اوراق من مفكرة الحرامي [الأرشيف]

درديري كباشي

12-07-2009, 11:48 PM

قمت صباحا قبل اذان الفجر بقليل كالعادة استعداد للصلاة وانا نائم بالحوش شعرت بحركة داخل الغرفة وصوت كركبة . وفتحت نور الصالة قبل ان ادخل الغرفة وفجاة انطلق شخص من داخل الغرفة يجري مارا بي منطلقا نحو سور الحوش ومتسلقا عداد المياه وقافذا نحو الشارع . بعد ان فقت من الدهشة او قل من (الخلعة) لاحظت ان هنالك كتلة من الاوراق سقطت من اللص او الحرامي كما نسميه في عاميتنا .
اخذت كتلة الاوراق وبدات اتبينها في النور واتضحا انها هي عبارة عن مجموعة اوراق من مفكرة رتبت بعناية وحرص . وتنم عن ان صاحبها صاحب فكر وايدلوجية ( بمعنى حرامي فوق راي ) ومن خلال هذا البوست سنتناول ما دونه الحرامي على مفكرته .
الورقة الاولى
الورقة الاولى : ملخص لمحضر اجتماع نقابتنا بوكر الغابة في صبيحة الخميس . في ذلك اليوم ناقشنا تقول كثير من النصابين وعديمي الذمة والجبناء واصحاب الشيكات الطايره وناهبي البنوك على مهنتنا وبمساعدة المجتمع وتسموا بلقبنا وواصفا المجتمع لهم بانهم حرامية . رغما عن انهم جبناء يسرقون اموال الشعب في وضح النهار وتحت حماية القانون تحايلا عليه بعد ان افلحوا في تشويهه حتى يتلاءم مع سرقاتهم اللئيمة ولا يحاسبهم احد . اما نحن الذين نغامر بحياتنا ونعرض حياتنا للخطر بالقفذ على بيوت الناس في الليل وفيهم الشرطي وفيهم الذي تحت مخدته سلاح ناري وفيهم المصارع وفيهم بطل كمال الاجسام . ورغما عن ذلك ندخل بيوتهم عبر الاسوار وفي الليل . هل يمكن ان تتم مساواتنا بهؤلاء الجبناء . ونحن ايضا المعرضون للسجن لعدة سنوات بينما ناهبوا المال العام والذين يتعرضون لقوافل الاغاثة والتي تحمل لقيمات الضعفاء والمشردين وينهبونها ويبيعونها في السوق السوداء . ايد الزعيم رئيس نقابتنا هذا الراي معقبا ومستدركا باننا صحيح لسنا كالص الخيالي ارسين لوبين بمعنى نسرق من الاغنياء ونوزع على الفقراء . ولكننا على الاقل لانسرق من الضعفاء ولو حدث ان انخضع اي واحد فينا وقفذ في بيت واكتشف بان اصحابه فقراء نادرا ما ياخذ منهم شئ بل بعضنا يترك لهم جزء من مسروقاته .

درديري كباشي

12-07-2009, 11:54 PM

الورقة الثانية
: في يوم الاربعاء الماضي قفذت بالليل على بيت فخم . بعد مارفعت راسي عبر السور لاحظت انه يوجد شخص واحد ينام في الحوش . قفذت للداخل بكل حرص . وكالعادة اولا اقتربت من الشخص النائم حتى اتاكد اولا اذا كان نائما او مستيقظا . وعند ما اقتربت منه تماما تاكدت من انه غارقا في النوم . بعد ذلك تجولت في الحوش الاول والثاني والثالث تاكدت انه لا يوجد شخص آخر غير اخينا النائم بعد ذلك دخلت في الصالة الاولى . نورت المصباح الصغير وانبهرت جدا من نوع الفرش الفخم والملايات قلت في نفسي ( من البيت دا حا اطلع بالهدية لنسيبتي التي وعدتها بها) وهي طقم ملايات فخم وفعلا دخلت لداخل الغرفة وفتحت الدولاب . ووجدت الملايات الفخمة والثياب بدات اجمع وارص في السرير . اخترت ملايا كبيره فرشتها في السرير . حتى اربطها في شكل لفة (بقجة) تحمل كل المسروقات . بينما انا اروح بين الدولاب والسرير توجد طاولة صغيره فيها زهرية زجاجية اصطدمت بها وسقطت محدثة صوت ضخم كانها قنبلة . انا اول شي جريت خارجا من الغرفة وجريا نحو السور وتسلقت ماسورة عداد المياه . طبعا متوقع انه صاحبنا يكون صحى من النوم وتناول المسدس وكنت متوقع طلقة تصيبني في الظهر في اي لحظة ولكن بعد ما ركبت الحائط . التفت خلفي لاني لم اشعر باي حركة من خلفي . وانا جالس على السور لاحظت ان صاحبنا اساسا لم يرفع راسه من السرير . ورغما عن ان الصوت الذي احدثته الزهرية يصحي فيل بالع شوال فاليوم. اخيرا عرفت انه اخينا صاحي لكن خائف . بعد ذلك تشجعت ونزلت ثاني ومريت قرب صاحبنا .وقربت وجهي من وجهه . وهو لم يفتح عينه وبدا يشخر حتى يوهمني بانه نائم . ولكن انا لاحظت ان نفسه سريع وضربات قلبه تكاد تهز البطانية . هنا عرفت انها فرصة لا تعوض وانا امام واحد من هؤلاء الجبناء . بعد ذلك دخلت الغرفة بمزاج ونورت كل الانوار . وبدات اعزل وانقي في البضاعة كاني داخل سوبر ماركت . طقم الملايات الذي اثار اعجابي اكتشفت انه ناقصا ملايا واحدة . خمنت انه صاحبنا الجبان يكون نائم عليها وفعلا بعد مانورت نور الحوش اكتشفت انه نائم عليها . قلت في نفسي ( معقول آخذ طقم ناقص لحماتي ) وذهبت لاخينا وبكل قوة عين سحبت الملايا من تحته . وهو الجبان بدا يساعدني بان يرفع ظهره مره ورجله مره دون ان يفتح عينيه . وقلت تجد مثل هذا الجبان مدير كبير لمؤسسة او شركة كل الموظفين يرتجفون لمجرد سماع صوته . بعد ما وصلت لهذه النقطة وبعد ان سحبت الملايا من تحته ضربته بل (رزعته كف صاموتي) بكل غيظ عندما تذكرت منظر الموظفين الذين يسبب لهم الرعب هذا الجبان وهم يرتجفون بمجرد دخوله عليهم .
بعد ذلك اخذت بضاعتي رصيتها في الحيطة ونطيت واتخارجت من بيت هذا الجبان وكانت صفقة عشت عليها شهر كامل وانا في اجازة .

