متشولق [الأرشيف] - منتديات ودمدني

مشاهدة النسخة كاملة : متشولق

عزيز عيسى

24-06-2009, 07:59 AM

متشولق شاب بسيط وهاديء الطبع..
يتجاوز بقليل السادس والعشرين من العمر..
يتمتع بأخلاق عالية ويتحمل الصبر عند المصائب..
لا يشكو لأحد حاله وهمومه إلا الله..
قطع تعليمه الدراسي نظراً لظروف خاصة به أجبرته على عدم المواصلة
حيث إكتفى بالمرحلة الثانوية العامة..
تخرج وإتجه يضرب في أرض الله الواسعة يبحث عن عمل يكفي لإعاشته
ويغطي إحتياجاته..
ومن حسن حظه أنه غير مسؤول عن إعالة أي شخص
لأنه وبكل بساطة لم يتزوج بعد..
لجأ متشولق الى قريبه عبدالمعين الذي يملك محلاً تجارياً (مغلق)
لبيع مواد البناء والحديد المسلح وطلب منه أن يساعده
في إيجاد عمل له ويوظفه عنده بالمحل..
وافق عبدالمعين على طلب قريبه متشولق وعينه بياع
في المحل براتب شهري يكفي حاجتة ويزيد..
ونظراً لأنه قريبه خصص له غرفة منعزلة وأسكنه معه في
منزله ليوفر عليه مبلغ الإيجار في مكان آخر..

في يوم من الأيام كان متشولق مستلقياً على ظهره في (عنقريبه) الهباب
الذي أهداه له قريبه عبدالمعين..
كان شارد بخياله يحلق في الأفق البعيد يتابع سرعة تحرك السحب في السماء
ويتأمل في قدرة الخالق وعظمته جلا وعلا على التحكم في هذا الكون
وكيف أن هذه السحب تسير في إتجاهات مختلفة لتصطدم ببعضها البعض
محدثة دوياً رعدياً عالياً تصحبه الصواعق وبعدها يهطل الغيث مدراراً على الأرض..
ويجري الماء على الوديان وينبت الزرع والأزهار والأشجار
وتخضر الأرض في كل مكان ويدر الضرع
ويعم الخير ويولد الفرح داخل الإنسان
وهو يردد سبحان الله.. سبحان الله العظيم..
ثم عرج بسرحانه على حسان الحي الذي يسكن فيه
وفكر في مشروع الزواج بأحداهن ويكمل نصف دينه
وبدأ في الأختيار الدقيق الصعب ويعدد محاسن هذه
و(يشنف) الأخرى (فتحية بت خليل الأزيرق جميلة ولونها فاتح
ورقبتها طويلة ذي الزرافة لكن متغرضمة ورافعة نخرتها في السماء..
لا لا دي ما بتتناسب معاي.. شن السماحة مع شنات الطبع..
وشامة بت السرة ود حمد بالرغم من إنها ما جميلة
لكن زينة مؤدبة ومتعلمة وأخلاقها طيبة.. وأعتقد إنها تتناسب معاي)..
وبينما كان متشولق سارحاً وغارقاً في تفكيره وخياله العجيب
فجأة سمع صوت جارتهم العجوز الحاجة نفيسة يقاطعه
هذه اللحظات السعيدة وتنادي عليه: (يا متشولق يا ولادة السجم إنت..
الشلاقة الـ .. إنت ياجني هوي.. سامعني
ولا أطرش.. الطرش اليقدد أضنيك!)..
نهض متشولق من عنقريبه الهباب عندما سمع الحاجة نفيسة
تنادي إسمه ولكنه لم ينتبه الى شتائمها وذهب ناحيتها
وخاطبها بكل أدب: نعم يا حاجة نفيسة إن شاء الله خير..
ولعل مافي عوجة؟..
شعرت الحاجة نفيسة بقليل من الحياء حينما أطلقت العنان للسانها
وشتمت متشولق مخاطبة له وما زال وجهها (المكرمش)
تظهر عليه علامات الزهج: كيفن عوجه مافي
الله يعوج خشمهم الوليدات ديل من الصباح طفشوا
ما لاقيه لي ولا واحد فيهم أرسلو يمشي لي السوق.. الله لا كسبهم..
ثم واصلت كلامها وغيرت طريقة لهجتها لأنها تحتاجه:
تعال يا عشاي عليك الله يا ولدي عايزه أكلفك هاك
مبلغ الخمسمائة جنيه دي أمشي السوق
وإشتري لي سكر وبن ودواء قهوة جنزبيل وهبهان وقرنفل وقرفة..
والباقي إشتري لي بيهو (جبنة) وهبابة ووقاية وقلاية للبن..
وكان فضل شيء إشتري لي (فناجيل).
عددتها له وقام متشولق بكتابتها على ورقة
وقال مازحا ًللحاجة نفيسة: لاحولا عايزه الحاجات دي كلها الشي عندك (قعده)؟
ثم تناول مبلغ الخمسمائة جنيه من الحاجة نفيسة وأدخلها في جزلانه
مع ورقة الأغراض وهو غير راض ولكن واجب الإحترام حتم عليه قبول المرسال..
ثم دخل غرفته وإستبدل العراقي الذي كان يلبسه بعراقي آخر
لبسه ووضع الطاقية على رأسه وخرج من البيت مسرعاً
قاصداً سوق المدينة.

عزيز عيسى

24-06-2009, 08:31 AM

عندما وصل متشولق السوق وفي أثناء سيره على الطريق
مر على محل لبيع لوحات زجاجية كانت معلقة على رفوف جميلة
ومرتبه ترتيباً أنيقاً لأن معظمها غالي الثمن..
رأي متشولق من على البعد إحدى اللوحات الزجاجية الجميلة
التي لفتت إنتباهه وإعجابه..
قام بتناولها من الرف ينظر إليها يتأملها ويتفحصها في إعجاب شديد
دون الإستئذان من صاحب المحل أو حتى السؤال عن ثمن شراءها.
وفي أثناء تفحصه وتقلبه لها فجأة (إنفلتت) اللوحة الزجاجية وإنزلقت من يده..
حاول الإسراع والإمساك بها ولكنها سقطت على الأرض
وتكسرت في شكل قطع صغيرة من الزجاج
وتناثرت في كل الإتجاهات..
ظل متشولق في مكانه واقفاً مشدوهاً ينظر الى الزجاج المتناثر حوله ..
لايدري ماذا يفعل أو كيف يتصرف مع الوضع..
وقد إتجهت أنظار كل من كان بداخل المحل
حوله تنظر إليه في تعجب.
وبينما هو في تلك اللحظات الحرجة
فإذا بصاحب المحل يصيح فيه
(يازول الشلاقة ليك شنو؟.. مالك بتهبش..
ليه ما بتسأل قبل ما تلمس..
هسع إنت عارف اللوحة دي ثمنها كم؟)..
طبعاً أخينا متشولق لايدري كم ثمنها..
ولكنه وقف حائراً صامتاً ولم يرد..
قال له صاحب المحل:
(يازول اللوحة دي كلفتني مبلغ خمسمائة جنيه..
وأنا عرضتها عايز أبيعها براس مالها علشان إتخلص منها..
ثم ثانياً يا إبن العم إنت ما بتعرف تقرأ؟..
ياخ كدي شوف الكلام المكتوب فوق دا بقول شنو؟:
رفع متشولق رأسه وهو يتصبب عرقاً ويتواري خجلاً من فعلته
وقرأ الكلام المكتوب:
(الرجاء عدم اللمس.. نرجو طلب المساعدة من صاحب المحل)..
وعندما وصل الى جملة:
(يتحمل الزبون قيمة اللوحة كاملاً في حالة تعرضها للكسر أو التلف)..
عرف إنه في ورطة..
لم يصدق متشولق وقع كلمات صاحب المحل على أذنيه
وبدأ يفكر في مبلغ الخمسمائة جنيه التي إستلمها من الحاجة نفيسة
وفي طريقة للتخلص من هذا المأزق الحرج..
أصر صاحب المحل بأن يدفع له متشولق سعر اللوحة كاملاً ودون نقصان..
رفض متشولق أن يدفع المبلغ بحجة أن اللوحة (دا ما سعرها)..
إندفع صاحب المحل ومسك بجلباب (عراقي) متشولق
وبدأ يصيح في وجهه بأعلى صوته وهو يقول:
(على بالحرام لازم تدفع لي حق اللوحة دي..
ولو ما دفعت لي الليلة على بالطلاق ما بخليك أبدا..
ولازم إرتكتب فيك رقبه!!)..
بدأ صاحب المحل يحرك يديه محاولاً الإمساك برقبة متشولق..
ومتشولق يصارع ويقابض في يد صاحب المحل و(يتزاوغ)
و (يكورك) يا جماعة ألحقوا فكوا مني الزول دا عايز يقتلني!..
تدخل أحدهم وإستطاع أن يبعد أيادي صاحب المحل
التي أوشكت أن تقترب من رقبة متشولق..
صاحب المحل مرة أخرى يصيح ويحلف في الناس:
عليكم الله ياجماعة خلوني أخنق الزول دا (أفطسو)..
وفي خلال دقائق إحتشد الناس حولهم..
وشعر متشولق بأنه دخل في (شكلة كاربة)
وعليه الرد بالهجوم المضاد..
دارت معركة كلامية حامية بين صاحب المحل ومتشولق
وصاحب المحل يحلف تارة بالحرام وتارة أخرى بالطلاق
ويتوعد على متشولق بالنيل منه ولازم يخنقو يفطسو..
باءت محاولات الناس المارة وتدخلهم لفض النزاع
وحل المشكلة بينهم بالفشل..
بعد قليل حضر أحد رجال الشرطة وأوقف (الشكلة)
بين الخصمين المتشاجرين.
ثم بدأ يستجوب صاحب المحل أولاً عن أسباب المشاجرة ..
ومن خلال متابعته لأقوال الخصمين عرف أن متشولق
قام بكسر احدى اللوحات وأنه لم يطلب الإذن من صاحب المحل
عندما أراد معاينتها ..
وللوصول لحل يرضي الطرفين بعيداً عن القانون
إقترح الشرطي على أن تكون الخسارة مناصفة بينهما
على أن يتحمل متشولق نصف المبلغ ويدفعه لصاحب المحل
مقابل سعر اللوحة التي كسرها كغرامة..
وافق صاحب المحل ومتشولق على الإقتراح..
وعندما أدخل متشولق يده في جيبه لإخراج جزلانه ليدفع
مبلغ الـ 250 جنيه من مبلغ الخمسمائة جنيه التي إستلمها
من الحاجة نفيسة لم يجد (جزلانه) معه
لأنه نسيه في البيت داخل جيب العراقي الذي إستبدله
بالعراقي الذي يلبسه وبدأ يقدم في الإعذار والتبريرات دون جدوي..
لم يوافق رجل الشرطة على الأعذار والتبريرات التي تقدم بها متشولق
وظن أن متشولق يريد أن (يستهبل) عليه
وتم إقتياده الى مركز الشرطة وحبسه على ذمة التحقيق.

