المساعد الشخصي الرقمي

مشاهدة النسخة كاملة : قلتى لى سموك ندى


شبارقاوية
29-05-2007, 10:14 PM
قلتي ليّ سموك ندى!؟!

وده منو السمّاك ندى؟

ده أكيد أبوك

إنعل كِدة!

فيك شنو يسمّك ندى!؟

في صوتك أتخن مننا

إضنين كُبار زي دِشّنا

وتقولي ليّ سمّاك ندى!

خشمك ده ريحتو معفّنة

ايدين كبار حقات بُنى

وتقولي لي سمّاك ندى!؟

المشية كتّاحة وعلال

كرشك تقول شايل جَنى

وتقولي لي سمّاك ندى!؟

قالت لي "ها هدى في البطاقة إسمي ندى"

شوف يا أخ..

مافيش علاقة بينك وبين ندى

خلّيها ندى ..

خالت قريبة جارت صديقة ناس ندى

ما فيش علاقة

ندى في العيون أكحل مجعّد مسوّدة

انتي العيون فوقن قضى

ندى في الحواجب زي هلال

قصة نصوم دي مؤكدة!

انتي الحواجب دلجة بس

قلم الحواجب هاردها

وتقولي لي سمّاك ندى!؟

ندى تبتسم آلالاف مؤلفة تسعدها

وانتي الخشم شارّة التلاليش

بس طبق ومغطّي صينية الغدا

ندى في الوشيش نظرك بشيش..

ما يعقّدها

وانتي الوشيش وش الدحيش

نخرين كُبار كُرعين ردا

وتقولي سمّاك ندى!

قاتلي "آي أنا إسمي ندى"

شوفي أوعك تقولي اسمك ندى

ندى ما بس الاسم

ندى الجمال زايد الأدب زايد العلم زايد الفهم

ندى في الجمال ما شُفنا أجمل من كِده

ندى في الدلال خصّاها بيو رب العباد حين أوجدها

ندى في الأدب ..

ربّوها بيو رجال ياكلو النار مولّعة موقدة

ندى في الكلام

طبيعي صوتا بيجيب صدى

ندى في "البزاغ" ..

شربتي "سفن أب" ياهو ده !

وتقولي لي سمّاك ندى!


منقول مع الاعتذار لكل من تسمى ندى
نزار حسن محمد
29-05-2007, 10:18 PM
شبارقاويه ... اجازى محنك ...ندى .دى ماذكرتنى ...هيثم الخلا...
مدنيّة
29-05-2007, 10:44 PM
وحاة الله يا دكتورة بالغتي اددددديل كدا:D

همسة : اوع يكون اسمك ندي:p
شبارقاوية
29-05-2007, 10:59 PM
نزار ومدنية
شكرا ليكم والله يا مدنية ما اسمى ندى لكن قرب يبقى ندى بس ربنا ستر
نور العيون
30-05-2007, 12:27 AM
الله يجازي محنك و يديكي العافية
مختار بازى
30-05-2007, 01:02 AM
ما عندك رقم تلفونا والله عايزين نبني :d
الشريف الهندي
30-05-2007, 02:12 AM
اذكر قصه هذه القصيده كانت في بنت تدرس بجامعه الخرطوم كليه العلوم وكان لهم زميل
يجديد المدح والذم بشكل عجييييييب .. وكان له موقف مع ندى فقد استفرته تقريبا ..
وقال كده قبل عليها
وراها النجوم عز الضهر .... ماعارف اذا كانت دي المناسبه ولا اختلف على الامر
لكن القصيده جميله جدا يادكتوره واوعى بس يكون اسمك مدى
طالما مرقتي من اسم ندى دي براها سلامه الا كان على نفسها جنت براقش
محمد السر احمد
30-05-2007, 03:35 AM
كلام يا عوض دكام اسمعي بصراحة كدا وبيني وبينك دي البت مرتبطة
مدنيّة
30-05-2007, 03:47 AM
اذكر قصه هذه القصيده كانت في بنت تدرس بجامعه الخرطوم كليه العلوم وكان لهم زميل
يجديد المدح والذم بشكل عجييييييب .. وكان له موقف مع ندى فقد استفرته تقريبا ..
وقال كده قبل عليها
وراها النجوم عز الضهر .... ماعارف اذا كانت دي المناسبه ولا اختلف على الامر
لكن القصيده جميله جدا يادكتوره واوعى بس يكون اسمك مدى
طالما مرقتي من اسم ندى دي براها سلامه الا كان على نفسها جنت براقش

بالله دي قصة حقيقية ؟؟
غايتو اتلوم فيها لوووووووم السنين
دي كان تمشي تخلي ليه الجامعة بعد قصيدته دي:(
محمد مصطفي
30-05-2007, 03:54 AM
ندي دي منو البتقولو فيها الكلام ده كلو

دايرين نشوفها

اوع تكون دي القلعه
هههههههههههههههههه



ودمتي بود شبارقاوية
شبرقية
30-05-2007, 04:45 AM
احمدك يارب انة اسمي ماندي
بس بهدلا بهدلة السرور ندوش
انت يادكتورة بطلتشي في الحاجات دي من وين
شبارقاوية
30-05-2007, 05:12 AM
اى واحدة اسمها ندى تجى تجيب خروف هسى نغير ليها اسمها طوالى
والله يا شبرقية بلطشها من كل مكان بس شغالة نسخ ولصق اى حاجة تعجبنى بجيبها ليكم قصرت معاكم
شكرا ليكم كلكم على المرور
الطويل
30-05-2007, 05:17 AM
أنتى حاسداها كدى مالك :D ;) :p
ابوشوتال
30-05-2007, 05:46 AM
والله لكن ندي

عارفة دي اعملوا ليها شنو

حيطة جالوس في نص الطين
كل شوية يلا ياندي المونة لمن حيلا ابردسلمت
شبارقاوية
31-05-2007, 04:51 AM
والله لكن ندي

عارفة دي اعملوا ليها شنو

حيطة جالوس في نص الطين
كل شوية يلا ياندي المونة لمن حيلا ابردسلمت

دى بتاعت اى شئ ما جالوص بس
بالوصف دا كبرى بتبنى ليك
وتسلم