المساعد الشخصي الرقمي

مشاهدة النسخة كاملة : يوميات وحكاوي فى مدنى


بابكر
07-09-2007, 11:09 AM
كنت بالسودان لقضاء الاجازه السنويه
كانت بحق اجازه ممتعه
كميات الامطار الهاطله,, يوميا تقريبا !!
الجو الغائم بأستمرار !!
وكمان مدنى تغيرت كثيرا !!
صارت مثل زمان !!
حديفة وقيع الله زاهيه ((لكن قيل لى الدخول بالفلوس ))
وهنالك اماكن لتقابل فيها اصدقائك ,,) بنات واولاد !!وتأكل الجاتوه والباسطه والمحل بجوار حلويات سلا
هنالك قابلنى على موعد الغالى عريس المنتدى الرائع الحساس (سواح),,, حيث اعجبنى المكان والذى كان يعج بالناس شباب وشابات وشخصيات من المشاهير اطباء ومهندسين وحرفيين !!

وذهبنا ايضا الى الشاطىء الجميل حيث استعدنا الذكريات العذبه الجميله
فعلا لقد تغيرت مدنى وخلعت ثوب الحزن وتعطرت مثل سابق عهدها وصارت زهرة المدائن بحق !!
ذلك العبق الجميل والالفه والمحبه انها مدنى مدينتى التى ولدت بها ,,اعشقها ارتاح فيها!!
وقابلت ايضا عريس المنتدى الثانى ((ابو مرام)) غاندى
والذى اشكر له حضوره لى فى المنزل هو وعروسه ,,,,انه جزء من نسيج ودمدنى المتآلف (السمح والزين ) اليك حبى وتقديرى ايها الفارس الرائع وامنيانى لك ولعروستك ست الحسان ,, الحياة السعيده الهانئه الكريمه وتغلبها بالمال وتغلبك بالعيال
ولا وانسى فول ابوظريفه الحار,, وخاصة فى مثل تلك الاجواء الغائمة
بس الشىء الزعلنى ,,,, الشاحنات الكبيره جدا والطويله جدا جدا ,, يعنى (((قطرعديل ماشى فى الشارع )) والله لوعاوز تتجاوز الاتتشهد على روحك وتتوكل وتدوس البنزين للصاجة ,, وامكن تتخارج وامكن لا !! وتبقى عليك حكايه ابو مرام فى طريق بورسودان !!!!(سيارتو اتكسرت واتفجقت لانه عاوز يتجاوز القطر !!
وبعدين لوارى اهل العوض الشايله الخضار دى ,, لافيها خطرات ولاعواكس !! تظهر ليك فجأة فى الشارع لافرامل بتحلك ولابورى (( ياناس نحن فى القرن الواحد والعشرين )) حرام والله
وللحديث بقيه بكره كان ربنا احيانا !!!
صلاح ودالطاهر
07-09-2007, 10:43 PM
بابكر خصمتك بالنبي كان تغيب علينا
مرتضى يوسف العركي
07-09-2007, 10:46 PM
الحبيب بابكر
اللقطة حلوة وواصل الحكاوي فنحن انتظار
مدنيّة
07-09-2007, 10:51 PM
دا شارع مدني واجرك علي الله ياعم بابكر :D

