيه
وطلعت الحاجة بتفرق مع جارتها
عن البيحصل ليها من مرة ولدها
ومحلفاها ماتحكي للولد
وبعد ماتت................ الجارة العجوز جات حكت للولد
ندم وسفة التراب والتراب ماشبعة ولا رواة
ولو كان عارف ومطنش يرجي الراجيه .................
ولو ماعارف يلوم نفسه علي عدم اهتمامه بي امه.............. ومابفيد اللوم
ام اختنا ديك اقول ليها العملتي بتلقي
في حاجة مهمة جدا نسيتيها
العاملتيها كدي دي هي الجابت راجلك دا
اي نعم العرس نصيب
بس دا امه الولدته من بطنها لو كانت مجرمة مفروض تحترميها
لو صحي بتقدريه وبتعزيه
بتحترمي اي شيء من ريحته
لو قصتك او انتي قصتك بتشبه دي
احسن فوقي او فوق قبل الفاس ماتقع في الراس
وبعدين ماااااااااااابنفع الندم
ام قبس
19-07-2009, 03:28 AM
النبي فيني لا منجضة زول ولا زول منجضني سمنة على عسل ياختي بس باعتبار ما شفت وسمعت برا برا يعني
ان شاء الله عسلك دايم علي الكل
يابت ام درمان ولو صبرتي شويه كنت حاحكي قصة عن الذكاء البيخلي المرة تكسب جميع الاطراف وتعيش هي مرتاحه
ودي البنسميها الدبلماسيه الحكيمه
اكيد انت واحدة منهم
وفي الحديث الشريف اسمها لاضرر ولاضرار
الله يديم عليك نعم التوافق
ويلا برضه احكي لينا
ام قبس
19-07-2009, 03:34 AM
الاخ عبدالله الصديق
مشكور علي القصه الجميله
ولكن للاسف بعد ماكنا بنسمع القصص دي في المجتمعات التانيه
بقت عندنا كتيرة خلاس
ربنا يهدي النسوان والرجال
الملكة اسماء ( ام محمد )
19-07-2009, 03:36 AM
http://img186.imageshack.us/img186/1597/29902211hc6.gif:p:D:D:D:D:p
ام قبس
19-07-2009, 04:06 AM
والله يالملكة الله يديك العافية
كركاتير لطيف شديد
وبمناسبته احكي ليكم القصه العجيبه دي
نسيبه النوع البسموهم بالصاد
ولدها عرس بي طريقته الخاصة يعني ماذي ناس
امي شوفي لي عروس علي زوقك
وبعد داك زوقها يجيب اخرها واخرة
والمهم جاء كلمها قالت ليه احسن ليك من اهلك
وحدة نكون بنعرفها وبتعرفنا
قال ليها امي بس دي ولا اموت ركن
قالت ليه خلاص انت حر
عرس الولد
وجاب المرة تقعد معاه في بيت اهله
واستلمتها ليك الام من اول يوم وصايه شديدة
حبيبتي كل مرة تقول ماله ماتوريني المابعرفة
وبعد داك الحلبه ضاقت بي المتعارك لي وحدة
وبقت الام قاعدة للبنية بالمرصاد
وماتصدق ولدها يجي من برة الامرتك عملت ومرتك سوت
تعبت ليك الولد ومرته في قلبهم
(( طبعا دا كله من الاحساس بتاع في وحدة جات وشالت ولدها))
الزوجة تعبت شديد وتستحمل كل مرة مرة عشان خاطر الراجل ومرة عشان ماتكورك قدام الاولاد عيب ومرة كدا ومرة كدا
المهم علي قول عباس الدسيس ممشيه حالها
لحدي مالطوبة جات في المعطوبه
جاء من برة واشتكت الام للولد مرة قليله ادب مابتسمع كلامي
تعب شديد من الشكيه
قرر ينهي الموضوع
طلق المرة
خربت البيت
قرر مايتزوج تاني
قعد بين الحسرة واولادة المساكين العاوزين رعايه مع وجود حدود
والزوجة التي لبست وشاح مطلقة طيله عمرها
واحتمال اعادة التجربة 1%
وارتاحة النصيبه
التي لم تحكم عقلها في راحة ابنها ولم تعامل تلك الفتاه علي انها مثل ابنتها
ومن زرع مالحق يحصد
العاقب مصباح
19-07-2009, 04:35 AM
يا عصمت العرس دا فيهو البلاوى دى كلها

