والله ايام يا تعليم

[MASS77]

المدرسه في زمان قريب جدا كانت المربي للطالب قبل البيت كان الاستاذ في الابتدائي لو لاقاك في ميدان الكوره ولا في عرس الا تاني يوم ما تجي المدرسه بانده اسمك في الطابور
وهاك يا قسمتك يا وقعة ليك خمسه سيطان يا عشره ولو قال ليك جيب ولي امرك اول ما ولي امرك يخش المدرسه بقول للاستاذ ليكم اللحم ولينا العضم .
كان في احترام الي درجة الخوف للاستاذ
كان لاقيت استاذ في الشارع بتخلي ليو الشارع وبتجري التربيه والتعليم وزاره كانت بتخص التربيه في المقام الاول وعشانكده ما كان في انحرافات تذكر للطلاب وكان احترام الطالب للاستاذ بنفس المقياس احترام للبيت وللاسره
ولو قارنا التربيه والتعليم في الزمن ده بنلقي الاستاذ ممكن يشيل سجاره من الطالب ولا يجي يخش الفصل ويقول داير سفه يا شباب
بقي في عدم احترام للاساتذه ممكن عادي الاستاذ يركب مواصلات ويلقي طالب قاعد وما بقوم ليو برغم من علمني حرفا صرت له عبدا
ولو خشينا للبيوت بنلقي الطالب بعيد كل البعد عن احترام الوالدين وبقية الاسره بفهم الاحترام الكان زمان والمدرسه كانت الاسره الاولي للطالب بتعلم الاحترام والتعامل مع الاكبر منك والاصغر منك كانت بتحث علي روح الجماعه واحترام الاسره الان المدارس بقت كلها تحصيل دراسي فقط وهمها الاكبر انو تنجح الطلاب وكانو التربيه والتعليم فصلو منها التربيه وخلو التعليم
بالجد والمدارس خلاص فتحت ممكن اضع تصور للطلاب بي حاله مزريه في المواصلات في البيوت في الطرق العامه وحتي في داخل الفصول ممكن تركب حافله تلقي واحد في سن عشره سنوات بتكلمو في الحب بطريقه غريبه ولا تلقي بت راكبه في الصف الخلفي والسواق بسمع في كلاما المزري وممكن عادي طالب يسمع واحد اكبر من ابوهو كلام ما سمعو الراجل الكبير من ابوهو
المدارس هي البتري وهي الممكن من وقت دقة الجرس ولغاية جرس اخر اليوم ممكن تساهم في تقويم السلوك للطلبه البكره بكون تعاملم مربوط بي وطن وامه ولو مشي الجامعه فحدث ولا حرج هرجله ونفس التصرفات بتاعت الاطفال في الصف الرابع ممكن تتصرفو بت في الجامعه او ولد يا اهلنا المدرسه ما محل للقراية وبس المدرسه هي البيت والاساتذه هم الاب والا م لو كلو استاذ وضع انو التصرفات دي طلعت من ولدو وعاوز يعلمو اسلوب جديد ولو الاستاذ ختي في نفسو انو هو ابو الفصل زي زمان صدقوني الوضع بتغير بنلقي طالب يلقي ليو ازي في الطريق بزحو ونلقي راجل كبير قاطع الزلط بكون في طفل عاوز يقطعو ومره كبيره عاوزه تمشي الدكان بنلقي الطالب يجري يشيل منها القروش وهو فرحان ويترسل ليها الدكان وكتير من النمازج
حقو الفي المدارس يبدو من الجرس بي طابور النظافه من الاظافر والشعر واللبس عشان يقومو كلو حاجه
وعارف الاساتذه عندهم مشاكل بتخلي الواحد يجن وما يدرس حتي الحصه بس حقو يختو في بالم انهم ببنو في وطن
ولا رايكم شنو؟؟؟؟؟؟

[مدنيّة]

والله ياماس جيت علي الجرح
الكلام دا كان زمان لما كان التعليم مهنة انسانية - مع الاعتذار للمعلمين - بس الان هو اصبح استثمار ليس الا واي حاجة لما يدخل فيها القرش يبقي عليها العوض

بتقدر تتخيل انه الان من سنة اولي اساس بيجيبوا للاولاد اساتذة في البيت !!! طبعا الولد بتدرس في مدرسة خاصة بالشئ الفلاني وبعد كدا عنده لكل مادة استاذ من اولي اساس !!!

