انا غايتو جني وجن البيتزا

[درديري كباشي]

لاننكر انه نحن مبهورين بالغرب ونسخنا كل ابتكاراتهم وماكولاتهم بدون ان بيبادلونا هم انبهارا بانبهار . وفتحنا كل فروع مطاعمهم هنا هامبرقر وشاورما وبيتزا ان وبيتزا اوت . ولكن للاسف هو حب من طرف واحد بمعنى لو لفيت جميع مدن الغرب لن تجد مطعما واحدا اسمه ( ويكا ان) ولا (قراصة كينق ) .
كلنا بدون فرز وانا معاكم انبهرنا بالماكولات الغربية المتعارف عليها واصبحنا نشتهيها اكثر من ماكولاتنا الشعبية . تجد الاولاد معلقين ليك ابوي جيب معاك شاورما وواحد ثاني يقول ليك لا لا ابوي انا عايز همبرقر او نقانق (ليست لها علاقة بالنقنقة ) .
ولكن انا شخصيا الاكلة التي لم تتوافق مع مزاجي هي المسماة البيتزا . تلك القراصة الضخمة المرصعة بل قل ملطخة اذا شئت باشياء كثيره لا تجتمع الا في اثنين البيتزا وسلة المهملات ( اسف اذا في واحد من عشاقها ) ولكن انا علاقتي بالبيتزا بدات متوترة شوية منذ البداية .
وهو ونحن طلبة وقبل ان تنتشر هذه الماكولات في السودان ولا حتى الدول العربية . كانت اختنا وزوجها مبتعثين الى امريكا . وعندما عادوا . وكان ضمن ما عادوا به من حضارات الغرب هي البيتزا . لان اختى عزمتني انا وصديق قالت الليلة عندي ليكم اكلة غربية تعالوا اتعشوا معانا اسمها البيتزا .دون ان تعطينا اي تفاصيل اخرى او معلومات عماهية البيتزا.
انا اخذت الصديق وذهبنا لوجبة العشاء الموعودة ونحن متشوقون الى هذه البيتزا وكيف يمكن ان تكون . ونحن جالسين في الصالون في انتظار البيتزا هذه وليس لدينا ادنى فكرة حتى عن شكلها . وفعلا جات تحمل صينية فيها قراصة كبيرة ملصقة فيها حاجات كثيره عرفنا منها الزيتون والطماطم والبصل , وقطعتها مثلثات وبدات تصرف لنا .
ونحن ما سالنا عن هذا الشئ ولكن بدنا ناكل فيه على مضض وفي انتظار البيتزا قلنا يمكن هذه مقبلات البيتزا وكده . بصراحة كده انا بطني قلبت من اول قضمه . لكن منعا للحرج واصلت . اما صديقي ذلك كان من النوع الضحاك جدا كلما قضم قضمة انفجر ضاحكا . وهي كل مره تلاحقنا بالاسئلة وهي اسئلة في ذلك الموقف اصعب من امتحان الفيزياء في الشهادة السودانية ... اها رايكم شنو عجبتكم ؟؟؟؟ وكل ما تسال اخينا عن رايه ينفجر ضاحكا . وانا شعرت انه مصاريني تتكلم معاي و تقول لي ( يمين يا ابو الدر لو ما وقفت القرف الردمتنا بيه دا نطلع ونخليها ليك فاضية زي الدلوكة ) . الطريف انك لو توقفت عن الاكل تحسست هي ( شنو مالكم ماعجبتكم ؟؟ واذا واصلت صرفت لك مثلثا جديدا . اخيرا خفت ووقفت . وهي .. شنو مالكم وقفتوا ازيدكم ... لا لا لا خلاص الحمد لله شبعنا . والطريف نحن لازلنا ننتظر البيتزا . انا لمن شفت الموضوع طول قلت ما نسال نشوف اخبار البيتزا شنو ومالها اتاخرت .
سالت انا : انت يا اخت ماقلتي عازمانا بيتزا ردمتينا بالقراصة دي وين البيتزا ؟؟
رديت هي : ومال الاكلتوها دي شنو ؟؟؟
انا : هي دي البيتزا ؟؟؟؟؟
هنا انفجر الصديق بالضحك وما قدر يمسك نفسه بصورة هستيرية. هنا طلبت منه ان يتوقف عن الضحك ونتخارج من هنا سريعا . وهي اتاثرت عندما عرفت انه البيتزا قلبت كياننا . وقالت اديكم حاجة ثانية ؟؟؟ في فول في ساردين . قلت يا بت الناس خلينا نمشي قبل ما نلوث ليك فرشك دا يمين تاني مطهرات امريكا كلها ما تعقمو ليك . ونحن طالعين صديقي قال نظام يعاتبني يعني .. ياخي كنت قاسي معاها... قلت له يا سلام عامل فيها انساني خالص وهو انت اكلت حاجة ما عديتها كلها ضحك وخليتني انا ضارب لي اربعة مثلثات يعني اهرام كامل من البيتزا . انا في الاول افتكرت انه هي غلطت في الوصفة او توجد مادة معينة في امريكا لم تجدها في السودان وبدلتها بشئ اخر . لكن بعد ذلك عندما تناولت البيتزا من مطاعمها الخاصة وجدتها هي هي لا يوجد أي اختلاف سوى اصحاب المطعام عندهم جبنة كدة( عبيطة) تمطها متر عشان تقطعها لتزيد البيتزا سوءا .
و قصة اخرى حدثت مع احد اقاربنا هنا في الرياض شلة من ابناء الشايقية . قال انه زميلهم عزمهم عشاء وقال رحنا بعد ان شربنا العصير والشاي احضر صاحب البيت صينية بها (البيتزا قطعها مثلثات كالعادة ووزعها عليهم ) هم اكلوها وواصلوا في السهر والونسة . وعندما جات الساعة احدى عشر ولم يتغير شئ تجرا احدهم وسال ( انت يا ابراهيم عشاك وينو العزمتنا ليه دا ) ....... رد هو ( عشا شنو ومال الاكلتوه داك شنو )
رد ثاني ( تقصد المثلثات الجبتها في الاول دي ؟؟؟)......واصل ( يا ها ذاتها والمره حتى نامت كمان ).....
قال الثالث ( يا راجل بطل الاستهبال دا انت ومرتك وامش صحي المره دي خلها تقطع لنا حرف (قراصة ) في باقي ملاح الغداء عشان نتعشا ونمش اهلنا ) .
وزكرني هذا الموضوع اليوم وانا ماري بالطريق وجدت اعلانات تقول ان احدى مطاعم البيتزا تحتفل بيوبيلها الذهبي ... يعني خمسين سنة بيتزا بس ........ عجاااااااااايب .

