خفيف خفة !!! .. [الأرشيف] - منتديات ودمدني

خالد النور

22-11-2007, 01:27 AM

إتصال غلط على الموبايل ..

هي : السلام عليكم ..
هو : وعليكم السلام ..

هي : خالد النور ..
هو : لا معتز الريح ..

هي : معليش الرقم غلط ..
------------------------

قال لنفسه ..
البت دي قاصده .. وعايزاني أنا ..
لكن دي حركات منها ..

يا معتز البت قالت ليك خالد النور. ما كان تقول ليها اى خالد النور ما عادى الزمن دا الناس بقت تتقمص شخصيات الغير

خالد النور

22-11-2007, 01:28 AM

صديقة أخته ..
غلطت وقالت ليهو ..

إزيك يا فلان .. مشتاقين ..
-------------------------
ما نام الليل ..
قال شنو .. بفسر في مشتاقين دي ..

كيس نايلون وهواء شايلو. دا داير ليهو حبوب حنانومايسين

خالد النور

22-11-2007, 01:30 AM

العينه دي ..
أي بت تضحك معاهو ..
معناها اتكسرت فيهو ..

والله دا خفيف خفة السنين

معتز الريح

22-11-2007, 01:35 AM

يا معتز البت قالت ليك خالد النور. ما كان تقول ليها اى خالد النور ما عادى الزمن دا الناس بقت تتقمص شخصيات الغير

حسه أمكن طالباك قروش ..

معتز الريح

22-11-2007, 01:40 AM

دا داير ليهو حبوب حنانومايسين

حنانو مايسين ..
دي حبوب الحساسية العاطفية ..

أسمع .. وصف لي مكانها

خالد النور

22-11-2007, 01:43 AM

حسه أمكن طالباك قروش ..

أنا الطالبة قروش؟؟؟

خالد النور

22-11-2007, 01:46 AM

حنانو مايسين ..
دي حبوب الحساسية العاطفية ..
على حسب الدوز بتعالج، سلاح ذو حدين

أسمع .. وصف لي مكانها

من صيدلية العشاق. فى الجامعة الأهلية جنب حديقة البروف

معتز الريح

22-11-2007, 06:43 AM

طبعاً هذا الدنجوان ..
مفهم كل من له به علاقة ..
بأن بنات الجيران ..
وبنات الأعمام وبنات العمات ..
وبنات الخيلان وبنات الخالات ..

كلهن جاريات وراهو وساكنو..
وهو بيني وبينكم ..
كلب الجيران ما بسكو..

هشام السماني إبراهيم

22-11-2007, 07:39 AM

والله دي بالغت فيها يا ود الريح

هشام السماني إبراهيم

22-11-2007, 07:41 AM

وائل

22-11-2007, 08:05 AM

والله يامعتز في ناس كتير كدا بيعانو من مشكلة الركوز القلبي أو بمعني تاني خفيفين جدا وكلمة إزيك ووينك ماظاهر معناها خلاص الحب الطاهر
ده النوع البيكون ماخالط الجكس والبنات أو يكون ماعندو أخوات أو بنات خالات ودي مشكلة بالجد بيعانو منها كتير من الشباب وهي قلة اجتماعهم بالبنات وكيفية مخاطبتهم والتعامل معاهم ...

GREY MAN

22-11-2007, 09:57 AM

ود الريح
انت حكايه...ربنا يخليك

المكاشفى

22-11-2007, 12:51 PM

معتز جيب من الآخر ..........
انت مالك ياخوى الحاصل شنو ؟؟؟؟؟
واوريك ليهم البعانو من العمى الجكسى
والارق المتناول بعد كلو بسمه.....
..
..
..
..
..
ديل المغتربيين..
وله شنو ياهشام السمانى؟؟؟؟

معتز الريح

23-11-2007, 10:49 PM

والله دي بالغت فيها يا ود الريح

بالغ الزول الوهمان ده ..

معتز الريح

23-11-2007, 10:55 PM

اوع تكون حصلت معاك ياقريبي
اكتم

كتير ..
ولو كنت بكتم ما كان جيت عملت البوست ده ..

عوض صقير

23-11-2007, 11:41 PM

أخى معتز الريح

يبدو أن الشخصية التى يتناولها هذا البوست مصابة بمرض وهذا النوع من المرض يسمى بالوهم وهو مرض من الأمراض الروحانية ... وهو مايقع فى الذهن من الخاطر ويقوم بتضخيم الواقعة إلى عدة أضعاف غير حقيقية .. سواء كانت الحالة من الظن أو التخيل ..... نسأل الله أن يشفيه

معتز الريح

24-11-2007, 12:09 AM

بيعانو من مشكلة الركوز القلبي ...

ونحنا كمان بنعاني معاهم ..
عشان الزول العندو المشكلة دي بكون برررررررررراي

ده النوع البيكون ماخالط الجكس والبنات أو يكون ماعندو أخوات أو بنات خالات ودي مشكلة بالجد بيعانو منها كتير من الشباب ...

بالعكس .. ديل بكونوا يومهم كلهم مع الجكس لكن عدم الثقة بالنفس بتمها كضب ..

------------------------------------
جيب أضانك .. عشان ما نظلم الأولاد
في بنات عندهم نفس المشكله ..
العندو شجاعة يجي يحكي عنهم ..

