شمارات من زيارتي الى السودان - توجد صور

[عزيز عيسى]

أولا عايز كل الشمشرجية يجيبوا كراسيهم ويجوا يصنقروا هنا يستمعوا..

أها على قول عمك تنقو الله يطراه بالخير:

حجيتكم ما بجيتكم.. خيرا جانا وجاكم.

كان يا ما كان في واحد خواجة عايش في بلاد الواق الواق قرر يسافر بلاد أفريقيا والسودان..
أها قام ركب الطيارة وسافرت بيه من بلاد الواق الواق وعبرت بيه بلاد الخواجات العجم من
أمريكا لغاية كندا ومرورا بأيسسلاند.. نيوزيلندا وروسيا وأوروبا وبلاد الأندلس والشرق الأوسط ..
مطوطح في السماء 17 ساعة بالتمام والكمال لغاية ما وصل لي بلاد العرب..
أها لما وصل لبلاد العرب وجد ناس بتكلموا لغته وفرح شديد وعجبتو البلد.. قال كدي أحسن
إنجم شوية وأقوم أواصل سفري..
بعد يومين ركب الطيارة وإطوطح تاني في السماء لمدة 4 ساعات لغاية في النهاية
وصل السودان بعد خراج روح...

يلا شوفوا الشمار الحصل:

[abomazeen]

أول حاجة : حمد لله على سلامة الوصول ... والقادم مذهل

[عزيز عيسى]

بدأت رحلتي من مدينة هيوستن في يوم الأربعاء الموافق 12 ديسمبر حيث كان في وداعي الأخ الصديق الوفي جمال ودالماحي الذي أبت نفسه إلا أن يأخذني الى المطار.. إستغرقت رحلتي على طائرة الخطوط الإماراتية 15 ساعة ونصف بدون توقف الى أن هبطت في مطار دبي الدولي، حيث كان في إستقبالي صديق العمر هاشم عبدالعزيز الذي لم ألتقيه لفترة 20 عاما.. طبعا بعد هذه المدة الطويلة اللقاء كان مؤثرا تميز بطابع الشوق والحنية .. بعد جولة صغيرة في مدينة دبي الحالمة ذات الطابع العمراني الفريد والمباني الراقية المذهلة ذهبنا الى مدينة أبوظبي حيث يقيم الأخ هاشم وعائلته..

في صباح اليوم التالي إتصلت هاتفيا بالأخ نزار حسن (أبوسفروق) وأخبرته بوصولي الى الإمارات وأنني متواجد بمدينة أبوظبي.. الراجل وقع فيني سلام وونسة وضحك شديد جدا عبر التلفون.. وأفادني بأنه يقيم في مدينة الشارقة وهي تبعد حوالي 150 كيلومتر من مدينة أبوظبي ووعدني بأن نلتقي في المساء وسيقوم بالإتصال بالأخ عروة ودالمطامير ثم أغلق سماعة الهاتف.

http://www6.0zz0.com/2008/01/14/17/518809827.jpg
شارع الشيخ زايد القادم من أبوظبي الى دبي - الصورة من دبي

[عزيز عيسى]

أول حاجة : حمد لله على سلامة الوصول ... والقادم مذهل



أبو مازن كيف حالك..
وكل سنة وإنتم طيبين مع العام الهجري الجديد..
أشكرك كثير.. والحمد لله رجعت لبلاد العجم بخير..
خليك قريب وإنتظر الشمار القادم.

[sambaaa]

يا عزيز ..

طبعا الخواطر مشحونة جدا وانت تصف لقاء الأهل بعد كل سنين الغربة وعذاباتها ..
وبإذن واحد أحد .. سنعيش هذه اللحظات بأرض الوطن الغالي عما قريب جدا إنشاءالله .

[عزيز عيسى]

يا عزيز ..

طبعا الخواطر مشحونة جدا وانت تصف لقاء الأهل بعد كل سنين الغربة وعذاباتها ..
وبإذن واحد أحد .. سنعيش هذه اللحظات بأرض الوطن الغالي عما قريب جدا إنشاءالله .

عثمان حبابك عشرة..
ها زول إنت كنت غاطس وين الوقت دا كلو..
والله مشتاقين شديد..
ولو عارف البوست دا بيجيب ناس جميلين مثلك لكان بدأته بفرش الورود..
فعلا الخواطر كانت مشحونة بكل شوق وحنين لأرض الوطن وأم المدائن بالذات
خاصة بعد تلك الغربة الطويلة..
إنتظر الشمارات جايكم بالكوم.

سعيد جدا بوجودك

[مدنيّة]

وحاة الله يا الخواجة طريقة كلامك هنا اصلا ما بتدل علي هيتك

تبعا ياجماعة الزول دا هادئ جدا - او هكذا بدأ لي :D - وحنكووووووووووووووووووووووش

وطلع انه اسم علي مسمي فعلا خواجة وما بعرف اي حاجة في مدني
اخير النسكت ياعزيز :cool:

ويا ابراهيم تاني اصلك ما تقول ليه ياعمو لانه طلع اصغر منك :p

[عزيز عيسى]

ولظروف ما لم يتمكن الأخ نزار وإعتذر عن الحضور الى أبوظبي ولكنه وعد بلقائي في مطار دبي قبل مغادرتي الى السودان.. في مساء ذلك اليوم إتصل بي الأخ عبدالمنعم (زول فردة) وأفادني بأنه مقيم بمدينة أبوظبي وأنه سيحضر لمقابلتي مع الأخ جيفارا والأخ إيهاب حمدتو.. وبعد إنتظار طويل إتصل الأخ زول فردة وأفادني بأنه سيتأخر قليلا ولكنه لم يحدد وقت معين..

كنت على موعد للقاء أحدى قريباتي في مدينة دبي ونظرا لضيق الوقت إنتهزت الفرصة وخرجت في المساء بصحبة الأخ هاشم وإتجهنا صوب مدينة دبي.. وفي إثناء الطريق إتصل الأخ زول فردة وأفادني بأنه قادم لمقابلتي.. أفدته بأنني في الطريق بالقرب من مدينة دبي وسنعود بعد حوالي ساعة ونصف حيث حددنا مكان للقاء بمحمل (أبو الأفوال) وهو مكان معروف بالنسبة للسودانيين في مدينة أبوظبي..

http://www6.0zz0.com/2008/01/14/19/223575772.jpg
هذه العمارة في شارع بالقرب من محل (أبو الأفوال) في أبوظبي.. بهرتني بألوان الإضاءة الزاهية.

[عزيز عيسى]

وحاة الله يا الخواجة طريقة كلامك هنا اصلا ما بتدل علي هيتك

تبعا ياجماعة الزول دا هادئ جدا - او هكذا بدأ لي :D - وحنكووووووووووووووووووووووش

وطلع انه اسم علي مسمي فعلا خواجة وما بعرف اي حاجة في مدني
اخير النسكت ياعزيز :cool:

ويا ابراهيم تاني اصلك ما تقول ليه ياعمو لانه طلع اصغر منك :p



أنا حنكوش يا مدنية؟
دا أنا يازولة تفتيحة وشايل مفاتيحها والدليل إنو ما قادر إتحرك لوحدي داخل الخرطوم :D
بصراحة العاصمة إتغيرت كثير وطول الوقت كنت شبه (دايش) وما عارفت معظم أسماء
الشوارع القديمة من شدة زحمة الناس والمسميات الجديدة .
الحمد لله إنتي شفتيني..
زمان إبراهيم كان بيناديني عمو عزيز الخواجة..
وهسع بقي يناديني بأخوي الكبير..
وبهناك الراجل العجوز الأسمو ود المطامير شابكني عمي عمي..
يا ود المطامير.. أنا عم إثنين.. واحد مجنون.. والثاني ما نصيح..
أها إنت منو فيهم؟
عليك الله شفتي ذي ديل يسوا معاهم شنو؟
يا مدنية.. أصبري لي جاييك وجايب شمارك.

[عزيز عيسى]

نظرا لوجود حادث في الطريق لم نستطع الرجوع الى مدينة أبوظبي في الموعد المحدد.. تأخرنا حوالي ساعة كاملة ونصف.. وعندما وصلنا الى محل (أبوالأفوال) لم نجد الأخوان زول فردة وجيفارا وإيهاب.. طبعا زعلت لأنني لم أحظي بمشاهدتهم في ذلك اليوم.. والشيء الأخر الذي جعلني أزعل أيضا هو إنه كان عندي نية أتعشى فول مظبط ومدنكل مع الجماعة ديل لكن وبكل أسف الفول خلص عند محل أبو الأفوال وبدأ يلملم الصحون ويطفيء نار القدر وأضطريت أتعشى شاورمة ربنا ما أراد نتذوق طعم فول أبوظبي علشان نحكم عليه.

في صباح اليوم الثالث حضر الأخ عبدالمنعم زول فردة وكان في صحبته أستاذنا الكبير الزول الرائع عصام حمدتو (أبونبيل)
والد الأخوان نبيل وإيهاب حمدتو.. كان اللقاء حارا وذو طعم خاص.. جلسنا إتونسنا وأعدنا ذكريات ودمدني والأيام الجميلة..
كانت لحظات جميلة جدا للغاية وبعدها حملت حقائبي وودعت الأخوان زول فردة والأستاذ عصام حمدتو ثم ركبنا سيارة
الأخ هاشم وإتجهنا الى مطار دبي..

http://www6.0zz0.com/2008/01/14/19/623311919.jpg
أبو نبيل و زول فردة ولحظة إستماع للونسة في منزل الأخ هاشم عبدالعزيز بأبوظبي

http://www6.0zz0.com/2008/01/14/19/600765958.jpg
أبونبيل يصغي لونسة الأخ هاشم عبدالعزيز

[ود المطامير]

وبهناك الراجل العجوز الأسمو ود المطامير شابكني عمي عمي..
يا ود المطامير.. أنا عم إثنين.. واحد مجنون.. والثاني ما نصيح..
أها إنت منو فيهم؟
.
هع هع هع هع
والله شفت الصوره وبراى قلت كدا
والله ما شاء الله وتبارك الله

كم كنت أتمنى لو إلتقينا ولكن تأتى الرياح بما لاتشتهى السفن
ونزار قال لى ما مشكله وهو راجع أمريكا بجينا بجاى ومش عارف خفزت بوين ؟

أنا فى النص بين المجنون والما نصيح
هع هع هع هع

[عزيز عيسى]

هع هع هع هع
والله شفت الصوره وبراى قلت كدا
والله ما شاء الله وتبارك الله

كم كنت أتمنى لو إلتقينا ولكن تأتى الرياح بما لاتشتهى السفن
ونزار قال لى ما مشكله وهو راجع أمريكا بجينا بجاى ومش عارف خفزت بوين ؟

أنا فى النص بين المجنون والما نصيح
هع هع هع هع

الزول الجميل عروة،

هسع إنت قريت كلام مدنية..
أها تاني أسمعك تناديني عمي أكان ما حرشت ليك مدنية وعشوشة
يبقى إسمي ما الخواجة.. :D

يازول ربنا ما كتب إننا نلتقي في بلدكم الجميلة دي..
نزار قال حارسني الليل كله..
وفي النهاية شالتو نومة ونساني..
وحاتك لو دي حالو كان لحدي الآن تلقاني
متلطع في المطار وحارسو..
وكمان أكون إتعلمت إتكلم جاوي أو أردو
من كثرة الجماعة ديل في المطار.
يازول لو باريت أبوسفروق بجنن 60 ذيك.

[Jamal Elmahi]

الواحد قبال مايدخل المنتدي كويس يقعد يعطّس من الشمارات التقيله دي ...هتشم ..هتشم ..صدق الحق..الشمارات عندك آآآالخواجه كمان بي صورا ..والدليل آلولو ...تعرف ياخواجه شماراتك دي كوم وصور المستشفي كوم تاني ..كنته قاعد أتصفح في المنتدي وجاء عموري الكارثه ولسؤ الحظ كنته فاتح صور مستشفي مدني ...قال لي ودا شنو يابابا ...قلته ليهو دي صور مستشفي مدني في السودان وفي لحظه لمّه علي البيت كلو ..وشبكوني ليك أسعله وأنا أتضاير جاي وجاي ..المهم عموري قام زنقني ليك بالاسئله ..قال لي يا بوي مادام السودان كدا أتا مودينا ليهو ليه ...؟؟قلته ليهو لانو فيهو أهلنا كلهم ...قال لي نحن طيب ما نجيب اهلنا كلهم هنا بدل ما نحنا نمشي ليهم ...قلته ليهو ياريت لكن نجيبهم كيف ...؟قال لي بالطياره ...وأتنازل عن غرفتو لزوم الضيافه ومصاريفو مساهمة في تذاكر أهلنا كهم ..بشرط ما نخلي شئ من العقاب..حلة الجنيد عن بكرة أبيها ..ودغلوقه ..العزيبه..رفاعه ..الحصاحيصا...مدني ..الخرطوم..الصداقه ..عد الغباش..الحلاوين..أبوفروع..ابوعشر..التراجمه ..التكله ..طيبه ..فداسي ..أربجي ..المطامير ..غريقانه ..بأختصار نص السودان .. والله يجازيك ياالخواجه ...

[عزيز عيسى]

في الطريق إتصل بي الأخ نزار وأفاد بأنه سيحضر الى المطار.. وصلنا الى مطار دبي وأنهيت إجراءات سفري ثم إتصلت بالأخ نزار بأنني في إنتظاره خارج مبنى المطار لملاقاته.. أعاقت حركة المرور والإزدحام في مدينة دبي الأخ نزار من الوصول الى المطار في الوقت المحدد حيث أفدته بأن موعد إقلاع رحلتي الى الخرطوم قد قرب وأنني سألتقي به عند عودتي من الخرطوم.. وفعلا جريت ولحقت بالطائرة وكنت آخر الركاب.

http://www6.0zz0.com/2008/01/14/19/443809712.jpg
هذه لقطة أخرى في طريق الشيخ زايد في الإتجاه من أبوظبي الى دبي.

[عزيز عيسى]

الواحد قبال مايدخل المنتدي كويس يقعد يعطّس من الشمارات التقيله دي ...هتشم ..هتشم ..صدق الحق..الشمارات عندك آآآالخواجه كمان بي صورا ..والدليل آلولو ...
ماهو الزمن دا يا ودالماحي لازم الواحد يثبت بالصور علشان الناس تصدق الكلام.
ألبس ليك كمامة لزوم الحماية من العطس.. والجاي أكثر.

تعرف ياخواجه شماراتك دي كوم وصور المستشفي كوم تاني ..كنته قاعد أتصفح في المنتدي وجاء عموري الكارثه ولسؤ الحظ كنته فاتح صور مستشفي مدني ...قال لي ودا شنو يابابا ...قلته ليهو دي صور مستشفي مدني في السودان وفي لحظه لمّه علي البيت كلو ..وشبكوني ليك أسعله وأنا أتضاير جاي وجاي ..
قول لعموري برضو عمو عزيز بيقول ليك Don't Risk it :D
يا خي عموري دا بي شيطنطه دي البعجبني فيه إنه رغم سنه
إلا إنه زولا حنين وقلبه طيب لدرجة بعيدة جدا..
بالله شوف الكلكة دا قلبه دائما على أهله
وخايف عليهم كيف.
يا سلام عليك يا عموري..
وذي ما بقولوا حبوباتنا
ربنا يخليك لينا ويديك الفي مرادك لما تكبر.


المهم عموري قام زنقني ليك بالاسئله ..قال لي يا بوي مادام السودان كدا أتا مودينا ليهو ليه ...؟؟قلته ليهو لانو فيهو أهلنا كلهم ...قال لي نحن طيب ما نجيب اهلنا كلهم هنا بدل ما نحنا نمشي ليهم ...قلته ليهو ياريت لكن نجيبهم كيف ...؟قال لي بالطياره ...وأتنازل عن غرفتو لزوم الضيافه ومصاريفو مساهمة في تذاكر أهلنا كهم ..بشرط ما نخلي شئ من العقاب..حلة الجنيد عن بكرة أبيها ..ودغلوقه ..العزيبه..رفاعه ..الحصاحيصا...مدني ..الخرطوم..الصداقه ..عد الغباش..الحلاوين..أبوفروع..ابوعشر..التراجمه ..التكله ..طيبه ..فداسي ..أربجي ..المطامير ..غريقانه ..بأختصار نص السودان .. والله يجازيك ياالخواجه ...
دا كلام إنسان عاقل وخايف على باقي أهله..
هسع جبت سيرة المطامير ما يقوم ود المطامير كمان يفكر
يرسل لينا أهله. :D

[ابراهيم]

يا عزيز انا طبعاً في جزء من الشمار وصلني قبل ما تتحرك من السودان ...
وكنت ناوي ليك في بوست شماراتي لكن قلت انتظر اسبوع لو عزيز ما فت لينا الشمارات انا بجي بفتو والباقي بتمو موية ...
دايرين شمارات الخرطوم يا خواجة

[ابراهيم]

ويا ابراهيم تاني اصلك ما تقول ليه ياعمو لانه طلع اصغر منك :p


مدنية خلي السلبطة انا احترمت نفسي زماااان لأنو كان في عمنا هنا قلت ليهو عمو قام زعل مني وهرشني
ومن ديك وعيك وطوالي بدل نقول عمو عزيز بقينا نقول عزو وبدل عمو ابوبكر بقينا نقول بكري وهلم جر جنس دلع .. لكن في ناس ما يقتنعوا الا يشوفو بالعين المجردة:D

[ابراهيم]

يا مدنية.. أصبري لي جاييك وجايب شمارك.
عليك نوووووور:D

[moh_alnour]

يا خواجة : حمداً لله على سلامة العودة إلى بلاد العام سام
والله من الشمارات الواحد بقى يعّطس ضحك
وشتان ما بين الصورين صور مستشفى مدني وصور الأمارات بس برضو القرد في عين أمو غزال
وياها سيدة المدائن كل شيء فيها على قلبنا زي العسل
وفي إنتظار باقي الشمارات
تخريمة : ود جيرانا إبراهيم دا والله صغير وجاهل كان قال ليك عمو مشيها ليهو
والله أنا أشهد ليهو أصغر مني بكتير ( سمعتي يا مدنية )

[admin]

لكن ياعمو عزيز ما تقول لي شمارك اصلي .. صناعة امريكية بايدي سودانية .. نحنا في انتظار باقي الصور والشمار.. قرينا طق طق ومعاك لغاية السلام عليكم

[صالح ابوشوارب]

يا عزيز الصور ما عايزة تفتح .. اظنو خجلانة .. استعين بصديق وبجيك راجع .. عشان اشوف اولاد جيمى قالو شنو

[ود المطامير]

دا كلام إنسان عاقل وخايف على باقي أهله..
هسع جبت سيرة المطامير ما يقوم ود المطامير كمان يفكر
يرسل لينا أهله. :D
يا الحبيب
إنت ما جابو ليك الخبر
ناس المطامير من عرفو انو حبيبهم عمورى ح يرسل ليهم
الكرت الأخضر باعو البقر والغنم والضان ومشو يطلعو الجوازات
والرساله شغاله عواسه سااااى قالت عزيز قال الرحله لأمريكا 17 ساعه
وهى خايفه على وليداتها من الجوع
غايتو لو ناس المطامير وصلو أمريكا الله يستر من حكاية
عنتر شايل سيفو
هع هع هع هع هع هع

[Madanawi]

حمدلله على السلامة يا خواجة
صورك في الامارات اعادت لي ذكرى أيام جميلة
قضيتها بين الاحباب في الامارات قبل تسعة أشهر
نزار حسن وعبدالمنعم زول فردة وودالمطامير
وخالد المسافر وعصام حسن،،
الامارات فعلا بلد الخير .. والله يرحمك يا شيخ زايد
ننتظر منك شمارات السودان .. بفارق الصبر،،

[عزيز عيسى]

يا عزيز انا طبعاً في جزء من الشمار وصلني قبل ما تتحرك من السودان ...
وكنت ناوي ليك في بوست شماراتي لكن قلت انتظر اسبوع لو عزيز ما فت لينا الشمارات انا بجي بفتو والباقي بتمو موية ...
دايرين شمارات الخرطوم يا خواجة
يا برهوتة علشان كدا أنا عملت حسابي وقلت الشمشرجية يجوا بيجاي..
أكيد الشمشرجي الجاب ليك الشمار دا واحدة من الأثنين أول حرف
من إسمهن يا عشوشة أو مدنية.. علشان كدا أنا من رجعت قلت
ودالماحي دا بيعطس مالو الحصل ليه شنو؟
كدي تعال فتو ورينا قالن شنو الشمشرجيات ديل؟
شمارات الخرطوم جاياك في الطريق..
بس كدي لوك الصبر.

