مهيد ود السفاح
05-07-2009, 10:46 PM
في اتصال هاتفي مع الوالد والأسرة عرفت انو الكهرباء بتقطع بصورة متكرره وعشوائيه , وغالباً ما يكون القطع ناشف , يعني بالعربي في وقت الناس محتاجه للكهرباء , وبقيت كلما اتصل اسأل عن احوال الكهرباء وصحتها , كأنها واحده من افراد الاسره , وغالباً ما تكون الاجابه اما هسي قطعوها او هسي ولعت ليها دقايق بس .
فكرت في حل للمشكله , ونسبة لعدم توفر السيولة الكافيه في جيبي حق البنطلون او حق القميص صرفت النظر عن فكرة شراء احد السدود الموجوده عندنا في السودان خصوصاً سد مروي جديد والناس فرحانه بيهو وده شئ طبيعي انو الواحد يفرح للحاجه الجديده , حتى الاطفال الصغار بفرحوا لما يكون عندهم حاجه جديده , المهم وصلت لي انو سد مروي بعيد عن متناول القوة الشرائيه حقتي , فكرت في سنار والروصيرص , لكن واحد من الاصحاب نصحني وقال لي الخزانات دي قديمه وعايزه صيانه وخبراء تعليه وهلمجرا .
طيب كيف احل المشكله ؟؟ كيف احل المشكله ؟؟؟
بس لقيتها (( جنا ريتر )) واسمه بالانجليزي (( مولد )) , واشتريت (( جنتير )) وبدون شطاره ومفاوضه للبائع كان السعر 210 دولار امريكي , دفعت وقلت الحمد لله الواحد قدر اتخارج من مشكله , ورسلت المولد الما خمج ومعاهو شوية هدايا للاهل بالسودان , ولحسن حظي او لسبب اخر انا ما عارفو كانت رسوم الشحن حتي مطار الخرطوم 30 دولار للمولد بس يعني جملة الليمون 240 دولار للمولد ( قيمة + رشوم شحن وترحيل )
وبعد كده ما باقي لي غير الجمارك السودانية ( اللهم احفظ جماركنا السودانيه من كل سؤ ) , وبيني وبينكم هي الجمارك ما محتاجه لي في حاجه , براها بي ضراعها الاخضر بتشيل حقها , عفيت منها .
يا ولد امشي الخرطوم ادفع الجمارك وشيل حاجاتكم دي , الكلام ده انا قلته بكل بساطه .
قال كويس يا مهيد يومين كده وانا بمشي .
الراجل مشي الجمارك وقدم بوليصة الشحن والفواتير عشان استلم السد الجديد اقصد المولد , اضرب اجمع اضرب اجمع ( ناس الجمارك الرياضيات حقتهم غير , ما فيها طرح وقسمه لانها بتنقص الناتج القومي ) , شويه كده وجرس التلفون حقي يرن .
يا مهيد المولد جماركو 257 دولار امريكي ابو صلعه , ورسوم شنو كده ما عارف 50 دولار يعني اجمالي جمارك السد الجديد 307 دولار , ده طبعاً غير الحاجات التانيه .
رديت بكل ادب ودهشه : انت متاكد ؟؟
امكن في غلط ولا حاجه , كدي اتأكد .
يا مهيد انا متأكد .
طيب يا ولد افتح الكرتون بتاع السد ده امكن انا غلط ورسلت ليكم السد العالي .
(( مهيد بطل الحركات دي ))
حركات شنو ؟؟
هسي يا جماعه بالله عليكم انا بتاع حركات , والله بتاع الحركات الله عالم بيهو .
مولد تكلفته لحدي العتبه 240 دولار , جماركو 307 دولار , ما قلت ليكم سد جديد .
طيب الناس دي لا دايره تحل مشكلة الكهرباء ولا دايرني انا احلها ليكم , يعني لا برحموا ولا بخلوا رحمة الله تنزل , ده كلو ساهل .