عشان كدا يا حبيب قلبى ارخى الموضوع

وما تتمسك شديد

بلا شنطة بلا شبكة بلا شقة بلا شيلة بلا أى شين تانية
ام قبس
19-07-2009, 04:51 AM
الاخ العاقب
انت قمت من كرسي الحنه وجيت والله ماقصرت
ايوة فيه اكتر من كده بس القرصان لازم يكون حكيم عشان يسوق السفينه
ويقدر يوازن بين حق الزوجة وحق الام والاخوات
ويفصل في مشاعرة عند حدوث التصادم الذي لابد ان يحدث
وربنا يعين الازواج الماضبحوا الكديسة ومالفتوا نظر الامهات والاخوات لي حق الزوجة
الملكة اسماء ( ام محمد )
19-07-2009, 04:59 AM
(( طبعا دا كله من الاحساس بتاع في وحدة جات وشالت ولدها))
التي لم تحكم عقلها في راحة ابنها ولم تعامل تلك الفتاه علي انها مثل ابنتها
ومن زرع مالحق يحصد

طبعا للاسف ساعات بكون الغلط مشترك
وفي نسبة كبيرة من البنات هم ( البطفشوا ) النسيبة


ومن ناحية احساس الام بان في وحدة اخدت او بالاحرى ( احتلت ) وسيطرت على ولدها فبكون موجود سواء تم اختيار الزوجة بواسطة الام او بدون اخد رائيها في الاعتبار


غايتو الله غالب
وربنا يعين كل المقبلين والمتزوجين
ام قبس
19-07-2009, 05:04 AM
كلامك في حتته ياملكة
والاغلب الاعم في الموضوع من جهة الزوجات
لانه الام بي طبعها حنينه
بس كمان بعض الامهات حكيمات في الشعور بتاع الاحتلال دا وبيقدروا يسيطروا علي انفسهم في كتير من اللحظات
وربنا يكفينا شر الاحتلال
الاميره
24-07-2009, 09:26 AM
كل منا يمر بلحظات من نقاء الروح التي تجعله يخرج من الانا ليتلبس الاخر
بنت الرفاعي
24-07-2009, 10:29 AM
يالهوي؟؟:eek::eek::eek:
عليك الله يا أم قبس في كلام زي ده حقيقي؟؟؟:confused::eek::confused::eek:
غايتو الحمدلله عندنا مافي , وحتى ولو في بيكون نقاشات عادية ومابتأثر في العلاقات بشيء لأنها بتكون خوة!!
أيوة إتذكرت عندنا حالة زي دي لكن من الحموات ولكن ما على طول على بعض!
غايتو الله يخلي ناسنا على طباعهم دي كدة على طول يااااااااااااارب.:)
فراس
24-07-2009, 10:50 AM
ام قبس تحياتي
والله مشاكل كتيرة خلاص وانا الحمد لله مرتاح راحة شديدة اول حاجة والدتي في بلد
وزوجتي في بلد تاني وانا بلد والله المشاكل الا عبر الاثير اللهم لك الحمد والشكر
يعني ذي قصة القصب والمرفعين والخروف في المركب ...
تسلمي
moh_alnour
24-07-2009, 03:40 PM
طبعا ً يا أم قبس أنا و الكاشف أخوي بين قوسين عصمت و العاقب دا شعر ما عندنا ليهو رقبة
و شهر ما عندنا فيهو نفقة عشان كدا ما بنعد أيامو
لكن من باب أداء واجب التكليف كمشرف على القسم قلتا أدخل أشوف حرب المعسكرات دي أنتهت لصالح منو ؟
لقيت الشغلانية ما عندها نهاية و الموضوع كر و فر و الحرب شغالة و مافي أجاويد عايزين يتدخلوا عشان نصل إلى نيفاشا أخرى
على العموم واصلي و منكم نستفيد و على قول الملكة يا أتعظنا بي غيرنا و لا صرفنا نظر عن الموضوع :eek:
قليل من الدبلماسية و قليل من الكياسة في التعامل من الطرفين يمكن أن ترسى سفينة الحياة الزوجية في بر الأمان
محمود (أبو وضاح)
24-07-2009, 11:56 PM
واحنا عشان المنغصات والهبائب جلسنا - دون رفقة - حتى اشعار آخر ،،
يعنى تسريح باحسان للأولى والثانية وبقينا فى رفقة مأمونة ، ننصح ونتناصح وزى (المحللين الاجتماعيين) طبعا الأيامات دى كل البرامج بالقنوات الفضائية امتلأت بالمحللين (سياسة ، رياضة ، ثقافة شنو المابعرفو داك) كما يقول استاذنا الفاتح جبرا ، قلنا نخش مع الجماعة ديل ، جائز نلقى لينا فردة جديدة مقطوعة من شجرة ترافقنا لما بقى لنا من عمر ، على شرط تدفع حق الميز براها Sharing يعنى لحدى سفر الطائرة ووزن العفش ، زواج مطيار !!!
مايسة
25-07-2009, 12:59 AM
ام قبس ازيك

