حمامات السوق

[عباس الدسيس]

تتهادي امواجه مع لفحات النسيم في وسط نهار ممطر تكسوه الغيوم وحبيبات رزاز المطر تتنطط علي سطحه مصاحبه فقاقيع مضيئة كالنجوم ومع لفحات النسيم يسري في الجسم بروده مع رعشه الجوع.... والساده الكرام في رؤسهم العمام وداخل كل ثوب امرأة هذا ما ندر في الممشي العريض اذ يغلب اللبس الافرنجي علي الشباب والشابات بالالوان الافريقيه الصارخه واصوات الباعه تتداخل علي المسامع تشكل هارمونية الصخب والازعاج لا يأبهون بصوت الاذان الذي يعلوا وعلي ابوب المساجد نعلات المصلين تشققت اطرافها وتهكتت اوساطها وثياب باليه مكرفسه الاطراف وضجيج سيارات المواقف وتكاثف دخان العوادم دي حال المدن السودانيه غالبا ما نجد تشابه لامتداد النيلين ... فكنت راجلا ابحث عن شراء مستلزمات اتحاور مع تجمهر المزدحمين لاتلمس طريقا التفت يمينا وشمالا وسط الزحمه والهيصه جاتني حاجه ملحه للبحث عن مرافق صحيه (( ادبخانات)) وبعد البحث المضني ومع برودة الجو الممطر جاني احتقان رهيب حاولت الدخول لبعض المطاعم عسي ولعل اجد حمامات اصطدمت بمنظر براميل المياه الممتده علي الشوارع ومصممه خصيصا لغسيل الايدي وانسياب المياه من الصحن المتدلي اسفل البرميل ولا يقوي علي استيعاب كيميات مياه الغسيل الممزوجه بصابون الغسيل في شكله الابيض دون رغوه واعلي البرميل طيور (عشوشه – ودابرق) غير ابهه بالزدحام والاصوات .. مع احتقان التبول تذكرت قريتنا الصغيرة بالجزيره عندما نتوجه الي الهواء المنعش والخلاء الفسيح ويالها من راحه نفسيه وبعد قضاء الحاجة نتجمر ان لم نكن نحمل ابريق انها ليست بساطة حياة بل هبات الطبيعة التي لا تؤمن بحمامات أو سايفونات مرصعة بالسراميك والمقاعد الافرنجيه فلقد اشار لنا الاسلام ولزوما للطهاره في بداياته علي استخدام حجر (طاهر، أملس) واستمر هذا الحال إلى أن أجاز المذهب الحنفي استخدام الماء في التنظيف (لذا أطلق العرب على صنبور الماء اسم الحنفية) وهي التي كما ذكرنا نجدها علي مقدمة براميل الغسيل في المطاعم.. نرجع لي مشكلتي السؤال في هذه الزحمه مصيبه وربما تجد هزت رأس بعدم المعرفه عن مكان التواليت ومعها ابتسامه ، وبشفقه يكسوها الخجل وجدت أحد الاحباب تبرع بالوصف وأنا ارتجف من الاحتقان .. شايف يا اخينا تمشي يمين تلقي مسجد بعد المسجد في جماعه قاعدين ابيعوا في حاجات معاهم ستتات شاي وبتاعين سندوتشات بعد ستات الشاي والسندوتشات تلقي الادبخانات.. معقوله يعني الواحد بعد قضاء الحاجة اشرب ليهوا كباية شاي اعدل بيها مزاجو من عملية البحث... تسمع مقاطعا حبل تفكيرك الراجل البوصف.... معاي انت يا زول عرفت الوصف ياخي الادبخانات دي عملوها في ميدان السواري عرفتوا ده زمان كان ناس الشرطه عندهم حصين بركبوها باليل للدوريات قالوا مدير الشرطه قال اعرف الجماعه ديل باليل بمشوا بعملوا شنو لما الواطه مغربت قال ليهم فكوا الحصين ديل انا بباريهم فكوا الحصين من مركز الشرطه الحصين مشوا زي خمسه كيلوا وقفوا في الميدان ده بركوا بي ركبيهم ناموا هنا للصباح قاموا مشوا المركز... مدير المركز لقي شجرة كان بنوموا فيها العساكر بعد ما انوموا الحصين اهااا زول عرفت الوصف بتاع ميدان السواري.... ايواا عرفتا يا استاذ شكرا جزيلا سلمت أمري لله ومشيت لكن مقاومتي بدأت تتهاوى.. من الاحتقان قلته الله استر ما اعملها في نفسي تكون شينه خلاس الله اقطع البرد حسي ده وقتوا نصت نهار.. ؟؟ وصلت.. يا الله ده شنو الصف ده كمان معاها تذاكر اذا لازم تدفع قروش وقفت في الصف زي الداخل سينما ولا كوره ازحف مع جموع المصطفين والاحتقان يزداد شدة يا الله اعمل شنو باقي ثلاثة قدامي باقي واحد قدامي بسرعه طلعت القروش للراجل يلا ادينا تذكره خلينا نخش قال لي انتظر خلي حمام افضي..... وانا ارتجف من الاحتقان طلع واحد مديت يدي بالقروش عشان اشيل التذكرة قال لي مافي فكه ؛؛؛؛؛؛؛ طيب خلي القروش معاك بعد اطلع نشوف الفكه في اللحظه دي دفرني واحد من وراء .. ياخي مالكم تعطلوا مشاغل الناس جاي الحمامات شايل معاك قروش قدر دي والله حكاية عجيبه .. انتزع التذكرة من امامي وأنا مشدوه للمنظر لاحوله ولا قوه الا بالله يعني الواحد اتوكل ابول علي هدوموا لا .. لا .. لا.... يا زول انت عره ولا شنو اجمد خليك صابر عشان تحل المشكله فجأة لمحت شرطي واقف علي مسافه من بتاع التذاكر الظاهر سادي خدمه معاهوا الحمدلله جاني الفرج ... حكومه والناس اهالي .. مشيت لي بتاع الشرطه معاها ابتسامه حكيت ليهوا المشكله باختصار وحكاية الفكه وعدم وجودها .. قال لي يا زول ما عندك مشكله مشكلتك اتحلت انا بدخلك بدون فكه بدون قروش... اخيرا اتحلت المشكله قبل ما اتبول علي سروالي (( بالله صدقتوا انا ما اتبولت علي هدومي ؟؟؟؟؟))

