يااااحليلك يل بتشيل من البنوك وتشتت قبل ما يحلقوك

[:@ارجوان:@]

ملاح قرع وبامية مفروكة وكسرة وصحن سلطة و(ملاحة) ... ده كان الأكل فى بيوت البكا قبل أن يصبح (البكاء ذاتو) مظهر إجتماعى ونوع من أنواع (الفشخرة) بعد أن اجتاحت البلد أعداد مهولة من (المليارديرات الجدد) أصبحت تؤثر سلوكياً على بقية الطبقات الأخرى حتى صارت (الفاتحة) هى الفرق الوحيد بين الأتراح والأفراح!
عندما توفى رجل الأعمال (حسن يورو) قامت أسرته بفتح أبواب (الفيلا) الفاخرة لأفواج المعزين علاوة على (صيوان) ضخم نصب بطول الشارع العريض مزود بعدد مهول من مكيفات الهواء تغطى أرضيته (السجاد) لزوم (عدم الغبار وكده)!
عند موعد الغداء انتشر أفراد يرتدون زياً موحداً يحملون (صوانى الأكل) النيكل الناصعة التى ترتاح بداخلها أطباق المشويات والمحمرات والمقبلات وقطع الرغيف الفاخر بينما وضعت امام كل صينية عدد من زجاجات المياه المعدنية البااااردة!
فى صالون النساء جلست سوسو (فى الأصل ست البنات قبل أن يصبح حسن يورو رجل أعمال) جلست على سرير خشبى مستورد عليه ملاية قطيفة تتلقى التعازى من جاراتها وصويحباتها اللواتى جئن وهن فى كامل زينتهن (ناقشات) الحنة الما خمج يرتدين ثياب (الشيفون) المطرزة والشباشب ذات الكعب (البلية) تمتلئ أياديهن ورقابهن بآخر صيحات سوق الدهب فى (دبى) وبقية العواصم الخليجية!
- كلمتى (عوضية ردحى)؟
همست (سوسو) لجارتها وصديقتها (نوسة) والتى مالت قريبا منها وهى تجيبها:
- والله (عوضية ردحى) دى قالو عندها مناسبت بكاء فى (مدنى) سافرت مشت ليها، قمت مشيت لى (هاجر حى ووب) قالو ليا عندها إرتباط خارجى فى (دبى) فى واحد من ناس الجالية مات هناك أها فى الأخير مشيت كلمت ليكى (حنان سكليب) لقينا ما عندها ارتباط ووقعت العقد مع مدير أعمالا! وأديتو مليون عربون مقدم.
- وشالت منك البيانات!
- أديتا ليها كووولها.. المرحوم كان شغال شنو؟ وعندو كم عمارة؟ وقاعد يتبرع لى ياتو (نادى) وإشترى ليهم كم (لاعب)؟ وعربيتو الراكبا نوعا شنو؟ وموبايلو الشايلو موديلو كم؟
انتهت مجموعات النساء من تناول طعام الغداء الفندقى (الما خمج) ثم جئن لهن بالتحلية (باسطة وبسبوسة وكنافة وعين جمل وأم على) شئ باللوز وشئ بالجوز وشئ يالما بعرفو شنو داااك وبعد أن (ضربن) بدأن فى زحزحة الكراسى (البامبو) والجلوس كيمان كيمان (للشمارات) وهن يمسكن بثرامس الشاى (المذهبة) المتشابهة (الكبيرة حقت الشاى والصغيرة للجبنة) التى تفوح من (فناجينها) رائحة (المستكا)..
وفجأة دخلت إلى الصالون شابة (آخر شياكة) ذات مظهر يطابق كثيرا مظهر مغنيات هذا الزمان يمشى خلفها ستة (شابات آخريات) من نفس الشاكلة يرتدين زياً موحداً وهن يرفعن أياديهن عاليا فى حركات متتابعة ويصحن بصوت كالجرس يشق عنان السماء:
ووووب ووووب وووووووووووووووووووووووووووووووووووووووووووووووووو ب..
ثم تبدأ (حنان سكليب) فى السكلى و(الوصف) وهن يرددن خلفها:
- ووووب عليا والله ليا يا حسن يوروو يا البتدى البتدورو والما بتدورو
ووووب عليا والله يا صغير وجاهل يا البتجيب القروش بالساهل
يا ود امي.. هيء يء يء يء ..
الكورس : وووب ... وووب ...ووووووووب
الليله يا حليلك يا زين الرجال ياملك الدولار يا البتستر الحال
الليله يا حليلك يا البتشيل من البنوك وتشتت قبال ما يلحقوك
يا ود امي.. هيء يء يء يء ..
الكورس: وووب ... وووب ...ووووووووب
الليلة وينك إنتا يا الإسبليت هبوبك والهمر ركوبك
الليله وينك إنتا يا البنيت المقصورة وركبت النافورة
الليله وينك إنتا يا أب جيوب منفخة وأب عربية مصفحة
يا ود امي.. هيء يء يء يء ..
الكورس: وووب ... وووب ...ووووووووب
يا حليلك الليله يا البتفك الصعيبة ويا البتسجل اللعيبة
يا حليلك الليله يا جوكى البنوك يا التهريبك بالسنبوك
يا ود امي.. هيء يء يء يء ..
الكورس: وووب ... وووب ...ووووووووب
ثم تعدل (حنان سكليب) توبا الشفون (الترانسبيرنت) الكان واقع وتنظر للكورس خلفها نظرة الفنان الذى يود أن (يختم) الأغنية فيبدأن فى (تحرير) البكاء ويرفعن أصواتهن ويضربن بأياديهن ليبدين زينتهن (دهب دبى وكده) ... ووووووووووووب وب وب وب ووووووووب ثم يتوقفن فى لحظة واحدة بإشارة من (حنان سكليب)! التى تجلس على أقرب كرسى وتتناول علبة مناديل الورق وتخرج منديلين تمسح بهما حبات العرق التى تساقطت بفعل المجهود رغم برودة التكييف ثم تلتفت إلى النسوة اللواتى كن فى الصالون يتابعون (فاصل السكليب) قائلة:
- قبلكن وحدكن.. جنس بخلن عليكن .. أول مرة أمشى ليا (بيت بكا) ما ينقطوا ليا فيهو!!

