العمله والكرت الممغنط 1

[محمد عبد الله عبدالقادر]

تفاجأت (حاجة سعاد) بجارتها (نعيمة) التي جاءت لزيارتها وهى تبتدرها قائلة :
- والله البلد دى فيها جنس إشاعات ؟
- كيفن يا (نعيمة)؟
- ما سمعتى قالوا ليكى الحكومة عاوزة تغير الـ (قروش) تااانى؟
- (قروش) شنو البتغيرا الحكومة يا نعيمة ياختى أمبارح القريبة دى ما غيرتا
إحتمال عشان لقوها بتتزور ؟
- هم من أول وكت بتكلفم قدر الملايين دى ما كانوا يعملوها ما بتتزور؟
- والله انا قلت دى إشاعة ساااكت أصلو البلد دى جنها إشاعات
- أقول ليكى حاجة؟
- شنو؟
- يكونو ناس الحكومة ديل عاوزين يغيرو (الخمسة جنيه) وإلا (العشرين جنيه) عشان لونهم واحد والناس قاعده تتلخبط فيهم !!
- هم من الأول ما عاملين جابو ليهم خبراء وتشكيليين وتأصيليين و مدرسة (الواحد) ومدرسة (الإتنين) وشنو ما بعرف داك .. عليكى الله هسع كان قلنا لى (شافع صغير) أعمل لينا (قروش) يعملا بتتشابه ؟
- وحات الله أنا بتاع الركشة الصباح ده عاوزة أديهو ورقه أم (خمسة) جنية أديتو ورقه أم (عشرين) !! عليكى الله عاينى جنس الاذيه دى
كما سرت الإشاعة بصورتها تلك ووصلت إلى ربات البيوت فقد وصلت بشكل آخر إلى شريحة المتعلمين والمثقفين فها هو أستاذ عدلان و سليمان (المحامي) وآخرون يتحدثون فى (بيت بكاء) عم محجوب الذى توفى فى (الحافلة) وهو فى طريقه لصرف معاشه :
- غايتو أنا ما عارف لكن الجماعه ديل عندهم حاجه عاوزين يعملوها ليها علاقة بالعملة والـ (قروش).
- يعنى يكونو عايزين يسوا شنو؟ العملة وغيروها.
- والله أنا بفتكر إنو عاوزين يعملو (العملية) العملوها زمااانك ديك؟
- ياتو عملية؟
- أقصد يرغموا الناس يدخلوا (قروشهم ) البنوك وبعد داك يصرفو ليهم (بالقطارة)
- والله ما أظنو المسألة كده عشان لو كانو عاوزين كده كان ربطو الموضوع بتغيير (العملة الجديدة) !!
- والله غايتو (الجماعة ديل حيرونا) وما عارفنهم عاوزين يعملوا فينا شنو؟
لم تخرج تلك الإشاعة من فراغ فكما يقولون إن اى إشاعة تحتوى على جزء من الحقيقة .. فقد كانت تجرى فى الخفاء ترتيبات لها بالفعل علاقة (بالعملة) لم يكن بوسع اى أحد أن يتخيل (مجرد خيال) ما سوف تأتى به تلك الترتيبات .
قرار تاريخي :
تم قطع الإرسال الإذاعى والتلفزيونى فجأة وبدأ صوت المذيع يعلن فى نبرة (ثورية) بأن هنالك بياناً مهماً سوف يذاع بعد قليل ..
- يا ربى الحكومة إتقلبت وللا شنو؟
- حكومة شنو البتتقلب حليل زمن الانقلابات...
- طيب يعنى الحاصل يكون شنو؟ تكون أمريكا دخلت علينا ؟
- هى كمان قالو ليكى أمريكا دى دخلتا بتدسا ؟ ما بتدخل (سمع وشوف) !!
