"17 ينــــــايـــــــر سلامات مصـطــفــى ســـيــد أحمــــد"

[سوباوي]

سلامات يا زول يا رائع

أزهري محمد علي

مدخل أول

لمتين متيمم شطر النيل

متوقَي اليابسة ووارد

متوكَي عصا موسى

بتهش في غيم الإلفه الشارد

مهدود القدرة وفتر انه

حردان الضل البارد

بتوجل لي يوسف في البير

يطلع من بطن البير المارد !

مدخل ثاني

فات الكان بدينا إحساس بالإلفه

وكان راوينا ،

فات الباكي جرحنا وناسي جروحو

ولافَى ورانا مدينه ……مدينه

فات الصاحي ونحن نغط

في النومة السابعة

طالق حسو ولا حسينا

حتحت فينا غناه الطاعم

وفات قنعان من خيرا فينا

سلا مات يا زول يا رائع

سلا مات عوافي !

سلا مات يا خلاصة الخير الفي الناس

وترياق الزمن المتعافي

سلا مات يا زول يا رائع

سلا مات عوافي

محاصر فيك

بسأل عن سكه تطلَع منك

أو سكه تودي عليك

بسأل عن مخرج منك وليك

زي نهر بينبع

وما لاقي مصب

بتمدد عشقك من أقصى ضواحي الروح

لي أقصى نواحي القلب

يتكثف بسعة إطلاق الرب

وأنا كنت بفلي القلب بسيرتك

سميتك حلاب الغيم

من ضرع الجدب

البارح عصفورتك

ركت في البال

رقصت

وأدت عصفور الريد شبال

وطارت من قولة كر

ما الزول النهر العصفورة

بحرض في كلاب الحر

لابسني وداخل في اللحم الحي

راصد كل البسأل عن حالي

حرش ضلي علي

ونتف زغب الخاطرة التخطر علي بالي

ومنع العصفورة تحوم

أستجوب كل الناس البجو في النوم

ما تقوم !

يا زول يا رائع يا مهموم

يا مضيع ضي عيني وراك

واقف

حاحاي للنوم

يا مستف رئة الدنيا

ومشحتف روح الخرطوم

كيف حال يا أبوي

كيف حال يا خال

شفتك في وجع طالع

علي برزخ ملتقي النيليين

كنت هناك وحيدك

وكل الناس أتنين … أتنين

براك واقف

في حد السيف

براك ألما واقف بين …بين

تغازل حلمك الفارغ

فتح بابين علي الملكوت

تسلم خواتم عمرك اليانع

تسلم علي حضرة جلال الموت

وتفتح في الأرض نفاج

إذا امتلأ الفراغ بالصوت

فيا بطن الأديم أفتح

براحات الحنين مشرع

وانده لي مدن شاخت

أنده لأطلال القري الراحت

بيوت في بيوت

تمرق من شبر مسرح

مدن فاضلة

وعالم باتساع الحلم

بقامة يشتهي التابوت

فما لفظ البحر يونس

ولا انسدت

شهية الحوت …… ويا زول يا رائع تمشي

بالحسرة وتموت ؟

[سوباوي]

جميلٌ كنت يا سيدي .. حين أقمت بيننا

وجميل أنت أيضاً حين رحلت ..

لك ألف رحمة وأبواب جنان واسعة ...

[سوباوي]

