الالقاب

[صلاح الدين محمد]

تنتشر ظاهرة الالقاب في جميع انحاء السودان فكل فرد له لقب يلقب

به وفي كثير من الاحيان يكون لقب الشخص هو السائد اكثر من اسمه

الحقيقي .

وفي ودمدني يختفي الاسم الحقيقي نهائيا في كثر من المناسابت للشخص

وكثير من الاشخاص في مدني معروفين با لقابهم وليس باسمائهم

والكل بسال ما هو السر في تلك الظاهرة النمنشرة في ربوع السودان بالاخص في ودمدني

وهناك كتير من الالقاب مثلا اخوتي ابوستة وكيس ولقبي انا ابا وانا اعرف الكثير من افراد

المنتدي الذين لديهم القاب تعلو علي اسمائهم .

ما تعالو نشوف القاب اعضاء المنتدي وابدا بي لقبي انا شخصيا.

فلقبي انا هو أبـــــــــــا

[معتز الريح]

الحبيب صلاح أبا ..
موضوع جميل ..
عندي إضافه بسيطه ..

اللقب مرات بيجي من هيئه جسديه
أو من حركة أو كلمه يكثر تكرارها عند الشخص
أو شبه وحاجات تانيه كتيره ..

سؤال لقبك (أبا) ده جاء من وين؟

[صلاح الدين محمد]

مشكور صديقي معتز علي اضافتك الحلوة لكن الاحلي

انو اللقب ده جاني من مدني ووالله ياغ معتز اصل اللقب شنو

ما عارفو وكتيرين زي الماعارفين اصل اللقب شنو

بس يا عزو حقو توري الناس لقبك شنو

[مح السنى مد]

يا أبـــــــــــــــــــــــــــــــــــــــا ولله كلامك صحيح فى ناس بتكون بتعرف لقبو لكن مابتعرف اسمو لو حد سألك عنو باسمو ماتعرفو لكن لو قال ليك لقبو تعرفو على طول...

[صلاح الدين محمد]

ودالسني ليك مني 55 الفين سلام

ومشكور علي اضافتك الجميلة ده

وبسالك بالله لقبك شنو يا ودالسني

[محمد أحمد الشيخ]

يا أبا انا كثير جدا بقولوا لي يا محمد ما بتلفت لكين لما أقولو لي بلقبي بتلفت علي طول حتي ناس بيتنا ما بقولوا لي محمد
بقولوا................باسطة
وسر اللقب لاني بحب الباسطة

[الفارس البنفسجي]

بالرغم أنو ما عندي لقب
لكن قلت أخش واشوف الحاصل
شنو.

الألقاب هي سمة من سمات
كثير من المجتمعات العربية
ومدني تميزت بالفعل بهذه الميزة
وهناك من أشتهروا بسبب ذاك
اللقب.

بنمشي ونجيكم عشان نشوف
القابكم

[همسة شوق]

والله ياصلاح دة موضوع جميل
ومرات كتير الواحد بينسى إسمو لأنو اللقب طغى على الاسم الحقيقى
وانا بحكم إنى كنت بلعب كورة إتلقبت ب زيكو

[صلاح الدين محمد]

يا زيكو تحياتي لك وتحياتي لجميع الاخوان في المزاد وسبحان الله اي واحد في المزاد انا بعرفو بي

لقبو وابدا ليك بي ناس تربطني بهم علاقات طيبة ابدا ليك بي كابو وجكسا وعثمان كلو ومحمد نظرية

ووالله الناس القولتهم ليك ديل الواحد تنادي بي اسمو ما اتلفت .

[صلاح الدين محمد]

يا باسطة يارائع مشكور علي الاضافة الجميلة

[صلاح الدين محمد]

سلامات يا فارس البنفسج ومشكور علي اطلالتك الحلوة الجميلة ومرحب بيك

[المكاشفى]

وانا كشه الكل يقووووووووووول كشه
حتى زوجتى تقووووول كشه
اخوانى وكل من حولى
ومستر كوش عند الهنود
بقولو الاسم طويل

[طارق محمد الحسن]

الالقاب مسالة جميلة لكن اذا الزول مابيرضى لقبو حقو الناس ماتناديهو بيهو >>>>>>>>>>>>>>>>>,وانا لقبى نادونى بيهو اول مرة بعد جلدة ساخنة لانو كنت بمشى البحر بالدس من ورا ناس البيت وكان محزرنى من البحر اها سمونى طارق البحر وبالمناسبة الصورة الموجودة فى البوست دى كانت فى البحر

[صلاح الدين محمد]

يا كشــــــــــــــــــــــــــــــــــــــــــــــــ ـــه

مشكور علي تواصلك الجميل

[صلاح الدين محمد]

طارق البحر

والله لقب جميل

وربي احفظك من شر البحر

[صلاح الدين محمد]

مافي القاب في المنتدي ولا الناس ما بتحب القابها

انحنا لسا منتظرين الكثير منكم ابناء مدني

[أبوياسر]

أخونا أبا
والله الموضوع بالجد جميل وعلي فكرة قبل
ما تسألني لقبك شنو أنا الحمد لله ما عندي
لقب وربنا يجزي عني والدي خير الجزاء لأنو سماني محمد
ومافي أعظم من كدا عشان نضيف ليهو لقب
أما حكاية الألقاب وفي مدني بالأخص فالكل يعلم أن مدني بلد الفن والجمال والإبداع
وكثيرا ما تكثر الألقاب في هذه الأوساط وخصوصاً الوسط الرياضي رنقو دجانقو سانتو
إبليس سنطة حموري أسمر الجار عليوة دامبا وإلخ

