*** رسالة الى زوجتى ...مقدما ....

[العاقب مصباح]

كنت اظن نفسى وحتى ليلة البارحة بأنى من امهر الطباخين ... وانى استحق لقب شيف من الدرجة الاولى ... وذلك حسب ما يدور فى مخيلتى الشخصية... ويمكن لى ان اصدر كتابا يعلم النسوة كيفية الطبخ وان تتم استضافتى فى برامج تلفزيونية وان يتصلن بى الفتيات اللاتى لا يستطعن الطبخ وقد اقوم بوضع الهاتف الخاص بالبرنامج اسفل الشاشه يرجى الانتباه...
استطعت او استطاعت الظروف ان تبرهن عدم صدق تلك النظرية تماما وذلك بإعترافى شخصيا بعدم اجادتى لفنون الطبخ والاعتراف يا سادتى هو سيد الادلة ...
ليلة البارحة كنت قد عزمت على صنع وجبة غداء ((كاربة)) فشمرت عن ساعدى ... وساعد مساعدى ... ودخلت المطبخ بكل ثقة بل وامشى كما يمشى الوجى الوحل ... ومن خلال مشيتى حينها تشعر بأنك امام طباخ لا يشق له غبار ولا يشق له بصل ايضا... وجدت اخى فقلت له ان يقطع البصل فقط ويخرج من المطبخ.... اتخيل نفسى كطبيب فى تلك اللحظة ويقوم بإجراء عملية جراحية ... وعملية صنع حلة الغداء لا تختلف كثيرا عن العمليات التجريحية كثيرا فكما يقوم الطبيب بعملياته بسكاكين ومشارط وبنج اقوم ايضا بإستخدام سكاكين ومفارك وغيرها من ادوات الحر ب اللازمة وتبدأ المعركة ....قتلى من اللحوم والخضار والبصل ... وقصف بالملح والبهارات الاخرى وتستمر المعركة وقتا غير قليل ..
ارجع الى موضوعى :-
ثبت لى عمليا اننى لا اجيد الطبخ نهائيا ...فما قمت به سابقا ايقنت تماما ان الصدفة وحدها هى الكفيلة بجعله يعجب من يأكله... والصدفة هذه المرة لم تزرنى بل وقفت متفرجة... كتفرجى على فيلم ليلة البارحة والذى جعل رائحة ((حريق)) الحلة تصل الى انوفنا بالخارج ونبهنى اخى ان الحلة حرقت فرحت ووجدها ممسكة بالحلة كما يمسك الاعمى بشخص يخنقه... الله لا وراكم مسكة الاعمى دى....
منذ قليل قمت على الحلة اردت تسخينها... فوجدتها قد استنفدت كل الطرق الممكنة للتسخين... وعملية التسخين هى عملية لا تفيد هذه الكارثة فى شئ ... وهل يصلح البوتوجاز ما افسد الدهر ....
وعندما ادخلتها الى فمى ابحث عن طريقة للتذوق شعرت بجسمى يرتعش ... ولكى لا اترك من معى يهجرها اصررت على الاكل منها بين فينة واخرى ... وانا اردد الشهادة اثناء تلك اللحظات ... وكتمت ضحكة كادت ان تعلن تضجرى ما حدث....ومنذ اليوم اقدم استقالتى من الطبيخ...
ولزوجتى خيار ان تطبخ لوحدها ... او تتركنى اذيقها ما قمت به والافضل لها ان تطبخ وتطبخ ...
اقول هذا الحديث وأعلم انى انتصرت على معشر النساء ...خصوصا ان بعض النساء يجبرن ازواجهن على الطبخ ... ويعتقد الرجل ان الحياة شراكة ويقوم بهذا كنوع من الواجبات....
أُعلن منذ الآن فض هذه الشراكة ...
وأعلن انتصارى كذلك.....
فهمتى يا زوجتى الجاية؟؟؟

[عصمت الصادق حماد]

تعرف يا عقبه يا فنان قالوا الصينيون (ما بتاعين القمح) لما يجوا يختبروا واحده يرغبون في الزواج منها يقوموا أيدها بطاطس لطهيها فإذا قامت بالعمليات التالية فهي طباخة ماهرة وإلا تعيد السمسر الجاي:
(1) إذا أخذ القشرةعلى خفيف فهي امرأة مدبره.
(2) إذا أخذت القشر ولمته في مكان واحد فهي أمرأة نظيفه.
(3) إذا قطعت البطاطس على شكل دوائر فهي طباخة ماهرة لأن الأكل سوف يكون (مسبوك).
العاقب أخوي أنت سوي دربه والمطاعم ما بقصر!!