مرثيات عن الراحل المقيم مصطفى سيد أحمد

مرثية الشاعر صلاح حاج سعيد

ما كنت قايل نفسي يوم

أرثيك يا أصدق خليل

أنا كنت بتخيّل أكون قبلك

أسافر غنوة في الوتر الجميل

زي ما عبرت معاك صروف زمن المسافة

وجينا للحزن النبيل

أنا كنت داير الدنيا تمهلنا

ونغني الفرحة لى الزمن الخُرافي .. المستحيل

ورحلت ما كان ده الأوان

رحت وحرقت حشا الغنا

خليتنا لى الزمن الهوان

والإرتهان لى خيول زمان الشنشنة

كل المطارات والمواني

وشفع البلد الفتارى

لسة بارين القطاري

يسألوا الناس عن خبر زولاً

مسطّر إسمو في قلوب العذارى

وفى عيون كل المساكين ... الحيارى

زول بيطلع من نفس طورية ضامة الطين

تكابد طول نهارا

زول بيسكن في عيون أطفال

تأمّل ديمة يديها البشارة

يا خي والله الفرقة حارة

وفقدك أكبر من محيط الدنيا

وأكوانها ... ومدارا

طليتنا زي حلماً جميل

فجأة في غفلة أنسرق

أسطورة تحكي أماني جيل

في حب غناك كان ليهو حق

أديتو في الدنيا الأمل

وريتو كيف في الحق يقيف

من غير وجل أو إنبهار

علمتو بى حس النغم إنو الكلام

لازم يكون واضح كما شمس النهار

صدقك ملاهو حماس .. يقين

بالخير وبالحق .. والنضار والإفتخار

إنو الحبيبة هي الأرض

والتضحيات عشان عيونا هو الفرض

والدنيا ورّاثا الصغار

وعرفنا يا زول قسوة الضنا والتعب

والإرتحال في غفلة الزمن الصعب

وقولة الوداع بالضبط

والسفر الأبيد من غير رجوع

أو غير متاع

وبكت عليك كل الشوارع في المدينة

ناحت عليك كل الفواصل

في الغنيوات الرصينة

وإنكتم نبض الغُنا

جلل سواد حزنك سنا

وإتوشح المنا بالضياع

وكان بدري يا زول الوداع

لا سكة لى درب الرجوع

بعدك أغانيك إلتياع

مسكونة بالأسى .. والخشوع

لكن بريقك ما خبا

أبداً بريقك ما هو ضاع

ساطع كما نور الشعاع

منو قال هو فات

زولاً وهب كل الحياة للأغنيات

منو قال هو فات

ما أظنو زيّك يقولوا فات

يا من وهب كل الحياة للأغنيات

يا من ترك في قلوبنا أنبل ذكريات

يا من ترك أحلامو في كل الجهات

وخلّد معاني الروعة بى كل الصفات

ما أظنو زيّك يقولوا فات

يا من وهب كل الحياة للأغنيات

****
ورحلت ما كان الأوان

رحت وحرقت حشا الغنا

خليتنا لى زمن الهوان

والإرتهان لى خيول حروف الشنشنة

[سوباوي]

أمل الأغاني

كلمات: مدني النخلي

شرد الكلام مني وسكت

حس الأغاني الملهمة

لبس النغم ثوب الحداد نزف المقاطع مؤلمة

لمتنا بيك يمين ظروف في ليل رياحو ملتنا هم

أنت الأخو وبرضو الصديق والبينا كان إحساس ودم

للكل فتحت القلب دار .. ومزجت روحك بالنغم

يا حليلو زمناً كان معاك يا حليل جدارنا الأنهزم

روح الرحابة الما بتضيق

يا باهي يا دفق الرحيق

شاقي الدروب الموحشة

فارش عشم وترك طريق

دايس علي الجرح الأليم

في أحلك اللحظات رفيق

يا حليلو أملاً كان معاك

خلانا لى جرحاً عميق

نجم الحروف المرهفة

ضد الذبول والإنطفا

لكنو من بعدك رحل خلانا فات يا مصطفي

يا حليلو شدواً كان معاك

وأمل الأغاني الإنطفأ

[سوباوي]

ضرب الإبرة

مدني النخلي

ضرب الإبره .. فوق الإبره

راسم زي وشم.. فوق ساعدو

كل ما يقول قريب

تعكس ظروفو .. تباعدو

راكز .. في الزمن

ماطر سماهو ورعدو

فوق حدب الصبُر

مترجي ..زولو الواعدو

غنيلنا .. قول يا زول

بُعد المسافة براح

من جرحك النزاف

رسِّل .. غناك صداح

نوِّر مداخل الليل

بصبحك الفضاح

شِد الوتر ..دندن

وأفرد نداكَ.. وشاح

طيور القمري..

ما غنت

ولا لوّن مداك شادي

حليل ولداً بشيل همّك

شرّ غناهو في الوادي

نده مطراً سحايبو ملت

وشتت برقو عبّادي

وليد الصابره ست الجيل

رقد واقف قصاد النيل

حبيباً جرحو فينا نزيف

وفكراً فاتح التأويل

مرق من بين ضفاير البنت

حبيبتو اللونا.. كاكاوي

نهارا شمالي .. كتـّاحه

مناخاً جنوبي.. غرباوي

دخل شرق الحِلم حفيان

سند ظهراً .. حناهو الهم

حليلو الكان جميل النم

حليلو .. البينّا خوة دم

[سوباوي]

مرثية عبد العال السيد

بسمع صدى صوتك مزامير في عشيات

الشتا والريح سوافي

وأطرق على بابك أواخر الليل وألاقيك

إنت مافي

وأنشد على بابك حزين "عز المزار"

وكل السنين صارت منافي

وأهتف وأناديك في سديم الليل

يضيع حسي وهتافي

قمراً وقف مستني تال الليل

نهارات العصافير والقوافي

رجع الصدى وحس الرياح

مجنونة في الساحات تعربد

وإنت مافي

غابت نهاراتك ولكن

لسة صوتك في العروق يا صاحبي ساكن

لسة صوتك يسري في كل الأماكن

"يا قمرة أقلبي السنسنه الحمرا

وشوفي ليه ما جاء"

لسع على أفق المدى ترجاك

"صبية" جراحا نازفة

لسة واقفة

تسأل عليك مجلس صحابك في الليالي

تسأل عناقيد الدوالي

تسأل عليك عصفور مرق ينفض

نعاس عينيهو من سهر الليالي

يا صاحبي لسع جراح الفرقة صاحية

وتر الغُنا المشدود ينوح

يسأل عليك في كل ناحية

كانت ليالي " الديم" فوانيس

والعمر مغسول صبابة

وكنا ما بشغلنا غير وتر

الغُنا وحرف الكتابة

يا صاحبي .. يا ليتها الأيام تعود

أنا في منافي العمر ضيعت الوعود

يا صاحبي .. هطلت على

قبرك سحابات الخزامى

وناحت " على بابك " يمامة

وشرقت شموس ترسم على باب

النهارات إبتسامة

[سوباوي]