[عوض الكريم الخواض]

علي اليمين يا عباس الدسيس ...بوستيك ريحتو طاقة ...من الوصف والكتمة ...
أسوأ من السؤ ذاتو ...
أنا فى محلك أركب تاكسى وأقرب بيت لى زول بعرفو ...
أي شئ ولا حمامات السوق :mad::mad:...
ولا أقول ليك البحر قريب .

[أبوبكرحامد]

(( بالله صدقتوا انا ما اتبولت علي هدومي ؟؟؟؟؟))

فكّاك الفكّ بلة ... ياجميل يامبلل :):):)

[مرتضى يوسف العركي]

الدسيس الرائع
انت في الرياض .... ؟ حظي عاثر من عدم لقاؤكم ... ظللت ولفترة اتابع من على البعد ما تجود به من روائع اتكيء معها بكباية شاي ... واصل بلا فواصل هذا السرد الدرامي المحبوك بتفاصيل محببة ومفردة اليفة هاتفي 0501464578
وتحياتي عبركم للرائعين المتداخلين استاذي ابو بكر حامد وعوض الكريم الخواض

[عباس الدسيس]

العزيز ودالخواض شكرا علي المرور ووصفة الاتوس كان حلت المشكلة... حبيبنا ابوبكر يا جميل يا رائع لك الشكر بمروركم... مرتضي اخبارك والاولاد مني التحايا شنو الغيبه طوالي مع زحمة الشغل ربنا اديك الصحة والعافية شوقنا ليك بحر مع انو تفصلنا كم متر من بعض لاكن ياهو حال السعودية اليوم انتهي اشارات وتوصيل مدرس في البلد دي مخصوم منها الدوام امنياتي بلقياء قريب مع فائق تقديري وشكري لشخصكم الكريم.

