الحب في زمن الجامعة .. أفراح وأتراح .. [الأرشيف]

تباريح الهوى

28-07-2007, 11:49 PM

مشكور يارائع على الموضوع طبعاً الموضوع ده حساس خالص وكل طالب او طالبة بينظرو ليه نظره مختلفة بعضهم بعتبروا تقضية زمن لحدى مايتخرجوا او يتخارجو وده بكون حدو باب الجامعة وديل بسموا (حب الكلالى) ( والكلالى جمع كلية) والبعض الاخر جادي شوية وهنا الارتباط بكون بين برومه وسنير سنيرا يعنى بكون بينهم كم دفعة، وفى ناس من دفعة واحدة بتعمل علاقة جادة وصادقة . ولسان حاله بقول (هم البريد فى يوم مابدور اشوف قدامو)
غايتو وجهة نظرى انو الحب الصادق مابعرف لازمن ولامكان ومابفرق بين ده صغير اوكبير وفى كتير من العلاقات الصادقة احتوتا جدران الجامعة وكانت نهاية الزواج .
بس فى مشكلة حقيقة الزمن ده مااى زول فهمو للحب ان نهايتو تكون زواج ديل نقول عليهم شنو؟
ومبرارتم (ليس الحب رواية شرقية بختامها تتزوج الابطال هو الابحار دون سفينة وشعورنا ان الوصول محال ) ديل يكونوا ماجادين ولاكيف ؟
دمتم بود

رضا حسن محمد

29-07-2007, 12:12 AM

الجنا دة قاصدنى عديل
خلاص ختنى مع لكل قاعدة شواذ

معتز الريح

29-07-2007, 12:18 AM

بعتبروا تقضية زمن

الحبيب تباريح الهوى ..
كتير جداً جداً بعتبروا تقضية زمن ..
وعندهم حب الجامعة لا بد منه ..
ولزوم تكملة طقوس انو طالب في الجامعة ..
وده إذا كان بحب من دفعتو ولا من الناس الوراهم ..
الكلام كتير .. والحالات كتيرة وحنناقشهم خطوة بخطوة ..

معتز الريح

29-07-2007, 12:20 AM

الجنا دة قاصدنى عديل
خلاص ختنى مع لكل قاعدة شواذ

والله يا رضا انا ما قايلها دفعتك ..
وانت الحمد لله بأولادك ربنا يحفظهم ..
لكن الأداك قروش العرس منو؟؟ ..

وعشان هي دفعتك .. قادره عليك ..
وبعدين خريجين الستينات ما معانا ..
الحياة كانت ساهلة والزمن كان بخيرو ..

رضا حسن محمد

29-07-2007, 12:30 AM

والله يا رضا انا ما قايلها دفعتك ..
وانت الحمد لله بأولادك ربنا يحفظهم ..
لكن الأداك قروش العرس منو؟؟ ..

وعشان هي دفعتك .. قادره عليك ..
وبعدين خريجين الستينات ما معانا .. الزمن كان بخيرو ..
هى ما دفعتى هى بيوراى
يل خوى الستينات دى انا لسع ما اتولدت

معتز الريح

29-07-2007, 01:03 AM

الغريبة يا رضا
البنات كلهم بدخلوا الجامعة وبقولوا مخطوبات ..

خالد النور

29-07-2007, 01:05 AM

زي ما بقولوا الجواب باين من عنوانو ..
وانا بقول البوست حقي باين من عنوانو ..

بغض النظر عن صدق العلاقة من عدمها .. ولكن ..

جاى تفتش الماضى، خلاص الماضى ولا زمان

يا معتز مالك جاى تفتح جروح إندملت

رضا حسن محمد

29-07-2007, 01:06 AM

الغريبة يا رضا
البنات كلهم بدخلوا الجامعة وبقولوا مخطوبات ..
عشان يحرروا السوق
انت يا فردتى
الامدرمانية المقطعاك النمة لاقيتة وين

رضا حسن محمد

29-07-2007, 01:07 AM

جاى تفتش الماضى، خلاص الماضى ولا زمان

يا معتز مالك جاى تفتح جروح إندملت
لا تنكى الجرح القديم فاننى ودعت ليلا مظلما وثقيلا

مختار بازى

29-07-2007, 01:32 AM

والله لو داير الجد يا معتز في الزمن الحالي هسة بقي زيو زي اي مادة يعني شيء كدا حتمي في الجامعة
( والماتيور ) برا من الاصطاف دا ؟؟؟ القال منو في عينة كدا بتخش ماتيور عشان تحب تاني وياريت لو بيحب ليهو سنيورة لا والله تلقاهو معلق ليهو في برلومة زي البرلومة ولو ما بخاف الكضب اقول ليك لي هسة قاعد يقرا!!!