عجبني علي هذا الزمااااان


همسة : اسم البوست ما واضح انت كاتب ( ال ) لو ممكن توضحه لينا عشان نعدله ويبقي اسم معلوم للجميع

[عاشق الريف]

شكرا للموضوع الهادف
فعلا حال التعليم اصبح يرسى له
واعطيك مثال : اصبح التعليم الخاص محسوب على الطلاب فمثلا الطالب يقول للاستاذ
انا بديك ماهيتك وانا بدفع ليك الماهيه وفعلا الاستاذ مامكن يعاقب التلميذ ابدا حتى لو التلميذ
قله ادبه على الاستاذ نفسه
اللهم اصلح حال التعليم فى بلادنا

[مدنيّة]

شكرا للموضوع الهادف
فعلا حال التعليم اصبح يرسى له
واعطيك مثال : اصبح التعليم الخاص محسوب على الطلاب فمثلا الطالب يقول للاستاذ
انا بديك ماهيتك وانا بدفع ليك الماهيه وفعلا الاستاذ مامكن يعاقب التلميذ ابدا حتى لو التلميذ
قله ادبه على الاستاذ نفسه
اللهم اصلح حال التعليم فى بلادنا

وبرضو بتساءل انه لية التلميذ مابيحترم استاذه زي زمان :confused:
واضحة طبعا زي الشمس زي ما بيقولوا

[Madanawi]

يا سلام على الموضوع الهااام ده ،

نحن كأمّة مسلمة مطالبين بالتعلم .. حيث يقول الرسول عليه الصلاة والسلام (من سلك طريقاً يلتمس فيه علماً سهّل الله له طريقاً الى الجنة) .. (أطلبوا العلم من المهد الى اللحد) ... (أطلبوا العلم ولو في الصين) حيث كانت الصين بعيدة جداً.
أو كما قال عليه الصلاة والسلام،

التعليم كان من أميز ما يميز السودان والسودانيين عن سائر الدول والمجتمعات .. كنّا أوّل الشعوب تعليماً .. وكنا رواد تعليم المرأة .. لأننا أدركنا قبل البقية أن التعليم ضرورة من ضروريات الحياة فأعطينا المعلم حقه المادي والأدبي والاجتماعي .. وأولينا الوزارات التعليمية الاهتمام الامثل ولنا مدارس نفخر بها ونضرب بها الامثال .. أوليست مدرسة مدني الثانوية وحنتوب الثانوية تحتضنهما مدني الحالمة؟
ما زلت اذكر العديد من الأساتذة الذين كلما ذكر اسم احدهم هممت بالوقوف احتراماً لهم لانهم لم يكونوا فقط معلمين بل ومربيين ومرشدين وهم عن حق وحقيقة تكملة لما بدأته الاسرة من تربية وتوجيه.
ما نراه اليوم ليس مسئولية الاستاذ فهو كما يعلم الجميع مغلوب على أمره .. فالحالة الاقتصادية تنعكس على أداء الفرد والمجتمع سلباً وأيجاباً .. لله درّهم معلمينا الذين جابوا الدنيا وكانوا سفارات ومنارات تشرق أينما أشرقت شمس وتهب العلم والنور ضياءً للشعوب التي طالما قاست ظلام الجهل حتى أتاهم الفرج من معلمي السودان فلهم التحية والتجلة.

[طارق محمد الحسن]

واللة موضوع التعليم دا موضوع هادف وياحليل التعليم زمان وبحكى ليكم قصة حقيقية جا مدير جديد لمدرسة اساس ودخل سنة تامنة وادى الطبشيرة للطلبة قال ليهم اى واحد يكتب اسمو بالكامل والغريب انو مافى طالب قدر اكتب اسمو لحدى جدو الرابع وبرضو لقيت استاذ بسف مع الطلبة صعوط تتخيلو والدليل على تدهور التعليم انو المدارس الحكومية بقت مابدخلوها الا المادايرين اتعلمو والعايز تعليم كويس امشى المدارس الخاصة اللة يرحم التعليم وايامو