منتظرين باقي الحكاوي
abomazeen
07-09-2007, 10:55 PM
وفي الانتظار نترقب ... !!!
الزبير محمد عبدالفضيل
08-09-2007, 02:32 AM
حمدالله علي سلامة الوصول أخ بابكر وفي أنتظار المزيد من الحاكاوي والمواقف الطريفه
بابكر
08-09-2007, 01:49 PM
أها يا شباب مدنى العسل جيناكم !!اولا والله المقصــــــــه دايره تشقنى!! تعرفوا ليــــــــــــــــــــــــــــــــــه؟؟؟؟؟؟يمين بالله لى اكتر من ساعه بكتب ليكم فى الموضوع وكان الكلام مدنكل جد!!ولمن داير انزلو,, الااسمع ليكم اللاب توب ((آآآآآى عندى لاب توب))) ,,,,الجهاز فجأة كده قام يطقطق وانطفأ براهو !! ومسح معاهو التعب داك كلو !!
المهم بكتب ليكم تانى لكن مابكون زى الاول !!!
المهم كلــــــــــــــــه كـــــــــــــــــــــــوم ومشتشفى مدنى كوم تانى !!!!!
ولنعمل مقارنه !!كده ايام زمان,,,, ((طبعا معظم الشباب هســـــــــــــــــــــع مابيعرفوا ا الكلام ده !!!اولا المستشفى كانت انظف من الآن بكتير,, وكانت منظمه وجميله,,,, والعنابر نظيفه ,, والممرضات والممرضين ,,, بيووووض زى بلوبلو !!!وكمان عندهم شرايط حمره فى الكتوف وديل التحت التمرين !!والعندهم نجمة فى الصدر,,, ديل كلامن تانى !! مؤهلين وجاهزين !! والعجب لمن تشوف ليك ممرضه زرررررررررررقــــــــــــاء وخاته ليك النجمه فى صدرها !! اهلنا العرب,, والله لمن يتكيفوا !!! وزمان كان الممرضات قطيمات,, لكن والله شايفات عملهن ومابشحدن واحد,, بل كان عندهن عزة نفش (( وقرضمه كمان ))
والدواء كان متوفر زى الهبل ,,, الاجزاخانه مليانه !! الدكتور يكتب ليك روشته فيها خمسه ادويه بتصرفها كامله !! وكمان تجدع منا وتدى ناس الفريق معاك أى والله ,,,وتعال شوف يوم الزياره ده كمان كلامو تانى وهى يوم الاحد من كل اسبوع !! الدخول طبعا مجانى والغفير اسمو جاموس معروف ,,, نوباوى عاتى بس طيب جدا !! مره فى مره عندها ولدها راقد ,, دايره تدخل قامت نست اسمو ,, قالت ليهو يا (جرقاس ) خلينى ادخل !! قام شاكلا ليك جنس شكل !! وقال ليها انا كلب تقولى لى ( جرقاس ) قام طردها ليك !! والله لى اسع حالتها تحنن!!!
ويوم الزياره ده بيجوا ناس الضهره من الصباح ,,, وينكبوا فى مدنى (سياحه عديل )) وتلقى الشجر مليان ناس وضل ,,الحيط مليان ناس!!
والحكايه ذى العيد !! أى والله,,, بهجه وزحمه ,,ولمه ,, زى المولد
وطبعا الناس بتفرش وتبيع الحاجات !! ,, الاقمشه ,, الحلل ,, الكبايات ,,,,,القفف,,وهلم جرا !! بأختصار كل شىء يباع هناك قدام المستشفى !! سوق رهيب وكبير !!
انا كنت فى الزمن داك طالب فى الوسطى
وكمان وبياع خطير فى يوم الزياره !!!وده موضوع بكره ان شاء الله,,, كان ربنا أحيانا !!
ا
بابكر
08-09-2007, 02:22 PM
سادتى الاحباء
صلاح الطاهر
مرتضى العركى
ومدنيه الخرطوميه!!الرائعه المهذبه
ابو مازن
والزبير
اشكركم على مروركم الكريم وارجو ان اكون عند حسن ظنكم جميعا
وارجو ان انكون صادقا فى سردى لان الوقائع تأريخيه بالفعل
شكرا احبابى والى اللقاء ان شاء الله
نزار حسن محمد
08-09-2007, 09:55 PM
ويوم الزياره ده بيجوا ناس الضهره من الصباح ,,, وينكبوا فى مدنى (سياحه عديل )) وتلقى الشجر مليان ناس وضل ,,الحيط مليان ناس!!
والحكايه ذى العيد !! أى والله,,, بهجه وزحمه ,,ولمه ,, زى المولد