[عزيز عيسى]

ومن ديك وعيك وطوالي بدل نقول عمو عزيز بقينا نقول عزو وبدل عمو ابوبكر بقينا نقول بكري وهلم جر جنس دلع .. لكن في ناس ما يقتنعوا الا يشوفو بالعين المجردة:D[/RIGHT]
تصدق يا إبراهيم أخواتي دائما بينادن إسمي عزو
وبعدين عليك نور هو فعلا إلا تشوف الواحد بالعين
حتى تقتنع.
ثم كذلك وأيضا حدد يا أبيض يا أسود
مين عمو أبوبكر المقصود هنا.. أعمامنا كتار هنا
عمو أبوبكر ودالصول.. عمو أبوبكر ودالمأذون
أم عمو أبوبكر المبارك؟ :D

[عزيز عيسى]

يا خواجة : حمداً لله على سلامة العودة إلى بلاد العام سام
والله من الشمارات الواحد بقى يعّطس ضحك
وشتان ما بين الصورين صور مستشفى مدني وصور الأمارات بس برضو القرد في عين أمو غزال
وياها سيدة المدائن كل شيء فيها على قلبنا زي العسل
وفي إنتظار باقي الشمارات
تخريمة : ود جيرانا إبراهيم دا والله صغير وجاهل كان قال ليك عمو مشيها ليهو
والله أنا أشهد ليهو أصغر مني بكتير ( سمعتي يا مدنية )

عزيزي الأخ Mohalnour

أولا قبل كل شيء ياريت تدينا إسمك بالعربي..
لأنه والله دائما أحب أخاطب الأخوان هنا بأسمائهم
الحقيقية..
يازول إنت برضو الشمارات وصلتك وخلتك تعطس ذي ودالماحي؟
جهز ليك كمامات لأنه الشمارات الجاية من النوع التقيل.
صور مستشفى مدني وصور الأمارات فرق كبير..
ناس بتنعم بالسعادة.. وناس....
وسيدة المدائن دائما في حدقات العيون..
عمو إبراهيم زولا صغير نعم..
كدي شوف الصورة والوجاهة تحت دي..
والصورة دي أكان ما مكضب تكون في العريش..

http://www6.0zz0.com/2008/01/15/14/440595742.jpg

[عزيز عيسى]

لكن ياعمو عزيز ما تقول لي شمارك اصلي .. صناعة امريكية بايدي سودانية .. نحنا في انتظار باقي الصور والشمار.. قرينا طق طق ومعاك لغاية السلام عليكم

هو إنت جيت يا عمو أبوبكر يا كبيرنا العلمتنا السحر..
شايفك راخي أضانك للشمارات وتلقط يمين وشمال..
غايتو جنس شمشرجية عمري ما شفت ذيهم..
الجماعة بهناك بطلوا يقولوا لي عمو عزيز
لما شافوا صورتي.. إنت جاي بيجاي
لسه شابكني عمو عزيز.. اللهم يطولك يا روح..
البقنع الديك شنو؟ :D
بالله الصور عجبتك؟..
شايف شغل الخواجات نظيف كيف؟
خليك قريب يالحبيب.

[عزيز عيسى]

وصلت الى مطار الخرطوم في تمام الساعة السادسة والنصف مساء بطائرة الخطوط الإماراتية.. وطبعا إنبهرت جدا لما شفت التغيير في صالة الركاب وقعدت إتلفت هنا وهناك لغاية ما جاني ليك واحد من الجماعة الشغالين في المطار.. بالله الجماعة ديل بينقشوا الواحد الراجع للبلد بعد فترة .. علشان كدا تاني لما أمشي السودان ما حأتلفت أبدا.. الراجل لما جاني سلم علي سلام شديد لمان خجلت.. قلت معقولة الزول دا بيعرفني وبسلم علي سلام شديد كدا وأتغابى فيه العرفة.. يا ربي شفته الزول دا وين.. بعد السلام عليكم ورحمة الله وبركاته قال لي إديني جوازك.. أها أنا صراحة خفت خوف شديد في الحتة دي لما طلب مني جواز السفر وشكيت في الأمر.. ياربي الزول دا رجل أمن وعايز يبهدلني؟.. يا ربي سويت شنو أنا مع ناس الحيكومة ديل.. أكان لي سياسة السودان وحات الله ما بعرف فيها التكتح.. وما قاعد إتكلم فيها ولا بحب إتكلم فيها خالص.. وحتى ناس الحيكومة البقولوا عليهم الكيزان ديل ما بعرف فيهم غير الترابي والرئيس البشير وحتى ناس المعارضة يادوب عرفت فيهم واحد إسمه ياسر عرمان.. وكمان قالوا لي الزول دا من ناس مدني وكان ساكن حي 114
على كل حال ناولت الراجل جواز سفري وقال لي أدخل.. دخلت وعيني ما زاغت من الراجل خايف على جواز سفري.. دا جواز سفر إمريكي وإسمي الخواجة.. يعني لو ضاع مني يكون إسم الخواجة ضاع مني وأصبحت مواطن سوداني تاني من جديد.. المهم في النهاية الراجل جاني شايل جواز السفر وناولني ليهو وقال لي عفشك وين.. يادوب الحكاية وقعت لي وعرفت إنو مجرد عامل في المطار فقط.. لكن في سري قلت ليه الله لا كسبك مالك علي مقطع مصاريني..
حملت حقابي وخرجت من المطار وناولت الراجل الفيها النصيب وقابلت أخواني وأخواتي وباقي أفراد الأهل والأقارب.. وناس الحي في الصحافة وركبنا عربية تشبه الحافلة (مني بص) قالوا إسمها إيه ما بعرف والله راح لي.

[عزيز عيسى]

في اليوم الثاني من وصولي كان أول المتصلين الأخت العزيزة الدكتورة مدنية وبعدها الأخت العزيزة فردتي عشوشة.. حددت موعد مع الأخت مدنية وأفدتها بأنني سأحضر الى زيارة منزلهم في مساء اليوم التالي.. وكذلك حددت موعد للقاء الأخت عشوشة..
في صباح ذلك اليوم قررت الذهاب الى مكتب الأخت عشوشة.. وبعد إعطائي الوصف الى كيفية الوصول وصلت الى المكان وكان بصحبتي إثنين من أبناء أخواتي.. كانت عشوشة في إنتظارنا خارج المبني وهي في شوق وترقب شديدين لمقابلتنا.. وبمجرد دخولنا في شارع مبنى المكاتب وبالرغم من إزدحام الناس المارة إستطاعت أن تتعرف على شخصي من بعيد وأتت مسرعة لتستقبلنا أحر إستقبال.. أخذتنا عشوشة الى داخل المبني وجلسنا في غرفة إستقبال الزوار.. وكعادتها كانت إنسانة بشوشة وظريفة وفي غاية الرقة واللطافة.. شربنا الحاجة الباردة وتونسنا معها لبضعة لحظات ضحكنا سويا أعدنا خلالها ذكريات أيام المنتدى الجميلة.. والراندوك فتيتوا ليها من النوع التقيل لغاية ما قعدت تتلفت وتقول يا ربي دا الخواجة ولا واحد شماسي معانا في الخرطوم.. :D
بعد هذا اللقاء السريع ودعت الأخت عشوشة على أمل أن ألتقي بها مرة أخرى قبل مغادرتي السودان.
في ذلك اليوم كان من المفروض أن ألتقي أيضا بالرجل الفنان التشكيلي الأخ بدر الدين محمد وعند إتصالي به عرفت أنه خارج العاصمة في الجزيرة لتقديم واجب العزاء لأحدى أقاربه..

[عزيز عيسى]

يا عزيز الصور ما عايزة تفتح .. اظنو خجلانة .. استعين بصديق وبجيك راجع .. عشان اشوف اولاد جيمى قالو شنو

يا ود أبوشوارب ما قلنا ليكم الكمبيوترات الخردة دي إتخلصوا منها
وجيبوا ليكم كمبيوترات حديثه من النوع (لابس توب) ذي بتاع
ود الصول على قول ودالمأذون.
الصور الناس ديل كلهم شايفنها.. إحتمال الجهاز عندك بيحتاج
لعملية تعديل بسيط في (setting).. كدي إستعين بصديقك
وتعال راجع لو ما حل ليك المشكلة إستعين بأخونا (أبوزرد)
أبوبكر المبارك وحيحل ليك المشكلة.

[عزيز عيسى]

والرساله شغاله عواسه سااااى قالت عزيز قال الرحله لأمريكا 17 ساعه
وهى خايفه على وليداتها من الجوع
قول للرسالة لما تخلص ما تنسي تعوسي لينا الأبري معاك
عايزين نحفظو لي رمضان الجاي.
وناس المطامير طالما عموري شايل همهم ومتبرع
بغرفته ومكافاته الأسبوعية قول ليهم غرفة عموري
أكان ما شالتكم حنشيلكم في الراس.

غايتو لو ناس المطامير وصلو أمريكا الله يستر من حكاية
عنتر شايل سيفو
هع هع هع هع هع هع
أها دي الخايفين منها.. الله يستر.

[عزيز عيسى]

حمدلله على السلامة يا خواجة
صورك في الامارات اعادت لي ذكرى أيام جميلة
قضيتها بين الاحباب في الامارات قبل تسعة أشهر
نزار حسن وعبدالمنعم زول فردة وودالمطامير
وخالد المسافر وعصام حسن،،
الامارات فعلا بلد الخير .. والله يرحمك يا شيخ زايد
ننتظر منك شمارات السودان .. بفارق الصبر،،

الزول الجميل أخونا مدناوي،

والله فعلا الإمارات بلد خير لأنه بإختصار حكامها مهتمين بالبلد
والمواطنين هناك.. وبالمناسبة ما فيش فرق بين الإمارات وأمريكا
من ناحية العمران والشوارع والترتيب والتنظيم.
لكن لاحظت أن معظم الناس حتى أهل البلد يتحدثون اللغة الأنجليزية
في المخاطبة وتكاد اللغة الإنجليزية تطغى على اللغة العربية هناك.
سعدت بمشاهدة دبي لأول مرة وإنبهرت جدا لكل شيء..
ربنا يحفظ عليهم هذه النعمة ويديمها عليهم.

http://www6.0zz0.com/2008/01/15/15/135149083.jpg

[عزيز عيسى]

في مساء ذلك اليوم قررت الذهاب الى زيارة منزل الأخت الدكتورة مدنية.. وبعد إعطائي الوصف الكامل لكيفية الوصول الى منزلهم إستطعت الوصول الى منزل الأخت مدنية وكان بصحبتي إبن أختي ياسر الذي ساعدني في تجوالي في الخرطوم.. كان في إستقبالنا الأخ إبراهيم شاشوق زوج الأخت مدنية وبناتها الإثنين والإبن جمال الله يحفظهم ويغطي عليهم..
يا سلام جلسنا وتونسنا مع الأخ إبراهيم شاشوق والأخت مدنية ما قصرت رحبت بينا أجمل ترحيب وقدمت لنا العصاير والشاي بالحليب مع أجمل كيك.. (يا أبوسفروق الحمد لله أخوك ما بشرب شاي.. وقعت في العصير والكيك.. وبرضو قلت الحمد لله ما وصلت بيت ناس مدنية الظهر.. تفتكر كان شربتني ذيك الشاي بالحليب نصف النهار؟) :D
المهم الونسة ما خلينا فيها شمار إلا وذكرناه.. والله الزولة دي تراها ما ساهلة هي وزوجها إبراهيم.. بسم الله ما شاء الله ناس في غاية البساطة والتواضع.. وناسين ومحترمين شديد ولديهم ثقافة عالية.. ولو جلست معهم الونسة تجر بيك وتنسى الوقت.. عائلة في منتهى الرقة والجمال والكرم.. وتدخل قلبك من أول وهلة.. وتشعر ذي الكأنك تعرفهم منذ زمن طويل..
لاحظت أن الوقت قد تأخر والواطة بقت ليل.. وقررنا نعود الى الصحافة.. طبعا إتفكينا منهم بصعوبة.. وقضينا معاهم وقت جميل جدا ثم ودعناهم وخرجنا من منزل الأخ إبراهيم شاشوق والأخت مدنية وعدنا الى الخرطوم حي الصحافة.

[معتز الريح]

حبيبنا خواجه ..
أيامكم لوز .. ما لم تكتبه برضو وصلنا ..

أها رايك شنو؟ ..

[عزيز عيسى]

حبيبنا خواجه ..
أيامكم لوز .. ما لم تكتبه برضو وصلنا ..

أها رايك شنو؟ ..

حبابك عشرة يا ود الريح..
نفسي أعرف الشمشرجي الجاب ليكم الشمار دا منو
أها الماكتبتو إحتمال تلقى قدام.
ولو ما وجدته تعال أحكي لينا إنت باقي الشمار
الفات علي أحكيه.؟

[عزيز عيسى]

لظروف ما إضطريت إني أحضر الصلاة وصباح يوم العيد في الخرطوم.. لما جات الساعة حوالى العاشرة صباحا مشيت مع شقيقتي الى موقف بصات الجزيرة.. وطبعا في كل الأحوال محتاج لدليل لأنه والله ما ناقش أي حاجة في البلد البقت ما ليها راس ولا قعر دي..كلو شيء إتغير وتلخبط علي.. وصلنا محطة البصات ولما جينا ندخل قالوا لينا تدفعوا كل واحد ألف جنيه رسوم دخول.. قلت ليهم يا جماعة الخير أنا جاي مسافر ما جاي علشان أدخل سينما ولا إتفرج ساي.. قالوا لي لو ما دفعت ما حتسافر.. قلت أمرنا لله ودفعنا ليهم ثلاثة ألف جنيه.. قلت ليهم الله لا كسبكم ودخلت..
عجبني النظام في المجمع والكنديشن في صالة إنتظار الركاب.. قلت أخلص قريشاتي الدفعتهن للدخول مشيت جلست في واحدة من المقاعد وقعدت إتفرج في خلق الله الماشي والجاي وأقول قادر الله على الزحمة.. الناس ديل ماشين وين.. وجايين من وين؟.. الأعمى شايل المكسر..
بعد دقائق جاء إبن أختي كان مقدمنا وقطع لينا تذاكر على بصات مكتوب عليها ثلاثة حروف بالإنجليزي أعتقد أم أف سي.. والله أنبهرت لما دخلت وقعدت في المقعد داخل البص.. كندشة لمان بردت.. إتكيفت خالص وقلت ما شاء الله البلد إتقدمت في ناحية المواصلات والإتصالات..
تحرك بينا البص في إتجاه ودمدني وزحمة العربات في الطريق ما تديك الدرب.. قالوا في حاجة إسمها (الطوف).. قلت ليهم أها الطوف دا شنو؟ إن شاء الله ما يكون في مطرة صابة في الطريق وجابت معاها السيل.. قالوا لي الطوف دا يا حبة يا منقرضة يا مدقس وطاشي شبكة سيارة الشرطة تسير قدام العربات وتقودهم في الطريق بسرعة محدده للتقليل من حوادث المرور.. قلت ليهم والله الزول الفكر في الطريقة دي ودحلال.. وعلى الرغم من تقليل سرعة البصات إلا أنها فكرة ممتازة جدا والواحد بيطمئن إنو الناس بتصل بسلامة خاصة بعد الحوادث المتكررة في الطريق..

[مدنيّة]

وركبنا عربية تشبه الحافلة (مني بص) قالوا إسمها إيه ما بعرف والله راح لي.

اسمها هايس يا خواجة :D

[مدنيّة]

كان في إستقبالنا الأخ إبراهيم شاشوق

عاد يا الخواجة كله شابكنا ما بعرفه ومابعرفه واسمه راح لي
يا اخوي شاشوق دا جبته من وين ؟؟
اسمه ابراهيم علي
ماتلخبت علينا الاختساس ساااااااااي :D

[عزيز عيسى]

اسمها هايس يا خواجة :D



عليك نور يا مدنية..
هايس.. والبلد كلو هايص.. :D

[عزيز عيسى]

عاد يا الخواجة كله شابكنا ما بعرفه ومابعرفه واسمه راح لي
يا اخوي شاشوق دا جبته من وين ؟؟
اسمه ابراهيم علي
ماتلخبت علينا الاختساس ساااااااااي :D

ما قلت ليك يا مدنية كل شيء في الخرطوم جايط لي في راسي..
حتى إسماء الشوارع والعربات والناس راحت لي..
والله أنا ذاتي شاشوق دا منو ما عارف..
على الأقل إسم إبراهيم موجود..
وأعذريني على شبكتي الطاشة دي..
وقولي لإبراهيم حقك علي..
والله يستر على أسماء الباقين.
واحد جارنا إسمو إبراهيم..
شابكو ليك يا محمد.. يا محمد..
في النهاية قبل علي وقال لي: محمد دا منو؟
أنا إسمي إبراهيم..
والله خجلت ودخلت في أضافريني. :D

[عزيز عيسى]

بعد شوية الكمساري بتاع البص جاب لينا كبايات بلاستيك فاضيات ومعاهن بسكوت.. أكلنا البسكويت وقلت في نفسي ياربي الكباية الفاضية دي في شان شنو؟.. المهم مرت لحظات وجاء الكمساري تاني شايل عصاير ويقسمها للركاب .. ناولني عصير منقة بارد.. شربت المنقة وإتكيفت جدا.. وبعد ما شربت المنقة الباردة أخذت لي تترعة جامدة باااااع قدام الركاب لحدي ما الراكب القدامي صحي من نومو وقعد يتاوق لي ومكشر وشيشو.. قلت ليه مالك يا فردة في حاجة.. عاين لي وقال لي الظاهر عليك جاي يادوب من بره.. وشكلك شكل خواجات.. قلت ليه شوف يا حبة أي أنا خواجة.. خواجة سوداني.. وكمان الخواجات ما بتجشؤا؟.. أنا إتجشيت لأني شارب منقة.. مش أحسن ليك من أكون شارب حاجة تانية.. أخينا هز راسه ورجع يواصل نومته..
أها بعد شوية الكمساري وسواق البص كثر خيرهم بسطونا أكثر السواق مرة يضع لينا شريط فيديو نتفرج فيه.. ومرة يضع لينا شريط غنا أطربنا بيه وقربنا نقوم من مقاعدنا ونسكسك.. غايتو الرحلة كانت ممتعة بشكل وغير مملة كما في السابق..
قبل مرورنا بالحصاحيصا شاهدت بنطون رفاعة ومن بعيد شاهدت أعمدة كبري رفاعة الجديد.. وعلى طول تذكرت أخونا وحبيبنا ودالماحي وقرية الجنيد..

[abdgina]

يا نلس مدني بالله همتكم معانا عشان مدني تصبح ذي دبي واجمل.... ومافي حاجة بعيدة علي ربنا؟؟؟؟؟اها قولكم شنو؟؟؟؟؟؟؟

[moh_alnour]

تسلم يا خواجة
يلا منتظرين باقي الشمار كلو ، ولا وكيلك الله ود الريح مجهز بوست بالشمارات
الما قولتها لينا عشان كدا فك أخرك ساي .
يا خواجة دي المرة التانية أكتب ليك أسمي بالعربي
أسمي ( محمد النور الجاك النور ) أوعى تنزلني في بوست صور أعضاء المنتدى
بأسم ( محمد شاشوق )

[Madanawi]

يا خواجة .. شكلك كده قاعد جوة اضافرينك
من ما وصلت السودان لحدي ما اتخارجت
ما ممكن ما تعرف الشوارع .. ولا البيوت ولا الناس كمان
بس بيني وبينك .. ما براك .. في غيرك
برضو خشو الفلم ده ،،
عشان كده واصل بلا حرج .. كان الخواجات بتحرجو!!

