ودغلوقة

[ودغلوقة]

إلي كل الاصدقاء بمنتديات ودمدني
السلام عليكم :
زمان وانحنا صغار كنا بنسأل ابواتنا واماتنا شنو يعني ودغلوقة ودا طبعا اسم قريتنا الواقعة في مشروع سكر الجنيد البنعتز بيها جداً وانا اخترت المدخل دا عشان سببين :
الاول انو اصدقاء المنتدي حيكونوا عايزين يعرفوا يعني شنو ودغلوقة .
والثاني ودا السب الرئيسي الخلاني ادخل بالاسم دا السخرية والاستخفاف اللي اتعرض ليهو اسم قريتنا من مشترك في منتديات ودمدني بعبارة قد تكون صغيرة بس كبيرة عندنا ويمكن كتير من اصدقاء المنتدي ما انتبهوا ليها ذي ما قال الكتب العبارة (عشان ما يفهموا حاجة ).
العبارة وردت في تعليق من فادي الماحي للرائع جمال الماحي وكنت منتظر من جمال ان يعلق علي كلام فادي ولكن لم يحصل .
يا اخ فادي لو ما عارف انو ودغلوقة بتعني لي كتير من ناس الجنيد شنو اسال وحتعرف واول واحد يوريك المعني دا ( والدك) .
ولكم الشكر
احد ابناء ودغلوقة
السعودية - المدينة المنورة

[صلاح ودالطاهر]

اخوي الحبيب مرحب بيك ونحن نحب نعرف المعني ولاتزعل ياخي نحن من ارض المحنه وارض الجزيره ولك العتبي حتي ترضي ومرحب بيك في منتدك منتدي ودمدني ومرحب بجميع اهل منطقتكم العامره وقالوا في المثل المابتعرفوا تجهلوا لك التحية مره اخره ونتمني ان نسمع صوتك عبر الهاتف ونتشرف بصداقتك اخوك صلاح الدين الطاهر الرياض 0569842896

[ودغلوقة]

كل الشكر للاخ صلاح واتشرف اكتر بالمعرفة وسيكون هناك اتصال ان شاء الله

[Madanawi]

أولاً مليون مرحب بيك عزيزنا ود غلوقة ،

لك العتبى حتى ترضى ..

السخرية والاستخفاف ليست من شيم المنتدى .. ورسالتنا الود والمحبة .. وأن نزرع الخير لنحصد الود ولندحض الفرقة والشتات ،،

[Jamal Elmahi]

الحبيب ودغلوقه
سعدته أيما سعاده لمّا ضربني دعاش وهمبريب الغباش وقطّعني الترعه ولقيت نفسي وسط أهلي ناس ودغلوقه...كرم وشهامه وفروسيه ...رجاله وضكاره وناس حاره ...المرا عندهم بي مية راجل ..والراجل بي الف فارس من فرسان زمان مش حناكيش زمنا دا ...
غلوقه هي حبوبتنا الكبيره وهي بي ألف فارس مش مية راجل ...ولنا جميعاّ شرف الانتماء ليها..وكضّاب البقول كلمه في غلوقه أو دوغلوقه فهم أهلنا لحم ودم وهذا شرف لنا والضفر ما بطلع من اللحم ...والعز بالاهل أأأأبوي...

مشاققه ...
ودغلوقه أأأعشاي ما تنقطع ...بالله العظيم ريحة الاهل ترد الروح ...ياحليل أهلي ...ناس ودغلوقه ديل أهلي ..ناس الغباش ديل اهلي ..ناس مكنون ديل أهلي ...وناس الضهره كلهم أهلي ..

جمال الماحي

[جيفارا]

جمال الماحي يا إبداع ....

بس مازلنا منتظرين تكلمنا عن غلوقة وبالتفصيل الممل وسيبك من أي واحد قال كلام كدة ولا كدة ما كلنا سودانيين ,

يالا ياود العم منتظرين كلامك . ولي قدام

وبعدين أنا بقوم أكلمك عن كلفورنيا ........
على سبيل المزاح

[ودغلوقة]

الاخوة الاعزاء:
الرائع جمال ..
والزول الجاي من ارض المحنة صلاح ...
ومدناوي ..
وصاحب التوقيع المدهش ,, جيفارا ,,
الواحد بحس انو الكلام ما كفاية للتعبير عن شعورو وهو بيقرأ في الردود الجميلة ابتدأً من رسالة المدهش جمال وهو بيضربوا دعاش ودغلوقة ويتذكر من علي البعد ريحة الاهل البترد الروح , ونمشي لي رسالة زول الجزيرة الاخ صلاح البتحس في رسالتو شوق وحنين لي ارض المحنة وفعلاً يا مدناوي الدنيا لمة ناس في خير ,
وانا بقرأ في توقيع جيفارا حسيت انو لمس وتر نحنا فعلاً عايشنو والحياة اصعب لحظاتها الفراق .
لكم التحية
ورايكم شنو نتقابل علي الماسنجر
عبد الحليم مبارك محمد احمد
السعودية
المدينة المورة

[Jamal Elmahi]

الوجيه زين الشباب عبدالحليم
ود غلوقه والجنيد عائله واحده ...أهلنا الغبش زمان كانوا عرب رحّل شغالين بنظام رحلة الشتاء والصيف ..في الخريف بمشوا بي سعيتهم يزرعوا في الضهره ودغلوقه وبعد الحصاد في الشتاء برجعوا الجنيد عشان يزعوا الجروف وبيوتهم كانت خيام متحركه وبعضهم عندو دوانيب أي بيوت مستديره وبعد العولمه إنفصلوا وكانت ودغلوقه وكان الجيند ولكن مازال الدم يجري بيننا...ناس الجنيد عجبم همبريب البحر ودعاش الجروف وناس ودغلوقه عجبم همبريب البطانه الماخمج ودعاش البارد من شرق الله البارد وكلو زول عاجبو الصارّو...ولاّ مش كدا ...وتبقي صلة الرحم لمواصلة رحلة الشتاء والصيف ...

مشاققه...
بالله يا عبدالحليم أحكي لينا عن حبوبتنا غلوقه وعن الاصاله ...

جمال الماحي

[Jamal Elmahi]

جمال الماحي يا إبداع ....

بس مازلنا منتظرين تكلمنا عن غلوقة وبالتفصيل الممل وسيبك من أي واحد قال كلام كدة ولا كدة ما كلنا سودانيين ,

يالا ياود العم منتظرين كلامك . ولي قدام

وبعدين أنا بقوم أكلمك عن كلفورنيا ........
على سبيل المزاح

حباب جيفارا وحباب كليفورنيا
إتا ظنيتك زيي ...أنا لي زمن ما دخلته المنتدي ودخلته بالصدفه ولفت نظري ودغلوقه المابغباني وريحة أهلي الغبش ...وطبعاَ أخوك سرح من ودغلوقه شقيت الغباش ومشيت سوق تمبول ولاقيت أهلي ناس عد الخضر وعد الحاج والطندب والتراجمه والعماره وبانت وحلفوا علي فطرته معاهم بي كبدة إبل وفول مظبط وهضمنا بي.....تمها براك من الكمبو وكيلو سبعه ...
مشاققه...
أها يا جيفارا شاقق بينا إتا ...من كليفورنيا لي وين يا ربي...!!

جمال الماحي

[ودغلوقة]

الاخ جمال :
اصدقء المنتدي ...
في التسعينيات عندنا شباب قالوا عايزين يغيروا اسم ودغلوقة واختاروا اسم ( غفار ) وكان عندهم مهرجان ومعارض ثقافية وطرحوا الموضوع للناس وتعال شوف ...
اجدادنا واعمامنا اول كلام قالوه ( اكان ما عندكم شغلة شوفوا ليكم شغلة تقضوها ) .. ( بعد ما نموت الدايرنوا اعملوهوا لكن هسي شوفوا ليكم موضوع تاني ) ..
وبعد كده جاء الكلام عن عن المرة البتساوي 100 راجل ( غلوقة ) واللي كان منها اسم القرية ... المرة الضكرانه .. المرة الكريمة .. والتي كان الكل بيحترمها ويقدرها وكان ليها كلمة وما في زول يقدر يرجع كلاما ويمكن يكون في تفاصيل يا جمال انت عارفا اكتر مني ..
وخليك علي تواصل ....

[Jamal Elmahi]

الاخ جمال :
اصدقء المنتدي ...
في التسعينيات عندنا شباب قالوا عايزين يغيروا اسم ودغلوقة واختاروا اسم ( غفار ) وكان عندهم مهرجان ومعارض ثقافية وطرحوا الموضوع للناس وتعال شوف ...
اجدادنا واعمامنا اول كلام قالوه ( اكان ما عندكم شغلة شوفوا ليكم شغلة تقضوها ) .. ( بعد ما نموت الدايرنوا اعملوهوا لكن هسي شوفوا ليكم موضوع تاني ) ..
....
أخو الاخوان عظيم الشأن عبد الحليم
وأنا كمان بضم صوتي لصوت أعمامي وأقول للشباب أختو ود غلوقه و الماعندو غلوقه اليشتري ليهو غلوقه...والنسي قديمو تاه ...وغلوقه تراث وأصاله ..وياحليل غلوقه وياحليلنا نحن الماشفنا غلوقه ...والعولمه كان بتنسّي الناس أصلهم وفصلهم تطير وتقع في البير...ياها دي زاتا الفلهمه العوره وشيل البطاريه في القمره ...وأنا في نظري ودغلوقه ولا ميامي...
لك الود وأجمل الاماني...

[ودغلوقة]

سابتات قلوبنا ما بسكن هلع في جوارن ....
وقاسيات الجبال اكان بدن بالرحيل حجارن ..
بمشن دغري بالدرب المشوبو كبارن ......
والبلد المحن لا بد يلولي صغارن .................

علشان تذكر همبريب البطانه وبالاخص همبريب مكنون يا جمال ..

وهاك ...
الليلة الصعيد صبحن بروقو يبرقن ..
وما قايل السنين من البريدو يفرقن
شن تشبه بلا قش البطانة الزرقن ...
وا اسف العقول وقت القلوب يتفرقن

احمد عبدالله بابكر
قرية مكنون .....