ذكرياتي مع بص عم عباس وسنكات جبرونا

[عصام الدين عموش]

من أجمل ذكريات طفولتي التي تدور في خلدي اليوم هي ما كان يحدث من مفارقات على خط سنكات جبرونا وبص (عم عباس) ، وكان هذا في نهاية الستينات وبداية السبعينات ، حيث الوسيلة الأكثر رفاهية ًلنا وهي البصات الداخلية والتي تنقلك رواحاً وغدواً ما بين السوق الكبير والحي الجميل ( حي الصقور ) أقصد به حي الثورة حالياً .
فقد كنا نعشق الترحال عليها صيفاً وذلك لأنها مفتحة الجوانب مشرعة الأبواب يأتيك النسيم عليلاً من كل صوب ده إذا خلا الأمر من السموم والكتاحة ورائح الجازولين ونكره ركوبها شتاءً وخريفاً لأن أبوابها ونوافذها أيضاً مشرعة لكل زيفة أو مطرة رغم القماش التخين الأخضر الذي يكسوها من الداخل .
كانت هذه البصات متعة نساء الحي خاصةً إذا كانت الفردة عند( عم عباس )، وعم عباس رجل مسن ضحوك تراه فتحبه دون سبب ، يحب ونسة النسوان ويمارس هوايته اليومية معهن بالمشاغلة مرة وبالردود الساخرة مرات وهذا الأمركان كفيلاً بأن بجعله ينام مبسوط البال مرتاح الضمير رغم عسر الحال ، وكان لا يعكر صفوه سوى الشباب المستعجل من أمره ، فقد كان مشوار السوق الكبير إلى حي البان يستغرق نصف ساعة ومع بص عم عباس يمكن يصل الأمر إلى ساعة وشوية ، حتى إن أحد الشباب قال لعم عباس ساخراً : والله بصك ده ما ناقصو إلا الزير .
وبالطبع كنا نحن عندما نقصد مشاهدة مبارأة في بانت و تجبرنا الفردة ونركب مع عم عباس مضطرين لأن الفردة الثانية بعد ساعة كنا نطالبه بأن يسرع ويديها نمرة 4 فكان يقول بسماحة وطيب خاطر : ياأولادي هدي العصاية عندكم كان فيها نمرة أربعة جيبوها لي أنا ذاتي عايزة .وكنا نضحك ملء أشداقنا براءة وقناعة .
ومن المفارقات العجيبة كان إذا حب الوصول لمحطة الأشراف مثلاً يدوس الفرامل من محطة أخر الشارع ، وإذا حب التوقف لأحد فجاة فعلى هذا الشخص قطع نصف مشواره راجلاً لبص عم عباس الذي توقف بعد 3 كيلو على الأقل والغريب في الأمر ما كنا نتذمر من هذا التأخير . وما حصل مطلقاً أن حضرنا مناسبة أو كورة من بدايتها مع عم عباس عشان كده كنا نفضل المشي الكداري أسرع وأرخص . وكانت محطات البص معروفة لدينا ( البان / الصقور/ جبرونا / اللفة / بانت / أخر الشارع / ود قيحة/ الحجر / ود أزرق / الكنيسة / البوشي / السوق الكبير ) وكان السوق حينها جنب الجامع بتاع البوشي أو سوق الجلود والصياغ حالياً .
وبص عم عباس متعة حقيقية لحبوباتنا وأمهاتنا فقد كان المشوار من السوق للبيت مع عم عباس كافياً لتقطيع البامية وتوريق الخدرة وقرقرة الأسود وحش الرجلة مع الونسة النقية والتي تدور ما بين الواجب للعزاء والمباركة للولادة والسمايات وعقد فلانة وطهور علانة بنفوس نقية نقاء اللبن الحليب ، والبص مكتوب عليه من الداخل ( العفش داخل البص على مسؤلية صاحبه ) ولا أدري عفشاً سوي القفاف الكتيرة المحملة بالخدار الندي المعطن برائحة الجروف الزكية والملئية باللحوم وأم فتفت والكمونية والفسيخ إضافة للأشياء الأخري والتي تهمنا في المقام الأول مثل السينات والقضيم وحلاوة قصب والتسالي وفول الحاجات وأحياناً قصب السكر أما البطيخ فكان من اختصاص الأباء . وكانت هناك روائح مميزة داخل البص خاصة عندما يهم الكمساري بالحساب فترى عشرات المفاحض ( جمع مفحضة ) بضم الميم فكانت لها رائحة خليط ما بين رائحة الجلد القديم التي صنعت منه وبين رائحة الأيدي الناعمة المدسوسة دوماً في الخدارات والسعف والحنقوق . وبمناسبة الكمساري اذكر ذات مرة بعد غلاء الأسعار وأصبح الركوب بقرش بعد ما كان بتعريفة جا الكمساري لاتنين في الكنبة الأخيرة وقال ليهم الحساب أعطاه أحدهم قرشاً أما الثاني فأعطاه ريالاً ( عشرة قروش ) ولف الكمساري في البص وعاد ليعطي تسعة قروش لصاحب الريال فأخطأ وأعطاها لصاحب القرش ، وفجأة صاح صاحب الريال : وين الباقي بتاعي ، فانتبه الكمساري للخطأ وبصوت حاد قال لصاحب القرش : إنت أديتني كم ؟، فقال له : قرش واحد ، فقال الكمساري له ورجعت ليك كم ؟ فقال له : تسعة قروش ، فقال الكمساري له طيب ليه شلتها ، فقال له : ما أنا ماعارف بصكم ده بي كم . وضحكنا حتى ملأت الدموع أجفاننا.