رحيل اليوتوبيا

مرثية الشاعر محمد طه القدال

في هذي المدينة الفاضلة

لبس الشعراء تيجان غار وهجوا

مع النشيد .. والبوح وغنوا للغُربة المتلتة

في الزمن المكان الروح

وما بين الرماد والنار

فضا الكلمات ومعناهم

بيمرقوا من هطيل النوح ومغناهم

يشقشق للحياة والموت

يغرد للمدائن الفاضلة جواهم

جزاير دوح

قدر يوتوبي

ترحل في مداين الناس ... مدينة

يندلق حسك حداهم

قطرة قطرة تعبي صوتك بى نداهم

مشدود وتر صوتك ربابة

مسنود عليك صوت الغلابة

مفرود من الزمن المفتق والمرتق بالرتابة

مولود مع الجدة المعتقة والمجرتقة بالرحابة

ينسدل من شدوهِ أنشاد المزامير

ينسمع في شجوهِ ترتيل الصحابة

زمن يوتوبي ترحل في العتامير

والمغاسل والغُنى المندلي من شطر السحابة

من عنا الأطفال وأولاد المسادير

السنينهم فوق جوازات العصافير

الحنينهم بحة الليل الطنابير

الحزينهم حزنه في الجوف المطامير

نبلهُ يطلع زي شعاع

لا ولولة لا شيل ندابة

( يا مطر عز الحريق)

( كمّل الناقص وفرضو )

( يا مشاوير الطريق )

شوفي لي حُّميد وأرضو

يا بلد ليلك غريق

طولو زي طولك .. وعرضو

إن ضلامك حر طليق

أو سلامك أهلو قِرضو

آه من هذا السليق

يشتري الراجل وعرضو

الفرج باقيلي ضيق

والصحاح العندي مرضو

كم إديريجاً حليق

شان يعيش بى دقنو برضو

يا مدد قشة غريق

(يا مشاوير الطريق)
(يا وليدات الفريق)

لملموا الصابرين تعالوا

(رقصوا البنوت أعرضوا)

****

يا نخلة المقبول ظلالك

وأصلة الشموس بى حريرة

ومجدولة من طيب شمالك

مروية في عز الجزيرة

من همي همك سمالك

كسر همومي الجبيرة

لحن الوليد الرمالك

مشرق يجبر الكسيرة

طينك مقالد رمالك

تحتك مياهك خريرة

شعرك جريدك حلالك نمة غُناه الضريرة

غنوة بتقرب منالك

رعشة جروفي الخضيرة

غنوة حبيباً شكالك

هجر البنية الأميرة

عند الترابلة القبالك

ضليلة صهد الهجيرة

يا نخلة السلفاب جمالك

في الناس غناوي المسيرة

لو جيدك الفارع بكالك

موّال دموعي العسيرة

أو نيلك السالك أمالك

جيهة المشاوير الحسيرة

أو قلبك المفجوع دنالك

روح الأناشيد المنيرة

شيليلي عِب وأمليلي شالك

من غناويهُ السميرة

شدي من صوتك حبالك

نشفي العرق الدميرة

قولي للجنيات سؤالك

يا نخلة بس متكية مالك ؟

بطنة سبايطك عضيرة ؟

جدلة سبايبك ممالك

محصورة في فد ضفيرة ؟

ولا السلام البدالك

سراب الأماني الكبيرة ؟

لو صبري بيهدم جبالك

شن تبقى غير عيني الهميرة ؟

****

قدر يوتوبي ترحل يا صديق

زمن يوتوبي ترحل في البريق

والمدينة الفاضلة نامت في العتامة

والعتامة تهاتي بالشعر الهيافة

والشعر متغطي بالكلمة السلامة

والسلام متداري في الولد الشليق

والوليد مندسّي في الحرف القيافة

والحروف الوردة تحلم بالرحيق

والحلم يتجاوز المعنى الرهافة

والمعاني تعاند الزمن الرحيل

والزمن يوتوبي يرحل في السحيق

والرحيل يوتوبي

ترحل يا صديق ؟

الرحيل الشفتو للناس العلامة

الرحيل الشفتو للمتلك قيامة

[سوباوي]

أغنية مصطفى سيد احمد

شعر : د.عفاف الصادق حمد النيل

يا الكحلت عيون الدنيا بلون الغنوه

يا الضفرت ضفاير إحساس الكلمة الحلوة

يا الشتت نجوم الليل في وش النيل

عقداً فوق القمره بيقدح فينا الضو

يا الطقطقت أصابع السُحب الشالن جو

دفق عسل المطره ونقط .. كبت شو

نضمت .. غنت .. سكتت .. صنت

مرقت .. دخلت .. قامت .. قعدت

شن بتسو ؟

تقشقش فوق رقراق الدمع الكاسي العين بهدمة دم

كل ما أتعرى يجدد توبو يضاري الريحه الكست الجو

تساسق بين تيار الموج الكسر الجدول ودفق شو

تسارق فوق نجماتا برقنْ هجنْ لجنْ ..باتنْ قو

تضاير فوق وديانا شبعن .. رضعن ضرع السحب الشالن برا ..جو

تصنت غنوة سيره عريسه مهقد .. مكسي .. مجرتك

يفوح الصندل .. وعطر المحلب منو مدفق

أمو تعدل .. وأختو الرقصت ..وخالو يبشر ...