منقول من الرأي العام

[moh_alnour]

تعيش كتير تشوف كتير
التحية للكاتب الساخر الفاتح جبرا
و لك ِ أرجوان
وللأخ هادي صالح
http://www.wadmadani.com/vb/showthread.php?p=305805

[:@ارجوان:@]

تعيش كتير تشوف كتير
التحية للكاتب الساخر الفاتح جبرا
و لك ِ أرجوان
وللأخ هادي صالح
http://www.wadmadani.com/vb/showthread.php?p=305805


التحيه ليك انت ولي حفظك لجهد الاخرين وشكرا على التزكير

كون بخير

[ابوالنور]

النبي فيك في زول بقري للساخر جدا وما بعرف بي فليل

[حاتم مرزوق]

التحية لك ارجوان ولصاحب الآتو ود الجاك.

[العاقب مصباح]

تناول هذا الموضوع قبل فترة الكاتب الرائع والصحفى فى صحيفة الرأى العام عبد العليم عبدالله

وقد تناوله فى كتابه عجائب الخرطوم السبع

واحسبه يتفوق كثيرا على الفاتح جبرا

اترككم مع ما كتبه






لفت نظري قبل ثلاثة أسابيع في منزل ضخم واسع بوسط محافظة الخرطوم حيث ذهبنا لتعزية صديق في والده, لفت انتباهي مرور امرأتين في حالة بكاء وعويل وهما تدوران حول المبنى الداخلي وبالتفرس في وجهيهما وسحنتيهما أيقنت أنهما ليستا من أقارب المرحوم ولاحتى من معارفه, ولما اشتد بي (الشمار) سألت أحد أقارب المرحوم من الشباب عنهما فقال لي: ديل يا عمو (بكايات) يعني ببكن بالقروش، المستطيع يأجرهن طوال أيام المأتم والعاجز يكتفي باليوم الأول فقط!! لاحظ العاجز دي..

تحضر النائحة إلى منزل العزاء وتطلب الـسي في ، أي السيرة الذاتية للميت من زوجته أو ابنته الكبرى:

العمر: 70 عاما.

المهنة: ضابط معاش وله وكالة سفر وسياحة.

المستوى التعليمي: دبلوم الحربية زائدا بعض الكورسات في الترجمة والحاسوب.

أسماء أكبر الأبناء والبنات: فيصل, أحلام, رابحة, عواطف.

هل قام بأي عمل بطولي: نعم, محاولة انقلابية فشلت في فترة الرئيس نميري.

