انهم لايكذبون

[ام قبس]

اعيش معهم منذ اكثر من اربعة اعوام اجوائهم تشبه طبائعهم
لايتاثرون بي شيء لا بقدر حجمه الطبيعي لا اكثر ولا اقل
يندهشون حين يرون تصرف غير منطقي
يقولون (اووويييووو ) حين تزعجهم الفوضي
يتمتمون حين يغتاظون
لم ارهم يصرخون او يرفعون اصواتهم كل شي يتهامسون فيه
حين يكونون غير مجزمين في الامر يقولون ( كان شي ) بمعني اظن او اعتقد او يمكن بلغتنا التي كل شيء فيها يمكن
وما اثرني كثيرا انهم لايكذبون ولا يتجملون
فحين انت بلغت الثامنه عشر من العمر عليك ان تستوعب كل شي وان تفهم كل شيء وان تتقبل كل شيء
فمنطقهم يقول لماذا اكذب من اجلك
وانت صاحب الشيء
لماذا اكذب وانا لست محتاج لشيء منك وحتي لو كنت محتاج لشيء وانت يجب ان تعطيني له
فانت نرجسي اذا لم تفعل
وهنا انت انسان غير ظبيعي
لا اكذب تعني ان لا اكذب لاي سبب في الوجود الا في حاله اللاوعي او الغير طبيعي
اين نحن من هذا

[esmat]

الاخت العزيزة ام قبس
اتمنى أن لا اكون قد ازعجتك
بهذه المشاركات
ولكن اذا هذا الحديث مواصلة للحديث السابق
عن المدينة التي تقطنين بها اتمنى أن يتواصل
في نفس البوست حتى لا يكون الحديث منقطع
حتى نستطيع استيعابه كاملاً فمن يقراء النص الان
يحس بأنه ناقص
مجرد اقتراح - لك ان ترفضيه او تقبليه وإذا كان
عليك ارسال رسالة للراقية مدنية - ومتابعين لما تكتبي

[ام قبس]

كنا ماشين انا وزوجي في نص المدينه
فجاء انتبهنا لي واحدة تنعل وتسب بالسويدي طبعا
وبدل نتهجم وكدا قعدنا في الواطه من الضحك
راجلي قال لي ياحليل حبوباتنا
قلت ليه حبوباتنا شنو والله يحليل اماتنا زاتهم
عارفين الحصل شنو
مرة عمرها حوالي 85 لو ما اكتر
راكبة عجله وانا وزوجي المحترم ماشين في الطريق غلط ومافهمنا الموضوع الا لمان لقينا الحاجة بتبرطم وتمتم
اللذيذ في الموضوع الطريق مفصول بي درابزين نص للمشاة ونص للعجلات ومجبرين اخوانكم لابطل نواصل في الغلط ونتهزاء او ننط من الدرابزين
وبعدها اخذنا نجتر الذكريات عن امهاتنا وحبوباتنا والفي عمر المرة دي طبعا لو حصلوا بيكونوا كيف والقعدة في العنقريب والمناوله واحيانا الخرف
للموضوع جوانب كثيرة اهمها سوال بيطرح نفسه البخليهم يصلوا للمرحلة دي شنو
يعني نحن ماعوزنهم يركبوا عجلات بس علي اقله مايمرضه ولا يتعبه في الكبر
نحنا بنحبهم وبنتمني يعيشوا معانا بي كل الصحة زالعافية
لانه الما عندوا كبير يروح يجيب كبير من السويد

[esmat]

التعب النفسي والارهاق والمجابدة شمال ويمين
لتربية العيال ترى الحبوبة تحمل هم احفادها وكل العائلة
وتطمئن عليهم صباح ومساء وتربي كبيرهم وصغيرهم
لهذا تراهم يكبرون (وهم صغار) بسرعة الصاروخ
شكراً ام قبس ياخ ذكرتيني حبوبتي الله ارحمها يارب

[ام قبس]

اخي esmat اشكرك بكثافة
دلني علي الطريقة فاقتراحك جميل ومنطقي
وانا مستجدة
شكرا ولن تكون مزعجا مادمت تصادق القلم

[moh_alnour]