معتز الريح

24-11-2007, 12:16 AM

انت حكايه...ربنا يخليك

الحبيب ..
بالله الشخصية دي ما قابلتك كتير ؟؟

في شخصية تاني .. مرت عليك؟؟
البكون عامل ليك فيها منقط الكورة ..
وهو ما عندو أي كوره وبتمها مشاكل ..

هوي .. أنا ما قاصدك ..

معتز الريح

24-11-2007, 12:20 AM

معتز جيب من الآخر ... ديل المغتربيين..
وله شنو ياهشام السمانى؟؟؟؟

الحبيب المكاشفي ..
أنا جايب من الآخر ..
وبصراحة أنا ما قابلت العينة دي في المغتربين ..
ولا قاصدهم ..
-------------------------------------------
لكن تعال قول لي ..
هشام السماني ده قابض عليهو حاجه ؟؟؟؟
تعال لي بالخاص ..

معتز الريح

24-11-2007, 12:27 AM

يبدو أن الشخصية التى يتناولها هذا البوست مصابة بمرض وهذا النوع من المرض يسمى بالوهم وهو مرض من الأمراض الروحانية ... وهو مايقع فى الذهن من الخاطر ويقوم بتضخيم الواقعة إلى عدة أضعاف غير حقيقية .. سواء كانت الحالة من الظن أو التخيل ..... نسأل الله أن يشفيه

الحبيب أستاذنا عوض صقير ..
هذه الشخصية لها ميزات إيجابية .. منها ..
1. نظافة البدن والملبس (بكون غاطس في الحمام نص اليوم) ..
2. طول السنة في حالة حلاقة وقطعيات نظيفة وجديدة ..
3. يحب العطور والمزيلات والمعطرات ويبالغ في استخدامها ..
4. لو ماشي الدافوري بقشر ..

طبعاً لانو بكون مستعد لأي طارئ عاطفي ..

عوض صقير

24-11-2007, 12:58 AM

الحبيب أستاذنا عوض صقير ..
هذه الشخصية لها ميزات إيجابية .. منها ..
1. نظافة البدن والملبس (بكون غاطس في الحمام نص اليوم) ..
2. طول السنة في حالة حلاقة وقطعيات نظيفة وجديدة ..
3. يحب العطور والمزيلات والمعطرات ويبالغ في استخدامها ..
4. لو ماشي الدافوري بقشر ..

طبعاً لانو بكون مستعد لأي طارئ عاطفي ..

ده والله ذكرنى بالقطر المصرى الذى يسمى بالقشاش !

معتز الريح

24-11-2007, 01:06 AM

ده والله ذكرنى بالقطر المصرى الذى يسمى بالقشاش !

الحبيب مولانا ..
الشرح واجب عشان نشوف وجه الشبه ..

عمرسنهوري

24-11-2007, 01:26 AM

ده منو الخفيف ولفيف دا ؟
لكن بامانه كده في ناس كيس نايلون خفه مبالغ فيها
الواحد في المواصلات تلاقهو اتلفت
الموضوع في النهايه وهم ومرض نفسي

عمر البشير

24-11-2007, 01:33 AM

عزيزي معتز الريح.
لك التحية وانت دائما تاتي بكل ما هو جديد ومفيد ومبدع في نفس الوقت.
حسب تحليلي لهذه الشخصية.

انها شخصية حساسة. وذات حس مرهف الي درجة المبالغة.
ويسرح بخياله ويحلم وهو في كامل وعيه. (احلام اليغظة).
يشطح بتفكيره الي ان يصدق ان هذا الشي قد حدث فعلا.
فمجرد مكالمة خاطئة قد يصل به التفكير الي انهو قد احب هذه البنت واحبته وهنا يبدا العقل الباطني في التفكير والتاويل. وهكذا .....

ولك ودي.

okasha

24-11-2007, 02:38 AM

على الطلاق الشخصية دى لو ما شخصيتك ما كان وريتنا الحاجات دى يامعتز

بعدين والله جاية فيك طق

عثمان جلالة

24-11-2007, 03:49 AM

الحبيب معتز .......... هههههههه .... والله كلامك صاح والشخصية دي لاقتني كتير .. ياخي عندنا واحد بى نفس المواصفات اعلاه ... قلنا نعمل فيهو مقلب ... كتبنا ليهو جواب ... من بت وهميه وانها مكسره فيهو ولازم تقابلوا ... وحددنا ليهو مكان اللقاء ... وقبل اللقاء بى ربع ساعة ... انتظرناهو .. أول ما جا فكيناها ضحكه وقلنا ليهو ده مقلب عملناهو نحن ... صدق ما اقتنع بى كلامنا .... مشينا خليناهو واقف منتظر ... أها رايك شنو؟؟؟؟

محمد حسين (المميز)

24-11-2007, 06:07 AM

العزيـــز معتـــز
طبعـــا النوع ده مش بيعمــل وجع قلب بيعمل وجع....كلى
القعده كلها تلقاهو هنايه قالت لي وفلانه عاينت لي
وديك بسمت لي التانيه غمزت لي
وطبعــا دي كلها تهيـــــآت

أما الشكل زي ماقلت تلقاهونضيف وظريف وآآآآآآآآآآخر قشره
عاين ليهو قيافه كيــــــــف

http://www.m5zn.com/uploads/4eebcb3296.gif (http://www.nua3m.net/vb/)

ممســــّح ومتمـــّــــر
ههههههههههههه

*-*-*-*-*-*-*-*-*-*-*-*

معتز الريح

24-11-2007, 06:12 AM

ده منو الخفيف ولفيف دا ؟

حبيبنا عمر ود سنهوري ..
الخفة براها .. واللفافة براها ..