درديري كباشي

12-07-2009, 11:59 PM

الورقة الثالثة
الورقة الثالثة : بعد عودتي من الاجازة التي قضيتها بعد سرقتي لبيت الجبان ولم يبقى منها شئ قدمت لي زوجتي ورقة جديدة بالطلبات المنزلية التي لا تخلص ابدا (ونحن الحريم ديل اصلهن كان ما قرضننا ما برتاحن) . حاولت استلف اي مبلغ من الاخوة على اسا س ارجعه لهم في اقرب عملية . كلهم كانوا في حالة اجازة ومفلسين . اخيرا وانا راجع للبيت عبر الحي الفخم الذي يسبق عششنا . لاحظت انه احد البيوت الفخمة قد سكن حديثا . اذا به انوار مضاءه قلت ما مشكلة نستفتح بالجماعة الجدد . شبيت من السور لاحظت انه هنالك عدد كبير من السراير منتشره في الحوش وكلها فيها ناس نائمين . لكن المغري انه الغرفة فاتحة ونورها منور والشنط منتشره هنا وهناك . وانا دون اي تردد قفذت للداخل . وبكل خفة الى داخل الغرفة . وقلت في هذه الحالة ما خف وزنه وثقل ثمنه فقط . وفعلا بدات اجمع في الاموال والمحافظ وافتح الشنط . ولكن فجاه انتبهت الى انه كل هذه الشنط لا توجد فيها اي اغراض نسائية . مما يعني انه كل هذه السراير مليئة بالعذاب . وهنا فعلا خفت لاول مره وقلت اتخارج احسن قبل ما يستيقظ هؤلاء العذاب و يحولوني الى (كفتة) وانا طالع لاحظت انه السراير فاضية تماما يعني نظام انسحاب تكتيكي وكدا . قلت في نفسي (يا ابو الشباب معناها انت رحت في ستين داهية). تفتكروا كذبت بعد ذلك ؟ . قفلت ليك علي باب الغرفة بالمفتاح من الداخل وبديت اصرخ باعلى صوت ) الحقونا الحرامي الحرامي الحرامي ) بعد ذلك ثلاثة شهور قضيتها في السجن كانت اخف من العلقة على ايدي هؤلاء العذاب .

درديري كباشي

13-07-2009, 12:03 AM

الورقة الرابعة :

هذا اليوم ليس اقل نحسا من السابق . لانه في ذلك اليوم كنت مخطط من الصباح لبيت معين في حي شعبي . هو البيت راقي جدا ليس بمستوى الحي . مما يدل على ان اصحابه مستوره معهم. طليت من السور حوالى الساعة اثنتي عشر كالعادة لاحظت انه هنالك شخص يبدو انه سبقني واقف في الحوش ويجمع في الملابس من حبل الغسيل . نفسي انقفلت لاني افتكرت انه هذا واحد من حرامية الغسيل ونحن عادة نكرههم لانهم جبناء ما عندهم قدرة على دخول الغرف وكسر الابواب لذلك يكتفون بالملابس المنشوره في حبل الغسيل . بعدين مهنتنا هذه لا تتحمل وجود الجبناء . صحيح الشئ السايد عند الناس انه الحرامي جبان . لكن هذا الكلام يقولوه ليشجعوا به انفسهم فقط . لاني انا لوكنت جبان ماكان عرضت نفسي للضرب بالاسلحة النارية والعصي والكمائن التي وقعت فيها كانت توبتني . لكن الحق يقال ان حرامي الغسيل جبان جبان و لا يوجد ادنى شك في ذلك .وانا كل ما صادفت واحد منهم في أي عملية رقعته علقة جامدة لاني بكرههم .هم انفسهم يعرفوني ولايتعرضون للاماكن التي ارتادها .المهم انتظرت حرامي الغسيل في الخارج لاني لا يشرفني ان نكون انا وحرامي غسيل في عملية واحده ونمسك مع بعض . وعندما طول الوقت اكثر من ساعة لم يظهر . شبيت انا من الجدار لاعرف السبب . واكتشف انه هذا لم يكن حرامي الغسيل انما هو صاحب البيت نفسه جمع الغسيل في بكجة كبيره ورقد نام . اذا العملية اصبحت جاهزة الآن وفعلا بعد ماشعرت بان اخينا نام تماما . نطيت داخل الحوش وكان البيت عباره عن غرف وصالات وجميعهم في وسط الحوش . أي بمعنى ان الحوش يحيط بالغرف من كل جانب . وانا ركزت على تفاصيل وصف البيت لان له علاقه بالعملية . المهم انا بعد ما دخلت الغرفه الاولى والثانية والصالون وحتى المطبخ . لم احصل على شئ يذكر او شيء له قيمة وخرجت يائسا احاول الحق باقي الليل في عملية ثانية وفعلا تسلقت الحيطة وقبل ان اقفذ . استيقظ صاحب البيت وشاهدني راكبا الجدار وقبل ان اقفذ تناول صاحب البيت طوبة من الارض ورماني بها قبل ان اقفذ للخارج بقليل واصابني في رجلي . صراحة وجعتني جدا الضربة وانا اصلا محروق من اليوم الضائع في بيت هذا الفلسان . وفعلا نزلت ارضا داخل البيت وتناولت نفس الطوبة . وجريت خلف صاحب البيت وطاردته حول الغرف والصالات وهو مرات ينطط بين السراير الفاضية وانا اصريت لا زم انتقم لضربتي الى ان اقتربت منه تماما ( ولبعته) بالطوبه على ظهره وتركته واقع يتلوى وخرجت نحو البيت قانعا من هذا اليوم النحس لانه الصباح شارف

درديري كباشي

13-07-2009, 12:07 AM

الورقة الخامسة
بعد فترة النحس الطويلة المرت علينا وانا قاعد في البيت سمعت النسوان يتكلموا وكان عندنا حريم جايات من حي بعيد قرب المقابر . رخيت اضاني وسمعتهن يقولن انه (حسن)ولد ناس عمك فلان (ماراح اقول الاسم طبعا وفي حد يكتب اثبات ضده بنفسه ) المهم قالوا الولد جا من ليبيا بعد غياب عشرة سنوات ، وقالن يازول جا خامي خم ماهو خم نصاح ، قاليك الارياح بالكراتين والهدايا ديل اقل شي سلاسل دهب لبنات اخته . اقول ليك شي انا جبت ااضاني جنب صالة النسوان عشان اسمع الوصف تماما. اخيرا فركت ليك يديني وركبت ليك الموتر وجري للسوق بتاعنا (سوق الحرامية كلكم عارفنه ما تعملوا فيها ما سمعتوا بيه). المهم جري لزميلنا مفتاح داك قلت اشركه معاي في العملية . وزميلنا مفتاح مافي قفل يعصي عليه انا قلت طالما ما الموضوع فيه دهب اكيد حيكون فيها خزن وكدا . لكن مفتاح خواف وكبكابة جدا . كلمته ليك بالعملية وقلت لازم اليوم تتم.
مفتاح : لكن يا عنكبة الناس بيكونوا كتار اليومين ديل ويسهروا ونسات مع الولد خليه يعدي اسبوع كدا والامور تهدا .
انا : اسمع يا مفتاح حاتجي معاي ولا اباصره باي واحد تاني . بعدين قال ليك الولد جايب هدايا وشيلته بتاعة العرس يعني بعد اسبوع حيكون وزع كله شئ . والشيلة دي قبل ما يلاقي هو بت الحلال اولى بها نحن اولاد الحرام ديل . ها ها ها ولا ما كدا المهم انا بجيك الساعة تسعة بالليل تلاقيني عند فوال العمده سامع؟؟؟ خلاص اتفقنا .
وفي المساء بعد ما اتلاقينا في محل الفول اتملينا تمام وشربنا لينا بيبسي قلنا عشان يهضم ما العمليه دي لا ينفع فيها زول جعان ولازول بطنوا مليانة . يعني لازم تكون شبعان وخفيف في نفس الوقت .
المهم بعد داك اتحركنا ناحية البيت مرينا بشارع البيت كدا نظام استكشاف يعني . ومفتاح كلامه صاح الانوار ظلت مولعة لغاية الساعة اتناشر كدا . اها بعد ما طفت قمنا شبينا كدا لقينا ليك الناس دي كلها نامت واستكانت . وانا قلت لمفتاح ننط من حوش النسوان احسن . لانه اكيد الدهب والشيلة والحاجات دي تكون بهناك .وفعلا تلبنا ليك . وانا عادة عندي بطارية صغيره كدا شغلتها ومشينا عديل ناحية الاوضة . وصاحبي يتراجف ويتلفت ويعاين للناس النايمين البليد ما باقي ليه الا يصحيهم عشان يتاكد انهم نايمين . زي مفتاح دا ما بينفع في عمليات البيوت هو تخصصه دكاكاين بس لانه بيفتح أي قفل وفي نفس الوقت يكون متاكد انه ما في حد نايم بجوه .
نحن قربنا من الاوضة وفعلا انا شفت شنطة الشيلة في راس الدولاب لمن ريقي جرى . ولكن فجاه اتاري كان في بنت بتصوت ليها شي في المطبخ وشايلا ليها جك قزاز وقع منها وصرخت (الحرامية واااااي الحرامية ) الشي صوتها تقول عربية مطافي . انا بدون ما احس لقيت ليك نفسي في الحيطة . اما اخوي مفتاح داك اظنه الحيطة ذاتها ما شافها . المهم وانا في الحيطة لاحظت من ناحية حيطة الرجال واحد شاب راكب في الحيطة وبشتم فينا الظاهر . ظل طول عمره ينتظر البنت الصرخت دي تستغيث حتى ولو من ضب عشان يعمل فيها عنتره بن شداد .المهم صاحبنا منفوش كدا نطا ورانا وجرى ليك خلفنا انا قلت لمفتاح المقابر المقابر . وفعلا تلبنا حوش المقابر وجري واخينا عنتره تلب ورانا ونحن في النص طبعا انا اتوقعت كالعادة راح تتحول العمليه لهيصة كبيره ويكثر المطاردين زي عادة السودانيين . تلاقي كله واحد يرجف تحت بطانيته من الخوف اول ما يسمع صراخ بنت يتحول بقدرة قادر الى خالد بن الوليد . لكن لمن اتلفت لقيت اخينا براه متحمس زي قصة الحمار الاحمق اللشاف الاسد جاري افتكره خايف منه وراح قال اهه فرصة نطارده طالما خاف مننا ، عمك الاسد يتلفت ويقول ليه هو دا انت تعال يا ابن الحماره ويظبطوا ليك لمن يعرف حاجة .انا في نفس الوقت الاتذكرت فيه القصة دي اتلفت القى ليك صاحبنا دا براه . قلت لمفتاح اقيف اقيف صاحبنا دا براه ، مفتاح قال لي ما يمكن معاه مسدس . قلت ليه انت اهبل لو معاه مسدس عاوز يدينا بيه حقنة ما كان ضربنا من بعيد .
وفعلا وقفنا . لمن وقفنا اخينا عنتر انتبه لنفسه واتلفت ما لقى أي سند وراه وقف هو فعلا . انا اتحركت ناحيته هو بدا يرجع . بس جري وراه وهو قام جاري يمين نسى ليك عبلة وليلى وكل بنات الدنيا وبقى يقول يا رقبتي بس. لكن قبضته ليك جنب سور المقابر ورقعته علقة تاني تاب والحرامي لو نطى ليه في بطنه ما يقوم وراه وكان يوم .

