ما بين احمد وقنبلة سليمان طه .. والزواج العرفى .. علاقه طرديه!!!!

[محمد الجزولى]

عندما فكر احمد بان يدخل القفص الذهبى بعد غربه امتدت لاكثر من 12 سنه امضاها بين امال عراض فى تكوين النفس وصقل الذات بالخبره والتجريه وبين الاستقرار الاسرى والعائلى ... المهم رجع اخونا احمد الى بلده ومعه الشيله وكل مستلزمات العرس وكله امل فى ان يجد العروس المناسبه للارتباط بها ومن ثم الرجوع الى موقع عمله ... بعد استعراض كم صوره وكم اقتراح من امه واخواته وقع اختياره على احدى الحسان والتى تسكن فى احد الاحياء المجاوره لهم ... عزم امره وتوكل على ربه واخبر اسرته بعزمه وذهبوا الى اسرة عروسته ( لفتح الخشم والذى منه )
تحدثت ام احمد اولا معلنة رغبتها فى ارتباط ابنها بابنتهم واخذت تعدد مزايا ابنها ومقدرته الماليه و عمله فى احدى دول الخليج كما لم يفوتها ان تذكر محاسن العروسه المختاره وعندما انهت حديثها قالت ام البنت مخاطبه ام احمد :
والله يا اختى نحن مبدئيا ما عندنا مانع بس عندنا استفسارات قبل الشوره!!!
ومالو يا اختى من حقك والاصول بتقول كده !!!
طيب يا اختى اول شئ انتو عاوزين العرس ده شرعى ولا عرفى ولا مسيار ؟؟؟؟
سكتت ام العريس قليلا ثم قالت مخاطبه ام العروس . قلتى شنو يا اختى انا ما سمعته كويس؟؟؟؟
قلت ليك يا بت امى انتو العرس عاوزنو كيف؟؟؟ شرعى ولا عرفى ولا مسيار ؟؟؟؟ عشان الامور ح تختلف حسب نوع العقد!!!!
استغفر الله يا بنت امى نحن قصدنا شريف وجايين بى خشم الباب وعاوزين البنت على سنة الله ورسوله !!!
ما هو كلو على سنة الله ورسوله يا ينت حشاى وطالما انتو اخترتو العرس يكون على شرعى يبقى برضو خير وبركه لكن هنا الوضع بختلف شويه؟؟؟؟
كيفن يا اختى؟؟؟؟
يعنى من ناحية العقد والشيله والكلام ده ؟؟؟
ولا يهمك يا اختى انحن جاهزين وولدى ما بقصر!!
طيب يا اختى اول شى العقد لازم يتم على يد الماذون هيثم ( سمعتى بيهو طبعا ) وده يا اختى طلباتو غير !!!
غير كيف يعنى ... مش ياهو العقد البنعرفو ده ؟؟؟!!!
لا لا يا بت امى ... اول شى العقد لازم يتم فى الهيلتون ولازم انتو توفرو حمايه كامله للبودى قارد بتاع الماذون وبعدين فطور الماذنون وجماعتو عليكم !!!!
اندهشت ام احمد من كلام ام العروس بينما واصلت ام العروس حديثها :
وبعدين الشيله لازم تكون كلها الكترونيات .... يعنى تياب وقمصان نوم وريحه دى ما عاوزنها ... دى يجيبها العريس بى راحتو لى العروس بعد العرس !!!!!
وبعدين يا اختى؟؟؟ خاطبت ام العريس مخاطبه ام العروس :
وبعدين يا اختى من ساعة الخطبه لحدى يوم العقد العروس مسئولية العريس ... يعنى مصاريفها والذى منه على ولدكم ولو عاوز يعقد من بكره نحن ما عندما مانع !!!
لا لا يا اختى كان كدى نحن عاوزنو مسيار !!!!
ما فى مانع يا اختى وبرضو خير وبركه ... بس ده كمان شروطو براها!!!!
شرووط ؟؟ اها شروطكم شنو يا اختى ؟؟؟؟
المسيار يا اختى لازم العقد يكون فى النادى؟؟؟ والماذون لازم يكون بين ال 18 سنه وعشرين سنه !!! والشيله يا اختى ما كثيره بس عربيتين يسجلو بى اسمى
وبعدين يا اختى؟؟؟؟
شهر العسل يكون محدد بى مده معينه واذا تجاوزها العريس ينطبق عليهو الشرط الجزائى؟؟؟
شرط جزائى؟؟؟ !!!
ااااى يا اختى شرط جزائى !! وبعدين ....
هنا صاحت ام احمد مخاطبة ام العروس : يا اختى عاوزنو عرفى ... العرفى ده مالو عيبيهو لى
صاحت ام العروس بلهجه واثقه : ومالو يا اختى عرفى عرفى ما عندنا مانع بس ده كمان بى شروطو!!!!
شرووطو شنو يا اختى ؟؟؟؟
اول شى يا بنت الناس العقد يكون فى البيت هنا واجرة الماذون كامله عليكم ... والقسائم يكونن عند الحاج هنا !! ابو البت يعنى!!!!
ابو البت ؟؟؟ سالت ام العريس ... هو ابو البت عايش؟؟؟؟
نحمد الله وهو كمان كان شاهد فى عرس جيرانا ديل الاسبوع الفات ... اصلوا عرسو لى بنتهم زواج عرفى ....
كل هذا واحمد ساهما يسمع وهو غير مصدق من هول ما يسمع بينما قامت ام احمد متثاقله وهى تخاطب ام العروس : قلتى لى عايش يا اختى ؟؟؟؟ ثم التفتت الى ولدها احمد والذى كان يغنى بصوت عالى ... قنبله .... قنبله... وهو يشد على شعره بجنون!!!!!

