إنحراف معياري! [الأرشيف] - منتديات ودمدني

مشاهدة النسخة كاملة : إنحراف معياري!

ابراهيم

01-06-2009, 10:15 PM

كنتني احس .. وامنطق .. !!
احسب .... وأعد ..!!
ادري أنه ليس شذوذاً عن القواعد
وكما ليس إختراع جديد!
ولكنما ...
(سبحانك لا علم لنا إلا ما علمتنا)
كثيراً ما ياخذنا الخيال فنحلق
ويسعنا المجال فضاءاً رحباً
فنبالغ في التحليق لكنما سنكون تجارب
بعد حين
وكل التجارب نافعة ..
ولو كنا ضحاياها !!
فقد حلق قديما عباس بن فرناس
وضحى ..
بعد أن ألهم الإنسان الفكرة
رغم انها كانت محلقة في الفضاء قبله
بأن كيف يطير الجماد
إلا أنه الفرق بين العلماء "وناس قريعتي راحت"
كان وقتها يوجد طيور ..!!
كانت تسافر بالرسائل
ثم ماذا
وقفة تأمل وبضع أسئلة
قد يكونوا طمأنينة وهداوة بال ..!!
فهذا الكون بديع الآن وأمس
أما غداً !!؟؟
فـ(سبحانك لا علم لنا إلا ما علمتنا)

في هذه الرحلة القصيرة
متاهات ...
لها ألوان ونكهات ...
قد تشعر بأنك قيس لبعض الليلات
في بعض الليالي !
وقد يكون فقط شعور مبني على
الكيمياء .. وقوانين الجاذبية الموقوتة
ولست تدري منطقاً او حساً ...
كيف او لماذا احتوتك تلك الفضاءات الليلائية!!
وانت لم تكن مرغماً بل ضميرك الغائب
أو قل حمار النوم!!
وربما تشعر بالغباء
لأنك خلت انك قيس ..
وسرعان ما وجدت نفسك نفس الـ(ابراهيم ، حسن ، حسب الله ....الخ)
واحياناً تكون مُحتوىً وبثقة "بكماء" أنك لست ذاك القيس
ولا هي ليلى ضفاف قصائدك!!
وسرعان ما تدرك انك فقط كنت
عوير "إن جاز التعبير"
وستندهش
بعد التأكد في واقع الأمر أنها ليلاك !
وستنشده اكثر بفكرة انك قيس!!
وهل الإنسان إلا أحاسيساً ومشاعر
تباً لهما .. !!

ما أجمل ان ندندن
"والله نحن مع الطيور الما بتعرف ليها خرطة"
وما اجملنا حينما نتشوق لغداً
فقط توقعاً وتفاؤلاً
ونترك البوصلة تختار الوجهة
فلا علوم ولا احاسيس تبرهن غداً
هو وحده سبحانه وتعالى يعلم غيب السموات الارض

ابوالنور

01-06-2009, 10:37 PM

برهتة حمد الله علي السلامة يا عثل

عبدالرحمن مدثر

01-06-2009, 10:46 PM

برهوتة

قبل النص

مشتاقين

حمدالله على السلامة

ابراهيم

01-06-2009, 10:51 PM

ابو النور ..
شوق كتير والله
تسلم يا جميل

:)

ابراهيم

01-06-2009, 10:55 PM

ابو عبدة ..
شوقنا بالزيادة ..
وتحياتي للأمورة ربنا يحفظها

:)

علي النعيم محمد نور

01-06-2009, 10:57 PM

الرائع هيمه . . .
معادله صعبه بين شوقنا ليك وجمال الكلمات . . . لكن أفضل نكمل الكلام الجميل ونخلي الأشوق بعدين . . .

ابراهيم

01-06-2009, 11:01 PM

ابو علوة ..
تحياتي ...
المعادلات الصعبة كتيرة
واحدة منهم لما تتفوق على نفسك وتجي المنتدي
والاصعب انك تكتب
والشوق بيناتم

ابوالنور

01-06-2009, 11:17 PM

إذا فرقت الايام بينكما فلا تتذكر امن كنت تحب غير كل احساس صادق ..