[أبوحراز]

أحب دائماً الأكل بدون زيوت
وزوجتي تعرف ذلك وتحفظه جيداً
لكن مرات يجيبوا ليك الملاح غرقان في الزيت
وكان اتكلمت يقولوا ليك ياراجل عاوز تنشفنا أكل أكلك
والعجيب انها لاتتركني نهائياً ادخل المطبخ
يعني هناك اشياء لابد ان تعملها هي بنفسها
ولديها غرام مع النظافة لدرجة قف
يوم قلت ليها والله الليلة الا اعمل { حلة } براي
بس عاوز منك تقطعي الحاجات دي
طبعا ياجماعة لازم ماتنسوا حقوق المؤلف والملكية الفكرية
الوجبة انا اسميتها { وجبة ابوحراز }
المقادير :
نص دجاجة يتم تقطيعها لقطع صغيرة جداً
حبتين طماطم
كباية شاي { لكن مامليانة شاي } تكون مليانة مكرونة صغيرة الحبة
فلفلية واحدة
حبتين بطاطس
شمار أخضر يتم تقطيعه الى قطع صغيرة
قرنين شطة خضراء تكون حارة زي السم
ملح قليل جدا
4 كاسات ماء صغيرة
الأشياء المستبعدة
فلفل اسود مافي
شمار ناشف مافي
بصل لايوجد
زيت لايوجد
توم لايوجد
الكنش لايوجد
والأشياء غير المستبعدة دي تختها في حلة ضغط صغيرة على نار هادئة
ماتجيب ليك { حلة } قدر يوم القيامة
تقفلها لمدة ساعة وتمشي تعاين في التلفزيون وماتقلب اي شيء
تجي بعد الساعة تجد كل شيء مستوي
وبالهناء والشفاء 00
المهم عملتها وجاء ابنائي وقت الغداء
وطلعنا وجبة ابوحراز
ولدي الكبير وبنتي الصغيرة قالوا : والله يمه الليلة اكلك لذيذ جداً }
جيت ارد بس حمرت فيني الظاهر عشان ماحمرنا البصلة
اها بلعنا اللقمة وصمينا الخشم
خاف تاني خلوني ادخل المطبخ
قالوا ياويلك لو تقرب هنا تاني
قال وجبة ابوحراز قال
عليك امان الله اكلناها مرة واحدة وبعد ذلك ذهبت الى مثواها الأخير

[الملكة اسماء ( ام محمد )]

فهمتى يا زوجتى الجاية؟؟؟



الكويس طبعا ان زوجتك الجاية ما حاتقراء الكلام دا
واعتقد لانك متاكد انها ما حاتقراه كتبته هنا :rolleyes::rolleyes::rolleyes:

همسة : مبدع ... ومقنع
بس ان شاء الله زوجتك بعدين تقتنع :p:D:D:p

[بت أم درمان]

أُعلن منذ الآن فض هذه الشراكة ...
وأعلن انتصارى كذلك.....
فهمتى يا زوجتى الجاية؟؟؟



حا تعمل شنو اذا قالت ليك ما فهمت
انت كمان في داعي للتهديد المبكر دا
وانت زول على وش عرس يعني

[moh_alnour]

الشلاقة ليك شنو ؟ يعني المطاعم دي فاتحة لي منو ؟ مالك و مال الطبيخ أم دق :eek:




فهمتى يا زوجتى الجاية ؟؟؟

الكلام دا لي بت أختي ولا واحدة تانية بس عشان الأختساس و كدا ؟ ;)

[esmat]

منذ قليل قمت على الحلة اردت تسخينها... فوجدتها قد استنفدت كل الطرق الممكنة للتسخين... وعملية التسخين هى عملية لا تفيد هذه الكارثة فى شئ .