[العاقب مصباح]

رائع رائع رائع كالعادة
مشتاقين فى الاول
وجهجهتنا
اصلو نحن سيرة العرس دى بترفع كثافتنا
وبتخلينا رقاااااااااااااق
وخاتفين لونين
بين تعدد مطالب الحركات المسلحة
والتى اعتبرها مسلحة لأن هذه الطلبات لن تكون فى حركة مقاومة ديمقراطية ابدا
وشهر العرس محدد
ياخى بالغت
لو الناس طبقت النظام بتاعك دا انا اول من يرفع فيك دعوى للمحكمة الشرعية والدستورية
لأننا حنكون من اكبر المتضررين
بين الشيلة الالكترونيات
وموبايل واحد يجيب خبر ريالاتك كلها
ونحن غالبنا تمن شوال سكر
كيلة بصل
كيلو شمار وتوم وكزبرة
ودقيق لقيمات عشان النسيبة تقوم تسو لقيماتها من دغش الرحمن
رغم وجود ثلاثة خيارات
الا انها تؤدى بنا الى اختيار العزوبية اجمل مقر واجمل سكن
نقضيها لعب كوتشينة افضل لينا
والفورة مليون
وملابس النوم
مصيرها الى فترينات المحال الراقية
رغم احلامنا الكثيرة حين نراها
وهى معلقة كرقابنا فى يد مكفولينا
وبى عيونك تقول لى تعال وتعال
بى نسيبتك تقول لى لا مافى مجال
وسلم لى على العروس
والعريس
إن التقيا يوما
ود الجزولى
والله العظيم انت مبدع وبس

[مدنيّة]

اخشي ان ياتي علينا يوم يصبح فعلا هذا واقع حالنا في السودان
ربنا يستر علينا
:(:(:(:(:(:(

[محمد الجزولى]

رائع رائع رائع كالعادة
مشتاقين فى الاول
وجهجهتنا
اصلو نحن سيرة العرس دى بترفع كثافتنا
وبتخلينا رقاااااااااااااق
وخاتفين لونين
بين تعدد مطالب الحركات المسلحة
والتى اعتبرها مسلحة لأن هذه الطلبات لن تكون فى حركة مقاومة ديمقراطية ابدا
وشهر العرس محدد
ياخى بالغت
لو الناس طبقت النظام بتاعك دا انا اول من يرفع فيك دعوى للمحكمة الشرعية والدستورية
لأننا حنكون من اكبر المتضررين
بين الشيلة الالكترونيات
وموبايل واحد يجيب خبر ريالاتك كلها
ونحن غالبنا تمن شوال سكر
كيلة بصل
كيلو شمار وتوم وكزبرة
ودقيق لقيمات عشان النسيبة تقوم تسو لقيماتها من دغش الرحمن
رغم وجود ثلاثة خيارات
الا انها تؤدى بنا الى اختيار العزوبية اجمل مقر واجمل سكن
نقضيها لعب كوتشينة افضل لينا
والفورة مليون
وملابس النوم
مصيرها الى فترينات المحال الراقية
رغم احلامنا الكثيرة حين نراها
وهى معلقة كرقابنا فى يد مكفولينا
وبى عيونك تقول لى تعال وتعال
بى نسيبتك تقول لى لا مافى مجال
وسلم لى على العروس
والعريس
إن التقيا يوما
ود الجزولى
والله العظيم انت مبدع وبس