الليله ..والليله ..بصات ابورجيله..هوووووى ياود المطامير جابوك فى المنتدى العام:D ..آآآى والله عمك بابكر خته قرض ..عفيت منك يا ابورجال
بابكر ازيك وكيفنك وحمدالله على السلامه ..شكيت الاب س توبه بتاعك ..الضيع تعبك وخلانا وحاتك منتظرين ..
تحياتى لك وفى انتظارك ...
لك الود
ابومرام
08-09-2007, 09:58 PM
لك التحية اخي وصديقي وحبيبي بابكر ولك مليون تحية وتحية وهذا كله من اصلك لانك اصيل كم تاصلت فيك الخصال النبيلة حتى صرت شمعة تضي لنا دروب مدني وكم تمثلنا وتمنينا ذرة من خصالك وكم انا سعيد بلقائك في مدني وكم سعدت وسررت بتلك الساعات سوف احتفظ بكل ثانية منها في اعز مكانة عندي ولا استطيع ان اجسمها تفصيلا لان حلاوة اللقاء حجبت كل جميل يعبر عنه بالحرف نسأل الله يجمعنا بك وبالاخوة الاكارم في جنان الفردوس الاعلى 0وكما لا يفوتني ان اعكس ضوء و لو القليل من لقاء اخوتي مرتضي العركي الذي فاجاني وبينما انا في حفل العرس (الحنة) وانا مندمج وسط ا لاهل وهنالك شخص يسالمني ماهو الا العركي لك التحية من كل قلبي وتحية خاصة جدا لاخي وحبيبي الذي فاجاني ايضا الاخ (ضياء الدين ) سواح اتى هو وعروسته فكانت ليله لا تنسى كم سعدت عندها وتاكدت حسيت بمعنى الاخوة الصادقة صراحة سعادة لاتوصف ولو تضاعفت حروف اللغة العربية لان السعادة غمرتني هاهم اهل مدني وها هي مدني عودتنا دائما ان نواصل الاخ ابو النور والتحية لك اخي نزار حسن و التيمان وكوكبة من الاحباب لا للحصر هم فعلا شموع تضي مدني لا نعرف بدون لقائهم كيف نقضي الاجازة في مدني
عموما نسال لله ان نلتقيهم جميعا في اطيب البقاع والي اللقاء - اذا مد الله في الاجال
بابكر
08-09-2007, 10:32 PM
..بصات ابورجيله..هوووووى ياود المطامير جابوك فى المنتدى العام
هووووووووووووى يانزار انت مالك داير تجيب الفتن انا اسع قلت ود المطامير ولا وقلت عرب الجزيره زمان لمن يجو مدنى يقعدوا فى ضل الشجر وتلقى المره لو عنها(( كوفاره)) تشرب ليها قزارة ببسى تقوم تتكرع باع باع اكان المقص والكوفاره تروح !!
بابكر
08-09-2007, 10:40 PM
الغالى الحبيب ابو مرام

ايها الوفى بكل ماتحمل هذه الكلمة من معانى

ايها النبيل نبل اهلنا الطيبين ,,الذين لم تغيرهم الايام ولن تقدر !!

شكرا لمداخلتك الكريمه
مدنيّة
08-09-2007, 10:42 PM
والله سردك جميل جدا ومشوق

واصل من غير ما تفاصل
ابومرام
09-09-2007, 11:20 PM
استأذنك استاذي بابكر في بعض السرد الرائع عن الام مدني وقبل ان تخرج من شارع المستشفى والشي الذي لمسته ولفت انتباهي وانا بعد غياب دام (6)سنوات عنها وجدت التقسيم في المستشفي بمعني كل قسم لحاله زمان كان تقطع ليك تذكرة واحدة وتحوم حوامة السوق داخل المستشفى تمش شمال ويمين لكن الزمن دا بقي الكلام تاني داير تخش الحودث لحالة النساء والتوليد لحالة الذرة لحالة والشي العجبني في التطور في قسم الذرة هو النظافة الفائقة لا تتصور ان هذا القسم داخل مشتشفى مدني الذي عانينا منها كتيييييييييييييييييييييييير عموما نهضة ملحوظة لكن صراحة الشي الكرهني عامة ناس المرور ؟؟؟؟ في السودان عامة الواحد يشوف لوحتك سعودية كانك عملت جرم تمشي وتتشهد على روحك كانك في تحقيق في عملية قتل وربك يعلم هنا في السعودية الواحد حريص ياخد الاقامة لكن في السودان احرص انك تاخد الرخصة والاوراق كاملة قبل ماتجهز وانت طالع 0معزرة اخوانا ناس المرور قالوا بسموهم ناس النهب المسلح والله هو حقيقة نهب مسلح ما حصل مشيت السوق ومافي حد ما وقفني وبالزات في الليل اليوم داك امانا ما تشوف شوف الا تنزل التراب برضو ما بخليك 0الظريف في واحد مرة لقاني سايق برخصة سعودية والسيارة محلية قال لي بصريح العبارة (اسمع يا ابو الشباب انا قلت ليك ما بخليك يعني مابخليك بس بجاملك )ههههههه والله على ما اقول شهيد صراحة انا اتخيلت نفسي في الملجة ولا الملابس دي حالة يا جماعة - نخلي الباقي لبابكر يدينا التفاصيل وكان حين بنقابل اذا مد الله في الاجال
بابكر
10-09-2007, 05:42 AM
ياشباب انا عاتب عليكم !! شويه يعنى انا بكتب ليكم فى الموضوع بتاع الحكاوى ولا حتى شويه تشجيع !! القروا الحكايات (80 ) والعلقوا (8 ) ,,,,,, امكن ماعاجبكم !! احسن اوقف !! لان التفاعل مهم جدا جدا اذا كان الموضوع يراد له الاستمرار وانا احترم رغباتكم التى وضحت من خلال الاحصائيه اعلاه!!!

