فوضى.. وسقوط أخلاقي مريع في حفل الفنانة شــيرين

[هيثم بابكر]

نامت العاصمة أمس الأول حزينة، ومجروحة، جراء الأحداث التي رافقت حفل الفنانة شيرين بنادي الضباط بالخرطوم الذي شهد أعمال فوضى واسعة، بسبب الحضور الجماهيري غير المسبوق، مع افتقار الحفل للتنظيم والتأمين اللازمين مما أدى إلى تعرض الفتيات والنساء والأسر لمضايقات أخلاقية لم يعرفها أي حفل جماهيري في تاريخ البلاد، حيث دخلت المسرح أعداد أكبر بكثير من طاقته الاستيعابية.ولوحظ الضعف الواضح في تأمين الجمهور، حيث لجأت الأسر إلى معالجة الأمر بالاعتماد على نفسها لحماية أفرادها فيما آثر بعضها ترك الحفل بعد أن دفع مائة ألف جنيه عن كل تذكرة ، وشهد فناء المسرح حالة من الهرج والفوضى، وأعمال ضرب، وتشابك بالاأيدي على خلفية فواصل من الشتائم البذيئة، في حين تعرضت العديد من الفتيات لحالات اختناق، وإغماءات بعضها بسب الزحام، والبعض الآخر بسبب التحرشات المتتالية من بعض «الصعاليك والسكاري والمساطيل» على حد قول احد الحضور وتداخلت صرخات الفتيات مع أغنيات الفنانة ودفعت حالة الفوضى العارمة التي انتظمت الحفل الفنانة شيرين إلى القول للجماهير الهائجة « يا أخوانا عيب .. معاكم أخوات وأمهات» ..

منقول من الصحف السودانية اليوم .

[مح السنى مد]

الحمدلله فتيت لى شمار الحفله كلو انا كنت عايز اعرف شمار الحفله واخيراً عرفتو...

[الطويل]

كلام عجيب والله

دى ما اخلاقنا نحن السودانيين

عكسوا صوره سيئه عن مجتمعنا السودانى

ربنا أهديهم

[طارق محمد الحسن]

واللة مسالة السقوط الاخلاقى دى كبيرة وانا تاسفت لحال الشباب السودانى الدخل الحفلة وماحافظ على الادب السودانى ودخلوا الحفلة سكارى ومساطيل وصعاليك وبسال وين الشرطة من الحاصل دا ومنو المنظم الحفلة دى واين اخلاقنا والظاهر انو الحفلة دى مادخلوها الا الناس الماعندهم موضوع وماعندهم هم غايتو زى الصعاليك الدخلو الحفلة دى ياهم البجيبو لينا الاساءات واللة يرحم اخلاقنا وصفاتنا

[مثني ودالعيكوره]

العيب ما في الناس الدخلو الحلفه !!!

العيب في الحفله ذاتها .....

مفترض يتعالج لب الموضوع موش الافرازات

** يا حليلنا خلاص انطمسنا ...

وا آسفاي...

[الفارس البنفسجي]

الشكر أولاً موصول للأخ هيثم بابكر لتسليطه الضوء على هذه الظاهرة وغيرها من الظواهر الإجتماعية المغايرة لمجتمعنا السوداني .. وأعتقد إنها إفراز طبيعي للزحمة المرورية في عالم الفيديو كليبات والإتصالات.
وهناك بالتأكيد من يرغبون في المحافظة على مجتمعهم من الإفرازات السلبية لمثل هذه الظواهر ، وهناك من لا يدري أنه غارق في الخطأ من شعر رأسه حتى أخمص قدميه، نأمل من الأخوة المتداخلين تبصير المنتديين بهذه وتلك حتى يساهم هذا المنتدى في إلتئام الجروح التي تنزف.

بوركت اخ هيثم وجعلك الله نافذ
البصيرة على الدوام.