وعمو بيعرض وسط السهله ..وخيرو مدفق

غنوه بتعزف نغم أتشتت .. رعداً صفق

برداً هز اتباطن صوتو

أتطانن حر لوح و هوا

وظهراً فارساً تب ما إتلوى

وزغرد ليك ايقاع المطر إتلبب

حضن الأرض ونام

ود سيد أحمد دق المحلب جوه الفكره

وخت الذكرى

ذكرى الليلة وذكرى بكره

أبيه و حرة

مبدأ و عزه

سيما وعبره

درايا و خبره

شموخ بيت عازه الما بتهزه

برغم الضيم

وليد ضكران

هز و رز تب ما فز

اتقطر نز

ادفق ضي

ود سيد أحمد شال الريشة

ورسم اللوحة

وشتت لونها

وتيرب بيهو سما السودان

وكانت النبتة عصارة الغنوه الفيها

ثقافة .. وحب .. وسياسة

مزيجها بلدنا وفيها ولدنا اتعطن الريد

والبت الحلوة .. الوطن الغالي

وسرج بيهو وشد ضهر سودانا القام

وكيف بتفوت

وكيف بتفوت ..

يا الولد الغنى وشنا ورنا

وخالداً حي

ما بتتضارى بشوفك قاعد بين الرمش الفوق عيني

يا الدفيت أعضاء الكلمة في ليل

البرد .. الريح.. الصي

يا النديت أغصان الحرف بصيفاً

حًرا وشد الكي

وكيف بتفوت يا الولد الضوا وشيشو قليب الوتر

الغنا وطرباً غطى فجاج الحي

تمرق بين ورتاب الزرع الفرهد

تمرق بين حبات المطر الطقطق نقط

يحضن ليلاً سود .. هج .. وهود

تمرق بين النيل الكتر ادفق و نمرق

تمرق بين الوتر الصفق غنا وزغرد

تمرق بين صفقات الشجر أخضر و ورق

قام أتشابى وعانق كتف الليل

أتطاول باس القمره وقبل عين الشمس

كيف نبكيك يا راجل الليلة و بكره وأمس

كيف نبكيك ونحنا بنسمع صوتك

سراً.. وجهراً .. ومس

كيف نبكيك و أنت معانا تشيل وتخت

ترص وتقص

تفج السهله وتحكي الغنوه اللبست صوتك

وشالت حسك .. ونفسك .. وروحك

وسمحت زي

وأنت معانا بقيت جوانا و ماك بتفوت

حتلت حنيناً جوه القلب

بصمت عليهو وجود موجود .. برغم الموج

وسفر الجسد الما محدود

غلبت تفوت

كسرت الحاجز الراكز جسرو على المسدود

رقعت الهدم الراسي خيوطو على المقدود

مسحت .. مسحت البعد الأرضي الما محدود

نسفت مسافة الزمن الروح و ما معدود

سكنت مسامة النغم المن إيقاع النبض

بقيت الدم .. والروح .. والقلب

هزمت الموج .. غلبت تفوت

تفوت لى وين ؟؟

وأنت الزول الباقي وحي

أنت النور الوج الضي

وأنت البحر الدفق ري

تفوت على وين ؟؟.. ونحنا زرعنا لسع ني

النيل الأبيض لاقى وعانق حضن الأزرق

باس الأبيض خد الزنجي

اتقلدوا .. اتقادوا

اتوحدوا .. فاتوا

مات العنصر و دأب الفارق

من بيناتن

صدر العين اتملى بالعبره

اتنهد نفس الكلمة الحلوة ..أتأوه

آهة طفت القمره و نفخت قلب الجمرة

وكبت فينا ضلام

يا إنسان .. يا فنان يا لقاومت الذاكره والنسيان

دخلت بوين ؟

سكنت الدم الجاري على الشريان

لوليت جوانا عصاية الكلمة .. الشرف .. العزه

العايش فينا في كل زمان

جرجرت علينا حروف النغم الطرباً

يهز يفرح كل مكان

ختيت الرأي صريح قولاً و فعلاً و فكراً

سجل اكتب يا تاريخ

يا أستاذ .. يا ممتاز

ختيت الدرس مفيد و صحيح

درساً ما دايرلو وسايلاً للتوضيح

ونحنا فهمنا كتبنا درسنا على الكراس

انتهت الحصة و ناحن سكلبن الأجراس

مرقت صحيح ؟؟؟

مشيت بى وين ؟؟

وكيف خليتنا بدون تصحيح ؟!؟

نصحح وين !!؟

شلنا الهم

نصحح وين