عاطف عولي

24-06-2009, 10:08 AM

ود عيسي!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!

اخيرآ ياخي ما قطعت نفسنا وشحتفت روحنا في كواستك كرعينا بقوا الاتني لفت.

غايتو حملله علي السلامة

وادي صنقيرة قدام النقطة راجين المحقق ومنها ننجما شوية بعدما لقيناك

ابراهيم

24-06-2009, 10:42 AM

والله قصة شكلها نار منقد يا عزيز
وحاجة نفيسة دي بتاعة السندوشتات الفي القصة الفاتت ولا gl ؟ ;)

جاري القراءة

خالد 000 ابقرجة

24-06-2009, 11:21 AM

والله قصة شكلها نار منقد يا عزيز

وحاجة نفيسة دي بتاعة السندوشتات الفي القصة الفاتت ولا gl ؟ ;)

جاري القراءة

الحواجة عزيز 000

حجزت مكاني بين عولي وابراهيم 000 في تاكسي ( علي حسابهم ) 000
وستجدنا انتظارا 000 في القسم 000

عزيز عيسي 000
عدت بنفس الألق 000 الذي أتي للعالم 000 بأنفلونزا جديدة 000;)

حسام التنين

24-06-2009, 11:26 AM

جاري الانتظار مع عاطف عوني وابو قرجة امام باب القسم

مابخلونا نزوروا امكن محتاج حاجة

عزيز عيسى

24-06-2009, 11:33 AM

ود عيسي!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!
اخيرآ ياخي ما قطعت نفسنا وشحتفت روحنا في كواستك كرعينا بقوا الاتني لفت.

عاطف شمشرة،
كيفنك يا لذيذ يا رايق..
أهو عدنا والعود أحمد..
والحمد لله إتخلصت من معظم المشغوليات
ورجعت لأواصل معكم يا أحلى ناس في الدنيا.
وأعذرني على الغياب الطويل خلال الفترة الماضية..
وياخي عاجز عن الشكر وسؤالكم المتكرر عنا الذي
يدل على أصالة معدنكم وتفقدكم لأخوانكم.
وربنا ما يحرمنا منكم.
وسلامة كرعينك.
مع خالص تحياتي وتقديري.

عزيز عيسى

24-06-2009, 11:40 AM

والله قصة شكلها نار منقد يا عزيز
وحاجة نفيسة دي بتاعة السندوشتات الفي القصة الفاتت ولا gl ؟ ;)
جاري القراءة
برهوته العزيز،
ياخي بتاعة السندوتشات المدنكلة ديك إسمها أم العوض..
وبتاعة الزلابية اللذيذة إسمها (الفن)..
ويا حليل أم العوض ويا حليل الفن ويا حليل حلوفي الضاع
في مهب الريح ذاتو.
وحاجة نفيسة دي بتاعة شبك وشتائم فقط..
بس إن شاء الله ما تلاقيك وتلبس فيك شتيمة.

عاطف عولي

24-06-2009, 11:45 AM

عاطف شمشرة،

الشمشرة فتحنا ليه قهوة وكفتريا في شارع النفاج بس انت تعال هناك
كيفنك يا لذيذ يا رايق..

تمام بس فاقدنكم وابداعاتكم
أهو عدنا والعود أحمد..

انت شلاقة هو اخو اشراقة ما بقولوا شلاقة الكتل اشراقة ولا انا غلطان
والحمد لله إتخلصت من معظم المشغوليات
ورجعت لأواصل معكم يا أحلى ناس في الدنيا.
وأعذرني على الغياب الطويل خلال الفترة الماضية..
وياخي عاجز عن الشكر وسؤالكم المتكرر عنا الذي
يدل على أصالة معدنكم وتفقدكم لأخوانكم.
وربنا ما يحرمنا منكم.
وسلامة كرعينك.
مع خالص تحياتي وتقديري.

تستاهل السؤال يا خواجة هو انت شوية ولا شوية

عزيز عيسى

24-06-2009, 11:49 AM

الحواجة عزيز 000

حجزت مكاني بين عولي وابراهيم 000 في تاكسي ( علي حسابهم ) 000
وستجدنا انتظارا 000 في القسم 000

عزيز عيسي 000
عدت بنفس الألق 000 الذي أتي للعالم 000 بأنفلونزا جديدة 000;)

هلا بالحبيب خالد أبقرجة،

إنت راكب في التاكسي مع الجماعة ديل
وإنت ما عارفهم (معلمين) الله.
غايتو شيل شيلتك..
الحمد لله أنفلونزا الحلوف أقصد الخنازير بدأت
تتلاشى تتدريجيا في أمريكا لكنها شغالة
في العالم شغل نظيف.. غايتو ربك يستر.
ياخي سعدت جدا بحضورك الأنيق..
وبالله لو عندك قرجة أحتياطي عايزك تسلفها
لأخينا متشولق علشان يحمي بيها نفسه..
الزول دا تعب من العساكر كل مرة شابكنه
أرح أركب معانا.

عزيز عيسى

24-06-2009, 11:55 AM

جاري الانتظار مع عاطف عوني وابو قرجة امام باب القسم
مابخلونا نزوروا امكن محتاج حاجة
يا تنين إنت..
يازول نصيحة أخوية مني ليك
متشولق دا ذي المعاهو بسم الله
أبعدوا منه لأن وشه أصبح من
النوع المألوف لدى الشرطة.
تحاول تمشي تزوره أو تضمنه بيدخلوكم
معاهو الحراسة.. أصلو البوليس
اليومين دي دمهم فاير بيقبضوا
في الناس من طرف.