الملكة اسماء ( ام محمد )

01-09-2009, 01:04 PM

ولكننا على الاقل لانسرق من الضعفاء ولو حدث ان انخدع اي واحد فينا وقفذ في بيت واكتشف بان اصحابه فقراء نادرا ما ياخذ منهم شئ بل بعضنا يترك لهم جزء من مسروقاته .

قف تآمل

كلام في صميم الواقع المؤلم

همسة : ابو الدُر ..مبدع
ماشيا اجيب الباقي

الملكة اسماء ( ام محمد )

01-09-2009, 01:19 PM

وقلت تجد مثل هذا الجبان مدير كبير لمؤسسة او شركة كل الموظفين يرتجفون لمجرد سماع صوته . بعد ما وصلت لهذه النقطة وبعد ان سحبت الملايا من تحته ضربته بل (رزعته كف صاموتي) بكل غيظ عندما تذكرت منظر الموظفين الذين يسبب لهم الرعب هذا الجبان وهم يرتجفون بمجرد دخوله عليهم .

والله قعدت اضحك في الحتة دي ضحك
ياخي دا حرامي اشجع من الشجاعة
تصدق دا قراء ليك صاحب البيت دا قراية متمعنة من منطلق البهرجة والرخاء بمقابل الخوف لدرجة التيبس والحرامي غالبا بكون خايف اكتر من صاحب البيت
لكن لما صاحب البيت يكون زي زولك الساعد الحرامي في اخذ الملايا الاخيرة فدا غالبا زول دنيا سااااي وخاف على عمره وتلقاه بينه وبين نفسه قال بكرة نصب واحتيال بجيب غير طقم الملايات عشرة

درديري كباشي

01-09-2009, 01:20 PM

قف تآمل

كلام في صميم الواقع المؤلم

همسة : ابو الدُر ..مبدع
ماشيا اجيب الباقي

ماشي يا ملكة ..
وهمسة برضو 0 ماتكونوا فاهمني غلط .. واحد يقول لي انت بتقنن للحرامية .. لانه واحد في موضوع المترجم الخاص قال لي انت يا ابو الدر قعد تبرئ الشيطان وتبرر له عمله .. يعني انا جردت الشيطان من مسئوليته تجاه تضليننا ... بعد الكلام الانا رصيته دا كله ... فبقيت احاول اتكلم بحذر في الحاجات المتحكره .. مع انه انا بحاول فقط اكتب باسلوب الاحلال .. بمعنى احاول قدر جهدي اضع نفسي مكان الشخصية التي اتحدث عنها .. على كل حال انا حا ارجع واجيب باقي قصة الحرامي كمان لو كان دا رايك..

ام قبس

01-09-2009, 01:23 PM

والله شككتني يا درديري اخوي
انت متاكد دي من مفكرات الحرامي
الله يديك العافيه ضحك في نص الليل
الغريبه قبل شويه ابو العيال ماجي من التراويح وانا ذي اتوهمت لي صوت في باب الشارع
حصل لي تجمد ذي بتاع التلج ودخلتني ليك سقطة عجيبه
وبعد دا اجي القاك كاتب عن الحراميه
شكين محنك

درديري كباشي

01-09-2009, 01:25 PM

والله قعدت اضحك في الحتة دي ضحك
ياخي دا حرامي اشجع من الشجاعة
تصدق دا قراء ليك صاحب البيت دا قراية متمعنة من منطلق البهرجة والرخاء بمقابل الخوف لدرجة التيبس والحرامي غالبا بكون خايف اكتر من صاحب البيت
لكن لما صاحب البيت يكون زي زولك الساعد الحرامي في اخذ الملايا الاخيرة فدا غالبا زول دنيا سااااي وخاف على عمره وتلقاه بينه وبين نفسه قال بكرة نصب واحتيال بجيب غير طقم الملايات عشرة

وازيدكم من الشعر بيت هذه هي قصة واقعية .. وحكاها صاحبها بنفسه .. ولكن طبعا انا صغتها بتصرف ... بحيث ابعدتها عن الاشارة اليه شخصيا .. مع الاحتفاظ بالمادة الرئيسية وهي عملية سحب الملايا من تحته وهو يتصنع النوم وفي ذات الوقت كان يساعد الحرامي في عملية السحب بالتقلب .

درديري كباشي

01-09-2009, 01:29 PM

الملكة اسماء ( ام محمد )

01-09-2009, 01:32 PM

قدمت لي زوجتي ورقة جديدة بالطلبات المنزلية التي لا تخلص ابدا (ونحن الحريم ديل اصلهن كان ما قرضننا ما برتاحن) . حاولت استلف اي مبلغ من الاخوة على اسا س ارجعه لهم في اقرب عملية . كلهم كانوا في حالة اجازة ومفلسين .