عثمان جلالة

29-07-2007, 01:55 AM

لكن لقيتك ختري يا معتز ... تنكت ساي .. غايتو زمنا نحن في أواخر التسعينيات .... زمن الحالة سعبه خالص .. ما شفت ولا لقيت تجربة ناجحة لكن كان في حب ... صادق .. الحب البعمل رعشه وحمى داك .. شفتو .. لكن في الزمن دا ... زمن الغبار العالق ... كل السألتو .. قال ما في حوجة ليهو ... لأنو الواقع بقى مادي .. جدا .. وبكل معطياتو ..

معتز ... بت أمدر مان دي منو:p

samar_taha

29-07-2007, 01:56 AM

أخي معتز
فعلاً هناك علاقات جادة في الجامعة وتستمر الى ما بعد الجامعة بقليل من الصبر من الفتاة وأهلها وقليل من الإجتهاد من الشاب وتتم على أروع ما يكون , و أنا شخصياً شهدت العديد من القصص المماثلة التي تكللت بالزواج ولله الحمد
ولكن
أيضا هناك قصص جادة ولم يكتب لها النجاح وذلك نتيجة لانهزامها للظروف الإقتصادية والإجتماعية , وبيني وبينك يا معتز نحن للأسف مجتمعنا ما بيرحم وأول ما البت تخلص الجامعة أهلها يقعدوا ينقوا فيها ويضغطوا عليها عشان توافق على أقرب عريس متقدم ليها خصوصا لو كان مغترب .
أما العلاقات غير الجادة فهذه أيضا موجودة وتنتهي بسهولة وسرعة تماما كما بدأت وتذهب غير مأسوفاً عليها .
يعني ما في قاعدة معينة تحكم الموضوع وما نقدر نقول علاقات الجامعة كلها جادة و لا كلها ما جادة انما تختلف حسب طبيعة الأشخاص وظروفهم وحسب التساهيل

معتز الريح

29-07-2007, 05:38 AM

يا معتز مالك جاى تفتح جروح إندملت

يا خالد أنت جادي ؟؟ ..
كنت مكيس وجادي حتعرس ؟؟ ..
ومن الدفعة ولا برلومة ؟؟

معتز الريح

29-07-2007, 05:41 AM

عشان يحرروا السوق

ومرات بطيروا الحمام ..
يعني تكون عايزه توزعك بالبارد كده وما تديك أمل ..
تقول ليك أنا مخطوبة ..

والعايزه تخلي خط رجعة ..
تقول ليك مرتبطه بره ..

كل بنات الجامعة في سنة البرليم
يا مخطوبات يا مرتبطات بره الجامعه ..

لكن تعال شوف السمستر التاني !!!!

معتز الريح

29-07-2007, 05:44 AM

والله تلقاهو معلق ليهو في برلومة زي البرلومة !!!

والله برلومة معقولة .. بس يكون جادي ..
وبعدين السناير ما بقعوا إلا تكون البرلومة قاطعة ..
وشغالين قص للبرالمة ..
تكون انت مكسراك بت دفعتك ..
ويجيك سنير بهدوء يحاورها منك ..

لكن عمرك شفت برلوم خطف ليهو واحدة من سنير ؟؟..
والله العظيم في ..

مختار بازى

29-07-2007, 05:46 AM

والله برلومة معقولة .. بس يكون جادي ..
وبعدين السناير ما بقعوا إلا تكون البرلومة قاطعة ..
وشغالين قص للبرالمة ..
تكون انت مكسراك بت دفعتك ..
ويجيك سنير بهدوء يحاورها منك ..

لكن عمرك شفت برلوم خطف ليهو واحدة من سنير ؟؟..
والله العظيم في ..

والله هدا القدامك دا

معتز الريح

29-07-2007, 05:49 AM

فعلاً هناك علاقات جادة في الجامعة وتستمر الى ما بعد الجامعة بقليل من الصبر من الفتاة وأهلها وقليل من الإجتهاد من الشاب وتتم على أروع ما يكون , و أنا شخصياً شهدت العديد من القصص المماثلة التي تكللت بالزواج ولله الحمد

أكيد في .. لكن نسبتهم بسيطه ..

أيضا هناك قصص جادة ولم يكتب لها النجاح وذلك نتيجة لانهزامها للظروف الإقتصادية والإجتماعية ,
إييييييييييييك .. كتير ..

لكن يا سمر بالمنطق والعقل .. وحكاية عمر البت وقروش الولد والعرس والمسئوليات .. يعني لو كانت دفعتو صعبة والله لكن ما مستحيلة ..