عزيز عيسى

24-06-2009, 11:59 AM

عارف يا عاطف النفاج دا لحدي الآن أصله ما دخلت عليه..
من زمن الزول الجميل والظريف جدا الله يطراه بالخير (ود المطامير)..
لكن حأجيكم بهناك وجهزوا لي قهوة بكر مظبطة..
لأني متقريف شديد..

عاطف عولي

24-06-2009, 12:09 PM

عارف يا عاطف النفاج دا لحدي الآن أصله ما دخلت عليه..
من زمن الزول الجميل والظريف جدا الله يطراه بالخير (ود المطامير)..
لكن حأجيكم بهناك وجهزوا لي قهوة بكر مظبطة..
لأني متقريف شديد..

قهوة بس غالي والطلب رخيص من هسع نبد ليك فيها بس لازم تشوف حفلة الخواجية

حسام التنين

24-06-2009, 12:12 PM

يا تنين إنت..
يازول نصيحة أخوية مني ليك
متشولق دا ذي المعاهو بسم الله
أبعدوا منه لأن وشه أصبح من
النوع المألوف لدى الشرطة.
تحاول تمشي تزوره أو تضمنه بيدخلوكم
معاهو الحراسة.. أصلو البوليس
اليومين دي دمهم فاير بيقبضوا
في الناس من طرف.

ياعزيز قلنا الزول طار في السماء وبين السحاب وبفكر في العرس
(مسكنا من يدنا البتوجعنا) قلنا نقيف معاه ونشوف التجهيزات
لاكن مادام المؤلف قال كده اكيد مابغالطك
انا انسحب وبتفرج من بعييييييد والماشفتو ماتعيدوا لي :d

حسام التنين

24-06-2009, 12:15 PM

قهوة بس غالي والطلب رخيص من هسع نبد ليك فيها بس لازم تشوف حفلة الخواجية

عالي والطلب رخيص بس انت بس تعال بي هناك واسال من التنين

معقولا مامشيت النفاج انت نص عمرك والنص التاني نصو ونص الربع

نص النص ضايع (الحق الفضل من عمرك في المعادلة اعلاه )

محمد حسين (المميز)

24-06-2009, 12:17 PM

متشولق .

:d :d :d

والله ياعمنا عزيز شولقتنا اقصد شوقتنا

أديــــــــــل كده ;)

صديق بلال

24-06-2009, 12:52 PM

حقيقة إنها قصة جميلة وجذابة لدرجة تجبرك على متابعتها لآخر قطرة.. زي ما يقولوا في الدعايات.. جرب وأشربها فحلاها في آخر قطرة.. ونحن في إنتظار الأكشن الثاني وإذا ماكملت القصة تراني أعمل أي شئ لأدخل القسم لأطمئن على بطل القصة...

أبوبكرحامد

24-06-2009, 01:40 PM

ياخواجة ده مرور تحية وسلام ، برجع ليك بى رواقة لأنو الساعة شارفت على الثانية فجراً ، بس فرحى بيك أجبرنى أقعد أكتب .

عاطف عولي

24-06-2009, 01:47 PM

عاطف عولي

24-06-2009, 01:50 PM

عالي والطلب رخيص بس انت بس تعال بي هناك واسال من التنين

معقولا مامشيت النفاج انت نص عمرك والنص التاني نصو ونص الربع

نص النص ضايع (الحق الفضل من عمرك في المعادلة اعلاه )

يا ولد انت!!!!!! سبحان الله في طبعك ياخ .

أنت اصلك كدي ولا صحيت من النوم لقيت نفسك كدي.

moh_alnour

24-06-2009, 03:59 PM

خالد 000 ابقرجة

24-06-2009, 07:40 PM

بكلم ليك الحكومة مش حقتنا؟

أضبط يا خواجة 000
طالما نحن داخلين علي القسم 000
بالله سجل معاك الإعتراف ده 000

صاحبك عاطف ده طلع من الجماعة ؟؟؟؟ ;) دي يا عولي عشان تبطل شولاق :p

حبيبنا عزيز 000
أنا جاي بس أقول ليك عافيين ليك ياخي 000
ما ترد علي مداخلاتنا 000
بس 000 شوف زولنا الشليق ده تم لينا حكايتو 000
قبال ما شلاقتو تلحقنا 000 أمات طه 000

عاطف عولي

24-06-2009, 08:00 PM

:d :d :d

والله ياعمنا عزيز شولقتنا اقصد شوقتنا

أديــــــــــل كده ;)

يا عزيز متشولق دا فيه ملامح من محمد حسين ( المميز)

عاطف عولي

24-06-2009, 08:05 PM

أضبط يا خواجة 000
طالما نحن داخلين علي القسم 000
بالله سجل معاك الإعتراف ده 000

انا يا ود ابو قرجة قاصد ليك حكومتنا العندك في البيت هسع اكلما ترسلك للخضرة

صاحبك عاطف ده طلع من الجماعة ؟؟؟؟ ;) دي يا عولي عشان تبطل شولاق :p

انت محوراتي كبير يا ابو قرجة الحكومة الاربع تاشرية ولا كمان ما معترف بيها

حبيبنا عزيز 000
أنا جاي بس أقول ليك عافيين ليك ياخي 000
ما ترد علي مداخلاتنا 000
بس 000 شوف زولنا الشليق ده تم لينا حكايتو 000
قبال ما شلاقتو تلحقنا 000 أمات طه 000

بصريح العبارة الليلة الا تبيت برا البيت الجماعة راجنك تجيب الخضرة وتورقا وتفركا وما تاكلا

عاطف عولي

24-06-2009, 08:07 PM

أبوريلان

24-06-2009, 09:26 PM

عبدالرحمن مدثر

24-06-2009, 09:27 PM

الخواجة عزيز

تسجيل حضور

ومتشعلقين ...

وفى انتظار متشولق وهو يبحث عن مخرج

حسام التنين

24-06-2009, 09:36 PM

يا ولد انت!!!!!! سبحان الله في طبعك ياخ .

أنت اصلك كدي ولا صحيت من النوم لقيت نفسك كدي.

الاب العزيز :-

نحن النفاجون ننشر البهجة في كل مكان ..

ماقصدنا نقلل من احترام الناس لكن نرسم الابتسامة ع شفاه الكل

(حتي متشولق) رغم اننا جداد وكده في المنتدي لكن مرحب بيك في النفاج

ابراهيم

24-06-2009, 09:59 PM

وبالله لو عندك قرجة أحتياطي عايزك تسلفها
لأخينا متشولق علشان يحمي بيها نفسه..
الزول دا تعب من العساكر كل مرة شابكنه
أرح أركب معانا.

والله يا عزيز من الصدف العجيبة إنو متشولق دة
90 % تلش مع اختلاف 10% من التفاصيل
من هذا المنطلق انا اكتر واحد excited

اوف سايد:
القرجة بتاعة خالد دي من غير تشديد القاف:D

صلاح ودالطاهر

24-06-2009, 10:15 PM

عارف يا عاطف النفاج دا لحدي الآن أصله ما دخلت عليه..
من زمن الزول الجميل والظريف جدا الله يطراه بالخير (ود المطامير)..
لكن حأجيكم بهناك وجهزوا لي قهوة بكر مظبطة..
لأني متقريف شديد..

اها كان عائز فيزا رسل لعمده في الخاص عشان اصدق ليك الزياره ياخي وينك وين ايام مشتاقين عديل يا عزيز اللذيذ اها ما ناوي تعمله تاني ونتقابل هناك ويا مرنجان جاك بلا ايام ليها ايقاع

حاتم مرزوق

25-06-2009, 01:04 AM

العزيز عزيز

ما اشلق زولك ويا ما في السجن مشاليق.

منتظيرن موقف حاجة نفيسة الظاهر حترجعو لي قسم الشرطة تاني.