- أها تطير عيشتنا (البيان) ده يكون بيان شنو؟
سيداتى سادتى الآن يلقى عليكم السيد و(مسئول المال والأعمال) فى الحكومة بيانا هاما يتعلق بالإجراءات المالية الجديدة .. (موسيقى
حازمة!!) ثم :
- بسم الله الرحمن الرحيم وبه نستعين ولا عدوان إلا على الظالمين .. أيها الشعب (الفضل) أحييكم تحية طيبة مباركة واود أن أبلغكم ببعض الإجراءات الجديدة :
فى الحقيقة أنحنا قررنا نسحب (العملة) الموجودة عندكم دى ونستعيض عنها (بكروت ممغنطة) إنتو بعد ده بقيتو شعب (بترولى) والقروش بعد ده ح تكتر فى إيدينكم وجيوبكم ودواليبكم والناس ضعاف النفوس والحرامية ح يطمعوا فيكم وتتعرضوا للنشل والسرقات والنهب عشان كده والله خفنا عليكم وقلنا أحسن نحسم الموضوع ده (نوهائى) ونشيل منكم القروش دى نسحبا وكل زول نسجل ليهو رصيدو فى (الكرت بتاعو) وطبعا مسألة التعامل
عن طريق الكروت الممغنطة دى مسألة العالم المتحضر كلو بيستعملا .. آآى هم قاعدين يستعملوها إلى جانب (العملة) لكن نحنا قلنا مافى داعى (للخبطة) وأخير نعملا ليكم كلها كروت فى كروت .. وما تخافو كل البيانات ح تدخل فى (كمبيوتر) مركزى متصل بالماكينات البتقرا الكروت دى والح تكون متوفرة فى كل محلات البيع والخدمات .. نحنا عاوزين نقول ليكم المشروع ده ح يكلف الدولة الكتير لكن دى خطوة كان لازم منها من أجل أمن وسلامة المواطن ونحن نستشرف عهدا (بتروليا) جديدا واعدا بالثراء !!
.الإخوة المواطنين :
ثقوا تماما أن الحكومة تعمل دائما من أجل سلامتكم وأمنكم وراحتكم وما هذا المشروع غير المسبوق إلا دليلا على ذلك والسلام عليكم ورحمة الله تعالى وبركاته !!
- (ثم وهو ينظر للحضور) : لو فى أى زول عندو سؤال ممكن يطرحو عشان نجاوب ليهو عليهو :
س : بإعتبار ان هذه التجربة لم يسبقكم عليها أحد من قبل هل قمتم بعمل دراسات وافية عن هذا الأمر ؟
ج : والله شوف بصراحة هو أنحنا لو كنا قاعدين نعمل لى مشاريعنا الفاتت دى دراسات ما كانت الحالة وصلت للدرجة دى لكن المهم فى الموضوع إننا (إستخرنا) وإن شاء الله يحصل خير !!
س : ممكن بس توضح لينا سعادتك (المواطن) مثلا لو عاوز يشترى (حاجة)
أكل خضار لحم ح يشتريها بدون (فلوس) كيف؟
ج : كل (الدكاكين) والبقالات والجزارات وكل المحلات التجاريه ح يكون فيها ماكينات موصلة مع الكمبيوتر المركزى الح تكون فيهو حسابات كل المواطنين يعنى المواطن لمن يشترى منها حاجاتو صاحب المحل يدخل الكرت فى المكنة وطوالى تتخصم من (الرصيد) بتاعو وتضاف لرصيد صاحب المحل - مضيفاً- كل محل ح يكون فيهو (ماكينة كروت ممغنطة) موصلة (بشبكة مركزية فى كل البلاد) تقرأ الكرت وتخصم القيمة من الرصيد !!
س : والرصيد ده بجى من وين؟
ج : ده سؤال جميل جدا .. الرصيد ده بجى من المرتب الشهرى البتديهو الدولة للمواطن فى (شكل رصيد شهرى) لقاء ما يقوم به من عمل زيادة على الرصيد الختاهو أول حاجة عند بداية المشروع.
س : ما موقف الذين يعملون فى القطاع الخاص (زول عندو مصنع) مثلاً ؟
ج : المشكلة وين؟ كل القروش العندهم (كاش) ح نسحبا منهم ونسجلا ليهم رصيد فى الكروت بتاعتهم .. بعد داك التعامل التجارى عادى بالكرت إذا كان عاوزين يشترو أو يبيعو أو حتى يصرفو للموظفين والعمال بتوعهم.
س : طيب ناس (الركشات) والحافلات والباصات ديل ح يعملو شنو؟
ج : المواطن العاوز يتوصل بمواصلات عامة ده يمشى يشترى (تذاكر) ونحنا ح نطرحا بفئات مختلفه ولمن يركب (الركشة أو الحافلة أو الباص) يدى التذكرة للكمسارى وفى النهاية الكمسارى يجمع التذاكر دى ونحنا نضيفها للرصيد فى الكرت بتاع سيد الركشة أو الحافلة !!