ولنا عودة

[magdi]

والله أيام يازمان ... ببكي وأتحسر عليك

[ابودجانه العباس]

إنت عارف مشكله مدني شنو
إنها بطلع مبدعين كتير يعني
أبسط حاجه إنت مثلاً ماشاء الله
تبارك الله أناديك أقول يا شنو
( كابتن , فنان , مبدع ,أستاذ)
مضطر أقول ليك ياجماعه ليك براك
والله رائع بروعه أمنا مدني...
طبعاً أنا من محطة الثوره حالياً
وسمعت كتير عن عم عباس دا
الذي يكاد يوازيه الآن عمنا اللذيذ
(علي عكس).
(ياأستاذ يافنان يامبدع يا كابتن عصام)
إسم ولا قطر دا بس بحق وحقيقه تستاهلو
واصل في سرد هذه القصص وأتحفنا من
روائع مدني وذكرياتك معها ولا تنسي الكوره
والمواقف الطريفه ولابأس بقليل من المواقف الصعبه

دمت لنا يا (عفاكم).إختصار لي إسمك الطويل
عصام..فنان..استاذ..كابتن..مبدع..

أخوك :- أبودجانه العباس محمد
الشهير (بعلويه الداعايه) أو أبولبانه.
كما يحلو للكتير مناداتي.

[samah]

والله يااستاذ عصام الليله بكيتني بحكيك ذكرتني ابوى الله يطول عمرو
احب دائما زمان وناس زمان ولا امل ابدا
من الحكاوي
ابوي عندو ذكريات جميله وسرد اجمل واظنه كان واحد من ركاب بص عم عباس
وياحسرتي في حاجات كتيره ماسمعتها منو واخذتني الغربه بعيدا
واصل ويديك ربي الف عافيه وماتحرمنا طلتك الذكرتنا الحبايب
وخلي الباص ماشي وماتفرمل

[الفارس البنفسجي]

الغالي عصام

أولاً دعني أرحب بك
وزي ما بيوت كتييييرة
في مدني هي بيتك
أكيد المنتدى دا بيتك

مداخلة :

ما قلت لينا يا اخ عصام
عمرك في الوقت داك كان
كم سنة؟

معاً لنستشرف أيامنا القادمات
وزادنا عشق هذه المدينة الحبلى
بكم وبأمثالكم.

[مرتضى يوسف العركي]

عموش :
اولا اشكر لك استجابتك بالكتابة والتوثيق .
ثانيا عليك الله واصل .
ثالثا كنت ضابط برتبة الملازم في القسم الاوسط مدني ( الاساس) تابع للجنائيات يا عموش استرعى انتباهي اقتياد احد افراد قسم الحركة المجاور للعم عباس ايقنت بان ثمة مخالفة ستحرر لعمنا عباس فقمت باستدعاء الشرطي لمعرفةما الامر مع ان الامر ليس من اختصاصي فاجابني بان هذا السائق يسير ببطء معرقلا للسير فضلا عن ان ليس لديه رخصة قيادة فضحكت بداخلي وبجدية سألته ما عندك رخصة قيادة فاجاب ياولدي نسيتها بس فاستطردت وهل تعتقد بان ذلك عزر مقبول قالها يا ولدي انتو جيتونا من وين والله بصي ده اول بص في المدينة وما حصل اتبهدلت البهدلة دي وناس البوليس ديل كلهم اولادي بركبوا معاي وسكت قلت ليه بركبوا ملح قال لي انا ما قلت كده .فامرت الشرطي الاكتفاء فقط بتعهد للمذكور لاحضار رخصته فهو احد رموز المدينة وكون البص يعرقل السير فهذا وضع قائم وثابت منذان كنا اطفال والاوضاع الثابتة يمكن استثنائها خاصة وان العجلة من الشيطان وقد يكون الامر حرص على السلامة فاجاب الشرطي مبتسما حاضر ياجنابو فما كان من عباس ان قال ياو لدي انت منو فاجبت بانني ود ابورز ( اهل والدتي) الذين يعرفهم وزبون قديم قال لي من عويناتك كنت بتركب ملح بس ده ما مهم عافي ليك وعافي لاهلك كلهم الركبوا ملح بس التعهد ده القلتو ده اجيهو بعد ما اعمل الفردة فقلت ما في مشكلة لانو قسمنا ده شغالين للصباح ومافي طريقة للزوغان وبالفعل فقد زاغ الرجل فلم احفل بملاحقته وبعدها بكم يوم قابلته في الموقف يمازح الجميع فقلت ياعم عباس ما جيت كتبت التعهد فقال ياجنابو انا بنسى المحطات دايرني اتذكر ليك تعهد ياخي الشعب في خدمة الشرطة ما تقلبوها مرة وتكونوا في خدمة الشعب فقلت بتلقائية وعفوية نعم فليكن ذلك .