عزيز عيسى

25-06-2009, 07:49 AM

في ذلك المساء إتصل متشولق بقريبه عبدالمعين
وأفاده بما حصل له وطلب منه الحضور لضمانته..
عبدالمعين رد على متشولق وقال له:
(يازول إنت ماك نصيح؟..
الدنيا ليل ويا دوب دي دخلتي من المحل..
مابكذب عليك أتلتل رقبتي وأقول ليك بيجيك..
هسع إنت بيت في الحراسة وبكرة ربك يفرجها)..
حاول متشولق أن يقنع قريبه عبدالمعين
ولكنه لم يفلح في أقناعه للحضور لضمانته..
أخيراً طلب منه أن يسلفه مبلغ 250 جنيه
ويحضر لمركز الشرطة لضمانته وفك سبيله عند الصباح..
وافق قريبه عبدالمعين على الحضور في الصباح
ومعه المبلغ المطلوب..
في صباح اليوم التالي حضر عبدالمعين قريب متشولق
وقام بدفع مبلغ الـ 250 جنيه كغرامة وتم الإفراج عن متشولق
وإصطحبه قريبه عبدالمعين وعادا الى المنزل..
بمجرد عودة متشولق وقريبه عبدالمعين الى المنزل
وجد الحاجة نفيسة في إنتظاره عند مدخل الباب
وكأنها أحست بمجيئه وبدأت تصيح فيه:
يا حرامي يا ود الـ... أمبارح رسلتك السوق بقروشي أكلتها؟
الليلة وحات شيخي أبوشرا لو ما أديتني قريشاتي إلا أكسر
راسك الغليد دا (بالشعبة) - بكسر الشين -
وهي عبارة عن قطعة عود..
وأخلي شفع الفريق يطقعوك بالحجار ويعملوا ليك (سيرا)..
تناولت الحاجة نفيسة (الشعبة) ومشت ناحية متشولق لتضربه بها..
ولكن عبدالمعين دخل حجاز ومنع الحاجة نفيسة من الوصول
الى متشولق..
رد متشولق: يا وليه ما تستهدي بالله..
هسع إنتي عندك قدرة للشكل..
قروشك في موجودة..
كدي خليني أدخل جوه البيت وأجيبهم ليك..
دخل متشولق المنزل ورفع العراقي ووجد جزلانه
وأخرج منه مبلغ الخمسمائة جنيه وسلمها للحاجة نفيسة..
الحاجة نفيسة في خجل:
والله متعسفة يا ولدي وأمسحها لي في وشي..
ظنيتك أكلتهن.. إستغفر الله العظيم..
العجلة من الشيطان يا ولدي ظلمتك..
أها ما قلت لي في شنو.. إن شاء الله حصل خير.؟

بعد مرور يومين قرر متشولق الذهاب الى ميدان بالقرب من منزلهم
لمشاهدة تمرين في كرة القدم..
وبمجرد وصول متشولق الى الميدان شاهد الكرة تطير في الهواء
وهي تتجه ناحيته كانت من ركلة أو (شوته) قوية سددها أحد اللاعبين
في إتجاه المرمى ولكنها ضلت طريقها الى خارج الملعب.
جرى متشولق باقصى سرعته وإلتقط الكرة من على الأرض قبل كل الناس
ثم أمسك بطرف العراقي و(شات) الكرة شوته قوية
ليعيدها الى داخل الملعب..
وفي أثناء (شوته) إصطدمت الكرة بزجاج سيارة أحد المشاهدين
أدت الى تهشم زجاج السيارة الخلفي..
شاهد صاحب السيارة ما حدث لسيارته وبدأ يصيح في متشولق
(يا زول هوي إنت عميان ما بتشوف.. العمى اليقدد ليك عيونك..
هسع كسرت لي قزاز عربيتي..
والله العظيم الليلة لو بقيت نبي ما بخليك إلا تغرم لي القزاز)..
دخل متشولق في إحراج شديد وحاول يقدم الأعذار لصاحب السيارة
الذي رفض رفضاً باتاً أن يقبل بأي عذر..
وحلف الغرامة لازم تدفع..
لم يجد متشولق حيلة للخروج من هذا المأزق الذي وقع فيه..
إزداد صياح صاحب السيارة وصراخه في وجه متشولق
وهجم على متشولق ليأخذ حقه ضرباً..
حصل تشابك بالأيادي..
وتدخل جمهور من مشاهدي المباراة لحل النزاع
ولم يفلحوا أيضاً..
أخيراً حضر رجل الشرطة وقاد متشولق الى المركز
وتم حبسه على ذمة التحقيق ودفع الغرامة.

عزيز عيسى

25-06-2009, 09:38 AM

طبعاً لم يملك متشولق مبلغ الغرامة ولكنه هذه المرة
أحس بالحرج ولم يقم بإزعاج قريبه عبدالمعين
والإتصال به ليستلف منه مبلغاً آخراً أو يطلب منه الحضور
لدفع مبلغ الغرامة لإطلاق سراحه من الحبس..
وفضل الإنتظار في الحبس حتى اليوم التاني حيث إتصل
بقريبه عبدالمعين وحكى له القصة..
في البداية أبدى عبدالمعين تذمره من قريبه متشولق
وحاول التنصل منه ولكن وضع قريبه متشولق جعله يشفق عليه
ولابد من مساعدته خوفاً من كلام الأقارب والناس (قالوا.. وقالوا)..
حضر في الصباح الباكر عند مركز الشرطة ودفع مبلغ الغرامة
وتم الإفراج عن متشولق وعادا سوياً الى المنزل.

بعد إسبوع من المصائب التي حدثت حمل متشولق كرسي وخرج
من منزله ووضعه بالقرب من مدخل المنزل وجلس عليه يراقب
حركة الناس في الطريق..
أحد أبناء الجيران إشترى دراجة (عجلة) من نوع رالي وإلتف
حوله أبناء الجيران يباركون له العجلة الجديدة..
نهض متشولق من جلسته على الكرسي وذهب ليبارك
هو أيضاً لصاحب الدراجة..
طلب متشولق من صاحب العجلة بأن يعطيه (سحبة) لكي
يجرب بها العجلة الدبل..
وافق صاحب العجلة والفرحة تملأ عينه على طلب
متشولق وسلمه العجلة..

ركب متشوق العجلة وإنطلق بها يقودها وراح (يبدل)
وهو يغدو مسرعاً بين زقاقات الحي..
وبينما هو مسرعا فجأة خرج أحد المشاة من بين الزقاقات وإصطدمه
متشولق بالدراجة أدى الى كسر في الساق ونزيف في الأنف
و(فلقة) في وسط رأس الشخص المصدوم..
كان المصدوم يبكي و(يكورك) بأعلى صوته من شدة الألم..
في خلال دقائق معدودة إلتف الناس حول متشولق وفجأة
صاح فيه أحدهم وهو في حالة من الغضب (يا زول الله ينعل....
الشفقة ليك شنو طاير بسرعة في شوارع ضيقة ذي دي..
كمان ما بتشوف..) وحاول الهجوم على متشولق لضربه
لكن جموع الناس دخلت (حجازين) ومنعوه من الوصول الى متشولق
للثأر منه.. وبدأ يصيح مرة أخرى ويقول للناس:
(عليكم الله فكوني خلوني أكسر رقبة المخلوق دا)..
في هذه اللحظة حضر صاحب العجلة وإستلم عجلته وقام
بتعديل الميزان (المفتول) وحمد الله على سلامة عجلته
ثم ركبها وعاد الى منزله.
أسعف المصاب بإرساله الى المستشفى وتم إعتقال متشولق
وإقتياده الى مركز الشرطة وقام الضابط المسؤول بالتحقيق
مع متشولق ثم أمر بحبسه..

وفي أثناء دخول متشولق غرفة الحبس حضر أحد الضباط وقال لمتشولق:
إنت يازول مش كنت هنا قبل أيام وأطلقنا سراحك بضمانة؟..
إنت الجابك تاني شنو؟
رد متشولق قائلا: والله دي قصة طويلة يا حضرة الضابط..
غايتو ربنا يستر! ثم حكي للضابط ما حدث له بعد
خروجه من الحبس مباشرة..

في صباح اليوم التالي سمع عبدالمعين بقصة
متشولق وإنه محبوس في السجن..
حضر عبدالمعين ودفع مبلغ مليون جنيه كغرامة
لعلاج الشخص المصاب وتم الإفراج عن متشولق.
تراكمت الديون التي إستلفها متشولق من قريبه عبدالمعين
وشعر بحرج في عدم إستطاعته تسديدها له..
ومن خلال نظراته فهم عبدالمعين بأن قريبه متشولق
لن يستطيع تسديد الديون التي تراكمت عليه في الوقت الحاضر
وقال لقريبه متشولق: يازول ما تقلق هسع أنسى موضوع الديون
دي خالص ووقت ما ربك يفرجها عليك ممكن تسددها..
بعدين ما تنسى أنحنا أهل..
بدأ متشولق يلعن حظه العاثر وظن أن النحس
يحاصره من كل الجوانب..
لذلك قرر أن يترك مدينته الصغيرة ويهجرها الى العاصمة.