ولو اجتمعوا في زول .. عليهو العوض
والخفة أخف درجة من اللفافة ..

منتظرنك تكتب لينا على اللفافة ..

معتز الريح

24-11-2007, 06:19 AM

انها شخصية حساسة. وذات حس مرهف الي درجة المبالغة.
ويسرح بخياله ويحلم وهو في كامل وعيه.
يشطح بتفكيره الي ان يصدق ان هذا الشي قد حدث فعلا.
فمجرد مكالمة خاطئة قد يصل به التفكير الي انهو قد احب هذه البنت واحبته وهنا يبدا العقل الباطني في التفكير والتاويل. وهكذا ..

الحبيب عمر ود البشير ..
الشخصية دي عالية الحساسية ..
(يقال أنو بستفيدوا منها في صناعة الرادار)..
ولو الناس عرفت مشكلتو بتعبوا تعب ما عادي ..
شايف المكاشفي مطالب بهشام عشان يشرح ليهو ..

بالله المكاشفي ده ما بتاع مشاكل؟؟

معتز الريح

24-11-2007, 06:30 AM

على الطلاق الشخصية دى لو ما شخصيتك ما كان وريتنا الحاجات دى يامعتز
بعدين والله جاية فيك طق

حبيبنا Okasha
يا زول بدون طلاقات .. أياني أنا ..

معتز الريح

24-11-2007, 06:49 AM

معتز الريح

24-11-2007, 06:54 AM

طبعـــا النوع ده مش بيعمــل وجع قلب بيعمل وجع....كلى
القعده كلها تلقاهو هنايه قالت لي وفلانه عاينت لي
وديك بسمت لي التانيه غمزت لي
وطبعــا دي كلها تهيـــــآت

أما الشكل زي ماقلت تلقاهونضيف وظريف وآآآآآآآآآآخر قشره
عاين ليهو قيافه كيــــــــف

[COLOR="Black"]*-*-*-*-*-*-*-*-*-*-*-*

المميز الحبيب ..
شنو من ديك وعييييك ..
أشواقنا كمية ..
------------------------
زي ما قلت الخفة مرتبطة بالبري ..
والبري الفيهو تمجيد للنفس .. ممل وما بفيدك ..
وبيني وبينك العينة دي لا شاكوش ولا ثقالة بتحسمها ..

----------------------------------------
تحت تحت قالوا علاجها الوحيد الكي ..

ابراهيم

24-11-2007, 08:25 PM

كنا شلة في جامعة النيلين كلية التجارة
اها كان في واحدة كدة شي نظرات كروباوية
ومرات تلفونات ومرات رسائل بتاعة التورية ديك
دة كلو وانا ماكل في حناني
عشان خايف من حركاتكم دي

ابراهيم

24-11-2007, 08:26 PM

معتز والله بوستاتك كلها في الصميم

نزار حسن محمد

24-11-2007, 09:53 PM

انت يا ود الريح ..انا بجيب لك من الاخر
اول بتبادى اول حرف من اسمه ود المطامير
تانى شى كان بلبس سروال وعراقى وبتمسح بالكركار اسعى بقى البس بنطلون تريفيره وقميص
بنفسجى بى كحلى وخلى الكركار بقى اتمسح بى زيت السمسم ..
ثالث شى قال هنايه ديك بتحبه اسمه منوا ياربى
اى اتذكرته حنان الترك ولا حنان الشرق ما عارف

معتز الريح

24-11-2007, 11:33 PM

كنا شلة في جامعة النيلين كلية التجارة
اها كان في واحدة كدة شي نظرات كروباوية
ومرات تلفونات ومرات رسائل بتاعة التورية ديك
دة كلو وانا ماكل في حناني
عشان خايف من حركاتكم دي

العزيز إبراهيم ..
يازول معذور .. الخفة كانت من الجانب التاني ..
وما تقول لي عملت تقيل ..

الخفة الشديدة والتقلة الشديدة ..
الاتنين كعبات ..

معتز الريح

24-11-2007, 11:37 PM

معتز والله بوستاتك كلها في الصميم

تشكر يا حبيب ..
والبوستات منورة بمشاركاتكم ..
ليكم جزيل الشكر ..

معتز الريح

24-11-2007, 11:42 PM

قال هنايه ديك بتحبه اسمه منوا ياربى اى اتذكرته حنان الترك ولا حنان الشرق ما عارف

الكلام القالوا حبيبنا ود المطامير أعلاه ..
قالوا قبل الكامري .. ولا بعد الكامري ؟؟
--------------------------------
والله يا نزار انت بتاع مشاكل ..

ودكمبال

26-11-2007, 06:41 AM

الموضوع لا علاقة له بالوزن بتاتاً ..
ولا دخل للديناميكا نهائياً هنا ..

ولكن له علاقة بإنعدام الركوز القلبي ..