[moh_alnour]

درديري كباشي
تسلم كتييير ياخ فقد أتحفتنا بهذا الحديث الجميل و الخفيف خِفة البيتزا في البطن
همسة : تعرف يا درديري أخوك برضو ما من المعجبين خاااالص بالبيتزا لكن بِضربا
و على قولك أصبح الجميع مفتونون بالوجبات السريعة و التيك أوي
و مع ذلك تجدني أفضل دوما ًتناول وجبة الغداء في المطعم السوداني

[بت أم درمان]

مع ان انا من اشد محبي ومعجبي البيتزا
بس قلت ما بقرأ وامرق ساي
سردك عجيب وفيه مرح
وضحتني شديد انت واصحابك
ربنا يضحك سنك ياخ

[عوض الكريم الخواض]

درديرى ...
حرام عليك يااااخ ...البيتزا مالا عيبا لي ...
ياخى دى من أجمل الوجبات ( المتفرنجة ) ...
والوجبات الغربية جيدة المذاق ونتناولها من باب التغيير ...
كنتاكى ... ريال ماك ... سندوتشات هارديز ... وغيرها ...
وأخوك من المغرمين بالبيتزا ويا ريت لو كانت بى عش الغراب والزيتون والبصل المحمّر والجبنة الموزريلا اللايوقة.....مباااالغة وأهم حاجة تكون مسسسخنّة سخانة شديدة ...
ياخى لو عزموك بيتزا كلمنى ... بجى آكل ليك نصيبك ... وأريحك منو ;);)لكن برضو ما بنقدر نفارق أكلنا الشعبى اليومى .
تسلم .