[ابراهيم]

عاد يا الخواجة كله شابكنا ما بعرفه ومابعرفه واسمه راح لي
يا اخوي شاشوق دا جبته من وين ؟؟
اسمه ابراهيم علي
ماتلخبت علينا الاختساس ساااااااااي :D




هههههههههههههههههه
والله ضحكت لمن بطني وجعتني
ذكرتيني مرة واحد صاحبي جا البيت لقى امي قال ليها يا حاجة عايزين تلش
قالت ليهو تلش دة شنو؟
قال ليها تلش ولدك
قالت ليهو انا ما عندي ولد اسمه تلش وفي نص المفاوضات تلش ظهر
"وقطعت جهيزة قول كل خطيب"
يا عزيز شاشوق دة جبته من وين صحي؟:D
ما تاكلونا حنك ساي

[ابراهيم]

يا نلس مدني بالله همتكم معانا عشان مدني تصبح ذي دبي واجمل.... ومافي حاجة بعيدة علي ربنا؟؟؟؟؟اها قولكم شنو؟؟؟؟؟؟؟


ابو دقنة سلامات
فعلاً مافي حاجة بعيدة على ربنا

[ابراهيم]

يا عزيز عايزين الشمار بتاع الراندوق

[عثمان جلالة]

والله يا خواجه أنا مستمتع بالسرد الجميل ده لحدي ما نسيت شغلي :eek: ولا اعلم لا أدري ألقى ليك المدير .. فوق راسي ... قال لي ... الخواجه عزيز ده منو .... واصل ياخي واصل ... وهدي قعده بلا شغل بلا هم:p

[نزار حسن محمد]

هى الخواجه الذيذ هو بى هنا وانا ما جيب خبر
ازيك ياحبه والله شوق مطر ذى العندنا اليومين ديل تلاته يوم ما وقفت المطر صباح لليل ...
ذكرتنى ايام روسيا وايامى الفى دويم يالليالى
لكن النسيان ما عندك ياشاشوق..
غايتو انا حريف اشبك لك الناس بالله كيف
والله ايام تعرف ياحبيب ..ومن هذا القبيل لقايت ما اتخارج ..لكن المشكله الغلبتنى عديل مشكلة الكلام بالهجة العرب الوهم ديل تعرف مره قلت لى ابوى الحين انا جاى..قال احنين راسك البقاء كلامه مامفهوم ده كل ما اركب معاى فى العربيه اشبكو لك سيده اهآ يابوى تانى سيده ((يعنى امشى عددديل )) قام قال شنوا انت شابكنى سيده سيده ..قمت اتذكرت قلت يابوى واحد سودانى اول مره اجى الامارات ركب مع بتاع التكسى وشبكه السواق سيده ..السودانى قال ليه اى سيده ومقدده عديل لف بجاى ...اكان رجع المطار تانى..
كدى واصل ياحبيب وانا قاعد وياهدى صنقيره

[admin]

اي نعم نحنا خواجات زي بعضينا واي حاجة بس شاشوق دي ما بفوتها ليك... اختار واحد من الاثنين يا نسميك الخواجة عزيز شاشوق .. ولا نسمي مدنية مدنية شاشوق .. صدقني فوتا ركعتين ودالماحي الفي الصحن

[امير عبدالباقي]

الحبيب ودعيسي لك التجايا وحمدلله علي السلامه ، لكن شمارك ماصعب وشوقتنا ماتكب الشمار كلو وريحنا ماتخاف منساهر فيه للصباح وزي ماقال ليك عثمان جلاله انعل ابو الشغل وهدي صنقيره،
ياخواجه لكن ماوقعته في شر اعمالك شاشوق دي ماظنيته الناس دي بتفوته ليك باخوي واخوك كده احسن من حسي فك الشمار ساي

[عزيز عيسى]

يا نلس مدني بالله همتكم معانا عشان مدني تصبح ذي دبي واجمل.... ومافي حاجة بعيدة علي ربنا؟؟؟؟؟اها قولكم شنو؟؟؟؟؟؟؟
يا أبو دجانة يا أخوي كل شيء متوفر في السودان
والله النفوس لو إطايبت بلدنا كلها تبقى أجمل من الإمارات.

[هشام السماني إبراهيم]

الف حمد لله على السلامة



اخوي كدا صورك خلصت ولا ننتظر كمان شوية

[عزيز عيسى]

تسلم يا خواجة
يلا منتظرين باقي الشمار كلو ، ولا وكيلك الله ود الريح مجهز بوست بالشمارات
الما قولتها لينا عشان كدا فك أخرك ساي .

يا محمد شاشوق.. أقصد ودالنور
ود الريح دا أنا منتظره بشوق الصبر علشان يجي يكمل
الماقلتو أنا هنا.



يا خواجة دي المرة التانية أكتب ليك أسمي بالعربي
أسمي ( محمد النور الجاك النور ) أوعى تنزلني في بوست صور أعضاء المنتدى
بأسم ( محمد شاشوق )
ومالو ما تكتبو ثاني وثالث لحدي ما نحفظو..
محمد النور الجاك النور
إنت تعال النسعلك..
النور دا عاصرنو بيناتكم عمل ليكم شنو؟ :D
إنت يا ودالنور بتتذكر في واحد أخونا سجل جديد إسمو ود ودالنو
إنت خاطبتو باسم ودالنور..
أها أنا غايتو إتسديتها.
بس فالح فيني.. عالم ما بتريح أبدا :D

[عزيز عيسى]

يا خواجة .. شكلك كده قاعد جوة اضافرينك
من ما وصلت السودان لحدي ما اتخارجت
ما ممكن ما تعرف الشوارع .. ولا البيوت ولا الناس كمان
بس بيني وبينك .. ما براك .. في غيرك
برضو خشو الفلم ده ،،
عشان كده واصل بلا حرج .. كان الخواجات بتحرجو!!
والله يا مدناوي يا أخوي البلد كلها بقت مقلوبه..
وما قدرت أعرف ليها راس من قعر..
غايتو بقت علي ذي حكاية الراجل الزار السودان
بعد فترة طويلة ووجد أسماء الشوارع في حيهم كلها إتغيرت
بأسماء الصحابة قام وقف في نص الشارع وصاح:
يا أهل مكة.. دلوني على منزلي!

[عزيز عيسى]

يا عزيز شاشوق دة جبته من وين صحي؟:D
ما تاكلونا حنك ساي

يا إبراهيم يعني لازم تحرجونا..
وتطاردوا فينا ليل نهار..
وتسألوا فينا أسئلة منكر ونكير بيتجاوزوا عنها.
ذلة لسان بتودي الواحد في حيص بيص..
ما إعتذرنا لإبراهيم عن طريق مدنية..
غايتو الله يعيني على شاشوق دا..
ولساني الشمشرجي دا إلا أقطعو
عالم ما بتريح أبدا.. :D

[عزيز عيسى]

نعود للشمار

وبعد خروجنا من منطقة الحصاحيصا كنت حريص في كل لحظة وأخرى أن أظل مستيقظا حتى أشاهد لوحة (إبتسم أنت في ودمدني)..

http://www4.0zz0.com/2008/01/16/14/179575814.jpg

وصلنا الى مدني حوالي الساعة الواحدة ظهرا ومنها توجهنا الى حلة حسن حيث نزلت في منزل شقيقتي..
بعد لحظات من وصولي إتصل بي الأخوان خالد الصول وأبوزيد محمد نور والأخوان عوض وصلاح أولاد الطاهر وأفادوني بأنهم في الطريق.. إتصلت بالأخ عماد أبورجاء ووجدته في منطقة قريبة في نفس الحي وأفادني بأنه سيصل خلال عشرة دقائق.. وفعلا كان اللقاء في غاية الروعة حينما جاءني الأخوان كلهم في وقت واحد.. سلام شديد.. طبعا قدمنا للجماعة حاجة باردة لأنه الناس كانت كلها خايفة من النزفية ولحمة الضحية..
بعد ذلك إتجهنا الى منزل الأخ عماد أبورجاء وشربنا البارد و القهوة والشاي وبعدها جلسنا وإتونسنا..

http://www4.0zz0.com/2008/01/16/14/365292072.jpg
من اليمين خالد الصول.. صلاح ودالطاهر.. حنين.. عزيز عيسى الخواجة.. أبوزيد محمد نور

http://www4.0zz0.com/2008/01/16/14/757794079.jpg
في اليمين خالد الصول وفي اليسار صلاح ودالطاهر

http://www4.0zz0.com/2008/01/16/14/176943340.jpg
خالد الصول (كب أربعة ملاعق سكر).. أبوزيد محمد نور (يازول كب ساي) .. عماد أبو رجا (والله قهوتنا كاربة)

[عزيز عيسى]

ومن هناك توجهنا الى منزل الأخ عوض صقير حيث كان اللقاء أيضا في قمة الروعة.. إتصلنا بالأخ أنيس التوم وأفدناه بمكان وجودنا وخلال فترة زمنية قصيرة حضر الزول الكوري الأخ أنيس التوم مما زاد من حلاوة وطعم اللقاء..
بعد هذه اللحظات الجميلة ودعنا الأخ عوض صقير والأخ أنيس التوم وتوعدنا بأن نلتقي في اليوم التالي.
في اليوم الثاني لعيد الأضحى جاءني الأخوان أبوزيد محمد نور وخالد الصول وصلاح ود الطاهر وشقيقه عوض ودالطاهر وركبنا سيارة الأخ أبوزيد وذهبنا الى منزل الأخ عماد أبورجاء ومن هناك توجهنا الى منزل شقيقة الأخ خالد هاشم حيث كان في إنتظارنا.

http://www4.0zz0.com/2008/01/16/14/179832744.jpg
خالد الصول وعوض الطاهر (شقيق صلاح ودالطاهر).. في منزل عوض صقير

http://www4.0zz0.com/2008/01/16/14/150046144.jpg
صلاح ودالطاهر ولحظة دردشة مع المجموعة في منزل عوض صقير

http://www4.0zz0.com/2008/01/16/14/580941154.jpg
عماد أبو رجاء.. خالد الصول.. عزيز عيسى (الخواجة) في منزل عوض صقير

[عزيز عيسى]

إلتقيت لأول مرة بالأخ خالد هاشم وأشقاؤه والسلام كان حار جدا ولحظات لقاء معبرة.. جلسنا في كراسي خارج المنزل نظرا لتواجد عدد كبير من المعازيم في الداخل الناس في حالة عرس جاؤا لتقديم التهنئة بمناسبة زواج بنت شقيقة الأخ خالد هاشم..
بعد لحظات حضر الأخ أنيس التوم ثم الأخ محمد السر وجلسنا نتونس في جو قمري ساحر إمتزجت فيه فرحة وحلاوة اللقاء بروح المرح والدعابة وود الطاهر خفيف الظل أمتعنا بقفشاته الظريفة.. وقد زاد حلاوة الجلسة حينما إتصل الأخ صالح أبوشوارب وكأنه كان على علم بموعد لقاءنا وتحدث معنا جميعا عبر الهاتف وأشعل المكان بالضحك بتعليقاته الصاخرة .. ثم تلاه مباشرة إتصال هاتفي من الأخ نزار حسن (أبوسفروق) الذي أتحفنا أيضا بتعليقات زادت من حلاوة جو القعدة وجعلت الضحك متواصلا.. يا له من لقاء ويا له من يوم جميل قضينا فيه أسعد اللحظات.

http://www4.0zz0.com/2008/01/16/15/961253642.jpg
الزول الجميل خالد هاشم.


http://www4.0zz0.com/2008/01/16/15/226072581.jpg
الزول الكوري أنيس التوم

[عزيز عيسى]

يا عزيز عايزين الشمار بتاع الراندوق

يا برهوتة صبر يبل الأباري مافي؟
الراندوق فتيتو مع عشوشة..
قلت ليها: شوفي يا حبة ما تعملي لي فيها تفتيحة..
أرخي الأبنص شوية.. وما دوسي للصاجة.
أنا بقلب هوبة في راس دبوس
وبطلع بقد الأبرة
وبرقص داخل سورو وهو مدور..
وبصارع أصغر نملة.
وبرضو عشوشة تقول علي حنكوش وما ناقش حاجة؟
يا عمك أها لقيتني كيف؟

[ود المطامير]

والله يا أخوى الكبير
الله يديك العافيه
أخدتنا فى رحله جميله فى جو جميل مع ناس سكنوا القلوب

الله يديك العافيه
كمل قول لينا قول

[عمك تنقو]

العزيز عزيز
خصمتك بالنبي
كوّل وويكاب وأبغازي ولالوب للحبيب ود الماحي :D
وسلامي للحبايب في مدني ( بالصور )

[عزيز عيسى]

والله يا خواجه أنا مستمتع بالسرد الجميل ده لحدي ما نسيت شغلي :eek: ولا اعلم لا أدري ألقى ليك المدير .. فوق راسي ... قال لي ... الخواجه عزيز ده منو .... واصل ياخي واصل ... وهدي قعده بلا شغل بلا هم:p

عثمان جلالة كيفنك يا زول يا رايق..
بس أعمل حسابك المدير ما يجي يلقاك بتضحك
ويقوم يرفدك.. وبعدين أبقى أنا السبب.

يازول هوي شوف شغلك وأنسى الخواجة
الطاشي شبكة دا خليه يلعلع بطريقته.

[عزيز عيسى]

هى الخواجه الذيذ هو بى هنا وانا ما جيب خبر
ازيك ياحبه والله شوق مطر ذى العندنا اليومين ديل تلاته يوم ما وقفت المطر صباح لليل ...
ذكرتنى ايام روسيا وايامى الفى دويم يالليالى
لكن النسيان ما عندك ياشاشوق..


هوي يا أبوسفروق.. تاني جبت لي سيرة شاشوق؟
يا جماعة أنا أودي وشي دا وين؟.. لا حولا!

تصدق المطر عندنا هنا من أمبارح شغالة (شكشاكة) ولحدي الآن ما عايزه
تقيف وكمان معاها برد..
غايتو ود الماحي بكون نشف طب وبقى لوح ثلج من شدة البرد.

الحين.. وسيده.. وأيش لونك..
جنس الكلام دا أوعك تمشي تقولو في السودان..
بسمعوك كلام ذي ما قال ليك أبوك.
غايتو أنا لما مشيت السودان كنت حريص دائما قبل
ما أرد إني ما أدخل كلمة إنجليزية علشان ما يقولوا
الزول دا عايز تفلهم علينا..
لكن مرات بدون ما الواحد يقصد يلقى الكلمة طلعت من فمه
والله يعينك مع الجماعة.
:D

[عزيز عيسى]

اي نعم نحنا خواجات زي بعضينا واي حاجة بس شاشوق دي ما بفوتها ليك... اختار واحد من الاثنين يا نسميك الخواجة عزيز شاشوق .. ولا نسمي مدنية مدنية شاشوق .. صدقني فوتا ركعتين ودالماحي الفي الصحن

عارفك غتيتوني وما بتفوت عليك حاجات ذي دي يا أبوزرد..
يا جماعة في خواجة إسمو خواجة عزيز شاشوق..؟
غايتو دي أصلو ما بتجي.. أحسن تخلوها
مدنية شاشوق.. :D
الله يجازي محنك يا مدنية.. فضحتيني مع الحناكيش ديل..
كان تعملي نايمة وتمرريها..
أها هسع عملتيها فيني والناس ديل بيني وبينك
شايفهم ناوين علي يلزقوا الإسم فيني بأي طريقة..
لكن سيك سيك الإسم أنا قلتو ومعلق فيك.

[عزيز عيسى]

الحبيب ودعيسي لك التجايا وحمدلله علي السلامه ، لكن شمارك ماصعب وشوقتنا ماتكب الشمار كلو وريحنا ماتخاف منساهر فيه للصباح وزي ماقال ليك عثمان جلاله انعل ابو الشغل وهدي صنقيره،
ياخواجه لكن ماوقعته في شر اعمالك شاشوق دي ماظنيته الناس دي بتفوته ليك باخوي واخوك كده احسن من حسي فك الشمار ساي
إنت يا أمير لما جيت راجع ما قلت بتعمل لينا وجع وش
طيب مالك إختفيت.. لا شفنا وشك ولا جانا وجع..
والحمد لله البوست دا جابك راجع تاني
وإن شاء الله يجيب بقية العقد الفريد.

غايتو ما فضل لي غير إني أقول شاشوق دا تطير عيشتو
اللي عايز يطير عيشتي. :D

يا أمير الأسم دا خلاص أنا إتنازلت عنه لأختنا مدنية شاشوق
بتاعة الشبك دي.

باقي الشمار جاي في الطريق إنت وعثمان جلالة بس لوكوا الصبر
وخليكم متابعين.

[عزيز عيسى]

نعود للشمار

في اليوم الثاني قررت الذهاب الى قرية السوريبة وقمت بتسجيل زيارة خاصة للأخ الحبوب عوض إبراهيم (أبوالمهتدي) وعرفت أنه كان مريض ويتمثال الآن للشفاء..

بعد عودتي من السوريبة ذهبت وبصحبتي الأخ عماد أبورجاء الى كازينو حسن جاد الله في آخر حي الدرجة على طريق مدني سنار لتلبية الدعوة التي قدمها إلينا الأخ خالد هاشم لحضور الحفل بمناسبة زواج إبنة شقيقتة.. إلتقينا بالأخ أبوزيد محمد نور ومحمد السر هناك وإستقبلنا الأخ خالد هاشم وزوجته أم هاشم وعرفني بعضو المنتدى الأخ خالد العبيد.. طبعا في تلك اللحظة خلطت بين إسم الأخ خالد العبيد والأخ خطاب العبيد وشبكت ليك الأخ خالد العبيد سلام شديد كيفنك يا الزول الشين كيف حالك يا عريس.. في النهاية أوقفني خالد هاشم وقال لي: عارفك قاصد منو؟.. دا خالد العبيد دا ما خطاب العبيد.. وتعال يا الضحك الجماعة عرفوني طاشي شبكة.. جابوا لينا العشاء إتعشينا وبعد لحظات بدأ الحفل والفنان بدأ يغني.. في البداية كنا جالسين نتفرج على الناس البترقص لكن جاء خالد هاشم يجرجر فينا وحلف ستين يمين لازم ندخل ونرقص.. أها دخلنا كلنا بسلامتنا نبشر ونرقص مع أنغام الموسيقى والطرب وإستلمنا الحفلة على حسابنا.. أنا غايتو لو خلوني شوية كان رقصت ليهم رقصة القرد.. وفي رقصات كدا شفتها في الخرطوم حي الصحافة نسيت أذكرها ليكم في نفس ليلة وصولي للخرطوم قبل ما أدخل شنطي ساقوني قالوا لي أرح الحفلة مدورة.. غايتو نوع الرقيص الشفتو من الله خلقني ما شفت ذيه برضو كان حأرقصه ليهم.. المهم الجكس في الحفلة ما يديك الدرب.. اللبس كيف والرقيص كيف.. وما تعرف تعاين لمين وتخلي مين.. يمين دي أسمح من دي.. الناس العينهم طايرة ذي ناس أبوزيد زحوا مننا بعيد علشان ياخدوا راحتهم ويعاينوا للجكس ويعلقوا وخلونا نتلفت.

وفي أثناء الحفل سقط الأخ خالد هاشم فجأة مغمى عليه مما إستدعى الأمر الى إيقاف الحفل وحمله الى قسم الطواريء بمستشفى مدني حيث شاهدنا المهازل هناك التي أتي ذكرها في بوست الأخ أبوزيد محمد نور عن مستشفى ودمدني التعليمي..

http://www4.0zz0.com/2008/01/16/16/588333603.jpg
عماد أبو رجاء ومحمد السر يتفرجوا على الجكس من بعيد

http://www4.0zz0.com/2008/01/16/16/175552927.jpg
أبوزيد محمد نور والخواجة عزيز عيسى ويد أبو رجاء لحظة رقيص وسكسكة شديدة

http://www4.0zz0.com/2008/01/16/16/215688356.jpg
خالد هاشم ومحمد السر ولحظة إندماج مع الرقيص.. طبعا طبقوا كل الحركات البتلفت الجكس.

http://www4.0zz0.com/2008/01/16/17/412327770.jpg
أبوزيد مشي جلس في منطقة إستراتيجية مبسوط يعاين للجكس ويتبسم

http://www4.0zz0.com/2008/01/16/17/502729239.jpg
خالد هاشم يداعب في الجماعة قبل أن يغمى عليه بلحطات.