جينا الكم

نصحح وين

وكل أقلامنا تقطر دم

كمل أحمر دفق لونها فحم

ونحنا كبرنا وعينا وزدنا فهم

عرفنا أهداف الدرس تمام

ختينا النقطة الهمزة الشوله الاستفهام

خلصنا خلاص

جمعنا قلمنا حبرنا كُتابنا مع الكراس

يا الوحدت بسفرك كل الناس

يا مقياس

يا ميراث

وأساس المعنى

الحب ..المبدأ .. والإحساس

نعم الإرث الباقي وأعظم ساس

وكيف بتفوت

و أفتش ليك أنا جاي بى جاي

و أهلك و ناسك مرقوا يكوسو عليك معاي

وأنادي عليك ارتي عليا

فوت بى وشك ارجع جاي

وفجأة ... وفجأة بتطلع من جواي

متل النور الضوا حداي

وموج النيل الرايح جاي

وهج العين الفكر الرأي

ومن الشمس بريق ضواي

وصدر الأم الليك غطاي

حديثها يناغم فيك لولاي

وصوتها يهدهد فيك هداي

هوها.. يا هوها

واحد ..اتنين .. تلاته

إبرة الخياطه

فيها م وفيها ص وفيها ط

و ف

وفيها جميع المصطفى

[سوباوي]

واحد جميل

سيد أحمد الحردلو

تاني قام واحد جميل في بلدنا ... ماتْ

وكان بغني للمساكين .. والمسولتين .. والحفاتْ

وكان بغنى للمنافى .. والعصافير .. والرعاتْ

وكان بغنى لى بلد في الحلم ... جاي .. أغنياتْ

وكان بطنبر .. وكان بدوبي .. للحياةْ

تاني قام واحد ملك ... روّح .. وفاتْ

وكان ملك في الريد ... وإنسان في الصفاتْ

وكان مهاجر في دموع كل البكاتْ

وكان وتر مشدود ... ومسكون دندناتْ

وكان "عليه سلام " تقول ما زول حياةْ

يا مصطفى .....

فاكر الجماعة الكانوا ساكنّك دوام

من منفى لى منفى

ومن عود ... لى سفرْ

فاكر العصافير المسافرات دون جواز

فاكر اللى داجّين في المطرْ

عبدالرحيم ... وهلم جرْ

فاكر القطر

فاكر النخيل .. فاكر الحراز

الليلة كانوا جميع هناك

قسماً يمين .. كان الجميع باكين عليك

كان المطار فارش عليك

كان الجميع مشتاق إليك

يا سلام عليك

لمّان تكون زولاً عزيزْ

عنْ ناس عزازْ

****

يعني كان لازم تفوتْ

والحزن مشرور في البيوتْ

والدنيا مازال فيها حوتْ

وفيها لسع .. عنكبوتْ !!

وتخلّي أوتارك سكوتْ

ولسه عندنا ريد جديدْ

ولسه عندنا ليك قصيدْ

يعني كان لازم تفوتْ

وتخلي هذا الحب يموتْ !

[سوباوي]

مرثية بشرى الفاضل

رطبت بالنّداوة

وغلالة الروح

سنوات الجفاف الأولى

فرقص الشعر على ناصيات الـقـوافي

في هذا العهد الكالح

عهد الصرير ...

ولف الذقون على الضحك

****

برج الغناء العالي أنت

وأنت النسيم يتردد..

يا حلو يا مستطاب

رحلت وكنت على باب الدخول

فنهض بديارنا ذلك المأتم الجمعي

ذلك الحزن .. ذلك الإنشداه

ذلك الذهول

وكانـت أشد القبائل جسارة في لقياك

وأنت عائدُ إلى الوطن ...

قبيلة الصبايا ..

ينضحن نضارةً وعافية

في زمان نقص الغذاء ...

صبايا من الحسن الصافي

كأنما جبلن من طينة أخرى

وقفنْ سداً بديعاً .. حازماً

في وجه سرقة عبيرك

بغية سكبه في الساحة الكالحة ... الغبراء

في طريق مدني ... إنبثقت عن ذاكرة الأغاني

غابةُ من المحبين

في إستفتاء مع الأغنية المشبعة

وضد سلخ جلد الأغاني

وحشوه بالغثاء

النهر أنت

ورؤا ك ... تسير الأنهار

نغمُ منك أو همهمة

فيقفز عاطف مثل درويش

من المجهول إلى الصدارة

قم .. قال صنوك الشاعر..