معتز الريح

29-07-2007, 05:50 AM

والله هدا القدامك دا

اها بقيتوا اتنين

صديق بلال

29-07-2007, 05:55 AM

بالنسبة لموضوعك يا أخ معتز الريح... أنا شخصيا لم أجربه لأن نظام التعليم في السعودية غير مختلط... ولهذا لا أستطيع أن أخوض معكم في المناقشات الدائرة فيما بينكم... وإنني في الحقيقة مستمتع بتلك المناقشات... وعلى فكرة مثل هذا الموضوع المطروح كنا نشاهده فقط عبر التلفاز في المسلسلات والأفلام العربية فهي قريبة من الواقع على ما أظن... وعموما إنني وجدت في تعليق وتعقيب الأخت سمر طه شيئا من المنطق والواقع...

معتز الريح

29-07-2007, 06:09 AM

الحبيب صديق بلال ..
الدراسة المختلطه .. عالم وحياة صغيرة ..
تؤهلك للاختلاط بأناس من بيئات مختلفة ومفاهيم مختلفة ..
والدراسة الجامعية أول عتبات الاختلاط ..
لها الكثير من الفوائد والسلبيات ..
وهنا نناقش بعض السلبيات بعين طلبه عاشوا هذه الفترة ..
ولك الشكر على مشاركتك ..

nasir

29-07-2007, 06:24 AM

لو تجاوزنا .. مسألة انهم قدر بعض ..
(الداخل الجامعة ماتيور ما معانا) ..
اخي ود السناهير ممكن استعمل حق الفيتو
جاى تفتش الماضى، خلاص الماضى ولا زمان
يا معتز مالك جاى تفتح جروح إندملت هي اتراح وافراح
( والماتيور ) برا من الاصطاف دا ؟؟؟ القال منو في عينة كدا بتخش ماتيور عشان تحب تاني وياريت لو بيحب ليهو سنيورة لا والله تلقاهو معلق ليهو في برلومة زي البرلومة ولو ما بخاف الكضب اقول ليك لي هسة قاعد يقرا!!! وانا واحد منهم
لك الود اخي ود السناهير

محمد أحمد الشيخ

29-07-2007, 06:45 AM

يا ود الريح الأخبار العندنا
قالو كنت قاشي بنات الجامعة كلهم

أبوياسر

29-07-2007, 06:47 AM

صديقي العزيز
يعني بسبب صاحبك الماخد دفعتو
فتحت جروح باقي الناس وخليتم يتغنوا بي حليل الكان

معتز الريح

29-07-2007, 06:52 AM

يا معتز مالك جاى تفتح جروح إندملت هي اتراح وافراح

ناصر الحبيب ..
أعذرني وسامحني لو جبت ليك الألم ..

تخريمة :
إلا يكتبوا ليك بوست زي ده حتى تظهر ؟؟

معتز الريح

29-07-2007, 07:20 AM

الحب البعمل رعشه وحمى داك .. شفتو ..
معتز ... بت أمدر مان دي منو:p

أوووووه .. الحب اللا تعرفوا حب ولا ملاريا ..
يا جلالة يا حبييييييييب .. شكلك كنت أساسي ..

تخريمة :
بت امدرمان دي أم أولادي ..
قول لي رضا أخير انا قريب في أمدر ..
هو مرقها في كوستي ..

معتز الريح

29-07-2007, 07:59 AM

صديقي العزيز
يعني بسبب صاحبك الماخد دفعتو
فتحت جروح باقي الناس وخليتم يتغنوا بي حليل الكان

لا لا لا .. ابو ياسر أنا ما قاصد زول ..
ما تجيب لي المشاكل ..

معتز الريح

29-07-2007, 08:34 AM

يا ود الريح الأخبار العندنا
قالو كنت قاشي بنات الجامعة كلهم

محمد باسطه الحبيب ..
والله ما شفت مداخلتك إلا حسه ..

والبجيب ليك الأخبار ده بتاع إشاعات ..
قالوا البحبوا في الجامعة بكون بتاع حنك ..
ونحنا يخربنا ..

محمد أحمد الشيخ

29-07-2007, 10:05 AM

محمد باسطه
قالوا البحبوا في الجامعة بكون بتاع حنك ..
ونحنا يخربنا ..