الغالى /ودالريح
حزمة امنيات
انا فى الاول اتحدث عن الحالة التى امر بها عندما اسمع امى خطيبتى تحكى عن المغتربين حالة ليست هى بانعدام الوزن بل هى التلاشى من الوجود ام الركوز القلبى فاكون كاذب اذا انكرت وجوده خصوصا عندما تهبط اى طائرة حامله مغترب الى ارض الوطن وموضوع البوست جميل جدا ومداخلتى اتت من زاوية ثانية
ود
ك
م
ب
ا
ل

معتز الريح

27-11-2007, 06:42 AM

انا فى الاول اتحدث عن الحالة التى امر بها عندما اسمع امى خطيبتى تحكى عن المغتربين حالة ليست هى بانعدام الوزن بل هى التلاشى من الوجود ام الركوز القلبى فاكون كاذب اذا انكرت وجوده خصوصا عندما تهبط اى طائرة حامله مغترب الى ارض الوطن

الحبيب ود كمبال ..
كدي في الأول النسألك ..
1. الحالة دي بتشبه الحالة البتجيك أيام الامتحانات ؟؟
2. هل هي مطابقة للحالة البتجيك وانت جالس لامتحان الفرصة الأخيره في الملاحق ؟؟
3. هل هي نفس الحالة لمان تمشي لمعاينة بتاعة شغل والمتقدمين 600 ألف وعايزين واحد ؟؟

لو الإجابه كانت بنعم على جميع ما ورد أعلاه ..
فالعلاج كالتالي :
1. عليك بسورة ياسين (صباح ومساء)
2. قراءة سورة القلم (نون والقلم وما يسطرون) طول اليوم ..
فهي مجربة وتبعد العوارض ..

وتعال لي بعد أسبوع ..

ودكمبال

27-11-2007, 07:26 AM

[QUOTE=معتز الريح;263656][center]الحبيب ود كمبال ..
كدي في الأول النسألك ..
1. الحالة دي بتشبه الحالة البتجيك أيام الامتحانات ؟؟
2. هل هي مطابقة للحالة البتجيك وانت جالس لامتحان الفرصة الأخيره في الملاحق ؟؟
3. هل هي نفس الحالة لمان تمشي لمعاينة بتاعة شغل والمتقدمين 600 ألف وعايزين واحد ؟؟

حبيبنا ودالريح
اشواقنا
الحالة البتجى ايام الامتحانات على الرغم من قساوتها الا ان الواحد بحس فيها بنوع من المتعة والاخيرة غير مجربة لكن حالتى التى امر بها اصعب بكثير.
ياخى اقول ليك حاجة انا شايل معاى المصحف 24 ساعة وذى ما انت بتحاول تدى كبسولات علاجها شوف لى حل لأم البت والمغتربين واكون مدين لك بقية عمرى.
ود
ك
م
ب
ا
ل

معتز الريح

27-11-2007, 10:18 PM

شوف لى حل لأم البت والمغتربين

الحبيب .. الحلول موجوده ..
لكن ما بتصلح معاك .. كتر من الدعوات ..
والكاتبها الله بتلقاها .. ولو ليك نصيب بتلقاهو ..

وسيب الخفة ..

Isam Hussien H

27-11-2007, 10:26 PM

معتز الجميل

أول حاجة جبتها من وين ،، ولا دا شم ساكت . أقصد شخصياتك العجيبة !

عندنا واحد أيام الجامعة من أبناء الأبيض بحب بجامع جدو قال سمع فتوى كل الأسرة بتدخل الجنة تحت لواء الجامع وكمان ممكن الزوجة تدخل معاهم ،، طوالي كان بطرح الفكرة للجكس بإعتبار الجنة ضمان ، ويمتلك كافة مواصفات الخفة حسب تعريفك ليها ..

بحسب التصنيف بتاعك يا معتز ده ممكن يكون لفيف ؟

معتز الريح

27-11-2007, 10:36 PM

الحبيب الغالي عصام ..
طبعاً البوست أصبح تقيل وزناً بمداخلتك المفرحة

معتز الجميل

أول حاجة جبتها من وين ،، ولا دا شم ساكت . أقصد شخصياتك العجيبة !

يالحبيب .. العينة دي كتيره .. ومن كترتها أصبحت محفوظة ..
وما عايز أقول ليك .. أمكن (فينا) فيني كتير منها ..

عندنا واحد أيام الجامعة من أبناء الأبيض بحب بجامع جدو قال سمع فتوى كل الأسرة بتدخل الجنة تحت لواء الجامع وكمان ممكن الزوجة تدخل معاهم ،، طوالي كان بطرح الفكرة للجكس بإعتبار الجنة ضمان ، ويمتلك كافة مواصفات الخفة حسب تعريفك ليها .. بحسب التصنيف بتاعك يا معتز ده ممكن يكون لفيف ؟

حسب التصنيف يالحبيب هذا الزميل يندرج تحت بند الحنك السنين (والمعنى مفهوم) .. وهو بند يشمل (المحامين) والأطباء النفسيين .. وبعض المدرسين ..

أنتظر عودتك الجميله

Isam Hussien H

27-11-2007, 10:49 PM

معتز تخيل أضحكتني حتى مرحلة البكاء الهستيري فالمرارات عدة ونبحث عن مثلك لنرتاح

،، ربنا يحفظك

جنيـــــدو

27-11-2007, 10:59 PM

معتز :

لو فيك كتير منها ! شوف ليك زول يرقي ليك .

عارف ليه ؟
النظرة سهم مسموم من سهام إبليس ، ومن أطلق لحظاته دامت حسراته ...

يعني ابليس بحاول بهيء ليك الجو وتلقاك مرتبك لانه في اللحظات دي بديك الأفكار والوساوس !!!

إذا كان النظرة بتعمل فيك كده انت ماشي تسلم وتتونس مالك !!!