[درديري كباشي]

درديري كباشي
تسلم كتييير ياخ فقد أتحفتنا بهذا الحديث الجميل و الخفيف خِفة البيتزا في البطن
همسة : تعرف يا درديري أخوك برضو ما من المعجبين خاااالص بالبيتزا لكن بِضربا
و على قولك أصبح الجميع مفتونون بالوجبات السريعة و التيك أوي
و مع ذلك تجدني أفضل دوما ًتناول وجبة الغداء في المطعم السوداني



نشكرك يانور
تعرف افتتانا ببلاوي ووجبات الغرب كان نتيجته انتشرت امراض ما كنا نعرفها من زمان منها لوكيميا الدم والفشل الكلوي .. وكلها بسبب تلك المواد التي تشبه شحوم العربات من نوع كاتشوب وما يونيز وغيرها .. لانها فعلا ترحل من بلد لبلد وتخزن بالسنين وهي اصلا مصنوعة من البيض وهو معروف من اكثر الاطعمة معرضة للفساد والتلف ...

[درديري كباشي]

مع ان انا من اشد محبي ومعجبي البيتزا
بس قلت ما بقرأ وامرق ساي
سردك عجيب وفيه مرح
وضحتني شديد انت واصحابك
ربنا يضحك سنك ياخ

نحترم حبك وافتتانك بالبيتزا يا بت امدرمان .. وانا كمان اطفالي بيحبوها ولكن عاديتهم بعد ما لاحظوا اني اتجنب حتى الاقتراب من مطاعمها بالتدريج طارت ليهم..
ونشكرك على الثناء ودا من ظرفك فقط

[عوض صقير]

أديبنا الدرديرى

تشكر على هذا الموضوع الرائع



تخريمة: ولكن الملوخية المصرية تغلبت على البيتزا الإيطالية

[سيد البلد]

الأخ " درديري "

اسلوبك اكتر من ممتع ومشهي
ومن يوم الليلة دي انا صاحبك عدييييييييل كده طالم انك بتكره البيتزا دي

اما بالنسبة لي عوض الكريم الخواض


ياخي والله من شدة ما اتاثرت بي كلامك لمن غلبني اقتبسوا
انت من يوم الليلة دي لا صاحبي ولا بعرفك
بتحب البيتزا ؟
ياخي دي والله لو ما خايف يدخلوني في جماعة " يحرمون ما احل الله " كنت قلت ليك رجس من عمل الشيطان


وكدي قبل اقطع علاقتي بيك وريني بالله
الريال ماك ده منو ؟
والجبنة الموزريلا اللايوقة نصنفها تبع شنو ؟

[حافظ شعبان]

الرائع والمتألق دوما بأذن الله
اخونا الدرديرى
لك منى كل تقديرى واحترامى
منذ اشتراكى بالمنتدى
قراءت الكثير من المواضيع ولكن كلمة حق تنقال
بالرغم حداثة تسجيلك بالمنتدى احس بأنك ستكون من الاعضاء المميزين
وحقا انت اضافه تستحق الانتباه
سردك جميل ومتنبه لك بظهور ممتاز فى هذا المنتدى

وعن البيتزا دى البتزا انا ذيك

http://images.panet.co.il/articles/17032007-34114-3.jpg

واقوليك شى غريب
اولادى يحبوها لكن لمن اجيبا ليهم اول حاجه هاك ياكنس
ينظفوا ليك الحاجات الفوق كله ويخلوها ليك فاضيه
امهم شايقيه قالت ليهم تانى لو بتعملوا كدى بعمل ليكم قراصه
وكانت مناسبه جميله حببتهم فى القراصه
ونحن ولو عوزين نتعشه بتزا نقول
بنعمل فى البيت قراصه ان
المكونات قراصه خفيفه + فول سودانى + عسل
وعندنا واحده تانيه بالسمن ذى دى
http://marktanner.com/sudan-recipes/art/semna.jpg
وجرب

وتسلم يارائع ويسلم لينا اخونا عباس الدسيس

[أبوريلان]

أبو الدر
ينصر دينك
تعرف أنت والجابك لينا جوز لوز .

