شمار سعديه بت جبريل [الأرشيف]

ود النمير

17-06-2009, 04:50 AM

بسم الله الرحمن الرحيم
بسم الله الرحمن الرحيم

شمار سعدية بت جبريل
شعر / هاشم صديق
- ناس البيت
هوووي يا ناس.
يا عشمانة.
يا إخلاص.
بنات كلتوم
يا فوزية
كيف حالكن
مشتااااقيين
سلاااام بالكوم
..........
جات سعدية
شايله شمار
معاهو «التُوم»
مشت شهرين
تَنَفِّس بتها
«الخمجانه»
في الخرتوم
........
تمام شهرين
بيوت الحله
لا سمعت خبار
لا شَمار
ولا قرقر ضحك
حلقوم.
ولا طقطق لبان
هيمان
في مُبْخر
بخور تيمان
ولا شالن حريم
فنجان
وسيرة زول
على قدوم.
لا ضحكو الصغار
في حجوة
لا سهروا الكبار
في حكوه
واتمحّن وطار
النوم.
......

ود النمير

17-06-2009, 04:51 AM

نان سعدية
بت جبريل
كان عارفين؟!
رويحة الحِلة
والطلّة.
لا قِدْمت
ولا هِمْلت
لا مسخت
لخلق الله
لا عِرْفَت
بيوت الحله
ليها متيل.
.....
كان غابت
تقول نامت
عيون القمره
أو ترتر
وفات النيل.
.......
هي المشاطه
والحنانه
والدلاّكه
والدبّاره
والشمشاره
والسمساره.
والطهاره
بي موسا
ما خلت
في هذا الشان
لِبت في الحله
شي مطلوق.

ود النمير

17-06-2009, 04:51 AM

هي الجهّازه
للعرسان
هي ديمه الراس.
القيدومه.
دق الريحه.
ست الشوره
والطايوق.
مرسال النَقَص
للسوق
عَرَق الهِمّه
للحبان
خبيرة الخُمره
بي ميزان
لو شم العريس
عوسا
تسيل دمعاتو
ويتجرّس
تقول ولّع
عديل بمبان.
........
كان دقّت
إيدين سعديه
في التعليمه
دلوكه
تلاقي النخله
تِتْفَنّس
وعودها يميل
تبوس سعفاتا
موج النيل.
وكان شالن
بنات الحله
غنوه معاها
تِتْقَطّع عديل
قمصان
ويتكشّف
ضهر شبان
يولول في الجلود
السوط
يرْكز في البُطان
عاشق
تزغرد ليهو
زولتو السمحه
«ست الفوت»

ود النمير

17-06-2009, 04:52 AM

يفور عِشقو
ويقول
- يا سوط
اريدك موت
تهز فوقو الايدين
طايرات
تولع نار
في وسط الدار
تَجِن زغرودة
من سعدية
ويتلهلب
غنا البنوت.
........

ود النمير

17-06-2009, 04:53 AM

- ناس البيت
هوووي يا ناس.
يا عشمانه
يا فوزيه
يا إخلاص
بنات كلتوم
كيف حالكن
مشتااااقين
سلاااام بالكوم
...
إنفتحن
عيون البيت
وانجدعن
ايدين الاوضه
والراكوبه
واتسرّح
شَعَر لالوبه
رجعت شابه
فاتا الشيب.
وركّت رشّه
فوق صفقات
شديرة الحنه
واتمسّح
غَباش الصنّه
واتجمّع
حمام الحله
واتراصص
تقول «قرقول»
صَدَح «قوقايو»

ود النمير

17-06-2009, 04:53 AM

بي تهذيب
.....
- جات سعديه
- جات سعديه
.....
جَرَت عشمانه
لي سعديه
حفيانه
وجات إخلاص
تَنَقِّز
زي وليد الريل
وطربانه.
ضحك قرقار
ودمع الشوق
نزل سرسار
وصار شَهَقى
السلام
دوبيت
...
- جات سعديه
- جات سعديه
....
سباليق البيوت
رفعت عديل
تعظيمها

ود النمير

17-06-2009, 04:54 AM

بالترتيب.
وشوفو الشامه
بت كلتوم
وكت سمعت
سلام سعديه
- بالدهشه-
قدّ الإبره
اتغاتت
واتسمّر رويس
الخيت
وإتنخَجَت
تقول راجياله
بس هبشه
....
ومن بين إيدين
فوزيه بت كلتوم
وبالهجمه
كمان طارت
عديل كمشه.
ونُص السهله
«بت الريله»
إتنفَضَت
واتْنَفَشَت
وجات زغروده
إنبهلت
إتْقَسّم
ضِليل شَدَره
واتبسَّم
خشيم مُفراكه
في حَلة مُلاح
خُدْره
واتشرشر
في نُص الطوه
واتْطاير
حنين الزيت.
.....
- جات سعديه
- جات سعديه
...

ود النمير

17-06-2009, 04:54 AM

اتعنكش
في عود سعديه
كل الناس.
الشُفَع
حريم البيت
الجيران
تقول نخله
سبايط خيرها
إتدْلّت
وتِقلو خلاص.
وهاك يا سلام
وهاك يا شوق
وهاك يا كلام
إتجمّع
في رمش العين
هوى الأرحام
واتجدّع
وطال الضُل
فَرش لي بِرشو
لي قِدّام
واتردّت
رويحة البيت
قلع توب زهجو
بالايدين
...
اتْفَرشت
في غمضة عين
عناقريب الأهل
صفين
وكم سجاده
كم بنبر.
ومن مبخر
مستّف
بي بخور تيمان
طلع صَفّق
سحاب دخان
واتحكّر

ود النمير

17-06-2009, 04:55 AM

في نص تربيزه
جك ليمون
مندِّي قزازو
زي حتّل
دموع مكنون.
ووسط الرجّه
والضحكه
إتماسك تمام
الكون
صِبِح موزون.
....
جات قُراصه
بي دمعه
واتراجف
صحن لقمه
وكت دلقن
إيدين نعمه
عليهو ملاح
نعيميه
واترصت
صحون الفول
تقول لمه
وبالفرحه
ضحك سرويس
وكت رَدَمَن
إيدين الشامه
بت كلتوم
تلات مرات
تل من نارو
طعميه
...
وهاك يا ونسه
يا قرقار
ويا سعديه
ست القعده
إنفتحي
تقول رادي
وهاك يا نشرة

ود النمير

17-06-2009, 04:56 AM

الشهرين
من الخرتوم
جِنس أخبار؟!
تُوم وشمار
حتى الضُل
وقف شمشار
....
صواني تفوت
صواني تجي
قصص بالكوم
ضحك وحكي
ويا سعديه
ما خلت
نَفَس يتشال
ولا إيداً
تحك الراس
جِنِس قصصاً
تجيب هلواس
....

ود النمير

17-06-2009, 04:56 AM

راس البيت
وقف مشطوب.
في عين النخله
كان الزير
خروف دبدوب
وبالهجمه
إنزلقن
من الايدين
كبابي الشوب
واتلخبط
حمار مربوط
نهق في الخُلعه
بالمقلوب.
صهل
ضحك الحريم
كورس
وكت فرقع
تقول في الحته
نُص القصه
كان مكتوب.
.....
يا سعديه
هاك الرص
وراهو الرص
وتتجادع
حريم البيت
سؤال وسؤال
تقول دوبيت
....
- سجم خشمي
مسك إيدينها
جوه البص؟!
...

ود النمير

17-06-2009, 04:57 AM

أجي يا يمه؟!
كمان قلعن
عديل التوب؟!
....
- سجم أُماتن
الخايبات
شن راجيات؟!
...
- أخير واحسن
يقولن روووب
.....
- قلتي شنو؟!
واحدات شربن
عديل الـ......
شنو؟!
الشيشه
ولاّ حشيش؟!!
.... ويا سعديه
بت جبريل
وكت كِتْر
الطَعِن في الضُل
إتعدلت
في نص الداره
زي ملْكه
وخَشّت توووش
عديل في الفيل
....
- هي يا يمه
نان ما نسيت
أقول ليكن
حكاية الزاكي
ود قنديل

ود النمير

17-06-2009, 04:57 AM

- الزاكي منو؟
- ود قنديل
جار التوم
- التوم
راجل بتك
«الخمجانه»
في الخرتوم؟
- أيّا
... وانعصرن
حريم البيت
على سعديه
جايى شمار
كبار مردوم
معاهو التُوم
وشِيهن رارا
للاخبار
...
يا سعديه
خُشي عديل
طَعِن في الفيل
....
- هو زول سمسار
قروشو كُتار
وخالو وزير
- سمسار سوق
ولاّ بيوت؟!
- في شيتاً
ما بسمسر فيهو
ود قنديل؟!

ود النمير

17-06-2009, 04:58 AM

من الخرفان
لحدي الخُرده
والعربية والتلاجه
والدكان.
سواقي
لواري
طيارات.
بيوت للبيع
بيوت تأجير
حصين
وحمير
كمان أكشاك
تجارْة الشنطة
والتمباك.
جزم
قمصان
ورق
أقلام
كمان دخان.
....
وكت دقّت سديرها
الشامه
بت كلتوم
كمان
كل الحريم تبعوها
في ذا الشان
....
- سجم خشمي
سجم خشمي
وا خجيلتي
وا خجيلتي
يا نسوان
- كمان دخان؟!
....

ود النمير

17-06-2009, 04:58 AM

سعديه غمزت
ليها
غمزه طَرَف
وزي حاوي
وبي حركة صوابْع
الإيد
سوّت ليها
ورقة لف
ومطّت للحروف
تبيان
- دخاااااان
ما دخااااان
فهمتن حسه
يا نسوان؟!
- سجم خشمي
حتى البنقو
باعو كمان؟!
- أصُبْرَن
أصُبْرَن
وقالوا الساترو
وساندو
خالو وفاهمو.
وسمعت شمار
قالوا استوردو
البمبان
.....
الشامة شهقت
وصوتها عشرق
والريله نَفّت
دموعها سالت
وفوزيه قَحّت.
عشمانة عطست.
....
وسعديه ضحكت
- سجمكن
مالكن حسه
يا نسوان؟!
شان قلت بس
بمبان؟!!
....

ود النمير

17-06-2009, 04:59 AM

وخالو وزير
- أيّا
مكنكش
في الكراسي عديل
لا شالوهو
في تعديل
لا نقلوهو
بره سفير.
ولو ساط البلد
بي حالها
ما سألوهو
من تفسير
- مساخْر الدنيا
في ناس ديل
- ناس مدفوره
يوت لي فوق
وناس بنيانها
درب السيل.
....
ويا سعديه
زيدي شمار
لسه الرادي
فيهو خبار
....
- أها اتذكرت
حاجة كمان
والله لو حجُّونا
ما بتدخل
عَقُل وأضان
...
اتفتحت
عيون شباك
وصَنُّو اتصّنتُو
البيبان
واتمدّت
إضين نسوان
ويا سعديه
اتشمرتي
واتحكرتي
واتمهلتي
واتوكلتي بالرحمن
شمارا الجاي
صنفو تقيل
عديل يكسر
رقيبة الفيل.
...

ود النمير

17-06-2009, 04:59 AM

- قالو الزاكي
خَشّ عديل
يسمسر
في مقابْر البكري
وأحمد شرفي
وحمد النيل
...
في تربيزه
نص القعده
منّ الخلعه
انكسرت كبابي
الشُوب
وطارت ليك
صواني الشاي
وقعت رُب.
....
- عشان الموت
صبح بالكوم
وموت الجُمله
صار معلوم
ناس الزاكي
شان ما يبقوا
يوم في لوم
قالوا الناس
تقدم لي قَبُر
بدري
وما تْسهِّى
ويشيلك نوم
تخُت دمغات
في طلب التُربه
تدفع للحجز
ورسوم
ويدوك....
ويدوك....
شن سموها يا سعديه
بت جبريل
شن سموها يا سعديه
بت جبريل....
أيّا
«شهادة بحث»
مكان عايز.
تُرب فاروق
ود البكري
أحمد شرفي
حمد النيل
....
إنْقَلَدن
حريم البيت
وانفقعن
دموع وعويل
...
صوت النخله
بالمليان
زِعِل كورك
- يا نسوان
بدل تبكن
على الخرتوم
بدل تبكن
على امدرمان
أخير تبكن
على السوداااان

منقوووووووووول

ودمهدي

17-06-2009, 05:08 AM

التحيه ليك
ود النمير
والله زمن من الاشعار الحلوه دي
تسلم وربنا اديك العافيه

بنت النيل

18-06-2009, 09:27 AM

تسلم على القصيدة الروعة دي ومنتظرين الاحلى

Almostshar

19-06-2009, 02:11 PM

مشكور ود نمير على النقل الجميل

ونحن في انتظار تلك المشاركات الجميلة منك

وشكرا على القصيدة

ود النمير

22-06-2009, 12:35 AM

بسم الله الرحمن الرحيم

ود مهدي
بنت النيل
المستشار بالانجليزي
تشرفت بمروركم الجميل ونوعدكم بالاحلي ان شاء الله