ما أتعلمت الحنك من أخوانك الصغار
عزام وصداح ( ياخ ديل ملوك الحنك )

ابوموفق

29-07-2007, 10:21 AM

حبيبنا الغالي معتز00 اشكرك جزيل الشكر على طرحك المميز والجميل وعلى اضافتك الرائعة رغم انك نبشت الماضي وذكرتنا بالايام الغابرة 00:confused:

هشام السماني إبراهيم

29-07-2007, 10:44 AM

معتز يا رائع

انا بفتكر انو الارتباط برجع للحالة المادية للاسرة
وفي بعض الحببية ماعندو مانع اهلو يعرسو ليو والبعض الاخر زي جماعتك الفتحته ليهم جروح ديل ببرروها بي تقضيت وقت والواحد يكون اتعلم حنك وبنسو ((الشاكوش))

سلام

دمت في رعاية الله وحفظة

باسطه

29-07-2007, 11:32 AM

الأخ معتز تحيه طيبه

جيتني لحدي عندي;) ;) ;)
والله أنا أمشي وأجي أتاوق أمشي وأجي داير الناس دي تكشف ورقه ونشوف رايهم شنو؟
لكن والله الآراء تلف الراس .
وعلى العموم أنا واحد من الناس العاشت التجربه دي وتقدر تقول شبه ناجحة أنا كان عندي علاقة مع برلومة وأنا كنته في السمستر الآخير والحمد لله توجته الموضوع بالخطوبة بالرغم إنو الزول ماداير يكشف ورقوا ويقفل سوقوا ههههههههههههههه.
ودعواتكم معاي الموضوع يتم على خير لأنو بصراحه بنات الزمن ده ........ الله يستر.( الكلام ده بيني وبينكم الجماعه مايشوفوا ويعملوا لينا مشاكل يامعتز هههههههه).
وطبعاً ده بعد عشرمية شاكوش لحدي ما الصلعة وصلت نص الراس :D :D :D
المهم مربط الفرس إنو التجربة دي تتوقف على عديد من الظروف في النجاح والفشل ولكن أولاً وآخيراً طرفي العلاقة لهم الدور الكبير في إنجاح تلك العلاقة وكما أوفوا بذلك جميع الأخوان ولكن أنا أرى أن هذه المرحلة قد تكون صعبة عند الخطوة الأولى ولكن مع العزيمة تجد أن الخطوات أصبحت أسرع فأمنياتي بالتوفيق للجميع .

مداخلة : ودايرين تسمعوا نصيحة مجرب اياكم والبرلومات لأنو أولاد دفعته قربوا يغتالوني هههههههههه هم يدردقو بالسنين والسنير يجي بين يوم وليلة ويخم حصاد السنين .

معتز الريح

29-07-2007, 11:04 PM

عزام وصداح ( ياخ ديل ملوك الحنك )

ياخي نسيت أستاذهم .. سنهوري ..
الله يحفظهم لينا ويديهم العافية ..

معتز الريح

29-07-2007, 11:05 PM

رغم انك نبشت الماضي وذكرتنا بالايام الغابرة 00:confused:

لسه شباب يا ابوموفق .. ودي كانت زكريات جميله ..
رغم حلوها ومرها .. لكنها جميلة ..

معتز الريح

29-07-2007, 11:08 PM

انا بفتكر انو الارتباط برجع للحالة المادية للاسرة وفي بعض الحببية ماعندو مانع اهلو يعرسو ليو .. والبعض الاخر زي جماعتك الفتحته ليهم جروح ديل ببرروها بي تقضيت وقت والواحد يكون اتعلم حنك وبنسو ((الشاكوش))

ده كلام خبرة يا هشام ..
أها انت مع ياتو نوع في الاتنين القلتهم ديل ؟؟

قلت لي راكب جمب السواق .. طيب شيل الصبر ..

معتز الريح

29-07-2007, 11:12 PM

الأخ معتز تحيه طيبه

جيتني لحدي عندي;) ;) ;)
.

والله البوست ده جاب كترة ناس ..
باسطه الشرك قبض ..

لكن حركتك بايخة يا سنير ..
ومقصك سنين ..

ومبروك وربنا يتمم ليك على خير ..

صلاح الدين محمد

29-07-2007, 11:54 PM

دفعتي ورفيق دربي / ودالريح

والله يا عزو موضوعك جميل شديد

وسبحان الله يا عزو انتا تعرف دفعتنا فيها اكتر من حاله

علاقة بدت وانتهت بي الزواج .

تخريمة :

ما تكون ام العيال عضو في المنتدي عشان ما تجي علي راسك

معتز الريح

30-07-2007, 12:01 AM

ما تكون ام العيال عضو في المنتدي عشان ما تجي علي راسك

ما تشلت يا صلاح ..
وما تنسى نسيبي الدفعة 14 .. ومسجل معانا ..

محمد السر احمد

30-07-2007, 12:26 AM

اخي معتز والله الموضوع جميل
و بالجد ايام كانت جميل وبسال انو ربنا يعيده
والله حب الجامعة اجمل حب لانو بكون نقي وخالي من الغش
لكن ما باليد حلية بعد التخرج

معتز الريح

30-07-2007, 12:30 AM

والله حب الجامعة اجمل حب لانو بكون نقي وخالي من الغش

يا راااااااااااااااااااااااااااجل؟!!!!

ودكمبال

30-07-2007, 12:43 AM

العملاق ابدا معتز
ياخى انا واحد من شملهم طرحك ولا زلت مع فردتى الى اليوم وبيقينا شبه بايرين الاتنين لانو متمسكين بارانا والحاجات دى وقلنا لازم نقاوم الظروف ونتوج هذه العلاقة بالزواج لكن العين بصيرة واليد قصيره وين العش وين وين وين............ومنتظريين الخدمه العامه نحن الاتنين وبنحلم ويشهد علينا ودالامين الحفظنا اغانيهو الشىء الوحيد المخوفنى جبروت امها والمغتربين لهذا انا بشهدك ومحضر كفنى اذا سمعت ليك بواحد انتحر من اعلى برج فى مدنى بيكون هو العبد لله .ما تقول لى حب الجامعة بنتهى عند اسوارها انا مابعرف كلام زى ده البت غسلت قلبى غسيل بطانيه وشرتو فى شريان قليبى الندى تحت درجة رطوبة عالية قدر ماتحصل عمليت تبخر من نصايح امها تلجأ لى ويجى الغيم وتتكون السحب ثم تهطل الامطار على قليباما اصلا هو مثبت بمشبكين الطرف الاول الصمام الايمن والطرف الاخر فى الرئه بهبهب مع كل نفس بيطلع
وخوفى اللاخير من امها والمغتربيين.

معتز الريح

30-07-2007, 12:54 AM

طارق محمد الحسن

30-07-2007, 02:29 AM

واللة يااخى الكريم موضوعك جميل ورائع وباين عليك كنت خطر فى مساءل الحب وشكلك حبيب قديم وذكرتنا ايام الحب الطاهر واللةالواحد يكون حق المواصلات ماعندك وعامل فيها حابى والبت عايشا معاك الموضوع بصدق وتساهر الليالى وتركبا المواصلات وتعيش قصة جميلة ويجى واحد مغترب يديك شاكوش شهرين انت برة الشبكة والبت تقول ليك اهلى غصبونى ونت شوف ليك واحدة احسن منى ويوم عرسة يجو اصحابك يواسوك اه هى تسافر السعودية مع عريسا وانت تلف صينية اها المغتربين ديل اللة يسامحم فى البعملوة فى اولاد الناس واللة............................................. ......... ولك ودى

معتز الريح

30-07-2007, 02:42 AM

ويجى واحد مغترب يديك شاكوش شهرين انت برة الشبكة والبت تقول ليك اهلى غصبونى ونت شوف ليك واحدة احسن منى ويوم عرسة يجو اصحابك يواسوك

الحبيب طارق ..
دايما مداخلات بتجي في الصميم ..
اها نحنا بنتكلم انو الواحد يحب برلومة عشان ياخد فرصة يجهز نفسو
والبت طالما بتقرأ وما اتخرجت .. اهلها ما بقدروا يغصبوها ..
لكن طالما اتخرجت .. فالكلام صعب والانتظار اصعب ..

وشاكوش يفوت ولا حد يموت ..

samar_taha

30-07-2007, 03:56 AM

وعموما إنني وجدت في تعليق وتعقيب الأخت سمر طه شيئا من المنطق والواقع...

شكرا يا صديق
انا ادليت بدلوي من واقع مشاهداتي أثناء الجامعة

مدنيّة

30-07-2007, 04:15 AM

البوست بتاعك دا يامعتز الواحد يعمل ليه برنت اوت ويوديه لحكومات الناس دي:D

بدر الدين محمد

30-07-2007, 04:29 AM

في السبعينات كان الحب عندنا في الجامعة حاجة تانية
والقصص عجيبة
لما اروق اكتب ليكم

عثمان جلالة

30-07-2007, 04:29 AM

البوست بتاعك دا يامعتز الواحد يعمل ليه برنت اوت ويوديه لحكومات الناس دي:D

والليلة والليلة .... دق صفايح ... وطليع فضايح عديل ... التسوي كريت في القرض تلقا في جلدا يا ود الريح ... مدوون عليك الله ... كان ما عارفه بيت ناس معتز النوصفو ليك:D

معتز الريح

30-07-2007, 06:09 AM

البوست بتاعك دا يامعتز الواحد يعمل ليه برنت اوت ويوديه لحكومات الناس دي:D

ليه المضرة دي يا مدنية ..
ناس بتتذكر اوقات جميلة وطيبة ومعظمها اصبح من الأمس ..
عرس ما عرسوا كمان ما يفضفضوا ..

خليهم يفضفضوا ..