[Jamal Elmahi]

الخواجه شاشوق ...وحاة أبكبس سايره عليك ...
غايتو شماراتك كوم وشاشوق دي كوم تاني ...يرضيك ياخواجه تطقش شاي اللبن والكيك تشتتا بشاشوق بتاعتك دي ...بشويش علي شاشوق ...أنا قلته ياربي شاشوق دي علي وزن طايوق ..قلته الخواجه دا إلا رفستو حماره والده عملت ليهو إلتماس في سلوك الطايوق وبقي برّه الشبكه ...
ولاّ أختلط عليهو الاختساس ذي ما قالت مدنيّه شاشوق ...وإتلخبط عليهو الاتي:
مشاققاتي + شلاقة ود المطامير + شقة الادمن الفي منهاتن + شرقة أبشوارب لما شاف الممرضه الهنديه جميله كابور+ شوق الخواجه للسودان + شقلة حلة حسن = شاشوق

ود الماحي

[ود المطامير]

وإتلخبط عليهو الاتي:
مشاققاتي + شلاقة ود المطامير + شقة الادمن الفي منهاتن + شرقة أبشوارب لما شاف الممرضه الهنديه جميله كابور+ شوق الخواجه للسودان + شقلة حلة حسن = شاشوق

ود الماحي

+ شعر شبارقه

[الجيلي حسن يوسف]

الناس الايام دي دايره مواضيع خفيفة ذي دي
الله يبارك فيك

[عزيز عيسى]

الف حمد لله على السلامة
اخوي كدا صورك خلصت ولا ننتظر كمان شوية
أخوي هشام السماني حبابك عشرة يا زول..
صوري ما كملت.. لسه النقة شغالة.
يازول إنتظر شوية مستعجل ماشي وين؟
وبعدين هو دخول الحمام ذي الخروج منه؟
خليك قريب.

[عزيز عيسى]

والله يا أخوى الكبير
الله يديك العافيه
أخدتنا فى رحله جميله فى جو جميل مع ناس سكنوا القلوب

الله يديك العافيه
كمل قول لينا قول
والله يا ود المطامير ما طالبني حليفة
الناس ديل لو قعدت معاهم تتمنى
إنك ما تفارقهم لحظة..
ديل سكنوا قلبي من يوم شفتهم.
الله يجمعني بيهم تاني مرات ومرات.

[عزيز عيسى]

العزيز عزيز
خصمتك بالنبي
كوّل وويكاب وأبغازي ولالوب للحبيب ود الماحي :D
وسلامي للحبايب في مدني ( بالصور )

عمك تنقو وصل؟
يا دا السعد..
أخوي الطيب والله الشوق مطر
وينك ووين أيامك يا راجل..

ود الماحي جايب اللغاويس دي كلها من زمن سفرته
الأولى للسودان ولحدي الآن صاريهم في مخلاية
ويطلع منهن شوية شوية بالملعقة.. وقدر ما حاولت
أسرق لي كولاية ومعاها أبغازي الزول دا ما أداني
فرصة قال لي الكول بديك منه شمومة لكن أبغازي
حلف ما يديني منه.. بعد ما العتي نشفت اليومين ديل
شايفو شاري أبغازي في سلك الغسيل
وحارسه اليوم كله لا كلب ولا كديس ما قادر يصله.

[عزيز عيسى]

في اليوم الأخير لزيارتي نظم الأخوان مشكورين حفل وداع بالنسبة لشخصي أقيم بحدائق كازينو إسطنبول على ضفاف النيل الأزرق.. إستمتعنا فيه بروعة المناظر الخلابة على شاطيء النيل والهواء العليل الذي يشرح الصدر وينعش النفوس.. كان ضمن الحضور الأخوان خالد الصول.. صلاح ود الطاهر.. عوض ودالطاهر.. خالد هاشم.. أبوزيد محمد نور.. أنيس التوم.. وشخصي.. وبعدها حضرت الأخت أسماء محمد شريف.. وتلاها حضور كل من الأخت فدوي الحسن بصحبة شقيقتها وشقيقها خالد.. كانت لحظات لقاء سعيدة جدا وفريدة في نوعها لكن ولظروف شخصية طارئة دعتني الى مغادرة هذا الجو العائلي الجميل الذي جمعني بواحدة من خيرة أبناء وبنات أسرة منتدى ودمدني.. علمت بأن الأخ عوض صقير حضر بعد أن غادرت المكان.. لم أستطع العودة للجلوس مع المجموعة ولكن إتصل بي الأخ أبوزيد محمد نور وأفدته بعدم مقدرتي للعودة ومنها ودعتهم على الهاتف على أمل اللقاء بهم في المستقبل القريب.

http://www4.0zz0.com/2008/01/16/20/956349716.jpg
هذه الصورة في منتزه ومطعم إسطنبول (دار القضاء سابقا)
الوقوف من اليمين أبوزيد محمد نور.. أنيس التوم
الجلوس من اليمين خالد الصول.. صلاح ودالطاهر.. خالد هاشم

http://www4.0zz0.com/2008/01/16/20/688048343.jpg
الوقوف من اليمين صلاح ود الطاهر.. خالد هاشم.. أنيس التوم
الجلوس من اليمين الخواجة عزيز عيسى.. خالد الصول

http://www4.0zz0.com/2008/01/16/21/899286493.jpg
من اليمين عماد أبو رجاء.. أنيس التوم.. عوض ودالطاهر (شقيق صلاح ودالطاهر)

http://www4.0zz0.com/2008/01/16/21/754480383.jpg
خالد هاشم و خالد أبوالحسن (شقيق فدوي أبوالحسن)

http://www4.0zz0.com/2008/01/16/21/227321275.jpg
عماد أبورجاء ولحظة تأمل وإستمتاع بهمبريب النيل المنعش

http://www4.0zz0.com/2008/01/16/21/128721341.jpg
أبوزيد محمد نور يتحدث في الهاتف مع عوض صقير ويقول ياخي إنت وين منتظرنك؟

http://www4.0zz0.com/2008/01/16/21/501624529.jpg
أنيس التوم يضحك مع قفشات صلاح ود الطاهر.

http://www4.0zz0.com/2008/01/16/21/160612266.jpg
خالد هاشم يفكر في مقلب على أبوزيد

[moh_alnour]

* يديك العافية يا خواجة شاشوق والله بالجد أتمنينا لو كنا معاكم
* ويا خواجة عايز أذكرك فك أخرك لأنو ود الريح جاهز
* ما قلت لينا رقصة القرد بالطريقة السودانية ولا الأمريكية
* والله يا خواجة ما عندك مشكلة في الراندوك شكلك كدا خليت عشوشة تفقد المنطق .
* كازينو أسطنبول وكازينو حسن جاد الله يطرشني أول مرة أسمع بيهم . مع أني طلعت 2004م من البلد .

[نزار حسن محمد]

والله تب ماقصرته ياشاشوق..
والشوق شوينى وشقانى ..
حلاة اسمك يا عزيز شاشوق
واصل ..والله حلاة ونسه
ياشاشوق;)

[عزيز عيسى]

الخواجه شاشوق ...وحاة أبكبس سايره عليك ...
غايتو شماراتك كوم وشاشوق دي كوم تاني ...يرضيك ياخواجه تطقش شاي اللبن والكيك تشتتا بشاشوق بتاعتك دي ...بشويش علي شاشوق ...أنا قلته ياربي شاشوق دي علي وزن طايوق ..قلته الخواجه دا إلا رفستو حماره والده عملت ليهو إلتماس في سلوك الطايوق وبقي برّه الشبكه ...
ولاّ أختلط عليهو الاختساس ذي ما قالت مدنيّه شاشوق ...وإتلخبط عليهو الاتي:
مشاققاتي + شلاقة ود المطامير + شقة الادمن الفي منهاتن + شرقة أبشوارب لما شاف الممرضه الهنديه جميله كابور+ شوق الخواجه للسودان + شقلة حلة حسن = شاشوق

ود الماحي

بالله دي عملية تعمليها فيني يا مدنية شاشوق؟
ود الماحي ما خلا ليه كلمة فيها شين وقاف في المنتدى..
وبحلف بشيخه وبقول الإسم ساير عليك يعني ما علي أنا. :D.

ودالماحي شفت الشلاقة ودتني وين؟
دا حالتو عاصير وكيك بس عملن فيني كدا..
ومال لو شربت شاي باللبن في عز النهار كان حصل شنو ماعارف؟
كان أديت ليك إبراهيم إسم شنكل..
لكن شلاقتي أحسن من شلاقة ودالمطامير وشرقة ودأبوشوارب في ود قيحة.
أها هسع جبت لي عشراقة في حلقي.

[عشوشه]

في اليوم الثاني من وصولي كان أول المتصلين الأخت العزيزة الدكتورة مدنية وبعدها الأخت العزيزة فردتي عشوشة.. حددت موعد مع الأخت مدنية وأفدتها بأنني سأحضر الى زيارة منزلهم في مساء اليوم التالي.. وكذلك حددت موعد للقاء الأخت عشوشة..
في صباح ذلك اليوم قررت الذهاب الى مكتب الأخت عشوشة.. وبعد إعطائي الوصف الى كيفية الوصول وصلت الى المكان وكان بصحبتي إثنين من أبناء أخواتي.. كانت عشوشة في إنتظارنا خارج المبني وهي في شوق وترقب شديدين لمقابلتنا.. وبمجرد دخولنا في شارع مبنى المكاتب وبالرغم من إزدحام الناس المارة إستطاعت أن تتعرف على شخصي من بعيد وأتت مسرعة لتستقبلنا أحر إستقبال.. أخذتنا عشوشة الى داخل المبني وجلسنا في غرفة إستقبال الزوار.. وكعادتها كانت إنسانة بشوشة وظريفة وفي غاية الرقة واللطافة.. شربنا الحاجة الباردة وتونسنا معها لبضعة لحظات ضحكنا سويا أعدنا خلالها ذكريات أيام المنتدى الجميلة.. والراندوك فتيتوا ليها من النوع التقيل لغاية ما قعدت تتلفت وتقول يا ربي دا الخواجة ولا واحد شماسي معانا في الخرطوم.. :D
بعد هذا اللقاء السريع ودعت الأخت عشوشة على أمل أن ألتقي بها مرة أخرى قبل مغادرتي السودان.
في ذلك اليوم كان من المفروض أن ألتقي أيضا بالرجل الفنان التشكيلي الأخ بدر الدين محمد وعند إتصالي به عرفت أنه خارج العاصمة في الجزيرة لتقديم واجب العزاء لأحدى أقاربه..

اول شى يا شاشوق حمدلله بالسلامه وبركه الرجعت سالم غانم بعد كل النوايا لقبضك كرهينه باعتبار انك مواطن امريكى فى العالم التالت الناس المفروض تستغل الفرصه وتساوم بيك احتمال كان نبادلك بى سامى الحاج بس للاسف انت جيتنى محروس بى عضوين من العائله وبى كده صعبت على المهمه الاولى الهى اصلا خطفك والمساومه بيك.
اما الخطة التانيه فهى كانت بيعك فى سوق سته وقبض تمك وندعم بيه اى منظمه تطوعيه للحفاظ على ثقافة ولغه الراندوق المهم كل خططى بات بالفشل .
طبعا زيارتك شرفتنى وكانت قصيره وزى ما بقولو الحلو ما يكملش كنت اتمنى انها تكون اطول .
بعدين تعال هنا اى حاجه بارده دى ؟؟؟:confused:
وتعال هنا معقول انت دقست يافرده لما بقيت تهضرب نفسى اعرف شاشوق دى جبتها من وين؟
تانى شى وينو الرندوق الكبيتو لى اتضح لى وحسب خبرتى البسيطه يا عمو انو انت حنكوش وحنكوش جدا لانو لما حاولت معاك كلمتين قعدت تغمز لى;) عشان اولاد اختك ما يفهمو انو خالهم واحد فاره وداقس المهم انا عملت زى ما اشرت لى حفظاً لما وجهك امام الشباب لكن هنا فى البوست ده ح افتك وافتفتك عشان ما تمشى تعمل فيها لى عمو جمال انك غلبت عشوشه راندوقاً.
حسى كدى خلينى اظبط راسى بس السلس وارجع للفت اها يا تلش عاد حضر لى عمو شاشوق المناديل والمويه البارده عشان ح يتجرس من فتى ليه .
ولى عوده................

[عزيز عيسى]

الناس الايام دي دايره مواضيع خفيفة ذي دي
الله يبارك فيك
و بارك الله فيكم يا أخ الجيلي..
أرجو أن يوفقنا الله في تقديم كل ما يسعدكم
ويدخل البهجة والسرور في نفوسكم.
شاكرا مروركم وحضوركم الأنيق.

[عزيز عيسى]

في صباح آخر يوم لي في مدني جاءتني مكالمة هاتفية من الكاملين أدخلت في نفسي البهجة والسرور من طرف مرام وهي عضوة في المنتدى تعرف بإسم Moram تسلم علي وتهنئني فيها بسلامة الوصول وكذلك تهنئني بمناسبة عيد الأضحى المبارك ورحبت بي ترحيب حار جدا.. يا سلام.. والله فرحت جدا لهذه المكالمة الهاتفية حيث أفادتني بأنها وصلت لتوها أيضا من السفر وأنا بدوري أشكرها جزيل الشكر على شعورها النبيل والإهتمام في الإتصال.

[عزيز عيسى]

صحي الواحد فينا بقى طاشي وفاتني أن أذكر هنا لقاء آخر مهم جدا وهو زيارتي لمنزل آل حمدتو..
ما بتذكر أي يوم في أيام العيد زرتهم.. على العموم إتصلت بالأخ نبيل حمدتو وقلت ليه أنا جاي أزوركم في البيت.. الزول فرح شديد وقال لي تلقانا في إنتظارك.. خرجت في العصرية وإصطحبت معي شقيقي الأكبر وإسمه حنين وركبنا الرقشة وذهبنا الى منزل آل حمدتو.. ركوب الرقشة عجبني شديد والعاجبني فيها ممكن تدخل في أي حتة.. أها إستقبلنا الأستاذ عصام حمدتو أبو نبيل وكان بالنسبة لي دي أول مرة أقابل فيها الأخوان نبيل وإيهاب وعندهم أخوهم واحد تاني غتيتوني مسجل في منتدى ودمدني لكن رفض يوريني مسجل بإسم منو في المنتدى.. المهم إستقبلونا إستقبال جميل ورائع جدا وقعدنا نتونس.. طبعا الونسة جرت وجاؤا ضيوف من ناس الحي لتهنئة آل حمدتو بمناسبة عيد الأضحى ويباركوا ليهم بمناسبة الزواج.. شقيقي إتضح إنه بيعرف الجماعة كلهم.. أي ضيف دخل يسلم طلع بيعرفه.. ودي ميزة ينفرد بها ناس مدني.. يعني كلما الناس إجتمعت في مكان ما لازم تجدهم بيتعارفوا مع بعض.. على كل حال الونسة إستمرت والجماعة إبتدؤا يتذكروا لينا ماضي مدني الجميل ويوصفوا إنه المكان الفلاني كان كيف ودا كان كذا وفلان داك أخو مين وقريب مين.. وعييييك.. أنا ونبيل وإيهاب في النهاية وجدنا أنفسنا كمستمعين فقط نلقط ونسجل في قصص الذكريات الجميلة.
على العموم الونسة كانت جميلة ومفيدة في نفس الوقت بالنسبة لنا وإستفدنا منها وعرفنا الكثير عن ماضي ودمدني.. وكما يقال في المثل: الشدر الكبار فيه الصمغ.
ونظرا لزمني الضيق إستأذنت من الأخوان وودعناهم ثم خرجت أنا وشقيقي الكبير من منزل آل حمدتو وتركنا الونسة مستمرة.

[عشوشه]

يا برهوتة صبر يبل الأباري مافي؟
الراندوق فتيتو مع عشوشة..
قلت ليها: شوفي يا حبة ما تعملي لي فيها تفتيحة..
أرخي الأبنص شوية.. وما دوسي للصاجة.
أنا بقلب هوبة في راس دبوس
وبطلع بقد الأبرة
وبرقص داخل سورو وهو مدور..
وبصارع أصغر نملة.
وبرضو عشوشة تقول علي حنكوش وما ناقش حاجة؟
يا عمك أها لقيتني كيف؟

لوشمار حار الصابرن ليها شنو فى شمار بتصبر عليه ؟؟؟:eek:والناس ديل كلهم داقين صيوانتهم وقاعدين يسمعو فى نضميك زى ناس دكان ود البصير
وانت من زمن اللابرى الببلوه حليلك يا الخواجه شاشوق الابارى بقى بتسحن وبقى سريع التحضير(الابرى دى قلبتنى البعرفها يصلحها لى )
بعدين انت يا فرده قاشر بى ابراهيم عشان هو زاتو بقى حنكوش بعد ما ضربو صقط كندا والله جمد لى الراندق بتاعو وبقى حنكوش فى روايه من الروايات . وعمو جمال ما ناقش حاجه بعد ما خلاص قطع رجلو من البلد دى وهجر اهلو لى امريكا والبركه فى حمودى ولدو:p
وحنكشتك من عدمها دى خليها لى بعرف ليها كويس ولومك بى شمارك انتشر انتشار الخير فى ام صفقاً عراض بقى اى زول ناقشك وناقش حنكشتك بس خلينى افضى ليك ويحلك منى الله عاد الا تقول الروب ولا الزبادى وخليك قريب.

[عزيز عيسى]

* يديك العافية يا خواجة شاشوق والله بالجد أتمنينا لو كنا معاكم
* ويا خواجة عايز أذكرك فك أخرك لأنو ود الريح جاهز
* ما قلت لينا رقصة القرد بالطريقة السودانية ولا الأمريكية
* والله يا خواجة ما عندك مشكلة في الراندوك شكلك كدا خليت عشوشة تفقد المنطق .
* كازينو أسطنبول وكازينو حسن جاد الله يطرشني أول مرة أسمع بيهم . مع أني طلعت 2004م من البلد .

هوي يا ود النور.. أنا غايتو فكيت أخرى وذكرت كل شيء قدرت أتذكره..
منتظر ود الريح الشمشرجي يجي يفك باقي الشمار لو هو أصلا عنده شمار..
رقصة القرد دي عندنا هنا في هيوستن شاهدت شباب سودانيين كانوا
بيرقصوها وعجبتني جدا.. وكلما أشاهدهم يرقصوها بموت من الضحك.
يازول عشوشة دي طلعت كيشة وطاير ريشها في الراندوك.. قلت لإبراهيم
أنا بقلب هوبة في راس دبوس.. وأطلع بقد الأبرة..
بالله أخوك مش طلع شماسي تمام في الراندوك..
شوف يا حبة.. كازينو أسطنبول أو مطعم إسطنبول دا على شارع النيل..
زمان كان إسمه (دار القضاء) والآن قلبوه لمطعم سياحي والأكل كله
كباب ودجاج وسلطات بإختلاف أنواعها طاعم شديد.. والمرة الجاية
لو مشيت السودان أنصحك تزور المكان دا علشان تستمتع بتناول الطعام
الشهي وهمبريب النيل الأزرق العجيب.
بالنسبة لكازينو حسن جاد الله.. كما ذكرت المكان في آخر الدرجة وهو
محل لاقامة الحفلات والأعراس.. وتاني ما تطول شديد من البلد
علشان ما تكون مدقس ذي أخوك.

