عنترة وعبلة في السودان (مسلسل) [الأرشيف]

درديري كباشي

18-06-2009, 03:03 AM

الحلقة الاولى
يقف عنتره على ناصية الشارع متكئا على سيارته الهمر ويبدو عليه القلق والتوتر ساعة يتحسس سيفه ويصلح الحزام في وسطه وساعة ينظر الى ساعته . وساعة يلعب على جواله ( موبايله ) ويبدو انه ينتظر عبله والتي تبدو قادمه من اول الزقاق حيث يقطن بيتهم في احدى حواري الخرطوم وهي تتهادى وتتكسر في مشيتها كعادتها . واول ما تصل قرب سيارة عنتره تبتسم ابتسامتها المشرقه , وهو بعد ان كان مشحونا بالغضب تذيبه تلك الابتسامه ويرتخي ويبادرها متبرما من تاخرها وهو يتصبب منه العرق .
عنتره : شنو يا ابنت العم ما شريتينا
عبله : اجي ياعنتر ما انت عارف المكياج بياخد وقت وكدا .
عنتره يدخل يده في جيبه ليخرج منديله ويمسح به العرق المتصبب . ليتفاجا في انه استخرج كيس الصعوت ...
وتبادره عبله : اخييي يا عنتر انت مش وعدتني انك حتسيب الصعوت""" . ونحن مما هاجرنا من الجزيره العربية وجينا السودان انت اتعلمت القرف دا من الشله الصعاليك المصاحبهم ديل . شوف يا عنتره وانا تاني ما حا اكررها ليك يا انا يا الصعوت ..
رد عنتره : لا لا لا يا عبله يا بنت عمي اهدي شويه دا ما بتاعي دا بتاع شيبوب اخوي . شيبوب كان لابس جلابيتي امس راح بيها حفلة في سوق الناقة والظاهر نسى كيسه في جيب الجلابية وانا عاوز اطلع المنديل طلع معاي القرف دا .... عنتره يرمي كيس الصعوت بتافف مصطنع ظاهر . والليلة شيبوب دا لازم اديه درس بس لمن نرجع من السينما :

وعنترة يحاول ان ينجر قصيده سريعه يلهي بها عبلة عن حادثة الصعوت ويرضيها ويقول .

يا ابنة العم عبله جل من سواك لاجل عينيك تركت تعاطي التمباك

وحجزت تزكرتين لي ولك في السينما بعد وقوف ساعتين في الشباك

وبعد السهر في الفلم الهندي لحظات ويكون عشاؤك كنتاكي

عبلة تفرح وتتهلل اساريرها بعد ان القى عليها عنتره هذه الابيات التي تنم عن حبه الجارف لها وخاصة بعد ان وعدها بدواجن كنتاكي اللذيذة التي تحبها .
وعنتره بعد ان يحس رضاها يتحرك بالسياره بعد ان تكون ركبت هي بيمينه ويفتح الموضوع الذي ارقه طيلة ايامه السابقة .
عنتره : انت تعالي يا عبله ابوك الاهبل دا قصدو شنو عاوز مهرك يكون مائة من النوق العصافير ، يعني انا حا اجيب ليه نوق من وين ونحن من جينا السودان دا شفتي ليك ناقة حايمه في الخرطوم دي. وبعدين هو عاوز بيها شنو عاوز يعمل شركة تاجير جمال ولا شنو ؟؟؟ . يعني لو قال مائة من الركشات ماركة بجاج او مائة من الامجاد ماركة داماس يمكن كان الموضوع ينحل .ثم شنو يعني نوق عصافير يعني عيونها مظللة ولا كيف . حالة تجنن هو يكون خاتي باله على واحد من اعيان الخرطوم ديل يمكن عاوز يعرسك لجمال الوالي ولا صلاح ادريس . اصلا انا عارفه جشع وجنه قروش .

عبلة : اول عيب يا عنترة تقول على ابوي اهبل ثانيا انت عارفه هو رجل بدوي وبيحب الابل . ثم انت براحه علي هو الراجل دا ما عمك اخو ابوك ولا شنو . وانا كنت بحاول انه يخلي المهر مائة من الكورلات او الهونديات وانت تدبر حالك مع ناس النجم الذهبي او جياد يمكن تاخذها منها بالتقسيط المريح .
عنتره : قال تقسيط قال ولمن ابوك ياخذ العربات انا راح اسدد الاقساط من وين ؟؟
عبله تسكت برهة : ثم ... يا اخي انت قلبتها غم مالك ما تخليها بوقتها يمكن تنحل كده هسع سيب الغم دا وقول لي دوبيت زي بتاع عرب السودان داك .

عنترة يسكت شوية الى ان تهدا اعصابه ويبدا ينم بالدوبيت على طريقة اهل السودان

الليييييييييييييييييل الللليللللللللللللل

يا عبلة يا بنت العم جل من رسم

الخلة صديرك عالي والخصر انقسم

همممممممممممممممممممممممم

عبلة يعجبها الدوبيت : كدي يا عنتر دا الكلام مش شابكنا مكر مفر مفرتك مش عارف ايه .

والى اللقاء في الحلقة القادمة

درديري كباشي

18-06-2009, 03:05 AM

الحلقة الثانية من مسلسل عنتره وعبلة

لازالت عبلة ترافق عنتره في سيارته الهمر متجهين ناحية السينما . وقد ساد بينهم صمت كل واحد سرح بالموضوع الذي دار وفتحه عنتره . عبله رغما عن تظاهرها بالتشجع الا ان الموضوع اصبح مقلقا لها فعلا . اذ يبدوا ان والدها اراد ان يعجز عنتره لذلك طلب منه مهرا نادرا وغريبا والا ماذا تعني مائة ناقة وحتى من النوع العصافير هذه . ولكي تشغل عبله نفسها عن التفكير كثيرا انشغلت بقراءه لوحات المحلات التجارية وبدات حتى تقراها بصوت عالي حتى تسري عن نفسها وتطرد الهواجس عن عنتره ايضا طالما ان كل واحد منهم يريد ان تدور الافكار بداخله وبدات عبلة تقرا في اللوحات على النحو الآتي:
...... مجزرة السلام للحوم البارده والطازجة ......... كفتيريا ماما ساره للمديدة الحاره ........ شاورما بانوراما ........... شركة السم الهاري للمبيدات الحشرية ....صيدلية الرحمه ...... كوافير سيدتي الجميلة . وتوقفت عند الكوافير وسالت عنتره : انت يا عنتره ليش ما بتجيبني للكوافير دا..... يرد عنتره .. يا عبله النسوان اساسا يجو هنا عشان يحصلوا عشر جمالك بعد ما يقضوا الساعات الطوال ... ترد عبلة : عنترة بطل مكناتك والبكش دا قول بس مفلس . وبعدين بالصحي انت وين هداياك الزمان . زمان لمن كنا في جزيرة العرب ما يمر يوم او يومين الا تقدم لي هدية اما اسورة ذهبية او عقد من الالماس . يرد عنتره .. زمان ما كان لنا سطوتنا وغزواتنا . كنا نغزو القبائل الثانية والغنائم كانت على قفا من يشيل .
عبلة : طيب ليش وقفتوا الغزو الجد شنو
عنتره : غزو وين ؟؟؟؟؟؟ هنا ؟؟؟؟؟
عبله : آآآآي هنا مالكم خفتوا ولا غنائم مافي

عنتره : اول ايامنا الهاجرنا فيها لهنا قلنا انا وشيبوب اخوي والشله نبدا الغزوات ومشينا بالحصين لمنطقة سهول كردفان . ونحن زمان كان لمن نتحرك ناحية مخيمات اي قبيلة بمجرد ما يشوف السكان غبار حصيننا او يسمعوا بقدومنا يفرون ويتركون لنا الغنائم .. اها هنا مشينا ناحية قبيلة في سهول كردفان . تتصوري لقايت ما قربنا يمكن مسافة مائة متر منهم ما في واحد قام من مكانه والرجال راقدين في سرايرهم ينظفوا قي اسنانهم من اللحم . والنسوان يطبخن . لمن بقى لينا حوالي سبعين متر . شافع صغير عمر عشر سنوات دخل جوه الخيمة وجا شايل ليه رشاش .. تعرفي فتح فينا و هبانا ليك نار لمن طار لينا ... انا حصاني دا فجاه انبرم من تحتي ولقيت ليك نفسي راكب بالمقلوب . وشيبوب اخوي دا نطه من الحصان وجري برجوله لمن سبق الحصان . ونحن جارين نسمع ليك في ضحك النسوان والرجال في ظهورنا مثل السكاكين .. تقولي لي نغزو هنا في البلد دي ؟؟؟

وسكت الاثنين مره اخرى وعبلة عادت لقراءة اللوحات من جديد ووصلت الى محلات ود الجاك للتنباك .. في نفس تلك اللحظة عنتره وبصورة آلية توقف عند المحل وفجاه صاحب المحل متعود جا جاري ناحية عنتره بكيسه المعتاد . ومره ثانية تنتبه عبله . عنتره تغشني ماقلت خليته .

عنتره : يا عبله دا ما بدل صعوت شيبوب اللقيته في الجلابية ورميته

عبله : وسيد المحل عرفك كيف رميت كيس شيبوب ؟؟؟

عنتره يحس بالزنقة وانه انقبض وينفعل باعلى صوته : هو انتي لازم تحكيها للنهاية ما كفاية ابوك انتو مسلطين علي ولا شنو ؟؟
وهي تستدرك : خلاص خلاص خلاص ما تفضحنا ... انت سف بس ما قدامي واول ما نتزوج تسيبه اتفقنا ؟؟؟

عنتره : اتفقنا

درديري كباشي

18-06-2009, 03:11 AM

الحلقة الثالثة

رجع الاثنان للصمت من جديد وعادت عبلة تراقب في معالم الطريق وهي سارحة . تفكر في حكاية عنتره وتركه للغزو . وقصة الطفل الصغير الذي ارعبهم بالسلاح الناري . خافت عبلة ان يكون عنتره قد تخلى عن شجاعته او قل تخلت عنه الشجاعة . وعندما وصلت لهذه النقطة قررت ان تستفذه بذكر احد قصائده في الفخر والشجاعة .وفعلا بدات تسرد القصيدة بصوت عالي :

اذا كشف الزمان لك القناعا..........ومد اليك صرف الدهر باعا
فلا تخش المنية واقتحمها ..........ودافع ما استطعت لها دفاعا
ولا تختر فراشا من حرير ...........ولا تبك المنازل والبقاعا
وحولك نسوة يندبن حزنا........... ويهتكتن البراقع واللفاعا
يقول لك الطبيب دواك عندي........ادا ما جس كفك و الدراعا
ولو عرف الطبيب دواء داء.........يرد الموت ما قاسي النزاعا
وفي يوم المصانع قد تركنا..........لنا بفعالنا خبرا مشاعا
اقمنا بالدوابل سوف حرب..........وصيرنا النفوس لها متاعا
حصاني كان دلال المنايا ..........فخاض غمارها وشرى وباعا
وسيفي كان في الهيجا طبيبا............يداوي راس من يشكو الصداعا
انا العبد الدي خبرت عنه .............وقد عاينتني فدع السماعا
ولو ارسلت رمحي مع جبان............لكان بهيبتي يلقى السباعا
ملأت الارض خوفا من حسامي........وخصمي لم يجد فيها اتساعا
ادا الابطال فرت خوف بأسي..........ترى الاقطار باعا او دراعا

وفعلا القصيدة تستفذ عنتره ويلتفت ناحية عبلة مستاءا . ويقول لها عنتره : قصدك شنو يعني يا عبلة انا اصبحت جبانا . يا عبلة لازم تعرفي ان الحرب كر وفر . ومن ثم انا لوعرضت نفسي لاسلحتهم الفتاكة الجديدة هذه ممكن طفل صغير ان يعجل بمنيتي قبل ان اقترب منه . وكوني لا اعرض نفسي للهلاك هذا لا يعني اني جبان .