معتز الريح

27-11-2007, 11:13 PM

معتز تخيل أضحكتني حتى مرحلة البكاء الهستيري فالمرارات عدة ونبحث عن مثلك لنرتاح

أخونا الأكبر ..
أنت قدمت لينا السبت كتير ..

ولو في طريقة نرد الدين بوستات ومواضيع فدي بسيطه..

وللعلم .. مداخلاتك تشعرني بالفخر لقيمتك الشخصية والفكرية ..

معتز الريح

27-11-2007, 11:18 PM

إذا كان النظرة بتعمل فيك كده انت ماشي تسلم وتتونس مالك !!!

الأخ الكريم جنيدو ..
هذه الشخصية غير محتاجة لسلامات وونسات ولا حتى نظرات..
راجع الموضوع من البداية ..
الكلام الفوق ده كلو تهيؤات .. ونسج وحبكة خيالية في خيال الخفيف..
عشان اتفقنا أنو الشخصية دي موهومة ومريضة ..

أسعدنا مرورك ..

ودكمبال

28-11-2007, 02:36 AM

الحبيب .. الحلول موجوده ..
لكن ما بتصلح معاك .. كتر من الدعوات ..
والكاتبها الله بتلقاها .. ولو ليك نصيب بتلقاهو ..

وسيب الخفة ..

ودالريح/الغالى
كيف نسيب الخفة ونحن ما بكلمونا بالشواكش وقاعدة تحصل امام عيونا وخايفين يحصل الحصل لعبدو.................

عبدو..عبدو..عبدو..عبدو
فى الليلة ديك
والقصة ذاتا بقت عليك
ياعبدووادوك( الشريط )
يوم قلنا ليك انضم معاها وانتظر
شوف اليكون ان شاءالله خير
ابيت تسمع كلامناوبقيت لميض
قلتا احسن اكون تقيل
انا ما جميل
باكر بعد باكر بكهربا ليك بنظرة قتيل
وبقيت تقيل لامن سقوك موية الغسيل
وقعدت يازينة الرجال
كهربجى قــــــــال
يوم جيت تلفلف زى زمان وتبارى بقعر الشجر
كيس كراسى الخيزان
والبت تجى وتمشى وتلف مرات تقيف
يازول معاها ولد حريف
وصاحبنا بالحساس عرف
وسالت والناس كلموك
ملعون ابوك دونيا ام قدود
بقت البقت
وقعدتا وفى شارع الزلط
تبكى وتجعر
والخدود اتورمـــــــت
ضهر القميص
كم القميص
يد القميص
حتى الفنيله اتشرطت
ياعبدوعيب
قوم ياخى صلى على الحبيب
يا اخوانا لا انا داير اموت اقع البحر
انا بنتحر
ياعبدو عيب الدنيا حر والمويه بتسخن عليك
تلاته ساعات كامله زولنا يسب ويكيل
ودموعو تخرخر تسيل
ودموعو سايلات بالكفوف
(وشرايطو )تلمع فى الكتوف
بقى فيلسوف
فى كلام عن الدنيا ام قدود
والعلاقة بين يوم السبت وعين الحسود
ومقارنات بين الجمال والجهل وسوء الاختيار
قال شينه قال
قال شينه قلنا كلام صحيح
وخطيبا زاتو ولد قبيـــــــــح
وكمان سنيح
بس ياخى قـــــــــوم
الواطه صبحت دار ننــوم
قام تانى جاب سيرة البحر

الشريط (الشاكوش)
ود
ك
م
ب
ا
ل

معتز الريح

29-11-2007, 12:01 AM

كيف نسيب الخفة ونحن ما بكلمونا بالشواكش وقاعدة تحصل امام عيونا وخايفين يحصل الحصل لعبدو...

الحبيب ود كمبال ..
قول الحمد لله .. والله عبدو زولك ده لو شاف الحصل مع
عطا شيله .. وبرعي ذهلله .. وجيب الله مسمار .. وعوض مرزبه ..
كان هان عليهو شاكوشو وعرف انو الحمى العندو حمى خفيفة ..

قولوا الحمد لله
الحمد لله ..

ودكمبال

29-11-2007, 01:36 AM

الحبيب ود كمبال ..
قول الحمد لله .. والله عبدو زولك ده لو شاف الحصل مع
عطا شيله .. وبرعي ذهلله .. وجيب الله مسمار .. وعوض مرزبه ..
كان هان عليهو شاكوشو وعرف انو الحمى العندو حمى خفيفة ..

قولوا الحمد لله
الحمد لله ..

ودالريح/ الحمد اطنان
بس انت بشكلك دى بتدخل الرعب فينا والحصل لعطا شيله وبرعى ذهللة ممكن يحصل لينا ولهذا بنطلب منكم التخفيف وليس التخويف لانو الخوف مستوطن فينا .
تخريمة ...
ما عارف ليك فكى كارب ؟؟؟؟؟؟؟؟؟؟؟؟؟؟؟؟؟؟
ود
ك
م
ب
ا
ل

معتز الريح

29-11-2007, 06:54 AM

حبيبنا ود كمبال .. بتتعدل إن شاء الله وتصبح من الأمس ..

لكن عايز أسألك حب المسنجر بعتبر خفة ..
ناس ما عندهم سابق معرفة وحبوا بعض بالمسنجر ..