شكرا لكم ايها الاحباء!!!
mahagoub
10-09-2007, 05:55 AM
بابكر يديك العافيه انعشت فينا الكثير من الزكريات مع انى كنت هناك قبل 5 شهو رلاكين بوصفك اللذيذ شوقتنى للعوده لك الاجلال
ابومرام
25-09-2007, 08:51 PM
دائما نترقب منك الكثير والكثير في السلسلة التي تعكس بها الضوء على ملاحظاتك عن مدني في اجازتك ياريت ماتحرمنا عن الكثير الذي افتقدناه وبعض المعالم التي لم نتطرق اليها نسبتاً لضيق الوقت نامل ان تواصل لنا عن تلك الدرر ولك مني مليون ود وود .
صلاح ودالطاهر
25-09-2007, 10:28 PM
عمي بابكر انا هناك ماقلت ليك خصمتك بالنبي كان تغيب
صالح ابوشوارب
25-09-2007, 10:50 PM
الاخ الفنان بابكر ود الصول
دائما انت وود الماحى وعزيز وود الماذون وعمك تنغو في القلب وكتاباتكم رائعة الواحد ياكل وما يدى الجنبو .. عشان كدة كنا معاك وما دايرين ندى الجنبنا .. طبعا انت عارف يوم الزيارة ده يوم عزيز على . انا كنت ببيع الليمون (لزوم شربات العيان ) والنعناع في البصات يوم الاحد .. كمل الحكاية وما تنسي ربطة المساويك هههههههههه
ود المطامير
25-09-2007, 11:35 PM
..بصات ابورجيله..هوووووى ياود المطامير جابوك فى المنتدى العام
هووووووووووووى يانزار انت مالك داير تجيب الفتن انا اسع قلت ود المطامير ولا وقلت عرب الجزيره زمان لمن يجو مدنى يقعدوا فى ضل الشجر وتلقى المره لو عنها(( كوفاره)) تشرب ليها قزارة ببسى تقوم تتكرع باع باع اكان المقص والكوفاره تروح !!
الله يديك العافيه والله ضحكتنى من جوه القلب

عمّتى الرساله جات من مدنى وجابت معاها قزازه ببسى
وطبعا مع خجت البكسى وسخانة الجو القزازه كبست
ولما وصلت البيت قعدت فى البنبر ونحنا حولينها عشان تدينا جقمه
وفتحت القزازه .. والببسى .. فاااار .. وهى قامت مخلوعه تضاير فيها جاى جاى
ولما الببسى راق لقت نص القزازه فاضيه وبحرقه قالت
_ والله ناس مدنى ديل ممسوخين مساخه , مالين القزازه نص ببسى ونص أندروس .
ود المطامير
25-09-2007, 11:39 PM
والله صدقت
يوم الزياره للمستشفى عندنا يوم عيد

ولو ما عندنا زول راقد بنمشى نضهب ساااى .
ود المطامير
25-09-2007, 11:43 PM
أجمل الزكريات فى مستشفى مدنى
لما حبوبتى الله يرحمها كانت راقده بالمستشفى ( عملية حصوه فى المراره )
ورقدت تلاته أشهر ... وأجرى لها العمليه أخوها .. جدى .. د. ابراهيم الأمين