والله ياصديقي اراك قد استنفذت كل طرق التسخين والتقليب
لجذب هذه المراة التي تنظر اليك وتأبي ان تأتي لتعين وتعطيك
ملح الحياة وقدر ما قلبتها شمال يمين ابت تلفق.
يا اخوي مالك وما الحلة ام سواطة الشيء ما بتعرف (القطر قام)
لحمة على بهارات على بصل على زيت قبل ما تولع النار زااتو
وتاخد ليك حمام تجي تلقاها مستوية وتقول ليك نسيت العيش

[مدنيّة]

هسي دا كللللللللللللللللللله خليه

انت صاري ليها كدا مالك


همسة : هاك امبيلي دا

[عباس الدسيس]

العاقب دائما رائع .... يا خوي ما سمعته بي القطر قام بعد الحله تنتهي كان الملح كثير تزيدا مويه

[عثمان جلالة]

فهمتى يا زوجتى الجاية؟؟؟



قالت ليك آآآآآآآآآي فهمت ... :p ما تخاف كان على الطبيخ .. هينة ... بس خليك قدر البااااااااااقي :D:D

[عبدالرحمن مدثر]

الجمعة عندى لها طعم خاص راحة وسياحة وبركة يوم طيب

(ونعيمية ) وعصيدة سااخنة

كان الجو ممطر وجميل .. وانا اسبح فى احلامى الوردية

فى انتظار النعيمية .. لم يدر بخلدى اننى ساقابل (نعيمية )

بصلتها تعاااين فيك .. عهدى بها سبكة مابعدها على يد والدتى

الفنانة ...

كانت النعيمية على غير العادة (اياك من الش.ع)

اجتهدت زوجتى كثيرا .. كان الموبايل بقربها وهى تستعين (بصديق)

والدتها من على البعد ... زيدى الموية ... جيبى الزبااادى .. مع انى من عشاق

الروب الاصلى ...

كانت مشكلة النعيمية الوحيدة ان (البطل لم يموت ) على وزن الافلام الهندية

التى نحبها فى زمن ما كان جميلا ...

(البصلة ابت تمووووووووووووووت )

هكذا كان النداء للجهة الاخرى من الوصفة

وبعد تحريات

اتضح لحرمى المصون ان البصلة بكتلوها فى الفندك قبل مايرموها

لكنها فعلت العكس

وانقطع نفسها وراء جيوش البصلات التى تعااند الموت

وتجاهد فى الصمود الى اخر جولة

واخر جولة

كانت النعيمية على غير العادة (باهتة الملامح )


بصلها يفور


وطعمها ليس كطعم نعيمية امى :p:p:p

[حاتم مرزوق]

خاب فألك يا عقبة ففي النساء شئ من (غتاتة) وابشرك انك ستطبخ مهما كان سؤ الحلة التي صنعتها:D:confused: وان فقد الأمل في طبخك فحتما انك ستغسل العدة او تكنس البيت ، نصيحتي ان تدخل معهد لتعلم الطبخ فهذا اسهل لك ولمستقبلك:D:D

[ابوخالد]

عقبة يارائع

سعال وكده ..........

أسى أمانة فى زمتك الحلة دى حرقتا كده عملت ليك شنو ؟؟؟؟

والأ دى سخانة الكرسى .. قلت النبردا فى الحلة دى .

ياهو حال الدنيا يالعاقب أخوى .. يوم ليك ويوم للحلة ......