[عزيز عيسى]

والله تب ماقصرته ياشاشوق..
والشوق شوينى وشقانى ..
حلاة اسمك يا عزيز شاشوق
واصل ..والله حلاة ونسه
ياشاشوق;)
أبوسفروق.. شاشوق..
تيمان برغو.. الما بتفرقو. :D
إنت يا أبوسفروق مدنية شاشوق دي لما شربت عندها شاي لبن
في نص النهار عليك الله ما جاتك هضربة؟
بصراحة الكيك كان جميل ولو ما خجلت كان طلبت زيادة..
تفتكر الكيك هو العمل فيني كدا؟

[عزيز عيسى]

اول شى يا شاشوق حمدلله بالسلامه وبركه الرجعت سالم غانم بعد كل النوايا لقبضك كرهينه باعتبار انك مواطن امريكى فى العالم التالت الناس المفروض تستغل الفرصه وتساوم بيك احتمال كان نبادلك بى سامى الحاج بس للاسف انت جيتنى محروس بى عضوين من العائله وبى كده صعبت على المهمه الاولى الهى اصلا خطفك والمساومه بيك.
اما الخطة التانيه فهى كانت بيعك فى سوق سته وقبض تمك وندعم بيه اى منظمه تطوعيه للحفاظ على ثقافة ولغه الراندوق المهم كل خططى بات بالفشل .
طبعا زيارتك شرفتنى وكانت قصيره وزى ما بقولو الحلو ما يكملش كنت اتمنى انها تكون اطول .
بعدين تعال هنا اى حاجه بارده دى ؟؟؟:confused:
وتعال هنا معقول انت دقست يافرده لما بقيت تهضرب نفسى اعرف شاشوق دى جبتها من وين؟
تانى شى وينو الرندوق الكبيتو لى اتضح لى وحسب خبرتى البسيطه يا عمو انو انت حنكوش وحنكوش جدا لانو لما حاولت معاك كلمتين قعدت تغمز لى;) عشان اولاد اختك ما يفهمو انو خالهم واحد فاره وداقس المهم انا عملت زى ما اشرت لى حفظاً لما وجهك امام الشباب لكن هنا فى البوست ده ح افتك وافتفتك عشان ما تمشى تعمل فيها لى عمو جمال انك غلبت عشوشه راندوقاً.
حسى كدى خلينى اظبط راسى بس السلس وارجع للفت اها يا تلش عاد حضر لى عمو شاشوق المناديل والمويه البارده عشان ح يتجرس من فتى ليه .
ولى عوده................

يا جماعة حرام عليكم كل واحد يجي يزرزر فيني.. وأخرتها الحنكوشة عشوشة..
مرة شاشوق ومرة موية باردة.. يا جماعة الحصل لي شنو؟.. وسويت شنو في الدنيا دي؟
يا فردة إنتي قايلاني مدقس؟
يازولة الحمد لله الهربت بجلدي.. قال كان عايزه تقبضني رهينة وتساوم بي قال:
أكان على الأمركان عارفني خواجة (مضروب) علشان كدا إرتاحي من الناحية دي
ما حيهتموا بي كثير.. لكن أقول ليك حاجة الإمركان ديل طالما الشخص بيحمل الجواز
الأمريكي بيعتبر مواطن وما بتقاعسوا أو يتلاعبوا في تقديم الحماية الكاملة له لاقدر
الله إذا حصل له أي مكروه.. يعني بالسوداني الفصيح حتفشلي حتفشلي من الناحية دي
وما حتقدري تمسكيني كرهينة. :D

وبيني وبينك في اللحظة ديك وأنا مدقس كان ممكن تبيعيني في أي برندة من برندات
السوق الأفرنجي ما بتحتاجي تمشي بعيد.. والحمدلله بالراندوك العندي قدرت أفشل
ليك خططك كلها.
يعني الحاجة الباردة دي إلا نجي شايلنها في إيدنا..
يا فردة بعد زيارتي للسودان دي ود الماحي طلع مدقس خالص وكمان بيعتبرني مثله الأعلى
في الراندوك وبيستعين بي لأني بقيت أجدع منه وبتكلم راندوك على أصله شماسي عديل.
وكان عليك إنتي تعالي جيبي الراندوك بتاعك و أنا جاهز لو ما فرجت فيك شماسة السوق
كلهم أبقى أنا ما الخواجة شاشو.. أقصد الخواجة عزيز :D
إنتي أمشي صلحي راسك.. وأنا ماشي أشم لي بنزين وبجيك راجع.

http://www2.0zz0.com/2008/01/17/17/456166984.gif

[عشوشه]

اها يا الخواجه شاشوق براك بتجيبها لى نفسك وتجيب لى روحك الزرزره ده كلو عشان عشان كيكيه بى عصير تخليك تطش شبكة وتفط سطر ؟؟؟؟؟
برى جنس ده ما ادونا ليه:eek:
انا يا عمو اظن راسك خفيف وكيسك فاضى
اكان عمو جمال مقتنع بيك بانو انت شيخو فى الراندق بس عشان الطشاش فى بلد العمى شوف ودحين راندوق بقيت انت شيخو ده طرفى منو سمعتى ومصاريف جماعتى حسى امان سمعونى ناس شمس وزمبا وكاليا بقولو على شنو ؟؟؟؟ اخر الزمن عشوشه تبقى حنكوشه والله ده كركدى وما عرفت لى .
انت بس اقيف بعيد واشخت شخيت وخلى لى ناسو .
وبعد الشخيت تبدا الزرزره الصاح
ولى عوده
بجيب شمارتك وبجى من الخور :D

[moh_alnour]

يا خواجة نصيحة أخوية
* أعمل إنسحاب تكتيكي والله عشوشة دي شكلك كدا ما حتقدر تغلبا في الراندوك
وكان على البنزين السوداني دا ما بعمل ليك أي شيء ، يا حليل زمن البنزين البسطل
* دار القضاء بعرفا بالحيل لكن منتزه حسن جاد الله دا جديد ما حضرتو
تخريمة : أنا حأراجع مستندات ود الريح عشان نشوف دا كل الشمار ولا في حاجة تانية
لأنو بصراحة حكاية شاشوق دي ما جات ساي أكيد وراها إن وأخواتا وبنات عمها .

[Jamal Elmahi]

حسى امان سمعونى ناس شمس وزمبا وكاليا بقولو على شنو ؟؟؟؟ اخر الزمن عشوشه تبقى حنكوشه والله ده كركدى وما عرفت لى .
انت بس اقيف بعيد واشخت شخيت وخلى لى ناسو .
وبعد الشخيت تبدا الزرزره الصاح
ولى عوده
بجيب شمارتك وبجى من الخور :D

فردتي عشوشه المهندمه ما منفوشه
راندوق اصلي بلادو وختري ما بوشه
كبي الراندوق وتقليهو وجهجهي التنبوشه
وأبريهو بري ..بري العضام في الكوشه
عشان يآمن وبطنو تطم وتجيهو دوشه
ويطرش البنزين وشوية الراندوق الملطوشه
فولط عالي يازمبا وكمبا وباله وسحلي وفرفوشه
بجيك صاد جهّزي الكلمنجو والكول والرشوشه ...

[عزيز عيسى]

اها يا الخواجه شاشوق براك بتجيبها لى نفسك وتجيب لى روحك الزرزره ده كلو عشان عشان كيكيه بى عصير تخليك تطش شبكة وتفط سطر ؟؟؟؟؟
برى جنس ده ما ادونا ليه:eek:
انا يا عمو اظن راسك خفيف وكيسك فاضى
اكان عمو جمال مقتنع بيك بانو انت شيخو فى الراندق بس عشان الطشاش فى بلد العمى شوف ودحين راندوق بقيت انت شيخو ده طرفى منو سمعتى ومصاريف جماعتى حسى امان سمعونى ناس شمس وزمبا وكاليا بقولو على شنو ؟؟؟؟ اخر الزمن عشوشه تبقى حنكوشه والله ده كركدى وما عرفت لى .
انت بس اقيف بعيد واشخت شخيت وخلى لى ناسو .
وبعد الشخيت تبدا الزرزره الصاح
ولى عوده
بجيب شمارتك وبجى من الخور :D
هوي يا فردة.. ضحكت لمان دموعي جرن..
معاك حق بعد الشفته في السودان شبكتي قطعت إتصال وشطبت سطور خالص.
الراس مليان وبوزع للجيران.
والكيس معبأ يا حبة
جمال لما مشى السودان حفظ ليه كلمتين وجاء يتفلهم بيهن قدامنا..
لكن أنا مشيت وإتعلمت كوم كلمات وجاي إتفلهم عليه..
والكيشة قدمو وألحقو..
الطشاش فى بلد العمى شوف .
دي أكثر حتة أضحكتني
ودالماحي مطوفش عديل..
ناس شمس وزمبا وكاليا ديل منو؟ شماسة برضو ولا حناكيش؟
بتقولي لي كركدي وما عرفتي ليه؟..
لكن شدة وغسيل عدة.
ويا شاشوق ضيعت الراندوق..
سمعتى ومصاريف جماعتى
دي غلبتيني فيها عدييل.
تلقيني راجيك.. ولو ما طلعتي من الخور بسرعة بجيب معاي لستك أولع فيه النار..
وعلي مسؤوليتك!
لكن لقيتك خطرية.

[عزيز عيسى]

يا خواجة نصيحة أخوية
* أعمل إنسحاب تكتيكي والله عشوشة دي شكلك كدا ما حتقدر تغلبا في الراندوك
وكان على البنزين السوداني دا ما بعمل ليك أي شيء ، يا حليل زمن البنزين البسطل
* دار القضاء بعرفا بالحيل لكن منتزه حسن جاد الله دا جديد ما حضرتو
تخريمة : أنا حأراجع مستندات ود الريح عشان نشوف دا كل الشمار ولا في حاجة تانية
لأنو بصراحة حكاية شاشوق دي ما جات ساي أكيد وراها إن وأخواتا وبنات عمها .

ودالنور أية الله الزرزاري الخرخاري،
إنت لسه بتزرزر فيني مع حكاية شاشوق؟
بيني وبينك الزولة اللي إسمها عشوشة دي خطرية في الراندوق..
وشايف بي شلاقتي دي الله أعلم أقدر عليها..
وأحسن أسمع بنصيحتك وأعمل بطريقة الإنسحاب التكتيكي..
لكن عايزك تساعدني كيف إتخارج منها؟
وبعدين الزول الإسمو ود الريح دا غاطس وين..
لحدي الآن لابد.. ما يظهر يفت باقي الشمار.. :D
كدي ننتظر يجي ود الريح ويحلنا من شاشوق الفضحني دا..

[عزيز عيسى]

فردتي عشوشه المهندمه ما منفوشه
راندوق اصلي بلادو وختري ما بوشه
كبي الراندوق وتقليهو وجهجهي التنبوشه
وأبريهو بري ..بري العضام في الكوشه
عشان يآمن وبطنو تطم وتجيهو دوشه
ويطرش البنزين وشوية الراندوق الملطوشه
فولط عالي يازمبا وكمبا وباله وسحلي وفرفوشه
بجيك صاد جهّزي الكلمنجو والكول والرشوشه ...

إنت بس فالح فيني عامل فيها شاعر..
هسع عاجباك حالتي دي؟
تشيل وتشمت فيني مع عشوشة..
كدي جيب لينا راندوق لو بتقدر.
قال بري العضام في الكوشة قال
هاك الجريو دا :D

[moh_alnour]

* يا خواجة والله حالتك بقت تحنن
زرة الكلب في الطاحونة بي جاي سيد الطاحونة وبي هناك سير الطاحونة .
* ياخي الناس بقولو مارنجان السودان تسعة لغات والعاشرة إبتسامة
يعني مفروض تكب الراندوك دا لعشوشة و ود الماحي ديل لحدي ما يعرفو حاجة .
* قايتو كان ما لقيت ليك طريقة خالص كدا كلم الأدمن خلي يحذف البوست دا .
* شمس وكاليا وزمبة ديل معجنات سودانية ما أكلتهم في منتزه صباح جمب فندق صحاري
ما تفضحنا يا خواجة مع الأجانب الحاجات دي أسأل منها بالرسائل الخاصة
عشان ما تخلي عشوشة تشمت فيك وتقول عليك فارة داقس .
* ود الريح دا علي حظك النحس يا خواجة ساكن جمب القنصلية الأمريكية في جدة
وشماراتو كلها مستندات موثقة من CIA و FBI
يعني بالراندوك كدا فك أخرك وورينا شاشوق دا مشكلتو شنو في الدنيا دي .
تخريمة : أية الله الزرزاري الخرخاري دا الأمام رقم كم ؟
عشان ما يتلخبط علينا الأختساس ( على قول ست الكل مدنية شاشوق )

[admin]

ناس معتز الريح باقي الشمار لمو
وقالوا تحت تحت كدا الزول هرشو
سرعة سرعة لملمو باقي الشمار دسو
قالوا خائف اصحاب الشمار يدقو
جاهو فرمان! اوع الشمار يشمو
من وين ماعارف لكن ارضا جو

[عمر البشير]

الخواجه عزيز الف الحمدلله علي السلامه اها يافرده غايتو بس ارجه الراجيك من ودالصول وكت ينتهي من الامتحانات اصلو بعد ما شاب دخلوهو الكتاب وشوف عيني وسمع اضاني اخوي الكاشف ودالطاهر عندو جنس شمارات بس خليها في حنانك

[عشوشه]

فردتي عشوشه المهندمه ما منفوشه
راندوق اصلي بلادو وختري ما بوشه
كبي الراندوق وتقليهو وجهجهي التنبوشه
وأبريهو بري ..بري العضام في الكوشه
عشان يآمن وبطنو تطم وتجيهو دوشه
ويطرش البنزين وشوية الراندوق الملطوشه
فولط عالي يازمبا وكمبا وباله وسحلي وفرفوشه
بجيك صاد جهّزي الكلمنجو والكول والرشوشه ...
فردتى عمو ود الماحى
جنس شعرك ونثرك انا ما قدرو
عشان لو عرفتو كان الشمار افتو
عربى ولا راندق بنفتو
المهم صاحبك الخواجه شايل كيسو نازل الخرطوم وعامل فيها تفتيحه بس هو ناسى انى انا شايله مفاتيحها
قال فى اخر اتصال بى انو اديه القاموس يشمشم منو عشان ماشى يقشر بيك ويعمل ليك فيها تفتيحه بس اتضح انو ا ناقش اى شى وداقس داقسه الذين اتلحسو
اكان لى الجهزان جاهزين مويه نور بس انت ابقى مارق لى جاى قبل ما يبرد الكلمنجو والكول والرشوشه

[عشوشه]

هوي يا فردة.. ضحكت لمان دموعي جرن..
معاك حق بعد الشفته في السودان شبكتي قطعت إتصال وشطبت سطور خالص.
الراس مليان وبوزع للجيران.
والكيس معبأ يا حبة
جمال لما مشى السودان حفظ ليه كلمتين وجاء يتفلهم بيهن قدامنا..
لكن أنا مشيت وإتعلمت كوم كلمات وجاي إتفلهم عليه..
والكيشة قدمو وألحقو..
الطشاش فى بلد العمى شوف .
دي أكثر حتة أضحكتني
ودالماحي مطوفش عديل..
ناس شمس وزمبا وكاليا ديل منو؟ شماسة برضو ولا حناكيش؟
بتقولاها ي لي كركدي وما عرفتي ليه؟..
لكن شدة وغسيل عدة.
ويا شاشوق ضيعت الراندوق..
سمعتى ومصاريف جماعتى
دي غلبتيني فيها عدييل.
تلقيني راجيك.. ولو ما طلعتي من الخور بسرعة بجيب معاي لستك أولع فيه النار..
وعلي مسؤوليتك!
لكن لقيتك خطرية.

سجمى سا عمو يا شاشوق ما بتعرف زمبه وكاليا وشمس :eek::confused: بالجد انت ما خد الموضوع هوايه ما احتراف
وصدقنى شغل الهواه دة ما باكل عيش وانت ح تعبنا معاك

انا غطاسنى فى الخور فى شان اجيب شمارك بس اديها صنه وبجيك باك ;)

[عماد أبوسالمة]

هسع يعني المعنى زولكم الخواجة دة ما عندوا شغلة بالمغتربين وجرجرتها..
ودحين انا كان ركبت غلط رجعوا لي قروشي يا وليداتي.. أنا أصلي ضيف

[عشوشه]

يا خواجة نصيحة أخوية
* أعمل إنسحاب تكتيكي والله عشوشة دي شكلك كدا ما حتقدر تغلبا في الراندوك
وكان على البنزين السوداني دا ما بعمل ليك أي شيء ، يا حليل زمن البنزين البسطل
* دار القضاء بعرفا بالحيل لكن منتزه حسن جاد الله دا جديد ما حضرتو
تخريمة : أنا حأراجع مستندات ود الريح عشان نشوف دا كل الشمار ولا في حاجة تانية
لأنو بصراحة حكاية شاشوق دي ما جات ساي أكيد وراها إن وأخواتا وبنات عمها .

محمد النور
drwo line and stop behind
يعنى خلينى من الحركات دى الى ينسحب الاتبلبل يعوم يا باشا
يسوط ويجوط الدنيا وتجى تقول لى انسحب خليك محضر خير
اوع يسمعك عمو جمال عشان ح يهجوك شعرا
بعدين انت ماليك لا فى التور ولا فى الطحين لم نعهدك من متعاطى الاندق لا سرا ولا جهرا لذا دع الخبز لخبازه او تعلم الاندق وخذ الدروس على يد ود حلتكم قبل ان يتحنكش ويترك الرندقه

[moh_alnour]

محمد النور
drwo line and stop behind


يعني أشمعنا دي يا عشوشة بالإنجليزي
بالراندوك ( أعمل شخيت وأقيف بعيد )
طبعاً يا عشوشة الراندوك بتاعي متواضع ( بعض من ما عندكم )
لأني ما بعمل ( أب ديت ) للراندوك بتاعي
ود حلتي والله بقى برا الشبكة وكان جاء السودان عايز ليهو دليل سياحي عشان أوريهو معالم البلد

[معتز الريح]

هوي أنا جيت ..
وحارس الخواجه ..

أها .. أقول .. ولا تقول ؟

[Jamal Elmahi]

فردتى عمو ود الماحى
جنس شعرك ونثرك انا ما قدرو
عشان لو عرفتو كان الشمار افتو
عربى ولا راندق بنفتو
المهم صاحبك الخواجه شايل كيسو نازل الخرطوم وعامل فيها تفتيحه بس هو ناسى انى انا شايله مفاتيحها
قال فى اخر اتصال بى انو اديه القاموس يشمشم منو عشان ماشى يقشر بيك ويعمل ليك فيها تفتيحه بس اتضح انو ا ناقش اى شى وداقس داقسه الذين اتلحسو
اكان لى الجهزان جاهزين مويه نور بس انت ابقى مارق لى جاى قبل ما يبرد الكلمنجو والكول والرشوشه

عشوشه كبي لينا الراندوق
خلي الما بشم سلسيون يضوق
والبقوم جاري لحقيهو سفروق
كضم كباتا كرموش كمبا وعروق
شاشي شاشوق شمله وماروق
شمّه شروم شلاقه شبط وشروق
وبجيك صاد بالمعدوم في السوق

[Jamal Elmahi]

هسع يعني المعنى زولكم الخواجة دة ما عندوا شغلة بالمغتربين وجرجرتها..
ودحين انا كان ركبت غلط رجعوا لي قروشي يا وليداتي.. أنا أصلي ضيف

حباب أبو سالمه حبابو ...
مغتربين شنو آآآآعشاي ..تعيش إنتا ...دا خواجه عيونو خدر وجوازو أمريكي أزرق والسودان بدخلو بي فيزه .. والامريكان حارسنو بالستاليت وF 18...أي عنكبه جنكبه عضلات تبش ..يضع سرو في أضعف خلقو ...
إتا ما ضيف آآآبوي إتا صاحب دار ...قرّب تعال ما تبتعد ...

ود الماحي

[عشوشه]

اول شى سلام عمو جمال مساك ولا صباحك خير زى ما دور
شمار اكيد والخبر الاكيد اليه بفتو فى عم شاشوق الداقس
اول عم شاشوق شايل صورتك يروى فيها من طرف قال انت جيت فى بيتو ويقارن بينك بينو وبقول انو انت عمو لانهو و صغيرومسمسم وحنكوش وبينى بيك ماشاءالله عليك;) اشاعات مغرضه منو وعايز يحلى روحو ساى :p
اها نجى لى شمارو مع عدم عرفتو لراندوق الزول ما قانش شى ام رافز يا جاحه شعان نا رفده لقت ام ضورى اتفو نها نات سب دايها نصه رباه يتف حورو .
اها عشان ما ح يفهم شى
شوربفت ياعاربمو شاشوربوق عاربامل فيربيها تفتيربيحه وهوربو ما جاربايب خببر بالحارباصل المهمربم حاربدد مواعيربيد جربيتك واربانا بورييبيك عاربالم الشاربمس الصابرباح
ولربى عوربوده

[moh_alnour]

يا خواجة بالله رأيك شنو في الراندوك دا
لقينا لينا منافس لعشوشة
http://wadmadani.com/vb/showthread.php?p=283411#post283411

[عزيز عيسى]

الصور التالية عجبتني وقمت بإلتقاطها في كل من مدني والخرطوم:
على فكرة كل الصور التي إلتقطتها كانت من داخل السيارة وهي متحركة..
إبراهيم قال لي تصلح مصور فني.
وبقول لإبراهيم: الفن ما في المصوراتي..
ولكن الفن في نوع الكاميرا.


http://www4.0zz0.com/2008/01/20/17/123565862.jpg
ودمدني شارع االنيل.. شارع القبة سابقا
وظهرت لي محبة.. في مدني شارع القبة.. ووووب يا حبيبي..ولو مت ذنبي عليك.
وأنا غيرك ما حبيت يا حبيبي.. ولو مت ذنبي عليك..
والقطر الشالك إنت.. يتكسر حته حته..ووووب يا حبيبي.
في حد فيكم يتذكر الأغنية دي؟

[عزيز عيسى]

http://www4.0zz0.com/2008/01/20/18/595428320.jpg

هذه اللقطة في الخرطوم شارع النيل بالقرب من فندق السودان..
أعجبتني جلسة هذا الرجل على المسطبة وهو في لحظة تأمل وتفكير..
وتبدو جلسة معبرة جدا.
اللقطة هذه جاءت عن طريق الصدفة.. وأساسا ما كنت قاصدها..
كنت قاصد أصور مبنى الفندق البعيد في جهة الخرطوم بحري.