[صلاح الدين محمد]

حبيبنا محمد لك مني كل الشكر علي اضافتك الجميلة

وخير الاسماء ما عبد وحمد

واباك اسماك محمد ونعم الاسم

وصلي الله علي سيدنا محمد

[بدر الدين محمد]

الاخ الكريم صلاح موضوع الالقاب ده جميل واضيف انه هنالك الاسماء والكنية والالقاب وكلها بسبب فرز الناس او مدحهم او زمهم
في مدني لاحظت الالقاب كثيرة وفي حي المدنيين بالذات كل اولاد دفعتنا لديهم القاب
مثلا (طارق تكل لاعب المريخ السابق) وقام بتلقيبه بتكل شقيقه الطيب زكي والطيب ذاته لقبه(كبسة) وكان متخصص في اطلاق الالقاب على زملاءه (مثلا - كديسو - التريتة..الخ)

[صلاح الدين محمد]

الفنان المبدع / بدر الدين

لك مني كل الشكر علي الاضافة الجملية

[Madanawi]

من حولنا الاصدقاء والاهل والجيران .. كثير منهم من يحمل لقبا مرادفا للاسم الحقيقي وبعض الالقاب تكون هي الاكثر رواجا في تعريف الاشخاص لانها تطغي على الاسم الاصلي وتحل محله.

بعض الألقاب جميل ويسعد صاحبه عندما ينادى به .. وبعضها ذميم والعياذ بالله ويسخط صاحبه عندما ينادى به .. وأنا أدعو كل الشباب أن ينادوا من يحمل لقبا جميلا بلقبه وأن يبتعدوا عن مناداة صاحب اللقب غير الجميل بهذا اللقب.

قال تعالى ( و لا تلمزوا أنفسكم و لا تنابزوا بالألقاب بئس الاسم الفسوق بعد الايمان)

[صلاح الدين محمد]

الجميل مدناوي

مشكور علي اضافتك الحلوة

[شبندر]

السلام عليكم انا طبعاً لقبي شبندر وهو لقب لي جدي والد والدي واللقب لأنه كان شيخ النجارين وتحول اللقب لوالدي واعمامي وأولاد أعمامي ولو جيت البيت وقلت عاوز شبندر البيت كله بجيك مارق اسمي الحقيقي حيدر عبد الغفار محمد أحمد
تخريمه : كواره شقيق أخونا ود المازون الكل يعرفه بي كواره فقط أسمه الحقيقي محمد الأمين حامد

[صلاح الدين محمد]

الراقي / حيدر عبد الغفار

اللقب الاسري جميل وبكون عايش ومتوارث الي ان يرث الله الارض

وبشكرك علي الاضافة الجميلة لذكر لانسان جميل وفنان اخونا ( كوارة) لان الكل ما بعرف

انو اسمو محمد الامين عدا القريبين منه وتحياتي لي ودالمازون والرائع عثمان ( جكسا )

[nasir]

الاخ ابا انا من م اللقب اعرفك تماما
والقريب اني لعبت كورة بس ابدا ماكان عندي لقب
وكثيرون يحملون القاب في مدني يكون ارتباطها بالاسم كارتباطنا بالاغتراب
ساحاول ان اذكر من اعرف بالالقاب :
1/ امين فضل المولي ------------ عمو
2/ ياسر صديق ---------------- حداثة
3/ عمر محي الدين--------- - الديبة الصغير
4/طارق ذكي ---------------- تكل
5/ المرحوم معتصم --------- شوكة
6/ بدرالدين جابر ----------- تره
7/ عبدالاله -------------- حربي
8/النور-------------------- بازنقا

[محمد أحمد الشيخ]

والله يا باكنا يا حليلك الأسماء الذكرته كلها من الأرشيف
لكين ستظل خالدة في ذاكرتنا الي الأبد

مشاققة :- مشتاقين ليك وين أنت .

[صلاح الدين محمد]

الحبيب / ناصر

مشكور شديد علي اضافاتك الرائعة

وفعلا نجد انو الالقاب الفردية معظمها من

مجتمع الكورة ومدني كلها كفر وتر

وايضا الالقاب بتجي من اسم الاسرة والاسر

في مدني كثيرة

[wafafathi]

thanks alot for nice topic

[كريشنا]

موضوع جميل يا صلاح , انا لقب كريشنا دا طلع من سينما رودي . لكن في القاب بتشبك في الزول لي جنا جناه ومن تسمعا تضحك زي نبقه , بليه , حسن فسيخه .....
ومرات الاسم يقطعوا حته حته تلقي ابرهيم ( ابرا ) مصطفي صفصف , حسن حسين حسان محسن ... حسكو , احمد محمد محمود حامد .... ميدو , نزار ابو النيز , جمال جيمي , .....
ومن دا في كتير ولا ما كدا

[مختار بازى]

يا كرشينا كلنا من الهند ولا شنووو:confused:
وانا بازي لقبني المدير بتاع المدرسة استاذ الجيلي عبد الله مرسال المناسبة حقت اللقب شنو ما عارف ؟
ومن اليوم داك واسم مختار بححححححححح:D :D

[صلاح الدين محمد]

مشكورا كتير وفاء علي الوفاء

[صلاح الدين محمد]

كريشـــــــــــــــــــــــــــــــــنا

لقبك جميل وكل الشعب السوداني بعرف كريشنا

ومشكور علي اضافتك الجميلة

[صلاح الدين محمد]

الحبيب / مختار بازي

مشكور علي حضورك الجميل

[صلاح الدين محمد]

وين باقي الناس ما عندهم القاب

لسه منتظرين اكتر