وكل عام وإنت طيب ... ورمضان كريم

يازول ياقمة

[عمر حبيبي]

ولزوجتى خيار ان تطبخ لوحدها ... او تتركنى اذيقها ما قمت به والافضل لها ان تطبخ وتطبخ ...
اقول هذا الحديث وأعلم انى انتصرت على معشر النساء ...خصوصا ان بعض النساء يجبرن ازواجهن على الطبخ ... ويعتقد الرجل ان الحياة شراكة ويقوم بهذا كنوع من الواجبات....
أُعلن منذ الآن فض هذه الشراكة ...
وأعلن انتصارى كذلك.....
فهمتى يا زوجتى الجاية؟؟؟

يا العاقب يا أخوي نصيحة من مجرب ...
ما تعمل خيارات ... لأنو والله بكرة يبقى الخيار واجب .. ويبقى فرض ...

ما هو من البداية الأجبرن أزاجهن على الطبخ ديل قدموا خيار أطبخ ليك ولا تطبخي إنت ومعاها إبتسامه جميلة ( مابداية طريق وكدة )

وعشان كده .. أحذف بند الخيارات ده من رسالتك ... وخليها تفهمك صاح ...
وما مشكلة خش وراها المطبخ .. و كب ليك معلقة ملح ... وأطلع ... تعال تاني رش ليك زيت وأطلع ...
وحتعرف إنك ساعدتها ...

تخريمة ::: أعمل حلتك براك وخليها تعمل حلتها براها ::: والفائز بالطعم هو البطبخ بقية عمر الشراكة .. .... :p:cool:

[ابوخالد]

العاقب دائما رائع .... يا خوي ما سمعته بي القطر قام بعد الحله تنتهي كان الملح كثير تزيدا مويه


لك التحية أخى المتألق / ود الدسيس

بمناسبة القطر قام والملح

قالوا عزابه واحد عامل طباخ فيهم (الطشاش فى بلد العمى شوف )
قاديهم ليك كل يوم حلة قطر قام .... واحد زهجان غفله وعبأ الحلة بى علبة
الملح كلها .. صاحبك جا يضوق الحلة لقا الملح زايد يشيل ويكب فى الموية
لما اللحم إتهرد وإتغيرت شكلآ ومضمونآ .... المهم فى النهاية زهج وقطع السلطة
وكبأ الحلة وجاب الغدا .. الجماعة لقو الحلة ما ياها الليلة قاموا سألوه :
يافلان دى حلة قطر قام ؟؟؟
إلتفت عليهم وقال بزهج : آآآى القطر قام لكن سِكته غرقا كب الموية الكتير ...

[عوض الكريم الخواض]

فهمتى يا زوجتى الجاية؟؟؟

[/color]

:D :D :D :D
:eek::eek::eek:
:p:p:p


مالى ذي الشعرت انك بتكلم ليك زول فى ( المراية ) ;);)

[سيد البلد]

طيب بالنسبه لي " بابا يغسل العده "
دي برضو مافي ؟

[وجدى محمد خميس]

ياعاقب القصص دى بتجى واحده واحده
اول قطع سلطه بعدين اعمل بيض وهكذا.....
طوالى طبيخ حرام عليك

[العاقب مصباح]

تعرف يا عقبه يا فنان قالوا الصينيون (ما بتاعين القمح) لما يجوا يختبروا واحده يرغبون في الزواج منها يقوموا أيدها بطاطس لطهيها فإذا قامت بالعمليات التالية فهي طباخة ماهرة وإلا تعيد السمسر الجاي:
(1) إذا أخذ القشرةعلى خفيف فهي امرأة مدبره.
(2) إذا أخذت القشر ولمته في مكان واحد فهي أمرأة نظيفه.
(3) إذا قطعت البطاطس على شكل دوائر فهي طباخة ماهرة لأن الأكل سوف يكون (مسبوك).
العاقب أخوي أنت سوي دربه والمطاعم ما بقصر!!




يا عصمت اخوى المطاعم افضل كتير من التعب البلا صالح

على الطلاق الحلة لحدى هسع فى التلاجة ما قادر اطلعها واوديها النفايات

التقول نفايات نووية

دى حلة شنو دى

اعوذ بالله


الله يدينا صينية

ما قصدى صينية مدنكلة قصدى بت صينية

ويا خوفى ما تطبخ لى كلب

نقعد فى حاو وتُر