موضوعك جميل - وتقريبا اغلبية المتزوجين مرت بهم مواقف وطرائف في العرس وبعد العرس وفي حياتهم الزوجية عموما

قالو لو العريس كويس واهلو عسل عدييييييييييييل كده لازم تكون في شوكة حووووووت في النص واقفة وممانعة لكل شي

عرفتيها منو دي ;):):d
omer.ahmed
26-07-2009, 05:43 AM
:)

الراجل السعيد وبخيت لا زم تتوفر فيهو المواصفات التالية عشان يعيش في امان وسلام مع امه ومرته ونسيبته :

1) لازم يكون دبلوماسي شدييييد ويعرف متين يعمل رايح ومتين يزوغ ومتين يتكلم
........ في رجال كتار من النوع ده خاصه البعمل رايح

2) لازم يكون مقندل لزوم الهدايا لجميع الاطراف .... يعني تياب ودهب وريحة والمهم تعمل رايح لو طرف سألك من سعر هدية الطرف التاني.

3) اهم حاجة اللسان العسل يعنى الكلام السمح مابقروش .... مثلا ممكن تقول لينسيبتك انك شوفتها ودقستا كنت قايلا بتها (يعني لسا شباب) :D او انك زي ولدا وهي زي امك لاكن اهم حاجة الكلام ده مايطلع بره

4) تكوين حزب التراضي الوطني مع الكل كلهن اهم زول في حياتك يعني زي اولاد الروضة كلهم بيطلعو الأول.

5) اهم حاجه انك تكون كونكتد يعني متصل مع الناس كلهم البعيد والقريب التلفون مابقروش

6) معليش لاكن احيانا بتجيبليها شوييييييية كضب لاكن يكون في الصالح وماتكترو
يعني ممكن تقول لى مرتك انها بالنسبة ليك احلا من اشواريا الهندية مثلا ;)
هي عارفااااااك كضاب لاكن الكلام بيبسط برضو

7) تشتغل كبانية لمن تكون رايق يعني لو امك طولت من نسيبتك او العكس تضرب تلفون لطرف وتقول للطرف التاني الطرف الاول داير يسلم عليك وتقنع من الرصيد :rolleyes:

8) والله دي اهم نصيحة اولادك وبناتك لازم يكونوا بيشبهو الناس كلهم حتى لو كانو نسخة منك طبق الاصل يعنى لو نسيبتك قالت ليك الود بيشبه خالو تقوليها وفيهو شبه من خالتو وجدو (النسيب) كمان ولو امك قالت ليك البت بتشبه عمتا اوبتشبهك طوالي تجيب بالتـأكيد حتى لو كانت نسخه من امها.


