نحتاج مشاركتم في الموضوع (لذييييييييييييييذ)

[ruby]

طبعا الانسان عندو مراحل بيعيشها في ناس بتعيش كل المراحل وناس بودعوا الحياه ويعشوا بعضها والمراحل هي 6مراحل
1\مرحله الطفوله الصغرى من 1-7 وهي مرحله لذيذه وبيكونو الاطفال لذيذين فيها
2\مرحله الطفوله الكبرى من 8-12مرحله في ناس بيكونو لذيذين وناس لا عشان تقريبا دي مرحله بتتكون فيها الشخصيه البدائيه
3\مرحله المراهقه 13- 20فيها تغيرات كتيره كلنا عارفنها منها البلوغ والافكا رالعاطفيه وكلام من ده يعني
4\مرحله الشباب من21-39وهي اجمل مراحل الانسان
5\مرحله النضوج من 40-69وهي بكون الزول ناضج فيها
6\مرحله العجز من 70 -الى مالانهايه وده اللي انا عايزه اصل ليهو بيكون الزول يبدى او عايز يخرف او يقول الكلمات غلط وتحصل مواقف لذيذه انا عايزه من اي
زول يقرا موضوعي ده
يبدى يقولينا موقف لذيذحصل من زول عجوز
ياريت تهتمو بالكلام ده انتو ماعارفين العجايز ديل غالين علي كيف

[سلاوي]