عبلة : انا ما قلت انت اصبحت جبانا كل الذي قلته هو اني كررت واحدة من قصائدك الرائعة التي ظل العرب زمنا طويلا يتقنون بها .
ثم مين الطلب منك تقابل الاسلحة الفتاكة بسيفك . لماذا لاتتدرب انت على اسلحتهم وترجع وترعب الناس من جديد حتى باسلحتهم الجديدة هذه .

تفتكري ما فكرت في الموضوع : رحت اسجل عند ناس الخدمة الالزامية قالوا لي ما في تدريب للاجانب . قلت ليهم انا يا اخوان امي سودانية . قالوا لي وفاكرنا نحن يهود . هنا الجنسية السودانية تمنح للاب فقط .

عبلة : بعدين من وين عرفت ان امك سودانية ، غايتو جنس لبط ... من جينا السودان دا كملنا سنتين ما لاقتنا مره سودانية اسمها زبيبة .

عنتره : عبلة ما تزيديني غيظ على غيظي اسكتي انطمي . اهو نحن قربنا من السينما اخيرا .

درديري كباشي

18-06-2009, 03:17 AM

الحلقة الرابعة من مسلسل عنترة وعبلة في السودان

فعلا يصل عنترة وعبلة السينما ويحضروا الفلم الهندي لمدة ساعتين . عنتره لا يحب الافلام الهندية هو يفضل الافلام الحربية الكلاسيكية امثال جنكيز خان وهولاكو والحروب اليونانية . لانها تذكره بايامه ايام الغزو والسيطره على قبائل العرب . اما الافلام الهندية فهو يدخلها مجاملة لعبلة لانها تحبها .
بعدما خلص الفلم خرجوا مع الجمهور . اعتاد عنتره مشاهدة الجمهور له وتعجبهم من جسمه الضخم وقد كان طوله يتجاوز المترين غير كتفيه العريضين بعرض متر تقريبا . ولكنه كان يغار عندما يعلقون او يتغزلون في جمال عبلة . بل اكثر من مرة يكاد يفتك باحد هؤلاء المتغزلين لولا ان ترجته عبلة .
عنتره معلقا :اليكره في الافلام الهندية هو شدة المبالغة وهو بطل الفلم الهندي دا لازم يكون . شكله جميل وجسمه قوي وغناي ورقاص وشجاع ومستعد يدق مدرسة ثانوية كاملة بناظرها .
ترد عبلة مغتاظه : ما انت كنت تسك قبيلة كاملة قدامك وتصف (السكه) في شعرك في حد كلمك او ا نكرك وقال عليك بالغت
عنترة : يبادلها غيظ بغيظ : شنو يا ولية انت مفروسه مني مالك وواقفه لي في حلقي أي كلمة اقولها ترديها لي ثم انت مالك قالو ليك انت من اصول هندية ؟؟؟
عبلة : اسكت ساي انا مقهورة منك قهر شديد
عنتره : لي في شنو يا بنت العم ؟؟؟؟
عبلة : انت النهار بتقضيه وين ؟؟؟؟؟؟؟
عنترة : يعني مع الاصحاب والاصدقاء مرات في الحدائق ومرات في شارع النيل
عبلة : شارع النييييل؟؟؟ انا اقول ليك انت وشلة الصعاليك اصحابك ما بتمشوا تتسكعوا في شوارع العرضة تشاغلوا بنات جامعة الاحفاد ؟؟؟؟؟
عنتره : انا ؟؟؟؟؟؟؟
عبلة : ومال انا .. فاكرني قاعدة في البيت وما جايبة خبر
عنتره :يا بنت العم في حد عنده واحده بجمالك وحلاوتك يمشي يدور على اشكال ثانية .
عبلة : بطل البكش بتاعك دا وهو انت سائل فيني مما جينا السودان اشوفك مره في الاسبوع .
عنتره شعر انه الجو اصبح معكر وان اوراقه كلها انكشفت فقرر ان يلطف الجو بانشاد احدى قصائده في عبلة :

هَلْ غَادَرَ الْشُّعَرَاءُ مِنْ مُتَرَدَّمِ &&& أمْ هَل عَرَفْتَ الْدَّارَ بَعْدَ تَوَهُّمِ

يَا دارَ عَبْلَةَ بِالَجِوَاءِ تَكَلَّمِي &&& وَعِمِي صَبَاحاً دارَ عَبْلَةَ وَاسْلَمِي

ولقد ذكرتك والرماح نواهل &&& مني وبيض الهند تقطر من دمي

فوودت تقبيل السيوف لانها &&& لمعت كبارق ثغرك المبتســـــــم

بعد هذه الابيات تاخذ عبلة تنهيدة طويلة وتعقب : كانت ايام نتمنى ان تعود . ويواصل الحبيبين السير نحو البيت في صمت آخر دون أي تعقيب .

اول ما يصل عنتره قرب بيت عبلة . تنزل هي وتشعر ان عنترة ليست لديه رغبة في النزول .وتساله
عبلة : شنو ماعندك رغبة تنزل تسلم على عمك كمان ؟؟؟؟
عنتره : اعزريني نفسياتي تعبانة وخايف اغلط معاه في كلمة تصبحي على خير وسلمي عليه
عبلة : اها طيب شاو تصبح على خير
عنترة : وانت من اهله .

درديري كباشي

19-06-2009, 05:54 AM

الحلقة الخامسة من مسلسل عنترة وعبلة في السودان

بعد ان ينزل عنترة عبلة في بيت اهلها يقود سيارته متجها ناحية البيت وهو يغلي من الغضب . لانه يعرف انه احد اخوانه قد وشى بحكاية طالبات جامعة الاحفاد هذه . وفعلا وصل البيت وفتح الباب بعنف .
امه زبيبة عرفت انه عنترة غاضب من احد اخوانه لذلك جرت ناحية الصالون حتى تحجزه منهم لانها تعرف ان عنتره عندما يكون غاضبا سيكون خطر جدا وضرباته قاتلة . جرت ناحيته ونسال فيه : خيريا ولدي عنتره مالك غضبان كده في شي.
عقب عنتره :تعرفي يايمه واحد من اولادك الحاقدين ديل فتني مع عبلة وقال انا بالنهار بمشي اشاغل بنات الجامعة واتسكع هناك .
زبيبة : افو يا ولدي في راجل عندو خطيبة بجمال عبلة يمش يدور على غيرها .
عنتره : انت كمان يايمه صدقتي الكلام دا؟؟؟؟
هنا يتدخل شيبوب معترفا بذنبه مما خفف حدة غضب عنتره : عفوا اخوي عنتره انا القلت الكلام لكن انا ما كنت قاصد وهي جرجرتني في الكلام .
عنتره :جرجرتك كيف يعني ؟؟؟؟
شيبوب : تذكر الرحلة المشيناها في الاسبوع الماضي لجنائن الكدرو . كنا انا وهي نتونس جنب النيل . قامت سالتني . قالت انت يا شيبوب بتقضوا النهار وين وانتو ماعندكم عمل معين .. قلت ليها مرات بنلف نروح امدرمان مرات شارع النيل ... قالت لي امدرمان وين تحديدا . .. قلت ليها يعني شارع الموردة .. شارع الاربيعين ... العرضة ...
سالتني زي الساعة كم يعني ؟؟؟؟ قلت ليها حوالي اثناشر لاثنين كده ..... سالتني لكن في الوقت دا الشوارع ما بتكون زحمة بالماره ... قلت ليها نعم خاصة المكان داك فيه جامعتين جامعة امدرمان وجامعة الاحفاد ..... قام سكتت كدا شوية وقالت ... يومي بتمشو هناك ...قلت ليها تقريبا ....اها هي خمنت الباقي براها ..
عنتره : بعد ان هدا شويه ... على كل حال خير انا بحاول احل معاها الموضوع دا واراضيها .
زبيبة : هو انت اخبار عرسكم شنو ابوها مش وافق على خطوبتكم خلاص .
عنتره : يا يمه هي دي موافقة .. قال موافق لكن شرط المهر يكون مائة من النوق العصافير . وانا مش عارف اجيبها من وين ولا عارف هي عاملة كيف النوق العصافير بتاعته دي . وانا خايف يكون قاطعه من راسه .

زبيبة : اصبر يا ولدي بتنحل وبعدين البنت رايداك وانت لازم تخلص ليها وبطل النطيط والصياعة بتاعتك الاتعلمتها دي .
عنتره : يا يمه احلف ليك بشنو . هو صحيح انا بمشي واتسكع هناك مع الاصحاب لكن ماعندي أي غرض بالبنات . ولكن بباريهم عشان ما افضل لوحدي فقط .

زبيبة : المهم انت حاول فهما وما تخليها تزعل منك .
عنتره : حاضر يمه وليك علي بكره اقبل راسها كمان .

درديري كباشي

19-06-2009, 05:55 AM

الحلقة السادسة

في صباح اليوم التالي استيقظ عنتره من النوم متاخرا بعض الظهر معتزرا من ناس شيبوب عن جولة الظهر اليومية حتى علق شيبوب لعنتره : خلاص هرشوك . عنتره ضحك واكمل معلقا : مين يقدر يهرش اخوك عنتره . لكن انا فكرت في الموضوع ولقيت انه فيه هيافة . شنو يعني نقطع المشوار دا كله من الجريف ( بختكم يا ناس الجريف سكنت معاكم عنترة بن شداد ) لغاية امدرمان عشان تضحك مع بنت او تاخذ رقم جوالها . انا حا اخرج العصر عشان اطلع في تمرين الجري اليومي المعتاد ونتلاقى هنا بعد المغرب . ( اعتاد عنتره بعد ان استقر في السودان واجرت الاسرة بيتا بالخرطوم بحي الجريف . لقد اعجبهم الحي اولا لقربه من النيل وثانيا لطبيعة الجناين والمناظر الخلابة . وعنتره اصلا لم تعجبة الحركة العمرانية والعمائر الشاهقة والغابات الاسمنتية . بعكس عمه مالك والد عبله والذي سكن في فيلا ثلاث ادوار بحي الاملاك الخرطوم بحري ( جارنا يعني ) . اعتاد عنتره ان يخرج في جريه يومية (نظام جكة وكدا ) محازيا النيل الازرق بدءا من الجريف مارا ببري ثم ارض معارض الخرطوم ونادي الشرطة ووزارة التربية وداخليات جامعة الخرطوم ومكملا شارع النيل حتى يصل قاعة الصداقة وفندق الهلتون وكبري النيل الابيض ثم يعود مارا بنفس المعالم . بعض الناس تيمنا به وبجسمه الضخم يشاركونه في هذه الجريه كل حسب قدرته . اما هو خاف ان التحرك بالسيارة فقط ان يصيب عضلاته بالترهل ويفقده قوته وقدراته الجسمانية لذلك حرص على هذا المشوار الرياضي .
وفعلا بالعصر طلع عنتره في جريته اليومية . وهو عائدا قرابة المغرب . رن تلفونه (الجوال ) رفعه ليكتشف انها عبله .
عبلة : عنتره انت وين؟؟؟؟
عنتره : انا في الجرية اليومية (الجكة)
عبله : عايزاك ضروري لازم تجي قبل المغرب
عنتره : خير في شنو يا عبلة
عبلة : عندي صاحبتي اسمها ميسون عايزة تتعرف عليك
عنتره : اشمعنه دي من دون صاحباتك عايزة تتعرف علي؟؟؟؟
عبلة : اصحلها هي طالبة ما جستير في كلية الاداب جامعة الخرطوم وعايزة تناقش معاك بعض المواضيع المتعلقة برسالتها . تتصور يا عنتره ابوها بروفيسور في نفس الجامعة وقالت ابوها عمل رسالة الدكتوره في اشعارك . شوف المفارقات يا عنتره هو عمل دكتوراة من شعرك وانت ما عندك شهادة الابتدائية . عشان كدا يا عنتر من زمان اقول ليك اتعلم الكتابة والقراية انت تقول لي ليه انا عاوز اشتغل كاتب عرضحالات اها هسع خم وصر .
عنتره: شنو انت خم وصر وكلام السودانيين العلقت فيه دا على كل حال انا اصل البيت ونص ساعة اكون معاكم ونتفاهم في المواضيع دي.
وفعلا عنترة يصل البيت ويستحم سريع ويغير ملابسه وهو خارج بسرعة امه تقلق عليه وتساله
زبيبة : عنتره خير مالك مستعجل كده في شنو يا ولدي
عنتره : يمه عبله اتصلت وعايزاني في موضوع مهم وما عايز اتاخر عليها .
زبيبة : خير لعله ما في مشكلة
عنتره : لا بس واحدة صاحبتها عايزة تناقش معاي مواضيع تتعلق بدراستها .
زبيبة : سوق براحة يا ولدي ما في حاجة طايرة وما في داعي للاستعجال وتاذى روحك .
عنترة يهمس في سره : غايتو امي دي بقت سودانية عديل كده حتى في كلامها
ويخرج عنترة مشغلا سيارته ومتجها ناحية كبري المنشية الجديد حتى يختصر المسافة . وهو سائق سيارته باستعجال فجاه يسمع صوت سيارة الشرطة وانذار والشرطي يخاطبه بالميكرفون .
الشرطي : وقف عندك يازول على جنب الطريق
عنتره يهدي السياره ويقف ينزل الشرطي ويجي ناحيتة .
الشرطي : مالك يا راجل جاري بسرعة كده انت فاكر نفسك مين
عنتره : انا عنتره بن شداد
الشرطي : انشاء الله تكون كمال شداد .... جاري كدا مالك؟؟؟
عنتره في الحقيقة انا كنت مستعجل وجاني تلفون ..
الشرطي : ماتطول الموضوع وتحكي لي قصة وعليك مخالفة مرورية غرامة خمسة الف جنيه هاك القسيمة دي وسددها مره ثانية بسحب رخصتك سامع ولا لا.....؟؟؟؟؟
عنتره ياخذ القسيمة ويدور سيارته مستانفا المشوار ناحية بيت عبلة