اسأل مجرب ولا تسأل طبيب ... والله كلهم حبايبنا وتحية للوالده والنسيبة والزوجة
وعشان ماتجيب مشاكل ترتيب التحية بالاقدمية


:) :) :)
ام قبس
05-08-2009, 05:59 AM
جيتكم تاني
بس برد ليكم بعدين
عشان ملكة الكتابه ماتروح
حلوة ملكة الكتابه دي مش
الدوره دي الكلام ليك يالمنططه عينيك
اخت الزوج
كتير من البنات الواحد اخوها يعرس لو هي اكبر منه او اصغر منه او قدرة قدرة يعني تيمان (( مافي دي كمان))
تعمل ليه فيها ابو العريف
باعتبار العرسها دي من فصيلتها
وحتوري اخوها الدروب والحركات وكدا
وللاسف تخرب عليها وعلي اخوها
تعالوا نشوف بطلتنا الليله
اخوها الوحيد
رسل ليها عاوز اعرس اختاري لي علي ذوقك
عندي ليك عروس شرط الشرط
بمناسبه ((شرط الشرط)) دي هي لسع متداوله ولا جابوا غيرها
عارفين لي سالت السعال دا
جيت هنا السويد لقيت واحد عامل فيها تفتيحا واثناء مابتكلم مع الاولاد قال ليهم (( عذبو جننو )) سالتهم طوالي دا ليه كم سنه من السودان طلع ليه 16 سنه اها هو من زمن عذبو جننو
اوعا اكون انا ذاتي كدا
اسفة والله الملكة طارت بالتداخل دا
بجيكم صادة
بت أم درمان
08-08-2009, 05:41 AM
جيتكم تاني
بس برد ليكم بعدين
عشان ملكة الكتابه ماتروح
حلوة ملكة الكتابه دي مش
الدوره دي الكلام ليك يالمنططه عينيك
اخت الزوج
كتير من البنات الواحد اخوها يعرس لو هي اكبر منه او اصغر منه او قدرة قدرة يعني تيمان (( مافي دي كمان))
تعمل ليه فيها ابو العريف
باعتبار العرسها دي من فصيلتها
وحتوري اخوها الدروب والحركات وكدا
وللاسف تخرب عليها وعلي اخوها
تعالوا نشوف بطلتنا الليله
اخوها الوحيد
رسل ليها عاوز اعرس اختاري لي علي ذوقك
عندي ليك عروس شرط الشرط
بمناسبه ((شرط الشرط)) دي هي لسع متداوله ولا جابوا غيرها
عارفين لي سالت السعال دا
جيت هنا السويد لقيت واحد عامل فيها تفتيحا واثناء مابتكلم مع الاولاد قال ليهم (( عذبو جننو )) سالتهم طوالي دا ليه كم سنه من السودان طلع ليه 16 سنه اها هو من زمن عذبو جننو
اوعا اكون انا ذاتي كدا
اسفة والله الملكة طارت بالتداخل دا
بجيكم صادة

ما تكتري المداخلات البتخلي الملكة تطير :o
يلا مستنين قصة اخت الولد العايز يتزوج عملت شنو:confused:
اوعا بس ما تكون عملت زي اخت الراجل الفي بالي
خلت اخوها يطلق مرتو وخربت بيتو وقعدت :eek:
أبو حمزة
08-08-2009, 06:26 AM
ده إسمو الخوف من المستقبل..الزمن ده ما زمن حماتي ولا زمن نسيبتي ..!!صدقيني البنات صارن بيعرفن مصلحتن وين..وما في إنسانة بتفرط في راجلها..إلا تكون جنت..وأمي براها و أهلي براهم و هو براو ..ولو ما عاجبكم نفرز عيشتنا..وبعدين بيني و بينك الزمن ده منو الما متعلمة..ومن قبل ما تعرسها شوف فهمها....لكن بصراحة الطلاق كتر والقاضي فتر..ّّ!!ومعاك إنو المشاكل كتيرة بس العاقل ( العقلو ..) بيعرف خلاصو
ام قبس
08-08-2009, 08:19 AM
والله يابت ام درمان وابو حمزة مادام جبتوه فوق كدا اصله ما اخذلكم
وذي ماقلتي يالملكة الرد نخليه بعدين
اها كنا واقفين مع اخت الراجل العجيبه
اتسدرت الموضوع
والغلط اساسا منه لانوا خت المفاتيح في يدها من الاول
المهم الامنتي ليك
عندها صاحبتها شديد وماصدقت تلقي ليها بشارة
والاخت مامعرسه واظنها كان مرنقه علي اخو البنيه ولا شيء الله تعالي اعلم
مشت ليك بي ليله داك (( طبعا عارفين تلفونات المغتربين بتكون بالليل ليه :D))
وبشرت ليك صاحبتها بي مقدمات انت عارفة بعزيك وبريدك قدر شنو
((اريت البت كان سجلت ليها الكلام دا قبل العرس عشان بعد مايحصل الحصل تسمعه ليها ))