الدول الأسكندنافية من أكثر دول العالم رفاهية و من أكثرها أرتفاع في مستوى دخل الفرد
لذلك تجد أن سكان تلك الدول يتمتعون بصحة جيدة و يعمرون لسنوات طويلة
و في أعتقادي أن ذلك نتاج الحياة السهلة التي يعيشونها و أيضا ً لبعدهم عن الضغوط النفسية و تعقيدات الحياة المختلفة
أضف إلى ذلك طبيعة الجو البارد و الذي يختلف كثيرا ً عن الطقس الحار و الذي يؤثر بدوره بصورة
كبيرة على مزاجية الفرد

[Yasir3050]

أم قبس انار الله قلبك نورتين عن السويد وأهل السويد .. هاتى المزيد مع شكرى

[ام قبس]

مشكور علي المداخله وعلي ثقافتك العاليه
فعلا الدول الاسكندنافية دخل الفرد عالي ولكن هل تعلم ان نسبه الضريبه عاليه جدا تكاد تقارب نصف المرتب وذلك لان الشخص الذي يعمل يصرف علي الذي لايعمل
وبالنسبه للجو ايضا اخي الثلج والجو البارد اغلبيه العام له مضارة وتوجد نسبه من الاصابه بالاكتائب كبيرة جدا
وترف العيش وسهولته تدخل في نفسوهم الملل الشديد
ولي بقيه في الحكاوي
بالمناسبه انا معك في فكرة البوست والواحد واسفة اني جوطة ليكم البيت

[محمد الجزولى]

ام قيس
لكى تحياتى
سرد واقعى وجميل لعالم نجهله تماما
لا ادرى رغم من ان هؤلاء الناس لا يدينون بالاسلام الا ان جل طباعهم الراقيه تعطيك الاحساس باننا اهل الاسلام بعيدين منه كل البعد
واصلى اختى واننا متابعين معك سبر اغوار هذا العالم البعيد عنا ..

[ام قبس]

مشكور اخي محمد الجزولي
حقيقي سبقتني في الكلام دا الكنت حاقوله في القصة الجايه
حقيقه تصرفاتهم اغلبها مفروض تكون مننا وللحكاوي بقية سوف انقلها احداث شخصية او مشاهدة ومعايشة
تابعني
ومره اخري اشكرك علي تلاقي الافكار

[esmat]

شكراً ام قبس واصل وانا من المتابعين
(ولا تلتفتي خلفك)

[ام قبس]

الموضوع دا لو عجبكم ادعموني فيه وانا مستعدة افتش وابحت لحدي ما اصل لي غرارة وفي مقولة اخري (ارارة)
حاجة عجيبه والله الناس ديل مابياكله اي شيء نحنا في السودان الشافع لو عاوز تكفاءة تديه كولا هنا الكولا ممنوعه للشافع خالص وبعد عمر التسعة سنين في احيان بسيطة جدا
لبن البدرة المنتج اغلبه من هولندا وسويسرا مابقربه جنبه
لازم لبن طازج ومدة سبع ايام بالكتير معلب بالكرتونه
مش شي يحير
وتعالوا لي منتجات ذي المعجون والصابون ابو ريحة قوية المغتربين بخمة لمان يجوا السودان طبعا ماعاوزة اسمي منتجات بي عينها بس حاجات عندنا نحنا ذي القشرة للبستعملها
هم لا ابدا مابقربوها
قربت سالت حاولت اعرف السر شنو كل شي صدقوني مابستعمله ماصحي
حتي الحلاوة للاطفال والشوكولا يوم واحد في الاسبوع اما السبت او الاحد يعني في يوم من ايام العطله
نظام دقيق
واهم شخص عندهم الطفل
والله كان شفتوهم بتعاملوا مع الاطفال كيف تحتاروا
ماعندهم لا ماتسال وكدا عيب ونهرة وضربه ودفرة
يقعدوا للطفل في الواطة ويتناقشه معاه لمان يقنعوة وفي احتمال يقنعهم
ولي رجعه مع حكاية قبس بتي والقرار

[ام قبس]