ـــــــــــــــــــــــــــــــــــــــــــــــــ
كلمة طيبة كغيث أصاب أرضا طيبة فانبتت كلأ وعشبا كثيرا

[نزار حسن محمد]

محبوبى الفنان ....عصام عموش ...
لك الحب والاحترام ،،،
اولا ارجوا ان تعزرنى طبعا النظر بقى مجلى عشان كده قمت بتكبير الخط واتمنى منك مواصلة السرد ايها المبدع لك كل الود اخوك نزار ودحسن

[شبرقية]

والله نحن الضحكنا حتي ملات الدموع اجفاننا
بحكايتك كاني ركبت بص عم عباس
لك كل التحايا استاذ ودعموش
في انتظار البقية بفارق الصبر

[عصام الدين عموش]

أخي أبو دجانة ..
لك الود والتحايا العطرات شكراً على اللقب الجميل الذي مزجته بطيبة وسماحة أهلنا بود مدني ونحن مبدعين لأن أمثالكم أكثر إبداعاً منا ومن أجل إحساسك الجميل بالذكريات أعدك بالجميل منه ان شاء الله

[نزار حسن محمد]

سعادة الملازم سابقا المحامى حاليا .. الحلامابى..
لك الود ايها الرائع ارجوا ان تواصل المداخلات وعينى بارده عليك فى الصور بتاعت يوم الخميس بالرياض..لك كل الحب والاحترام..اخوك نزارحسن

[عصام الدين عموش]

الإعزاء مشرفي المنتدي على رأسهم المشرف العام ونائبه :
أسوق لكم التحايا وأخجل من أن أرد على مثل هذا المدح والذي بسببه حملتموني ملامة لمدني منذ سنين خلت بخلنا عليها بذكرياتنا وذكرياتها ظانين أن مثل هذه الأشياء لا تلقى اهتماماً من أحد ، فلكم العتبى حتى ترضوا .
الحقيقة وقتها كان عمري يا أيها المشرف العام كافيأً لإقامة الصلاة وصوم نصف رمضان فقط بعد قول الشهادة .

[مرتضى يوسف العركي]

سعادة الملازم سابقا المحامى حاليا .. الحلامابى..
لك الود ايها الرائع ارجوا ان تواصل المداخلات وعينى بارده عليك فى الصور بتاعت يوم الخميس بالرياض..لك كل الحب والاحترام..اخوك نزارحسن

اخي الكريم ود حسن نزار الحبيب
اولا اشكر لكم مداخلتكم ومجاملتكم الانيقة فصفة القائد تعتليك وكم انا سعيد بهذه المداخلة التي وان تاخرت يكفيها صدقها فالانسان يحتاج لرائع مثلك تعرفه عن كثب لك الود اطنان والاعتزار مثله ان اصابكم مني خرش ما يوما ما لم اقصد به الا قامة تقف على امر هذا المنتدى مشهود لها ضوء قبيلة ومواقف طيبة لراجل قيافة أندب حظي العاثر لم التقيه في الثمانينات ها ها ها ( بكسر في الحاجز والله ليس الا ..)
لك الود والاحترام وفقنا الله واياكم لما فيه خير هذه المدينة وانسانها الكريم
اخوكم ومحبكم
مرتضى يوسف العركي
جوال 0501464578

ـــــــــــــــــــــــــــــــــــــ
كلمة طيبة كغيث أصاب أرضا طيبة فأنبتت كلأ وعشبا كثيرا

[مدنيّة]

والله يا استاذ بالجد متعتنا بروعة سردك للذكريات الخوالي
لكن عمنا دا بسوق البص من الستينات ولغاية لما جاء اخونا مرتضي بقي ملازم هو بسوق ؟؟؟ حيرنا والله والحالة هو من الستينات دي نمرة اربعة في قاموسه مافي طب في التسعينات كيف ؟؟ والله الراجل دا حاجة عجيبة

همسة : شنو ياود جيرانا في داااعي للاسعلة التعسفية دي ;)

[عصام الدين عموش]

أولاً في بداية السبعينات أخونا مرتضى ممكن يكون في المتوسط لكن المخالفة السواها لعم عباس كانت في اوائل الثمانينات حسب اجتهادي . وبخصوص نمرة أربعة نحن كنا بنعتبرها ضرب من الخيال وسابع المستحيلات ما كنا قايلين الزمن بلف ويجيب سيارات فيها أربعة وخمسة وخلف ( أصلو بص عباس ما كان فيهو خلف )


ولتعديل الأحداث حقو تدقوا لينا في الموبايل 0565401573

[مدنيّة]

لالالالالالالالالا
يا استاذ مرتضي بقي ضابط في التسعينات والحلفة لهسي متذكراها :cool:

وبعدين يعني بالجد كدا ما كان في نمرة اربعة ؟؟ ولا في خلف ولا انت قمت بي باربعة :D

[Madanawi]

الرائع .. الفنان .. عصام عموش ...
لك الود .. والتحية .. والاحترام .....

أها .. وبعدين .. لمن وصلتو السوق؟؟

مستنيين .. يا رائع

يلا .. أكمل..

[نزار حسن محمد]

الاحباب عصام عموش والحلامابى .. الكلام تحت الهوى ليه طعم تانى ارجوا التواصل والرقم ده سرى للغايه هههههه00971507877187

[معتز حمدتو]

الاستاذ عموش
تحيه طيبة واعطر الكلمات وانت تعطر المنتدي باطلالتك بالاضافة لذكرياتك الجميله اذكر بص عمك عباس وانا صغير وكم ركبت علي متنه واسعدتني لحظاته الجميله ، اذكر ان ابن عمتي مالك انس محمد محمود وهو من سكان جبرونا كان من اشد الناس كرها لبص عمك عباس نتيجة لحادث ادي كسر رجله ومكوثه بالمستشفي فتره من الزمن ولا زال يعاني من ذلك الحادث الذي ادي لعرجه في رجله حتي الان فما كان من الحاج انس وبشهامته وكرمه المعرفين ان عفي عن العم عباس والذي اتت بعده البرنسات ومنها برنست عمك زحل والذي بعده ايضا اصبحت حي الصقور منطقه عامره جدا واذكر فيها الكثير من الاسر العريقه والطيبه والتى لا تزال تربطني بها عشره جميله وذكريات اجمل .
لك الود استاذ عصام وبالله لا تقطع التحف المعروفه عنك من سنين .
معتز عبدالمنعم حمدتو

[مرتضى يوسف العركي]

لالالالالالالالالا
يا استاذ مرتضي بقي ضابط في التسعينات والحلفة لهسي متذكراها :cool:

وبعدين يعني بالجد كدا ما كان في نمرة اربعة ؟؟ ولا في خلف ولا انت قمت بي باربعة :D



الكريمة مدنية :والعزيز جدا استاذنا عموش
يا مدنية الحق حق الحفلة التي اقامتها لي اسرتكم الكريمة كانت بمناسبة ترقيتي لرتبة نقيب في منتصف التعسينات على ما اذكر لكن ذلك لا يمنع كون استاذنا عصام عموش هو دفعة خالي في المدرسة الاولية في نهاية الاربعينات من القرن الماضي ( ( حا هريك يا عموش )وفيما يبدو هناك حلقة سجلت معه في برنامج من الامس وهي ذاتها مفقودة من سجلات التلفزيون في نهاية الستينات ها ها ها ها حكو بيها بعض معارفي ويامدنية انا دفعة اخوك ولا يتجاوز عمرنا كم تعلمين حتى الان 28 ربيعا حلوة ربيعا دي هاها ها .وعموش مع كده لسة مصر انو انا دفعتو وحضرت معاه كاس الامم الافريقية 1970م الكان في مدني .ويا عموش بتعرف اخونا عبد الرحمن الطاهر ( القسم الاول )ابوة كان مقدم للاراضي وقال لولدو انت عمرك كم ؟ لانو شهادة الميلاد ضايعة بتاعتو قام قال ليه بابا انا عندي واحد وعشرين ربيع فما كان من الاب ياولد الله انت بقيت ما نافع الله يربع كرعينيك اوع اسمع ربيع دي تاني.

ــــــــــــــــــــــــــــــــــــــ
كلمة طيبة كغيث أصاب ارضا طيبة فأنبتت كلأ وعشبا كثيرا

[مرتضى يوسف العركي]

الاحباب عصام عموش والحلامابى .. الكلام تحت الهوى ليه طعم تانى ارجوا التواصل والرقم ده سرى للغايه هههههه00971507877187

العزيز ود حسن (نزار) ولازم اقدم عم حسن عليك لاعتبارات انه اسم والد ام العيال ويمثل حكومة كاملة باركان حربها
اعتقد انك في نهاية الخمسينات كنت في احدى الجمهوريات السوفيتية السابقة عشان كده ما حتتذكر استاذنا عموش
على كل ( ارجي الراجيك على الهاتف ) وناس الامارات ديل كان ضباطهم الان طلبة فيما سبق يدرسوا عندنا كطلبة في كلية الشرطة بالسودان هم وكل ناس الخليج يا حليل زمان فحدث ان اخطأ احدهم يوما في البيادة فما كان من تعلمجينا طيب الله ثراه الا ان صاح به خلي بالك وفتح عينك طلبة قطريين بتاعين ابو ظبي ديل ها ها .

ـــــــــــــــــــــــــــــــــــــــ
كلمة طيبة كغيث أصاب أرضا طيبة فأنبتت كلأ وعشبا كثيرا

[مدنيّة]

الكريمة مدنية :والعزيز جدا استاذنا عموش
يا مدنية الحق حق الحفلة التي اقامتها لي اسرتكم الكريمة كانت بمناسبة ترقيتي لرتبة نقيب في منتصف التعسينات على ما اذكر لكن ذلك لا يمنع كون استاذنا عصام عموش هو دفعة خالي في المدرسة الاولية في نهاية الاربعينات من القرن الماضي ( ( حا هريك يا عموش )وفيما يبدو هناك حلقة سجلت معه في برنامج من الامس وهي ذاتها مفقودة من سجلات التلفزيون في نهاية الستينات ها ها ها ها حكو بيها بعض معارفي ويامدنية انا دفعة اخوك ولا يتجاوز عمرنا كم تعلمين حتى الان 28 ربيعا حلوة ربيعا دي هاها ها .وعموش مع كده لسة مصر انو انا دفعتو وحضرت معاه كاس الامم الافريقية 1970م الكان في مدني .ويا عموش بتعرف اخونا عبد الرحمن الطاهر ( القسم الاول )ابوة كان مقدم للاراضي وقال لولدو انت عمرك كم ؟ لانو شهادة الميلاد ضايعة بتاعتو قام قال ليه بابا انا عندي واحد وعشرين ربيع فما كان من الاب ياولد الله انت بقيت ما نافع الله يربع كرعينيك اوع اسمع ربيع دي تاني.

ــــــــــــــــــــــــــــــــــــــ
كلمة طيبة كغيث أصاب ارضا طيبة فأنبتت كلأ وعشبا كثيرا



لاحولة يامرتضي وهسي خليتني اشكك في كلام استاذ عصام واشيل وادافع انك صغير وجاهل هسي يعني الواحد يخجل كيف ماعارف ;)

واتاريك كنت نقيب في الزمن البعيد دااااااااااااااااك :cool:

همسة : قلت لي كم ربيع يامرتضي ؟؟؟ :eek:

[zaher]

الفنان الرائع ...

اللاعب ..

الفنان


الرائع

البشوش دوما


لك الف تحية ... ومليون مليون وقفة احترام وتبجيل لقدرك السامي ....

وانت تحمل هم مدني ... المدينة التي تحتاج الى امثالك ... وانا كلي علم بانك تريد ان توثق كل شئ عنها ... فارجو من الله لك التوفيق .... ودمت .....


مشاققة ............
***** ( الى المستشار مرتضى .. الحلمابي .... يا ريت تتحفنا انت ايضا بذكرياتك التي سمعنا القليل منها في جلستنا الاخيرة .. ومن ضمنها تسمية الحلمابي ... وخاصة انو احنا سمعنا من تحت تحت انه لك درر محتفظ بها على صفحات مطوية بالمنزل ... والكلام ده سمعناهو من اخوك هو اللي فضحك .....)

**** ( عصام ده يا جماعة صغير في العمر .... واخر مباراة ضده بعد عام الفين ما قدرنا نمسكو وهو الغلبنا ... وعموش ... ليست صفة لانو المباراة كانت بالليل والنور فيها يكاد لا يذكر ... يعني احنا اللي كنا عميانييين ... )

الله يديك العافية اخي عصام

[مرتضى يوسف العركي]

لاحولة يامرتضي وهسي خليتني اشكك في كلام استاذ عصام واشيل وادافع انك صغير وجاهل هسي يعني الواحد يخجل كيف ماعارف ;)

واتاريك كنت نقيب في الزمن البعيد دااااااااااااااااك :cool:

همسة : قلت لي كم ربيع يامرتضي ؟؟؟ :eek:



يا مدنية
الله يهداك كما يقول الاخوة السعوديون ما عايزة تجيبها البر
طيب باحتساب عمري من غير الاجازات وبالتاريخ الهجري ونحن مسلمين والذي يسقط اكثر من طاشر يوم من الميلادي وبمراعاة الظروف البيئة المحيطية بحياتي المدنية والعسكرية وباحتساب خدمتي بمناطق العمليات سواء بالجنوب او الغرب والذي تحتسب فية السنة بسنة ونصف والفيها ايام تحسب بسنين وباستقطاع الشواكيش التي تعرضت ليها في حياتي من اياهن الدايرات يواصلوا دراساتهن وباضافة ايام الجامعة وكذلك استقطاع ايام كلية الشرطة وبالنظر بعين الاعتبار لفترة الزواج الممتدة والتي جازفت فيها مع ام العصابة والعصابة انفسهم وبالنظر الى عمودية محمد سعيد التي تزين شهادة ميلادي والتي لم تقبل فيما بعد بواسطة سلطات الاحصاء مما اضطرني الى استصدار شهادة تسنين مزورة ولا تحمل تاريخي الاصلي مما يدفع لعدم الاعتداد بها وبالتالي لاتعطي نتيجة دقيقة قد تضلل كثير من الشامتين امثال اخونا عموش فالحمد لله عمري يكون بالضبط ؟؟؟؟
كم آسف لان كل الوقائع اعلاه لاتتعلق بالطلب وغير منتجة حيث تم البناء فقط على على التاريخين الهجري والميلادي وبما ان طلبكم في همسة ( كم ربيع ) وحيث ان بالسودان لا يوجد ربيع مما يستحيل معه احتساب كم ربيع في عمري ولما كان تواجدي بالمملكة منذ ثمانية اعوام وبالتالي ثمانية ربيعات مضاف له ما درجت السلطات السودانية في غير السماح لغير البالغ بالسفر للعمل للخارج وبما ان سن البلوغ والعمل المعتد بها قانونا هي الثامنة عشر ليبقى المجموع 26 وعشرين سنة وحتى لا يفهم من انني بصغر نفسي على الجميع لتحقيق مآرب اخرى فهذا الظن بعيد عن الوقائع باعتباري متزوج وحريص على اسرتي وليس خوف وبالتالي لا يوجد دافع للتشريك لحواء اخرى فام العيال تكفى ( انشاء الله تقرأ الكلام ده ) وككرم مني ازيد سنتين ليصبح 28 ربيع اعتقد ما قصرت
همسة :
في احد الكشات على منطقة للخمور البلدية ابان عملي بالشرطة فقمت بالقبض على واحد سكران فسالته عن بطاقته الشخصية ؟؟فرد بسخرية وين الشخصية لمان يعملوا ليها بطاقة .

ـــــــــــــــــــــــــــــــــــــــــــــــــ
كلمة طيبة كغيث أًصاب ارضا طيبة فأنبتت كلأ وعشبا كثيرا

[سواااح]

الاليف .. استاذي / عصام

لك عاطر الامتنان علي قتح سيرة التاريخ ..

لا اخفيك ان قلت لك .. انت رائع !!!


وكيف لا تكون رائعا وانت آت من مدينة رائعة !!

عفوا .. انا هنا باق لديك .. فواصل سرد هذه الدرر

دمــــــــــــــــــــــــت ،،

[الفارس البنفسجي]

أيها النفس البهئ
القادم إلينا من كل
الإتجهات

أخونا المتقد عصام عموش

سملت ودمت لمدني نهراً
يتدفق بالأصالة وحب الإنتماء

[ابودجانه العباس]

حبيبنا ( عافاكم )...

شنو قلتا لينا كفاكم..

واصل كلنا شغف لسماعكم..





مشاققه تحت تحت :

هسع بديك دعوه من النوع أبو كديس

هههههههههههه ههههههههههه

لا لا أنت ما من النوع البداعيهم

طبعا بداعي كتير عشان تربيه حبوبات...
هههههههههه ههههههه هههههه

دمت لنا (عافاكم )..

[MASS77]

لما تحكي زكرياتنا كنت تحكيها بي امانه
كيف بدت
كيف انتهت
واتبددت
وفات اوانه
صدقني محتاجين لتلك الذكريات لينا نحن ولي اخوانا الصغار
الما عندهم ارشيف يحكي زمان رائع وناس طيبين
واخوه متواصله وروعة وبراعة السودانيين زماااااااااااااااااااااااااااان
ولو بنتمني انو الزمن يرجعنا لي الزمن الفات وما جا زيو كان اتمنينا ترجع لينا منو حاجاتنا القديمه السمعناها والعشناها
والبتمثل كل قيم البلد دي في زمن ملوهو بالحب والضمير الابيض فانعم عليهم الله سبحانه وتعالي النبت والزرع والخضره
سؤال اين يقع موقعنا من هذا الزمن
شكرا ليك علي الذكريات وبتمني تتواصل من كل حله ومن كل بيت ومن كل حواشه وعن كل حاجه في جزيرة الخير

[مدنيّة]

يا مدنية
الله يهداك كما يقول الاخوة السعوديون ما عايزة تجيبها البر
طيب باحتساب عمري من غير الاجازات وبالتاريخ الهجري ونحن مسلمين والذي يسقط اكثر من طاشر يوم من الميلادي وبمراعاة الظروف البيئة المحيطية بحياتي المدنية والعسكرية وباحتساب خدمتي بمناطق العمليات سواء بالجنوب او الغرب والذي تحتسب فية السنة بسنة ونصف والفيها ايام تحسب بسنين وباستقطاع الشواكيش التي تعرضت ليها في حياتي من اياهن الدايرات يواصلوا دراساتهن وباضافة ايام الجامعة وكذلك استقطاع ايام كلية الشرطة وبالنظر بعين الاعتبار لفترة الزواج الممتدة والتي جازفت فيها مع ام العصابة والعصابة انفسهم وبالنظر الى عمودية محمد سعيد التي تزين شهادة ميلادي والتي لم تقبل فيما بعد بواسطة سلطات الاحصاء مما اضطرني الى استصدار شهادة تسنين مزورة ولا تحمل تاريخي الاصلي مما يدفع لعدم الاعتداد بها وبالتالي لاتعطي نتيجة دقيقة قد تضلل كثير من الشامتين امثال اخونا عموش فالحمد لله عمري يكون بالضبط ؟؟؟؟
كم آسف لان كل الوقائع اعلاه لاتتعلق بالطلب وغير منتجة حيث تم البناء فقط على على التاريخين الهجري والميلادي وبما ان طلبكم في همسة ( كم ربيع ) وحيث ان بالسودان لا يوجد ربيع مما يستحيل معه احتساب كم ربيع في عمري ولما كان تواجدي بالمملكة منذ ثمانية اعوام وبالتالي ثمانية ربيعات مضاف له ما درجت السلطات السودانية في غير السماح لغير البالغ بالسفر للعمل للخارج وبما ان سن البلوغ والعمل المعتد بها قانونا هي الثامنة عشر ليبقى المجموع 26 وعشرين سنة وحتى لا يفهم من انني بصغر نفسي على الجميع لتحقيق مآرب اخرى فهذا الظن بعيد عن الوقائع باعتباري متزوج وحريص على اسرتي وليس خوف وبالتالي لا يوجد دافع للتشريك لحواء اخرى فام العيال تكفى ( انشاء الله تقرأ الكلام ده ) وككرم مني ازيد سنتين ليصبح 28 ربيع اعتقد ما قصرت
همسة :
في احد الكشات على منطقة للخمور البلدية ابان عملي بالشرطة فقمت بالقبض على واحد سكران فسالته عن بطاقته الشخصية ؟؟فرد بسخرية وين الشخصية لمان يعملوا ليها بطاقة .

ـــــــــــــــــــــــــــــــــــــــــــــــــ
كلمة طيبة كغيث أًصاب ارضا طيبة فأنبتت كلأ وعشبا كثيرا


خلا يامرتضي سميناها رضينا :D

[عصام الدين عموش]

والله نحن الضحكنا حتي ملات الدموع اجفاننا
بحكايتك كاني ركبت بص عم عباس
لك كل التحايا استاذ ودعموش
في انتظار البقية بفارق الصبر

العزيزة شبرقية / كم كنا نتمنى مصافحتكم لعطائكم اللا محدود للمنتدى وما كنت أتخيل أن بص عم عباس سوف يكون له كبير صدى لأعضاء المنتدى رغم أن ذلك في السبعينات والثمانينات
وتعقيبك دل على انني يمكن أقدر أن أكتب بسخرية جادة وطبعاً لولا تعقيبك لما صدقت أن أحد ضحك من خلال سردي لقصة بص عم عباس
فلك التحية أخت شبرقية

[شبرقية]

ماحضرت السبعينات وجيت في اواخر التمانينات
لكن لاتتصور كم انا شغفة بحكاوي زمان
الزمن الجميل العدى وفات
تمنيت كثيرا لو اني عشت في ذلك الزمن
وقد تحقق حلمي واها نحن نعيشه معكم وبكم

مازلنا في الانتظار

[عصام الدين عموش]

عزيزي Mass77
أصبحت مغرماً بكم فرضاً وسنة ياأيها المبدعون في بلادي ومدينتي الخلابة
صليت عليك فرض الغرام
وتليت عليك أشعاري حب
زكيت غرامك مرتين
مرقتهن فضة ودهب
بعد الصيام صمتك ستوت
لا عطشت لا حسيت تعب
ولو سوو ريدتك لي صيام
أنا كنت صمتك من رجب

مدني الرائعة لك التحية ما دام فرسان رهانك من أمثال Mass77
الشكرلكم دوماً

[صلاح ودالطاهر]

عمي عصام وقت نفضنا عنك الغبار ابدعت ياستاذي لك التحية وانت تمطرنا بهذه الزكريات طبعا باص عمك عباس ده انا ماحضرت يادوب ياستاذي كنت في السكه لك التحية يا ابو روي ودمت ابنك صلاح الطاهر

[صالح ابوشوارب]