والحب من أول نظرة هل فيهو نسبة خفة ؟

صديق بلال

29-11-2007, 07:10 AM

دنتة رهيب يا إبن الريح...
فعلا هناك الكثير من يفسر بعض الكلمات بمزاجه وبالذات حينما تصدر من الجنس الناعم...
والدليل كما ذكرت في قصتك حينما قالت صديقة الأخت لأحدهم عفويا كلمة مشتاقين...
فأخينا في الله... طول الليل سهران يفكر تحديدا لكلمة مشتاقين...
فأصبح يقلب الكلمة بجميع إتجاهاتها ومعانيها ومصطلحاتها وإحتمالاتها... يعني البنت دي بتعني شنو بكلمة مشتاقين.....

Jamal Elmahi

30-11-2007, 06:31 AM

هي : ألو سهام إزّيك
هو : أنا ما سهام أنا أخو سهام
هي : سهام كيفك مشتاقين والله ...
هو : ياخي قلته ليك أنا ما سهام
هي : ياخي عارفه ..سمعتك وفات أضاني ...
هو : دقيقه أنادي ليك سهام ...
هي : ياخي حس ...سهام شنو ...أنا عايزه أتونس مع أخو سهام ...
هو : أخو سهام طلع قبل شويه ...بس في أنا وسهام ...نديك سهام ...
هي : لا ما تديني ليها ...بس قول ليها خلي أخوك يشرب ليهو جبة سبيرتو كان دمو يخف شويه ...قال سهام قال...رضعتك قراده إتا ولاّ شنو ....

ود الماحي

معتز الريح

30-11-2007, 10:20 PM

دنتة رهيب يا إبن الريح...
...

الحمد لله الما طلعت خفيف ..

----------------------------------------
مشتاقين يا ود بلال

معتز الريح

30-11-2007, 10:28 PM

معتز الريح

30-11-2007, 10:31 PM

حكمة البوست ..

لا تكن خفيفاً فتنهر .. ولا تقيلاً فتخسر ..

معتز الريح

30-11-2007, 10:39 PM

خليك (بين بين) ..

و(بين بين) المقصودة هنا
تختلف عن (بين بين)
التي وصف بها الكاتب جعفر عباس الفنان راغب علامة ..

ودكمبال

01-12-2007, 06:44 AM

حبيبنا ود كمبال .. بتتعدل إن شاء الله وتصبح من الأمس ..

لكن عايز أسألك حب المسنجر بعتبر خفة ..
ناس ما عندهم سابق معرفة وحبوا بعض بالمسنجر ..

والحب من أول نظرة هل فيهو نسبة خفة ؟

الغالى / ودالريح
لك الشمس
حب الماسنجر ذى الزول العندو موبايل بدون رصيد والحب من اول نظرة شبية بالرسالة التى ترسل لك عن طريق الخطاء.
نتمنى ان تتغير الاحوال وتنستر الحال ويصبح الحاصل لينا فى سلة مهملات الامس ونشاهد غدا كل احلامنا تنساب فى وادى الحياه العذب.
ود
ك
م
ب
ا
ل

معتز الريح

01-12-2007, 11:25 PM

حب الماسنجر ذى الزول العندو موبايل بدون رصيد والحب من اول نظرة شبية بالرسالة التى ترسل لك عن طريق الخطاء.

حبيبنا .. الكلام ده على مسئوليتك ..
جلالة حسه بجيك طاير.. أصوا هو تبع أول نظره ..

ودكمبال

02-12-2007, 12:14 AM

حبيبنا .. الكلام ده على مسئوليتك ..
جلالة حسه بجيك طاير.. أصوا هو تبع أول نظره ..

ودالريح/ اشواقنا
حبابك وحباب جلالة اذا كان له راى مقنع بالحب من اول نظرة ويا مافى الجراب حاوى
ود
ك
م
ب
ا
ل

moh_alnour

02-12-2007, 03:26 PM

حكمة البوست ..
لا تكن خفيفاً فتنهر .. ولا تقيلاً فتخسر ..

يعني يا ود الريح
يا الواحد يكون قشر توم ولا .............

معتز الريح

02-12-2007, 10:06 PM

حبابك وحباب جلالة اذا كان له راى مقنع بالحب من اول نظرة ويا مافى الجراب حاوى

أستاذ في الغرام من أول نظره ..
شارك في تأليف أغنية " من أول نظرة سحرتني عيونو"
وقيل أنه شاعرها الحقيقي ..

بمشي وبجيبو ليك في يدي ..

معتز الريح

02-12-2007, 10:17 PM

يعني يا ود الريح
يا الواحد يكون قشر توم ولا .........

بس خليك ...............

عثمان جلالة

02-12-2007, 11:12 PM

الغالى / ودالريح
لك الشمس
حب الماسنجر ذى الزول العندو موبايل بدون رصيد والحب من اول نظرة شبية بالرسالة التى ترسل لك عن طريق الخطاء.
نتمنى ان تتغير الاحوال وتنستر الحال ويصبح الحاصل لينا فى سلة مهملات الامس ونشاهد غدا كل احلامنا تنساب فى وادى الحياه العذب.
ود
ك
م
ب
ا
ل