أسمحي لي اختي بالمشاركة بإحدى روائع مواضيع اخونا الأشتر


علول ما (حبوبتي) ترسل لي و تقول لي بدورك في غرضاً ضروري بعرف إنو الموضوع فيهو تعب وتكلفة لاعن خروج الروح .. وما بترسل لي إلا للشديد القوي .. خاسة لامن تقول لي تعال (أشرب شاي الصباح) معاي .. قلبي بقول شح وكريعاتي يشيلن هم ونعلاتي زاتن يبقن في غضب الله (باقي مشاويره بكون فيها زي كلب السيجة) يومي كلو أنطط من جهة لي جيهة.. المهم رضيت بي القسمو لي ربي ومن جهة تانية مرات بكون مستفيد من مشاويره بطلع لي بي سمسرة وحبيبة قريشات منها (باقي هي في الحساب طالعة الطيش) .. وهي عارفة وأنا عارف والله عارف ..
ومن دغشاً بدري مشيت عليها لقيت شايها في النار ولقيماته في الصاج (زي شفع سنة أولى في الفصل ) .. أهان إتفرجخت لي في (بنبر) .. وهي منتكية في (عنقريبه) وقبال ما تبدأ موضوعه كبت الشاي (الصاموتي المقنن) في كباية (الشُب) أم أضان (عارفاني بقدره جداً الكباية أم أضان دي) .. وتناولني في اللقيمات من الصاج لي خشمي مباشرة بالله زي (عجّان الطابونة .. من الطاولة لي الفرن) (أنا عارفه بلباصه).. وبدت نضميها تسعلني من الشغل ومن مواعيد الإجازة (زي حضرة المدير).. أنا في خاتري قلت حبوبتي بتدور تديني (ترقية) ولا شنو؟؟ .. وقالت دايراني عشان ناداها المنادي لي بيت الله وبتدور تمش (عمره) وتزور (الحرمين الشريفين) .. وعايزاله زولاً يمش معاها (محرِم) وقالت : مالقيت لي زولاً إلا إنت وبي (طرطشتك) وجنك وغباك ده برضو ياكه البتساعدني وتقضى غرضي (إنت يا يابا تتجازه وتاخد الإجازة) .. (إنت يا يابا تشيلك عافيتك) إنت (يا المشحتف المنتف ) .. قلتله .. ماشاء الله مشاويرك بقت (دولية) عبر القارات يعني .. قالت لي : (التظاكر) هولك علي أنا .. إنت عليك تسوي (الإجرارات) الليلتنا الإتنين وبس .. تمش من بكرة تطلع لي (بظبورطي) ووندرج نمش العمرة ..
أهان أنا حكاية أمشي (عمرة) دي طرت بيها السماء كمان لو لقيت لي زوغة في البلد ديك يكون (أمين) وأرسل ليك حبوبتي مع أي زول راجع إن شاء الله بي DHL :.. أها قمت بديت في (الإجرارات) ومن صف لي صف ومن رسوم لي رسوم .. ومن حق فطور لي حق شاي .. (غايتو فطّرت وشرّبت شاي لنص الحكومة) أها و بسرعة شديدة إنتهيت منها (مو الكاش بقلل النقاش) .. وخربت ليك مالية حبوبتي (خراب سوبا) .. وسافرنا بالطيارة .. ومن قامت الطيارة حبوبتي كضمت تتلفت (زي مراقب الإمتحانات) تب خشمه ما فتحتو علا لامن (النضيفة) ليلت الطيارة جابت فطور .. حبوبتي قالت ليها : هيا (يالنضيفة) يابت أمي ماكان تتعبي .. الكلافة لزومة شنو ؟ .. أها ووصلنا (جدة) بلد (الشُداد واللضة) .. أتاري ناس (كجوكابي ومفرفش) .. مكوجكين ومفرفشين) لاعن إضنينهم فيها .. بلد من نوره ولمعانه عليك أمان الله زكرتني (أوضة العمليات) .. بلد كلها (قاعات صداقة) و (حدائق أبريل) و (شوارع النيل) .. حبوبتي قالتلي : الأشتر دي مو أمريكا ناس الحرب والضرب .. قلت ليها : ليه ؟ إنت بتدوري تعمري عند الحجر الأسود ولا تطوفي في البيت الأبيض .. أمريكة شنو كمان ؟ أهان ومنها مشينا البلد الطاهرة بلد الرسول (ص) (مكة المكرمة) وبدينا في العمرة والطواف .. أهان أنا طابي ليك حبوبتي من يدها وقمنا نطوف وندعو .. قدامنا كان في واحداً (حمريطي وحلبستك) كدي أظنو (مصري) صوتو سمح وعالي قاعد يدعو ونحن (نشيل) بي وراهو وحبوبتي مبسوطة .. بعد شوية المصري راح مننا في الزحمة وبقى قدامنا واحداً (حمريطي تاني) أظنو باكستاني يدعو بي لغتو ونضميهو الصعب داك . أهان قلت لي حبوبتي .. قولي آميين بي وراهو قامت قالت لي : بري ما بقول وراهو يمكن دينهم مو زي دينا أقوم أكفر ساي وأنا في بلد الله .. أها بعدها شافت الناس العجايز البشيلوهم في العناقريب ويطوفوا بيهم ديك قالت لي إلا تشيلني .. وشوية شافت الناس البسوقوهم في عجلات قالت إلا تركب عجلة وأن ألزها .. قلت ليها : حبوبتي أنا جايبك عمرة ولا (منتزه المقرن العائلي) ما فضل إلا (أطوطحك كمان) قالت لي : مو جايباك أنا وبقروشي يطوطحك الله .. غايتو إنتهينا العمرة ورجعنا الفندق (الموخمج) وحبوبتي الليل كلو ما نامنت قالت : الأسانسير المتل (الدلو) سوي ليها ضربات قلب .. أهان وبقيت أفكر في الزوغة من الرجعة للبلد ومن حبوبتي كمان .. و عندنا ودعماً لينا قابلنا وسألتو من طريقة (الزوغة) قام طمم ليك بطني وقال لي أخير ليك ترجع وما ح تقدر تشتغل والحكاية ضايقة طب.. وفكاها فيني لامن مرقت من نفسي وإقتنعت .. وقعدنا أيامنا وبقينا خلاس على الرجعة .. وفي أخر يومين لينا .. قلت لي حبوبتي خلاس بقينا ناس رجوع .. دحين نمش السوق ونبضع شوية هديمات للناس .. قامت براحة كدي قالت لي :

الأشتر إنت أمش ألحق شغلك .. أنا (زايغة) .. بدور أقعد مع بت أخوي في المدينة المنورة لامن الحج ..
إنتو قايلين ما رجعت براي !! .

[ruby]

واله ياالاشتر حبوبتك دي امراه لذيذه بس للبسمع الحكايه دي وانت زول اكتر من ظريف شكرا شديد على المشاركه الحلوه دي ولو عندك تاني اكتب لي ولو عارفاك كنت جيتك في المطار وشردتك من حبوبتك لكن طلعت امراه قادره شديد بالله ترجعك وتقعد ما شاء الله لكن وتشبيهاتك لذيذه ضحكتني من جوه قلبي

[schizo]

المشاركة يا سلاوي رائعة جدا والحكاية ظريفة بالحيل
=====>>>لكن مشكلتي اني ما فهمت نصها تقريبا
لكن بعد دا كلو والله حلوة


موضوعك حلو جدا يا روبي وانا بوعدك اول ما القى لي حكاية ظريفة وبتستاهل اقولا
حا تكوني انتي اول واحدة تعرفيها

وواصلي مواضيعك الحلوة

[ruby]

ياschizoشكرا على اطلاعك على موضوعي وياريت تلقي لي قصه حلوه
زي سلاوي كده
يديك الف عافيه