تأخذ النائحة المعلومات وتعقد اجتماعا عاجلا بزميلاتها وبعد التداول يخرجن للملأ وهن يرددن: الليلة ياب دقنا دايرة وخدودا نايرة وقدرتن فايرة وشيكاتن طايرة- كتلنا فيك الليلة يا أبو أحلام يا الشالوك للصالح العام وحكموا عليك بالإعدام – ما دايم إلا الله ووووووووووووووووووووووووب وأحييييييييا.. الليلة يا السايق الكراون يا أب مدفعا هاون وينك لينا؟ أوروروووووووووووووووك.. وهنا يهج البيت ويفور بالعويل والنواح وتميل النائحة يسارا ثم تنحني ضاغطة بيدها اليسرى على أنفها ثم تنظر إلى ابنته الكبرى نظرة ذات فحوى ولسان حالها يقول: لقيتيني كيف؟ وتواصل في الوصف وتعديد مآثر الفقيد: الليلة يا الساكن ديم لطفي أب كلمة تشفي الما متزوج عرض زايلة وخربانة (يعني مازول دنيا) ، البجيك بتجبرو والواقع بتشيلو يا السايق الباجيرو.. مو دار عمار فقدتك السكرتيرة والطربيزة المستديرة والمرسيدس الخنزيرة خليتنا لمنو ياخووووووووووي يي يي يييي إهيء ؟! لاحظ العربة قبل دقائق كانت كراون!


بعد ذلك تذهب النائحات إلى غرفة قصية حيث يؤتى لهن بالثريد والإدام والزواحف والبارد والساخن وعند الانتهاء من هذه المأدبة تنقد البنت الكبيرة النائحات مبلغ 300 ألف جنيه وتقول لهن همسا: ضروري حضوركن بكرة المغرب عشان ناس السعودية والبلد جايين.. كويس؟


منقول من ايميلى

[:@ارجوان:@]

النبي فيك في زول بقري للساخر جدا وما بعرف بي فليل



تخيل بفليل دي تحديدا مشيت سالتا منها عمو قوقل قال لي قولي لي ابو النور لمبتك دي اتحرقت امشي اشتري ليك لمبه جديده عشان تدينا كلمه نبحث عنها :p:p

ابو النور نورتني بي مرورك دمتا بي خير

[:@ارجوان:@]

التحية لك ارجوان ولصاحب الآتو ود الجاك.



التحيه لمرورك الكريم

[:@ارجوان:@]

تناول هذا الموضوع قبل فترة الكاتب الرائع والصحفى فى صحيفة الرأى العام عبد العليم عبدالله

وقد تناوله فى كتابه عجائب الخرطوم السبع

واحسبه يتفوق كثيرا على الفاتح جبرا

اترككم مع ما كتبه










العاقب تسلم على الاضافه الجميله بس انا حابه اعرف هل الكلام دا حقيقه حاصل في السودان ام مجرد انتقادات للحاصل في البكيات من تابهي

دمت بالف خير

[العاقب مصباح]

العاقب تسلم على الاضافه الجميله بس انا حابه اعرف هل الكلام دا حقيقه حاصل في السودان ام مجرد انتقادات للحاصل في البكيات من تابهي

دمت بالف خير




الموضوع دا حاصل اختى ارجوان

وبلدنا كل يوم فيها جديد

وكفاية انو وفاة المرحوم بتكون فى شركة خاصة بى عمالها لخدمة اهل المرحوم

ويرتدون زيا موحدا

انعدم التكافل

عن عبد الله بن جعفر -رضي الله عنه- قال: لما جاء نعي جعفر حين قُتل، قال: رسول الله -صلى الله عليه وسلم- اصنعوا لآل جعفر طعاما فقد أتاهم ما يشغلهم
أخرجه الخمسة إلا النسائي.