عزيز عيسى

25-06-2009, 09:53 AM

تستاهل السؤال يا خواجة هو انت شوية ولا شوية
تسلم وتسلم مارنجان الجابتك..

عزيز عيسى

25-06-2009, 09:55 AM

قهوة بس غالي والطلب رخيص من هسع نبد ليك فيها بس لازم تشوف حفلة الخواجية
طيب يالخزين بس أخذ لي جمة شوية وأجيكم
بهناك النشوف حفلة بتنا الخواجية.

عزيز عيسى

25-06-2009, 10:00 AM

ياعزيز قلنا الزول طار في السماء وبين السحاب وبفكر في العرس
(مسكنا من يدنا البتوجعنا) قلنا نقيف معاه ونشوف التجهيزات
لاكن مادام المؤلف قال كده اكيد مابغالطك
انا انسحب وبتفرج من بعييييييد والماشفتو ماتعيدوا لي :d
غايتو يا أخوي التنين صاحبنا متشولق دا شلاقته
كل مرة رامياهو في السجن عرس شنو تاني
البفكر فيهو.. وحرام عليك تقيف بعيد وتخلوه
ياكل نارو لوحده.. هسع الزول دا كان عرس
ما كان حصل ليهو الحصل دا كله.

عزيز عيسى

25-06-2009, 10:07 AM

:d :d :d

والله ياعمنا عزيز شولقتنا اقصد شوقتنا

أديــــــــــل كده ;)
إنت يا محمد حسين متشولق دا ما صحبك..
ليه ما بتقيف معاه في محنته؟
أوع تتغابى فيه العرفة.
كدي أمشي رسل ليه ألف ولا ألفين ريال
خليه يسدد ديونه على الأقل.
علشان يقول ليك:
بارك الله في رجل فرج كربة عن أخيه.

عزيز عيسى

25-06-2009, 10:11 AM

حقيقة إنها قصة جميلة وجذابة لدرجة تجبرك على متابعتها لآخر قطرة.. زي ما يقولوا في الدعايات.. جرب وأشربها فحلاها في آخر قطرة.. ونحن في إنتظار الأكشن الثاني وإذا ما ماكملت القصة تراني أعمل أي شئ لأدخل القسم لأطمئن على بطل القصة...

الاخ صديق بلال مرحب بعودتك وين الزمن دا كله ياخ..
وبالله أدعو لبطل القصة أخينا متشولق بالسلامة
وحسن الخاتمة.. وربنا يعدلها عليه.
أسعدني مرورك العطر..
مع خالص تحياتي.

عزيز عيسى

25-06-2009, 10:15 AM

ياخواجة ده مرور تحية وسلام ، برجع ليك بى رواقة لأنو الساعة شارفت على الثانية فجراً ، بس فرحى بيك أجبرنى أقعد أكتب .

أووه أخونا الجميل ود المأذون..
ياخي الشوق بحر..
سعدت جدا بطلتك البهية..
أمشي نوم ولما تصحي الصباح
تلقاني في إنتظارك قبل
ما تشرب شاي الصباح.

عزيز عيسى

25-06-2009, 10:37 AM

الخواجة عزيز اللذيذ حمدا ً لله على سلامة الطلة و الله المنتدى نور بوجودك
أها يا خواجة زولك دا في قسم مارنجان و لا في الأوسط عشان نزوروا
كمان كان بقى في الشرقي بنشوف ليهو طريقة غدا و كمان بنضمنوا ليك عشان الحاجة ديك بتكون متقريفة زيك للقهوة
يا خواجة إن شاء الله المرة دي تكون أخر أيام الغياب و ياريت تجيب معاك الزول المسخوت ود الماحي
والله يا ود الجاك ذكرتني زمان لما كنا في مارنجان كنا بنجلس
مجموعة نتونس في حته عالية بالقرب من محل الترزية و(التعاون)
وبنساهر لوقت متأخر من الليل خاصة أيام العطلة المدرسية..
ولما تفوت الساعة 12 كل مرة وبدون ما نشعر نلقى ليك (لاندروبل)
مليان عساكر بوليس واقف قدامنا وينزل ليك واحد عسكري عمنا
ما بتذكر كان أمباشى ولا شاويش أسأل عنه أخونا عاطف عولي
يمكن يتذكر إسمه غايتو عمك دا اصلو ما بتفاهم.. وأول كلمة
بنطقها طوالي يقول للواحد (أركب) علشان كدا الجماعة سموه
(أركب).. يأخذك على قسم مارنجان حتى يستجوبنا ويقول لينا
إنتو المقعدكم شنو في وقت متأخر ذي دا من الليل في مكان
ذي دا.. مع العلم بيعرفنا وبيعرف أهلنا كلنا واحد واحد..
غايتو العساكر ديل غتيتين جنس غتاتة.
لكن أيام كانت جميلة..

عزيز عيسى

25-06-2009, 10:43 AM

أضبط يا خواجة 000
طالما نحن داخلين علي القسم 000
بالله سجل معاك الإعتراف ده 000

صاحبك عاطف ده طلع من الجماعة ؟؟؟؟ ;) دي يا عولي عشان تبطل شولاق :p

مالو بقى يتكلم في السياسة؟
غايتو يشيل شيلتو مع الحيكومة
ولو باكر ما سمعت منه خبر
أكيد ناس الحيكومة مسكو..

عزيز عيسى

25-06-2009, 10:46 AM

يا عزيز متشولق دا فيه ملامح من محمد حسين ( المميز)
متشولق دا ما ياهو ذاااااتو محمد حسين (المميز)
إنت ما ما لاحظ (متشولق) (مميز).

عزيز عيسى

25-06-2009, 11:03 AM

الخواجة عزيز عيسي شخشياً

مابصدق
يازول الحكاية شنو!!
طولـت الغيبة شـــديد المـرة
حلوفك أكان الإنفلونزا خلته السيرفر ما خلاه
يا خوي البركة في الموجود وأكيد متشولق سوف تكون
من أروع القصص طالما أنها من تأليف وسرد الخواجة عزيز،
أنا سائق التاكس زاتو أها قلت لي عاطف عولي وأبو قرجة
عدمانين الله يعني أمسك في ود المزاد لو طلع كوكب ،
ما عندك مشكلة مشوارهم للقصة مجاني
عشان شدتها وعشان خاطر
عشوشة .

ياسر أبوريلان ليك وحشة يا راجل يا جميل..
الغيبة كانت بسبب تخرج البنت وهات يا تجهيزات
وسفر للجامعة.. حتى ودالماحي إبنه تخرج مع
إبنتي في نفس اليوم.. يعني عصفورين بحجر
واحد.. والحمد لله أتخلصنا من الغلبة وجيت راجع..
تصدق متشولق عنده موقف برضو مع سائق تاكسي
في القصة سيأتي ذكره فيما بعد..
والجماعة عاطف عولي وأبقرجة ديل ناس متشولقين
ساكت ومتأكد منهم معلمين الله.. لو ما دفعوا ليك
تمشي بيهم على القسم طوالي ما ياكلوك أوانطة.
ديل تبع ريا وسكينة!!
وعشوشة دي إلا نكلم ليها مدنية أم جمال تفتش
لينا عليها وتجيب لينا أخبارها لأنها واحشانا كثير..
البنت دي من عملت العملية الجراحية إختفت خالص..
يا ربي بتكون مشت تأخذ كورس راندوق ولا لاوندي.

عزيز عيسى

25-06-2009, 11:06 AM

الخواجة عزيز

تسجيل حضور

ومتشعلقين ...