ودش كتير خلاصته اخوي عارفاه الفي .......................... هسع اقول في قطر يقولوا دا العاقب مصباح
هسع انا قلت شي:eek:
المهم البت طبعا اتعززت شوييييييييييييييييييييييييييييييه ماكتير
وادت الضوء الاخضر
وبدت الاجراءت
الاخو امشي قولي ليها
البت امشي قولي ليه
الاخوت قالت ليك كدا
الاخت قال ليك كدا
الاخو اتحدد مواعيد قولت الخير
واول كلمه بعد قولت الخير الكرت الاحمر للاخت
دا شي صعب بالحيل طبعا
استغنوا عن خدمات ساعي البريد
والغيرة بدت تسخن سخانه بسيطة
بالذات لمان تعرف معلومة عن مواعيد شيء من صاحبتها ما من اخوها
اها بقي يقول ليك انت انا مابعرف لمان تكونوا خلاص قررتوا
الشيله رسل ليك تشتريها انت
سقتي معاك اختك عشان تختاروها
وبي جوة جوة
طيب دي ماقروش اخوي
المهم الاجرات الاولي تمت بين تسخين وتهدين
لحدي مالعرس تم
وبعد داك سافروا لي الدوله المقيم فيها العريس
ما قطر:p
طلبت الاخت تجي زيارة من قولت تيت
ماراعت الجماعة عرسان وكدا
وطبعا دا كله تيرمومتر لي الاخو اتغير ولا شنو
وهي اساسا ختت الفهم انو اتغير
طيب مايتغير
ماعرس مالازم فهمو للحياة هو عزابي غير هو متزوج
المهم تفادي للتصادم وعرفان بي الجميل رسل ليها
وجات الكارثة شايله قنابلها
يومين بس
وبعد داك مسكينه عاوزة تلعب دور الموجهه والحكم للاخ
ونست انو الفريق التشكيله بتاعته اتغيرت
و422 وبتجيب اهداف
هي دحين بيقسموها كدا ولا انا لافحاه ساي
المهم
من تقوم من النوم الليله حاطبخ كدا
ونتعشي برة
بعدين يا فلان امشي ناس فلان عندة ود عمو مات في السودان ماشتل معاه الفاتحة
دا شنو اللابسه دا غير القميص الشين دا عليك الله ((والقميص مشتريها المرة ))
المرة تتدخل المطبخ لا القال ليك منو دا بيعملوة كدا اخوي بحبه كدا
غسلت الهدوم
اخوي بيحب صابون الغسيل تاني مادا
دا بيعمل ليه حساسيه
المرة لبسة دايرين يمرقة
دا شنو اللابساه دا والله النسوان بيضحكوا عليك
وبعدين دايرة الناس يقولو ماجبنه ليك شيله حلوة
كتر كتر كتر كتر
ومرة البت تمشي ومرة تكلم راجلها ومرة ترد براها
لمان فاض بيها وقررت المناقرة وحدة بي وحدة
وبعد داك المواجه ابتدات علنيه
ودقت الحرب طبولها
ودقديق الصفايح وطليع الفضايح :o
والبت ماكانت صاحبتها
انت ماكنت بتعلقي لي علي ود ناس فلانه داك عاجبك
انت ماقلت لي ود ناس فرتكانه شاغلك
اكيد لقي منك تجاوب
وبدا خراب الصاحبات
اقصد خراب البيوت
واتخرب العش الصغير
وطلق الراجل وسفر اخته
بس بعد شنو
بعد ماخربت سوبا
ابوخالد
08-08-2009, 09:59 AM
كلام جميل وقصص أجمل

الحقائق واقعية ومعاشه ....

