المساعد الشخصي الرقمي

مشاهدة النسخة كاملة : طاشي شبكة!!


شبارقة
22-10-2007, 09:20 PM
حبايبنا ندردش شوية رايكم شنو!!

أخوكم رجع السودان بعد تلاتة سنوات اغتراب !!

مشى خلا البلد صقيعة !!

لا عملة جديدة !!
لا اريبا ولا سوداني!! وحتى موباتل ما على قدر كده!!
ولا بنغالة ولا هنود ولا باكستان ولا حتى مصريين !!

رجع ....
العملة ماااااااااااا ياها!!
والدنيا مااااااااااااا ياها
ولا الناس كمان ياها!!!!!!

المصطلحات اتغيرت !!
والدنيا اتقلبت!!

وأخوكم لقى روحو عائم بلا عوامات ..
وحايم بلا رأس !!!

لقى ناس جديدة ...
ولخبط بين خالتو الحرم ونفيسه ست الكسره ،،
وبين محجوب الراعي وعبدالوهاب أخوهو!!

وصفوهو جماعتو الزمااااااااان اللي هم أصحابو بأنو (طاشّي شبكة!!)
وأخوكم دخل ومرق والشبكة ماجمّعت معاهو!!!

دي حال يا ناس!!

الغربة أكبر من قروش ..
الغربة نار متوقّده .......
تدفع كتييييييييييير وتلقى القليل ...
دا أكان لقيت ...


دمتم أحبتي!!
ابراهيم
22-10-2007, 09:32 PM
احكي لينا يا شبارقة
قالوا المؤمن مرآة اخيه
وتلاتة سنين ما كتيرة مالك داير تشيلنا هم
شبارقة
22-10-2007, 09:35 PM
احكي لينا يا شبارقة
قالوا المؤمن مرآة اخيه
وتلاتة سنين ما كتيرة مالك داير تشيلنا هم

انت يا ابراهيم خليك على جنب ..
الكلام دا للناس البقعدو تلاتة سنة ...
أما الزيكم ، والدايرين آله حاسبة لعدد سنواتهم ، دا النوع اللي ما بيعرف أمو ولا أمو بتعرفو ،، ولا حتى عندو شبكة أصلاً عشان تتطش!!
ابراهيم
22-10-2007, 09:41 PM
انت يا ابراهيم خليك على جنب ..
الكلام دا للناس البقعدو تلاتة سنة ...
أما الزيكم ، والدايرين آله حاسبة لعدد سنواتهم ، دا النوع اللي ما بيعرف أمو ولا أمو بتعرفو ،، ولا حتى عندو شبكة أصلاً عشان تتطش!!


الله يطمنك والله
انا جاييك تطمني يالنقر تقوم تطمم لي بطني
والله كونه يكون مافي شبكة دي مسألة صعبة
وعلي قولك الغربة اكبر من قروش
خالد عبدالماجد
22-10-2007, 10:04 PM
حمداً لله على سلامتك شبارقة وأتمنى أن تكون قد وجدت الأهل بخير .
وفي إنتظارك لمزيد من الحكاوي ..
أما عن التغيرات التي حدثت في مجتمعنا فلولا التلفونات والمتابعة المستمرة عبرها للمستجدات رغم أنها لاتعلمنا بكل التفاصيل لوجدنا أنفسنا ودون إرادة منا على جهل تام بمجتمعنا الحديث ..
نسأل الله أن يرد غربة الجميع ..
بورتبيل
22-10-2007, 10:15 PM
فيـــك الخيـــــر .. تلاتة سنة .. قــــــــول قــــــــول قــــــــول الحقيقاااااااااااااا !!
بعديـــن طششــان الشبــكة دا عــادي جداً ..
المصيــبة انــو تكون ما قدرتــا تغيــر شريحتــك !!
بمعنــي انك تقول ( سيــارة - للعربيـة) ( وخبــز -للعيش) و(جوال - للموبايل) ( وفلوس - للقروش)
يقومو الناس يعاينــو ليك ذي كانـتك جاي من المريــخ ,, وخصوصـــاً الفـــردة بتاعتك !!
النور محمد يوسف
22-10-2007, 10:56 PM
وصفوهو جماعتو الزمااااااااان اللي هم أصحابو بأنو (طاشّي شبكة!!)
وأخوكم دخل ومرق والشبكة ماجمّعت معاهو!!!

دي حال يا ناس!!

الغربة أكبر من قروش ..
الغربة نار متوقّده .......
تدفع كتييييييييييير وتلقى القليل ...
دا أكان لقيت ...


دمتم أحبتي!!