ولاتتحدث عنه إلا بكل ماهو رائع ونبيل...فقد اعطاك قلباً... واعطيته عمر

وليس هناك اغلى من القلب والعمر في حياة الانسان

ابراهيم

02-06-2009, 01:36 PM

صدقت صديقي ابو النور ...
فرقت الأيام كثيراً
وجمعتنا بأناس احببناهم كثيراً
وأحبونا ...
ويبقى الجميل من ذكراهم
نوراً يضىء ماضى الأيام وحاضرها
لك الود يا جميل

moh_alnour

02-06-2009, 03:37 PM

جاري العزيز برهوتة

و أنا هل كنت إلا ألقا ً ذاب في عينيك وهجا ً أبديا
أو فتونا ً فوق خديك إنتشى بهجة عاد بها الحس أليا

تحت تحت
يا جار الحنين و الشوق غلب في البلاد التي تموت حيتانها من البرد ولا الفهم شنو ؟

ابراهيم

02-06-2009, 08:44 PM

الشوق طوالي غالب في كل المباريات المحلية والدولية
والبلاد اليومين دي صيف جميل جداً لكن اخير منو الشتاء من ناحية تانية

كل ما في الموضوع محاولة إبداع في افعال (الماضى، المضارع والمستقبل)
وإعراب ما استطعنا من جمل ..
لك الود يا جار .. والله نفسى نتلاقى هناك عشان نحكي كل الحكاوي
:)

رضا حسن محمد

03-06-2009, 04:07 AM

يا ابو خليل الشوق مطر
والله انت زول سمح وجميل وخسارتك فى البلد البعيدة ديك
يا خ تعال

ابراهيم

03-06-2009, 04:19 PM

رضا ...
والله خجلان منك .. بالنسبة لي كولن كولن وكدة
استهلاكات القراية والشغل وكدة برضو

المهم مشتاقين كتير والله
خلي التلفون جنبك عشان ما يهرشونا

العاقب مصباح

03-06-2009, 08:45 PM

الامل
يوم باكر
يوم جميل
لو وضعنا فى حسباننا انو جميل
لوحدنا نستطيع ان نهئ انفسنا لذلك
نرى اللون الابيض
كما فى ليلة عرسنا
لا نرى لونا غيره
ارادتنا نطوعها بضحكة
بإبتسامة
من اجل غد بلا هم
ولا غم
غدا نكون كما نود
والله باكر يا حليوه
لما اولادنا السمر
يبقوا افراحنا البنمسح بيها احزان الزمن
نمشى فى كل الدروب الواسعة ديك
والرواكيب الصغيرة تبقى اكبر من مدن

احترامى ابراهيم

ابراهيم

03-06-2009, 09:29 PM

الأمل ..
يمنحنا القوة
حينما تضيق كل الوجهات
وهو التفاؤل في رواية اخرى
لكن وبعيداً عن المثالية
احياناً يكون الأمل رومانسية مفرطة
وحلم ساااكت
وهذا يحدث
عادة
حينما نتأمل بلا ماضِ ولا حاضر
مثال لتقريب الوجهات:
منهم من حفظ حديثاً واحدا فقط من قول النبى (صلى الله عليه وسلم ) هو (تزوجوا فقراء، يغنيكم الله)
وهو مفلس من كل النواحي .. تزوج وما عندو "التكتح" آملاً في القريشات بعد العرس.
لك الود يا العاقب

ابراهيم

09-06-2009, 02:09 PM

ازمات مداخل
سوء مفاهيم
إنطباعات أولية

هي اشياء في كثير من الأحايين تحول دون الوصول إلي الحقيقة
حقيقة ما يجري حولنا من أحداث وافعال وردود افعال
حقيقة فهم الناس والحياة ..

احياناً نجدنا نتوق للتعرف على شخص معين
كاتب/ة، عالم ، فنان /ة، شاعر /ة، مذيع /ة، حلاق ، جلاد عناقريب ، مهندس/ة، دكتور /ة، عجلاتي
لا شي غير إنه إعجاب لما يحمله الشخص من إنسان
ولكن تتأزم المداخل في كثير من الأحيان وغالباً ما يكون السبب في تأزمها عدم البساطة.
مع إنو لو ختينا الكورة في الواطة الموضوع بكون بسيط وسمح.