لاألوم ام الزوج ... لانو ده ولدا مابترضى واحده تشاركا

فيهو ( حسب الفهم القديم ) ... وممكن تكون هى أو إحدى أخواته

إختارت العروس ... وحتى لو الزوجة صاحبة واحدة من الأخوات

برضو بعد الزواج بتحصل المناكفات ... بين الأخوات والأم من جهة

والزوجة وأهلها من جهة ... ويروح فيها المغلوب على أمره

شمار
× مرقة ... بين سندان الزوجة ونقتا الكتيرة .. وبين مطرقة

الوالدة وتمثيل المسكنة وأنها المنسية وماجايب خبرها .....

الحكاوى تتنوع وتتعدد ....

ولكن يبقى الرك كله على حمال التقيلة وكيف يقدر يوفق

بين المطرقة والسندان .... بمعنى يجتهد بقدر المستطاع ....

لايتدخل بينهم إلا إذا إستفحل الوضع وتأزم .... ويحاول يرضى كل طرف

على حده بالمستطاع ... ماديآ أو نفسيآ ( كلام معسول يعنى )......

النقة الكتيرة من الزوجة فى محاولات مستميتة منها لتبرئة

نفسها وأهلها من الغلط ... وحكاوى الام والاخوات لشرح

لآمة الزوجة معهم ... وطبعآ اللآمة دى ماتظهر إلا بعد الزواج

لكن قبل الزواج البت دى صاحبتنا ومؤدبة وأخلاقا كويسة

وأهلا ناس كويسين وووووو ... ومسكينه ... وسبحان الله

بعد الزواج تتغير نظرتهم ليها كليآ ...

يعنى فى كلا الأحوال الرك على الزوج بدون ضبح كدائس

ولا كلاب .... شخصية الزوج هى مربط الفرس .....