كلام يفتح باب سؤال كبير
هل فعلا اعباء الاسرة وطلبات العائلة هي سبب الانحراف السلوكي الذي قد يقود لامتهان ( السرقة )
لكسب العيش واعالة الافراد؟؟

ام قبس

01-09-2009, 01:33 PM

مره جانا حرامي زمن الجامعه في الداخليه اها انا كنت نايمه في الارض الحرامي جاءبالشباك ودخل يديه وبداء يسحب في الشنط القريبه من الشباك
اختك اتدردقت لمان دخلت تحت السرير وديك يالنومة نحت السرير طبعا بعد خوفه استمرت ما عارفة كم ساعة وخليته ليك شال اي حاجه عاوزها
وقمت الصباح احكي في جبني (( علي قولهم مولودة في صفيحة جبنه ))
اها اعمل شنو الله خلقني كدا جني وجن الناس البيجوا بالليل ديل

بنت الرفاعي

01-09-2009, 01:34 PM

ماشاءالله حراميك ده فاهم ومثقف , وقاريء الدنيا دي قراية , والعجب ناس ال..............!!

وماشاءالله عليك:)

الملكة اسماء ( ام محمد )

01-09-2009, 01:41 PM

نكتته هسع الملكة عاوزة تجيب لنا الهوى في رمضان دا ..

لو الهواء بلطف الاجواء ويرحم الصائمين من سخانة الاجواء الطبيعية حبابه الف
لكن هواك الانا شايفاه دا ( مُفلتر ):rolleyes:

درديري كباشي

01-09-2009, 01:43 PM

الورقة السادسة
استمر معي النحس فتره طويلة خاصة بعد حادثة المقابر وانا ذاهب الى البيت بعد ما سهرت في النادي في لعب الكتشينة . دخلت البيت حوالى الساعة حداعشر قابلتني ليك المره بنقتها المابتخلص ، انت الليل كله حايم والنهاير نايم لاشغل ولا مشغلة العيال عيانين مابتسال منهم . والبت الدكتور كاتب ليها روشته وانت مازي الرجال تشيل الروشتة تشتري الدوا لاولادك . اما معاك قروش بالهبل تخلصها في يومين فسح وضبائح وعوازيم يا اما مفلس حكيتك شنو ما عرفناها . يازول رجمتني رجم . طبعا هي ما عارفة انا شغال شنو . اننا مفهمها اعمال حره واكيد ما كذبت لاني ماشغال تبع عصابة مثلا وانا جني وجن العصابات والعمل تحت مظلة مؤسسات القطع الخاص في النصب والاحتيال والسرقات ، وانا عارف انه هذا المجال اتطور جدا واصبح فيه عصابات ما فيه دوليه وعلماء ودكاتره شغالين في المجال دا . يا عمنا انا مالي ومال الهم والالتزامات واسئلة . من نوع اتاخرت مالك والعملية دي لازم تتم في حوالي الساعة عشرة وواربعة عشرة دقيقة وثلاثين ثانية . تسال اشمعنى ما تخلوها حداشر تماما . تجيك نهرة اخرص وماتسال في المايخصك .....
المهم ما اطول عليكم اخذت روشتة البت وطلعتها وانا مافي مليم في جيبي وانا ماري في الشارع كدا لفت نظري بيت شكله كدا جميل . اها قلت البيت دا ممكن نطلع منه بمصاريف نعدي بيها الايام لغاية ما نقع في عملية كبيره . اها اولا اتلفت لقيت الشارع فاضي . وبعد ذلك شبيت من السور شفت لي مره كده سمينة قاعدة في نص السرير تمشط في شعرها . بعد داك نزلت قلت اخذ لفة لغاية الولية دي ماتنوم . رجعت بعد نص ساعة لقيتها لسع تمشط في شعرها . تاني اخذت لي جولة نص ساعة ورجعت . تاوقت لقيتها لازالت تمشط في شعرها . انا ما عارف شعرها دا عاوزة تعمل منع برش ولا شنو؟؟؟؟. المهم لمن رجعت في المره الرابعة لقيتها نامت رحت متلب ناطي جوه الحوش جيت بالقرب منها عشان اتاكد من نومها لقتها غرقانة تب كانها شاربه ليه جك بتاع روب . وتشخر وحولها اولادها نايميين . دورت على سيد البيت قلت ما يكون في حمام ولا حتة تانية كمان يجي ناطي لينا يعوقنا ولا يتعوق . لايوجد احد اخير دخلت الغرف . استغرق عملية البحث عن الغنائم اكثر من ساعتين ما لقيت لي حاجة تستاهل تعريفة ولا تجيب ليها صحن فول . لا دهب ولا مصاريف . وانا ما مصدق كله مره ارجع اعيد التفتيش . لمن الصباح قرب اخيرا طلعت وجيت عاينة للمره للازالت نايمة وتشخر . بغيظ شديد قمت صيحتها ومسكت ليك شعرها دا نكشتو من جديد وقلت ( المتسرحة ليها شنو لا دهي لا تياب زي الحريم ونايمة تشخري . ما تقومي تعملي زلابية تبيعي شاي انت عايشة كيف والسمن دا جبتيه من وين )
فجاه المراه ختت يدها في خدها وانفتحت بكاء ،،، انا لمن شفقت عليها وقعدت في الكرسي سالتها مالك ياحاجة . قالت لي الراجل غدر بي ؟؟؟؟ كيف ؟؟؟؟ انا اهلي كانوا عاملين لي دهب كتير قام اخذوا قال عايز يشتري بيه دكان في السوق المركزي ... وغاب بعد فتره اكتشفت انه عرس بيه واحدة تانية صغيره . وبقى يجينا مره في الشهر يرمي المصاريف ويمشي ليها باقي الشهر .
بصراحة كدا انا اول مره احس بالندم على محاولة سرقة وشعرت انه دموعي قربت تجري . واعتذرت ليها وقلت ليها ليك علي انا اعوضك وارجع ليك دهبك من راجلك الحرامي دا . وتمنيت لو كان معاي أي مبلغ كان تركت ليها مبلغ وطلعت منها . وانا عارف ما في باقي من الليل يكفي لعملية ثانية وراح اليوم

أشرف صلاح السعيد

01-09-2009, 01:44 PM

تسجيل حضور..
ابوالدر مانضب لك معين..

الملكة اسماء ( ام محمد )

01-09-2009, 01:45 PM

نفسي انقفلت لاني افتكرت انه هذا واحد من حرامية الغسيل ونحن عادة نكرههم لانهم جبناء ما عندهم قدرة على دخول الغرف وكسر الابواب لذلك يكتفون بالملابس المنشوره في حبل الغسيل .

لكن الحق يقال ان حرامي الغسيل جبان جبان و لا يوجد ادنى شك في ذلك

:rolleyes::rolleyes::rolleyes::rolleyes::rolleyes: :rolleyes::rolleyes:

درديري كباشي

01-09-2009, 01:48 PM

الورقة السابعة :
استمر معي النحس فتره طويلة وانا في جوله ليلية اتلفت واتصيد لي بيت مناسب فيه ريحة ترطيبة ... كل البيوت شكلها نشفانة واصحابها اتعس مننا ... فجاه كده ركزت على بيت معين قلت بعد مرات اصحاب البيوت الغبشاء يكونوا اغنياء لكن ما مبحبحنها مع اهلهم يخافوا العين .. ديل عز الطلب لانه قروشهم كتيره وما مستفيدين منها ... اها ديل لمن تقع في بيت واحد منهم يمكن تعيش عليها ست شهور .. يعني توبة مؤقته ... اها انا خمنت انه واحد من البيوت دي يكون منها .. فعلا مديت راسي بالحيطة كدا ... نظره استكشافيه يعني البيت من جوه شيين والسراير مجدعه في الحوش لكن الخلا ظني في محله انه هناك تراكتور مقرش في البيت .. قلت بس ياهو ذاتوا معناها اخونا من اصحايب المشاريع الزراعيه وديل ذاتهم الكاتلين الجدادة وخامين بيضها ...
وفعلا بعد ما اقنعت نفسي انه صاحب البيت مقندل وثري وبدون تردد اتلفت الشارع فاضي رحت ناطي الحيطة .. وانا واقف في نص الحوش اتلفت واختار في الغرفة المناسب فجاه سمعت صوت كركبة في باب الحوش وصوت واحد يفتح الباب بالمفتاح ... فكرت بسرعه اخر شي فكرت فيه انه ادخل الحمام بلا مؤاخذه يعني .. ودخلت الحمام فعلا وقفلت الباب علي ... لكن لسوء الحظ انه الراجل الظاهر كان سهران في حفلة يبدو انه كان محقون اول ما دخل البيت اول مكان فكر يدخله هو الحمام ...
انا اعصابي باظت مره واحده وفعلا صاحبنا دخل وهو يترنم بباقي اغاني الحفلة ويبدو انه سكران كمان .... دخل الحمام وولع النور وجلس بدون ما يلحظ وجودي .. وانا اصبت بشلل مؤقت .. واخينا بعد ماجلس لحظ لي ... وعيونه جحظت وبدا عليه الهلع وانا كمان .. لكن فجاه وبدون ما يسالني خرج فتح باب الحمام .. والمدهش انه ما قدر يمشي على رجليه احتمال انه اعصابه باظت اكثر مني انما حبى مثل الاطفال وانا وقفت على باب الحمام مندهش ما عارف اضحك على منظره ولا اجري اتخارج احسن قبل ما ينطلق منه صوت .... ولسع الناس تقول ليك الحرامي هو الخواف ...وتلبت واتخارجت من هذا البيت وانضم هذا اليوم لايام النحس ... عشان تعرفوا شغلنا ما ساهل زي مانتو فاكرين .

الملكة اسماء ( ام محمد )

01-09-2009, 01:54 PM

والشيلة دي قبل ما يلاقي هو بت الحلال اولى بها نحن اولاد الحرام ديل . ها ها ها ولا ما كدا

. ظل طول عمره ينتظر البنت الصرخت دي تستغيث حتى ولو من ضب عشان يعمل فيها عنتره بن شداد

واخينا عنتره تلب ورانا

. تلاقي كله واحد يرجف تحت بطانيته من الخوف اول ما يسمع صراخ بنت يتحول بقدرة قادر الى خالد بن الوليد .

:p:D:D:D:D:D:p

درديري كباشي

01-09-2009, 01:56 PM

كلام يفتح باب سؤال كبير
هل فعلا اعباء الاسرة وطلبات العائلة هي سبب الانحراف السلوكي الذي قد يقود لامتهان ( السرقة )
لكسب العيش واعالة الافراد؟؟

[/center]

خلاص انا طبعا كملت الاوراق وطلعت من توب الحرامي ..
لا الاعباء ولا ما هو اكثر من ذلك تكون مبررا للانحراف ايا كان نوعه

بس الخلاف هو في التعبير او الاسماء المجازية التي نطلقها على الحرامية .. وهل الحرامي الا ينط الحيطة ويرعب الناس بالليل .. في لصوص اخطر من حرامي الليل بكثير .. منهم من يغشوا في مواد البناء والمباني تنهار على رؤوس ابرياء .. وفي الذي يستورد مواد غذائية ضاربة والقائمة تطول وكلها تجد صاحبنا اخفاهم ضررا .

درديري كباشي

01-09-2009, 02:01 PM

درديري كباشي

01-09-2009, 02:03 PM

ماشاءالله حراميك ده فاهم ومثقف , وقاريء الدنيا دي قراية , والعجب ناس ال..............!!

وماشاءالله عليك:)

يا مرام الا تقولي لينا ناس ال........................ منو .. احسن تقولي قبل ما نغشاكم في الايام دي ونخليكم تعيدو بالقديم .

الملكة اسماء ( ام محمد )

01-09-2009, 02:04 PM

قابلتني ليك المره بنقتها المابتخلص ، انت الليل كله حايم والنهاير نايم لاشغل ولا مشغلة العيال عيانين مابتسال منهم . والبت الدكتور كاتب ليها روشته وانت مازي الرجال تشيل الروشتة تشتري الدوا لاولادك .

وانا جني وجن العصابات والعمل تحت مظلة مؤسسات القطع الخاص في النصب والاحتيال والسرقات ،

تاوقت لقيتها لازالت تمشط في شعرها . انا ما عارف شعرها دا عاوزة تعمل منع برش ولا شنو؟؟؟؟.

. بغيظ شديد قمت صيحتها ومسكت ليك شعرها دا نكشتو من جديد وقلت ( المتسرحة ليها شنو لا دهب لا تياب زي الحريم ونايمة تشخري . ما تقومي تعملي زلابية تبيعي شاي انت عايشة كيف والسمن دا جبتيه من وين )

قالت لي الراجل غدر بي ؟؟؟؟ كيف ؟؟؟؟ انا اهلي كانوا عاملين لي دهب كتير قام اخذوا قال عايز يشتري بيه دكان في السوق المركزي ... وغاب بعد فتره اكتشفت انه عرس بيه واحدة تانية صغيره .

كم رسالة يحوى هذا الجزء؟؟
بصراحة : بوست كنز

درديري كباشي

01-09-2009, 02:06 PM

تسجيل حضور..
ابوالدر مانضب لك معين..

سلام يا شاعرنا الفذ

نحن لسع راجين منك القبيل راجنه نحن ..يوم تبشر بيه غيمة

الملكة اسماء ( ام محمد )

01-09-2009, 02:12 PM

بعض مرات اصحاب البيوت الغبشاء يكونوا اغنياء لكن ما مبحبحنها مع اهلهم يخافوا العين ..

لكن الخلا ظني في محله انه هناك تراكتور مقرش في البيت .. قلت بس ياهو ذاتوا معناها اخونا من اصحايب المشاريع الزراعيه وديل ذاتهم الكاتلين الجدادة وخامين بيضها ...

دا حرامي قاري الدنيا قراية غريبة جدا
ابتديت اشك في مصدر المفكرة يا ابو الدُر :rolleyes::D:cool:

بنت الرفاعي

01-09-2009, 02:54 PM

يا مرام الا تقولي لينا ناس ال........................ منو .. احسن تقولي قبل ما نغشاكم في الايام دي ونخليكم تعيدو بالقديم .

ماقلت ماداير الهواء , أجيبو ليك؟؟؟؟:rolleyes:

:p:p:p:p:p:p

درديري كباشي

02-09-2009, 03:16 AM

دا حرامي قاري الدنيا قراية غريبة جدا
ابتديت اشك في مصدر المفكرة يا ابو الدُر :rolleyes::d:cool:

اهاااااااااااا يا هو دا الكلام البجيب الكلام .... هي حتى بخط الحرامي نفسه ما شايفة الاخطاء الاملائية كثيرة كيف

درديري كباشي

02-09-2009, 03:19 AM

ماقلت ماداير الهواء , أجيبو ليك؟؟؟؟:rolleyes:

:p:p:p:p:p:p

مرام هرشتيني عدييل خلاص خليتك قرطي على كدا

الملكة اسماء ( ام محمد )

02-09-2009, 03:24 AM

هي حتى بخط الحرامي نفسه ما شايفة الاخطاء الاملائية كثيرة كيف

:p:D:D:D:p
انا غايتو شااااهد ماشافش حاجة :rolleyes::D:rolleyes:

تخريمة : قلت لي كل يوم الصباح بتخت كرسي تقعد جمب باب البيت ؟:rolleyes::rolleyes::rolleyes:

محب

02-09-2009, 03:30 AM

الحقونا الحرااااااااااااااااااااااااااااااااااااااااااااام ي
الحقونا الحرااااااااااااااااااااااااااااااااااااااااااااام ي
الحقونا الحرااااااااااااااااااااااااااااااااااااااااااااام ي

درديري كباشي

02-09-2009, 03:32 AM

:p:d:d:d:p
انا غايتو شااااهد ماشافش حاجة :rolleyes::d:rolleyes:

تخريمة : قلت لي كل يوم الصباح بتخت كرسي تقعد جمب باب البيت ؟:rolleyes::rolleyes::rolleyes:

بمناسبة الخوف من الحرامي وعشان اطلعك من الجو دا .. اخواتي الاصغر مني كن ممتحنات الشهادة السودانية .. وكان عندهن بنت صاحبتهن تجي تذاكر معهن .. ولكن صاحبتهن طخمة وما بتحب السهر والتعب في المذاكره وفي نفس الوقت غيورة جدا ... تكون هي عاوزة تنوم وفي نفس الوقت ما عايزة تنوم وهم بيكونوا بيذاكروا وراها ..