[محمد الجزولى]

المبدع الدرديرى كباشى
ياخى انا ما عارف كسرتنا وملاحنا ده مالو ؟؟؟ والله الواحد لو لفه الدنيا دى كلها ما بلقى زيهم
سردك قوى وجذاب
تقبل مرورى واحترامى

[عوض صقير]

الرائع والمتألق دوما بأذن الله
اخونا الدرديرى
لك منى كل تقديرى واحترامى
منذ اشتراكى بالمنتدى
قراءت الكثير من المواضيع ولكن كلمة حق تنقال
بالرغم حداثة تسجيلك بالمنتدى احس بأنك ستكون من الاعضاء المميزين
وحقا انت اضافه تستحق الانتباه
سردك جميل ومتنبه لك بظهور ممتاز فى هذا المنتدى

وعن البيتزا دى البتزا انا ذيك

http://images.panet.co.il/articles/17032007-34114-3.jpg

واقوليك شى غريب
اولادى يحبوها لكن لمن اجيبا ليهم اول حاجه هاك ياكنس
ينظفوا ليك الحاجات الفوق كله ويخلوها ليك فاضيه
امهم شايقيه قالت ليهم تانى لو بتعملوا كدى بعمل ليكم قراصه
وكانت مناسبه جميله حببتهم فى القراصه
ونحن ولو عوزين نتعشه بتزا نقول
بنعمل فى البيت قراصه ان
المكونات قراصه خفيفه + فول سودانى + عسل
وعندنا واحده تانيه بالسمن ذى دى
http://marktanner.com/sudan-recipes/art/semna.jpg
وجرب

وتسلم يارائع ويسلم لينا اخونا عباس الدسيس

أنا غايتو ( قراصة إن ) بتاعت حافظ جربت منها ( بالدمعة ) حاجة رهيبة ( تسلم الأيادى )

[مدنيّة]

عندنا التقليد الاعمي للاسف يادرديري كباشي








همسة : البيتزا صراحة مافيها اااااااي كلام والعيب مامنها هي العيب منك انت وصاحب واي زول ما بحبها :cool:

[درديري كباشي]

نقول للاخوة عشاق البيتزا واخواتها السبعة تعرفوا من هن اخوات البيتزا هما
الكاتشوب والميانويز والبشملة والهمبرقر والشاورما والبروست وبقيادة الاخت الكبرى الحاجة ام علي.
هؤلاء القوم ومنذ مطلع التسعينات بداوا يغزون موائدنا وبالتدريج بداوا يحلوا محل الغالي الفول والقراصة بالدمعة والفطير باللبن والعزيزة اللذيذة سلطة الاسود ... وانا اقول للمدافعين عن البيتزا ولم يستطيعوا ان يخفوا تمطقهم لمجرد سماع سيرتها ... عمركم قابلتوا خواجة قال نفسه في قراصة بملاح خضره مفروكة مع الشطة بالليمون والبصل الاخضر ..
انا اتمنى امتلك راس مال مليون دولار واهاجر الى امريكا وافتح سلسلة مطاع قراصة هوط واملا شواع وشنطون اعلانات بصور ضخمة ... قراصة هوط بنكهة الدمعة ... وقراصة هوط بالخضرة المفروكة والبصل الحار .. ومش حا تقدر تفتح عينيك ..
واعمل مشروب غازي بنكهة الحلومر واسميه ايت أم ( على وزن سفن اب .. مع اعتزار للمريخاب ما بيحبوا السيرة دي )

[esmat]

الدرديري
نحنا ما من انصار البيتزا لكن لو لقيناها ما بناباها
عندنا صاحبنا هنا بحبها شديد بجيبها ونحنا ما بنقصر
معاهو لكن ما بنمشيى عليها
لكن من احباب سلطة الروب كدا


اسلوبك اكتر من ممتع ومشهي ومن يوم الليلة دي انا صاحبك عدييييييييل

شوف جنس المصالح دي بالله
رئيس بكسر في تلج

[littlestar]

نقول للاخوة عشاق البيتزا واخواتها السبعة تعرفوا من هن اخوات البيتزا هما
الكاتشوب والميانويز والبشملة والهمبرقر والشاورما والبروست وبقيادة الاخت الكبرى الحاجة ام علي.
هؤلاء القوم ومنذ مطلع التسعينات بداوا يغزون موائدنا وبالتدريج بداوا يحلوا محل الغالي الفول والقراصة بالدمعة والفطير باللبن والعزيزة اللذيذة سلطة الاسود ... وانا اقول للمدافعين عن البيتزا ولم يستطيعوا ان يخفوا تمطقهم لمجرد سماع سيرتها ... عمركم قابلتوا خواجة قال نفسه في قراصة بملاح خضره مفروكة مع الشطة بالليمون والبصل الاخضر ..
انا اتمنى امتلك راس مال مليون دولار واهاجر الى امريكا وافتح سلسلة مطاع قراصة هوط واملا شواع وشنطون اعلانات بصور ضخمة ... قراصة هوط بنكهة الدمعة ... وقراصة هوط بالخضرة المفروكة والبصل الحار .. ومش حا تقدر تفتح عينيك ..
واعمل مشروب غازي بنكهة الحلومر واسميه ايت أم ( على وزن سفن اب .. مع اعتزار للمريخاب ما بيحبوا السيرة دي )