معتز الريح

30-07-2007, 06:12 AM

في السبعينات كان الحب عندنا في الجامعة حاجة تانية
والقصص عجيبة
لما اروق اكتب ليكم

يا سلام يا أستاذ بدرالدين ..
بالله عليك تروق وتجي تدينا محاضره في حب السبعينات ..
وقارن بين المكتوب هنا ..
في فرق بين حب زمان وحسه والعلاقات الجامعية ؟؟ ..
ما تتأخر من فضلك ..

معتز الريح

30-07-2007, 06:15 AM

التسوي كريت في القرض تلقا في جلدا يا ود الريح ... مدوون عليك الله ... كان ما عارفه بيت ناس معتز النوصفو ليك:d

الحبيب جلالة ..
ما سوينا حاجه .. وبنطلع مواقف وندي نصائح للداخلين جديد ..
وبنقول ليهم حبو من البرالمة واختو بنات الدفعة ..

تخريمة :
قلت لي الحب أبوحمى ؟؟ ..

معتز الريح

30-07-2007, 09:22 AM

في ناس لمان تتخرج ما برتبطوا .. ما غريبة؟
وفي ناس كل سنة بواحد/ه ..
وفي ناس اسلوبهم غريب في الطرح ..
وفي بنات بفكروا في شواكيش غريبة غريبة ..
لا تعرف ده شاكوش ولا منشار خشب ..
وحكاية انا بعاملك زي أخوي دي من زمنا انتهت ..
وبجيكم بحكي ليكم أسلوب شواكيش تستغربوا ..
شاكوش ملعوب ..

هشام السماني إبراهيم

30-07-2007, 12:32 PM

وحكاية انا بعاملك زي أخوي دي من زمنا انتهت ..

والله يا معتز دا اقوا شاكوش ولما تقوليك كدا تقول يادنيا اشقي وابلعيني احسن

اي حصل لي قبل ما تسأل ;) :D والحمد لله حصل خير والجاتك في راسك سامحتك

خالد النور

30-07-2007, 06:48 PM

وا حليييييييييييييييله أيام حلوة

تخريمه:
راكب بص سيرة

معتز الريح

30-07-2007, 09:43 PM

والله يا معتز دا اقوا شاكوش ولما تقوليك كدا تقول يادنيا اشقي وابلعيني احسن ..اي حصل لي قبل ما تسأل ;) :D والحمد لله حصل خير والجاتك في راسك سامحتك

والله يا هشام ظاهر عليك انت أقدم من الكسرة ..
لكن يا حبيب أجمل حنك لشاكوش عجبني .. هو
شاكوش الاستخارة .. يكيفك ..

معتز الريح

30-07-2007, 09:48 PM

وا حليييييييييييييييله أيام حلوة

حلوه بس؟؟!!!
لكن ما وريتني يا خالد .. انت قصتك شنو ؟؟
ولا أسأل أمجد عمر وأحمد عبدالعاطي؟؟ ..

خالد النور

30-07-2007, 09:51 PM

حلوه بس؟؟!!!
لكن ما وريتني يا خالد .. انت قصتك شنو ؟؟
ولا أسأل أمجد عمر وأحمد عبدالعاطي؟؟ ..

معتز
دى ما عارفينا إلا البقعدو فى الغابه

معتز الريح

30-07-2007, 10:18 PM

معتز
دى ما عارفينا إلا البقعدو فى الغابه
بنجيب خبرك ما تستعجل ..

خالد النور

30-07-2007, 10:23 PM

كان غيرك أشطر يا فرده

معتز الريح

30-07-2007, 10:45 PM

لكن يا خالد ورينا بما انك زول خبرة ..
وسلك دروب العشق والهيام في الجامعة ..
ادينا اجمل اسلوب بتاع شاكوش قابلك ..
كان اخدتو انت ولا اخدو زول صاحبك ..

خالد النور

30-07-2007, 11:39 PM

لكن يا خالد ورينا بما انك زول خبرة ..
وسلك دروب العشق والهيام في الجامعة ..
ادينا اجمل اسلوب بتاع شاكوش قابلك ..
كان اخدتو انت ولا اخدو زول صاحبك ..

أنا ما بدونى شواكيش أنا كنت بدى شواكيش

معتز الريح

31-07-2007, 01:21 AM

شاكوش انت زي أخوي ..
شاكوش خلينا أصدقاء ..
شاكوش خلينا للظروف ..
شاكوش فاجأتني ..
شاكوش بديك الرد بكره .. ويحلك لمان يجي بكره ..
شاكوش خطبوني وأهلي ضغطوني ..
شاكوش خطفوا مني (دي أبطالها السناير) ..
شاكوش الاستخارة ..