الاخ عصام عموش
اولا المعذرة لانى تأخرت عليك ولكن السبب النضارة بتاعة القراية انكسرت وكنت فعلا ( عموش ) لذلك نطلب من السماح طبعا استمتعت بالسرد الجميل لبص عمنا عباس ولكن انا حاعمل ليك كسرات ذى البحبها اخونا مرتضى
طبعا بص عمنا عباس ده حكاية بس ارجوك انت ومرتضى تراجعوا موضوع نهاية الستينات لان بص عباس كنت بسابقو من مربع 11 الى مدرسة جبرونا في سنة ستييييييييين . كنت بنتظر الصباح ومعاى بعض الاخوان في المحطة حتى يصل بص عم عباس وكنا بنمشى معاهو كدارى لمدرسة جبرونا وكنا بنصل قبلو .. لكن مرات الباص كان ببطل والزمن داك ما كان في استارتر ولكن كان في منفلة . والمنفلة بتاعة بص عمك عباس كانت دائرة ملحوم في مركزها عمود. في اخر العمود ملحوم حديدة تعمل مع العمود حرف تى .. بعد الباص ما يبطل يدور يقوم المساعد ( الكمسارى الان ) باخراج المنفلة وادخال العمود داخل البص من الامام وعلى الدائرة يقوم يجيب حبل يلفه حول الدائرة الموجودة بالمنفلة ويقوم ينادى ركاب البص عشان يسحبو طرف الحبل الملفوف حول المنفلة . واول ما الناس تمسك الحبل يقوم المساعد يقول واحد اتنين تلاتااااااااااا . وبعد البص مايدور تلقى المساعد يتلفت يمين وشمال ونافش ريشو وطبعا مبسوط عملية التدوير تمت بالسلام .. والبص بعد ما يدور ويمشى .. المساعد ما بيركب طوالى . يقوم يخلى البص يمشى مسافة وبعد داك يجرى يلحق البص . واول ما يصل البص يقوم يمسك في السلم ويبدا يشبح خطوة خطوتين وبعد داك ينط برجل واحده والتانية مدلدله . المهم المساعد ده كلو حكاية وسلامتكم في كسرات ابوشوارب

[نزار حسن محمد]

بالله كتر من الكسرات يابو الله جابو.. اديك لينا الصحه والعافيه

[samah]

والله عيني بارده المنتدي بقي كلو حيويه بظهوركم بيتنا نور
عموش المبدع وصلاح الراقي وعمي ابوشوارب والله نور
والحلامابي ات ييالحلامابي كنت شغال محامي في مدني
والله كلامكم سمح ونستكم سمحه ولمتكم سمحه
شكرا عموش لانك لميت لينا الوجوه السمحه دي ودمت لنا

[عصام الدين عموش]

"]أخي وحبيبي أبو شوارب

لك الود قفاف ولك التحية خدرة ضفاف
والسلام عليك يا مبدع يا شفاف

حكاية بص عباس حجيب لينا الهوا ، وتكشف المستور يا عمو صالح نحن الكنا البندور المنفلة بتاعت البص وبتاعت لوري التراب وبص المارشال وبص عمك السنجك ، والدقداق الموجود في بص عباس ما أظنو موجود في الشارع ذاتو .
ونحن الكنا بنشعبط في السلم الخلفي لبص السيرة ، لمان كان بص السيرة بغنوا لي البنات ( دور بينا البلد ده أحرق الجازولين يا الوابور جاز ، دور بي حبيبي دور بي ) وطبعاً ده ما ظنيتو بص عباس لأنو ما بقدور يعمل صينية وبص عباس لو شال لي سيرة بتاعت عرس ما ظنيتن بتعشوا ولا حتي حيحصلو الحفلة ذاتها
وذكريات تبكي وتضحك [/COLOR]

[مرتضى يوسف العركي]

استاذنا الرائع عصام عموش
السماح سيدي ان كان بكم عتب علينا
الدنيا شن بتسوى غير لمة
هانحن بكم سيدي نحتمي
اتساءل اين انت من لمة كنت انت سيدها
فتعال قبل السنين تجري وتعال فرح ليالينا
اعلم بانك ستفعل باذن واحد احد فهلا

[ودسمير]

عموش ... ليك التحايا

جد انبسطت من البوست اللذيذ ده ...

سؤال للجميع :

ماهى محطة الاشراف حاليا ...

ثانيا : لمذا لم تزكر محطة البيان يا استاذ ؟!!

مشكور مره ثانيه ... وخليك قريب وما تنقطع

[mahagoub]

عموش مدنى ومواصلاتها لها اكثر من وجه
فمثلاً ناس عووضه كان عندهم
بصات عمك حسن على
وعمك يوسف
وكذلك باقى الاحياء
جزاك الله خيرا فقد احييت فينا ذكريات وذكريات

[mahagoub]

سعادة الملازم سابقا المحامى حاليا .. الحلامابى..
لك الود ايها الرائع ارجوا ان تواصل المداخلات وعينى بارده عليك فى الصور بتاعت يوم الخميس بالرياض..لك كل الحب والاحترام..اخوك نزارحسن

هو الواحد لمان ينزل معاش بينقص رتبه

[mahagoub]

( انشاء الله تقرأ الكلام ده )

ما ياهو ده الخوف بزاتو