افتح الموضوع برفق (قابل للكسر )

[omerahmed5]

الحاج فلسفه بقول ليك انا راجل ظريف ولبيس ودمي خفيف ....... في يوم الخميس بخش لي في منطلون وقميص .... وفي فصل الخريف اول ما اطلع من باب بيتنا بكفكف منطلوني لانه الخور الجمب بيتنا مويته متواجده صيف وخريف مرة قمت ردمت الحته القدام بيتنا عشان يسهل التصريف .... بعد يوم يومين جاتني ليك رسالة داخل مظروف لقيتها ليك .... من المحكمة الكبري للحضور بتكليف ..... موضوع الشكوي التعدي علي مواطنة أسمها انثي الانوفولس بت ابليس ممثل الاتهام وزراة الصحة .. شاهد الاتهام الاول التايفويد شاهد الاتهام الثاني النزلات المعوية .... المتهم مين .... شخصي الضعيف ...... الشهود ... شهادتي أن لا إله إلا الله وان محمدا رسول الله ... والشكية لغير الله مزله ..... كانت الجلسة الاولي بحضور ممثل اليونسيف .... والدنيا كانت خريف والمطرة تصب وتقيف ..... وطلعت من البيت واولادي ما خليت ليهم حق السكر و الرغيف ... ما اصلوا نحنا بننتظر دعم المغتربين بالمصاريف ...اكان ما هم ما كان مقابرنا ليها بالصف نحجز ونقيف .... جابوني من المعتقل مكتف جنس كتيف ... نهرني القاضي وقال لي انت عامل فيها عنتر .... بتهدم سكن (نفوية ) المن زمان مستوطنة في المدن والريف .... وقال لي هذه حرمه والكلام دا منك عيب .... إذا كررت العملية دي تاني بنعمل فيك العملوه الامريكان في مساجين ابو غريب
يا ريت ناس اخوان ............ البنات يعملوا فينا المعروف يرجعوا الكوادر الطاشه من الوطن بالالوف .. ونتدفي بالحرية الشاتية لينا صيف ... دا كلو لاجيالنا واطفالنا لانهم لسع زوقهم رهيف وعقلهم نظيف .... ونعلمهم ونقول ليهم بالكاء ... كريمة ،،،كرمك ،،،، كسلا ،،،، كادقلي ... و ما نحكي ليهم عن الكلاشنكوف ...... ونرجع الطيور المهاجرة ولي فرحة اطفالها نشوف ..... ونلم الشمل ونطرد الفرقه وندق طبول السلام دفوف ..... نشيل اللغم نزرع نغم السلام بين المزارع والجروف .... ونعلن للعالم إسلامنا حقيقي مش مزيوف ...... لكن على قول المثل الكتير مسيخ ... يا جماعة العصي والسيخ يا الدايرين تعملوا من الشربات فسيخ .... بس نقول شنو في قادة احزابنا اكل وشرب عليهم الزمن ومسح فكرهم التاريخ ولا حياة للورل بين التماسيح