س : طيب والناس (العطالة) والما شغالين؟
ج : أيوااا .. والله واحدة من موجهات ودوافع المشروع ده محاربة العطالة عشان الناس (العواطلية) ديل يشوفو ليهم شغلة !! نحنا موفرين ليهم الشغل وهم ما عاوزين !! وكمان عشان التسول لأنو البلد كلها إتملت (متسولين) جايبين لينا (الكلام) ... أها تانى اليشوفو ليهم طريقة.
س : طيب هسع لو فى (مواطن) ما أداكم (القروش) بتاعتو ؟
ج : ح يمقلب روحو سااكت لأنو بعد داك القروش ما ح تكون متداولة وغير مبرئة للذمة وما عندهاش قيمة لكن لو أدانا وسلمنا ليها ح نختها ليهو فى رصيدو وممكن يشترى بيها العاوزو أو يتعالج منها أو (يركب بيها مواصلات) أو إن شاء الله يشترى بيها من (ود عمارى) !!
س : نعرف من كده سعادتك إنو حتى (الصعوط) ح يتباع بالكرت الممغنط ده ؟
ج : أنحنا قلنا (قروش تاانى مافى) يبقة مش (الصعوط) لو عاوز تشرب كباية شاى (بالكرت) بعد ده !!
- مواصلاً - يا جماعة الخير الفلوس دى أصلها بدعة وكل بدعة ضلالة وكل ضلالة فى النار ..
( منقول ) ونواصـــــــــــل

[محمد عبد الله عبدالقادر]

تحويل رصيد :
لم يكن للمواطنين إلا الإنصياع للقرار أو أن (يصيعوا)، ففى وقت قياسى تم (تركيب وتوصيل) ماكينات (الكروت الممغنطة) فى كافة المحلات التجارية والخدمية حتى شملت (ستات الشاى) والمهن الهامشية !!.. وأصبح المواطنون لا يمكنهم شراء إحتياجاتهم اليومية إلا من بواسطة (الكروت الممغنطة) لذلك وفى وقت قياسى تم إيداع كل (القروش) التى لدى المواطنين - والتى أصبحت غير مبرئة للذمة - إلى الحكومة وللمرة الاولى فى (التاريخ المعاصر) يعيش شعب بدون (قروش)!!
- عليكى الله يا ست البنات شوفى جنس البشتنة دى؟
- مالك يا عوضية زهجانة؟
- الما بزهجنى شنو ؟ مشيت (السوق قلت اشترى الخضار واللحمة) بعد ما ختوها ليا فى (القفة) وجو يحاسبونى لقو (الرصيد) كملان !!
- طيب ما تشوفى ليكى زول تحولى ليكى منو رصيد؟
- (فى إستغراب) بالله هو ممكن ؟
- كيف يا ست البنات ناس الحكومة ديل ما ظبطو الحكاية ظبيط شديد ... لكن بشيلو رسوم على تحويل الرصيد- !!
- حليلو هو .. حياتنا كلها أصبحت رسوم وتحويل رصيد - مواصلة- طيب افرضى ما لقيت ليا زول يحول ليا رصيد أشترى بيهو؟
- فى الحالة دى ما عندك غير تشيلى ليك (غويشة) تلفزيون .. تلاجة أى حاجة وتمشى (تبيعيهم) وتغذى (رصيدك) !!
- والله يتجازو عاوزين يعنى يعدمونا السارحة والمارحة !!
عبد الحميد فى المواصلات :
- بعد صعوبة وجد (عبدالحميد) له مقعداً فى الحافلة المتجهه (للكلاكلة اللفة) ذاهبا لأداء واجب العزاء فى قريبه الذى توفى بالأمس...
- التذكرة يا حاج؟
- تذكرة شنو هو الحكومة دى خلت لينا قروش ندفع بيها تذاكر؟
- يعنى شنو يا حاج ؟ مشينا بالله.
- أمشيك دى شنو يا ولد .. مش الحكومة قالت بتعمل لينا هى أى حاجة؟
- بالله يا حاج ما تدخل معانا فى نقاشات اول الصباح جيب تذكرتك ذى باقى خلق الله ديل.
- والتذاكر دى بجيبوها من وين؟
- شفت (الاكشاك الحمراء) الفى مواقف المواصلات دى؟
- أأى
- بس تمشى تشترى التذاكر وتديهم كرت الرصيد بتاعك يخصمو منك.