[Bet-alsudan]

جد الله يسامحهم في ناااس كده اسمحوولي يعني ما يستاهلو يكونو سودانيين ما عارفة جاين من وين ديل .. والله كلام فعلا عجيييب ده شنو ده ياخي معقووولة الناس التايننين هم البقولو ليناا نحن( عـــــــــــــــــــــــــيب) والله جد هـ ز ل ت

[خالد عبدالماجد]

بقدر ماتكون فرحتنا كبيرة بقدوم فنانين وفنانات كبار إلى السودان إلا ان مثل هذه الأحداث تنعكس سلباً علينا وتأخذ منا بدل أن تعطينا ، ولكن يبدو أن العشوائية التي هي ديدنا في كثير من الأمور التنظيمية اسهمت في هذا الشئ ..
ليست المشكلة في تواجد السكارى واشباههم داخل المسرح حضوراً فمثل هذه الحفلات في أي مكان في العالم يتجمع فيها كل اصناف المجتمع صالحهم وطالحهم ولكن المشكلة في ضعف التنظيم الذي منح ضعاف النفوس فرصاً لإختلاق الفوضى التي ينشدونها ..
صراحة أخي هيثم حزنت كثيراً لماذكرت فأتمنى ان يرتفع المنظمون لمثل هذه الحفلات لمستوى تلك الأحداث بدل من يأتونا بما يكون خصماً علينا .

[شبارقة]

أحشفاً وسوءَ كيل !!

دي أصلاً ما عايزه تعليق!!

[مصباحيه]

يا اخوانا انتو عمالين تقولوا ضعف فى التنظيم ؟ وين الشرطه ؟ وين وين وين
تفتكروا شخص دفع مائة الف لتزكره ممكن الشرطه تمنعوا من الدخول
بعدين الواحد لما يقطع التزكره بجى شكلوا مهذب ومحترم والزول ما بخت فيه حاجه لكن بقلوا ادبن جوه
المشكله ما هنا المشكله فى الفكره زاتها بعدين الشخص الكويس كويس مهما حصل والعكس صحيح بعدين العاصمه بقت لامه ولا رايكم شنو
انتو خلوا الحفله والحصل فيها شوفوا مضمون الحفله كان لشنو الشى العملوه الغرباء اهل البلد ما عملوه .

[ابوندى]

انا طبعا رأيى مختلف عن كل ذلك , هذه المائة الف اولى بها اخواننا فى دارفور .....يعنى خلاص وصلنا درجة من الرفاهية كى نتتبع الحفلات العربية ,, وايه يعنى شيرين ولا نانسى ..ما فنهم معروف اليومين ديل؟؟؟؟؟؟؟؟؟؟,, ما عندنا الفن ((بالكوم)) واصيل كمان

[المكاشفى]

الحفله اولا دا مامكانها الكل يعلم بضيق نادى الضباط
ويصعب السيطره على اى فوضى تحدث فيه ومن المفترض
انو الاسر ماتفرط وتدخل حفلات فى اماكن هى سلفا عارفاها
بس تكون فى محل ابكباس مايسووووق ليه الشماسه والغير مسؤولين
نحمد الله وربنا يستر لى هسى

[هيثم بابكر]

كل الشكر لكل الاخوة الاعضاء الذين شاركو في الموضوع وخاصة اخينا الكبير بعقله ومداخلاته الفارس البنفسج ، وكل شخص بحب بلدنا تكون كما هي طباعنا رجولتنا نخوتنا طيبتنا مانتأثر بالعولمة في طمث الاشياء الجميلة البتمييز بيها مجتمعنا ، ايوة شئ جميل ان ياتونا الفنانين والمغنيات من الوطن العربي وخاصة الشقيقة مصر وكمان ان يتغنو لصالح اطفال دارفور ، بس بهذه المهزلة والسخافات غير مقبول نهائيا ، وكما قالت احدى الاخوات العاصمة اصبحت لحم راس وافرازات اهمال الاقاليم كل شهر شهرين اخوانا العايشين في الخرطوم بتزوقو مرارتها منذ احداث وفاة جون قرنق واحداث المهندسين وهذه المسخرة التي حدثت بهذه الحفلة وليس ببعيد حالة الاغماءات وجري الفتيات خلف الفنان ايهاب توفيق في فندق الهيلتون بالخرطوم قبل عامين والمهازل التي تمت ايضا في تلك الحفلة .