الحبيب الغالي ود كمبال ... ما في مجال للمقارنة بين حب الماسنجر والحب من أول نظره ... حب الماسنجر ممكن يكون مفبرك او مغشوش او مبني على الكذب ... والساسو كذب ما بقوم كبنيان !! لكن الحب من أول نظره مبني في المقام الاول المشاهده والواقعية ... في الدين .. مثلا ... الارواح جنود مجنده منها ما اختلف ومنها ما ائتلف .... والحب من اول نظره بكون حب روحي مباشر ما عندو علاقه بالطين ... يعني كيف؟؟؟ نحن مثلا لامن ننوم ... تخرج ارواحنا من الأجساد ... وتنطلق .... والرابط هو الحبل الأثيري ... ده كلام ناس الباراسيكولوجي وعلم ما وراء الطبيعة ... في الدين ... عند النوم الارواح بتكون في البرزخ ... منها البجي راجع لى جسده ومنها ما يمسكه الله .. اها البحصل ... إنو بكون في لقاء أرواح ... عشان كده تشوف زول للأول مره وتحس انك قابلتو قبل كده أو تشوف مكان .. تحس إنك كنت فيهو .. وهكذا ... ولي عوده

عثمان جلالة

02-12-2007, 11:29 PM

ودالريح/ اشواقنا
حبابك وحباب جلالة اذا كان له راى مقنع بالحب من اول نظرة ويا مافى الجراب حاوى
ود
ك
م
ب
ا
ل

الحبيب ود كمبال .. نكمل .. وجهة نظري في الحب من اول نظره إنو حب حقيقي ... لكن بجي للناس الصافين فقط .... روحيا ... الصفاء الروحي سمه لا يهبها الله إلا للقدر القليل من الناس .. الناس المرهفين والحساسين .. البكون عندهم علاقة مباشرة بى القمر ... خاصة ليلة 14 و15 ديل بكونو خطرين والشعراء ممكن يحصل الحب من أول نظره في الحالات أعلاه .... لكن الزمن ده بقى قليل ... ونادر ... لأنو قليل من الناس البنتبهو للقمر مع الكهرباء .. وقليل البنتبهو لخفيف الأشجار او تغريد الطيور أو هدأة الليل .. لوسائل التكنلوجيا الكثيره البتمنع ده ... عشان كده ناس الريف دايما .. اكتر حساسية ورهافه من ناس البندر ... واشعارهم اقوى وتعبيراتهم فياضه بالحب ... وصدقني يا ود كمبال .. ما في احلى من الحب من اول نظره ..... بخليك لامن تشوف حبيبك تترجف ... لانو الظاهر الروح في اللحظه ديك بتحاول تطلع .. لانو هي المعنية بالحب ... الجسد ما عندو أي علاقه بالموضوع ..... تكون ماشي في الشارع كافي خيرك شرك تشوف رجل مثلا ... تكون إتلاقت أرواحكم في مكان مبارك وطاهر .. تحبو في الله وتصبح صداقة قوية جدا ... يكون تفكيركم واحد ... وإحساسكم واحد ... تشوف بت .. تحبها من أول نظره .. لأنو اتلاقيتو روحيا وتحصل نفس المعادلة الكيميائية .... وأقرب مبرر للكلام ده ... كيف الاب ولا الأم بعرفو ولدهم من أول نظره حتى لو ما اتقابلوا زمن طويل ... والله أعلم

معتز الريح

03-12-2007, 10:37 PM

الحبيب الغالي ود كمبال ... ما في مجال للمقارنة بين حب الماسنجر والحب من أول نظره ... حب الماسنجر ممكن يكون مفبرك او مغشوش او مبني على الكذب ... والساسو كذب ما بقوم كبنيان !! لكن الحب من أول نظره مبني في المقام الاول المشاهده والواقعية ... في الدين .. مثلا ... الارواح جنود مجنده منها ما اختلف ومنها ما ائتلف .... والحب من اول نظره بكون حب روحي مباشر ما عندو علاقه بالطين ... يعني كيف؟؟؟ نحن مثلا لامن ننوم ... تخرج ارواحنا من الأجساد ... وتنطلق .... والرابط هو الحبل الأثيري ... ده كلام ناس الباراسيكولوجي وعلم ما وراء الطبيعة ... في الدين ... عند النوم الارواح بتكون في البرزخ ... منها البجي راجع لى جسده ومنها ما يمسكه الله .. اها البحصل ... إنو بكون في لقاء أرواح ... عشان كده تشوف زول للأول مره وتحس انك قابلتو قبل كده أو تشوف مكان .. تحس إنك كنت فيهو .. وهكذا ... ولي عوده

منطق عالي الجوده ..
صدق المثل ..
أسأل مجرب ..

صلاح الدين محمد

04-12-2007, 02:02 AM

ود الريح

والله الما بعرفك اقول عليك بتاع ســـــــــــــــــــــ

بتنكت المواضيع ده من وين بس عليك الله

شوف لي شخصية الجادي الواثق من روحو

ودكمبال

04-12-2007, 08:06 AM

منطق عالي الجوده ..
صدق المثل ..
أسأل مجرب ..

الغالى/ ودالريح
تحايانا
فعلا اسأل مجرب ويظهر انو الاخ جلالة يملك مشاعر تكاد تكون معدومة فى زمنا هذا وكان جرجرتو حبه بينطق شعر .
على العموم البوست رائع وجلالة اروع
ود
ك
م
ب
ا
ل

معتز الريح

04-12-2007, 10:17 PM

ما في احلى من الحب من اول نظره ..... بخليك لامن تشوف حبيبك تترجف ...

وااااااااااااااااااااااااو
قــــــــــــــــــادر الله ..

معتز الريح

04-12-2007, 10:26 PM

والله الما بعرفك اقول عليك بتاع ســـــــــــــــــــــ

الحمد لله الطلعت بتعرفني ..
عشان تثبت للبروجوا للإشاعة دي ..