وفى انتظار متشولق وهو يبحث عن مخرج

يازول متشعلق وين؟
بس أعمل حسابك البوليز
ما يشوفك.. حيختك حراسة
مع متشولق وتبقى إنت ذاتك
في الطريقة التخارجك.
أستاذنا القامة عبدالرحمن مدثر
سعدت جدا بحضورك الزاهي
ودي وتقديري

عزيز عيسى

25-06-2009, 11:17 AM

والله يا عزيز من الصدف العجيبة إنو متشولق دة
90 % تلش مع اختلاف 10% من التفاصيل
من هذا المنطلق انا اكتر واحد excited

اوف سايد:
القرجة بتاعة خالد دي من غير تشديد القاف:d

يا تلش ضحكتني لمان قربت إنشرق..
لو 90% معنى كدا دا إنت ذاتك..
شايف كيف شميتك؟
إنت قالوا ليك براك والله الشلاقة
محمدانا كلنا..
تتذكر قبل كدا حكيت ليك عن يدي
عليها جنس شلاقة.. كل ما أدخل
المطبخ أو أجي ماشي بجمب
الكاونتر ساي تلقى يدي براها خطبت ليها
حاجة كسرتها.. وبعد داك نقعد في
الخرخرة وأقول دي أصلها كانت
مكسورة بس عايزه سبب تنكسر..
شفت العذر القبيح كيف؟..
دا غير كذا شلاقة ثانية
يازول مناظر بس خليها ساي.

عزيز عيسى

25-06-2009, 12:00 PM

حمل متشولق أمتعته وذهب الى محطة الأتوبيس وفي صحبته
قريبه عبدالمعين لوداعه..
دفع عبدالمعين سعر تذكرة السفر على إحدى البصات المتجهة
الى الخرتوم وسلمها الى متشولق..
ركب متشولق الباص وجلس على المقعد المخصص له وهو
يتنفس الصعداء وسعيد بأنه قد يغادر بعد قليل
مدينته الصغيرة ويتخلص من كل المتاعب التي حلت به..
وكان يحدث نفسه ويقول: على بالحرام البلد دي مفارقها طب..
وحرم ثاني برجلي دي ما أعتب عليها..
تحرك الباص في موعده المحدد وعندما وصل عند حدود الخرتوم
أوقف رجال الأمن الباص بغرض تفتيش الركاب
وهو أجراء أمني إتبعته الحكومات التي مرت على السودان
منذ أيام المرتزقة في عهد حكم النميري..
نزل الركاب من الباص وبدأ رجال الأمن يدققون في هويات
الركاب واحدا تلو الآخر الى أن جاء دور متشولق..
سأله رجل الأمن: (يا إبن العم لو سمحت البطاقة الشخصية بتاعتك..
ممكن تدينا ليها نشوفها؟.. عايزين بس نتأكد من شخصيتك)..
أدخل متشولق يده في جيبه بكل ثقة وإطمئنان لإخراج (جزلانه)
ولكنه لم يجده.. أدخل يده في جيبه الآخر أيضا لم يتحصل عليه..
بدأ يتصبب عرقا وهو في حالة هستيرية وهو يسب في جزلانه
أخيرا تذكر أنه نسي (جزلانه) في البيت..
ثم بدأ في توضيح الأعذار والمبررات وأنه كان
على عجلة من أمره للسفر.
لم يصدق رجل الأمن ما تقدم به متشولق من أعذار..
وقال له: (كيف بس دي تجي..
يا خي إنت مسافر ومفروض أول حاجة تعملها إنك تجهز
أوراقك اللي بتثبت شخصيتك..
لا لا دي مخالفة.. وإنت أكيد زول بلطجي عايز تغشنا..
إحتمال تكون مرتزقه مين عارف..
لا لازم تنزل تمشي معانا المركز للتحقيق)..
لم يوفق متشولق في التبريرات التي قدمها لإخلاء سبيله..
رغم تدخل الركاب إلا أن رجل الأمن أصر علي رأيه وتم إنزال
متشولق وأمتعته من الباص وقادوه الى مركز الشرطة..
سجل الشرطي مخالفة وإهمال ضد متشولق بعدم حمل
البطاقة الشخصة وتم وضعه في الحبس.
طلب متشولق من ضابط الشرطة الإتصال بأحد أقاربه
وأعطاه رقم جوال قريبه عبدالمعين ..
إتصل أحد رجال الشرطة هاتفيا وأخبر عبدالمعين قريب متشولق..
رد عبدالمعين ثاااااااني الزول دا عملها؟
يا دي المصيبة!..يمين الزول دا ملازمو شيطان
ولا عاملين ليهو عمل.. اللهم يطولك يا روح..
طيب شكرا أنا من دربي دا جاي عليكم..
ركب عبدالمعين على آخر بص متجه الى الخرتوم حاملا
معه (الجزلان) والبطاقة الشخصية لمتشولق
لكن هذه المرة عليه أن يدفع مبلغ خمسمائة جنيه غرامة
مقابل المخالفة التي إرتكبها متشولق من جراء عدم حمله
للبطاقة الشخصية الخاصة به..
نجح عبدالمعين في إطلاق سراح متشولق ثم سلمه (جزلانه)
وأوصاه بالمحافظة عليه ورجع عائدا الى مدينته الصغيرة
على إحدى اللواري التجارية المحملة بزيوت الطعام..
وواصل متشولق رحلته الى داخل الخرتوم على أحدى اللواري
التجارية التي تحمل الفحم.
وصل متشولق الى الخرتوم بعد مجهود وعناء طويل.
نظرا لوجود ازدحام شديد في الخرتوم وصعوبة التنقل وشح
في المواصلات خلال تلك اللحظة من الليل..
جاءت حافلة صغيرة وبدأ الركاب الذين طال إنتظارهم في
الركوض ناحية الحافلة..
دخل متشولق في (مدافرة) مع الركاب للحصول على مقعد
في الحافلة المتجهة الى أم درمان ولكن أمتعته التي كان يحملها
معه إعاقته ولم يفلح في الحصول على مقعد داخل الحافلة..
أضطر الى النزول مطأطأ رأسه وهو يلعن تارة مدينته التي أتى
منها وتارة أخرى اليوم الذي أتي به الى الخرتوم..
وفي النهاية إضطر متشولق أن يستوقف سيارة تاكسي لتقله
الى المنطقة حيث يسكن أقاربه.
عندما وصل متشولق الى أم درمان أدخل يده في جيبه لإخراج (جزلانه)
ليدفع أجرة التاكسي.. ولكنه لم يحصل عليه..
رمي الشنط التي كان يحملها وبدأ يبحث علي (الجزلان)
في كل مكان ولكنه لم يجده لأن أحدهم قام (بنشل جزلانه)
عندما دخل في مدافرة زحمة المواصلات..
بدأ متشولق في تقديم الأعذار لصاحب التاكسي..
وأنه فقد (جزلانه) ولم يستطع الحصول عليه..
طلب متشولق من صاحب التاكسي بأن ينتظر لحظة
حتى يدق على باب منزل أقاربه ويخرج أحدهم ليدفع له مبلغ أجرة التاكسي..
راح يطرق على الباب عدة مرات بشدة لفترة من الزمن جعلت صاحب
التاكسي يتضايق من أمر متشولق..
ولسوء حظ متشولق لم يكن في المنزل أي احد من
أقاربه في ذلك اليوم.
حاول متشولق أن يستكشف الأمر من فوق حائط المنزل
ربما يكون أحدهم نائما ويوقظه..
ولكن فجأة هجم عليه أحد (كلاب) المنزل وبدأ ينبح و(يهوهو)
مما جعله يضطر الى التراجع..
عاد متشولق الى صاحب التاكسي وأخبره بعدم وجود أي من
أقاربه بالمنزل وحاول يقدم بعض الأعذار مرة أخرى
على أن يلتقي به في الصباح في مكان يحدده صاحب التاكسي
ويسلمه مبلغ الأجرة.
لم يقبل صاحب التاكسي الأعذار والمبررات التي قدمها متشولق
وظن أنه يتحايل عليه ليتركه ويذهب في حاله..
أصر صاحب التاكسي على أن يدفع له متشولق الاجرة كاملة
أو يذهب معه الى مركز الشرطة.
حدثت بينهما مشاجرة وتبادل الإساءات وبعدها مشابكة بالأيدي..
فجأة حضرت سيارة رجال الشرطة من بين الظلام وشاهدوا من
على البعد المشابكة بالأيدي بين سائق السيارة ومتشولق..
نزل رجال الشرطة من السيارة وفضوا النزاع بين الإثنين وبدؤا
في التحقيق عن ملابسات (الشكلة) وسوء التفاهم..
قال صاحب التاكسي لرجل الشرطة بأن هذا الرجل بلطجي
أراد أن يذهب دون أن يدفع الأجرة..
قام رجل الشرطة بإعتقال متشولق وإقتادوه الى مركز الشرطة
وتم حبسه على ذمة التحقيق..