عوض الكريم الخواض

19-06-2009, 10:58 AM

أبدعت يا درديرى ...
قالب كوميدى لذيذ ... :d:d
انت يا زول قاعد تألف لى محمد نعيم سعد وأصحابو ولا شنو .

littlestar

19-06-2009, 02:21 PM

والله يا أبو الدر أبدعت
وفى إنتظارك تتم لينا بقية المسلسل
بس ما يكون لاحق مسلسلاتنا التركيه اليومين ديل

سرحة:
تخيل يقوم واحد يتكسر فى عبلة
بعد أكتر من ألفين سنه
يبقى بيحب فى تراث بث

آه نسيت
والله حبابك والدار
بوجودك أكيد بيكون ليها طعم تانى ونكهة تانية
زى نكهة البيتزا فى المطاعم الفخمة ;):d:d:d

عوض صقير

19-06-2009, 11:19 PM

إن تغدفي دونى القناع فانني ****طب بأخذ الفارس المستلئم

أها سدد المخالفة ؟

درديري كباشي

20-06-2009, 01:12 AM

أبدعت يا درديرى ...
قالب كوميدى لذيذ ... :d:d
انت يا زول قاعد تألف لى محمد نعيم سعد وأصحابو ولا شنو .

مشكور يا خواض ان بقى كدي ارجوني الجيب الباقي واجيكم

درديري كباشي

20-06-2009, 01:14 AM

درديري كباشي

20-06-2009, 01:15 AM

إن تغدفي دونى القناع فانني ****طب بأخذ الفارس المستلئم

أها سدد المخالفة ؟

شاكرين يا صقر باقي ليك البيت دا بيسدد المخالفة الهم الا يكون بيت ناصية في الدرجة

أبوريلان

20-06-2009, 02:07 AM

يادرديري عليه الله بدون فواصل
أنت قلت ما بتريد الأفلام الهندية
أها في إنتظارك
ياخي والله العظيم إبداع حد الثمالة .

درديري كباشي

20-06-2009, 04:07 AM

يادرديري عليه الله بدون فواصل
أنت قلت ما بتريد الأفلام الهندية
أها في إنتظارك
ياخي والله العظيم إبداع حد الثمالة .

مشكور يا ابو اليسر وانا جايي
*********************************************

جاي ليك يانورة آفة
آفة للسوس البنقر فوق عشيما داخرو فيك
اصلا لما ندور نجيك بجيك
لا بتعكسني المسافة
لا بيقيف بيناتنا عارض
لا الظروف تمنع تجيبني
ولا من الايام مخافة

درديري كباشي

20-06-2009, 04:11 AM

الحلقة السابعة

وصل عنتره الى بيت عبلة او بالاصح بيت عمه مالك وطرق الباب ودخل ليجد عبلة وصديقتها في انتظاره على الحديقه ومعهم ادوات الشاي والكيك وطبق الفواكه . اول ما يقترب منهن تقف ميسون مندهشه تشهق قائلة عنتره ؟؟؟ نفس وصف الكتب تماما .
يبتسم عنتره ويلعق : وانت كمان جميلة ورائعة
عبلة مستاءه من هذا الغزل المشكوف وناهرة : عنتره ؟؟؟؟
ميسون : ماتسيبي لينا نصيب معاك هو عنتره لا تريده يتغزل في غيرك ؟؟
عبلة : اذا كنت انا بغير من مدحه لحصانه الادهم هل ساقبل مغازلة فتاه .
ميسون : طيب بالمناسبة دي انا حابدا بيك انت يا عبلة ( ماهي اجمل ابيات قالها عنتره فيك وانت تحتفظي وتعتزي بها
عبلة : هي ابيات لا احد يشك في انها اجمل ابيات قيلت في الحب حتى الان وهي :

ولقد ذكرتك والرماح نواهل مني و بيض الهند تقطر من دمي

فأردت تقبيل السيوف لأنها لمعت كبارق ثغرك المتبسم

عبلة مواصة : تخيلي شخص يقول ليك تذكرتك والسيوف يقطر منها الدم بعد ان جرحتني وقد ذكرتني بك عندما لمعت لانها تشبه فمك عندما يبتسم لدرجة اني كدت ان اقبلها .شخص يشعر بقمة الحب والشوق في قمة الالم والعذاب .

ميسون : وااااااااااااااااااو
عنتره : شنو وااااو دي يعني بتقلدي اوبرا ؟؟
ميسون : انت كمان بتعرف اوبرا ؟؟؟
عنتره : طبعا وانا اول اهتماماتي بمجرد عودتنا وحضورنا للسودان كان شاغلي ما هو الشي الذي لهى الام العربية عنا وجعلونا مقررات مدرسية مركونة في المكتبات لا يتذكرونا الا ايام الامتحانات وسرعان ما ينسوننا. وهو بدلا من ان يستمتعوا باشعارنا وبطولاتنا وقصصنا راحوا يبحثون عن ابطال اخرين . وقدمها لهم الغرب او الفرنجة في شكل ممثلين امثال توم كروز ومزيعين امثال اوبرا ولاعبي كرة قدم امثال مسي ورولاندينو وغيرهم . وحتى هؤلاء هم بشر ولكن بمواصفات خرعة وخليعة وماجنة ولم يكونوا غدوة باي صفة سوى باب اللهو الذي برعوا فيه وهي التي زادت اعجاب الناس بهم وللاسف معظمهم من اهلنا العرب .

ميسون : بعد ان تسكت برهة ... تكمل .. حقيقة يا عنتره انت اجبت على اسئلة كثيرة وادهشتني حتى قبل ان اسالها . ولكن عندي سؤال لم تجب عليه وان كان اجابتك السابقة غطت جزء كبير منه . ماهي المفارقات والصعوبات التي واجهتك في رحلتكم الزمكانية ؟؟؟؟
عنتره مندهشا ومستغربا : ماذا تقصدين برحلتنا الزمكانية وماذا تعني هذه الكلمة هل هي عربية ؟؟؟
ميسون : عنتره لازم تعرف انك لم تنتقل من مكانك في الجزيرة العربية الى السودان في نفس الزمن الذي كنت تعيش فيه . بمعنى حاليا بلدك صار اسمها المملكة العربية السعودية واصبحت دولة غنية وواحدة من اكبر الدولة المنتجة للبترول . كلمة بترول هذه قبل ماتسالني هو مصطلح مقسوط به النفط والذي كنتم تستخدمونه في زمانكم فيما يعرف بالقطران وكنتم تدهنون به بيوت الشعر حتى لاتتسرب منها مياه الامطار . اما الان فاصبح له شان واصبح اغلى ماده سائلة تخدم الانسان في عدة مجالات . هذه المعلومات اكيد عرفتها بدليل انك تقود سياره همر تعمل بهذه المادة .
وحتى عيون الجوى التي ذكرتها في اشعارك وحيث كانت ديار محبوبتك عبله . هي الان منطقه زراعيه في المملكة العربية السعودية بها اكبر مرزعة لتربية الدواجن بالشرق الاوسط تعرف بدواجن الوطنية . ولكن لازالت تحتفظ بسحرها وطبيعتها الخلاقة وجوها المنعش .
عنتره معقبا ومبتسما : يبدو انك ستخلصي رسالتك بسؤالين فقط .
ميسون :
لا طبعا لازال راسي يمتليء بالتساؤلات لكن قبل ذلك اريد ان استمع لاحد قصائدك الرائعة بصوتك كاستراحة بين الاسئلة .
عنتره : اامري اي القصائد تريدين
ميسون : قصيدة ريح الصبا
عنتره : تفضلي القصيدة

إذا ريحُ الصَّبا هبَّت أصيلا
شفت بهبوبها قلباََ عَليلا
و جاءَتني تُخبِّر أن قومي
بِمن أهواه قد جدُّوا الرحيلا
و ما حنُّوا على من خلَّفوه
بوادي الرَّمل منطرِحاً جديلا
يحِنُّ صبابةً و يهيمُ وجداً
إليهم كلما ساقوا الحُمولا
ألا يا عبل إن خانوا عهُودي
و كان أبوكِ لا يَرعَى الجميلا
حملتُ الضَّيم و الهِجران جُهدي
على رَغمي و خالفت العَذولا
عركتُ نوائبَ الأيامِ حتى
رأيتُ كَثيرها عِندي قليلا
و عاداني غُرابُ البَين حتى
كأَني قد قتلتُ له قَتيلا
و قد غَنَّى على الأغصان طَيرٌ
بصوتِ حَنينه يشفي الغَليلا
بكى فأعرتُهُ أجفان عيني
و نَاحَ فزاد إعوالِي عَويلا
فقلتُ له جرَحتَ صميم قلبي
و أبدى نَوحُكَ الدَّاءَ الدخيلا
و ما أبقيتَ في جَفني دُموعاً
و لا جِسماً أعِيشُ به نحيلا
و لا أبقى لي الهجرانُ صبراً
لكي ألقى المنازِلَ و الطُّلولا
ألِفتُ السُّقمَ حتى صار جِسمي
إذا فقد الضَّنى أمسَى عليلا
و لو أني كَشَفتُ الدِّرع عنِّي
رأيت وراءه رسماً مُحيلا
و في الرسمِ المُحيلِ حُسامُ نفسٍ
يفللُ حدُّهُ السيفَ الصقيلا