[شاذروان]

والله ياهيثم ده كلو ما فى داعى ليهو ... البنات ديل كان اخير ليهم بفتحو ليهم شريط لشيرين او قناة من القنوات الفضائية بلقوها ناطه فيها بشوفوها ويسمعوها وهم فى بيوتهم .. لكن تقول شنو دى واحدة من شلاقة بناتنا .... وما حدث قمة الفوضى ....... وربنا يسترنا

[madaniboy]

كلام غلط والله ما كان في داعي ليه اساسا
ويسلموو على المتابعه
فاقد حنان حاليا

[معتزودمدنى]

والله انا رأيي انو اى زول ساق زوجته او اخته للحفل دا يستاهل الشى الحصل ليهو!!
لانو الحفاظ على سلامة واعراض المواطنين دا آخر اهتمامات حكومة سلق البيض الوطنية.
واخونا والى الخرطوم دى لو كانت اكشاك كان شالها من الغلابة ودى لو كانت ركشات او هايسات كان وقف ليها بوليس الدنيا عشان المخالفات ودى لو كانت اى حاجة بتدخل للناس ديل قروش من جيوب الغلابة كان اهتموا بيها.
لكن طالما الموضوع بيتعلق بسلامة المواطن المسكين دا الحكومة بتقيف بعيييييييييييد
وانا بقول للاخ ودالعيكورة العيب مافى الحفلة العيب فى الناس الدخلوا الحفلة
لانو دى مابلد يدخلوا فيها حفلات
وحسبنا الله ونعم الوكيل

[منير محجوب]

المشكلة ما كامنة في ناس الأمن ولكن المشكلة في الشباب العديمي الأخلاق ، لأن من لايحترم نفسه لايحترم الآخرين،وصاحب العقل يميز، وهانحن دائماً تشوه صورتنا، بسبب فئة غير مسئولة من الشباب ، ومناني أن تعدل هذه الصورة ولاتصبح مقلوبة إلى.......؟

[منير محجوب]

المشكلة ما كامنة في ناس الأمن ولكن المشكلة في الشباب العديمي الأخلاق ، لأن من لايحترم نفسه لايحترم الآخرين،وصاحب العقل يميز، وهانحن دائماً تشوه صورتنا، بسبب فئة غير مسئولة من الشباب ، ومناي أن تعدل هذه الصورة ولاتصبح مقلوبة إلى.......؟

[هيثم بابكر]

الشكر كل الشكر لكل الاعضاء الذين شاركو في الموضوع .......

[samar_taha]

أحب أثني على كلام الأخ معتز ود مدني لأنو فعلا الشرطة غائبة تماما في مثل هذه المواقف و ما في مثال أكبر من الأحداث المصاحبة لوفاة جون قرنق وحتى الاَن لا زال المجتمع متأثر بالتبعات , عايزين كمان الشرطة تحرس ليكم الحفلات ؟؟؟؟
وبرضو الاسر الدخلت الحفلة ما ملامة لانو أي انسان من حقو يستمتع بي وقتو وبي مالو على راحتو و طبعا دون المساس بالاخرين , لكن اللوم وكل اللوم يقع على الجهة المنظمة لأنها كان من المفترض تتوقع الفوضى دي وتحتاط ليها أمنياً أو أنها تعمل الحفلة في صالة مغلقة بعدد محدود من الناس .
عموما الله يستر علينا وعلى مجتمعنا من الفوضى والسلبيات الدخيلة .