احتراماتى

[ود النمير]

بسم الله الرحمن الرحيم


أضحكني هذا المقال حتي كدت أن أقع من الكرسي الذي أجلس عليه من الافراط في الضحك ، فالكاتب شكلو خبير بكيات وعرف أختار النص كويس!!
لكن حقيقه مجتمعنا السوداني أصبح كل يوم يأتي بالجديد الشديد زي مابقولو !!
ولكن الذي أستغرب له كيف للانسان أن يبكي وينتحب دون شعور حقيقي للبكاء؟!
ومهما كانت الحوجه الماديه هل من الصحيح أن يقبلن هؤلاء النائحات بأفساد مثل هذه الانفعلات الحقيقيه التي تعبر عن أنسانيه الانسان
الي أعمال دراماتيكيه مخجله ومهينه للعوطف والمشاعر وكيف تُطاوع بعض النسوه نفوسهم لأيجار بكايات لأبيها!!
هل تحجرت القلوب والمشاعر لذاك الحد الذي لا نستطيع فيه أن نزرف الدمع السخين علي فقد أعزاء لنا أم ماذا؟!
وأن كان يؤجرن لشق الجيوب ولطم الخدود ألا يدرين بأن هذا العمل مخالف للشرع وجزاءه جهنم أهي مكابره ؟!
حقيقه مثل هذه الاعمال مؤشر لسقوط أخلاقي مريع يستحق الوقفه والتحليل لمعالجه الامر وتوجيه الارشاد والنصح والتوعيه لوأد مثل هذه العادات في مهدها قبل أن تستفحل!!

[بت أم درمان]

فعلا السودانين ديل بقو عجيبين
عندهم حركات بعرفوها براهم
والمظاهر بقت اهم شي

لاحول ولا قوة الا بالله

[:@ارجوان:@]

الموضوع دا حاصل اختى ارجوان

وبلدنا كل يوم فيها جديد

وكفاية انو وفاة المرحوم بتكون فى شركة خاصة بى عمالها لخدمة اهل المرحوم

ويرتدون زيا موحدا

انعدم التكافل

عن عبد الله بن جعفر -رضي الله عنه- قال: لما جاء نعي جعفر حين قُتل، قال: رسول الله -صلى الله عليه وسلم- اصنعوا لآل جعفر طعاما فقد أتاهم ما يشغلهم
أخرجه الخمسة إلا النسائي.



احتراماتى


للاسف الشديد دا ان دلا يدل على ضيق النظره برغم من انو في فتره من الفترات كان السودان واهله يضرب بهم المثل في كل ما هو مضربا للمثل

تسلم على الايضاح كون بخير

[:@ارجوان:@]

بسم الله الرحمن الرحيم


أضحكني هذا المقال حتي كدت أن أقع من الكرسي الذي أجلس عليه من الافراط في الضحك ، فالكاتب شكلو خبير بكيات وعرف أختار النص كويس!!
لكن حقيقه مجتمعنا السوداني أصبح كل يوم يأتي بالجديد الشديد زي مابقولو !!
ولكن الذي أستغرب له كيف للانسان أن يبكي وينتحب دون شعور حقيقي للبكاء؟!
ومهما كانت الحوجه الماديه هل من الصحيح أن يقبلن هؤلاء النائحات بأفساد مثل هذه الانفعلات الحقيقيه التي تعبر عن أنسانيه الانسان
الي أعمال دراماتيكيه مخجله ومهينه للعوطف والمشاعر وكيف تُطاوع بعض النسوه نفوسهم لأيجار بكايات لأبيها!!
هل تحجرت القلوب والمشاعر لذاك الحد الذي لا نستطيع فيه أن نزرف الدمع السخين علي فقد أعزاء لنا أم ماذا؟!
وأن كان يؤجرن لشق الجيوب ولطم الخدود ألا يدرين بأن هذا العمل مخالف للشرع وجزاءه جهنم أهي مكابره ؟!
حقيقه مثل هذه الاعمال مؤشر لسقوط أخلاقي مريع يستحق الوقفه والتحليل لمعالجه الامر وتوجيه الارشاد والنصح والتوعيه لوأد مثل هذه العادات في مهدها قبل أن تستفحل!!

ادام الله ضحكك استاذي الفاضل
وصدقت في ما اوردت كيف للانسان منا ان يتجسد الحزن زيفا ان يبكي ليجني المال

وهذه ليست مؤشرات للسقوط فان كان هذا هو السائد فلقد هوينا وانتهى الامر

دمتا ب خير

[:@ارجوان:@]

فعلا السودانين ديل بقو عجيبين
عندهم حركات بعرفوها براهم
والمظاهر بقت اهم شي

لاحول ولا قوة الا بالله



احلى ما في الموضوع انو زمان بيتفشخرو في الاعراس والولادات حسه في البكاء ياخي دي عايزين عليها جائزة نوبل طبعا المظهر دا موجود في السعوديه وشفتو لكن مظهر اليوني فورم الموحد ما مظهر النائحه دا يعميني وطرش جيراني :confused: