موقف يشرف السودانيين

[المهاجم2]

اخوتى فى المنتدى بعد السلام والتحية
اريد ان اقص لكم بعض الكرم السودانى الاصيل اللذى يعكس اجمل ما فى وطننا الحبيب
كنت بسب او بآخر ضمن افراد بعثة الامم المتحدة فى السودان
اللتى اتت بغرض تقرير عن المجاعة فى السودان
وكنا يومئذ فى منتصف شهر رمضان وبالقرب من منطقة (القريقريب) وقد حان وقت الافطار
فأعترض الاهالى طريقنا كما اعترضوا طريق بقية السيارات وابو الا ان نفطر معهم
ففعلنا وقد اعجب الاجانب بهذا التجمع الضخم علما بأنهم من غير المسلمين
فما كان منهم الا ان ترجلوا خلفى الى حيث الطعام وكانت البهجة والتساؤل لا تفارق شفاههم
وبعد الافطار اردنا التوجه الى مدينة ود مدنى بغرض تكملة التقرير
ففوجئت بالبعثة تتوجه الى الخرطوم فسألت عن السبب فقالوا يكفينا ما رأينا فى الطريق الى
الى حيث نذهب وضحكوا طويلا وكان الضحك لا يحتاج الى تعلم اللغة الانجليزية فشاركتهم الضحك

[مدنيّة]

مرحب بيك المهاجم 2

والكرم السوداني موجود في المليون ميل مربع
وخيرا فعل الاجانب بعودتهم ادراجهم
لانه اللي شافوه في القريقريب ح يشوفوه في مدني وفي غيرها من المدن والقري السودانية

[عماد عبدالشكور]

بلادي اهلاً يا بلادي
الف تحية ليكي من الفؤادِ
بلادي اهلاً .. يا بلادي
صدورنا حماية ليكي من الاعادي

بلادي أنا بلاد ناساً في اول شي
موارثيم..كتاب الله
وخيل مشدود ، وسيف مسنون حداه درع
تقاقيبن تسرج الليل مع الحيران
وشيخاً في الخلاوي ورع

وكم نخلات تهبهب فوق جروفا الساب
وبقرة حلوبة تتضرّع وليها ضرع

وساقيةً تصحي الليل مع الفجراوي
يبكي الليل ويدلق في جداولو دمع
يخدر في بلادي سلام ..
خدرةً شاربة موية النيل تزغرد في البوادي زرع


بلادي سهول بلادي حقول
بلادي الجنة للشافوها او للبرة بيها سمع
بلاد ناساً تكرم الضيف
وحتى الطير يجيها جعان ومن اطراف تقيها شبع

بلاي أنا
تشيل الناس ، كل الناس
وساع بي خيرو لينا يسع
وتتدفق مياه النيل على الوديان
بياض الفضة في وهج الهجير بيشع

بلادي بلاد الصفقة والطمبور
وداراتاً تنح بالليل
وبنوتاَ تحاكي الخيل
يشابن زي جدّي الريل
وشبالن مكنتل في طريفو ودع

بلادي بلاد من التاريخ
من ترهاقا لا عند ميسنا ...
عاد ترجاك خيل ودروع

بلادي أمان ، بلدي حنان وناسا حُنان
يكفكفوا دمعة المفجوع
يحبو الدار يموتو عشان حقوق الجار
يخوضو النار شان فد دمعة
وكيف الحالة لو شافوها سايلة دموع ؟!

ديل اهلي .. ديل اهلي ..

يبدّوا الغير على زاتم
يقسموا اللقمة بيناتم
ويدّوا الزاد حتى ان كان مصيرم جوع

ديل اهلي .. ديل اهلي ..

ديل اهلي .. البقيف في الدارة
وسط الدارة واتنبر
وأقول لي الدنيا كل الدنيا
ديل أهلي

عرب ممزوجة بي دم الزنوج الحارة
ديل اهلي
ديل قبيلتي لما ادور افصل للبدور فصلي

اصحاب روحي والاحساس
وسافر في بحار شوقم زمان عقلي

أقول بعضي ...
ألاقيهم تسرّبوا في مسارب الروح
بقوا كُلي .. ديل اهلي

محل قبلت القاهم ..
معايا .. معايا زي ضلي

كان ما جيت من زي ديل وآسفاي وآماساتي وآآآآآآآذلي


تصور كيف يكون الحال لو ما كنت سوداني
واهل الحارة ما اهلي ؟؟

تصور كيف يكون الحال ؟!!

[المهاجم2]

شكرالك اخى عماد وشكرا على هذه القصيدة التى لا تعبر بأي حال عن كل الحال السودانى
والتحية لك يا وطنى

[mohd.dafalla]

والله السودانين اكرم شعوب الله

[خالد النور]

هذه واحدة من طباع وخصال السودانيين والتى مهما ساءت الأحوال لن يغيروها، دمت يا بلدى الحبيب وأهلى الحنان الفى الجود والكرم ما يفوتهم إنسان

[صلاح ودالطاهر]

بلادي اهلاً يا بلادي
الف تحية ليكي من الفؤادِ
بلادي اهلاً .. يا بلادي
صدورنا حماية ليكي من الاعادي

[طلال الصول]

ديل السودانين مهما يضيق بيهم الزمن وحالتهم تتدهور
الاصالة والكرم والقيم الطيبة عندهم ابد الدهر

[sara95]

These qualities inherent Sudanese This is not a stranger to these inherent Sudanese drop in the ocean generosity

[GREY MAN]

والله يا اخوي لو جو داخلين شويه لي جوة كان عقدنا ليهم كمان