ولك كل الود والإحترام
أختى أم قبس
ابوالنور
10-08-2009, 12:49 AM
القلم ... بتار ... والتار ودار ... والكلام صبابات خريف الروح ... خلوني اشتت السحاب الشال جوايا فيكم ... يا جاكم غمام ... يا سيل ... ولو كسح ما خلّ شي ... ذنب السحاب
وقالو المرة كان غلبا راجلا بتأدب نسيبا
أبوعمرو
10-08-2009, 01:04 AM
أم كبس
ضاربه السقطيبه في البلد (ديك) وتسخني في المواضيع
النسيبه (العجوز) ما منها خوفه ... عاقله ورزينه وحكيمه.
الخوف من النسيبه (الشابه) المتصابيه ... الشايفا انها وبنتها في عمر واحد ... ودي من النوع البتلد هي وبتها في شهر واحد... (ياخوانا دي أمه تتطور).
مكي محمد صالح
10-08-2009, 01:34 AM
اها النحكي ليكم القصة الاولي
قبل الناس دي ماتجي متلبه تنسيني عايزة احكي شنو
جميله وعاجباها روحها وكدا عرست واتعززت
راجل ضكراني اخو اخوان
لا ضبح كديسه ولا يحزنون
امه مرة كبيرة لا ليها في الذرة ولا الطحين كل برنامجها انها تشوف اولادها واولاد اولادها
دخلت العروسه الجديدة
واظنها مابرجلها اليمين
وبعد داك عينك ماتشوف الا النور ................زز مالنور بتاعنا دا الفي المنتدي
دا نور البيجي لمان تطقك حاجة فجاء وتشوف حاجات ذي النجوم كدا في عز الضهر
الشابه مناكفات شديدة مع ام الزول
ولو الحاجة قالت شيء البت تنط ليها في حلقاه
وهو يمشششششششششششششششششي ويمشششششششششششششششششششششي
وماعارف مشيه دا بخلي الامور تستفحل (( حلوة تستفحل دي ))
اها ياجماعه الامنته ليكم
المرة تخلي الراجل يطلع بي جاي وهات ياتهزئي وبشتنه شديدة للحاجة (( مابتخاف الله فيها))
الما واعيه لو اتذكرت امها مابتعمل جنس العمايل دي
المهم المرة ولدها يجي من الشغل يلقي ليك الحاجة وشهها متغير
مالك يا امي مافي شي
مالك ياحاجة مافي شيء
طبعا المسكينه تقول لو قلت ليه حتحصل مشاكل والولد عندة اولاد
احسن اسكت ما اخرب علي ولدي
الحجة طيبه شديد
والمرة قدر شديد بي ضم الق
والراجل مستهبل شديد
قولو لي كيف
كييييييييييييف
عاوز يريح اضانه عااااااارف الزعل الحجة منو
لكن في احتمالين
ام خايف من المرة اذا فتح معاها الموضوع
اما بيقول امي دي بتكبر المواضيع
ما هو عارف الزعل الحجة منو يعني حتكون العمرة
اها قول طول ماتطول
تابعة المرة عمايلها دي والراجل ساكت والحاجة ساكته
لمن وافتها المنيه
وطلعت الحاجة بتفرق مع جارتها
عن البيحصل ليها من مرة ولدها
ومحلفاها ماتحكي للولد
وبعد ماتت................ الجارة العجوز جات حكت للولد
ندم وسفة التراب والتراب ماشبعة ولا رواة
ولو كان عارف ومطنش يرجي الراجيه .................
ولو ماعارف يلوم نفسه علي عدم اهتمامه بي امه.............. ومابفيد اللوم
ام اختنا ديك اقول ليها العملتي بتلقي
في حاجة مهمة جدا نسيتيها
العاملتيها كدي دي هي الجابت راجلك دا
اي نعم العرس نصيب
بس دا امه الولدته من بطنها لو كانت مجرمة مفروض تحترميها
لو صحي بتقدريه وبتعزيه
بتحترمي اي شيء من ريحته
لو قصتك او انتي قصتك بتشبه دي
احسن فوقي او فوق قبل الفاس ماتقع في الراس
وبعدين ماااااااااااابنفع الندم
تحيه عطره ام قبس طبعاً اللوم كل اللوم على الولد لأنه لم يتمكن من معرفة انه امه مرتاحة ام لا أنا شخصيا إذا انتابني مجرد احساس بأن امي تتضايق من شئ ما لفعلت ما لا يحمد عقباه أما بالنسبة لهذه النوعية من النساء فيعتبرن قليلات ربايةإن صح التعبير لأنه هذه الآم كما قلت في حديثك هي الجابت الراجل نفسه وبالمناسبة اقول ليك حاجة قد لا يصدق البعض وهي أن أمي توصيني على زوجتي مع كل شخص قادم لمكان اقامتي وبكل كلمات العفو ومرات بالتلفون تقول لي ما عافيه منك كان زعلته مرتك والله يرضى عليك طول بالك ودي بت يختوها في الجرح تبرأ وهذا قد يكون لعدة أسباب أنني ومنذ لحظات الزواج الأولى أوضحت لها أن عائلتي خط أحمر ونحن في العيلة دي ناس مترابطين وهمنا واحد ومشكلتنا واحدة فما يقلقني اتجاههم يجب ان يقلقك وبالمناسبة هي كمان بت حلال والحمد لله ربنا وفقني في الإختيار لكن أرجع وأقول ان الرجل الذي تهان أمه ويتناسى فهذا لا يعتبر ر...................ل ! ! !