تعمل شنو قالوا تكون بتعاين في الكتاب فجاه ترفع راسها بعنف وتركز نظرها في الظلام كانها شافت حركة او سمعت صوت .. بدون ما تتكلمم وبعد شوية تاني تكرر الحركة بعنف .. لغاية ما تزرع فيهن الرعب وكل واحدة تجري على بطانيتها وسريرها حتى بعداك ضميرها يرتاح وتمشي تنوم هي بمزاج .

الملكة اسماء ( ام محمد )

02-09-2009, 03:45 AM

لغاية ما تزرع فيهن الرعب وكل واحدة تجري على بطانيتها وسريرها حتى بعداك ضميرها يرتاح وتمشي تنوم هي بمزاج .

والله دي الذ زول
المنافسة تعمل العجائب

وانا اعتدت اني استخرج كرسي من الصباح في ظل النيمه امام البيت
اول ما شرقت الشمس في الاول وقفت انا على باب البيت منتظرا الشارع يتفرغ من الماره والطلاب وغيرهم ثم اخرج الكرسي اولا ... ورغما عن انه خلال ساعة واحدة من السابعة الا الثامنة تفرغ الماره تماما الا انها كانت ساعة طويلة

اها ولسه بتقعد الصباح جمب باب البيت ؟:rolleyes::D:rolleyes:

درديري كباشي

02-09-2009, 03:58 AM

والله دي الذ زول
المنافسة تعمل العجائب

اها ولسه بتقعد الصباح جمب باب البيت ؟:rolleyes::d:rolleyes:

بالله يعني انتي فاتحه الحلل كلها في وقت واحد وقاعدة تسوطي ... هو انت عندكم ضيوف ولا شنو ؟؟؟؟ بعدين حكاية الكرسي دي في الاجازات بس وفي السودان بس ..

الملكة اسماء ( ام محمد )

02-09-2009, 04:01 AM

بالله يعني انتي فاتحه الحلل كلها في وقت واحد وقاعدة تسوطي ... هو انت عندكم ضيوف ولا شنو ؟؟؟؟

هيهيهيهيهيهيهيهي
يعني عايز تقنعني انه ماف رابط عجيب بينك وبين الحرامي دا :rolleyes:

:p:D:D:D:D:p

درديري كباشي

02-09-2009, 04:23 AM

هيهيهيهيهيهيهيهي
يعني عايز تقنعني انه ماف رابط عجيب بينك وبين الحرامي دا :rolleyes:

:p:d:d:d:d:p

والله خوفتيني حتى من نفسي ... مش في مرض نفسي من نوع زي كدا .. الواحد بالليل تتلبسه روح حرامي يقوم يحوم ويسرق ويعمل بلاوي والصباح يرجع شخص عادي ولا يتذكر اي شئ من احداث الليل .. الليلة انا غايتو بالليل بربط نفسي في السرير .. ما اكون منجض الجيران وما جايب خبر ... اتاااااااااااري في حاجات كثيرة كل مره تلاقيني في البيت انا اقول دي جات من وين؟؟؟؟؟؟

الملكة اسماء ( ام محمد )

02-09-2009, 04:47 AM

الليلة انا غايتو بالليل بربط نفسي في السرير .. ما اكون منجض الجيران وما جايب خبر ... اتاااااااااااري في حاجات كثيرة كل مره تلاقيني في البيت انا اقول دي جات من وين؟؟؟؟؟؟

هيهيهيهيهيهي

:p:D:D:D:D:D:p

ابوخالد

02-09-2009, 05:05 AM

منهم من يغشوا في مواد البناء والمباني تنهار على رؤوس ابرياء

قصدك شنو يادرديرى ... دى أخرتا ..... دايرنا نطلع فى الجامع ونسمع الما سامع ...
والا تبدى الندم ... وتدعى العدم ....

دا حرامي قاري الدنيا قراية غريبة جدا
ابتديت اشك في مصدر المفكرة يا ابو الدُر

تذيع المصدر .... والا أذيع أنا ...؟؟؟؟؟؟؟؟؟؟؟؟
الجائزة شنو !!!!!!!!!

ما اكون منجض الجيران وما جايب خبر ... اتاااااااااااري في حاجات كثيرة كل مره تلاقيني في البيت انا اقول دي جات من وين؟؟؟؟؟؟

من ناحية الجيران أسالنى أنا .... عامل ليهم لسته كمان ...
إنت ماحاسى بى نفسك والا شنو .... كملت الجيران وقبلت على ناس
السليمانية ... الله يستر التيرم الجاى على وين ....
حولينا ولا علينا ...[/center]

درديري كباشي

02-09-2009, 12:19 PM

منهم من يغشوا في مواد البناء والمباني تنهار على رؤوس ابرياء

قصدك شنو يادرديرى ... دى أخرتا ..... دايرنا نطلع فى الجامع ونسمع الما سامع ...

الفي بطنه حرقص براه يرقص راس السوط هبشك يا هندسة .. يعني قطعة ارضنا من هسع نقول ليك ابعد منها يازول ..
والا تبدى الندم ... وتدعى العدم ....

دا حرامي قاري الدنيا قراية غريبة جدا
ابتديت اشك في مصدر المفكرة يا ابو الدُر

تذيع المصدر .... والا أذيع أنا ...؟؟؟؟؟؟؟؟؟؟؟؟

يعني انت براك عاوزني اقول انه الاوراق دي معطتها من مفكرة لقيتها في صالونك وكمان اسال خالد ولدك قلت ليه اوعى تكلم ابوك ........الجائزة شنو !!!!!!!!!

ما اكون منجض الجيران وما جايب خبر ... اتاااااااااااري في حاجات كثيرة كل مره تلاقيني في البيت انا اقول دي جات من وين؟؟؟؟؟؟

من ناحية الجيران أسالنى أنا .... عامل ليهم لسته كمان ...
إنت ماحاسى بى نفسك والا شنو .... كملت الجيران وقبلت على ناس
السليمانية ... الله يستر التيرم الجاى على وين ....
حولينا ولا علينا ...[/center]

غايتو جنس ناس ماركة رمتني بدائها وانسلت

أشرف صلاح السعيد

02-09-2009, 02:17 PM

درديري كباشي

02-09-2009, 04:00 PM

ابوالدر عوافى..
انا كملتا لغاية الورقة الخامسة..
اولا فهمت انك مرتاح عشان كدا الحرامى ابو مفكرة كان عايز يسرقك..
انو الواحد لو مفلس وجاو حرامى ومالقى شى يسرقو مايفلقو بطوبة عشان مايتسكا فى عز الليل..
انو صاحبك المدير الاتكفت جبان ..ولسه مصاحبو ولا خلاص؟
انو الواحد يتجوعل بنص الحوش ومافى داعى للسك ويتكفت فى المقابر..
ياخى عندك اعجاب بالحرامية غريب خلاص اول مرة اشوف الخاين هو البطل..
بكمل وبأرجع ليك..
شكيت محنك هبلت بيى جنس هبالة اضحك زى المجنون براى..
كن مبدعا كما انت دوما..