درديري كباشي

20-06-2009, 04:14 AM

الحلقة الثامنة

لازال عنتره يجلس مع عبلة وصديقتها في حديقة منزل اهل عبلة وتواصل صديقة عبلة ميسون اسئلتها على عنتره بعد ما طلبت منه القاء قصيدة ريح الصبا .
ميسون تسال استاذ عنتره : بعض قصائدك خصصتها لمدح حصانك الادهم هل يمكن ان نشبه اهتمامكم بالحصان في ذلك الزمن هو اشبه بمعاملة شباب هذا الزمن لسياراتهم حيث انهم يزينونها ويعلقون عليها انواع من المناظر والعطور الخاصة بالسيارات كنوع من التدليل ؟؟
عنتره : لا يوجد ادنى وجه للمقارنة او الشبه ذلك لان الحصان هو حيوان له روح وله احساس والحصان ممكن ان يكون جبانا او شجاعا مثل الانسان تماما . لذلك الحصان عندما يكون جبانا ونافرا من خوض الصعاب سيعرض حياته وحياة صاحبه للخطر وبالعكس تماما عندما يكون شجاعا هذه الروح تكون عادة متبادله بين الحصان وصاحبه لذلك انا مدحت الادهم في هذه الناحية هو قد كان عنده رغبه عارمه في خوض المعارك وتلقي الرماح بصدره وكنت احس بانه له ثقة كبيرة في واني قادر على حمايته . اما السيارات التي تتحدثين عنها هذه فهي حديد جامد اصم لا يملك احساسا وتدليل الشباب لها هو دليل على تدليلهم هم انفسهم وعدم احساسهم بالمسئولية . لان هذه المبالغ التي يصرفونها على الاكسسوارات كان الاولى ان تصرف على من هم في حاجة الى رغيف من الخبذ واهلكهم الجوع والمرض.
ميسون : لقد افحمتني فعلا يا استاذ عنتره وفعلا من ابياتك تحس ان هنالك مشاعر متبادله بينك وبين الحصان الادهم وعبله ربما معها حق عندما تغار من مدحك للادهم
لو طلبت منك القاء بعض ما قلته في الادهم على ممكن نسمعه .
عنتره : لا يوجد مانع وتفضليها:

لـمَّا رَأيْتُ القَوْمَ أقْبَلَ جَمْعُهُـمْ يَتَـذَامَرُونَ كَرَرْتُ غَيْرَ مُذَمَّـمِ

يَدْعُـونَ عَنْتَرَ والرِّماحُ كأَنَّهـا أشْطَـانُ بِئْـرٍ في لَبانِ الأَدْهَـمِ

مازِلْـتُ أَرْمِيهُـمْ بِثُغْرَةِ نَحْـرِهِ ولِبـانِهِ حَتَّـى تَسَـرْبَلَ بِالـدَّمِ

فَـازْوَرَّ مِنْ وَقْـعِ القَنا بِلِبانِـهِ وشَـكَا إِلَىَّ بِعَبْـرَةٍ وَتَحَمْحُـمِ

لو كانَ يَدْرِي مَا المُحاوَرَةُ اشْتَكَى وَلَـكانَ لو عَلِمْ الكَلامَ مُكَلِّمِـي

ولقَـدْ شَفَى نَفْسي وَأَذهَبَ سُقْمَهَـا قِيْلُ الفَـوارِسِ وَيْكَ عَنْتَرَ أَقْـدِمِ

ميسون : جميلة الابيات يا استاذنا عنتره وفعلا على رايك لو نطق الادهم لقال لك كلام كثير بل انا عندي احساس ان الادهم نفسه كان شاعرا في عالم الخيول وربما له قصائد في مدحك اكثر من التي ذكرتها انت في مدحه .
عنتره ضاحكا : هكذا ياميسون حببتيني فيه اكثر وشوقتيني لو سمعت قصائده .
عبلة محتجة : حا تفضلوا تجيبوا في سيرة الحصان دا كثير انا راح ادخل جوة واسيبكم .
ميسون : عبلة افهم من كدا نك بتغيري بالجد من الادهم .
عبلة : ما مسالة اغير او ما اغير وهو حيوان طلع او نزل لكن انا ماممكن افضل ساكته بدون موضوع مشترك بيننا وانتوا في حوار مفتوح حول الحصان .
ميسون : خلاص يا عبلة معاك حق بس انا عندى باب كامل من رسالتي للماجستير يتحدث عن حصان عنتره الادهم . لدرجة اني بالمعاومات التي جمعتا كنت عاوزة اقدمها لاحد الفنانين حتى يرسم صورة من هذه المواصفات لهذا الحصان الذي لم يتلقى حيوان مدح مثله على مدى التاريخ .ولكن من باب التنويع سنترك موضوع الحصان ونخوض في مواضيع اخرى .
ميسون : بالمناسبة يا استاذ عنتره عندي عمي رجل اعمال اسمه سيد احمد حايجي ياخذني بعد شوية ونفسه يتعرف عليك . ربما تدخل معه في احد مشروعاته التجاريه . هو لمح لي في انه ممكن يعمل شركة اعلان ونشر بمشاركتك .
عنتره : بس انا ماعندي راس مال اشارك به ؟
ميسون : هو يقول ان راسمالك هو موهبتك الشعريه الفذة نحن ما نستعجل الامور هو راح يصل ويشرح لك فكرة الشركة .
عبلة يبدو عليها السرور : عنتره ماتقفل الباب قبل ما يفتح فكر في الموضوع وانت نسيت موضوع النوق العصافير ولا شنو ؟؟؟
عنتره : هو في شئ غيرها شاغلني حتى انساها .
وفعلا لا تمر لحظات الا ويسمع طرق على الباب ليدخل بعد ذلك عم ميسون .

درديري كباشي

20-06-2009, 09:41 PM

الحلقة التاسعة

يدخل عم ميسون مسلما على عنترة سلاما سودانيا خالصا ( وكيفك يا ابو العناتر) بالاحضان مع (لبعات متواصلة ) على الظهر . عنتره لم يستغرب طريقة السلام لانه تعود عليها . وتهيء عبلة كرسيا لعم ميسون ليجلس قربهم .
سيد احمد : تعرف ياعنترة لمن سمعت بانك هاجرت الى السودان في الرحلة الزمكانية العجيبة دي اولا كنت مستبعد الموضوع خالص وقلت هذا فلم خيال علمي او قلت شخص اجاد التمثيل واستقل الشبه . ولكن من الحقائق الظهرت بعد ذلك انا لازلت مندهش .
عنتره : يا دي الرحلة الزمكانية الشابكني ليها دي . يا اخوان نحن وعائلة عنتره فجاه لقينا روحنا في مينا قيل لنا بعد ذلك انه يسمى ميناء جده ركبنا وعبرنا الى السودان . في الاول كنا مندهشين من المباني والمركبات والشوارع لكن بعد سنتين اعتقد اننا تعودنا بعض الشئ . ولكن قولي يا اخي سيد احمد ميسون قالت لي انك رجل اعمال .ماهي طبيعة عملك ؟؟؟
سيد احمد :في الحقيقية انا عندي مطابع ودار نشر كما عندي وكالة سفر وسياحة لها عدة فروع حول العالم .
عنتره : طيب كيف يمكن ان افيدك انا او اشتغل معك .
سيد احمد : تعجبني يا ابو العناتر انت جبت الموضوع من الاخر . في الحقيقة انا مفكر اعمل شركة دعاية واعلان وعايزك انت تدخل معاي . راسمالك موهبتك الشعريه ,
عنتره : كيف ممكن موهبتي الشعريه تتحول لدعاية واعلان؟
سيد احمد : اصبر ما انا جاييك واحده واحده يا زول انت مستعجل مالك . اولا طبعا حا تجي انتخابات قريب وسيوزع السودان لدوائر انتخابية وراح يتنافس المرشحين في تسويق انفسهم . يعني مثلا الواحد لمن يقول فيه عنتره قصيده مدح اكيد ما في حد راح ينافسه .وراح نعمل تسعيره للقصيدة مثلا البيت بمائة الف جنيه سوداني . طبعا اقصد بين الشعر ..
عنتره : ينظر بغيظ واستياء ولكن عبله تحدجه بنظره تطرد من راسه فكرة الرفض . ولكن هو يريد أي مخرج من هذه الورطه وشعر بانه بدلا من ان يكون فارسا يقطر فخرا وقوة وشجاعة سيتحول الى طبال يلمع ابناء الدوائر الدجالين ويا للكارثة . وبعقب بعد ان يحس ان هنالك خاطر سينقذه ,طيب افرض الانتخابات انتهت حا يكون شغلنا شنو بعد داك .
سيد احمد : انت فاكر عملية المدح والفخر مربوطة بالانتخابات فقط . الناس على طول عمرهم يريدون ان يمدحوا .
عنتره : اديني امثله ما تقول لي كلام عام كده .
سيد احمد : مثلا عريس محتاج لاغنية مديح لتلمعه قدام نسابته .
عنتره : عايزني اقول ليك
سيرو لبنت القبيلة سيرو للسمحة واصيلة ؟؟؟
ولا الجوافة طويل واخضر قيافة
سيد احمد: العفو يا عنتره ما نحن عايزنك تعمل لينا نقلة نوعيه في اغاني السيرة دي وتغير الكلام الفارغ دا . دا ما دورك انت .
عنتره : شوف يا ابو السيد انا شعري حتى اساتذة اللغة العربية يفهموه بصعوبة عايزني كمان اكتب قصائد يغنوها البنات والطقاقات . يعني مثلا كلام مثل :

طَـوْراً يُـجَرَّدُ للطَّعانِ وتَـارَةً

يَأْوِي إلى حَصِدِ القِسِيِّ عَرَمْـرِمِ
يُخْبِـركِ مَنْ شَهَدَ الوَقيعَةَ أنَّنِـي

أَغْشى الوَغَى وأَعِفُّ عِنْد المَغْنَـمِ
ومُـدَّجِجٍ كَـرِهَ الكُماةُ نِزَالَـهُ

لامُمْعـنٍ هَـرَباً ولا مُسْتَسْلِـمِ
جَـادَتْ لهُ كَفِّي بِعاجِلِ طَعْنـةٍ

بِمُثَقَّـفٍ صَدْقِ الكُعُوبِ مُقَـوَّمِ
فَشَكَكْـتُ بِالرُّمْحِ الأَصَمِّ ثِيابـهُ

ليـسَ الكَريمُ على القَنا بِمُحَـرَّمِ
لـمَّا رَآنِي قَـدْ نَزَلـتُ أُريـدُهُ

أَبْـدَى نَواجِـذَهُ لِغَيـرِ تَبَسُّـمِ

اها قصيدة زي دي منو تغنيها من المغنيات

سيد احمد :
هو انت لازم تقرطها كده ما تستعمل لغة سهلة شوية تقعد تقول لي ومدجج كره الكماة نزاله دي انا حسع ما عارف الكماة ديل منو . ياخي ما تقفلها من كل النواحي .
هنا تتدخل عبلة وتشعر ان عنتر يتجه نحو تطيير الفرصة
عبلة : معليش يا عم سيد احمد ادينا فرصة ندرس المشروع ويعدين نتصل عليكم
سيد احمد : يسلم فمك يا عبله ودا عين العقل انتو ادرسوا المشروع من كل النواحي وبعدين نرجع ونكمل باقي اتفاقنا .

درديري كباشي

20-06-2009, 09:48 PM

الحلقة العاشره :
تذهب ميسون مع عمها بعد ان ترك عم ميسون كرته لعنتره حتى يتصل به اذا اقتنع بمشروع الشراكه ، ليتركا الحبيبين وحدهما في الحديقة يتناقشون في ابعاد الموضوع .

عتنره : يا عبلة انا الكلام القالوا سيد احمد دا ما دخل راسي يعني شنو انا اقعد االف اغاني سيرة او امدح مرشحين دجالين بصفات ما فيهم . ثم انا اساسا لا اعرف استخدم الشعر الركيك المنتشر حاليا ولو كتبت ليهم بلغتي المعروفه ما حد راح يفهم حاجة اذا الموضوع كله ما راح يكون فيه فايده .

عبلة : يا عنتره انت ما تقفل الباب واتذكر نحن ما قدامنا حل غير كده . ثم انت ما دام قدرت على الصعب والشعر المعقد ما في حد قادر يجاريك فيه بعد عدة قرون غالبك تقول ، سيروا لبت القبيلة وسيرو للسمحة واصيلة بس بالفصحة شوية

عنتره: بالفصحة كيف يعني مثلا اقول :

زفوه لذات الحسن والجمال زفوه لسليلة الآصال
زفوه لبنت الرجال كريمة الحلي الحلال

عبلة : عليك نووووور بس نجر زي دا وما شرط تشكلها . بس بعد داك سيد احمد يدور ليه على ملحن وفنانة تكون تابعة للشركة . انت ما عليك الا تنجر ليهم القصيدة وتقبض حقك . بعدين قصيدة مؤلفها عنتره اكيد ما راح تكون ساهلة وسعرها رخيص .