كفاكم ولا أزيدكم

هشام السماني إبراهيم

31-07-2007, 02:02 AM

والله يا هشام ظاهر عليك انت أقدم من الكسرة ..
لكن يا حبيب أجمل حنك لشاكوش عجبني .. هو
شاكوش الاستخارة .. يكيفك ..

كدي اديني فكرة عشان قريبك ما ناقص واحد تاني وهل في طرق لتفاديو

معتز الريح

31-07-2007, 07:01 AM

كدي اديني فكرة عشان قريبك ما ناقص واحد تاني وهل في طرق لتفاديو؟

أسأل جلالة ..

عمر البشير

31-07-2007, 07:50 AM

الاخ معتز /
اولا الموضوع جميل بمعني الكلمة.
ثانيا ده كان في زمن القراية في الجامعة مجانا بل وبيعطوك فلوس كمان اما في الزمن ده، فالواحد بيدخل الجامعة وهموا اليوم حا يجيب قروش الفطور من وين، فاين الحب

معتز الريح

31-07-2007, 08:11 AM

فالواحد بيدخل الجامعة وهموا اليوم حا يجيب قروش الفطور من وين، فاين الحب

حبيبنا ود البشير (صاحب صلاح ود الطاهر) ..
ما أحلى الحب مع المعاناة .. وقديماً قالوا المعاناة تولد الإبداع ..
أها في ناس بحبوا عشان الواحدة تغدي وتعشي ..
وتشتري ليهو سجاير (ومرات ليهو ولي القروب كلو) ومرات يغشها يشيل منها حق السجاير ويمشي يفتش محل التمباك بوين والباقي كروب.. وده بيعتبر محظوظ .. وكنا بنقول عليهو (الزول ده وقع ليهو في بير بترول) ..

باسطه

31-07-2007, 11:25 AM

البوست بتاعك دا يامعتز الواحد يعمل ليه برنت اوت ويوديه لحكومات الناس دي:D

والله يامدنية لقيتك ههههههههه جنس ده زاتووو الكان خالينا نزوغ من الكتابة في البوست ده لكن إتوكحنا نعمل شنو كل شئ ولا الحكومااات يامدنية أصلو بنات الزمن ده بقو يهرشو الرجال:D :D :D

باسطه

31-07-2007, 11:33 PM

والله البوست ده جاب كترة ناس ..
باسطه الشرك قبض ..

لكن حركتك بايخة يا سنير ..
ومقصك سنين ..

ومبروك وربنا يتمم ليك على خير ..

ههههههههههههههههههههههه
والله يامعتز نحنه قاعدين لكن زي ماعارف ظروف البلد دي والجري حاصل والدنيا آخر شهر وإنته عارف الباقي وبعدين لو ما سنينه المقصات في السمسترات الآخيرة كان طلعنا بقد القفه ولازم الواحد يطلع ليهو بحاجه كده عشان تصبروا لظروف ومقاسي الدنيا دي ولا شنووووو؟

معتز الريح

01-08-2007, 06:57 AM

يا باسطه ..
والله أيامك ..
تعرف يا باسطه الحب الصادق .. بظهر على شكل الواحد ..
لمان تجي البحبها ماشه من بعيد حيلو يموت .. وتلقاهو يبتسم براهو ..
وبكون مشوش .. تتكلم معاهو في موضوع ويرد ليك على موضوع تاني ..

ولي البت بتحبو بتجي تسلم على الناس كلها وتخليهو آخر واحد ..
وكتير أتناسا ايديا واسيبهم عنيه في إيدك ..

وتلقى في ناس شغالين تصوير في الموقف ..
اها انا كنت مع الناس البصوروا ..

جيفارا

01-08-2007, 07:47 AM

اااااااااااااااااااااااااااااااااااه بتفتح جراح

وما الحب غلا للحبيب الاول

يا متعز مافي داعي للمشاكل وخلي الناس عايشة

معتز الريح

01-08-2007, 07:57 AM

وما الحب إلا للحبيب الاول

جيفارا هوووووي الكلام ده ما بنقدر عليهو ..
اها الحبيب الأول ده كان لاقيناهو في المتوسط ..

قول كما قلتها أنا
وما الحب إلا للمدام ..

عمر البشير

01-08-2007, 09:04 AM

حبيبنا ود البشير (صاحب صلاح ود الطاهر) ..
ما أحلى الحب مع المعاناة .. وقديماً قالوا المعاناة تولد الإبداع ..
أها في ناس بحبوا عشان الواحدة تغدي وتعشي ..
وتشتري ليهو سجاير (ومرات ليهو ولي القروب كلو) ومرات يغشها يشيل منها حق السجاير ويمشي يفتش محل التمباك بوين والباقي كروب.. وده بيعتبر محظوظ .. وكنا بنقول عليهو (الزول ده وقع ليهو في بير بترول) ..