مليون شنووووووووووووو :eek::eek::eek:
دى يعدوها كيفن يا أبوى :confused::confused::o

كدى مع الأزمة الإقتصادية العالمية دى
لم فى الدولار أول الباقى بيجى برااااااهو هين

[درديري كباشي]

مليون شنووووووووووووو :eek::eek::eek:
دى يعدوها كيفن يا أبوى :confused::confused::o

كدى مع الأزمة الإقتصادية العالمية دى
لم فى الدولار أول الباقى بيجى برااااااهو هين


اكيد يا ليتل استار حا تقدي ناس البيت بالبيتزا في رمضان.ز

انا كل ما يكون عندي ضيوف في رمضان ام محمد اهم طبقين عندها هم البيتزا والمكرونة بالباشميلا .. ولانه انا الاثنين ما بطيقهن لمن يرجعوا زي ما هم في الصينية تحملني مسئولية تبويرهم انا .. تقولي حاجة انت ما اكلت منها اكيد الضيوف ما راح يهبشوها .. واقول ليها ليه هم شاكين نحن حانسممهم .. شوفي تعملي بيتزا انا ما بدخل فيها يدي والضيوف هم احرار يلا ..

[الجندي المجهول]

بصراحة وقت اللزوم وقت الزنقة بتفك الحيرة ( عن نفسي) بمشي ليها بالمزاج يعني امكن كل شهر مرة او كل اربعين خمسين يوم كدا ( يعني في حالة اني اشتهيتها ) ولكن ميال جداً للأكل السوداني خاصة ما يطبخ بالمنزل (بامية مفروكة عليها قدحة - رجلة - كفتة - ملاح روب مرشوش عليهو سمنة بلدية وكذلك النعيمية الخ... )
عموما البيتزا جميلة وحلوة ولا غبار عليها ابدا ..... لكن من غير كترة

[telecom]

يا درديرى يا خوى طريقة سردك للحكاية يخلى الزول متشوق يصل النهاية لكن البيتزا ما فيها اى كلااااااااااااام بحبها موت وكل ما اكون مدبرسة بمشى اكل بيتزا ما عارفة العلاقة شنو

[درديري كباشي]

بصراحة وقت اللزوم وقت الزنقة بتفك الحيرة ( عن نفسي) بمشي ليها بالمزاج يعني امكن كل شهر مرة او كل اربعين خمسين يوم كدا ( يعني في حالة اني اشتهيتها ) ولكن ميال جداً للأكل السوداني خاصة ما يطبخ بالمنزل (بامية مفروكة عليها قدحة - رجلة - كفتة - ملاح روب مرشوش عليهو سمنة بلدية وكذلك النعيمية الخ... )
عموما البيتزا جميلة وحلوة ولا غبار عليها ابدا ..... لكن من غير كترة


سلام يا جندي رغما انه ردك دا مفروض يقراه واحد بالليل بعد الافطار يعني خاصة بعد حكاية السمن البلدي دي..

لكن اما عن البيتزا رغما عن اني مصاريني تصرخ بالجوع الا ان حتى هذه اللحظة ما عندي اي رغبة في البيتزا .. انا ما اعيبها هي اكيد نعمة من نعم الله ..بس انا ما اطيقها ..

[درديري كباشي]

يا درديرى يا خوى طريقة سردك للحكاية يخلى الزول متشوق يصل النهاية لكن البيتزا ما فيها اى كلااااااااااااام بحبها موت وكل ما اكون مدبرسة بمشى اكل بيتزا ما عارفة العلاقة شنو



تلي كوم

وكلامك عن الدبرسة دا كوم


معقولة في حد يفك الدبرسة بالبيتزا وهي البيتزا اصلا بتشبه وش الزول المدبرس

[عمرسنهوري]

الرائع الدرديري صاحب الاسلوب الساحر

اول شي ضحكتني ضحك شديد
تانيا الاخوان المتداخلين جوعوني جوع شديد بالامثله .