أخي شبارقة الحمد لله بمناسبة عودتك
أسلوبك حلو ولذيذ.... فأنت حقيقة إضافة حقيقية للمنتدى... أفتخر بوجودي بين أمثالك ...

الحياة بالسودان في نظر أجيال الإغتراب هذه (نحن وأنتم والجائيين) يجب أن تكون عبارة عن قطار ماشي في سكتو..يمر بمحطات... أنزل في أي محطة تريد ...بس القطر سيكمل رحلته... ..... لكن فاتتك متعة الرحلة بحلوها ومرها بخبراتها وكسبها ومكتسباتها ....

وكم تتبدل الحال والمحطات والركاب في كل رحلة بس علينا أن نمشيها وكل رحلة ستكون بحلاوتها وبمرارتها التي تميزها عن غيرها من الرحلات...بس استمتع بما تستطيع وهذا قدرنا .... واسمعنا نشيدك وحدثنا أكثر عما غاب عنا ونحن في الغربة
شبارقة
23-10-2007, 12:26 AM
حمداً لله على سلامتك شبارقة وأتمنى أن تكون قد وجدت الأهل بخير .
وفي إنتظارك لمزيد من الحكاوي ..
أما عن التغيرات التي حدثت في مجتمعنا فلولا التلفونات والمتابعة المستمرة عبرها للمستجدات رغم أنها لاتعلمنا بكل التفاصيل لوجدنا أنفسنا ودون إرادة منا على جهل تام بمجتمعنا الحديث ..
نسأل الله أن يرد غربة الجميع ..

الله يسلمك يا خالد ، وقالوا الشاف بي عينو ما زي السمع ،،،

ربنا يرد غربتك..
شبارقة
23-10-2007, 12:28 AM
فيـــك الخيـــــر .. تلاتة سنة .. قــــــــول قــــــــول قــــــــول الحقيقاااااااااااااا !!
بعديـــن طششــان الشبــكة دا عــادي جداً ..
المصيــبة انــو تكون ما قدرتــا تغيــر شريحتــك !!
بمعنــي انك تقول ( سيــارة - للعربيـة) ( وخبــز -للعيش) و(جوال - للموبايل) ( وفلوس - للقروش)
يقومو الناس يعاينــو ليك ذي كانـتك جاي من المريــخ ,, وخصوصـــاً الفـــردة بتاعتك !!

مااااااااااااااااااااااااااااااااااااااااااا تقلب المواجع ،،

الغريبة الفردة لساني معاها صاقعة ، يكون دا كترة الكضب!!
شبارقة
23-10-2007, 12:31 AM
أخي شبارقة الحمد لله بمناسبة عودتك
أسلوبك حلو ولذيذ.... فأنت حقيقة إضافة حقيقية للمنتدى... أفتخر بوجودي بين أمثالك ...

الحياة بالسودان في نظر أجيال الإغتراب هذه (نحن وأنتم والجائيين) يجب أن تكون عبارة عن قطار ماشي في سكتو..يمر بمحطات... أنزل في أي محطة تريد ...بس القطر سيكمل رحلته... ..... لكن فاتتك متعة الرحلة بحلوها ومرها بخبراتها وكسبها ومكتسباتها ....

وكم تتبدل الحال والمحطات والركاب في كل رحلة بس علينا أن نمشيها وكل رحلة ستكون بحلاوتها وبمرارتها التي تميزها عن غيرها من الرحلات...بس استمتع بما تستطيع وهذا قدرنا .... واسمعنا نشيدك وحدثنا أكثر عما غاب عنا ونحن في الغربة

نجمنا العزيز النور ، بل نحن من نفتخر بوجودك معنا ...
سنمشي إن أبينا أو رضينا ... طريقاً لا مناص لسالكيها ...

لك كل الود والتقدير،،
مختار بازى
23-10-2007, 01:07 AM
وتغير البلد المعــــــــروف علي ازهاننا فلا الناس الكنا بنعرفهم هم ولا هم عرفونا!!:D

دا كلو هـــين بس الفرد ما يكون قالوا عليكـ بقيت حنكوش:D:D
ود المطامير
23-10-2007, 01:28 AM
وأخوك يا الحبيب
على وشك إنو يدخل فى السنه ال12

مره .. عديت 7 سنوات ونزلت إجازه ووصلت المطار بالليل
وكنت خليت خالد أخوى طوله لا يتجاوز نص طولى .. المهم
خارج المطار سلمت على من جو يستقبلونى وركبنا البكسى
من الخرطوم لحد الشرفه ولما وصلت البيت سألت عن خالد أخوى
فى الوقت اللى هو سلم على ّ أول واحد خارج المطار وكان معاى
طول الوقت .. ماشاء الله بقى أطول منى بكتير وما عرفته
عماد عبدالشكور
23-10-2007, 02:06 AM
وأخوك يا الحبيب
على وشك إنو يدخل فى السنه ال12