يا طرير الشباب

غني لنا ... غني

من عبقري الرباب

أنشودة الجن

قم يا جميل بثينة

وأشهد هذا الوله

بما أمتعت به الناس

وضوأت ليالي القرى ... والأمدان

يدلقون عليها العسس والعسف ... والأسف

فتغسلها بآهة مرسلة إليك ... حُبلى بالفرح

منذ مطلع القرن عبر كرومة ... ووردى

وصادح تلو صادح

فتـنمّي فيها التشبيب بحب الوطن

وشهقة الشعر ... وإنــدلاق الصليل

مصطفى

يا مصطفى

النهر ..... أنت

فولاذ الرقة

برج الغناء العالي ..

والنـسيم

[سوباوي]

المرثيـــــات أعلاه جمعت بواسطة

(محمد علي حسن)

[سوباوي]

(في ذاكرة النجم هواك)

د. معز عمر بخيت:-

إن غاب بفقدك يا نجم

فلك ٌيحتضن الأقمار

و سماءٌ تاهت في وطني

و بحارٌ جفّت وديار

لا زال رحيقك يغمرنا

نبلاً و جلالاً و وقار

و سماحاً ينبض إشراقاً

وعبيراً ينضح أسرار

***

مُذ غرب الصبحُ بعينيك

وانطفأت شمس الأعمار

و انشطر الزمن بكفّيك

و توارت كل الأشعار

العشق تحوّل رحالاً

ينهزم بطول المشوار

يلتهب حنيناً أفقياً

يتداعى من خلف ستار

***

(مصطفى ِسيد أحمد) علّمنا

أن نغزل عطر الأزهار

أن ننسج للفرح قميصاً

بخيوط حرير ٍ من نار

كي تهدأ خاطرة أولى

كي يسكن نبض الإعصار

و يموت حريق مواجعنا

ينفجر الحزن و ينهار

***

(مصطفى ِسيد أحمد) علِّمنا

أن نرسم شكل المشوار

و نقود كتائب نهضتنا

في زمنٍ صعبٍ غدّار

علِّمنا شكل ثوابته

كي نشدُد عصب الإصرار

علِّمنا أن الأغنية

ستحارب كل الأشرار

علِّمنا صبراً ينقصنا

و طريق الخير فنختار

بين الأحلام و إن وهبت

للناس جنون الأبقار

تبقى الحرية مذهبنا

و الحق طريق و شعار

فالتحيا شعباً أوجده

و ليحيا عشقك للدار.

رحيل اليوتوبيا

[ودتابر]

العزيز .. سوباوي


لك التحية على هذا الجمع الرائع .. وكم نحن بحاجة لمثل هذا التوثيق في كل المنتديات الثقافية والأدبية ...



ألا رحم الله بلبل الوطن الغريد .. ولحنه الذي انزوى في غفلة من الزمان

اللهم أرحم مصطفي رحمة واسعة .. واسكنه فسيح جناتك ..
اللهم آمييييييييييييييييييييييين

[سوباوي]

مرثية محجوب شريف

يا ويح قلبي وتر فتر

شج الأماسي خبر حجر

عكر ينابع الصفا

وإتحتت أوراق الشجر

كل العصافير التي

تعرف تمتماً مصطفى

تعزف سلاماً يا بلد

ذاك اللي حباك وإختفى

سكت المغني

سكت سكت

بكت الكمنجات إتكت

مابين دموعها ودهشتها

بكت الأصابع رعشتها

شكت السلالم وحشتها

مشت المقامات الحفا

إنسد حلق الأغنيات المرهفة

شبت شبابيك المدينة وميلت

ماإتخيلت

ماإتخيلت

أنت الي في حاضرة غُناك

شالت نجومها وقيلت

ختت همومهة على ظروفها إتحيلت

وإتالمت ماإتحملت

كم من قصيدة إترملت

زوجتها اللحن الشجي

ودعت أحرف لم تكن تتخيلك

نائم تجي

والقامة ياخي مرحلة

دخلت صندوق البريد

جواب مرسل للأرض

تلك التغطت بالتعب

يا حنجرة .. يا فنجرة

ياضحكة وسط الزمجرة

ياحالي يازوق ياصعب

يانخلة دلت رطب

حلو الكست تحت الكست

فلنستمع كي ننبسط

ياسهل ممتع و ممتنع

هل نقتنع

ما أنت خليل فرحنا الأتولد

ما أنت جميل بثينة و ود بلد

نعم الولد

البس قميص الفرهدة أسرح بعيد في المدى

أسرح سعيداً في الصدى

أسمك كبير

أملا المسافات البعيدة شبر شبر

في عشرة الضو والندى

وعلاقة الدم والحبر يا مصطفى

****

[سوباوي]