السد الجديد نسميهو شنو ؟؟
ونركبوا ليكم وين ؟؟
ونعمل ليهو كاس في الافتتاح ونلعب فيهو هلال مريخ ولا ناس الهلال بنسحبوا ؟؟
اكرر اللهم احفظ جماركنا وطول سيفها .
سؤال برئ جداًً
شنو يعني جمارك ؟؟؟؟؟
فكرت في حل للمشكله , ونسبة لعدم توفر السيولة الكافيه في جيبي حق البنطلون او حق القميص صرفت النظر عن فكرة شراء احد السدود الموجوده عندنا في السودان خصوصاً سد مروي جديد والناس فرحانه بيهو وده شئ طبيعي انو الواحد يفرح للحاجه الجديده , حتى الاطفال الصغار بفرحوا لما يكون عندهم حاجه جديده , المهم وصلت لي انو سد مروي بعيد عن متناول القوة الشرائيه حقتي , فكرت في سنار والروصيرص , لكن واحد من الاصحاب نصحني وقال لي الخزانات دي قديمه وعايزه صيانه وخبراء تعليه وهلمجرا .
طيب كيف احل المشكله ؟؟ كيف احل المشكله ؟؟؟
بس لقيتها (( جنا ريتر )) واسمه بالانجليزي (( مولد )) , واشتريت (( جنتير )) وبدون شطاره ومفاوضه للبائع كان السعر 210 دولار امريكي , دفعت وقلت الحمد لله الواحد قدر اتخارج من مشكله , ورسلت المولد الما خمج ومعاهو شوية هدايا للاهل بالسودان , ولحسن حظي او لسبب اخر انا ما عارفو كانت رسوم الشحن حتي مطار الخرطوم 30 دولار للمولد بس يعني جملة الليمون 240 دولار للمولد ( قيمة + رشوم شحن وترحيل )
وبعد كده ما باقي لي غير الجمارك السودانية ( اللهم احفظ جماركنا السودانيه من كل سؤ ) , وبيني وبينكم هي الجمارك ما محتاجه لي في حاجه , براها بي ضراعها الاخضر بتشيل حقها , عفيت منها .
يا ولد امشي الخرطوم ادفع الجمارك وشيل حاجاتكم دي , الكلام ده انا قلته بكل بساطه .
قال كويس يا مهيد يومين كده وانا بمشي .
الراجل مشي الجمارك وقدم بوليصة الشحن والفواتير عشان استلم السد الجديد اقصد المولد , اضرب اجمع اضرب اجمع ( ناس الجمارك الرياضيات حقتهم غير , ما فيها طرح وقسمه لانها بتنقص الناتج القومي ) , شويه كده وجرس التلفون حقي يرن .
يا مهيد المولد جماركو 257 دولار امريكي ابو صلعه , ورسوم شنو كده ما عارف 50 دولار يعني اجمالي جمارك السد الجديد 307 دولار , ده طبعاً غير الحاجات التانيه .
رديت بكل ادب ودهشه : انت متاكد ؟؟
امكن في غلط ولا حاجه , كدي اتأكد .
يا مهيد انا متأكد .
طيب يا ولد افتح الكرتون بتاع السد ده امكن انا غلط ورسلت ليكم السد العالي .
(( مهيد بطل الحركات دي ))
حركات شنو ؟؟
هسي يا جماعه بالله عليكم انا بتاع حركات , والله بتاع الحركات الله عالم بيهو .
مولد تكلفته لحدي العتبه 240 دولار , جماركو 307 دولار , ما قلت ليكم سد جديد .
طيب الناس دي لا دايره تحل مشكلة الكهرباء ولا دايرني انا احلها ليكم , يعني لا برحموا ولا بخلوا رحمة الله تنزل , ده كلو ساهل .
السد الجديد نسميهو شنو ؟؟
ونركبوا ليكم وين ؟؟
ونعمل ليهو كاس في الافتتاح ونلعب فيهو هلال مريخ ولا ناس الهلال بنسحبوا ؟؟
اكرر اللهم احفظ جماركنا وطول سيفها .
سؤال برئ جداًً
شنو يعني جمارك ؟؟؟؟؟