[عزيز عيسى]

http://www4.0zz0.com/2008/01/20/18/987568874.jpg
هذه اللقطة في طلمبة بنزين بالخرطوم جنوب خلف المنطقة الصناعية ..

توقفنا لتعبئة السيارة بالبنزين ولكن اللافتة أعلاه إسترعت إنتباهي..
وكما ترى من اللافتتين مكتوب على إحداهما يوجد وقود..
وعلى الأخرى عفوا لا يوجد وقود.. تناقض عجيب..
ونظرا لعدم وجود طلبة بنزين قريبة من تلك المنطقة إضطررنا الى سؤال
الشخص العامل في الطلمبة لنتأكد من وجود البنزين من عدمه.
أها نوع السيارة المرة دي عرفتها إسمها (أمجاد)..
تعالي يا مدنية صححيني لو كنت غلطان في دي كمان؟

[عزيز عيسى]

لوشمار حار الصابرن ليها شنو فى شمار بتصبر عليه ؟؟؟:eek:والناس ديل كلهم داقين صيوانتهم وقاعدين يسمعو فى نضميك زى ناس دكان ود البصير
وانت من زمن اللابرى الببلوه حليلك يا الخواجه شاشوق الابارى بقى بتسحن وبقى سريع التحضير(الابرى دى قلبتنى البعرفها يصلحها لى )
بعدين انت يا فرده قاشر بى ابراهيم عشان هو زاتو بقى حنكوش بعد ما ضربو صقط كندا والله جمد لى الراندق بتاعو وبقى حنكوش فى روايه من الروايات . وعمو جمال ما ناقش حاجه بعد ما خلاص قطع رجلو من البلد دى وهجر اهلو لى امريكا والبركه فى حمودى ولدو:p
وحنكشتك من عدمها دى خليها لى بعرف ليها كويس ولومك بى شمارك انتشر انتشار الخير فى ام صفقاً عراض بقى اى زول ناقشك وناقش حنكشتك بس خلينى افضى ليك ويحلك منى الله عاد الا تقول الروب ولا الزبادى وخليك قريب.

يا فردة تقولي لي دكان ود البصير..
تصدقي إفتكرتو دكان ودالصول.. :D
إنت يا عشوشة أنا من بداية البوست قبل ما أبدأ البري قلت حجيتكم ما بجيتكم..
يعني الشمار بتاعي جايبو ليكم في شكل حكاوي..
تكتب أبرى بالطريقة دي.. وبعدين تعالي النسعلك والله أبرى يتسحن دي أول مرة أسمع بيها..
معنى ذلك الناس بقت تشرب موية الأبرى وكمان تأكل التفل.. حولا.
إبراهيم دا لما يكون الصقط شديد بيلبد.. وبمجرد ما يلقى ليه دفء بيظهر.
وشايفه متمسك بمبدأ (أحذروا السقط فقد جرس أخاكم برهوتة)..
والراندوق عنده من زمان جمد من شدة البرد.. وبقى حنكون لابس طربوش..
عمو جمال قلت ليك في الراندوق مطوفش وأنا أخير منه كثير..
وعايز أديه دروس عصرية فيه.. بس خليه يجهز الكراس وقلم الرصاص
علشان يكتب ويمسح باللستيكة.
بالنسبة لي أنا غايتو عملت بنصيحة أخوي محمد النور وسجلت إنسحاب تكتيكي..
وشايفك لسة مكاجراني وطالباني أقول الروب أو الزبادي..
ما فيش حاجة وسط؟.

[عزيز عيسى]

* يا خواجة والله حالتك بقت تحنن
زرة الكلب في الطاحونة بي جاي سيد الطاحونة وبي هناك سير الطاحونة .
* ياخي الناس بقولو مارنجان السودان تسعة لغات والعاشرة إبتسامة
يعني مفروض تكب الراندوك دا لعشوشة و ود الماحي ديل لحدي ما يعرفو حاجة .
* قايتو كان ما لقيت ليك طريقة خالص كدا كلم الأدمن خلي يحذف البوست دا .
* شمس وكاليا وزمبة ديل معجنات سودانية ما أكلتهم في منتزه صباح جمب فندق صحاري
ما تفضحنا يا خواجة مع الأجانب الحاجات دي أسأل منها بالرسائل الخاصة
عشان ما تخلي عشوشة تشمت فيك وتقول عليك فارة داقس .
* ود الريح دا علي حظك النحس يا خواجة ساكن جمب القنصلية الأمريكية في جدة
وشماراتو كلها مستندات موثقة من CIA و FBI
يعني بالراندوك كدا فك أخرك وورينا شاشوق دا مشكلتو شنو في الدنيا دي .
تخريمة : أية الله الزرزاري الخرخاري دا الأمام رقم كم ؟
عشان ما يتلخبط علينا الأختساس ( على قول ست الكل مدنية شاشوق )

يا ود النور طيب أسوي شنو.. الفردة عشوشة دي بنظهر معاها
قامت جاتنا نازلة بطولها وعرضها وجايبه لينا من الراندوق التقيل..
يازول أنا عملت بنصيحتك وإنسحبت لكن هي لسه وراي وراي..
إنت مالك غتيت كدا ما تساعد أخوك بشوية راندوك أفتو ليها؟
والأدمن تلقاهو هسع متابع وعاجباه حالتي مع الفردة دي..
سبحان الله شمس وكاليا وزمبة طلعوا معجنات وعلى قولك
والله يطرشني ما سمعت بيهن.. أخوك فارة ومدقس عديل.
تصدق برضو كنت ساكن في عمارة بالقرب من القنصلية الأمريكية
في جده.. ولو ودالريح بقدر يتحصل على ملفاتي خليه يجي
وينكت العندو.. الزول دا حرق روحنا لسه منتظرنه.
وعلشان ما يتلخبط عليك إختساس مدنية..
الزرزاري الخرخاري دا الإمام محمد النور الثالث عشر
حاكم ولاية الجزيرة المخلوع. :D

[عزيز عيسى]

ناس معتز الريح باقي الشمار لمو
وقالوا تحت تحت كدا الزول هرشو
سرعة سرعة لملمو باقي الشمار دسو
قالوا خائف اصحاب الشمار يدقو
جاهو فرمان! اوع الشمار يشمو
من وين ماعارف لكن ارضا جو

إنت بس أقعد أعمل لي فيها المديدة حرقتني..
إن شاء الله تبقى شاعر ذي واحد أخونا
هنا الراندوق غلبو.
حقنة تمرجي ولا شماتة شمشرجي.
ود الريح دا التقول لسه بيسحن في الشمار..
وعايز يجيبو لينا دقاق.
البوبار ولا الشمشار.

[عزيز عيسى]

الخواجه عزيز الف الحمدلله علي السلامه اها يافرده غايتو بس ارجه الراجيك من ودالصول وكت ينتهي من الامتحانات اصلو بعد ما شاب دخلوهو الكتاب وشوف عيني وسمع اضاني اخوي الكاشف ودالطاهر عندو جنس شمارات بس خليها في حنانك
ألحق الحكومة جات؟ عمر البشير بشحمه ولحمه..
أهلا ومرحب بسيادة الرئيس.. وشرفت البوست.
يا ريس يا فردة الجماعة لقوني يتيم وإتلموا علي..
وما تركوا لي جمبة أرقد عليها..
وبصفتك رئيسنا كلنا عايز فزعتك وترسل لي جيش من
شماسة السوق من ذوي الراندوق الفصيح
يجوا يبهدلوا لي الجماعة ديل.. أنا مظلوم يا سيادة الرئيس.
وأرجوك تساعدني.. وبصوت ليك في الإنتخابات الجاية.
والتلميذ خالد ودالصول بعد ما يخلص من طابور النظافة
يجي يلقاني في إنتظاره.
وأستاذ صلاح ود الطاهر كلنا خايفين من سوطو.. أقصد
شماراتو.. ويحلنا منه الحل بله.
غايتو علي جنس شلاقة.. :D

[عزيز عيسى]

سجمى سا عمو يا شاشوق ما بتعرف زمبه وكاليا وشمس :eek::confused: بالجد انت ما خد الموضوع هوايه ما احتراف
وصدقنى شغل الهواه دة ما باكل عيش وانت ح تعبنا معاك

انا غطاسنى فى الخور فى شان اجيب شمارك بس اديها صنه وبجيك باك ;)

والله يا فردة زمبة وكاليا وشمس ديل ماسمعت بيهم خالص..
وفي دي معاك حق أنا مدقس من الناحية دي..
دقسة شاشوق.. الباعوه في السوق.
غايتو شماراتكم دي لو كان ضريتوها في الهواء
كان شميناها هنا في أمريكا.
تجيني باك ولا إستوبر؟.. منتظرك.

[عزيز عيسى]

هسع يعني المعنى زولكم الخواجة دة ما عندوا شغلة بالمغتربين وجرجرتها..
ودحين انا كان ركبت غلط رجعوا لي قروشي يا وليداتي.. أنا أصلي ضيف

شوف يا عمك عماد،
ضيف دي ما معانا..
طالما ركبت معانا في الشمار دا..
لازم تدفع الثمن يعني لازم تدفع..
ما عندك أي حل.
قروش شنو يرجعوها ليك..
كدي أدفع الأول وبعدين طالب بترجيع القروش..
كان مفلس قول: معلم الله يمكن نسامحك..
بس أوعك تحاول تاكلنا حنك. :D

[عزيز عيسى]

هوي أنا جيت ..
وحارس الخواجه ..

أها .. أقول .. ولا تقول ؟

يا فردة كنت قاعد في كنبة الإحتياط..
ويا دوب جيت داخل؟
وحارسني مان تو مان إنت فردة باك؟
شوف يا حبة لو عايز تفتو.. فتو..
والزارعة الله في الشمار بتقوم. :D

[عزيز عيسى]

شاشي شاشوق شمله وماروق
شمّه شروم شلاقه شبط وشروق


كدي يا عشوشة قبل ما تكبي الراندوق
عايزك تشرحي لينا معني كلمة ماروق؟!!!!

[عزيز عيسى]

اها نجى لى شمارو مع عدم عرفتو لراندوق الزول ما قانش شى ام رافز يا جاحه شعان نا رفده لقت ام ضورى اتفو نها نات سب دايها نصه رباه يتف حورو .
اها عشان ما ح يفهم شى
شوربفت ياعاربمو شاشوربوق عاربامل فيربيها تفتيربيحه وهوربو ما جاربايب خببر بالحارباصل المهمربم حاربدد مواعيربيد جربيتك واربانا بورييبيك عاربالم الشاربمس الصابرباح
ولربى عوربوده
يا فردة أنا داقس.. طيب حأشرح ليك كلام الراندوق الكتبتيه وأديني رأيك..
(الزول ما ناقش شيء ما فارز أي حاجة عشان أنا فرده قلت ما ضروري أفتو هنا إنت بس أديها صنة براه يفت روحو.)

شفت يا عمو شاشوق عامل فيها تفتيحة وهو ما جايب خبر بالحاصل المهم...

وبرضو تقولي ما فاهم شيء..

وأنا بقول ليك بوربيبيك عاربالم الشاربمس الصابرباح فاربي عبارزم الظارباهر.

[عزيز عيسى]

يا خواجة بالله رأيك شنو في الراندوك دا
لقينا لينا منافس لعشوشة
http://wadmadani.com/vb/showthread.php?p=283411#post283411

يا ودالنور تصدق شاهدته قبل يومين الراندوق الخطير دا..
وعندي نية أعمل مباراة في الراندوق بين منتخب
بت مدني ومنتخب عشوشة (كسلا).
كدي حدد التاريخ والمواعيد..
وعايزين ثلاثة حكام دوليين.

[ريانية]

حمدالله على السلامة.. والله شماراتك كثيرة..

[عزيز عيسى]

حمدالله على السلامة.. والله شماراتك كثيرة..

شكرا يا ريانية.. وما زلنا في إنتظار ودالريح يأتينا بالمزيد من الشمارات.

[صلاح ودالطاهر]

شكرا يا ريانية.. وما زلنا في إنتظار ودالريح يأتينا بالمزيد من الشمارات.

اولا الف حمدلله علي السلامه معليش جاءت متاخره لانو اخوك يادابو واصل للنت الملح

اها يا خوجه منتظرين باقي الصور يا بنفتو

[عوض صقير]

الخواجة العزيز ... عزيز عيسى

لن ننسى أياماً مضت لن ننسى ذكراها

فعلاً أيام لاتنسى أبداً وكانت أحسن عيدية لنا ... ما أجمل هذه اللحظة وهذا الأحساس

عندما تفتح باب بيتك وتجد هذه الألفة وهذا الأنسجام وهذا التواضع .... المتمثل فى هذه الشخصيات الرائعة بقيادة أخونا شيخ العرب خالد ود الصول وأخونا أخو الأخوان أبوزيد محمد نور وضيوفهم بقيادة المهذب الأنيق عزيز عيسى والراقى أبورجاء والهاش الباش صلاح الطاهر وأخيه ودفعتى عوض الطاهر والكورى المهذب أنيس التوم .... لحظات سعيدة تؤكد مدى أهمية منتدى ودمدنى .... فى تقوية الصلات وخلق مثل هذه الروابط والعلاقات الصادقة .... تبادلنا الحوار والنقاش بلهفة وشوق ومدنية كانت معنا من خلال هاتفها المواصل المتواصل دائماً ... وأنتقلنا بنفس المجموعة لزيارة أخونا خالد هاشم .. وكانت جلسة سمر تحت ضوء القمر بأضافة العضو المميز ود السر .. ومداخلات العزيز الغالى أبوشوارب وأخو الأخوان أبو النيز الهاتفية ... حقيقة أستمتعنا بهم وسعدنا بوجودهم ..... وللحديث بقية

[معتز الريح]

في صورة في بيت أبورجاء ..
وانت كنت بتتكلم على الموبايل ..

السؤال ؟
1. وين الصورة ؟
2. بتتكلم مع منو ؟

[ابراهيم]

في صورة في بيت أبورجاء ..
وانت كنت بتتكلم على الموبايل ..

السؤال ؟
1. وين الصورة ؟
2. بتتكلم مع منو ؟

والله دي شكلها كدة اقوى من بتاعة شاشوق

[صلاح ودالطاهر]

الخواجة العزيز ... عزيز عيسى

لن ننسى أياماً مضت لن ننسى ذكراها

فعلاً أيام لاتنسى أبداً وكانت أحسن عيدية لنا ... ما أجمل هذه اللحظة وهذا الأحساس

عندما تفتح باب بيتك وتجد هذه الألفة وهذا الأنسجام وهذا التواضع .... المتمثل فى هذه الشخصيات الرائعة بقيادة أخونا شيخ العرب خالد ود الصول وأخونا أخو الأخوان أبوزيد محمد نور وضيوفهم بقيادة المهذب الأنيق عزيز عيسى والراقى أبورجاء والهاش الباش صلاح الطاهر وأخيه ودفعتى عوض الطاهر والكورى المهذب أنيس التوم .... لحظات سعيدة تؤكد مدى أهمية منتدى ودمدنى .... فى تقوية الصلات وخلق مثل هذه الروابط والعلاقات الصادقة .... تبادلنا الحوار والنقاش بلهفة وشوق ومدنية كانت معنا من خلال هاتفها المواصل المتواصل دائماً ... وأنتقلنا بنفس المجموعة لزيارة أخونا خالد هاشم .. وكانت جلسة سمر تحت ضوء القمر بأضافة العضو المميز ود السر .. ومداخلات العزيز الغالى أبوشوارب وأخو الأخوان أبو النيز الهاتفية ... حقيقة أستمتعنا بهم وسعدنا بوجودهم ..... وللحديث بقية

الحمد لله يا ود صقير اخوي عوض الذي يكبرني بست سنوات بقه دفعتك كان كده مرتضي حلامابي جدي

[عزيز عيسى]

اولا الف حمدلله علي السلامه معليش جاءت متاخره لانو اخوك يادابو واصل للنت الملح

اها يا خوجه منتظرين باقي الصور يا بنفتو
ود الطاهر أخيرا ظهرت..
يازول مشتاقين شديد حبابك عشرة وبرضو ألف حمد الله على سلامة العودة
وإن شاء الله تكون إستمتعت بباقي الإجازة مع الأهل والأصحاب.

إنا قلت الزول دا تأخر كدا مالو؟..
إفتكرت الكديسة كانت بتديك دروس
ذي واحد أخونا إسمه خالد الصول. :D
ما تورينا النت الملح دا وين؟

http://www6.0zz0.com/2008/01/29/14/269185764.jpg

[عزيز عيسى]

الخواجة العزيز ... عزيز عيسى

لن ننسى أياماً مضت لن ننسى ذكراها

فعلاً أيام لاتنسى أبداً وكانت أحسن عيدية لنا ... ما أجمل هذه اللحظة وهذا الأحساس

..... وللحديث بقية

الزول الجميل جمال الحبيبة ودمدني الإنسان الخلوق عوض صقير،

تحية تقدير وإعزاز ومحبة لكم جميعا..

ما أجمل اللقاء في مدني..
وما أسعد تلك اللحظات التي جمعتنا بكم..
لحظات ستبقى عالقة في الذاكرة والقلب على مر السنين..
لحظات نتمنى أن تتكرر مرات أخرى لنسعد أكثر بلقياكم..
وشكرا للأخ أبوبكر محمد المبارك الذي شيد لنا
هذا المنتدى العملاق وأتاح لنا فرصة التواصل معكم.
ما زلنا في إنتظار بقية الشمارات.


http://www6.0zz0.com/2008/01/29/14/471541324.jpg

[صلاح ودالطاهر]

هوي يا خوجه ما تخلي المكنات دي وما تحاول ترشيني بالصوره كدي نزل صورت الجوال ديك

[عزيز عيسى]

في صورة في بيت أبورجاء ..
وانت كنت بتتكلم على الموبايل ..