والله يا بابكر .. أخوك سمن عديل من كترة السفسفه .
نزار حسن محمد
26-09-2007, 12:33 AM
بابكر ود الصول ..عليك البينى ..ما بينك ..تعال ..وعز ..لنا ..حليفت ود الطاهر
منتظرنك ..يادخرى ..ود المطامير ذاتو جاء
وصدقنى تانى الا تقول الروب عدددديل وانت احسب بعد كده عدد المشاركات ..
يالله يالحبيب قرب تعال ما تبتعد ..ودعتك الله
بابكر
26-09-2007, 10:17 AM
الاخوهوالابناء الاحباب لكم التحيه !! واهو كده فتحتوا نفسى !!
أها نحنا وصلنا وين ؟؟ يوم الزياره !!وماادراك مايوم الزياره!!
طبعا هذااليوم ذى يوم العيد بالنسبة لى ناس الضهره !! اللوارى{ والكندات} الكنده دى عربيه من زمان اسع ما موجوده!!! اسألوا منها ابو شوارب كان سواق فى واحده زمان!!!
وتلقى العرب من الصباح فارشين وقاعدين تحت الشجر يوم الاحد ,, منتظرين باب المستشفى يفتح !! وغالبا كان بيفتح الساعه 2 بالظبط
وانا طبعا بكون من الصباح مشيت لى ود اب رمضان,, اديتو ساعتى الجوفيال,,, وادانى عده {الساعه ضمان } العده طبعا كبايات ,,فناجين .. ملاعق ,, وصوانى..وبراريد ,, وكل شىء يخطر على بالكم ,, اشيلها للعتالى وانزلها قدم المستشفى ,,, افرشها واتفنن فى رصها استعدادا لبداية سوق الزياره!!!
دعونى اصف لكم المشهد !!! الشارع امام المستشفى ملىء عن بكرة ابيه نساء ,, اطفال ,, رجال ,,شبان من كل قرى الجزيره اختلطوا فى فسيفساء رائعة ,, لوحة جميله ,, تلمس فيها طيبة القرويين ,, واندهاشهم ,, وعفويتهم ,, السيارت قليلة جدا الشارع ملىء بالناس ,, لااثر للسيارات!!
معظم الناس نساء ورجال حضروا للتسوق .. وقليل منهم من له مريض !!
احضروا معهم اكلهم !! ومعظمهم !! بدأوا يطبخون تحت الشجر!!
بدا الكرنفال !!اشتدت حركة البيع !!ونحن نرفع اصواتنا !! منادين لسلعنا !! {{يلا الكبايات 6 بريال }} وتجد آخر ينادى ,, المتر بريال كتر الغيار!!
وتجد بائعات الازيار من قرية حبيب الله وكذلك باعة الليمون .. وباعة الجرجير و!!!!وكل يعرض سلعته .. والناس تتدافع وتتزاحم !!
واخير ينفض السامر !!
ترى عربات القرى !! الكماسره يصيحون {{ سوريبا الكمير 88 ود شمعه قسم الله رميتاب }} وكل سائق عربه يعرف ناس منطقتة ,, فينتظرهم حتى يعودوا جميعا !!
ويعود الهدوء مرة اخرى !! احسب ارباحى وارارجع كم بعت وكم بقى !! ارجعه وادفع رأس المال ,,وأخذ الربح والذى كان لايتعدى ريالين !وقد كان هذا المبلغ يفرحنى كثيرا !! اول شىء اطلع حق مجلة { سمير } وحق السينما وحق ايجار العجله !!!
ولنا عوده ان شاء الله !!!
بابكر
26-09-2007, 12:43 PM
تابعونا !!!!!لان هنالك حكاوى رهيبة,,, مزهله!!!! خطيره!!!! جايه فى الطريق !! اشياء ليست للنشر!!!
بابكر
26-09-2007, 10:24 PM
[ "]اليوم سوف احكى لكم عن {الارطه } او حى البوليس !! او الاشلاق !! سميه ما شئت !! فسوف تصل ان شاء الله !![/
[ طبعا اولاد العساكر شكلهم مميز !!! شفوت ومدردحين !! ولايهابون احد !! اولاد عساكر طبعا !!!بالله تلاقى البيت فيهو 12 ولد {العسكر ولادين جنس ولاده } بنلبس فنلة القلشين !! ورداء البردلوبه !!! وقميص الكاكى !!! ((الترجمة عند خالد الصول )) الاستحمام فى {خيره} وخيره دى ترعه جنب المطار !! تصوروا فى مدنى زمان كان فى مطار جميل,, وتهبط فيه الطائرات بأنتظام !! يعنى كل يوم الساعه 4 بتجى طياره من الخرطوم !!والمطار به مبنى جميل !![ ]
[ وهناك البيطرى ,, بجوار حى البوليس !! ناس البيطرى كان عندهم عربيه صغيره وجميله توزع اللبن فى البيوت فى قزاز مميز راقى جدا جدا !!انت تضع الفاضى فى الحيطه وتخت معاهو تذكرة من الدفتر {يعطون دفتر لاخر الشهر } !!ويجى بتاع العربه يأخذ الفاضى ويضع المليات !!بطريقه حضاريه !!لم اشاهدها فى اى بلد حتى اليوم وكان البيطرى يمد الناس بالبيض !! والكتاكيت !!والدجاج !! والجبنه العاده !!والجبنه المضفره!!!! أى والله !!
كان يسكن فى حى البيطرى الفنان التاح مكى واخوه زميلى الحاج مكى كان التاج فى ذلك الزمان عندو عجله مكركعه !! تلقاهو كل يوم فى العصر راكبها وشايل عودو وشاقى اشلاق البوليس!! "]جارنا فى الاشلاق محمدأدم المنصورى !! ساكنه معاهو امه وكانت تناديه وتقول ليهو {{ يا حنين }} وكان كل الناس بتقول ليهو حنين ماعارف [/ غير الاسم الجميل ده ليه؟؟؟ [/ اوكان هناك فى فرقه الموسيقى والتى كانت ملاصقة [ لمدرسة البوليس الابتدائيه!! والتى كان ناظرها عمك قرشى !! اتذكر كان عندو بنت بتقرأ معانا !! (سيده قرشى ) اى والله معانا فى الفصل !!دفعه يعنى ! وكمان عندها عجله بتمشى بيها المدرسه !! اتذكر كان دفعتنا فى تلك المدرسه ايضا ولد حكمباشى مستشفى مدنى !! اسمو ,,عباس ابراهيم ابو الريش! !وولد مدير الرى ! اسمو بكرى حسن كافى !! لست ادرى اين هم الآن !! ومن رواد فرقة المويسقى الذين كنا نشاهدهم بأستمرار !! الفنان محمد الامين !! كان يجى شايل عودو ويتخبط يمين شمال ,,لمن يصل لى ناس جمعه جابر !! جمعه جابر الموسيقار المشهور,, كان عسكرى فى فرقة البوليس !! وعمك مرده دقاق النوبه الكبييييييره !! وعمك عوض طربيجه !! فى فصل الخريف,, كان بيقبض الطير بالشبكه!! ووتتزاحم الافكار والحكاوى!! [/[/ "6"]وخلو الباقى بكره !! ان شاء الله ]
صلاح ودالطاهر
26-09-2007, 11:14 PM
ياسلام عليك يود الصول ربنا يديك العافيه قلبت علينا المواجع والزمن الجميل
مدنيّة
27-09-2007, 12:22 AM
هي ياعمو بابكر النبي فيك
الكلام دا كان سنة كم ؟؟ :confused:

قلت لي زعلان عشان الناس بتقول ليك ياعموووو :(

بيني وبينك مفروض نقول ليك ياجدووو
ونجيب نزار نحكمه بينا :D
محمد عبد الله عبدالقادر
27-09-2007, 12:29 AM
يا سلام يا بابكر على الاشلاق وناس الاشلاق الزمان كنت ساكن في الاشلاق ( في الحقيقة ولدوني في الاشلاق) وكنت ساكن جنب نادي البوليس وقريب من البطري وحي المطار ( الذي انتقلنا اليه لاحقاً - شوف الزمن) وعند اخر زيارة لي تالمت كثيراً لحال الاشلاق العامة والخاصة البيوت تكاد تقع على من فيها، اذكر انه وعند انتهاء الخريف تمر لجنة من الظباط على البيوت كلها حيث تصدر التعليمات بصيانة البيوت التي تاثرت بالخريف وكل ذلك على حساب الشرطة، كان في كل عيد اضحية تذبح الزبائح وتوزع هبر هبر على من لا يستطيع الزبح وهو اصلاً ما كان بحتاج لانو الناس كانت حالة واحدة والله نمرق من البيت الصباح نفطر عند ناس محمد علي حجة ونقيل عند ناس الخير الابوابي وناس خليفه محمد الحسن ونتغدى عند ناس ميرغني حميدة ولا ناس محمد شريف ابو جبون ولا ناس محمد خير والد المرحوم كمال ووالدته الحاجة حواء الشايقية ونمشي نلعب الكورة في الميدان الفاصل بين الاشلاق والمطار ناس فريق وراء ضد ناس فريق قدام وراءواذكر ونحنا في مدرسة البوليس الابتدائية نطلع من المدرسة ونمشي محل الموسيقى نقعد نسمع في ناس الموسيقى لحدي ما يطردونا عشان ما نتاخر على بيوتنا.
ويا ريت تواصل في الزكريات دي