عنتره : بيني وبينك يا عبلة انا شاعر بالابتذال وشعرت اني بقيت رخيص . كمان لمن االف اغاني يعني حتى ما لناس محمد الامين ووردي اغني (جب جب يعني واغاني كشف كمان)

عبلة : ياخي انت ما تبخس الموضوع وبعدين انت لمن تقول كلمات رصينة وشبه فصيحة مثل البيت النجرته قبل شويه . انت راح تغير الزوق العام نفسه وتفرض عليهم بضاعة نضيفة .

عنتره : هازا راسه افقيا ، بضاعة نضيفة ، انت كمان سميتيها بضاعة ؟؟

عبلة مغتاظه وتحاول تستخدم اسلوب الضغط :

شوف يا عنتره كده من الآخر نحن ماعندنا حل غير هذا الطريق يعني ما تقعد تترفع لي تقولي انا مستواي وما بقدر انزل للمستوى دا ،بعدين انت لا عندك مهنة لاعندك شهادة . وماعندك غير عضلاتك وسيفك . وديل بعضمة لسانك قلت ما بياكلوا عيش في الزمن دا . وبعدين ابوي دا بقى يلمح لي في انه واحد من تجار الخرطوم ديل عارض عليه مهر خمستاشر بطاح وعشرين دفار وثلاثين امجاد . وابوي انت عارفه ما يقدر يمسك اعصابه قدام الاملاك .
عنتره : وهو ابوك قلب مالو بتاع عربات خلاص نسى النوق العصافير . خلاص يا عبلة انا راح اتصل بسيد احمد اليوم عشان نحدد موعد ونوقع العقد .
عبلة مبتسمه . اااي كده يا عنتره ما تضيع الفرص

درديري كباشي

01-07-2009, 06:44 AM

الحلقة 11
اتفق عنتره وعبلة على الاتصال بسيد احمد وابلاغه بموافقة عنتره . وفعلا اتصلوا به .
وعنتره مستاءا ولازال مترددا خائفا من هذه التجربة والتي ربما ستعصف بتاريخه الذهبي ولكنه وافق على مضض تحت تهديد انه يمكن ان يخسر عبلة الى الابد طالما هو لا مال له ولا وظيفة ولا سلطة و حتى لم يجد احد يخاف منه . كل الذي يحدث هو ان يقف الناس في الشارع لمشاهدة جسمه العملاق .
سيد احمد يوعدهم انه في اليوم الثاني سيحضر معه العقود المطبوعة وعليهم ان يجتمعوا في نفس المكان غد مساء .
يودع عنترة عبلة ويقود سيارته نحو بيتهم وهو تتنازعه المشاعر بين الفرح بان الازمة كادة تفرج وقريبا سيجد مهرا لعبلة . وبين الحزن لركاكة التجربة والتي سيجره اليها سيد احمد . وواضح ان سيداحمد هذا هدفه وموهبته محصورة في سبل جمع المال فقط . فهو لا يراعي ادبا ولا يكترث لقلته .
دخل عنتره بيته مهموما ويبدوا عليه الغم .
تقابله امه زبيبة .
زبيبة : سجمي عنتوري مالك ؟
عنتره (مغتاظا ) سجمي شنو يا يمه انت كمان اتعلمت كلام السودانيات دا.
زبيبة : انت ذاتك ما قلت كلمة شنو .. شنو دي كانت كلمة فصيحة . ماتصرفنا عن الموضوع الاساسي الحصل ليك شنو داخل زعلان .
عنتره : الحصل يا امي لقيت شغل
زبيبة : طيب دا شي يفرح ولا يزعل .
عنتره : مش لمن تعرفي الشغل هو شنو
زبيبة : حيكون شنو يعنو ؟؟
عنتره : حا اكتب اغاني هابطة
زبيبة .. واضعة يدها في صدرها ( ووب علي ) قلت شنو ؟؟؟؟
عنتره : زي ما سمعتي واحد من اصحاب الشركات جايي بكره يوقع معاي عقد شراكه وقال حيكون طبيعة عملي ان اكتب قصائد مديح للعرسان وللمرشحين في الانتخابات واي انواع قصائد المدح والمسخره عفوا المفخرة .
زبيبة : طيب يا ولدي وين الكلام الهابط هنا ما انت طول عمرك بتكتب قصائد تمدح فيه قبيلتك واصحابك وحصينك شنو الصعب .
عنتره : يا يمه انا كنت بمدح ناس يستاهلوا وبدون تملق او مقابل وكنت صادق في حبي ليهم . ولكن انا الان مطلوب مني التزييف ومقابل مبالغ عرفتي ليه انا مستاء والاغاني الهابطة ليست بالضرورة تعني كلمات بذيئة او كلمات شوارع يكفي انها تحمل نفاقا وتخضع الناس في بشر بغير حقيقتهم . يعني مثلا انا اوصف لي عريس بانه عمره ما زاق طعم الخمر وهو في نفس اللحظة يكون ببشر على الفنانة وهو سكران . كيف تجي دي ؟
زبيبة : يا ولدي انت ماتكون متشائم للدرجة دي وشيل الصورة السوداء دي من دماغك وانت ابدا الشغل وهو ما راح يقيدك بالسلاسل ولو الموضوع ما نفع معاك انسحب . هسع ادخل للعشاء مع اخوانك ونوم والصباح تفرج .
عنتره : اها عشاكم بشنو
زبيبة : فول وطحنية وطعمية
عنتره : وهو الثلاثي دا كتبه لينا دكتور ولا شنو ؟ ما عندك حاجة ثانية ؟
زبيبة : حاجة شنو يعني ما يا هو عشا السودان العاجبكم دا . في ملاح قرع باقي الغدا اعجن ليك فيه كسره كدا بالشطة والليمون .
عنتره ويبدوا انه الوصفة عجبته (انا كمان ) ماشي اهو دا احسن من الثلاثي المرح .بس يايمه ظبطي لي كباية لبن عشان الحرقان .
يتعشى عنتره وينام وهو يحلم بيوم غد وعن الذي تخبيه له الايام

درديري كباشي

01-07-2009, 06:45 AM

الحلقة 12

يصحو عنتره في صباح اليوم التالي متاخرا كعادته بعد الساعة العاشره ويسال عن شيبوب وامه تخبره بانه ذهب للعمل ويتساءل عنتره
عنتره : هل وجد شيبوب عملا وكيف واين .
زبيبة : يعني حيكون وكيل وزارة ولا ناظر مدرسة ما راح يفرش في سوق الخضار اشترك ليه مسطبة مع واحد اهو يلقط رزقه بدل ما يقعد عاطل .
عنتره (شعر بالتجريح): تقصدي شنو يا يمه .
زبيبة : العفو يا عنتره ما قاصداك لكن قعادك في البيت ونومك لنص النهار دا واجعني جوا قلبي . يعني نحن بعد ما تكمل الدهيبات والجايبنها معانا دي حنعمل شنو . وهي مهما كانت كتيره مصيره بتكمل . ونحن بعد ما اشترينا البيت دا وانت اشتريت عربيتك الهمر شيبوب امس اخدلو كم قطعة كدا وقال راح يشتري بكسي يلقط بيه .
عنتره يشعر ان هنالك ضغط خفي تمارسه امه لتدفعه الى قبول العمل . وان الكنز او القطع الذهبية التي احضروها معهم من عالمهم ستخلص لا محال طالما ان هنالك صرف لا يقابله دخل .
بعد العصر خرج عنتره في مشواره الرياضي وعاد قريب المغرب واستحم وخرج للموعد مع العمل لاول مره .
وصل عنتره الى بيت عبلة متاخرا بعض الشئ و وجد سيارة سيد احمد المارسيدس الشبح واقفة امام بيت ال عبلة وقف متاملا طويلا في هذه السياره الفخمة وشعر بان تيارا من التنازل بدا يسري في عروقه . طرق الباب ودخل
عنتره : سلام يا شباب ما اكون اتاخرت عليكم .
سيد احمد : ولا يهمك انا سبقتك بشوية
ميسون والتي حضرت مع عمها : نتوقع ان نشاهد عنتره جديد عصري قريبا يا عنتره كدا ولا ما كدا .
عنتره : الظاهر لايوجد مخرج اخر بس لو سمحت يا ابو السيد ما في طريقة تشوف لي ناس ابو اللمين ووردي بدلا من حكاية الدلوكة وكدا يعني .
سيد احمد : يا عنتره الموضوع دا ما ناقشناه وفرغنا منه وبعدين ابو اللمين حا يقعد يشبكنا ليك السلم السباعي وصولا وفا صوليا وقرع ويطلع ليك الغنية بعد سنتين ونحن ماعندنا زمن . ياعبد ناس القلعة ديل تديهم الاغنية الليلية الصباح تلقى عرضتها قاجة في شندي .
عنتره : طيب هو ما في مجال اخر غير مدح الناس مثلا مدح السلع والصناعات .
سيد احمد : عفارم عليك ايوة كده يا ابو العناتر طلع الافكار الخطيره . انت برضو ممكن تعمل قصايد مثلا لشركات العصاير والبسكويت وشركاة الاثاث الكثيرة ومننتشرة دي هو يعني شعبان عبد الرحيم احسن منك ولا حتى يجي ضفرك . وحتى كمان يمكن تنتشر وتعمل للشركات العالميه مثلا التايوتا يطلبوا منك قصيدة لمدح اللاندكروزر تقول ليهم

ولاندكروزر عبيته بنزين وقدته الى كسلا وكنت اظنه لا يوصل
ولقد طوى الطريق طيا واعادنا الى ديار الحبيب وزمن الوصل
وعاد محملا بالفواكه من البرتقال والجوافة وجوالا من البصل

عنتره (عايز يزوق ) : اهو يا سيد احمد انت ما شاعر كبير وما محتاج لي في حاجة .
سيد احمد : انت عايز تخمني ولا شنو دي نجره كدا على الطاير عشان توريك العينة بس وانت اكيد راح تسوي البدع .

سيد احمد يفتح شنطته الدوبلامسيه ويستخرج اوراق وشروط العقد ليقراها على عنتره وعبلة ويبدا ,

سيد احمد : في يوم كذا من شهر لقد تم الاتفاق بين سيد احمد خليل ابو ريا والذي يشار اليه بالطرف الاولى مع الاستاذ عنتره بن عمرو بن شداد العبسي ويشار اليه بالطرف الثاني .
عنتره : سيد احمد ما في داعي تقرا التفاصيل كلها ما معروفه سيق العقود اقرا لينا فقط الحقوق والواجبات يعني مثلا انا مفروض اعمل شنو والقى في المقابل شنو.

سيد احمد : تعجبني ايو كدا خليك رجل عملي وفعلا يبدا يقرا . العمل المنوط بالاستاذ عنتره هو سيكون كاتبا للسيناريو والتصور .
عنتره مقاطعا : عفوا تقصد شنو بالسيناريو . نحن اتفقنا شفاهة اني حا اكون شاعر فقط ما تحملني اشياء انا ما قدر اعملها .
سيد احمد . ولا يهمك يالعنتره نغير السيغة لكن لازم تعرف ان كلمة سيناريو هو مصطلح اجنبي بيعني كتابة التصور العام لموضوع معين وهذا التصور يشمل كل شئ بدءا من الاشعار والحوار وشكل الناس وكدا .
عنتره : طيب ما تكتبو تصور او استعملوا الكلمات العربية طالما العقد وشغلنا نفسه سيكون بالعربي .
سيد احمد : في دي معاك حق ونحن غلطانين المهم دا ملخص لوظيفتك اما حقوقك ستكون كالتالي :
اولا : راتب ثابت مقداره خمسه مليون جنيه سوداني تصرف شهريا مع نسبة في الارباح تعادل 25 % من اي عمل تنجزه .