السؤال ؟
1. وين الصورة ؟
2. بتتكلم مع منو ؟

أها يا كبير الشمشرجية الذي علمهم الشمشرة.. إنت جيت؟
يا ود الريح لما جينا نتصور إتصلت الكديسة بتاعتي من أمريكا
إتكلمت معاي وعيدت علينا كلنا واحد واحد..
ولما إتكلمت بالسوداني الفصيح الجماعة قعدوا يتلعثموا في الكلام..
كلمات من النوع التقيل..
أها أخير عيدت علي كديستي..
لكن في واحد من الجماعة كان معانا كديسته كانت بترسم ليه في خطط معينة
ولازم ينفذها بحذافيرها.. :D
لو مغالطني كدي أسأل أبوزيد أو ود الطاهر أو أبورجاء بيديوك الشمار..
والله يكضب الشينة.

http://www6.0zz0.com/2008/01/29/15/717245611.jpg

[عزيز عيسى]

والله دي شكلها كدة اقوى من بتاعة شاشوق

إنت يا إبراهيم خلاص بقيت مع الخيانة؟

[صلاح ودالطاهر]

أها يا كبير الشمشرجية الذي علمهم الشمشرة.. إنت جيت؟
يا ود الريح لما جينا نتصور إتصلت الكديسة بتاعتي من أمريكا
إتكلمت معاي وعيدت علينا كلنا واحد واحد..
ولما إتكلمت بالسوداني الفصيح الجماعة قعدوا يتلعثموا في الكلام..
كلمات من النوع التقيل..
أها أخير عيدت علي كديستي..
لكن في واحد من الجماعة كان معانا كديسته كانت بترسم ليه في خطط معينة
ولازم ينفذها بحذافيرها.. :D
لو مغالطني كدي أسأل أبوزيد أو ود الطاهر أو أبورجاء بيديوك الشمار..
والله يكضب الشينة.

http://www6.0zz0.com/2008/01/29/15/717245611.jpg



هوي ياخوجه وين الصوره وانت جالس في الكرسي ولا نفتو

[عزيز عيسى]

يا ود الريح شايف كديستك شيلتك الجنى..
الظاهر رسمت ليك خطة ولازم تتصور مع الولد.
غايتو الليلة الحليب لو خلص من البزة إلا.... :D
أها شيل شيلتك مع الجماعة وخم وصر.

http://www6.0zz0.com/2008/01/29/15/980792167.jpg

[معتز الريح]

ههههههههههههههههههه ..
يا حبيب الولد ده ما شايل بزه ..
في ذمتك ده عمر شراب بزه ..

كدي شوف صلاح ود الطاهر ده عايز شنو منك؟

والصورة القاصدها ليك صلاح دي لمان كنت لابس الجزمة والشراب مع الجلابية؟

[عزيز عيسى]

هوي يا خوجه ما تخلي المكنات دي وما تحاول ترشيني بالصوره كدي نزل صورت الجوال ديك
أها يا ود الطاهر خلاص جيت طوالي تقعد تزرزر فيني؟
طيب شوف الصور تحت دي..
إن شاء الله ياها البتقصدها؟

http://www6.0zz0.com/2008/01/29/15/717458408.jpg

شوف خالد ودالصول مكفكف طرف جلابيته تقول عايز يضبح الخروف.

إيه رأيك في الجماعة الإثنين ديل.. أبوزيد وعوض..
عرفنا عوض كديسته معاه في التلفون..
طيب أبوزيد دا تفتكر كان بتكلم مع كديسته اللي خطبها؟

http://www6.0zz0.com/2008/01/29/15/666804054.jpg


والزول التحت دا بعد كديسته هرشته.. حتى الوقفة مايلة وما قادر يقيف عديل..
هسع تجي الشمشارات مدنية ولا عشوشة ويقولن (كُر عليكم).. :D


http://www6.0zz0.com/2008/01/29/15/379613849.jpg

[عزيز عيسى]

هوي ياخوجه وين الصوره وانت جالس في الكرسي ولا نفتو

يا ود الطاهر ياتو صورة وأنا جالس في الكرسي؟
يازول ما لاقيها.. إنت صورتني ليها؟
كدي تعال فتو راجيك..
دا كلو من الشمشرجي ود الريح..
أنا غايتو العندي كلو فتيتو..
إنتو ما تشحتفوا روح الناس ساي..
تعالوا فتوا.. والكاتل الله والحي الله :D

[عزيز عيسى]

ههههههههههههههههههه ..
يا حبيب الولد ده ما شايل بزه ..
في ذمتك ده عمر شراب بزه ..

كدي شوف صلاح ود الطاهر ده عايز شنو منك؟

والصورة القاصدها ليك صلاح دي لمان كنت لابس الجزمة والشراب مع الجلابية؟

أي واحد بيشوف الصورة بيقول الولد شايل بزة..
يعني عايز تقول لي الولد شايل كمرة وبصور في الجمهور في حفلة القنصلية؟
إنت قايل شمارك ما عندي؟.. قالوا الكديسة أدتك أوامر تغادر الحفل بدري.

ود الطاهر لو عنده صورة خليه يجيبها يورينا ليها..
لظروف طبية ما بقدر ألبس جزمة بدون شراب..
وبعدين ما تنسى أخوك خواجة.. يعني عايز الخواجات يقولوا علي شنو
لما يشوفوني لابس جزمة بدون شراب.. ؟!!! :D

[معتز الريح]

إنت قايل شمارك ما عندي؟.. قالوا الكديسة أدتك أوامر تغادر الحفل بدري؟!!! :D


هههههههههههه .. ما حصل ..



وبعدين ما تنسى أخوك خواجة.. يعني عايز الخواجات يقولوا علي شنو
لما يشوفوني لابس جزمة بدون شراب.. ؟!!! :D


أنا أصلاً ما معترض ..
بس بحدد ليك حالة الصورة ..

وسمع أضاني ..
لو ما صلاح ود الطاهر ..
كان رجعوك أمريكا في يومك داك ..

[عزيز عيسى]

هههههههههههه .. ما حصل ..




أنا أصلاً ما معترض ..
بس بحدد ليك حالة الصورة ..

وسمع أضاني ..
لو ما صلاح ود الطاهر ..
كان رجعوك أمريكا في يومك داك ..

دي صورة تانية وجدتها وبرضو كان في بيت ناس أبورجاء..
أكيد ود الطاهر بيقصد دي..
لكن الجزمة والشرابات ما ظاهرات..
كدي أسأله وداهن وين؟
إحتمال مشيت البيت حفيان وأنا ما جايب خبر!!!
ثم ثانيا ود الطاهر دا الخلاهو يعاين لكداريني شنو؟
عايز يفصل لي مركوب؟
ولا عجبتو الجزمة البرازيلية؟


http://www3.0zz0.com/2008/01/29/18/449180737.jpg

[عزيز عيسى]

لحظات من الفرح والضحك المتواصل.
حديقة روعة.. ومناظر طبيعية خلابة..
همبريب وجو بس خليه ساي..
أسكت وشم.


http://www5.0zz0.com/2008/01/29/20/769720523.jpg

[عزيز عيسى]

http://www5.0zz0.com/2008/01/29/20/687932162.jpg

عماد أبو رجاء.. عوض صقير.. وإبن عوض صقير (نسيت إسمه) الله يحفظه.
الصورة في منزل الأخ عوض صقير.

[عوض صقير]

الحمد لله يا ود صقير اخوي عوض الذي يكبرني بست سنوات بقه دفعتك كان كده مرتضي حلامابي جدي


عوض الطاهر دفعتى يا صلاح .... السؤال : منو الأكبر أنت ولا هو ؟؟؟؟ الأجابة الأكيدة موجودة ولكن بطرف الريس الزعيم صالح أبوشوارب ...

[صالح ابوشوارب]

والله شماراتك يا عزو سكرتنى
اشرب لى جبنة واجيك راجع

[صلاح ودالطاهر]

عوض الطاهر دفعتى يا صلاح .... السؤال : منو الأكبر أنت ولا هو ؟؟؟؟ الأجابة الأكيدة موجودة ولكن بطرف الريس الزعيم صالح أبوشوارب ...

عوض صقير العتب علي النظر يا سعادة المستشار انا قلت ليك اخوي الكبير يعني حيكون الاكبر ود الفتلي

[عزيز عيسى]

عوض الطاهر دفعتى يا صلاح .... السؤال : منو الأكبر أنت ولا هو ؟؟؟؟ الأجابة الأكيدة موجودة ولكن بطرف الريس الزعيم صالح أبوشوارب ...

عمودية صالح أبو شوارب..
أنا عايز لي شهادة تسنين ممكن تستخرجها
يا سعادة الحكيمباشا.. :D

[عزيز عيسى]

والله شماراتك يا عزو سكرتنى
اشرب لى جبنة واجيك راجع

تشرب جبنة تشرب شعير كله ماش يا سعادتك..
ظبط الراس تمام وتعال تلقاني راجيك..
شماراتنا شمومة ساي خلت ودالماحي يعطس..
وإنت بنجيب ليك أم فتت..
ولو سكرتك ما فكت ما تضع اللوم علي.. :D

[صلاح ودالطاهر]

تعرف ياخوجه تمنيت عجلة الزمن ترجع ونجتمع مره اخري بالناس الحلوين ويا لها من ايام كلما تزكرها اندم ندامت الكسعي لانني ما عرفتكم من زمان يا مان...... كم كانت ايام جميله مرت مر السحابه الراحله وهي خالده في الازهان ....وكيفين حالك والامركان ما رقوك بقوك باشكاتب يورينا الله زيادة الراتب.... كيفين حالكم .....اها يا الخواجه نكورك ليكم ما تجو نجيكم تكوركو

[عزيز عيسى]

عوض صقير العتب علي النظر يا سعادة المستشار انا قلت ليك اخوي الكبير يعني حيكون الاكبر ود الفتلي

نخلي الناس تقارن وتحكم وتقول منو الأكبر..
شوف عيني عوض أصغر من صلاح..

http://www3.0zz0.com/2008/01/30/14/280845466.jpg

http://www3.0zz0.com/2008/01/30/14/850652942.jpg

[عزيز عيسى]

تعرف ياخوجه تمنيت عجلة الزمن ترجع ونجتمع مره اخري بالناس الحلوين ويا لها من ايام كلما تزكرها اندم ندامت الكسعي لانني ما عرفتكم من زمان يا مان...... كم كانت ايام جميله مرت مر السحابه الراحله وهي خالده في الازهان ....وكيفين حالك والامركان ما رقوك بقوك باشكاتب يورينا الله زيادة الراتب.... كيفين حالكم .....اها يا الخواجه نكورك ليكم ما تجو نجيكم تكوركو
يا سلام يا ود الطاهر على حلاوة اللقاء
ويا سلام على حلاوتنا ونحنا كلنا بسلامتنا متلمين
تزين قلوبنا روح المحبة مع الدعابة والضحك المتواصل..
لقد فرحت حينما إلتقينا لأول مرة..
وزادت دهشتي وفرحتي حينما إتضح لي بأن أشقاؤنا
يعرفون بعضهم البعض حق المعرفة وبينهم إلفة ومودة شديدة
كانت غائبة عنا نحن بسبب الغربة والإبتعاد عن مدينتنا
الحبيبة.. ورغم قصر المدة التي جمعتنا سويا إلا أن ذكراها
ستبقى في مخيلتنا الى الأبد.
سعدت كثيرا بمعرفتكم عن قرب سائلا المولى عز وجل
أن يجمعنا بكم وبباقي الأخوان الذين لم نلتقي بهم من قبل..

بعد ما رجعت الأمريكان رقوني بقيت باشخواجة..
ما فيش زيادة رواتب علا اليومين ديل منتظرين وصول التاكس ريتيرن
لو ما بتعرفها أسأل ود المأذون بيوريك حلاوتها كيف..
إنت كورك وأنا بكورك والبسمع أخوه بيكورك يجي.. إتفقنا؟

[مدناوية]

والزول التحت دا بعد كديسته هرشته.. حتى الوقفة مايلة وما قادر يقيف عديل..
هسع تجي الشمشارات مدنية ولا عشوشة ويقولن (كُر عليكم).. :D


http://www6.0zz0.com/2008/01/29/15/379613849.jpg





الكديستو بتهرشو ما كعب ياخواجة *** كعب الكديستو بتخربشو


لكن ماشاء الله وتبارك الله
وعيني باردة عليكم
اللمة ماعندكم لكن

إن شاء الله ملمومين في الحرم

[عزيز عيسى]

الكديستو بتهرشو ما كعب ياخواجة *** كعب الكديستو بتخربشو


لكن ماشاء الله وتبارك الله
وعيني باردة عليكم
اللمة ماعندكم لكن

إن شاء الله ملمومين في الحرم


هسع عليك الله يا مدناوية من وقفة الزول الفي الصورة دا
مش تعرفي إنو كديسته هارشاهو ومخاربشاهو؟
اللمة كانت فاقداكم.. وكنت بتمنى باقي الأخوان
والأخوات لو كانوا معانا.

[ابراهيم]

إنت يا إبراهيم خلاص بقيت مع الخيانة؟

لا والله
الله يكفينا شر الخيانة وهزايم غانا
لكن انت ما داير تجيب الشمار كلو وشغال لينا بالدرب "بكسر الدار والراء"
طبعاً يا عزيز امبارح يادوب لقيت المسج
واول امبارح السقط وصل قمته ودرجة الحرارة عملت - 42
الواحد بقى ياكل وما يشبع
غايتو على بال الشتاء يخلص الواحد بكون بقى قدر الريس:D

[مرتضى محمد الحسن]

أها يا ود الطاهر خلاص جيت طوالي تقعد تزرزر فيني؟
طيب شوف الصور تحت دي..
إن شاء الله ياها البتقصدها؟

http://www6.0zz0.com/2008/01/29/15/717458408.jpg

شوف خالد ودالصول مكفكف طرف جلابيته تقول عايز يضبح الخروف.

إيه رأيك في الجماعة الإثنين ديل.. أبوزيد وعوض..
عرفنا عوض كديسته معاه في التلفون..
طيب أبوزيد دا تفتكر كان بتكلم مع كديسته اللي خطبها؟

http://www6.0zz0.com/2008/01/29/15/666804054.jpg


والزول التحت دا بعد كديسته هرشته.. حتى الوقفة مايلة وما قادر يقيف عديل..
هسع تجي الشمشارات مدنية ولا عشوشة ويقولن (كُر عليكم).. :D


http://www6.0zz0.com/2008/01/29/15/379613849.jpg
الاخ عزيز عيسى عايز اسال بس دى صورة مسجد انصار السنة بحلة حسن ولاوين. وبعدين انت ماعندك اصحاب بحلة حسن ولا شنو عشان عايزين شمارت.
انا ساكن حلة حسن - حى الجعليين -جوار دكان الطيب بريمو.
عايزين نتعرف ممكن؟

[صالح ابوشوارب]

اولا يا عزو نحن اولادنا ما بيشربو بالبزة
عندك الله جابو من يوم ولدتو امو رسلناهو ليكم .. لانو حردان من شراب الكوز ..
قال نمشو لي ناس عمى عزيز وعمى ود الماحي اصلا مشتهين الشفع وعايزين يلولو ويعبو البزة .. قال لينا فكونى من الكيزان
...
كيف عامل معاكم الله جابو ؟

[معتز الريح]

اولا يا عزو نحن اولادنا ما بيشربو بالبزة
عندك الله جابو من يوم ولدتو امو رسلناهو ليكم .. لانو حردان من شراب الكوز ..
قال نمشو لي ناس عمى عزيز وعمى ود الماحي اصلا مشتهين الشفع وعايزين يلولو ويعبو البزة .. قال لينا فكونى من الكيزان
...
كيف عامل معاكم الله جابو ؟


ههههههههه ..
الضربة القاضية الفنية ..
دي ضربة واحدة رمت اتنين ..

كفاه(م) الحبايب ديل ..

[moh_alnour]

ههههههههههههههههه
دي في الأنكل عديل كدا يا ريس أبو شوارب
صمت دهراً عن البوست ونطق كفراً

[مدناوية]

هسع عليك الله يا مدناوية من وقفة الزول الفي الصورة دا
مش تعرفي إنو كديسته هارشاهو ومخاربشاهو؟
اللمة كانت فاقداكم.. وكنت بتمنى باقي الأخوان
والأخوات لو كانوا معانا.






السياسة ما حقتنا !!!!!!!

[صالح ابوشوارب]

ياعزيز وين انت
جيب لى الله جابو

[صلاح ودالطاهر]

ياعزيز وين انت


جيب لى الله جابو



تعرف يا ريس ذولك كبه الجاز

[عزيز عيسى]

لا والله
الله يكفينا شر الخيانة وهزايم غانا
لكن انت ما داير تجيب الشمار كلو وشغال لينا بالدرب "بكسر الدار والراء"
طبعاً يا عزيز امبارح يادوب لقيت المسج
واول امبارح السقط وصل قمته ودرجة الحرارة عملت - 42
الواحد بقى ياكل وما يشبع
غايتو على بال الشتاء يخلص الواحد بكون بقى قدر الريس:D
أنا ذاتي يا برهوته قلت تلفونكم دا مالو بقطع تن تتن تتتتن..
أتاريهو من شدة البرد.
الريس قال ماشي السودان يمتحن للماجستير..
غايتو أنا لو الموجه المسؤول بديه ليك أول حاجة
تمارين جري يلف حول جامعة الجزيرة خمستاشر مرة
على الأقل وبعد داك أجيبو إمتحنو.
لما شفت صورته مع عماد أبو رجاء والعضة قدامهم
قلبي حن على أخوي عماد.
تفتكر نصيبه كم قطعة من الفي الصحن؟ :D
كدي خمن معاي يا ربي دي زلابية ولا كيك؟
والله صلعة الريس فيها حلاة فلقة بالحجر!! :D


http://www6.0zz0.com/2008/02/05/16/326754895.jpg

[عزيز عيسى]

الاخ عزيز عيسى عايز اسال بس دى صورة مسجد انصار السنة بحلة حسن ولاوين. وبعدين انت ماعندك اصحاب بحلة حسن ولا شنو عشان عايزين شمارت.
انا ساكن حلة حسن - حى الجعليين -جوار دكان الطيب بريمو.
عايزين نتعرف ممكن؟
العزيز مرتضى محمد الحسن،

يازول مرحب بيك والله لي الشرف إني إتعرف عليك..
أولا بالنسبة للمسجد والله ما عندي فكرة لأنو أخوك
كان مدقس الوقت كله والجماعة سايقني من زقاق لي
زقاق يعني مباريهم.. وإنت عارف (البباري الجداد بوديهو الكوشة)..:D
كدي أسأل عماد أبورجاء لأنه مقدد الحلة كلها..
والمسجد دا لصق بيتهم الهيطة بالهيطة.
ثانيا والله حلة حسن دي عندي فيها أصحاب كثير
لو قعدت أحسب ليك لي بكرة ما حأخلص.. ياخي
ديل أهل.. أها أمسك أديك جزء منهم من أول حلة
حسن ناس صلاح وبابكر الحاج بخيت.. كمال ومعتصم بشير
وعبدالمنعم حسن مرحوم.. وأولاد أبوريد صلاح وعماد..
أولاد دبلوك بسلامتهم.. أولاد النجومي.. الرشيد نوبة.. أولاد جرجوري..
أبو جرفل.. الباقر عبدالواحد.. حسبو.. أولاد فضل منهم حسن وحسين..
أولاد رحمة الله محمد (النعير) وصلاح وكمال كزو.. أولاد الهادي عباس وعادل
وعصام وأمير.. حسن والتاج بشير.. هاشم قرعان.. يازول القائمة تطول..
على كل حال أخواني حنين وصلاح (عكاري) وراشد (الدحيش)..
الطيب بريمو دا في حد ما بيعرفه.. آخر مرة إلتقيت به
عندما حضرت للسودان في عام 2000 وبمجرد وصولي
الى مارنجان سمعت بنبأ وفاة والده وعلى طول ذهبت عزيته في الفراش.

[عزيز عيسى]

اولا يا عزو نحن اولادنا ما بيشربو بالبزة
عندك الله جابو من يوم ولدتو امو رسلناهو ليكم .. لانو حردان من شراب الكوز ..
قال نمشو لي ناس عمى عزيز وعمى ود الماحي اصلا مشتهين الشفع وعايزين يلولو ويعبو البزة .. قال لينا فكونى من الكيزان
...
كيف عامل معاكم الله جابو ؟

لكن ما تقول لي الله جابو طلع كوز كبير.. http://www6.0zz0.com/2008/02/05/19/928470110.gif

إيه رأيك في حاجة كولن كولن دي؟
تفتكر الطريقة دي تنفع مع الله جابو؟

http://www6.0zz0.com/2008/02/05/19/519533207.jpg

[عزيز عيسى]

ههههههههه ..
الضربة القاضية الفنية ..
دي ضربة واحدة رمت اتنين ..

كفاه(م) الحبايب ديل ..

إنت يا ود الريح عرفنا الله جابو شايل كوز ولا قرعة ما عارف..
إنت ولدك دا شايل شنو ما قلت لينا؟!!
شنطة الولد قالوا نسيتها في القنصلية تحت الكرسي ومشيت. :D

[عزيز عيسى]

ههههههههههههههههه
دي في الأنكل عديل كدا يا ريس أبو شوارب
صمت دهراً عن البوست ونطق كفراً
إنت يا ود النور برضك إنضميت للخيانة؟
أكان كدي أمشي أجيب صحب البطل ود الماحي
ونشوف أخرتها معاكم..