مرثية يحي فضل الله

لا تتركوني لهذا الحزن وحدي

فباب ذاكرتي موارب

وطير الروح

لا يقوي علي النسيان

لا تستقيم دروب عاطفتي

كي أجادل خطوة الأمكان

و الوتر الرفيق

كيف الطريق و لا رفيق؟

كيف إحتشادك بالعذوبة

و الحرف يفقد سر أن يرتاح

في لحن صديق

يا صديق الغربة و الألم الحريق

يا منتمي للألفة و المعني العميق

يا وتر عِزة هوانا

يا مصابيح الطريق

يا مبعثر

و منسجم

يا معاند

يا رقيق

يا منسرب كالنسمة

من جوف المضيق

يا حوار روح الفراشة

مع الرحيق

يا جدال الريح

مع الموج الغريق

يا مصطفي من التألف

في الأجنة

وكل أوجاع الطريق

يا معادي

وأنت عادي

للرمادي

وكل حيادي

وكل منتفع صفيق

يا مصطفى

من هميم الأغنيات

من هميم الأغنيات

علمتنا

إن برق الصحو

ميلاد البشارات

و تاريخ التفأول و البريق

يا صاحبي

هذي ثمارك أينعت

و العصافير إستراحت

علي غصن وريق

لك أن تنام الأن

فالحب يسقي

بذرة الأمكان

و الشجر الصديق

بالله

كيف سلبت الدمع حزنه

و خبرت أسرار العشيق؟

و إنحزت طوعاً

لاحلام الطفولة

في الفريق

[سوباوي]

الوقور .. ودتابر ...

أزيك يا صاحبي وكيف حالك وأريتك طيبة ..

أهو بنحاول نطبطب جراح الذاكرة البلوة دي كلما يجي شتاء إلا وتتاور فينا وجع

أحزان الناس السمحين الذين غادروا بتوقيت الشتاء ولأشياء يعلمها الخالق بأن

يكون أقرب إليه .. وأهو .. ياود تابر بنباصر في محاولة نضاير بيها أحزاننا الداخلية

شكراً لك يا سيدي ولوجودك هنا فكن بالجوار بالجوار ما أمكن ..

سامق تحياتي ،،،

[سوباوي]

( مرثية أولى لك مصطفى )

(سوباوي)

بينا بين نقلدك

شبر فاتر ...

فٍر حروفك واحتوينا

بنشتهيك ونرجى الغيمة تلدك

ونبقى نتوسد غناك

صمتك بيهتف

هتافك بنادي

بهدهد فينا القوافي

نغمك بيحرك جوانا السكات

ونحكي للناس البتكدح

ونروي للجيل البصارع

أنك لا زلت فينا

ممتد في تعاريج خطوط الخريطة

في تفاصيل مصابيح الشوارع

في حياد ضوء الشمس

وخضرة لون المزارع

في نعاس ضل الضحى

رواكيب زمن الخريف

وفي عرق عمال المصانع

في جزيئات الرماد

تلافيف دخان السجائر

وفي الأساور

في تعب ملامح المسافر

بينا بين نقلدك

شبر فاتر ...

ٍفر حروفك واحتوينا

بنشتهيك ونرجى الغيمة تلدك

سرّج خيل حروفك

وأطلقها القوافي ..

وقع الحوافر

في الصحاري وفي البيادر

في المرافئ وفي المنافي

بيختف من حلقي البكاء

إلا بغرف من دموع عيون

زمن الغلابة ..

وبروي حزني الخرافي

وبروي ..

حزني ..

الخرافي

[ودتابر]

عزيزي سوباوي



مهما طال الحزن وطول
برضو بيبقي الغالي فينا
معشعش في دواخلنا وقلوبنا
وكان مسارب دمو نيلنا
بنشوف غناهو الضاوي درب العتمة ديمة
يشق العتامير القديمة
ويمد أيديهو لكل زول جواهو قيمة
ومهما حاولنا التناسي ما بتفوتنا الأسيه
لكن عزانا أنو رسم الدرب بالكلمة القوية
ونثر في ربوعنا العزيمة والروح الأبية


أسمح لي عزيزي سوباوي عجز قلمي عن الاستمرار في التعبير .. ولكن أنتظر منك الكثير إلي أن نلتقي .. مع جديدك لك حبي .. وثق أننا بالقرب مهما بعدت منك المسافات .

[moh_alnour]

الشفيف الرهيف : سوباوي
هاهي الأرض تغطت بالتعب والبحار أتخذت شكل الفراق
وأنا مقياس رسم للتواصل والرحيل وانا الأن الترقب وأنتظار المستحيل
أنجبتني مريم الأخرى قطاراً وحقيبة
أرضعتني مريم الأخرى قوافي ثم أهدتني المنافي
هكذا قد خبروني ثم قالوا لي ترجل

ثم ترجل الفارس المغوار عن صهوة جواده
ليرحل إلى عالم الأجساد الزائل في يوم حزين لا أنساه إطلاقاً في العام 1996م ونحن طلبة برالمة بجامعة الجزيرة
ولا أنسى مسحة الحزن التي عمت كل ركن من أرجاء الجامعة وهي تبكي حزناً على رحيل الزول الرائع
ورجل بقامة الأستاذ مصطفى سيد أحمد حري بأن يُرثيه هذا الكم من القمم من شعراء بلادي
وسلامات يا زول يا رائع في دار الخلود إن شاء الله

[مرتضى يوسف العركي]

سوباوي وود النور مواصلة ....
ثم انتي يا كل المحاور والدوائر
ياحكايات الصبا تحفظين السر والمجد الذي ما بين ....... اختبىء
ليس يعنيك الذي قد ضاع من عمري هباء
وانا لست ادري ما الذي يدفعني دفعا اليك لا عليك
لاعليك .....