سلام يا باشمهندس

بس الحتة دي انت بالغت فيها مره واحده وهي حكاية اعجابي انا بالحرامي ...

القصة انا كما ذكرت كتبتها باسلوب الاحلال او التقمص . وهي محاولة خيالية مني في ان ادخل داخل عقل الشخص واطرح الموضوع من وجهة نظره هو .. وهذا الاسلوب انا استخدمته كثيرا كما في قصة الطفل الرضيع .. وحتى في الحيوانات كما في قصة فرار فار .. وثرثرة في عالم الصراصير .. لانه هذا الاسلوب يتيح لي ان اقوص في جانب غامض يجهله الانسان من منظور خيالي فقط .. فنحن كناس سويين لانعرف كيف يفكر الحرامي او المجنون او الصرصار او الديك ... ولكن لاننكر شوقنا لمعرفة هذا الشئ .. وانا بالذات عندي رغية شديدة ولازالت في معرفة كيف يفكر كل مخلوق .. كيف ينظر الى الاخرين وكيف ينظر له الاخرون ..

والعملية ليست خيال فقط بل بعض مرات اتجرا عليها بتجارب عمليه ..واضرب ليك مثال بسيط ايام كنت طالب بالجامعة كنت اعمل مع الوالد بالمكتبة في فترة الاجازة .. وجاء فجاة بائع متجول من الارتريين يبيع المساويك ... فجاه خطر في بالي اني امثل عليه اني ابكم واطرش لاعرف كيف سيتصرف هو معي ..وقف من خلفي وبدا يناديني .. يا اخ مساويك .. داير مسواك ؟؟ مسوالك جديد .. ويرفع في صوته انا كنت مقبل على رفوف الكتب ومعطيه ظهري .. الى ان اضطر يلكزني من كتفي .. التفت اليه كاني مفزوع .. وبحركة البكم وضعت اصبعي في مخي واصدرت اصوان كاني اقول له هل انت مجنون ؟؟ الطريف في الامر كان معنا عامل ارتري ايضا فهم اللعبة ودخل في الصورة وقال للبائع هذا اصم .. بعد ذلك بدا البائع يتعاطف معي ويجتهد في انه يوصل لي المعلومة ... وضع المساويك في الارض وبدا يؤشر ويحسب .. وانا كنت جادي كتمت نفسي حتى لا تفلت مني ضحكة ووصلت له في الصراخ والاشارة .. وعامل المكتبه مثل دور المترجم لحركاتي .. يقول له مثلا .. قال لك من اين تاتوا بالمساويك .. وهو يؤشر ناحية الجبل ويتحرك . ومنظره كان يفطس بالضحك .. وانا مواصلا اخيرا كتعاطف منه معي نزع مسواك وقدمه لي كهدية .. وقبل ما يصل الباب قلت له ( متشكرييييين يا ابو الشباب ) اولا وقف يعاين لي باندهاش وبعدها انفجر يضحك الى ان جلس في الارض .من التجربة اتعلمت كيف يمكن ان يتعامل الاصم مع بائع متجول .. وما هي نتيجة الصدمة لو اكتشف البائع انه الاصم الذي تعاطف هو معه انه ليس كذلك ..... لقيتني كيف بعد كدا ؟؟

الملكة اسماء ( ام محمد )

02-09-2009, 04:22 PM

والعملية ليست خيال فقط بل بعض مرات اتجرا عليها بتجارب عمليه ..

لقيتني كيف بعد كدا ؟؟

انا غايتو لقيت انه منك خوف :confused::rolleyes::confused:
:p:D:D:D:p

فراس

02-09-2009, 05:01 PM

ابوالدر ربنا اديك الصحة والعافية وتبدع اكثر واكثر
تسلم

درديري كباشي

02-09-2009, 11:23 PM

انا غايتو لقيت انه منك خوف :confused::rolleyes::confused:
:p:d:d:d:p

واالله ما في حد في المنتدى دا منه خوف غيرك انت ...لدرجة انه لمن تجيني مشاركة منك افتح المشاركة بيد مرتجفة وقلب خافق واقعد اخمن يا رب جابت شنو المصيبة دي ما انت كمان ردودك ما زي ردود الناس .. وقرايتك ذاتها تشيل الهم .. تعرفي انا الموضوع بقيت اكتبو بثلاث مراحل بدلا من اثنين الاولى اكتب عفويا كدا زي ما يجي يجي وبعدين ارجع من اجل عيون الاخطاء الاملائية وان كان كثير ما تفلت مني .. وكويس انه التعديل هنا مفتوح ويعني عملية التصحيح مفنوحة .. لكن اضفت لهم قراءه ثالثة .. وهي تشمل تقليب الحروف وقص الحشائش الضارة من حولها لاجل عيونك انت واشرف .. ورغما من كدا برضو تجيبوا الهوا ..

درديري كباشي

02-09-2009, 11:29 PM

ابوالدر ربنا اديك الصحة والعافية وتبدع اكثر واكثر
تسلم

سلام عليك يا فراس والله يخليك واحلى دعوة لانسان هي ان تتمنى الصحة والعافية لشخص .. حقيقة الصحة كنز لاتشعر بقيمته الا عندما تصاب ويوقظك الالم في عز الليل حتى ولو من ظفر ..

أشرف صلاح السعيد

03-09-2009, 12:30 AM

درديري كباشي

03-09-2009, 12:40 AM

ابوالدر عوافى..
خلصتا ولا شنو وينو الباقى ؟ مايكون الحرامى تاب وحيرنا معاو؟
ياخوى حكاية حبك للحرامى دى خلتك تنفض الريش من شعرك مالك؟ الناس ديل كلهم كانو شاكين فيك وانا اليوم بأديهم الاكيدة انتا حرامى سراق عقول وخلدان وألباب..
غايتو اذا القصة فيها حمار نوم بتقلبك حرامى بالليل الله يسترك من حمار نوم قالب ليو واحد سياف وتتقابلو نايمين اتنيناتكم..
الدرديرى ود كباشى دمت مبدعا دوما..

خليني يوم تاني يا باش مهندس اكون معزوم مع ابو خالد وامعط لي منه تاني كم ورقة من المذكرات بتاعته واجي انقلها مش نحن اتفقنا انه المذكره هي تبع ابو خالد .. اقرا ما سبق اعلاه ... بعدين تعال انت لسع ما استلمت جماعتك مالك حايم بيجاي لسع .

أشرف صلاح السعيد

03-09-2009, 01:01 AM

خليني يوم تاني يا باش مهندس اكون معزوم مع ابو خالد وامعط لي منه تاني كم ورقة من المذكرات بتاعته واجي انقلها مش نحن اتفقنا انه المذكره هي تبع ابو خالد .. اقرا ما سبق اعلاه ... بعدين تعال انت لسع ما استلمت جماعتك مالك حايم بيجاي لسع .

بالله هى القصة كدا وشابكنى امبارح مانمتا ..مامن العليو..
لسة ماقبضتا ويظهر الواحد يعدى على ابوخالد يشوف من المذكرة اللسه مدسوس فيها كتير يمكن نلاقى لينا طريقة نختصر غربتنا..
أيوخالد وانا اقول الكرم دا وراو سر..ماماتعبان فيو غير نطة ونطة..