البيتزا انا ممكن اكلها لكن اقرب الى الكراهه بالنسبه لي

[درديري كباشي]

الرائع الدرديري صاحب الاسلوب الساحر

اول شي ضحكتني ضحك شديد
تانيا الاخوان المتداخلين جوعوني جوع شديد بالامثله .

البيتزا انا ممكن اكلها لكن اقرب الى الكراهه بالنسبه لي


حلوة حكاية الكراهة دي يا مولانا سنهوري .. زكرتني علاقتي بحاجة تانية غربية دخلت حياتنا وتربعت .. وهي تلك المادة الدهنية المسماه المايونيز ..

تعرف ناس المايونيز الكتشوب اصبحوا الان من اساسيات اكل الاطفال .. او كماليات على الاقل الاطفال ياكلون بدونها .. وهي بايخة شكلا ومضمونا وطعما ونكهة ..

انا اول مره اشوف المايونيز تخيل ونحن طلبة في الثانوي .في اجازة كنا في بيت احد الاصحاب عازمنا فطور وهو والدهم مغترب ( اي حناكيش) والفطور لم يكن ينقصة شئ سوى عدم رؤيانا الغالية .. يعني دمعة مسبكة وفول مظبط ولحمة محمرة وسلطة بالجبنة وطحنية وبيض مسلوق ..

بس نسمع ليك في صاحبنا ينادي في اخوه ( يا توفيق جيب معاك المايونيز ) انا ما انشغلت بالموضوع لانه اصلا ما كنت فاكر ان الموضوع له علاقة بالاكل .. قلت يمكن شريط فرقة جاز او اي شئ ثاني .. بشوف توفيق جاب برطمان فيه مادة بيضاء ما يلة للصفار .. واخينا فتح البرطمان وتناول منه معلقتين صباها في الفول ودور الخليط .. انا اول لقمة اكلتها شعرت ليك نفسي كتم كاني اكلت حشوة حجر بطارية ( قلت انا اخوك يا فاطنة) دا شنو الكبيته في الفول دا ... دا ما مايونيز .. ايوة سمعناها الكلمة دي لكن يطلع شنو المايونيز دا .. ياخي دي خلطة فرنسية .. معقولة مات بتعرف الميونيز؟؟ لا بعرفوا ولاى عايز اعرفوا .. والحمد لله ... يا خي كمل خلاص اكل حاجات تانية .. خلاص قفلت معاي ... الى الان انا اذا اشتريت شاورما اطلبها من غير هذا المايونيز ..

[telecom]

تلي كوم

وكلامك عن الدبرسة دا كوم


معقولة في حد يفك الدبرسة بالبيتزا وهي البيتزا اصلا بتشبه وش الزول المدبرس

كتر خيرك يا درديرى انا يادوب عرفتا العلاقة بينى وبين البيتزا صورة منتزعة من متعدد:mad::mad::mad:

[yhmoh]

أهلين بالجميع، يا جماعة البينزا والملاح والعصيدة والشاورما ، دي كلها من خير ربنا ، وبعدين البيتزا دي ما خلقوها الخواجات ، شوفوا مكونات البيتزا مين الخالق المكونات ، فيها البصل وفيها الزيتون وفيهاالدقيق وفيها الملح وفيها الجبنة والحاجات دي كلها ما غربية علينا وكل يوم بنأكلها ، عايز أعرف ليه بتقولوا دي حقت خواجات ، يا جماعة ده مجرد إبتكار بس ، مش خلاص الخواجة إبتكر حاجة نحن ننفر منها . طبعا انا كتب الكلام ده تعليقاً لكتابة واحد من الأخوان ، وبالمناسبة دي ، أنا حبي للبيتزا يفوق كل أكله خلقت على وجه الأرض . مع تحياتي ،،،،،

[فراس]

ودالكباشي كيفك
انت عارف انا زمان كنت مثلك تماما مابحبها خالص
لكن شوية شوية حصل ود بيناتنا الان انا من المدمنين
عليها ولحسن الحظ شاءت الاقدار ان اسكن بعمارة
اسفلها مجموعة من المطاعم العالمية ومنها
Pizza Hut واصبح لي معها غرام عجيب
همسة
والله جوعتنا
تسلم

[mutasim]

والله يادرديرى شهيتنا البيتزا ليك على اليوم السحور بيتزا