هنا تنطلق زغرودة ويفاجا الجميع بان عبلة هي من تزغرد . وهي فرحة

هنا يطل الخدم من الشبابيك ويخرج مالك ابو عبلة مستفسرا .
مالك : ما هذا ما الذي يحدث لماذا تصدحين بالزغاريد .
عبلة : ابوي عنتره وقع عقد بخمسة ملا يين في الشهر .
مالك : عقد ماذا لا عبا لكرة القدم ؟؟؟
عنتره : كرة قدم شنو يا عمي هسع اللاعبين السودانين ديل يتحملوا انا العب معاهم اكان ما عجنتهم كلهم تحت رجليني .
مالك : اذا ما نوع العمل؟؟
سيد احمد :يا عم مالك نحن والاستاذ عنتره عملنا شركة دعاية واعلان سيكون عنتره مدير للانتاج فيها
مالك هم هم دون تعقيب هزا راساه ولا تدري عن رضى ام احباطا لان عنتره يبدو ان امورة ستحل وسيكون مؤهلا للزواج من عبلة وهذا ما لا يريده ابدا .

توقع العقود بين الاطراف وتتم المباركة .

سيد احمد : بكره راح اجيك نمش مع بعض عشان اوريك المكتب واعرفك بالموظفين الذين سيكونون تحت ادارتك .

عبلة : مش قبل كدا عنتره يمشي الترزي ويفصل بدل وقمصان ويشتري كرفتات لزوم الوظيفة الجديدة وكدا .

سيد احمد : لا لا لا عنتره ما راح يغير اي شي نفس دروعك وسروالك وقميصك القصير دا لو عايز تفصل منهم ماية ما في مانع بس لازم تكون نفس الشكل .لو لبس بدله مين راح يصدقنا انه ادا عنتره يمكن يقولوا عليه توني اطلس او باتستا المصارعين

عنتره : من هؤلاء الذين ذكرتهم هل هم شياطين ام ماذا ؟؟؟

سيد احمد : زي كدا بس انت ما تشغل بالك .

درديري كباشي

01-07-2009, 06:55 AM

الحلقة 13
في صباح اليوم التالي يهب عنتره مبكرا فرحا ومتعجلا لاول يوم عمل واخذا بشكيره متجها ناحية الحمام وهو يترنم . امه تلاحظ هذا الحبور وتبدا تخاطبه
زبيبة : مالك يا ولدي قايم الصباح بدري كده ومسرور
عنتره : اليوم يا يمه راح استلم العمل الجديد بالشركة ابسطي يايمه ولدك بقى مدير كبير .
زبيبة : انت اصلك كبير يا ولدي بس الزمن مازمنا عشان كدا ما ظهر كبرك .
عنتره : يمه انا كبير في أي زمن اظهر فيه ومال الناس كيف عرفتني وانا ميت قبل الف وسبعمائة سنة .
زبيبة : يا ولدي بطل الغرور وانت ما عارف الايام مخبية لينا شنو انا راح اجهز ليك الشاي باللقيمات على بال ما تستحمى يكون جهز .
عنتره : تسلمي يا يمه . وهو متجها ناحية الحمام ومواصلا في ترنمه .
عنتره يلبس ملابسه ويدرع سيفه في كتفه ويقود سيارته متجها ناحية شارع النيل في برج الفاتح في الدور الثاني عشر حيث يقبع مكتبه الجديد .
يصل عنتره الى المكتب ويجد سيد احمد في انتظاره على الاستقبال .
سيد احمد مكشرا وجهه: شنو يا عنتره من اول يوم كدا تاخير .
عنتره : تاخير؟؟؟ هو دا اول يوم اصحى فيه بدري انا منذ ان وصلت السودان .
سيد احمد : المهم تعال عشان اعرفك على الاستاف بتاعك .
عنتره : ما هو الاستاف
سيد احمد : عفوا القروب الشغال معاك .
عنتره : ماذا تعني القروب هل تقصد الغروب قد لاحظت ان السودانيين يخلطون بين الغين والقاف ويعكسون اماكنهم .
سيد احمد : عفوا الكلمتين الاولتين كلمات انجليزية فرنجية وهي بعض من كلمات اجنبية اصبحت دخيلة على لقتنا العاميه وراح تلاقي منها كثير في حياتك العمليه . لكن انا آسف ما قصدت ولكن المقصود هو الفريق الذي سيعمل تحت ادارتك .
وفعلا يركب الاثنان المصعد ويتوقفا عند الطابق الثاني عشر ويدخل عنتره امامه مكتبا فخما كل ابوابه من الزجاج الملون بالالوان سماوية خفيفية . ويجد فعلا فريق مشكل من الاولاد والبنات ويبدا سيدا احمد بتعريفه بالفريق .
سيد احمد : على يمينك من الاول الانسة منال وهي من اصول مصريه وراح تكون سكرتيرتك الخاصة ، وبعدها الاستاذ عاطف . عنتره مقاطعا .
عنتره : عفوا يا سيد احمد لقد عرفتني بالانسة منال على انها سكرتريتي الخاصة ماذا تعني سكرتيره وما هي وظيفتها تحديدا .
سيد احمد : كلمة سكرتيره ايضا هي كلمة اجنبية دخيلة على اللغة وترجمتها تعني المساعد الخاص .
بمعني هي راح تكون قريبة منك تطبع خطاباتك وممكن تمليها اشعارك وهي تكتبها تناقشها في افكارك .
عنتره : عفوا انا بعتذر انا ما عايز سكرتيرة بهذه المواصفات
منال : (معبوره ) لييه يا بيه هو انا ماعقبتكش ؟؟؟؟
عنتره : لا انتي عقبتكش ونص وخمسه ما هي دي المصيبة ذاتها .
سيد احمد : انا فهمت عنتره يعني انه عبلة شخصية غيورة جدا وانت انسانة جميلة ولو زارتنا عبلة يوما ودا حتما حا يحصل ممكن تطريق الدنيا .
عنتره : انا اسف يا منال ويا استاذ سيد احمد ووظيفة سكرتير هذه ما ممكن يقوم بها رجل مثلا .
سيد احمد : عادى جدا نجد شاب متخصص سكرتاريا . المهم خلاص انت يا منال راح نحولك قسم التحرير وتكوني سكرتيره لرئيس التحرير
عنتره : تحرير ماذا ؟؟؟ هل سنحارب نحن من اجل التحرير
سيد احمد : لا يا عنتره انت مشيت بعيد جدا . نحن شغل الاعلان شبيه بشغل المجلات لذلك يكون فيه شخص رئيس تحرير وهو مدير مختص بالصورة النهائية لشكل الاعلان وهو مهمته يجمع الافكار كلها ويرتبها بحيث انها تعطي شكلا واحدا متناسقا.
المهم يلا يا شباب نحن راح نكسب الوقت كله واحد على مكتبه ونخلي عملية التعارف دي مع الوقت . تعال يا عنتره اوريك مكتبك .
ويدخل عنتره مكتبه ليجده عباره عن غرفه فخما نصفها من الزجاج ومطلة على النيل بشكل بيضاوي جميل . عنتره وقف مبهور وفاتحا فمه مندهشا من هذا الاثاث الذي لم يطرا حتى على خياله .
عنتره متلتفتا ناحية سيد احمد : تفتكر يا ابو السيد انه عملنا ممكن يغطي تكلفة البهرجة دي كلها .
سيد احمد : انت ما تستهون بمكانتك وانت ما عارف كنز الذهب الذي تحمله في راسك اذا كان المكوجيه والبلطجيه بكلام مهبب في الاعلان عملوا ذهب ومال انت راح تعمل ايه .

درديري كباشي

30-08-2009, 02:06 AM

الحلقة 14

بعد ما دخل عنتره مع سيد احمد في مكتبه وجلس عنتره على الكرسي الدوار الفخم والمكتب المكون من الزجاج الشفاف كاملا . شعر عنتره بانه شعره ووصفه لاشياء جميلة كثيره كان لاشياء بسيطه لم ترقى لهذا المستوى . هو الان تقريبا يجلس على اعلى مبنى بالخرطوم خلفه اطول نهر في العالم امامه شاشة مسطحة مثبته على الجدار تنقل كل اخبار العالم . اكيد كل هذه المدخلات ستقدح شاعريته وتشعلها من جديد .قد كان شعره في السابق محصورا في ثلاثة عبلة وحصانه الادهم والحروب مع بطولاته . اما الان فهو مطلوب منه ان يكتب قصائد غنائية ويمدح افرادا لايعلم عنهم شيء . لكن سوى هذه النقطة بالذات كل شئ جميل وحتى الهواء المنعش البارد الذي يخرج من جهاز التكييف المركزي هو لا يفرق كثيرا عن أي نسمه عليلة قرب الشلال .
سيد احمد : شنو يا ابو العناتر سرحت مالك ؟؟ ارح اوريك مكتبي والف بيك على باقي المكاتب واعرفك على باقي الموظفين ومهماتهم .
عنتره : لالا توجد قاعة للاجتماعات ؟؟
سيد احمد مندهشا وملتفتا ناحية عنتره : وانت وين شفت قاعة اجتماعات قبل كدا .
عنتره : انت ناسي انا لي سنتين في البلد دي اشاهد في التلفزيونات والافلام والمسلسلات وفيها وصف دقيق لكل متطلبات الحياة الحديثة .المهم نحن افضل نلقتي في قاعة الاجتماعات ويتكلم كل شخص عن ملكاته وماهو نوع المساهمة التي يمكن ان يفيد بها الشركة . عشان نوظف كل شخص حسب قدراته بدلا ان ننتظر حتى اكتشافهم بالصدفة .
سيد احمد مواصلا في دهشته : عنتره انت شكلك مدير عام ناجح لا شعر ولا يحزنون شكلي انا راح ارفع يدي واسيبلك كل شئ .
عنتره : يا عمي ما تكبر الموضوع ارح نلف على الجماعة ونعلمهم بالاجتماع .
وفعلا يلف الاثنان على الموظفين في المكاتب وبعضهم بين بانه فضل العمل في هذه الشركة فقط حبا في عنتره بن الشداد .
سيد احمد مستائذنا :
يا اخوان انا ما راح احضر معكم الاجتماع اجتمعوا انتو وانا راح ادخل السوق ونبحث عن مشروعنا الاول . فعلا يخرج سي احمد ويجتمع الباقون في قاعة الاجتماعات برئاسة عنتره بن الشداد . ليبدا عنتره بفتح الاجتماع والغرص منه ,
في قاعة الاجتماعات التي هي عباره عن طاولة ضخمة مستطيله حولها حوالي ستة عشر كرسيا فخما وكرسيا مميزا للمدير جلس عليه عنتره وتوزع الباقون , ليفتتح عنتره الاجتماع بكلمة.
عنتره : طبعا يا شباب انا سعيد جدا اني اكون متواجد معكم في هذه الشركة ومن وجوهكم المبشرة والمشرقه والتي تدل على الحماس وحب العمل . وانا حددت هذا الاجتماع ليستعرض كل واحد منكم خبرته وشهاداته وماهو الدور الذي يمكن ان يلعبه في الشركة . نبدا من اليمين عرف نفسك
الاول : انا عاطف عثمان خريج كلية الاعلام ومجالي هو اختيار انواع السيناريو الذي يجعل الاعلان فعالا ومميزا وممكن ان يجذب اكبر قدر من الناس ناحية السلعة المستهدفة ,
ويستمر التعارف والاجتماع ليخترق القاعة فجاه سيد احمد وفي معيته بنت نحيلة سوداء البشرة ترتدي بنطلونا من الجنز وبلوزة نصف كم . ومقدما لها كالتالي
سيد احمد : اقدم لكم اكتشافنا الاول المطربة عشة عشش .ودي راح تكون قنبلة الموسم التي ستتغني لعنتره .
عنتره واقفا مندهشا في الاول كان يفتكر ان سيد احمد يهزر معه . ولكن بعد ذلك بعد ان عرف ان سيد احمد جادا صرخ منفجرا في سيد احمد .
عنترة : انا اكتب اغاني للمخلوقة دي يا سيد احمد ....انا كان لازم اعرف من اول انت زيك لا يمكن يستمر نضيف وعنتره ضاربا الطاول بيده حتى شجها . وسيد احمد والجميع مزعورين من هيجان عنتره .

عدا عشه لم يبدو عليها أي اضطراب او خوف و هي ملتفتة ناحية سيد احمد .

عشة : ابو السيد الجنقر بتاعك دا جقلب مالوا يمين اجيب ليه ناس عنكبه يشنكبوا ليك هسع لمن يعرف حاجة .
سيد احمد : عشه اطلعاك يمين دا لا بيتشنكب ليكم ولا شي بس اطلعي خلاص .