معتز الريح

04-12-2007, 10:29 PM

فعلا اسأل مجرب ويظهر انو الاخ جلالة يملك مشاعر تكاد تكون معدومة فى زمنا هذا وكان جرجرتو حبه بينطق شعر .
على العموم البوست رائع وجلالة اروع

حبيبنا ود كمبال ..
ما قلت ليك جلالة مجرب وبقنعك ..

بالله حبوبتنا كيف ؟؟
سلم عليها ..

ودكمبال

05-12-2007, 12:06 AM

حبيبنا ود كمبال ..
ما قلت ليك جلالة مجرب وبقنعك ..

بالله حبوبتنا كيف ؟؟
سلم عليها ..

ودالريح/التحيات دميرة
والله حبوبه الزلقة دى السنه مرقت منها وربنا يديها العافيه بس ذى معارف الخرف وعدم الشوف والطرش احلى حاجة وليك عمرها.
ود
ك
م
ب
ا
ل

معتز الريح

05-12-2007, 10:55 PM

ودالريح/التحيات دميرة
والله حبوبه الزلقة دى السنه مرقت منها وربنا يديها العافيه بس ذى معارف الخرف وعدم الشوف والطرش احلى حاجة وليك عمرها.

الحبيب الغالي ود كمبال
تحيات لا تحدها حدود لحبوبتنا الغالية .. وألف سلامة ..

وأشكرك جزيل الشكر على مشاركاتك الحبيبة إلى نفسي ..

ابراهيم

18-12-2007, 10:41 AM

العزيز إبراهيم ..

يازول معذور .. الخفة كانت من الجانب التاني ..
وما تقول لي عملت تقيل ..

الخفة الشديدة والتقلة الشديدة ..
الاتنين كعبات ..

لكن الخفة احسن شوية من التقلة

على جنب:
انا منتظر معاك مولانا يشرح لينا حكاية القشاش

taboo

19-12-2007, 06:01 AM

تصدق بتحصل كتير

mamdoh

19-12-2007, 10:54 AM

كل عام وكل أهل المنتدي بألف خير وعافبة وتحية خاصة للاخ معتز علي الطرح و الرد البليغ للشخصية المذكورة , انا عاوز منك تحليل لحالتي يمكن مختلفة شوية عن شخصيتك بس في تشابهة يمكن ,,,,,,,,,,,,

انا مرات كثيرة بحلم وانا صاحي مثلا ربحت جائزة مائة الف درهم ورحت السودان واشتريت بيت وعربية وأصبحت مقرش خلاص وعلي الاساس ده اي قروش حقيقيةمعاي بقوم اصرفها كلها بعدين أتضح لي انا ماربحت جائزة ولاأي حاجة والقروش المعاي صرفتها بدون اي لازم أصبحت مفلس ........طبعا انا عاقل بس عندي أوهام بقتنع انها حقيقية؟؟؟؟؟؟؟؟؟؟؟؟؟؟؟؟؟

عوض الكواكب

21-12-2007, 03:13 PM

الموضوع لا علاقة له بالوزن بتاتاً ..
ولا دخل للديناميكا نهائياً هنا ..

ولكن له علاقة بإنعدام الركوز القلبي ..

لك التحية يارائع علي هذا البوست
وكل عام وانتم بخير ولو انها جات متاخرة
الارواح جنود مجندة ما تعارف منها إءتلف وماتنافر منها إختلف
وليكن شعارنا دوما لا للطمع
ونترك اللوم بعيدا
وما اجمل الرضئ

معتز الريح

22-12-2007, 07:01 AM

لكن الخفة احسن شوية من التقلة

بالعكس ..

انا منتظر معاك مولانا يشرح لينا حكاية القشاش

والله مولانا متردد .. ليه ما عارف..
انت عارف حاجه عن ما يسمى بالقشاش ؟؟

وكل عام وانت بخير ..

معتز الريح

22-12-2007, 07:08 AM

تصدق بتحصل كتير

أكتر مما تتخيل يا تابوووو ..

معتز الريح

22-12-2007, 07:11 AM

انا مرات كثيرة بحلم وانا صاحي مثلا ربحت جائزة مائة الف درهم ورحت السودان واشتريت بيت وعربية وأصبحت مقرش خلاص

كلام زي العسل ..

اي قروش حقيقيةمعاي بقوم اصرفها كلها بعدين أتضح لي انا ماربحت جائزة ولاأي حاجة والقروش المعاي صرفتها بدون اي لازم أصبحت مفلس ........طبعا انا عاقل بس عندي أوهام بقتنع انها حقيقية؟؟؟؟؟؟؟؟؟؟؟؟؟؟؟؟؟

المشكلة أنا القروش بتعمل لي حساسية ..

ومع الافتراض انك ربحت الجائزه فعلاً ..
الصرف ليك شنو؟؟؟
دكن القنذب ..

معتز الريح

22-12-2007, 07:15 AM

لك التحية يارائع علي هذا البوست
وكل عام وانتم بخير ولو انها جات متاخرة
الارواح جنود مجندة ما تعارف منها إءتلف وماتنافر منها إختلف
وليكن شعارنا دوما لا للطمع
ونترك اللوم بعيدا
وما اجمل الرضئ

حبيبنا عوض
مطول الغيبة .. إن شاء الله تكون بخير ..
وكل عام وانت طيب ..

ولك التحية على المشاركة والمداخلة والنصح