- وكان رصيدى منتهى؟
- تركب الظلط طواااالى يا حاج !! (ثم بصوت عال) : بالله يا معلم أقيف نزل الحاج ده يمشى (يحول) ليهو تذاكر !!!
عرس صلاح :
عندما بدأ تنفيذ ذلك القرار كان (صلاح) على وشك أن يقوم بإكمال نصف دينه من (زميلته فى العمل) .. كان المبلغ الذى قام بتحويشة ومن ثم قام بتسليمه (صرة بى خيط) للحكومة و(كتبته) له فى (كرتو) كرصيد هو (خمسة مليون جنيه بالقديم) !!
- هسع نبدأ نشترى الشيلة دى كيف؟
- شنو كيف ؟ تشيل (كرتك) وعلى (سعد قشرة طواااالى).
- طيب هسع قولو أنا إشتريت (الشيلة) بالصورة دى .. وجبت الصيوان
والأكل .. أها (المهر) ندفعو كيف؟
- شنو تدفعو كيف ؟ إنت ما قالو ليك؟ المهر ما بقى (تحويل رصيد).
- كيف يعنى؟
- يعنى تشوف الكرت بتاع الحاج أبو العروس(رقمو كم) وتقوم تحول ليهو (المهر) فى حسابو.
- كويس دى خليناها، هسع (حنان مس كول) الح نجيبا تغنى فى (الحنة) دى نديها (قروشا) كيف؟
- والله عندك حل من (حلين) يا تدفع ليها بى طريقة (المهر) وتحول ليها حقها (رصيد) أو تشترى ليها بى حقها (غويشة) دهب أو تياب أوهدايا من رصيدك وتديهم ليها !!
بعد شهر من التنفيذ :
- أختفت (القروش) أصبح لدى كل مواطن (كرت ممغنط) يقوم بواسطته بشراء كل مستلزماته إبتداء بالأكل والشرب و(الجمرة) وإنتهاء بالسجائر والمواصلات وود (عمارى) !! لم يمر وقت طويل على تنفيذ المشروع حتى إتضح للمواطنين تماماً أن شيئاً هاماً ينقصهم وأن هنالك معاملات كثيرة قد أضحى إنجازها من الصعوبة بمكان وأن ما قامت به الدولة من سحب للقروش له أهداف أخرى لا علاقة لها بأمن وسلامة المواطن من السرقة والنشل وخلافه كما بشرت بذلك الدولة لتبرير المشروع . وقد ورد ذلك فى تحليل قام به أحدهم فى إحدى الصحف اليومية حيث لخص دوافع
المشروع فى النقاط التالية :
- يمكن للدولة معرفة ما يمتلكه أى مواطن فى أى لحظة.
- لن يستطيع المواطن بعد الآن التهرب من الضرائب او الزكاة أو الرسوم والجبايات إذ أنها سوف تخصم مباشرة من رصيده.
- لن تحتاج الدولة لكل ذلك الجيش الجرار من الموظفين و العربات الفارهة والمكاتب المكندشة الوثيرة التى يستخدمها العاملون عليها (الضمير طبعا عائد للضرائب والرسوم والجباياااات بس) !!
- يمكن للدولة التعرف على (حركة السيولة) ورصد عمليات (غسيل الأموال) ومن ثم التعامل معها !!
- مع أن الكل يعلم بأن نسبة الفقر تزيد عن (90%) إلا أن الدولة تستطيع بواسطة النظام الجديد أن تعرف بالضبط النسبة كم وتسعين وكم من عشرة !!
- معرفة عدد (البدون) وهم أولئك الذين لا يمتلكون من حطام (الدولة) شيئاً ولم يتحصلوا على تلك (الكروت الممغنطة).
تداعيات :
بعد أن تم (سحب) الفلوس من (ايدى المواطنين) ومضى شهر على تعامل المواطنين (بالكروت الممغنطة) كان من الطبيعى أن تختفى من حياة (المواطنين) بعض السلوكيات كما تظهر سلوكيات أخرى أملتها (ظروف المرحلة) !!