قبس بتي يوم 22 الشهر دا تتم تلاته سنين
والكلام الحاحكيه دا كان السنه الفاتت يعني عمرها كان سنتين
ذي ماقلت ليكم قبل دا الناس الهنا ديل بيعاملو الطفل علي اساس انه مفروض يعرف كل شي حتي ولو علي اجزاء بس مايمنع من المعرفة
يوم في المساء قبل ماتنوم كالعادة قلت ليها يلا ياقبوسه تعالي اشربي اللبن عشان تمشي تنومي بكرة عندك روضة قالت لي لا ماعوزة لبن عاوزة عصير
قلت ليها ماممكن عصير بالليل احسن اللبن
اتخيلوا ردت قالت لي شنو
ماما (( du enta bestamar jag bestamar))
الترجمة (( انت مابتقرري انا بقرر )) شفتو ليكم خلعة ذي دي اتهجمت جنس هجمه
وفضلت طول الليل صاحية افكر في (بستمر) قبس العمرها سنتين وحاجات تانية حامياني
بس الكويسه الناس دي عندها حريه الاعتراض والمناقشه والاقناع
حضرت كل ادواتي وكلماتي وتعبيراتي
والروضه جاك بلاء
وماصدقت الصباح صبح الا وانا اول من دخل علي المسوؤله
قربت تقول لي بسم الله مالك ياوليه
ودخلت ليك ليها في الموضوع مباشره قبس قالت كدا كدا كييف بس طفله عمرها سنتين هي التقرر وتعلموها لي بستمر وما بستمر
المرة اتفهمت عصبيتي وطوالي قالت لي نحنا ماقلنا ليها انت بتقرري المشرفة يتاعتها لمان تحدد ليهم شي يعملوه وواحد من الاطفال يعترض بتقول ليهم انت مابتقرر انا البقرر
وبتك لفحت الكلمة بي صمتها وقالتها ليك
وعلي طول نادت قبس وقالت ليها ياقبس ماما هي البتقرر كل شي خاص بيك لحدي ماتبقي كبيرة اوكي
ووافقت قبس علي الموضوع وقالت اوكي واصبحت انا اقرر والحمد لله

[moh_alnour]

اتخيلوا ردت قالت لي شنو ماما (( du enta bestamar jag bestamar))
الترجمة (( انت مابتقرري انا بقرر )) شفتو ليكم خلعة ذي دي اتهجمت جنس هجمه

ماشاء الله تبارك الله ربنا يحفظا و يخليها ليك
هم قوم أمنوا بأن الأطفال هم اللبنة الأساسية لبناء المجتمعات و هم الأساس الذي يجب الأهتمام به
بينما نحن لا نُراعي حتى لرغبات أبنائنا في المرحلة الثانوية و حريتهم في تحديد مستقبلهم الدراسي و المهني
و نقوم بتحديد الرغبات الدراسية لهم ضاربين بميولهم و رغباتهم و أهتماماتهم عرض الحائط
ونحن من قلنا
علموا النشأ علما ً يستبين به سُبل الحياة و قبل العلم أخلاقا

[esmat]

ماما (( du enta bestamar jag bestamar))

لهذا يكون الشخص لديهم لديه القدرة على اتخاذ القرارات
دون التردد في شيء كحالنا يتعلم كيف يتخذ قراراه ويعلم
انه لا أحد غير سيتحمل عواقبه حتى لو كان والده او والدته

اما عندنا فالحديث يخلف واتخاذ القرار ترى التردد في كل شيء
حتى في كلمة نكتبها في بعض الاحيان فما بالك في قرار مصيري

شكراً ام قبس ربنا احفظها واخليها ليك واجعلها من البارين بوالديها

واصلي

[ام قبس]

الاخوان محمد نور وesmat
اشكركم علي المتابعه
كل حرف كتبتوه حقيقة لاتقبل الرفض ودا السبب الاساسي اننا الواحده لو بقت مرة كبيرة متزوجة او رجل بي اسرته يجيه التردد في كل شيء
بس هم سبحان الله الطفل الصغير محدد هو عاوز شنو وبتين وكيفيه الوصول لي هدفه
عشان كده تلقاهم ماعندهم وقت بيضيع ساي
ربنا ينور دربنا جميعا