عوض الكريم الخواض

25-06-2009, 01:47 PM

يآخى دا شليق شلاقة ...
ومنحوس جنس نحس ...

بركة الجيت يا خواجةعزيز

محمد حسين (المميز)

25-06-2009, 01:48 PM

يا عزيز متشولق دا فيه ملامح من محمد حسين ( المميز)

:eek: :eek: :eek:

محمد حسين (المميز)

25-06-2009, 02:11 PM

إنت يا محمد حسين متشولق دا ما صحبك..
ليه ما بتقيف معاه في محنته؟
أوع تتغابى فيه العرفة.
كدي أمشي رسل ليه ألف ولا ألفين ريال
خليه يسدد ديونه على الأقل.
علشان يقول ليك:
بارك الله في رجل فرج كربة عن أخيه.

هي ده لكن يقيفو معاهو كيفن

ده متشولق شلاقه تشلق :p

متشولق دا ما ياهو ذاااااتو محمد حسين (المميز)
إنت ما ما لاحظ (متشولق) (مميز).

طيب يا عبدالمعين :D

لذلك قرر أن يترك مدينته الصغيرة ويهجرها الى العاصمة

ههههه :D ههههه :D ههههه

والله يا الخرطوم جاك بلاااا :p :D :p

عزيز عيسى

26-06-2009, 06:28 AM

في صباح اليوم التالي لم يتصل متشولق بأقاربه في أم درمان
فضل أن يظل داخل السجن ليتفادى الشر والنحس الذي ظل
يلازمه لفترة من الزمن الى أن أتي يوم المحكمة..
في يوم المحكمة بدأ محامي الدفاع عن سائق التاكسي
في سرد ملابسات القضية..
لم تمر لحظات حتى أصدر القاضي حكمة بالسجن
شهر على متشولق..
عندما سمع متشولق صدور الحكم عليه قال:
الحمد لله المرة دي طلعت سجن بدون غرامة..
وطالما إتخلصت من جزلاني السبب لي المشاكل دي كلها
تاني مش مهم إن شاء الله تحكم على بالمؤبد أو حتى إعدام.
في أثناء وجود متشولق في السجن كان يزوره كل أسبوع
شيخ متدين يتحدث إليه وأخبره بأن كل الذي حدث إليه
كان مجرد صدفة.. ونصحه بالصلاة وقراءة آية الكرسي
والتسبيح ثم التعوذ بإسم الله في كل مرة..
أصبح متشولق من المصلين المتلزمين يداوم على الصلاوات
الخمسة في مسجد السجن.. يقرأ القرآن ويتعوذ
بإستمرار كما نصحه الشيخ.
.
بعد إكمال متشولق مدة السجن تم الإفراج عنه..
حضر عبدالمعين لإستقباله وذهب به الى المنزل
وبعد إسبوع عاد متشولق الى عمله في المحل حيث
لاحظ تغير في أحواله بعد تقربه بالصلاة الى الله سبحانه
وتعالى وأن الكوارث التي كانت تحدث إليه قد زالت عنه
تماما وأصبح كل شيء طبيعي..
في يوم من الأيام وبينما هو يقوم بمساعدة أحد الزبائن
أراد الزبون دفع قيمة المواد التي قام بشرائها
أدخل يده في جيبه وأخرج (جزلان) يشبه تماما
(جزلان) متشولق..
بمجرد مشاهده متشولق لجزلان الزبون قفز
الى الوراء متراجعاً وصاح بأعلى صوته
(تااااااااااااااااااااني).

ولدمارنجان

26-06-2009, 08:06 AM

بمجرد مشاهده متشولق لجزلان الزبون قفز
الى الوراء متراجعاً وصاح بأعلى صوته
(تااااااااااااااااااااني).

حبيبنا عزيز عيسى ،، مرحب بطلتك من جديد ،،،، ياولــــــد حلتنا

لكن لقيت جزلان صاحبنا دا زى حزاء ابوالقاسم الطنبوري .. وتقبل مروري .

عاطف عولي

26-06-2009, 12:10 PM

الاب العزيز :-

نحن النفاجون ننشر البهجة في كل مكان ..

ماقصدنا نقلل من احترام الناس لكن نرسم الابتسامة ع شفاه الكل

(حتي متشولق) رغم اننا جداد وكده في المنتدي لكن مرحب بيك في النفاج

انت زعلت ولا شنو يا دكتور

عاطف عولي

26-06-2009, 12:15 PM

:eek: :eek: :eek:

يازول مالك بتحدري ليك بعيونك الاتنين شمال ديل

غايتو ان شايفك كدي بعيوني الاتنين يمين ديل

خالد أحمد الصول

26-06-2009, 12:24 PM

عزيز عيسي يا أريجا من الزمن السمح ... يا من أعطيتنا أحلي اللحظات و أبحرنا معك في عوالمك الصافية ... اليك أشكو قلة حيلتي و لهفتي للقاؤك
أخي عزيز
طالعت في أحدي الاماكن هذه القصة
كانت أجهزة الامن قد أعدت كمينا محكما بعد أن ورد لها معلومات تاكدت من صدقها أن الدكتور الفار المتهم في قضية التكفير و الهجرة يتحفي في أحدي الاحياء الطرفية من العاصمة و بعد مباغتته نجح في الهرب بدراجة نارية يقودها أحدهم ... كان صاحبنا بطل القصة قريب من منطقة الحدث و رأي هروب شخص من أجهزة الامن في الدراجة النارية و الذي مر بجانبة فما كان منه إلا و أن قذفه بطوبة أصابته في رأسه فإنقلبت الدراجة و أصيب الدكتور إصابات بالغة في الرأس أدت الي نقله الي المستشفي و التي مات فيها بعد ساعات قليلة ... إقتادت أجهزة الامن هذا الشليق الي الحبس طواااااالي توطئة لتقديمه للمحاكمة
أها شوف ليك جنس شلاقة

عاطف عولي

27-06-2009, 11:47 AM

عاطف عولي

27-06-2009, 12:04 PM

moh_alnour

27-06-2009, 03:07 PM

أنتو ود النور دا مش كان قال عاوز يضمن شلاقة مالوا زاغ وتاني ماظهر

ياخي شلاقة ولا متشولق دا زول بتاع كفاوي لو باريتو كدا بجيبا لي ضقلا يكركب :(
بركة الربنا تاب عليهو و هجس في الدكان دا

عاطف عولي

27-06-2009, 03:14 PM

ياخي شلاقة ولا متشولق دا زول بتاع كفاوي لو باريتو كدا بجيبا لي ضقلا يكركب :(
بركة الربنا تاب عليهو و هجس في الدكان دا

هجس وين قال ماشي الجزيرة فيل عندو عقاب اهلن ليه متذكر في اسمن ودالجاك ولا اولاد الجاك دا الكلام القالوا للمحقق.

شيل شيلتك وارجي الراجاك

ود ابوقرجة قال الزول دا من اهل ود النور

وجاب شاهد المميز والتنيين النفاجي

عزيز عيسى

29-06-2009, 06:06 AM

يآخى دا شليق شلاقة ...
ومنحوس جنس نحس ...
بركة الجيت يا خواجةعزيز
الأخ العزيز عوض الكريم الخواض..
الراجل عوارضه كثيرة وكلها مجرد صدف
قد تحصل لأي شخص آخر..
لكن العاجبني في متشولق إنه
راجل صبور.
مشكلته ما ببطل شلاقة.

عزيز عيسى

29-06-2009, 06:11 AM

والله يا الخرطوم جاك بلاااا :p :d :p
عارف يا محمد حسين صحبك متشولق دا لو إستقر في الخرطوم
بشلاقته دي كان ناس الخرطوم شردوا لي مدينة تانية
لكن الحمد لله عبدالمعين أعاده لي مدينته الصغيرة..
أها ماذكرت لي إنت شلاقتك كيف؟

عزيز عيسى

29-06-2009, 06:21 AM

حبيبنا عزيز عيسى ،، مرحب بطلتك من جديد ،،،، ياولــــــد حلتنا

لكن لقيت جزلان صاحبنا دا زى حزاء ابوالقاسم الطنبوري .. وتقبل مروري .