الملكة اسماء ( ام محمد )

03-09-2009, 01:24 AM

واالله ما في حد في المنتدى دا منه خوف غيرك انت ...لدرجة انه لمن تجيني مشاركة منك افتح المشاركة بيد مرتجفة وقلب خافق واقعد اخمن يا رب جابت شنو المصيبة دي ما انت كمان ردودك ما زي ردود الناس .. وقرايتك ذاتها تشيل الهم ..

وقص الحشائش الضارة من حولها لاجل عيونك انت واشرف .. ورغما من كدا برضو تجيبوا الهوا ..

ابو الدُر والدُرر

تعرف قعدت اضحك في كلامك دا وذكرني حاجة
تصدق زمان كان في اعضاء انا قدر مابتمنى يجوا يتداخلوا في مواضيعي كنت بكون شايلة الهم
ودا طبعا لانهم جد ماشاء الله عليهم ( مابخلوا للبوست جنبه مايفلفلوها ) , ومع الزمن بقيت اتمنى دخولهم لمواضيعي عشان احس انه في نقد بناء
طبعا استاذ ااشرف ممكن يكون نقده بناء اما انا والله اعلم ( ارهابية ):p
المتعة في مواضيعك انها بدون ماتلاحظ بتخاطب كل العقول والمستويات الفكرية
عشان كدا انا ساعات بقتبس ليك حاجة من داخل الموضوع عندها بُعد تاني

هسي انا جيت مخصوص احرش ليك استاذ اشرف السعيد , اظنه ما انتبه لكلامك دا :rolleyes:

ملاحظة : الخواف ببدع في حروفه ( على وزن بربي عياله ):)

ابوخالد

03-09-2009, 03:39 AM

ابو الدُر والدُرر

تعرف قعدت اضحك في كلامك دا وذكرني حاجة
تصدق زمان كان في اعضاء انا قدر مابتمنى يجوا يتداخلوا في مواضيعي كنت بكون شايلة الهم
ودا طبعا لانهم جد ماشاء الله عليهم ( مابخلوا للبوست جنبه مايفلفلوها ) , ومع الزمن بقيت اتمنى دخولهم لمواضيعي عشان احس انه في نقد بناء
طبعا استاذ ااشرف ممكن يكون نقده بناء اما انا والله اعلم ( ارهابية ):p
المتعة في مواضيعك انها بدون ماتلاحظ بتخاطب كل العقول والمستويات الفكرية
عشان كدا انا ساعات بقتبس ليك حاجة من داخل الموضوع عندها بُعد تاني

هسي انا جيت مخصوص احرش ليك استاذ اشرف السعيد , اظنه ما انتبه لكلامك دا :rolleyes:

ملاحظة : الخواف ببدع في حروفه ( على وزن بربي عياله ):)

رفقآ بالباب يا أحباب ....
كاتبنا متهم بالسفلى ومرة بتاع ممنوعات .... ولو بدع فى الحروف أكتر من كده
ممكن يحصل ما لا تحمد عقباه ....

الملكة اسماء ( ام محمد )

03-09-2009, 04:23 AM

رفقآ بالباب يا أحباب ....
كاتبنا متهم بالسفلى ومرة بتاع ممنوعات .... ولو بدع فى الحروف أكتر من كده
ممكن يحصل ما لا تحمد عقباه ....

تصدق يا ابوخالد
معروف اني ملولة جدا وصعب جدا اقعد اقراء لي مقالة طويلة , لكن والله ابو الدُر قدر باسلوبه السهل الواقعي جدا ياسرني بحرفه لدرجة بكون حابسة انفاسي وانا بقراء وساعات بضحك لمن اسمع ناس البيت كلهم والاطرف من كدا بحكي ليهم عن كتاباته وفيهم الابتداء يتصفح المنتدى عشان يقراء لكتابنا الحقيقة هم فخر لنا جميعا
ومن هنا احب اُشيد بكمية ليست قليلة من اقلام اثبتت وجودها بقوة رغم صغر عمرها في المنتدى
الغائب الحاضر في القلوب : ابو حراز
المبدع بحق : عباس الدسيس
القادم بقوة : اشرف صلاح السعيد
المدهش سرد وكلمة : درديري كباشي
وهناك آخرون ولكن حتى لا اظلم احد اكتفي بهذا القدر حاليا

ودعني اقف احتراما وتقديرا لك استاذي ابو خالد
فبصراحة ويشهد الله لا اجاملك : انت اضافة حقيقية للمنتدى

همسة : ابو الدُر لو ابدع اكتر من كدا ح يكون احسن لينا ننسحب بكرامتنا :p:D:p

درديري كباشي

03-09-2009, 07:05 AM

تصدق يا ابوخالد
معروف اني ملولة جدا وصعب جدا اقعد اقراء لي مقالة طويلة , لكن والله ابو الدُر قدر باسلوبه السهل الواقعي جدا ياسرني بحرفه لدرجة بكون حابسة انفاسي وانا بقراء وساعات بضحك لمن اسمع ناس البيت كلهم والاطرف من كدا بحكي ليهم عن كتاباته وفيهم الابتداء يتصفح المنتدى عشان يقراء لكتابنا الحقيقة هم فخر لنا جميعا
ومن هنا احب اُشيد بكمية ليست قليلة من اقلام اثبتت وجودها بقوة رغم صغر عمرها في المنتدى
الغائب الحاضر في القلوب : ابو حراز
المبدع بحق : عباس الدسيس
القادم بقوة : اشرف صلاح السعيد
المدهش سرد وكلمة : درديري كباشي
وهناك آخرون ولكن حتى لا اظلم احد اكتفي بهذا القدر حاليا

ودعني اقف احتراما وتقديرا لك استاذي ابو خالد
فبصراحة ويشهد الله لا اجاملك : انت اضافة حقيقية للمنتدى

همسة : ابو الدُر لو ابدع اكتر من كدا ح يكون احسن لينا ننسحب بكرامتنا :p:d:p

قبضتكم يعني الواحد ما يغيب من النت تلاتة ساعات الا تقعدوا تقطعوا فيه وعلى عينك يا مزارع ...

مع احترامي ليكم وبالمناسبة دي عند موضوع اسمه مع احترامي ليكم اللجيبو واجي

أشرف صلاح السعيد

03-09-2009, 12:17 PM

تصدق يا ابوخالد
معروف اني ملولة جدا وصعب جدا اقعد اقراء لي مقالة طويلة , لكن والله ابو الدُر قدر باسلوبه السهل الواقعي جدا ياسرني بحرفه لدرجة بكون حابسة انفاسي وانا بقراء وساعات بضحك لمن اسمع ناس البيت كلهم والاطرف من كدا بحكي ليهم عن كتاباته وفيهم الابتداء يتصفح المنتدى عشان يقراء لكتابنا الحقيقة هم فخر لنا جميعا
ومن هنا احب اُشيد بكمية ليست قليلة من اقلام اثبتت وجودها بقوة رغم صغر عمرها في المنتدى
الغائب الحاضر في القلوب : ابو حراز
المبدع بحق : عباس الدسيس
القادم بقوة : اشرف صلاح السعيد
المدهش سرد وكلمة : درديري كباشي
وهناك آخرون ولكن حتى لا اظلم احد اكتفي بهذا القدر حاليا

ودعني اقف احتراما وتقديرا لك استاذي ابو خالد
فبصراحة ويشهد الله لا اجاملك : انت اضافة حقيقية للمنتدى

همسة : ابو الدُر لو ابدع اكتر من كدا ح يكون احسن لينا ننسحب بكرامتنا :p:d:p

اختى ملكة القلوب وملكة الحضور عوافى..
يديك العافية والله يرفع معنوياتك زى مارفعتى معنوياتى واكيد من نالهم اطرائك الجميل..
ورمضان كريم عليك وعلى الجميع..