كلامك ده عاوز ليه واحد عندو مؤهلات بس نحنا الواحد فينا بخاف من ضلو خلي اتكلم مع واحده. ;)
وبعدين انت ساكي الموضوع ده عشان تدق الصفائح وطلع الفضائح. عشان كده انا بتحفظ علي اقوالي. واطلب المستشار شبارقة يدافع عني. :D :D :D

معتز الريح

01-08-2007, 10:35 PM

نحنا الواحد فينا بخاف من ضلو خلي اتكلم مع واحده. ;)

في البداية كلنا كنا كده ..

وأضيف :
ولي حسه ..

معتز الريح

02-08-2007, 05:51 AM

ده كلو كوم ..
والطرح (المصارحة بالحب) كوم تاني ..

معتز الريح

03-08-2007, 10:22 PM

الغريبة الواحد بيصدق ..
ويشعر بالالتزام ..

تعالوا ورونا خبراتكم ..

معتز الريح

11-08-2007, 06:03 AM

ما زلنا في انتظار الأستاذ بدرالدين محمد
وحب السبعينات ..

بدر الدين محمد

15-08-2007, 02:24 AM

زي ما بقولوا الجواب باين من عنوانو ..
وانا بقول البوست حقي باين من عنوانو ..

بغض النظر عن صدق العلاقة من عدمها .. ولكن ..

توكلنا على الله
في العام 76 دخلنا الجامعة (كلية الفنون) لاول مرة نقرأ مع البنات في فصل واحد
الزمن داك
اللبس كان التوب الأبيض الناصع .. مافي حاجة اسمها اسكيرت وبلوزة الا نادرا
كنا في الدفعة اكثر من 40 ولد وسبعة بنات
الكل يتنافس في ارضائهن وتنفيذ مراسليلهن
واهم شي مشوار التوصيل الى ميز البنات
وايضا تلبية توصيل مجموعة الى السينما ويومها تكون التذكرة والعشاء مضمونة والسينمات كانت محدودة النيل الازرق بجوار جامعة الخرطوم توقفت الآن وسينما غرب والتي هي الآن موقف بصات الحاج يوسف واخيرا قاعة الصداقة ذات السيراميك والتكييف
في البوست القادم (قصص مثاليه شهدناها)

معتز الريح

15-08-2007, 05:42 AM

حمد لله على السلامة ..
منتظرين ..

ابراهيم

18-11-2007, 02:32 PM

ومرات بطيروا الحمام ..
يعني تكون عايزه توزعك بالبارد كده وما تديك أمل ..
تقول ليك أنا مخطوبة ..

والعايزه تخلي خط رجعة ..
تقول ليك مرتبطه بره ..

كل بنات الجامعة في سنة البرليم
يا مخطوبات يا مرتبطات بره الجامعه ..

لكن تعال شوف السمستر التاني !!!!

في السمستر التاني الصبر بنفد :D

ابراهيم

18-11-2007, 02:34 PM

توكلنا على الله
في العام 76 دخلنا الجامعة (كلية الفنون) لاول مرة نقرأ مع البنات في فصل واحد
الزمن داك
اللبس كان التوب الأبيض الناصع .. مافي حاجة اسمها اسكيرت وبلوزة الا نادرا
كنا في الدفعة اكثر من 40 ولد وسبعة بنات
الكل يتنافس في ارضائهن وتنفيذ مراسليلهن
واهم شي مشوار التوصيل الى ميز البنات
وايضا تلبية توصيل مجموعة الى السينما ويومها تكون التذكرة والعشاء مضمونة والسينمات كانت محدودة النيل الازرق بجوار جامعة الخرطوم توقفت الآن وسينما غرب والتي هي الآن موقف بصات الحاج يوسف واخيرا قاعة الصداقة ذات السيراميك والتكييف
في البوست القادم (قصص مثاليه شهدناها)

استاذنا وحبيبنا بدر الدين
منتظرين بفارق الصبر

معتز الريح

19-11-2007, 01:54 AM

في السمستر التاني الصبر بنفد :d

حبيبنا إبراهيم ..
هم بعملوا كده عشان يورونا أنهم ضحوا عشانا وباعوا لينا ناس ..

شفت الدهاء ده ..

معتز الريح

19-11-2007, 02:00 AM

استاذنا وحبيبنا بدر الدين
منتظرين بفارق الصبر

سمعنا والعهده على الراوي ..
أن وزارة الداخلية الخاصة بالأستاذ الكريم بدرالدين
شجبت وأدانت البوست .. وأنذرت بعقوبات قاسية ..
على كل من يتداخل في هذا البوست ..
وذلك في حدود صلاحيات الوزارة ..