فارس الكلمه صديقى العاقب مصباح
تحياتى واحترامى
والله يا العاقب فى ظل التحول الاجتماعى السريع الحاصل فى السودان ده ما تستبعد انو شهر العسل يكون محدد المده .. زى عقودات العمل بتاع الخليجيين ديل ... تصدق يا العاقب انو الماذون ابو بودى جارد موجود فعلا ... وانا شخصيا حضرت ليهو عقد واحد
قريبى ...
غايتو قول يا هادى

[محمد الجزولى]

اخشي ان ياتي علينا يوم يصبح فعلا هذا واقع حالنا في السودان
ربنا يستر علينا
:(:(:(:(:(:(


على قولك اختنا مدنيه ربنا يستر ويبدو لى ان رياح التغيير العاتيه التى تجتاح المجتمع ستؤدى بنا الى اشياء غريبه عنا
لكى شكرى وامتنانى على مرورك الراقى

[العاقب مصباح]

... تصدق يا العاقب انو الماذون ابو بودى جارد موجود فعلا ... وانا شخصيا حضرت ليهو عقد واحد
قريبى ...
غايتو قول يا هادى


؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يا شيخ قول كلام غير دا

السبب شنو يعنى يكون للمأذون بودى قارد

حيلاقوهو اتنين ويقولوا ليهو اعقد لينا بالقوة

ولا فى واحدة تقول ليهو طلقنى بالقوة

ياخى لو كان قريته فى الجرائد كنت بقول كذاب × كذب

لكن منك انت مصدق تب

من يعش كثيرا يرى العجائب

لا حول ولا قوة الا بالله

[بت الشبارقه]

والله مصيبه لو السودان وصل المرحله دي بجد
ومابعيد يكون وصلا بعد البنسمعوا ده
اللهم نسالك الستر في الدنيا والاخره

[حاتم مرزوق]

فنتازيا هذا القرن تطلقها من هنا اخي محمد الجزولي وترصد فيها مخاوف مستشفة من واقع التأثيرات السلبية للعولمة علي مجتمعنا المحافظ و نتمني ان لا تجد هذه المخاوف مكانها في ارض الواقع ونشيد بحلاوة التناول والطرح السهل الممتنع و بدورنا نطلق طلقة مضادة هي كلمات تغني بها الفنان زكي عبد الكريم شفاه الله عسي ولعل ان توقف من السيل العارم للعولمة.



اميرة الشباب يا السمحة أنا جايك عريس
بي كتب الكتاب يا الملكة مهرك مو رخيص

عارفك جميله وزايده في البنوت حلا
المال عليك يا غالية أبداً ما غِلا
لكن ظروفنا القاسية كيف بنبدلا
فاضل وحاتك بس نفوس مدللا

من قلبي دايرك ليّ شريكه وأم عيال
لكنو قربك ليّ بعيد صعب المنال
يعجبني فيك لو قلتي أنا ما دايره مال
وأصلو العرس بالفاتحة يا ناس ما حلال

بت المدن يا الواعية يا الدارسة الكتاب
غلا المهور حاربيهو ما تخليلو باب
إتمنى خت الحنة وأعرض في السحاب
وأرقّص بنات حلتنا دايرات الشباب

عايش وحيد بلدي فيها الحور بنات
عاشق جمال بنوتنا سمحات الصفات
قولوا خير باركوا العرس يا الأمهات
على الشباب خايف يفوت فيهو الفوات

[moh_alnour]

في زمن تبدلت فيه الأشياء شكلا ً و معنا ً لا أستبعد حدوث مثل هذا الموقف
لكن الذي لم أتخيله تماما ً هو وجود مأذون يسير بمرافقة حرس شخصي ( بودي غارد )
تعيش كتير تشوف كتير
و الليالي من الزمان حُبلى مُثقلات يلدن كل عجيب

[محمد الجزولى]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يا شيخ قول كلام غير دا

السبب شنو يعنى يكون للمأذون بودى قارد

حيلاقوهو اتنين ويقولوا ليهو اعقد لينا بالقوة

ولا فى واحدة تقول ليهو طلقنى بالقوة

ياخى لو كان قريته فى الجرائد كنت بقول كذاب × كذب

لكن منك انت مصدق تب

من يعش كثيرا يرى العجائب

لا حول ولا قوة الا بالله

والله يا العاقب اخوى زى ما بقول ليك كده ... وانا شفتو بى عينى ديل يعنى ما حكوهو لى ... وكمان اخوك لزوم التوثيق وكده اخد ليهو صوره بجانب الماذون والبودى جارد بتاعنو ...
الم اقل لك يا صديقى .... قول يا هادى ....

[محمد الجزولى]

والله مصيبه لو السودان وصل المرحله دي بجد
ومابعيد يكون وصلا بعد البنسمعوا ده
اللهم نسالك الستر في الدنيا والاخره

على قولك اختى بت الشبارقه .. اللهم نسالك الستر فى الدنيا والاخره ... اللهم امين
شاكر لكى مرورك الرائع اختى الكريمه

[محمد الجزولى]

استاذى حاتم مرزوق
لاشك ان رياحا عاتيه تجتاح مجتمعنا السودانى باسره ... نتمنى من كل قلوبنا ان لا نؤثر فيه تأثيرات جذريه...
شاكر لكى استاذى القامه على كلماتك الراقيه ومرورك الرائع

[محمد الجزولى]

في زمن تبدلت فيه الأشياء شكلا ً و معنا ً لا أستبعد حدوث مثل هذا الموقف
لكن الذي لم أتخيله تماما ً هو وجود مأذون يسير بمرافقة حرس شخصي ( بودي غارد )
تعيش كتير تشوف كتير
و الليالي من الزمان حُبلى مُثقلات يلدن كل عجيب


فعلا اخى محمد النور تعيش كتير تشوف كتير
شاكر لك مرورك الانيق اخى الكريم

[esmat]

الاخ محمد الجزولي
ابداع وطريقة سلسة وفي غاية الجمال
للمعالجة وبسهولة وبساطة في اختيار الكلمات
واصل مبدعنا في طرق كافة الطرق والاساليب
حتى تتضح الرؤية للكل ويعلم الجميع.

[امير عبدالباقي]

والله ياجماعة نحن طولنا من السودان مالكم عاوزين تخوفونا
حرس للماذون (حكمة والله و ارادة)

[زيزي]

هههههههه
كلام والله

[محمد الجزولى]

الاخ محمد الجزولي
ابداع وطريقة سلسة وفي غاية الجمال
للمعالجة وبسهولة وبساطة في اختيار الكلمات
واصل مبدعنا في طرق كافة الطرق والاساليب
حتى تتضح الرؤية للكل ويعلم الجميع.

تسلم حبيب الشعب اخونا esmat على كلماتك الرائعه
فهى تعطينا الامل وتبدد ضباب الرؤيه
سلمت اخى العزيز من كل شر

[ابو لوزة]

الاخ محمد الجزولي لا تستبعد الموضوع ده
يمكن في القريب العاجل يحصل
وربنا يكون في عوننا وبعدين انا الماذون
ولا داير فطور ولا عندي بودي غارد
والبعقد ليه مجاني تب

[الصامته]

ههههههههههه
ولسه في زواج المطيار و غيرو وغيرو هههههههه
الله يعينكم يا شباب

[محمد الجزولى]

والله ياجماعة نحن طولنا من السودان مالكم عاوزين تخوفونا
حرس للماذون (حكمة والله و ارادة)

العزيز امير عبد الباقى
سافر يا اخوى فالسودان لا زال بخير ... وانما هى ارهاصات لما يجتاح مجتمعنا من تغيير
لك ودى عزيزى امير وشاكر لك مرورك الرائع

[بت أم درمان]

هههههههه
بالرغم من ان دي قصة وكلام في كلام
بس جد ممكن يبقى واقع في يوم من الايام
خاصة وان السودان بلد عنده قابلية للتغير باي شكل
وفي اي وقت
والغزو الثقافي سهل جدا في بلدنا مافي ايييييي مقاومة
و ربنا يستر

[الجندي المجهول]

لكل شيخ طريقته ( لكن انت ) طريقتك غير

عبارة عن متعة ( بس ما تبخل علينا) شغل القطارة دا خليهو عاوزين كميات كميات


تخريمة ----------

هل ؟

[محمد الجزولى]

هههههههه
كلام والله

زيزى
يديك العافيه
وشاكر لكى مروروك الكريم

[محمد الجزولى]

الاخ محمد الجزولي لا تستبعد الموضوع ده
يمكن في القريب العاجل يحصل
وربنا يكون في عوننا وبعدين انا الماذون
ولا داير فطور ولا عندي بودي غارد
والبعقد ليه مجاني تب

حبيبنا ابو لوزه
نسال الله ان لا يحدث ذلك فى السودان
ويا اخوى العقد المجانى ده بلم فوقك الناس
شاكر لك مرورك الكريم اخى ابو لوزه

[محمد الجزولى]

ههههههههههه
ولسه في زواج المطيار و غيرو وغيرو هههههههه
الله يعينكم يا شباب

الصامته
حبابك الف
وربنا يعين الجميع
شاكر لكى مرورك الانيق اختى الكريمه

[الزمن المريح]

تسلم يا ود الجزولى يا رائع على الاضافة الجميلة و الموضوع بالجد كبير و عاوز ناس تتحزم و تتلزم و تشيل الشيلة و بالمناسبة الاخوة المغتربين نحن معاكم لكن سمعة السودانيين المغتربين اسواء و اضل سبيل

[درديري كباشي]

حلوة الفكرة يا الجزولي احيانا الواقع يمشي في اتجاهات خطيرة لكن يسبقها الكاتب بخياله ليقول للناس انتبهوا انتم الى اين سيذهب بكم هذا الطريق .. وبالتالي هي معالجة وقائية عسانا نصحو من هذا التوهان

[خالد أحمد الصول]

بت الافندي أمرأه فاتت الخمسينات ولكنها تتمسع في أوائل الاربعينات ... ترتدي ثوب آخر موضة و توابعة من الطرحة و الشبشب و الذهب و الذي منو ... و جهها يندي زيتا و زيتونا و جضومها منفخة كالبيتزا الهوت ... أستضافتها تلك فارغة العقل مزيعة قناة النيل الازرق أمس ... فكان كمقدمة أن قامت المذيعة البرستيج و التي تنم ملامحها عن حقد طبقي و حياة غير مرفهه ... أول ما عرضته هو ريبورتاج مصور ظهرت فيه موسيقا القرب الحبيبة للنفس وهي نعزف أجمل ألحان السيرة الحديثة و تم عرض أصناف مصنفة من المحمر و المقمر و المشمر ... كلها أصناف دخيله علي المائدة السودانية مقرطسة بورق السيلوفان وورق الالمونيوم و ورق التزيين و الاستعراض و البوبار ... ثم ظهرت خلف هذا الحدث التأريخي الهام نساء مكشكشات بالذهب و متأنقات و متزينات أكاد أن أجزم أن كل واحدة منهن قد قضت في الكوفير أكثر من 4 ساعات ... تفوح منهن روائح و تبدو شعورهن سافرات حرصن علي رفع الايدي حتي تبين بلوزاتهن فجميعهن متزوجات قبل 24 سنه أو أكثر لا يحوم حولهن راجل و الذي أصلا قد جعلن مهمته فقط الدفع المقدم ... فلا يعترض ولا يتدخل ولا يعدل منكرا
لا بيده ولا لسانة و لا حتي بقلبة ... فقد مات قلبة زمانا ... تلي ذلك أستطلاع نسائي عما حدث فكان التفاخر و الفشخرة و النفخة الكذابة علامته ... و هذه أم العروس تتحدث عن ذلك الحدث الهام و الذي تم تصويرة و هو فطور العريس ... و قد تحدثت عن المقدرة و الاستطاعة و قبح الله الفقر و سمحة المقدرة ... ثم تلتها كل الفشخارات و البوبارات اللاتي أثنين علي السنه الحسنة في إرسال فطور العريس و الذي أصلا هو ليست للاكل إنما للاستعراض و زيادة في إضطهاد أمهات العروسات لازواجهن و إستعمال العنف الثوري مع تلك الفئة التي صارت من ذوات الدم البارد ... و من ثم عاد الحوار للاستديو الانيق و الذي كانت بطلته بت الافندي و التي تحدثت عن فطور العريس أبو 5 مليون و الذي تقوم بإعدادة و ما علي أم العروس إلا الذهاب للكوفير و إنتظار تلفون منها لتحديد زمن الاعداد ... ثم من تجاربها حكت حكاية أبو العروس الذي زهجها بحضوره اليومي و تفقده لفطور العروس بنفسه و إبداء الملاحظات الدقيقة في عجينة البيتزا و الجبنة الموزريلا ... و خلافه ...
أتقدم بإستيائي البالغ لمدير قناة النيل الازرق ... و تلك المذيعة التي تستقل الاعلام في ترسيخ عادات دخيلة غريبة ضاره في بلد المليون ميل
و أسجل أحتجاجي و أرسل صوت لوم كبير علي إدارة هذه القناة التي لا تراعي الزوق ولا السعور العام ولا الادب في أختيار مثل هذه المواضيع
و أسجل شكري و تقديري لهؤلاء الرجال البلهاء الذين يطاوعون زوجاتهم في تلك الاعمال التي نهي الاسلام عنها و ذلك الاسراف المضر
كما لا يفوتني أن أهني حواء السودان علي إنجازين: الاول إضطهاد الرجال البلهاء و الثاني ترك العادات المتخلفة في إعداد الطعام و الالفه و إستجلاب
فطور العريس جاهزا من المحلات الكبري