العزيز يوسف خليل علي قدورة..
مشيت أتاوق بهناك في بوست الولد الشمشرجي عاطف عولي
وعرفت إنك من أولاد أهلنا الطيبين في مارنجان حلة حسن..
وسعدت جدا إني أشاهد توقيعك هنا معنا في منتدى ودمدني..
طبعا أخوك طول شديد من مارنجان السودان لكن أسماء الناس
القدام مازلت راسخة في الذاكرة وما حأنساهم أبدا..
كدي عليك الله ذكرني إبوالقاسم الطنبوري غلبني عديل
إتذكره..تفتكر خرفت؟!!

عزيز عيسى

29-06-2009, 06:25 AM

يازول مالك بتحدري ليك بعيونك الاتنين شمال ديل

غايتو ان شايفك كدي بعيوني الاتنين يمين ديل
غايتو يا عاطف حدرة المميز دي أنا ذاتي
خفت منها .. بس أعمل حسابك
ما يقوم يقول ليك تعال طالعني الخلاء..

عزيز عيسى

29-06-2009, 06:41 AM

كان صاحبنا بطل القصة قريب من منطقة الحدث و رأي هروب شخص من أجهزة الامن في الدراجة النارية و الذي مر بجانبة فما كان منه إلا و أن قذفه بطوبة أصابته في رأسه فإنقلبت الدراجة و أصيب الدكتور إصابات بالغة في الرأس أدت الي نقله الي المستشفي و التي مات فيها بعد ساعات قليلة ... إقتادت أجهزة الامن هذا الشليق الي الحبس طواااااالي توطئة لتقديمه للمحاكمة
أها شوف ليك جنس شلاقة

هههههه يا خالد أكيد الراجل الرمى الطوبة وفلق الزول
الراكب الدراجة النارية ياهو زولنا متشولق ذاتو لكن
ناس الحكومة تستروا على إسمه وقرروا عدم محاكمته
بالإعدام لأن شلاقته زادت عن الحد وإعتبروا الحادث
مجرد قضاء وقدر..
أسعدني مرورك ياراجل يا راقي وأسأل الله أن يجمعنا
مرة أخرى في أم المدائن لنسعد بلقائكم أكثر وأكثر.
ودي وتقديري.

عزيز عيسى

29-06-2009, 06:45 AM

أنتو ود النور دا مش كان قال عاوز يضمن شلاقة مالوا زاغ وتاني ماظهر كلموا يا خواجة قول ليه شلاقة في اخر تحقيق قال عندو اهل في جزيرة الفيل وماشي عليهم وكمان قال ما متذكر الاسم لكن في اسمن فيه اسم الجاك والله يكضب الشينة

يا عاطف إنت ماعارف إنو شلاقة دا هسع ساكن جزيرة الفيل؟
وقالوا مجكس ليه واحدة هناك.. وأكيد يجيب ليها (الكج)..
غايتو ود الجاك لو طلع قريبه بديك نصيحة أحسن تبعد عن ود الجاك..

ابوالنور

29-06-2009, 10:12 AM

يا سلاااااام يا عزيز ده انت جيت ياخي البركة الشفناك طيب وان شاءالله الشوفتك لينا تشوفنا الهادي اختفي مع السيل

محمد حسين (المميز)

29-06-2009, 10:47 AM

غايتو يا عاطف حدرة المميز دي أنا ذاتي
خفت منها .. بس أعمل حسابك
ما يقوم يقول ليك تعال طالعني الخلاء..

:confused: :confused: :confused:

ده انا غلباااااااااااان :o

عزيز عيسى

30-06-2009, 06:00 AM

يا سلاااااام يا عزيز ده انت جيت ياخي البركة الشفناك طيب وان شاءالله الشوفتك لينا تشوفنا الهادي اختفي مع السيل
تحياتي الأخ أبوالنور..
أخينا الهادي (أبوصفية) إختفى وبظهر مرة مرة ذي
الهلال ولا المريخ ما عارف..
من ما جاب لينا المعضلة الرياضية زاغ وعمل نائم..
لكن الراجل متواصل معاي عبر البريد الخاص
وبنقول ليه أظهر وبطل كسل تعال شارك.

عزيز عيسى

30-06-2009, 06:02 AM

:confused: :confused: :confused:
ده انا غلباااااااااااان :o
المرة دي يا عاطف زولك (المميز) شعر راسه طار!!

عاطف عولي

30-06-2009, 01:36 PM

يا عاطف إنت ماعارف إنو شلاقة دا هسع ساكن جزيرة الفيل؟
وقالوا مجكس ليه واحدة هناك.. وأكيد يجيب ليها (الكج)..
غايتو ود الجاك لو طلع قريبه بديك نصيحة أحسن تبعد عن ود الجاك..

يوم الجمعة سامعين الربة في ام بارونة حفلة في شكل رحلة قالوا قريب ودالجاك شلاقة اصحابوا عاملين ليو قيدومة ولا صبحية ما عارف.

عاطف عولي

30-06-2009, 01:39 PM

المرة دي يا عاطف زولك (المميز) شعر راسه طار!!

المميز دا ديناصور وشلاقة اصغر اصحابوا والشعر الظاهر دا سميرغانم

ولدمارنجان

01-07-2009, 03:03 AM

العزيز يوسف خليل علي قدورة..
مشيت أتاوق بهناك في بوست الولد الشمشرجي عاطف عولي
وعرفت إنك من أولاد أهلنا الطيبين في مارنجان حلة حسن..
وسعدت جدا إني أشاهد توقيعك هنا معنا في منتدى ودمدني..
طبعا أخوك طول شديد من مارنجان السودان لكن أسماء الناس
القدام مازلت راسخة في الذاكرة وما حأنساهم أبدا..
كدي عليك الله ذكرني إبوالقاسم الطنبوري غلبني عديل
إتذكره..تفتكر خرفت؟!!

وتاني نقول ها ،، يا حبيب الكل ،، اخونا عزيز ،، لك كل الود والتقدير ،، طبعــاً ،، شوف طبعا دى كيف ، نحنا الجيل الرابع بس مـا بتاعة نوكيا ، عشان كدى كان اخونا عاطف عولي بيحكي لينا عنكم بس حكايات ماحجاوي حبوبات ، يحكي عن الواقع الجميل والزمن الجميل والصحبة الجميلة والرموز الجميلة في مارنجان ، رموز ،،، العم فلو ، وأم كركب ، وباسم ديمة ، والعم لعبسه ، وشجر الحنبك ، والضريسه ، والموليتة ، وشارع النص والفسحه بس ايام زمان لما كان البولمر بقرش ، وحسن فرشة يبيع بقرش ،،، وبمناسبة طيب الذكر ابوالقاسم الطنبوري وبما انك من الجيل الاول اكيد ماادوكم لية في المدرسة لما كان الطنبوري زهجان من نعلاتو وكل يوم يرميها في حتة وطبعا الحلة كلها عارفة انو دي نعلات صاحبنا تقوم ترجعها لية من جديد ،،، اها اتذكرتها والله الزهايمر اشتغل ، مع امنياتي القلبية لك بدوام الصحة والعافية .وتقبل المرور واتمني تواصلنا ،،، وبرجعلك .

عزيز عيسى

01-07-2009, 10:02 AM

العم فلو ، وأم كركب ، وباسم ديمة ، والعم لعبسه ، وشجر الحنبك ، والضريسه ، والموليتة ، وشارع النص والفسحه.

والله لكن يا ود قدورة تراك ما ساهل..
الثنائي فلو وكودي.. وخازوق جلي.. وعامر اللعوتة.. والعاقب..
وباشكتاب..
وباسم ديمة.. قصدك سكران ديمة..
الناس ديل معظمهم قالوا رحلوا عن دنيانا.. الله يرحمهم.

شجر الحنبك.. والتمرهندي.. والنبق المصري.. والنخلات.
وياما الضريسة دي طعنتنا في رجلينا من كثرة المشي
حفيانين وأنحنا بنسرق الفول والموليته من الحواشات.

شارع النص.. وشارع الورشة.. وشارع السوق..
وكانت لنا أيام.
وين التيمان حسن وحسين علي قدورة؟