ويستمر الجميع في تهدئة عنتره ويسحب سيد احمد فنانته خارجا

مدنيّة

30-08-2009, 02:25 AM

يا درديري
غايتو عبلة وعنتر ماعندك لكن

جد ابدعت

ماقدرت اواصل فيها للنهاية

بعدين المساء لو المزاج كان رايق برجع اتمها باذن الله

درديري كباشي

30-08-2009, 03:13 AM

يا درديري
غايتو عبلة وعنتر ماعندك لكن

جد ابدعت

ماقدرت اواصل فيها للنهاية

بعدين المساء لو المزاج كان رايق برجع اتمها باذن الله

سلام يا بت مدني

ارجعي بمزاجك وانا المسلسل كتبتها مع بداياتي هنا ( تسمع بداياتي تقول قبل عقد من الزمان ) المهم اليوم قررت اجر فيه شوية

درديري كباشي

30-08-2009, 03:17 AM

[الحلقة 15
يوصل سيد احمد عشة الى مكانها ويعود مسرعا الى المكتب ليجد عنتره لازال نفسه مرتفعا كانه عائد من مباراة في المصارعة الحرة . اول ما يدخل سيد احمد يبادره عنتره .
عنتره : شوف هنا يا سيد احمد لو انت قاصد تزلني فقط وتشوش تاريخي احسن نكون واضحين من الان ونفضها سيره . مش معناها انت شخص يمتلك الاموال من الممكن ان تشتري كل شئ . في اشياء غير معروضة للبيع واولها هو تاريخي وسمعتي .
سيد احمد : شنو هو انت مكبر الموضوع كدا يا عنتره تاريخ وسمعة وجغرافيا وبعدين البنت عشة دي ليه ما عجبتك عشان سوداء وهذا معناه انت رجل عنصري ويكون في علمك معظم الفنانات العربيات العاجبنك وكل يوم تقعد بالساعات تبحلق فيهم هم مكتشفات من الشوارع وعايلات فقيره . وقليل منهم بنات الباشوات .يعني عشه صحيح لا تتمتع بجزء بسيط من جمالهن لكن موهوبة ليها صوت جميل .
عنتره : شوف يا سيد احمد انت ما تسيس الموضوع وايه عنصرية وما عنصرية وثانيا هو انا لوني اشد سوادا من لونها . انا قصدي عندما اتفقنا ان نبدا من التراث أي من السطح او من الصفر . ليس من القاع . انت تاتيني ببنت مشرده وهي بنفسها ثبتت ذلك تفتكر انا ما فهمتها عندما كلمتك بلغة الشوارع الجنقر جقلب وخلافه وهي اثبتت انها نبتة مغروزه في الصياعة . وبعدين نحن ليه نتحمل عبئ انتشال جثة من الحضيض ونحن لسع في اول الطريق خليها تروح تشتهر في مكان ثاني و تعود لينا نكتب ليها اغاني . ثم انت عميان من برنامج نجوم الغد . ما تروح جمع المواهب ديل ونحن نعيد اكتشافهم ونصنع منهم نجوم حقيقيين . بدلا عن فتيات الشوارع .
سيد احمد ويبدو من لهجته التنازل :
خلاص يا عنتره معليش وانا فعلا غلطت واتهورت شوية الحقيقية البنت شفتها تغني في رحلة وعجبني صوتها وقلت نبدا بيها لكن صدقني لم اركز على كل الكلام الانت قلته دا . وعلى رايك خليها تروح تنتشر وتشتهر بعد ما تصبح نجمة من نجوم المجتمع مثل الباقيات بعد داك ل وجاتنا ماعندنا مانع . خلينا نرجع لشغلنا الحصل شنو في الاجتماع .
عنتره : كان اجتماع مفيد كل واحد من الموظفين استعرض امكاناته وقدراته وانا اعتقد حالفك توفيق كبير في اختيارهم فهم مهذبين وفاهمين دورهم في ذات الوقت وهي الصفات التي يجب ان تنطبق على أي موظف . ولكن انا عندي اقتراح لابد من تعيين مناديب مبيعات ونطبع تعريفات بالشركة يوزعوها على المصانع والمعارض ويعرضوا خدمات الشركة . لان الشركة لازالت غير معرفة .
سيد احمد : لا اعلام الشركة ونشرها دا خليه علي انا . اولا انا رتبت لك لقاء مع جريده يومية وبعدها في ندوة شعرية في الجامعة الخاصة جامعة خمس نجوم . جامعة المواهب الاهليه .ويمكن بعدها ندبر لقاءا في التلفزيون . لكن بكره لمدة اربعة ساعات راح تكون في لقاء مع صحفية اسمها سناء من جريدة المواطن .استعد وخلي قصائدك كلها قريبة ه وخلي روحك رياضيه . يعني زي تهور اليوم وحالة الزعر الصنعتها دي دربكت كل حساباتنا .
ينفض الاجتماع المغلق بين سيد احمد وعنتره وبعدها يقوم عنتره بجولة على الموظفين في مكاتبهم معتذرا عن حالة الغضب التي انتابته وانفعاله وكسره لطاولة الاجتماعات . والموظفون ايضا بادلوه بالوفاء بانهم فعلا قدروا الظرف الكان فيه عنتره وانهم ربما تصرفوا نفس التصرف لو كانوا في مكانه ,
انتهى اول يوم عمل في شركة عنتره بن شداد للدعاية والاعلان وعاد عنتره الى البيت بعد ما اشترى كميه من الفواكه لاهل بيته ولاهل بيت عبلة . حقيقية كان متشوقا للوصول الى عبلة ليبشرها بالبداية وفخامة المكتب ويدعوها لزيارة الشركة . وهو سعيد من نفسه بوفاءه لها بعد ان عالج موضوع السكرتيرة بسرعة فائقة .

--------------------------------------------------------------------------------

أشرف صلاح السعيد

30-08-2009, 03:29 AM

درديري كباشي

30-08-2009, 03:34 AM

ابوالدر عوافى..
وحياتك جاريها من الاولى لل 14 شى خيالى ورائع..سرد قمة ومترف بالافكار الافكار الفكار بالثلاثة..
عارف المأخذ الوحيد اللقيتو شنو؟ ياخى عنترة راكب همر مرسيدس شنو التزغلل بيو؟بس باقى القصة رغم كوميديتها الا فيها كلام كتير ورا الكلام..
دمت قاصا رائعا يحمل رسائل الوعى بين اسطر كلمه وصفحات بنات افكاره العملاقات ..

سلام يا ابو صلاح

والله نحن لسع البينا كلام كثير

والقبيل راجنه نحن يوم تبشر بيه غيمة

لما تمطر يوم علينا

الفرح يملا المدينة

والبوياتات الحزينة

درديري كباشي

30-08-2009, 03:34 AM

حلقة 16
عاد عنتره الى البيت بعد اول يوم عمل ونتتيجة لزحمة الشوارع المعهودة وصل متاخرا الى البيت .. ووواجد امه واخوه شيبوب على احر من الجمر في استقباله .. جلس بعد ان غير ملابسه ...
دار حوار عادي ومتوقع بين اي شاب واهله عندما يقضي اول يوم في العمل..
امه: اها يا ولدي عنتره الشغل كان كيف
عنتره : اسكتي ساكت يا يمه .. ماشفتي الجو كان كيف والمكتي فخم والموظفين البراسهم راقين ومهذبين ..
واكيد حا اخذك يوم تشاهدي المكتب وبكره عندي لقاء صحفي مع جريدة وندوات في الجامعات .. خلاص ايام العطلة انتهت ..
زبيبة : كدي يا ولدي ياها الدايراها ليك من زمان ... اها متين نتقدم لعبلة رسمي اظن بعد كدا عمك ماعنده حجة ..
عنتره : الله يسهل الامور يا يمه بس دعواتك ما تنسينا منها ,,
تناول عنتره الغداء في ذلك يوم وكان بملاح خضره مفروكة بالشبت مع الكسره .. وهي كانت اكلته المحببه مما وصلوا الى السودان ..
بعد الغداء دخل عنتره الى غرفته ونام ساعة واستيقظ نشيطا ومتشوقا للذهاب الى ديار عبلة وتبشيرها بالانفراج والعمل والمكتب الجميل وشارع النيل وبرج الفاتح من سبتمبر وهذه البهرجة التي قابلها في هذا اليوم .
وفي العصر بعد ماغير عنتره ملابسه وتعطر قاد سيارته وذهب ناحية الخرطوم بحري لزيارة دار المحبوبة عبلة .. بعد اقل من ساعة وصل البيت فعلا ..
ودخل وهو فرحا مستبشرا ووجده عمه مالك واقفا امام الباب وسلم عليه عنتره فرحا ليقابله العم متجهما .. واراد عنتره ان يبشر عمه ربما ازال منه هذه الغمه ... وهو لا يدري ان سبب تجهمه هو نفس هذا التبشير الذي اتى بعنتره ... كان يتمنى ان يزوج بنته لاحد شخصيات البلد وزير او تاجر كبير حتى يستفيد من تلك الصفقة ... انما عنتره الذي يمتطي سيفا في القرن الواحد وعشرون ويتحدث باللغة الفصحى والتي لا احد يعرف مفرداتها في هذا الزمن ... كان يتمنى لو ان عنتره لم يصحبهم في هذه العودة عبر التاريخ ..
شعر عنتره بالحرج وهو يمد يده نحو عمه فرحا والعم يقابله بهذا البرود .. في هذه اللحظة تمنى عنتره لو ان ابوه عاد معهم حتى يقف به في وجه هذا العم المتجهم الحاقد الطماع والذي يريد ان يبيع كل شء لا يعرف حب عبر القرون ولا غيره ..
سمعت عبلة صوت عنتره وخرجت تستقبله فرحة
ابتسامه عبلة عملت غسيل للغم في نفس عنتره ليعود له الحبور وهو يراها تبتسم له فرحة بعودته كعادتها.ز
ويدخل الاثنان الى البيت ويجلسا في الحديقة ..
عبلة : اها بشر كيف اليوم معاك
عنتره : في شئ في الدنيا احلى من هذا اليوم الا وجهك الصبوح ..
عبلة : خليك جادي دا ما وقته وابوي جاي يسمع فيك
عبلة : ومافي حد كرهني رجعتي للدنيا زي ابوك دا ..وهو جاي ورانا ليه اصله ماكفاه الزمن العشناه معاه وعذبنا فيه جاري ورا اطماعه ..