[محمد عبد الله عبدالقادر]

سلوكيات أختفت (1) : كشف العريس :
بعد أن قام (العريس صلاح) بشراء كافة متطلبات (العرس) من (شيلة) وبعد ان قام بدفع المهر (بالإنجاز كارد) من رصيده لرصيد (أبوالنسب) ذهب مع صديقه (جمال) لسوق الجملة لشراء حاجيات (العزومة) وبعد ان قام بإنزال عدد من (باغات الزيت) وصفيحتين من (الجبنة) و(بواكى الشاى) وخلافه قام بإعطاء صاحب المحل (الكرت) ليقوم بخصم قيمة الاشياء إلا أن صاحب المحل وبعد أن قام بادخال الكرت فى الماكينة إلتفت إليه قائلا:
- والله يا استاذ رصيدك ده ما بيكفى.
- (فى إندهاش) معقولة ؟ ده لسه لا أدينا (حنان مس كول) ولا بتاع (الصيوانات) و..
- رصيدك العندك ده يا دوبك يشترى ليك (صفيحتين الجبنة) !!
- (يلتفت إلى صديقه جمال) : والعمل يا جمال؟
- والله أنا يا صلاح ما عندى رصيد كان حولت ليك !! لكن حقو تشوف ليك زول يدينك وبعدين من القروش البجيبا (الكشف ترجع ليهو).
بما أن (صلاح) شخص إجتماعى ومجامل جداً فى المناسبات و(بيدفع) فقد وجد أن حديث (جمال) منطقى جدا فراقت له فكرة (الإستلاف والدين) على أن يقوم بتسديد (تحويل) ما عليه من ديون من (قروش الكشف) وقد كان، إذ قام (صلاح) بإستلاف (القروش الناقصة) من عدد من الأصدقاء والمعارف رغم رصيدهم التعبان مع تأكيده لهم بأنه سيعيد لهم ما قام بإستلافه بعد إنتهاء مراسم الزواج مباشرة (من الكشف وكده) !!
جاء يوم العزومة .. خرجت (الصوانى) للمدعووين ممتلئة بما لذ وطاب من (ضلع) و(محشيات) و(طبائخ) وسلطات .. جلس جمال صديق (صلاح) على كرسى أمام باب الحوش من الداخل وبالقرب من حوض (الغسيل) واضعاً أمامة تربيزة صغيرة وممسكا بكراس (جديد) وقلم علامة (الكشف هنا وكده) إلا أنه ولدهشته قد لاحظ أن جميع المدعويين يقومون بغسل ايديهم بعد الاكل ويتجاوزونه خروجا من الباب الشئ الذى حدا به لسؤال (الفاضل) شقيق (صلاح) الاكبر:
- ناسكم ديل بياكلو ويطلعو طوالى مالهم ما بيدفعو فى الكشف؟
- إنتو ما أجرتو ليكم (مكنة) ؟
- مكنة شنو كمان؟
- مكنة (الكروت الممغنطة) ؟
- ونجيبا ليه؟
- عشان يدفعو ليكم فى الكشف يعنى يدفعوا ليكم كده بى شنو!!!
سلوكيات إختفت (2) : حق اللبن :
بعد أن وضعت (التومة) بالسلامة وعادت من (الدايات) تحمل رضيعها وجدت شقيقتها الكبرى (ميمونة) وقد قامت بتجديد (الستائر) وأرضية (حجرة النفاس) وذلك بشراء (مشمع) مربعات (بنى) كما قامت بشراء ملايات (للبرندة) والسرير (الدبل) .. ما أن رأت (التومة) عند دخولها للبيت تلك التغييرات حتى صاحت فى (ميمونة):
- والله يا ميمونة بالغتى عديل كده .. شنو التغييرات الرهيبة دى؟
- قالوا ليكى أنا عويرة عاوزانى أخلى البيت مبهدل زى ما كان والنسوان يشيلو حسك
- ولقيتى القروش وين؟
- الحاجات الشايفاها دى كلها ديون .. وتحويل رصيد ساااكت.
- وح نسددا من وين بعدين.
- إنتى نسيتى إنك زولة مواجبة وعندك قروش عند النسوان ديل .. البتلد كلها إنتى ماشة ليها وخاتا ليها العشرة والعشرين (حق لبن) والمات ليها زول والطهرت أولادا والبتها عرست ؟
- لكن يا ميمونة ياختى بعد ما شالو (القروش) وجابو (الكروت) النسوان ديل باقى ليكى بيدفعن ليا كيفن؟
- إنتى ما عارفا؟ ما بس (نأجر لينا) مكنة كروت) ونختها قدام الباب (والبتجى طالعة) كلها تدخل (كرتا) وتحول ليكى .. والله والله يومداك فى (نفاس) منال بت الصبر دى النسوان (كروتن) تطاقش.. وكان على الزول البقعد ليكى فى المكنة أنا دى بقعد ليكى!!