مره .. عديت 7 سنوات ونزلت إجازه ووصلت المطار بالليل
وكنت خليت خالد أخوى طوله لا يتجاوز نص طولى .. المهم
خارج المطار سلمت على من جو يستقبلونى وركبنا البكسى
من الخرطوم لحد الشرفه ولما وصلت البيت سألت عن خالد أخوى
فى الوقت اللى هو سلم على ّ أول واحد خارج المطار وكان معاى
طول الوقت .. ماشاء الله بقى أطول منى بكتير وما عرفته


ود المطامير يا شقي مرة عديت 7 سنوات ومرة قبلها ومرة بعدها وحسي ليك 12 سنة انت يا زوول ليك كم سنة ؟ هههههههههههههههههههههههههههههههههههههههههه
والله كان كدي انت اكبر من جدي واستاذي ود الطاهر
ود المطامير
23-10-2007, 02:15 AM
ود المطامير يا شقي مرة عديت 7 سنوات ومرة قبلها ومرة بعدها وحسي ليك 12 سنة انت يا زوول ليك كم سنة ؟ هههههههههههههههههههههههههههههههههههههههههه
والله كان كدي انت اكبر من جدي واستاذي ود الطاهر
حبيب قلبى .. عماد
هع هع هع
أول ما جيت قعدت سنتين ومشيت إجازه
وتانى قعدت سبعه سنوات ومشيت إجازه
وهسى داخل على ال 12 يبقوا كم ؟
أكبر من جدك ممكن
لكن ال 2 + 7 + 12 + السنوات اللى عشتها فى المطامير
ما بيساوا السنين العدها أخوى الكاشف وهو يكتب ويمسح فى السبوره
هع هع هع هع
عماد عبدالشكور
23-10-2007, 02:31 AM
حبيب قلبى .. عماد
هع هع هع
أول ما جيت قعدت سنتين ومشيت إجازه
وتانى قعدت سبعه سنوات ومشيت إجازه
وهسى داخل على ال 12 يبقوا كم ؟
أكبر من جدك ممكن
لكن ال 2 + 7 + 12 + السنوات اللى عشتها فى المطامير
ما بيساوا السنين العدها أخوى الكاشف وهو يكتب ويمسح فى السبوره
هع هع هع هع

حبيبنا ود المطامير
ال 21 سنة دي + ...... العشتها في المطامير يا دوب تجي قدر السنين العداها اخونا الكاشف مدرس في مدرسة الشرطة المتوسطة .
ربنا يديكم الصحة والعافية
صلاح ودالطاهر
23-10-2007, 04:03 AM
المشكله في طشة الشبكه ساهله لكن المشكله انو جيت يد وره ويد قدام لاحق ناس ودالبشير وبازي وهشام قايتو دعوب اخير منكم
محمد الشايقي
23-10-2007, 04:28 AM
المشكله في طشة الشبكه ساهله لكن المشكله انو جيت يد وره ويد قدام لاحق ناس ودالبشير وبازي وهشام قايتو دعوب اخير منكم

الاخ الحبيب الحبوب صلاح ودالطاهر
تحيه واحترام
شكرا علي الترحيب واتمنى ان اكون عند حسن ظنكم
مره اخري جزيل لك الشكر وامل ان نتواصل
لك تقديري ايها الحبيب
عمر البشير
23-10-2007, 05:53 AM
حبيبنا شبارقة. الله يكون في عونك وعنا نحنا بعدك.
وذي ما قالوا الغربة تاخذ الكثير وتعطي القليل.
وربنا يحفظنا جميعا والسودان.
ودمت يا غالي.
فتحي همام
23-10-2007, 07:54 AM
مااااااااااااااااااااااااااااااااااااااااااا تقلب المواجع ،،

الغريبة الفردة لساني معاها صاقعة ، يكون دا كترة الكضب!!