ابراهيم

09-06-2009, 02:19 PM

ومن امثلة ذلك
واحد حب ليو واحدة لأنو كان بتاعملو بي حنية
ولما صارحها
اتضح إنو كانت حنيتها حنية أمومية
قالت ليو يا ولدي
آي نعم الحب اعمى لكن ما للدرجة دي!!
قال ليها انا صغير لكن ما للدرجة دي!!
ما زال يحبها
وما زالت تعطف عليه - قصدي تعطف على حاله
بعد ان فضح مشاعره!!

خالد 000 ابقرجة

10-06-2009, 01:19 AM

ابراهيم

10-06-2009, 01:18 PM

ود حسب الله 000

دوما 000 حين لا يكون أمامك الا سكب دواخلك كما هي 000 تكون الروعة كما أتت مع انحرافك المعياري 000 في مكانها ودون انحراف 000

فدوما 000 نحن في أشد الحوجة 000 لخوض غمار تجربة أن نطير 000 لا لنسقط 000 ولكن لنستمتع بإحساس انعدم الوزن 000 ونحلق بخيالنا 000 الي ليلات 000 لا قيس لهن 000 ويحلمن بقيس مثلنا 000

ابراهيم 000 ممتع تداعيك 000

ويوم بكرة جميل 000

وربما بإنحراف ليس تقليدي المعني ..
الكلاسيكية يا صديفي تقتال فينا اشياء كثيرة جميلة في هذا الكون
وايضاً جبناً إلى جنب ما ذكرت : الطيران للإحساس ببهجة إنعدام الوزن
كذلك نحتاج أن نطير ونضحي من اجلنا واجلهم كل الجميلين حولنا
ولم يكن طيراننا إلى غربة تجلدنا فيها الثوانِ بلا رأفة
يبكينا فيها الشوق حتى تدهور الدموع اقتصادياً
وضف الى ذلك إنتظار ليلى بإحساس قيس الذي يتلبسنا
وكتير يا ود ابقرجة من الاشياء ربما الحديث عنها ممتع
رغم لهيب الحرمان.

مدنيّة

11-06-2009, 01:25 AM

ياسلام عليك ياابراهيم لما تبدع وتمسك القلم وتكتب

ابراهيم

11-06-2009, 07:57 PM

جميلة الطلة ام جمال
فإن بدت تداعياتي ابداعاً ...
فتلك هي
سماحة العيون التي قرأت
ونقاء الروح
شكراً لإحراج قلمي
وتجميل حروفي

ابراهيم

13-06-2009, 06:18 PM

سوء الفهم .. يحدث وهو شيء طبيعي جداً
ومفيد في كثير من الأحيان حينما يتصحح ..
مسلن في المنتدى ..
قد يسيء القراء فهم جملة بها غلطة مطبعية
لم يقصدها الكاتب ..
وقد يسيء الكاتب فهم انتقاد البعض له!
مما يؤدي إلى متاهات وفجوات واعتبارات شخصية
والسبب ربما يكون حرف واحد.

ابوالنور

13-06-2009, 09:51 PM

ابراهيم

16-06-2009, 11:00 PM

لامن القاك بلقي روحي وكتين يضيع مني الكلام. وكتين يضيع مني الكلام بتوسدك . ياكي الحروف وياكي المعاني الازهرت جواي جروف . ياسكة الريد البقت وقصرت درب الطريق . أرجيني يا عشمي البقي .. لي هالدروب الباعدت خطو الطريق .. عبي المسامات بالفرح . دوزني الخطوات نشيد ..
يا برهتة عندي بطل قصة خالي وظيفة نرسل ملفو ؟

الحبيب ابو النور
انت عارف قلبي رهيف وطرقاته كملن وجنس ونستك الفوق دي بتودرنا ساااي..!!
تعرف مرة جاتني رسالة بالنص التالي:
ما بحتاج عشان شوفتك تشوف عيني
ولا بحتاج عشان المس وهج روحك امد ايدي
ملالمحك مني ما بتروح
ووهجك فيني ساكن الروح ...
انقر ما راحت؟؟
اما بالنسبة للبطل وكدة .. ما محتاجين ملفات .. خلي يجي ساااكت وبنشتغل معاو كومبارسات
ابقى طيب يا حنين.