[moh_alnour]

و الله ياود الصول لما حضرتا الحلقة دي من برنامج مساء جديد حلقة أفراح أفراح
جاتني نفسيات عدييييل كدا و قلتا شكلنا كدا ما ح نعرس طالما فطور العريس بي خمسة مليون
يعني مفروض أودي شيلة بي كم عشان يجيني فطور زي دا :(
عشان كدا نشوف لينا واحدة من ناس ( ش . ع ) ديل لا فطور عريس لا لخمة فاضية
يوم وااااحد في الأستراحة و كان الله يحب المحسنين

[الشايقية]

والله كلام

ههههههههههـ

الله يعينكم يا شباب

[محمد الجزولى]

هههههههه
بالرغم من ان دي قصة وكلام في كلام
بس جد ممكن يبقى واقع في يوم من الايام
خاصة وان السودان بلد عنده قابلية للتغير باي شكل
وفي اي وقت
والغزو الثقافي سهل جدا في بلدنا مافي ايييييي مقاومة
و ربنا يستر

ربك يستر اختى بت ام درمان وما يصير واقع معاش
شاكر لكى جدا مرورك الكريم الذى اسعدنى

[محمد الجزولى]

لكل شيخ طريقته ( لكن انت ) طريقتك غير

عبارة عن متعة ( بس ما تبخل علينا) شغل القطارة دا خليهو عاوزين كميات كميات


تخريمة ----------

هل ؟

تسلم يا جندينا المبدع على كلماتك الرقيقه وحمد لله على سلامة عودتك لتشعل المنتدى نشاطا
رد التخريمه " لا !!

[محمد الجزولى]

تسلم يا ود الجزولى يا رائع على الاضافة الجميلة و الموضوع بالجد كبير و عاوز ناس تتحزم و تتلزم و تشيل الشيلة و بالمناسبة الاخوة المغتربين نحن معاكم لكن سمعة السودانيين المغتربين اسواء و اضل سبيل

اخى العزيز الزمن المريح
تسلم يا انيق على كلماتك الرقيقه ... وربك يلطف بالسودان والسودانيين
شاكر لك مرورك الانيق

[محمد الجزولى]

حلوة الفكرة يا الجزولي احيانا الواقع يمشي في اتجاهات خطيرة لكن يسبقها الكاتب بخياله ليقول للناس انتبهوا انتم الى اين سيذهب بكم هذا الطريق .. وبالتالي هي معالجة وقائية عسانا نصحو من هذا التوهان

صاحب الابداع الثر
اخى درديرى كباشى
واقعنا تتهدده متغيرات عظيمه اخشى ان لا نستطيع الصمود امامها
شاكر لك اخى العزيز مرورك الرائع كروعتك

[حسام التنين]

والله ياخوانا لو الوضع بقي كده الله لا كتر بيوت العزابة والكشاتين والفورة مليون
((اتخيل الاقيك واحد اقول ليك انا ماشي اشتري عربية ام العروس))

[محمد الجزولى]

الاخ الرائع دوما خالد احمد الصول
مشرفنا الهمام محمد النور
الاخت الرائعه الشايقيه
الاخ الرائع تنين انا
شاكرين لكم مروركم هنا والذى اسعدنى جدا
وشاكرا لكم الاضافه القيمه
لكم ودى وحبى ...