رمانسية الرجل السوداني (نقاش بصراحة)

[همتارو]

هذا الموضوع شيق والكلام فيه لازم يكون بصراحة ووضوح

انا طرحت الموضوع ده بعد مناقشة قوية في البيت فحواها انو الرجل او الزوج السوداني يفتقر للرومنسية وكتمان المشاعر لانو بيعتبرها ضعف تجاه المراءه او الزوجة وعيب ممكن يعاب عليه من قبل اصدقاءه كمثال تعليق( عاين فلان ماشي جنب مرتو كيف ,او عاين علان شايل الطفل والمرة ماشه ساكت) وحبيت اطرحوا في المنتدى لتعم الفائدة على الجميع ونتناقش بموضوعية وبدون تعصب لفئة
مفاتيح الحوار:-
ليه لما نمشي مع الزوجة او الاخت او الوالدة بنكون بعيدين مترين قدام ومستحي حتى لو قابلت انسان بتعرفوا بتسلم من بعيد غير لما تكون براك؟
اتحده اي رجل يمشي في الشارع ويكون ماسك يد زوجتو على الاقل ويفتخر بيها انو دي شريكت حياتو ورافع راسو ولا عيب وعاداتنا ؟
هل قاعدين نهتم بالهداية والمناسبات السعيد ونحتفل فيها بشكل خاص ونداوم عليها؟
هل بنقول كلام حلو ونتكلم عن مشاعرنا الجياشة بكل صراحة ولا دا ضعف مننا؟
هل بندلعم وناخذ بيدهم ونلعب معاهم ونساعدم في المطبخ والنظافة في البيوت؟

مجموعة من الاسئلة محتاجة نقاش شديد عشان نغير مفهوم ونظرة المرة للرومنسية عند الرجول السوداني ونشبع رغباتها كلها من دون تقصير

وانا اختصرت الكلام في مفاتيح للحوارعشان كلنا نتناقش بفيض ويا حبذا نظرت المراءه السودانية في هذا الموضوع

ولكم مني دوام الصحة