لم تلبث (ميمونة) أن قامت (رسلت) ابنها (مهند) بعد أن أعطته (الكرت الممغنط) الخاص بها قائلة :
- تمشى للمحل البأجرو فيهو ناس (الحكومة) مكنات الكروت تأجر ليك منهم مكنة (3 يوم) وتديهم (كرتى ده) عشان يخصمو قيمة الإيجار !!
خرج (مهند) متجهاً نحو محل (تأجير الكروت) بينما جلست (ميمونة) فى إنتظاره بعد ان رتبت (قعدت التومة) وقامت بتغيير (حفاضات المولود الجديد) وتجهيز (العروض) للضيوف والزوار من حلاوة وخبيز وبارد .
بعد حوالى ساعة من الزمان عاد (مهند) وما أن رأته والدته حتى صاحت فيه :
- المكنة وينا ما جبتها معاك
- والله يا أمى لقو الرصيد بتاعك ده ما بكفى قيمة الإيجار.
- ليه ما بكفى أنا كرتى ده فيهو ميت الف !!
- والله قالو الإيجار في اليوم بى ميت الف .. وكمان بيخصمو أمنية خمسمية الف !!
- ووووب عليا كان كده (حق اللبن) ما راح شمار فى مرقة!!
ظواهر جديدة (1) :الرشوة الاليكترونية :
بالطبع فقد كانت واحدة من محاسن (إختفاء القروش) هو الحد من (ظاهرة الرشوة) والتى أُبتليت بها البلاد فى العقود الاخيرة فقد تقلصت ظاهرة الرشوة إلى حد كبير على الرغم من أن بعض المرتشين من ضعاف النفوس قاموا بتحويل المسألة من صورتها المادية إلى صورة عينية وبدأت الرشوة تتفاوت فى نوعيتها العينية من (زجاجة عطر) إلى (السبائك الذهبية) وحيث أن (القروش) فى حالة الرشوة سهلة الإخفاء مما يجعل القبض على المرتشي صعباً فقد تفتقت قريحة بعض المرتشين حيث قاموا بوضع رقم (الكارت) الخاص بهم مع بقية معلوماتهم الموجوده فى كروت الزيارة (visiting cards) الخاصة بهم فهذا (حسنين صابر جمعة) مدير (المشتريات) بإحدى المصالح الحكومية وقد كتب على (كرت الزيارة الخاص به) :
حسنين صابر أبواللغف
مدير المشتريات
تلفونات : مكتب 0187249000
موبايل : 0912456380
بريد إليكترونى : mashi-imorak@hotmail.com
كرت ممغنط :00122-1323-7650
ظواهر جديدة (2) : الصرفة الإليكترونية :
تفاجأ احد الموظفين المسئولين فى نقاط (تحويل الرصيد) بعدد من النسوة تتزعمهن أضخمهن (جتة) وهى تحمل فى يدها عددا من (الكروت الممغنطة ) وهى تقول له :
- (وهى تمد له الكروت) : شوف هنا .. كل كرت من الكروت دى تشيل منو (خمسين الف بالقديم) وتختها ليا فى الكرت ده ( تناوله الكرت الخاص بها) !!
- كيف ما فاهم !!
- دى عاوزة ليها فهم أنا و(النسوان) الشايفم ديل داخلين لينا فى (ختة) النفر (خمسين الف) واليلة الصرفة بتاعتى.
- أها وعاوزانى اعمل ليك شنو؟
- شنو تعمل ليا شنو؟ تشيل ليا من رصيد كل واحدة (خمسين الف) وتدخلهم ليا فى (كرتى) ده.
- لكن يا حاجة ح نشيل من كل كرت (خمسة الف) رسوم تحويل !!
- خمسة شنو؟ يعنى العشرة نسوان ديل الحكومة ح تشيل فيهم (راس) عديل ؟
هى الحكومة دى خاشة معانا (الصندوق) ده !!
- يا حاجة إنتى من زمن الحكومة !!

[abomazeen]

لكـــــن ....

والله إبداع عديل كــده !!!!

المزيد .. المزيد بالله عليك يا حبـيــبـــنا !!!