:D:D:D:D:D
شبارقة دى حلوة والله عجيتنى يديك العافية
عزيز عيسى
23-10-2007, 09:56 AM
أهو دا الكلام ذاتو البجنن زوزو..
والخايفين منو..
زوزو دي منو يا شبارقة؟..
لو ما عرفتها أسأل أختنا مهيرة خليها تجي تشرحها ليك..
طيب الناس المابتنفع معاهم آلة حاسبة
وطولوا من السودان ومدني من أمثال ودالمطامير الواقع في البير..
أحسب بأصابعينك 13 + 7 = 200 سنة
شفت كيف حتى الحساب بقينا نغلط فيه..
ذكرتني بمقولة مصرية تقول:
المصري لو غاب عن مصر 6 ستة شهور
أهله بقولوا: معليش إحتمال ظروفه ما سمحتش..
ولو غاب عن مصر سنة كاملة..
بقولوا: برضو بنسامحه إحتمال ظروف العمل غلبت عليه..
لكن لو غاب عن مصر سنتين..
أهله بقولوا: دا ما ليهوش أصل.. :D
أها الزينا أنحنا ديل المصريين بيقولوا عليه شنو؟
يازول ضروري تعال أحكي لينا ورينا الحاصل شنو..
أخوك عايز يعرف مصلطحات جديدة علشان ما يكون
طاشي شبكة أو بالفصحى القديمة (مسطح) زيك..
غايتو الله يكون في عونا.
ود المطامير
23-10-2007, 12:01 PM
ودالمطامير الواقع في البير..

هع هع هع هع
عمّى الحبيب ... عزيز عيسى
سلام والله مشتاقين تضحكنا من الأعماق

والمشكله طلعنا من الحكومه وبقينا ناس شركات
يعنى مافى إجازه قبل سنتين
يا نور العين بيتنا .. بيتنا فى المطامير لسه بره الحله ولأ وين ؟؟
moh_alnour
23-10-2007, 04:54 PM
دنيا لا يملكها من يملكها
أغنى ما فيها سادتها الفقراء
العقل من أخذ منها بأستحياء
والجاهل من ظن أن الأشياء هي الأشياء

ألف حمداً لله على السلامة يا شبارقة ، والله يا شبارقة دا ذاتو المجنن بوبي وبوبي دا منو أنا ما عارفو لكن أسأل منو الأستاذ : عزيز عيسى
نزار حسن محمد
23-10-2007, 07:48 PM
الاخ الحبيب الحبوب صلاح ودالطاهر
تحيه واحترام
شكرا علي الترحيب واتمنى ان اكون عند حسن ظنكم
مره اخري جزيل لك الشكر وامل ان نتواصل
لك تقديري ايها الحبيب (( مشاركة اخوانا محمد الشايقى ))


ياخوانا ...
انا محتار فى اخوانا محمد الشا يقى
والله ده طشه جنس طشه الناس فى شنوا
والحسنيه فى شنوا حول البوست بقدرة قادر
للمناسبات والترحيب بود الطاهر
شبارقه ..ياخوى هوى طش طشك ساكت
ابورجاء ..لقايت الليله بته بتقول ليه عمى
شبارقة
24-10-2007, 01:13 AM
وركبنا البكسى
من الخرطوم لحد الشرفه

من الخرطوم لحدي الشرفة بي بكسي!!
أوعى تكون راكب ورا كمان!!!
بورتبيل
24-10-2007, 01:19 AM
انت يا شبــــارقة لو طاشي شبكة
زاهر حبيبنا طاشــي عجــــــلة
والادمن طاشي امريـــــــكا .... والبقية تاتي
النيرو
24-10-2007, 02:15 AM
انتو يالمغتربين عندكم العزر لو شبكتكم طشت عشان مدة الغياب كبيرة وكدة , انحنا هنا في مدنى كل يوم بختلف من اليوم القبلو .. وكان ربنا قدرك ومشيت الخرطوم لاي سبب الا تشيل ليك موبايل بشريحتين :D:D:D
شبارقة
24-10-2007, 09:54 PM
انتو يالمغتربين عندكم العزر لو شبكتكم طشت عشان مدة الغياب كبيرة وكدة , انحنا هنا في مدنى كل يوم بختلف من اليوم القبلو .. وكان ربنا قدرك ومشيت الخرطوم لاي سبب الا تشيل ليك موبايل بشريحتين :D:D:D

الله كريم عليهم ....
ما المشكلة المغتربين ، المشكلة أولادهم ، الواحد ما بعرف يفرق بين الرزينة بت كلتوم والرتينة حقت عثمان!!!
عزيز عيسى
26-10-2007, 06:16 AM
والله يا شبارقة دا ذاتو المجنن بوبي وبوبي دا منو أنا ما عارفو لكن أسأل منو الأستاذ : عزيز عيسى

والله يا أخوي mohalnour نفس السعال دا سعلني ليهو الجنى الشقي
كتال الكدايس والكلاب الإسمو ود المطامير بهناك في موضوعه
( صُدفه غريبه جداً .. جداً . (http://wadmadani.com/vb/showthread.php?t=21495) ) وأرد عليك بنفس الرد:

قالوا الأنجليز المستعمرين زمان كان بيربوا كلاب وبسموها (بوبي)..
أها السودانيين خطفوا الإسم من الخواجات وبقوا يسموا بيها كلابهم
علشان الواحد يقولوا عليه راجل إنجليزي خالص.