درديري كباشي

03-10-2009, 10:25 PM

عنترة الحلقة 17
جلس عنتره امام عبلة في الكرسي في حديقة منزلهم ممتعضا اولا من استقبال عمه الفاتر له .. وهو كان يعتقد ان همة عمه الفاترة ستزول اسبابها بمجرد ما التحق بتلك الوظيفة .. والتي يسيل لها لعاب أي اب لبنته ... يعني بنت ياتيها عريس مدير عام لشركة وشريك في الارباح .. هو في هناء اكثر من ذلك ورغما عن ذلك احتار عنتره ماذا يريد هذا العم تحديدا بعد ان تنازل عن الف ناقة من النوق العصافير واستبدلناها بمائة هونداي من جياد . فاق عنتره من سرحته بعد ما لفتت نظره عبره .
عبلة : هيي عنتره سارح وين وبعدين ما عيب انا اكون قاعدة معاك وتسرح بعيد تخليني ..
عنتره : هو في سرحان غيرك انت
عبلة : طيب ما انا قاعدة معاك بلحمي ودمي تسرح مني ؟؟؟
عنتره : محيرني ابوك انا قلت بعد ما اشتغلت اكيد حايفرح والمشكلة انحلت وحانعلن يوم الزواج ونطبع الكروت ونوزعها .
عبلة : ابوي جاب ليه حجة جديدة قال انت ما معاك شهادات ....
فجاه هب عنتره هائجا بعد ما سمع هذه العبارة
عنتره : شهادات شهادات بتاع شنو انت ابوك دا خرف ولا شنو انت براك ما سمعتي انه صاحبتك ميسون قالت ابوها حضر دكتوراه في شعري .. انا قصايدي طلعت منها مئات الشهادات ابوك يطالبني انا بالشهادات...
يرتفع صوت عنتره حتى يصل داخل البيت ويسمع عمه الحوار الهائج من عنتره ويخرج ...
مالك : ايوه يا بني انت مالك هائج عايزني انا ازوج بنتي لواحد ما عنده أي شهاده جامعية ...
عنتره : يا عمي انت جادي في الحته دي ؟؟؟
مالك : انت شايف شنو نحن في زمن حتى كمساري البص معاه شهاده من أي جامعة حتى لو كانت جامعة وادي الدوم المهم هي شهاده جامعية ..
عنتره : يا عمي في كتاب عرب كثر جدا حضر على كتبهم شهادات في الدكتوراه والماجستير في حين هم انفسهم ماكانت عندهم شهادات ..
مالك اعطيني مثال زي منو يعني
عنتره : زي الكاتب السوداني الطيب صالح وزي الكاتب المصري العقاد وزي الكاتب المصري المنفلوطي وكذلك نجيب محفوظ وحتى المسمى امير الشعراء احمد شوقي .. هؤلاء يوجد اناس كثيرين يحملون شهادات عليا من كتاباتهم في حين هم انفسهم ماكانت عندهم شهادات عليا .. لازم يا عمي تفهم انه في اناس مستواهم تجاوز حد الشهادات بكثير بل هم اصبحوا فوق تقييم مستوى البشر .. اذا كان من يمنح الشهادات هم اساتذه .. مين الاستاذ في الادب الذي يحمل مستوى اعلى من الطيب صالح مثلا حتى يمتحنه ويعطيه شهادة ..
هنا شعر مالك انه منطق عنتره اصبح قويا وخاف ان يهزمه امام بنته ولذلك اراد ان يختصر الحوار ... خلاص خلاص يا ابني .. بس لكن مع صاحبك سيد احمد ابحثوا عن أي جامعة تعمل اعادة تقييم لقصايدك وتمنحك شهادة ..
عنتره : هو يا عمي انا متقدم لبنتك ولا مقدم لوظيفة
مالك مختصرا الحديث ومغتاظا من عنتره : خلاص يا عنتره هو دا شرطي الاخير يا تجيب شهادة يا تمشي تفتش ليك عروسه في مكان ثاني .

درديري كباشي

03-10-2009, 10:29 PM

عنترة الحلقة 18
رمى مالك كلمته لعنتره ودخل الى غرفته تاركا عنتره غاضبا يزمجر .
عبله مهدئة لعنتره : ولا يهمك ياعنتره بسيطة
عنتره : شنو هو البسيطة يا عبلة وابوك كل مره طالع لينا بمصيبة جديدة يعني موضوع النوق العصافير القال عليه في الاول دا اصبح سهل كان الواحد ممكن ياخذ قرض من البنك وينزل سهول البطانة يلقط النوق البيتكلم عليها دي لكن يا عبلة الموضوع طالما جاب ليه شهاده جامعية كدا معناها من الاخر كدا هو ما عايزنا نتزوج وبس.
عبلة : عنتره انت كمان ماتكون متشائم للدرجه دي ومسالة الشهاده دي سهله أي جامعة في السودان تتمنى انه عنتره بن شداد يكون متخرج منها وهم يطولوا كمان .. بس انت ما تحمل هم واعرض الموضوع على سيد احمد وهو راح يدبر لك احلى جامعة في السودان .
عنتره : هي دي ما المشكله انا خايف ناس الجامعات يشترطوا علي تعلم اللغة الانجليزية ... ما هي موضة كمان تنكر العرب للغة العربية واصبحوا يعتقدون انه تعلم اللغه الانجليزية هو نوع من انواع الثقافة .. وانا ظليت طيلة عمري اعتقد ان اللغه العربية هي اللغى الوحيده في الدنيا .
عبله : ما اظن انهم سيضعونها كشرط وزي ما قلت ليك انه الجامعات كلها تتمنى انك تنتسب لها وحتى لو كانت اللغه الانجليزية شرط التخرج هم راح يعدلوا القانون علشانك .. وببساطه يا عنتره انت ما عارف مكانتك عند العرب ... الناس ديل ظلوا حافظين سيرتنا ويتوارثونها اكثر من الف وسبعمائة سنة معقوله يفرطوا فينا ويرفضوا لينا طلب ..
عنتره : على كل حال الصباح رباح وانا راح اتصل بسيد احمد من اليوم واعرض عليه الامر وحا استاذن منك تصبحي على خير ..
عبلة : وانت الخير ذاتوا ..
خرج عنتره من بيت ال عبله ممتطيا سيارته الهمر وعبر كبري بري متجها الى بيتهم في الجريف غرب وهو طيلة الوقت يفكر في الهموم التي كل ما يفتكر انها قاربت تنتهي تاتيه بصفحة جديدة كانه مشترك في مسابقه تلفزيونية مثل المسابقات السخيفة التي تعرض في التلفزيون تلوح له بجائزة وتحرمها منه مهما برع في الاجابات ... واخرج عنتره جواله واتصل بسيد احمد ..
سيد احمد ::: هلا هلا هلا ابو شداد اها كيفك الامور ماشه كيف ..
عنتره : والله يا ابو السيد ماما شه مظبوطة ياخي تتصور الراجل المخرف دا قال لازم يكون عندي شهادة جامعيه عشان يزوجني عبله .
سيد احمد مستنكرا ومندهش : شهاده جامعيه ؟؟؟ وعلاقتها شنو بالزواج ؟؟؟
عنتره : انا عارف ما تلاقيه سمعها من شلة العطالة البلعب معاهم كتشينة كل يوم ديل في النادي .. يكون سمع له واحد منهم قال انه بنته ما يعرسها الا لجامعي .. اها تفتكر الحل شنو يا ابو السيد وزي ما انت عارف انه اخوك عنتره ما عنده هدف في الدنيا غير انه يتزوج عبله .. ومسلط علي ابوها كله مره يعمل لي شرط تعجيزي ..
سيد احمد ويبدو انه تاثر بكلام عنتره الاخير : ولا يهمك يا ابو العناتر انت سيب الموضوع دا علي وانا ادبرها ليك ... يا خي ما تحمل هم كل جامعات السودان تتشرف بقبولك وتخريجك .. بس خليني انا اعمل اتصالاتي وادبر ليك الموضوع
عنتره : شاكر جدا يا ابو السيد يا اخوي انشاء الله ما عدمناك ياخي ..
اخيرا شعر عنتره بنوع من الارتياح بعد ما كلم سيد احمد وقفل جواله مواصلا في الطريق نحو البيت .. ومستبشرا بغد مشرق تتبدد فيه الغيوم وتزال فيه الهموم .. هذا لو لم تركب فكرة شيطانية اخرى في راس عمه مالك .

درديري كباشي

03-10-2009, 11:05 PM

الحلقة 19
كما ذكرنا انه عنتره قد اصابه طلب الشهادة الجامعية كشرط اساسي لزواجه من عبلة بالاحباط لو لا ان هون صديقه وشريكه سيد احمد الامر ... وفي اليوم الثاني توجه عنتره الى عمله باكرا كعادته وهو لازال يدب فيه الحماس للعمل رغما عن امر الشهادة المحبط لكنه واثق في ان لسيد احمد الاف الحلول ... وهو جالس على مكتبه الفخم يراجع في كتاب بين يديه يحتوي على اشعاره يقراها ويحن للايام الخوالي .. ويتحسر على حصانه الادهم وكان يتمنى لو عاد معهم الحصان .. ولكن كيف ستكون حياته مع السيارات المسرعة وشوارع الاسفلت وزحمة الناس ... كان في السابق يركب حصانه بالايام دون ان يعترض طريقهم بني آدم لذلك كان الحصان يشكل له ونيسه الوحيد وصديقه الاقرب ..
يقطع سرحانه وابحاره في الماضي الجميل صوت سيد احمد
سيد احمد : ابشر يا ابو العناتر
عنتره : خير بشر يا وجه السعد
سيد احمد : اداري جامعة النيل للاداب والفنون وافقوا يعطوك بكلاريوس ودكتوراه بمائة مليون جنيه ..
عنتره : لكن هذا مبلغ كبير جدا علي من اين لي به.
سيد احمد : لا يا حبيب ما نحن الحاندفع ... هم راح يدفعوا لينا ماية مليون جنيه سوداني مقابل انه حضرتك تتواضع وتتنازل وتقبل انك تنال شهادة الدكتوراه من جامعتهم المتواضعة .
عنتره : سيد احمد انت عاوز تجنني الظاهر عليك .... كيف انا ادرس في جامعة خاصة وواحدة من اغلى الجامعات الخاصة في السودان وهم يدفعوا لي ,
سيد احمد : انا ما قلت ليك سيب الموضوع دا علي ... انا لفيت على الجامعات الخاصة كلها وقلت لهم عندنا عطاء انه الاستاذ عنتره بن شداد وافق اخيرا بان ينال شهادة الدكتوراه من اي جامعة ولان المنافسه حادة بين الجامعات لنيل هذا الشرف نحن طرحنا الموضوع في ممنافسة لمن يدفع اكثر ... وفعلا تباروا اصحاب الجامعات الى ان وصل المبلغ مائة مليون من جامعة النيل للاداب والفنون .... وهم الان على احر من الجمر في انتظار موافقتك .... لاني قلت لهم لازم اشاور صاحب الشان اولا ..
عنتره : موافقتي انا ؟؟؟ والله انت مصيبة ومسلط .. انا كنت احلم بان اي جامعة توافق تعطيني شهادات الان انت جعلت الجامعات تترجاني على الموافقة .. ومع الدفع كمان ..
سيد احمد :يا عنتره انت ما عارف قدر نفسك .. تعرف ماردونا اللاعب الارجنتيني العالمي الشهير . دفعت له الشركة التي صممت له بدلة الفرح اكثر من مليون دولار لكيف يوافق ويلبسها يوم زفافه .. وهو لاعب كرة ما بالك انت عنتره بن شداد الذي اطرب العرب عبر القرون ، لكن افهم من كدا انك وافقت لانه الجماعة منتظرين مني مكالمة ..
عنتره : بالتاكيد موافق ..
وفعلا يرفع سيد احمد تلفونه ويتصل :
الو البروفيسر عادل .. اخيرا انا قدرت اقنعت الاستاذ عنتره بجامعتكم ورغما عن انه كان مصر على جامعة عريقه مثل جامعة الخرطوم او جامعة الجزيرة او جامعة ام درمان ... وخلاص حضروا لينا شيك بدفعة مقدمة خمسين مليون سنمركم انا وعنتره بعد ساعة نستلم الشيك ونوقع العقد .

ابوخالد

03-10-2009, 11:46 PM

والله حيرتنا .... هسى يقولوا ليك شنو ....

الشفتو زمان كلو كوم وحق الليلة ده كوم ... تانى ...

لكن صراحة ما تميتا كلها ... وبرجع شوية شوية ...

دى حاجة الواحد ياخد لها إجازة عديل ... ويمشى

تايلاند ذى أخونا abuzaid ... ويركب المركب العائم

الفى الصورة ديك ... ويفتح النت ويقعد يضحك ... يخلى

القصار قصار ديل يتاوقوا ...

والله رائعة صعب وصفها ... حقيقى ...

الله يديك العافية .... أضحكتنا بقلوب صافية ...

وحمدآ لله على سلامة الأسرة الكريمة ....

معنى كده ح ننتظر إبداعات جديدة ... على حس أخبار البلد ...

لكن ما معروف تظهر متين ...

فى يوم .. فى شهر .. فى سنة ...
(إنت الشاعر ليه ماقال فى إسبوع .. لعل المانع خير )
إمكن على أيامهم ما كان فى إسبوع والا شنو )

لازم تحجز لينا مواعيد لزيارة الأسرة ...
ما عايز نجى توووووووووووش ...

****************
أبو الدر ... والإبداع ... مروا من هنا ...

درديري كباشي

04-10-2009, 12:18 AM