اللهم ياحنان يامنان ياواسع الغفران أغفر له وأرحمه وأعف عنه
وأكرم نزله و وسع مدخله ..
وأدخله الجنه وأعذه من عذاب القبر ومن عذاب النار
اللهم عامله بما أنت اهله ولا تعامله بما هو أهله
اللهم أجزه عن الاحسان إحسانا وعن الإاساءة عفوا وغفرانا

[عماد السائح]

لغالي سوباوى مصطفى سيد احمد رحل خبر ادخل الفجعة فينا جميعا" الله يرحم مصطفى وجميع المسلمين وشكرا" للاخ محمد علي حسن وللاسف الشديد تمر علينا الايام ولا نجلس سويا"في مناسبات كهذه نتجرع كؤوس الالم ومن ثم النشوة مع الذكريات
والشكر للشعراء المجموعة المبدعة التي الهمتنا حب الارض وحب الناس .
واغنية سلامات انا شخصيا" وبالطريقة التي يدوزن بها الراحل تكفيني وتملاني باحساس غريب ارجع واسمع كيف يقول مصطفى سلامات
شكرا" سوباوى .

[محمد خبره]

سيناريو البحث عن ضايع

طريق الحب لو تمشيه تتفتت خطاك قزاز
ودمع الحزن لو قاومتو يطفر من عينيك رزاز
وليل الهم وغابات الحزن بتتشابك
كتر.. ولعوت... ونيم .... وحراز...

تركت وراك طريق الهم
وقدامك رصاص ولغم
حرام انك تروح في دفعة التيار
حرام تطفىء اللهب بالحب
وتحرقك انت باقي النار
حرام ما الناس تفتش فيك ليل ونهار
تعيش الخوفة واللهفة
تعيش الرهبة والرعشة
وانت تضيع نغم في غابة الاوتار
وتصبح غنوة للتاريخ
وحجوه قديمة للاطفال
نحجي بيها ناس بكره ونحفظ فيها للاجيال

وانا....
أمد ايدي اطول الغيم
افتش ليك من خلفو..
اقول الغيم بدسك وين؟
افتش جوه في شمسو...
اتابع القمره طول الليل
اقول يمكن تجيب وصفو...
اطارد الموج...اسك الريح
اقول وروني بس نعشو...
ولما الشوق يهد الحيل
ولما اليأس يصبح ليل
يزورني الطيف بدون ميعاد
يجدد فيني املاً مات
اشوفك بس.. ولو لحظه
تكون بالنسبه لي الزاد
حرام أصحي,,,,
وأكون بحلم....
والقي خطاك مني بعاد
والقي خطاك مني بعاد....؟؟


(محمد خبره)

[عبدالرحمن مدثر]

,ورحل صوت المغنى حزين

[تغريد]

رحم الله أستاذ مصطفي سيد احمد وشكرا لسوباوي علي تخليد زكري هذا الفنان القامة وشكرا لعبد الرحمن مدثر علي رفع هذا البوست الجميل

والأستاذ مصطفي سيد احمد فقدا للساحة الفنية بكل المقاييس نقشت حروفه دروبا شتي علي كافة القلوب فقد سكنت كلماته أرواحنا ندعو له بالمغفرة

[سوباوي]

17 ينـــاير 2012 .. سلامات مصطفى سيد أحمد

نعم ها هي الأرض تغطت بالت------عب

[ساريه]

سلامات يا مصطفى ......

سكت المغني

سكت سكت

بكت الكمنجات اتكت

مابين دموعها ودهشتها

بكت الاصابع رعشتها

شكت السلالم وحشتها

مشت المقامات الحفا

انسد حلق الاغنيات المرهفة

شبت شبابيك المدينة وميلت

مااتخيلت

مااتخيلت

انت الى في حاضرة غناك

شالت نجومها وقيلت

ختت همومهة على ظروفها اتحيلت

واتالمت مااتحملت

كم من قصيدة اترملت

زوجتها اللحن الشجي

ودعت احرف لم تكن تتخيلك

نائم تجي

والقامة ياخي مرحلة

دخلت صندوق البريد

جواب مرسل للارض

تلك التغطت بالتعب

يا حنجرة .. يا فنجرة

ياضحكة وسط الزمجرة

ياحالي يازوق ياصعب

يانخلة دلت رطب

حلو الكست تحت الكست

فلنستمع كي ننبسط

ياسهل ممتع و ممتنع

هل نقتنع

ما انت خليل فرحنا الاتولد

ما انت جميل بثينة و ودبلد

نعم الولد

البس قميص الفرهدة اسرح بعيد في المدى

اسرح سعيداً في الصدى

اسمك كبير

املا المسافات البعيدة شبر شبر

في عشرة الضو والندى

وعلاقة الدم والحبر يا مصطفى

محجوب شريف