وبالمناسبة لي قصة واقعية سوف اسردها لاحقا
ود الجعلي
10-08-2009, 01:46 AM
اولا للرجال لو كنت متزوج وعندك اخت متزوجة
انت داقس لو اتخيلت ان البتعملوا اختك مع نسابتها مفروض تعمله مرتك مع اهلك
هذا لايجوز في عرف النسابه ولا الحموات
للمابعرفوا التسميات
1) النسيبه هي ام الزوج او الزوجة
2) الحماة هي اخت الزوج او الزوجة
والعهدة علي الوراني الكلام دا
تسميات من تحت لي تحت
النصيبه هي ام الزوج المغلوب علي امرة من امه وطالع زيته مع مرته
الحماء او السخانه هي اخت الزوج المورياه النجوم في عز الضهر وقاعدة ليه في الزراره الاخيرة قبل الكرفته لو بلبس كرفته
اها خلونا ندخل تتتتوش في الموضوع الاول دا كان كله شروح ساي
طيب لو الراجل متزوج ومرته من النوع الصعب المترقب دخلت يده في جيبه
وطوالي دا لي منه
لو اليد اتوجهت ليها .. الضرس الاخير بيظهر
اما لو لاقدر الله بقت اليد طريقها للاخت او الام فاحتمال يدك تلقاها مافي او بي كل طرق (كيدهن عظيم ) يدك ترجع بس الفيها ماتعرفة وصل وين
خليكم جادين شويه ونتكلم بي العربي الفسيح
بعض النساء يدخلوا علي .........................
الواحدة مما تعرس الراجل عاوزة تنسيه اهله وفي بعض الاحيان اسمة
وتوهمه ليك جنس وهم انهم من بيت واحد وانهم اخوان ( دي كيف مابعرفها ) بي معني انه هو ولدهم وكدا
وتستشيط غضبا ((حلوة موش ) اذا ماعلمت انه يرسل لي اهله مصاريف او لو في البلد بيساعد في مصروف البيت
وهو مقتنع كل الاقتناع ان مايفعله صحيح لان اخته او اخاه الاخر يفعل ذلك
وطبعا المرجع في صدق ذلك الزوجة متابعة الموضوع
يعني نرجع للدارجي لانه الفسحة دي ذي الشربت لي شاي تقيييييييل
وتعالوا شوفوا البت العرست ليها راجل امه طيبه ومسكينه
نجاض ابو قبورة بتعرفة
ولا ديك العرسته واخواته مامعرسات
ولا الامه صرفت دهبها وسفرته ومرته شرته الدهب بعد قندل بس ما لي امه انتوا شاطرين وفاهمين لي منو
ولا العجب العجيب العرسها مسكينه وبعد داك بقت سكينه
ولا النسيبه البتحرش بتها لمان جابت اخرها بي يدها
ولا ديك البتتدخل في كل شي بين اخوها ومرته وليه تجيب ليها وليه تشتري دا مافي داعي
والله حاجات عجيبه
وقصص جنس قصص
ررررراجعة احكيها ليكم بالتفصيل الممل
بس ماتتهجم لو لقيت نفسك من اصحاب احد القصص
تمشي تشاكل مرتك وتقول ليها كشفتي حالي في المنتديات



صدقا" تعكسين مايدور بادق التفاصيل في مجتمعنا السوداني
ويمكن لعلماء الاجتماع وعلماء النفس ان يستفيدوا من هذه الاشارات التي تشرح جوهر قضايانا الاجتماعية بطريقة لصيقة لما يدور في داخل البيوت من عراك وحروب قد تكون في بعض الاحيان ناعمة ((الحرب البارده) وقد تأخذ منحى اخر بالالفاظ والكلمات وقد يتطور الامر بالسفنجات والشباشب ولكن انها نقل حي ومثير ومترابط لحالنا وحال صراعنا بمفردات الام والاخوات وشوية القرشيات
فلك التحية
ام قبس
05-09-2009, 05:23 PM
اسفه لي كل المارديت عليهم
وجيتكم واحد واحد للرد
وقبل الرد سوعال بريييييييييييييييييييييييييء
الجماعة ديل بيكون عاملين هدنا في رمضان
يعني وقف مؤقت لاطلاق النار
ولا في جماعة بيستقلوا الفرصه لطيبه الطرف الثاني في الشهر دا
انتن يالنسوان الله يدينا خيركم:o:o