[عمرسنهوري]

حبيبنا عباس

نفسي قام وانا بقرا في قصتك
ذكرتني واحد كان في الميناء البري
يدنقر ويرفع راسو
ومره يقيف على امشاطو ويصدر في اصوات زي الزول
البياكل في شطه لكن ما قال ولا كلمه .
اخوك طوالي اخد ليهو الاذن من الجماعه الفي الصف
زولك لمن قالو ليهو خش ما صدق توووووووووووووف صاروخ بس





في المينا بتدفع قبل ما تقيف في الصف
يعني لو المسافه وقنعت يبقن عليك اتنين
زنقه وضياع قروش

[عباس الدسيس]

ههههههههههههه الله اجازي محنك يا سنهوري...... مع الشكر للمرور

[أبوحراز]

أكثر شيء غايظني واحد أداني مصاريف لأهله في السودان
مشيت يومين افتش على الحلة
تركب لوري من رفاعة
وتاني في خور اللوري بيقيف ما بيقطع
تجيك كارو حمار
الكارو نفسها مابتوصلك البيت
هذه الفنتازيا العجيبة كلها مش مشكلة
بحبها كتير
احب الاختلاط بالناس والحمير والنعاج وركوب المراكب واللواري
المهم ياويلك لو قالت الطبيعة كلمتها الأخيرة وقررت تمشي الحمام
أول شي الحمام في آخر الحلة
وانت شايل ابريقك كأنك ماشي ترفع { كورنر }
وبرضو استحملنا
لكن المصيبة التي لم أجد لها اي تفسير
أنهم يعملون الحيطة بالجهات الأربع أقل من متر
يعني لمن تقعد نص جسمك بره
وكمان هم يغيظوك أكثر
ناس { الحلة } يعني
يجوا ماشين فيك
ويقولوا ليك { كيف حالك يا اللخو الضيف !!!! }
اقسم بالله الفي راسك كلها تطير
بس قلت ليهم الواحد ياكل معاكم
ويتفاهم مع الطبيعة بان تفرض نفسها في مكان آخر !!!
قال الضيف قال !!!!

[حاتم مرزوق]

يا عبس يا لذيذ

كثيرا ما يستخدم اهلنا عبارة (قطع الجمار ) وكثيرا ما استوقفني هذا التعبير ، كنت علي علم ان الجمار من جمرة والجمرة حجر وهذا واضح في نسك رمي الجمرات و يشترط ان يكون الحجر كحبة الفول السوداني.


و جمار هو القمة النامية في النخلة تكون في أعلى الجذع، تستخرج بعد قطع النخلة وهي مادة سليلوزية بيضاء اللون تقطع كشرائح رقيقة وتؤكل.

و يفهم ان الحجر يستعمل للطهارة في حال عدم وجود الماء كما هو في التيمم ويستعمل كما هو عندنا في السودان للتطهر من البول وايضا في حال عدم توفر الماء الذي هو خير طهور.

اما كلمة (قطع) فهي كلمة دقيقة جدا وتعني قطع البول وتحقيق الطهارة وعندما تجمع الكلمتين (قطع الجمار) فالمعني هو تجفيف مكان البول بالحجر بغرض قطع البول تماما عن موضع الحدث وبذلك تتحقق الطهارة .


واظن ان تعبير قطع الجمار لا يوجد الا عندنا في السودان وهذا من ثراء لغتنا العربية.

وسلامات يا عبس ونحن من هنا نناشد كافة الولاة والمسئولين بتوفير حمامات في الأسواق و اماكن تواجد الناس لا سيما ان هناك من كبار السن و مرضي السكر والأطفال الذين يحتاجون لحمامات.

والمشهد الذي حكيته لنا هنا مشهد يطرح مشكلة كبيرة يجب الأهتمام بحلها وتطويرها وهذا لا شك يعكس حضارة شعبنا.

[عباس الدسيس]

ابو حراز يا عزيز يا لذيذ اضافة حلوة ورائعه ومتشكرين علي المرور.

عزيزنا حاتم فتحي معلومات بقامة اعلي من البوست وزخيره ثقافيه علمية فتحت ازهاننا .... ماهو الكلام لي ناس السجم ديل كان افهموا حاجة مستوي متدني من الخدمات العامه في الاسواق من حمامات وحالة مزريه لمطاعم الله اكون في عون اهلنا مع الامراض الكل يوم بتظهر وانواع الانفلونزات الجديدة في العالم ... زي ما قلته الله اعدل الحال وتتحل مشاكلنا الصحيه بعدين نعمل الكباري والظلط... ولك تقديري وشكري للمرور