طلال الصول

17-06-2009, 11:27 AM

ابرهة دايما بنلمس في كتاباتك روح الفنان ودفء المشاعر

.........
وين انت ياراجل

ابراهيم

18-06-2009, 01:12 PM

ابرهة دايما بنلمس في كتاباتك روح الفنان ودفء المشاعر

.........
وين انت ياراجل

اخوي ودفعتي طلال ..
والله مشتاقين حد الشوق ..
شنو يا خوي عرست ولا جابو ليك:D
اخبار الشباب شنو والله الحنين فاض بينا
وجنس الهضربة الفوق دي سببها حنين سااي
ابقى عافية وما تبقى منقطع النظير

رمية تماس:
دفيء المشاعر الشاتية صيف!؟:rolleyes:

طلال الصول

21-06-2009, 12:41 PM

والله يا ابراهيم مشيت وغلبتنا وتعبتنا بالشوق اظهر يا راجل وحشتنا الدندنات

وهضربات الخلط ساعة المسلسل والترنيمة لي صوت حفلة من بعيد والا شنو يا صاحبي

تحويلة غير مضمونة العواقب الجماعة ال ............................................ لسه

ابراهيم

22-06-2009, 03:22 PM

الحاجات ديك يا طلال بقت مرهقة من تواردها الكتير والذاكرة ملت الذكريات
وانت عارف آخر حاجة عرفتها إنو افضل تكون مصاب بعشق إنسان
رغم آلامه وهشاشة الآمال فيه إلا إنو ..
أخف وارحم بكتير من عشق الذكريات "التشيل فيني وتودي"

اما بالنسبة للتحويلة:
قصدك جماعة انصار السنة:confused::D
ولا ...

ابراهيم

22-06-2009, 03:50 PM

ودي معادلة صعبة
شعور بإرتياح أو إنزعاج لظاهرة/شخص ما من اول نظرة "من قصاد الطاقة"
مرات بكون شعورك صاح ومرات بكون غلط حسب الصدفة
وما يتدحرج من ذلك اقاويل للتعبير عن الشعور:

انا الزول دة قلبي ما ارتاح ليو
الزول دة من اول مرة ما ركب لي في راصي
الزول دة شكلو مريب
الزول دة من عيونو ديل انا لاوزت منو
انا قلت ليكم الزول الراصو زي الركبة من الأول ...الخ

فلاش باك!
شخص غريب الأطوار اسمو هاشم ...شكلو ما عجبني وقربت اتشاكل معاو بدون سبب
لكن بعد ان تحادثنا وتحاورنا اكتشفت إنه راجل مهذب لأبعد الحدود وعاتبت نفسي كثيراً لما خدعتني به مشاعري .. واصبح صديقي إلى هذا اليوم!

جكسوية:
شفتها أول مرة .. وقلت خلاص ياها ذاتها .. حبيبتي ذاتها
جميلة حد الجمال "على فكرة انا عيني ما طايرة"
وبقيت أأمل وافتش لي مدخل
وحصلت ازمة في المداخل
رغم إنو كانت بتجي محل الشغل كل يوم كزبونة!
وبعد فترة من الزمن لقيت مدخل متوفر
لكن النصيبة إنو الصورة كانت فلاش!

ابراهيم

22-06-2009, 04:07 PM

وقس على ذلك في المنتدى
رغم تعب الكتابة ..
وندرة الإلهام
وصعوبة التميز في عصر التشابه
أحياناً كاتب الموضوع يكون قد اصابته شظايا إنطباعاتنا الأولية
ربما لأنه لم يكن موفق في إختيار عنوان مميز
لموضوعه الذي صُنف قبل أن يُقرأ

ابراهيم

08-07-2009, 08:43 PM

من أول نظره رشقتني عيونو جذبتني فنونو و بقيت مجنونو
من أول نظره لم أخد حزرا غير اني هويتو في قلبي اويتو

الكثيرون يهتمون بالإنطباع الأولي ..
ولكن كثيرون لا يهتمون به ..
في رايكم هل هو مهم شديد؟