[عزيز عيسى]

قبل أن أعود الى الخرطوم أنا ومعاي إثنين من أخواني إستأجرنا سيارة تاكسي
ومشينا على الحصاحيصا ونزلنا في شارع الظلط قدام بنطون رفاعة..
نزلنا وقطعنا الشارع ومشينا في إتجاه البنطون.. والجو كان جميل للغاية..
هواء البحر (النيل) ضارب في كل مكان.. والناس لسه معيدة..
في البداية وجدنا صعوبة في المشي لأنه (القريرة) كانت كثيرة..
وصراحة أخوكم الخواجة كان قاشر ولابس لا مؤاخذة جزمة سوداء..
وحكاية القريرة دي مرقت لي من راسي كله ما إتذكرتها..
إتذكرها كيف وأنا طول الوقت مدقس.. وما عارف نفسي ماشي وين..
غايتو ركبنا البنطون وعاينت لجزماتي لقيتن غبش خلاس من الترابة..
بعد شوية إتحرك البنطون وجانا واحد (كمساري البنطون) يخلص في القروش..
قلت ليه النفر كم يا عمك؟.. قال 500 جنيه للراس الواحد.. أقصد للفرد الواحد..
لما قال لي 500 جنيه سرحت على طول وقلت في نفسي بالله زمان الواحد كان
راتبه 120 جنيه فقط.. عايش بيهن مبسوط.. ماكل.. شارب.. ومتفسح في
الخرتوم ليل نهار.. ويشتري في الهدايا لأهله ويدفع منهن حق السفر ببصات
الجزيرة ماشي وجاي.. ويقعد ليه يومين ويرجع تاني.. وبعد دا كمان يوفر
مبلغ محترم جدا.. هسع الزول دا يقوم يقول ليك ركوب البنطون 500 جنيه؟..
وكمان في إتجاه واحد.. والله الزمن إتغير كثير..
كدي خلونا من آحلام ظلوط دي وخلونا نرجع لموضوعنا..
أها لما البنطون وصل بينا نص البحر كنت واقف إتلفت يمين وشمال وأعاين زي الككو
الرايحة ليه موزة.. مناظر خلابة.. خضرة على ضفاف النيل.. وصوت الموج يتلاطم
على جنبات البنطون يخلي الواحد يقرب يقول شعر ويلحنه ويغنيه للركاب.
من بعيد قدرت أخذ صورة لعلب أعمدة كبري رفاعة الجديد قلت أجيبها لصحبي
ود الماحي يمتع نظره بيها.. ويبرد حشاه لغاية ما الله يجيبه البلد في الصيف..


http://www6.0zz0.com/2008/02/05/20/595385579.jpg

[عزيز عيسى]

يا جماعة الواحد فينا خلاص أظنه خرف.. نسيت أقول ليكم ليه ركبت البنطون وماشي وين..
يا جماعة أنا ماشي أزور أهل ود الماحي في الجنيد الحلة وطالما جابني الطريق لمدني لازم أمشي
وأسلم عليهم.. في خلال ظرف أقل من 10 دقائق البنطون وصل بينا الضفة الشرقية من البحر..
وتلب قمت أخذت لي شبحة ونطيط نزلت تاني في القريرة وقلت يا زول خربانة خربانة.
لما طلعنا فوق القيفة وجدنا زحمة عربات وناس عايزين يعبروا لجهة الغرب.. إستأجرنا تاني
تاكسي المرة دي نقشتها إسمها (أتوس).. صاحب التاكسي قال لينا ماشين ياتو حته..
قلت ليهو ماشين الجنيد الحلة.. الراجل طوالي قال لينا ماشين لي ناس منو.. في ود فلاني عرس..
وبت فلاني عرسوها.. وما تعرف ود مين طهروا.. أدانا شريط أخباري كامل عن المنطقة..
قمت قاطعته قلت ليهو أنحنا ماشين لي بيت ناس بكري الماحي.. الراجل قال لي بكري أخو جمال؟..
قلت أي بتعرفه؟.. قال لي: كيف ما بعرفه دا أنحنا أهل ويبقى لي في النسب.... قمت تاني قاطعته
قلت ليه كدي خلينا من حكاية النسب دي هسع طريق الزلط دا بيوصل لغاية الجنيد؟..
قال لي: بيوصل قريب الجنيد الحلة.. قلت ليهو: طيب بتعرف بيت ناس جمال؟
قعد يحك راسه.. وقال: والله المدة طالت لكن لو سألنا أي واحد في طرف الحلة بيورينا بيتهم
وين.. وفعلا لما وصلنا الجنيد الحلة لقينا بالقرب من الصهريج سيارة تاكسي برضو من ماركة
أتوس واقفة وبداخلها عريس مرصع بالجرتق والحنة وريحة الضريرة تقول يا ليل تشمها من بعيد..
ولأنه الملامح شوية أتغيرت وما قدرنا نعرف الطريق لذلك قمنا سألنا الجماعة مع العريس عن بيت
ناس جمال الماحي.. قالوا لينا الشارع دا بيوديكم طوالي على بيتهم أمشوا ما بتروحوا وفعلا وجدنا
البيت ودقينا الباب فتح لينا بكري أخو جمال وعلى طول عرفني وبدأ يسلم علي سلام شديد
وسلمنا على باقي الاهل..
قعدنا حوالي 15 دقيقة فقط وبعدها طلبت من الأخ بكري يسمح لينا نمشي طبعا فكانا بعد
خراج روح الزول كان مصر لازم نتغدي ونقيل باقي اليوم معاهم.
المهم رجعنا وركبنا البنطون وعدنا الى الحصاحيصا بعد أن قضينا يوم جميل.

http://www6.0zz0.com/2008/02/05/21/218851926.jpg

[moh_alnour]

كدي يا خواجة أول شيء ورينا البطل منو
والخيانة منو
عشان ما يتلخبط علينا الأختساس

[صلاح ودالطاهر]

لكن ما تقول لي الله جابو طلع كوز كبير.. http://www6.0zz0.com/2008/02/05/19/928470110.gif

إيه رأيك في حاجة كولن كولن دي؟
تفتكر الطريقة دي تنفع مع الله جابو؟

http://www6.0zz0.com/2008/02/05/19/519533207.jpg

تعرفي ياخواجه خوفي من كدايس الخواجات يكونن ذي كديسة الزول ده وربنا يكضب الشينه ويا حليلك يا الخواجه ويا حليلك ياود الماحي امريكه تطير وتقع في البير

[ريانية]

هههههههههههههه والله لكن الصورة موتتني من الضحك..
ويا اخوي عزيز والله ماشاءلله صحي شمارات منزيارتك بس كدي كمل لينا الحصل بعد
ما طلعتوا من بيت ود الماحي اذا كان في باقي.. بس اسمعني عليك الله
جزمتك دي حصل ليها شنو بعد ما لفيت؟؟؟؟؟؟

[Jamal Elmahi]

اولا يا عزو نحن اولادنا ما بيشربو بالبزة
عندك الله جابو من يوم ولدتو امو رسلناهو ليكم .. لانو حردان من شراب الكوز ..
قال نمشو لي ناس عمى عزيز وعمى ود الماحي اصلا مشتهين الشفع وعايزين يلولو ويعبو البزة .. قال لينا فكونى من الكيزان
...
كيف عامل معاكم الله جابو ؟

حباب الله جابو وحباب أبو الله جابو وحباب كيزانكم ...الكيزان عندكم لكن ...
والله يا أبو الله جابو صدقته إننا مشتهين الشفّع..وفي الشفع مشتهين الله جابو ...بس الكوز يختانا بجيب لينا الهبايب ويقولو إرهابي ...أستلفو ليهو بزّه مؤقته من ناس ود الريح ...

[Jamal Elmahi]

يا جماعة الواحد فينا خلاص أظنه خرف.. نسيت أقول ليكم ليه ركبت البنطون وماشي وين..
يا جماعة أنا ماشي أزور أهل ود الماحي في الجنيد الحلة وطالما جابني الطريق لمدني لازم أمشي
وأسلم عليهم.. في خلال ظرف أقل من 10 دقائق البنطون وصل بينا الضفة الشرقية من البحر..
وتلب قمت أخذت لي شبحة ونطيط نزلت تاني في القريرة وقلت يا زول خربانة خربانة.
.

http://www6.0zz0.com/2008/02/05/21/218851926.jpg

ناس خايفه علي الجزمه من القريره وناس خايفه علي القريره من الجزمه ...ناس خايفه الجزمه تغتس في القريره وناس كايسه تغتس حدّها الباطوس في القريره ...ومابتدي حريف..
ياخواجه حنصرف ليك بدلات ...بدل جزمه ..بدل كتاحه ..بدل عنكشه في المواصلات ..بدل مدافرة الحمير والغنم في البنطون ..بدل قريره ..بدل دقداق ..
مشاققه ...
هو مش كويس البنطون ما طوّح بيك مرقك في الهجيليج ...ولاّ غريقانه ...
المرّه الجايه حتقطع لينا بالكبري والجزمه شوقا للقريره تاني ...
بجيك صاد بعد ما أسف لي سفة قريره ..ولاّ أمضغ لي سارة بحر ...

ود الماحي

[hadi salih]

اخوناعزيز كيفنك تعرف لو كان قلت لى انك ماشى الجنيد كان جيهتك تب ورسمت ليك خريطة من غير ما توسخ جزمتك

[عزيز عيسى]

كدي يا خواجة أول شيء ورينا البطل منو
والخيانة منو
عشان ما يتلخبط علينا الأختساس

يا محمد نور.. يا محمد نور الحكاية شنو؟
ياخي البطل الخواجة.. ومشيت جبت صاحبي وجيتكم..
يعني ما عارف الخيانة منو؟..
الخيانة هم أي واحد ماسك ليهو طفل معاهو
بزة أو أبوه أداهو كوز علشان يسكتو..

[عزيز عيسى]

تعرفي ياخواجه خوفي من كدايس الخواجات يكونن ذي كديسة الزول ده وربنا يكضب الشينه ويا حليلك يا الخواجه ويا حليلك ياود الماحي امريكه تطير وتقع في البير
ود الطاهر الحمد لله المرحلة دي عديناها زمان..
وهسع أولادنا بقوا يصارعونا ويدقوا بينا الواطة.
غايتو خوف ساكت قاعدين بصمة خشمنا.
وأخينا الشايل الطفل دا تلقى ولده قال ليهو: تشيلني في ضهرك
ولا أقوم إتصل بالرقم 911 (رقم الطواريء عندنا).

[عزيز عيسى]

السياسة ما حقتنا !!!!!!!


يعني يا مدناوية حقت منو؟

[عزيز عيسى]

ياعزيز وين انت
جيب لى الله جابو
أنا موجود يا ود أبوشوارب..
لكن إنت بتمشي وين؟
بتظهر مرة وتختفي مرة..
الله جابو رابطتك؟ :D

[عزيز عيسى]

بس اسمعني عليك الله
جزمتك دي حصل ليها شنو بعد ما لفيت؟؟؟؟؟؟
إنت يا ريانية مالك شمشرجية كدا..
جزمتي في كراعي برضو ملاحقنها؟
بوريك سر ما توريه لود الماحي..
قلت لبكري أخوه أديني فنيلة ولا قميص
من حقات جمال الفي الدولاب ألمع بيهن
جزمتي.. مشى عزل لي أحسن قميص
وجابوا لي.

[عزيز عيسى]

تعرف يا ريس ذولك كبه الجاز
كب الجاز؟.. لا كب القهوة.

[عزيز عيسى]

ياخواجه حنصرف ليك بدلات ...بدل جزمه ..بدل كتاحه ..بدل عنكشه في المواصلات ..بدل مدافرة الحمير والغنم في البنطون ..بدل قريره ..بدل دقداق ..
مشاققه ...
هو مش كويس البنطون ما طوّح بيك مرقك في الهجيليج ...ولاّ غريقانه ...
المرّه الجايه حتقطع لينا بالكبري والجزمه شوقا للقريره تاني ...
بجيك صاد بعد ما أسف لي سفة قريره ..ولاّ أمضغ لي سارة بحر ...

ود الماحي


حباب ود الماحي.. حبابك يا الزين..
إنت عارف يا ودالماحي أنا عايز بدل مشاققة وبس..
والجزمة تطير تقع في البير على قول ود الطاهر.
طيب عرفنا المرة الجاية لو مشينا وقطعنا بالكبري
أها الدقداق والكتاحة نسوي ليهم شنو؟
الهجليج سمعت بيها قبل كدة لكن ما عارفها وين؟؟
غريقانة دي غرقانة وين.. أقصد محلها وين؟
ولسه فيها ناس؟

[عزيز عيسى]

اخوناعزيز كيفنك تعرف لو كان قلت لى انك ماشى الجنيد كان جيهتك تب ورسمت ليك خريطة من غير ما توسخ جزمتك

عبدالهادي كدي أولا بالتبادي خلينا نرحب بيك
ونعرف الجماعة بيك.. وبنقول ليك أهلا بيك
في دارك بين أخوانك وأخواتك..
ونبارك ليك الجنسية الأمريكية..
إنت قايل أخبارك ما عندنا؟

بالمناسبة يا جماعة عبدالهادي دا من مدني
وساكن حي الدرجة ومعانا هنا في هيوستن
متابع المنتدى من قولة تيت ويا دوب أقتنع
وسجل. أها الزول دا قريب ناس حمدتو.

طيب يا عبدالهادي إنت وكت عارف ليك دريبات
تانية توصلني للجنيد مالك ما دليتني عليها..
هسع يرضيك جزمتي تتعكنن بالقريرة وتخرب
ولو ما جبتها معاي هنا وعملت ليها عملية
تجميل كان الكوش ما ترضى بيها.

[moh_alnour]

يا محمد نور.. يا محمد نور الحكاية شنو؟
ياخي البطل الخواجة.. ومشيت جبت صاحبي وجيتكم..
يعني ما عارف الخيانة منو؟..
الخيانة هم أي واحد ماسك ليهو طفل معاهو
بزة أو أبوه أداهو كوز علشان يسكتو..

وضح أكتر يا خواجة
أنا مرات فهمي تقيل

[Jamal Elmahi]

اخوناعزيز كيفنك تعرف لو كان قلت لى انك ماشى الجنيد كان جيهتك تب ورسمت ليك خريطة من غير ما توسخ جزمتك

أبوصفيّه ...زارتنا الملايكه وحلت علينا البركه ..
أها آآآآبوي أنا ماشي الجنيد في الصيف النبي عليك كان ما جيهته أخوك ..النعمنو القريره بتهيّج علي الدبس وبتوّر علي خمّة النفس وبتذيد لي العشراقه وبتقطع لي شرشوفي ...أخوك ما داقس زي الخواجه أنا بنزل البنطون ونعلاتي في يدي والقريره يسمها في كبكي ...أما الدقداق عضلات تبش ...

[صلاح ودالطاهر]

اها دي هدية لكل الحبان
http://www.youtube.com/watch?v=uXJ2APYznZg&feature=related

[عزيز عيسى]

وضح أكتر يا خواجة
أنا مرات فهمي تقيل
ود النور أمشي فتش على الصور وشوف ليك
أي طفل ماسك ليهو بزة أو كوز أعرف أبوه
منو وبعدين تعال قول لي أساميهم.
بس أعمل حسابك أوعك تشيل واحد فيهم
بعد شوية بيقولوا ليك تعال لولي معانا.

[hadi salih]

اخونا عزيز مشكور على الترحيب وقلنا كمان اكان مابقينا خواجات زيكم مابنسجل فى المنتدى وهاردلك للجزمة واخونا الغالى ودالماحى على الطناش بيعوضا ليك بى مركوب نمر سودانى اصيل مابرازيلى بس عليك الله البسه من غير شراب هههههه
ودالماحى اخوى ازيك والله مشتاقين خبر جميل والله نزولك للسودان بس المرة دى معاك الحجل بالرجل والكرسى جنب الكرسى ده قرار حكومى ولازم نطبقه مش زى المرة الفاتت تدقسنى ومااشوفك الا فى دالاس ههههههه

[نزار حسن محمد]

هووووووى ناس الصقط ازيكم
شافكم جايبين سيرة اهل الكرم
ناس الجنيد وسكر الجنيد
حرآآآم ياخوجه ناس حلوين
جنس حلوه ... لكن الله استر عليهم
من الكبرى الجديد ..انا خايف
على ود الماحى كل يوم بجى
اجكس فى البندر ..

[نزار حسن محمد]

هووووووى ناس الصقط ازيكم
شايفكم جايبين سيرة اهل الكرم
ناس الجنيد وسكر الجنيد
حرآآآم ياخوجه ناس حلوين
جنس حلوه ... لكن الله استر عليهم
من الكبرى الجديد ..انا خايف
على ود الماحى كل يوم بجى
اجكس فى البندر ..
كدى بس اصبرو لى
بس ساحل العاج تغلب مصر
وبجيكم بى مزاج

[عزيز عيسى]

اها دي هدية لكل الحبان
http://www.youtube.com/watch?v=uXJ2APYznZg&feature=related
يا سلام عليك يا ود الطاهر.. هدية جميلة جدا..
وأتاريك ما عندك عوجه بتعرف تختار أغاني لقطة..
إنت عارف الطيب وداعة دا صوته بيذكرني بالفنان
محمد كرم الله.. ولو جعل فاصل لعزف الطمبور
ْوخلا الجماعة خلفه يرقصوا الدليب كما كان يفعل
الفنان الراحل النعام آدم لزادت من روعة الأغنية.

[عزيز عيسى]

اخونا عزيز مشكور على الترحيب وقلنا كمان اكان مابقينا خواجات زيكم مابنسجل فى المنتدى وهاردلك للجزمة واخونا الغالى ودالماحى على الطناش بيعوضا ليك بى مركوب نمر سودانى اصيل مابرازيلى بس عليك الله البسه من غير شراب هههههه

ما تجي تغرمها لي أنت بالنيابة عن ود الماحي..
يعني هسع عايزني أقعد حفيان لغاية ما يرجع ودالماحي
من الجنيد..
لاحول يا جماعة حرام عليكم دي جزمة ما مركوب ولازم ألبسها بالشراب..
لما كنت في السعودية معانا أخ سوداني جاء المكتب لابس ليهو مركوب
من النوع المخطط مربعات.. الجماعة السعوديين معانا في المكتب كانوا
بيعاينوا لمركوب أخونا السوداني ويضحكوا قالوا تعالوا شوفوا الزول
السوداني اليوم جانا لابس موكيت..
أها إن شاء الله تبقى عليك يا أبوصفية. :D

[عزيز عيسى]

هووووووى ناس الصقط ازيكم
شايفكم جايبين سيرة اهل الكرم

عليك الله يا أبو سفروق الضاربو سقط منو فينا..
إنت الظاهر السقط من شدته خلاك تنزل الموضوع مرتين.:D

[Jamal Elmahi]

اخونا عزيز مشكور على الترحيب وقلنا كمان اكان مابقينا خواجات زيكم مابنسجل فى المنتدى وهاردلك للجزمة واخونا الغالى ودالماحى على الطناش بيعوضا ليك بى مركوب نمر سودانى اصيل مابرازيلى بس عليك الله البسه من غير شراب هههههه
ودالماحى اخوى ازيك والله مشتاقين خبر جميل والله نزولك للسودان بس المرة دى معاك الحجل بالرجل والكرسى جنب الكرسى ده قرار حكومى ولازم نطبقه مش زى المرة الفاتت تدقسنى ومااشوفك الا فى دالاس ههههههه

أبوصفيّه ليك سلام وألف تحيّه
بخيت وسعيد آآآعشاي الجنسيه
تربي في عزّك وبكره تجيب صفيه
وتكفيك بهدله المطارات والعواطليه
وأنا راجيك الحجل بالرجل بالخليجيه
مدني كنانه الجنيد الخرتوم والقدمبليه
والعرجه لي مراحا آآآلخيرأبو البنيّه

ود الماحي

[ابراهيم]

عليك الله يا أبو سفروق الضاربو سقط منو فينا..
إنت الظاهر السقط من شدته خلاك تنزل الموضوع مرتين.:D


ابو سفروق شابكنا ناس السقط ناس السقط
انت عارف يا عزيز صاحبك شكلو كدة ايام روسيا كان معذب شديد
لكن هناك عندهم حلول ومقترحات اقوى:D