البطالة وحدها معانا وين...

[تسنيم خالد]

تشكل البطالة في السودان واحدة من أهم مشكلات التنمية الاقتصادية، لكن السنوات العشر الأخيرة شهدت تفاؤلاً من بعض قطاعات المجتمع السوداني بتحسن الوضع الاقتصادي وخلق فرص عمل جديدة للشباب، وذلك بعد البدء بتصدير البترول وتوقيع اتفاق السلام الذي أوقف حرباً استمرت لأكثر من عقدين في جنوب البلاد.
البطالة هي السبب الذي دفعك للهجرة ..هي من بعدك عن اهلك واحبابك ..
ما هي اسبابك التي دفعتك للهجرة؟؟
وانتو يا القاعدين في البلد وعارفين الوضع هل صحي انو البترول اضاف شئ ليك وحسيت انو في
تنمية حاصلة ؟ وهل الخريجين لقوا الفرصة للتوظيف كما يقول هؤلاء؟

لو عندك تجربة توصل الفهم اضيفها لينا عشان نعرف الحقائق





دمتم

[Bet-alsudan]

انا والله ما عندي فكرة في مجالات الشغل والكلام ده لانو لسه اصغر من الكلام ده وما حصل جربتو ا بس انا شايفة في تقدم واااضح جدا في السودان السنوات دي بعد ما ظهر البتروول احدث تغير هائل جدا يستحق الافتخار به ومن الممكن ان تصبح بلادنا في مصاف البلاد المتقدمة بعد كم سنة ..

ولا رايكم شنو ؟؟

[اسامة عبدالماجد]

تسنيم التغيرات السطحية لا تعالج جوهر التحول نحلم بفرص عمل ونحلم بطرق ونحلم بسكن لكل زول ونحلم بعلاج مجانى وغيرها وهذة ابسط واجبات ولاة الامر جوهر المشكلة انو البلد يقت طبقتين ودى مربط فرس السياسات الاقتصادية وافرازاتها الاجتماعية ننتظر زمنا يييجى على سروج الخيل

[مزوني]

والله ما عارف أقول شنو ؟؟

انا لما كنت في السودان بتصل بي اي زول من بره السودان يقول لي السودان اتحسن

وما عارف ايه و و و و و و و ... وانا بكون عيني مارقه بهناك وبكون مستغرب من كلامو

بسأل الكلام ده انتو بتجيبوه من وين ؟؟؟ بقولوا لينا من التلفزيون والجرايد و و و و و و و

بقول ليهم طي انا ما شايف حاجه من دي ليه ؟؟ يقولوا لي انت شافع ما بتفهم في الحاجه دي

ولحد ما اتخارجت من السودان برضو بقولوا لي انت خليك من السياسه دي حاجات بدري

عيك ,,,, فإحتمال انو لي حسه ما بفهم في السياسه لكن البفهموا يورونا

ولكم العتبى ومعليش للإطاله وتشكراتي يا تسنيم على الموضوع

وربنا يديك العافيه

بجيك راجع

[Bet-alsudan]

الصراحة الآراء كتيييرة .. بس في النهاية بلدنا ونحن لازم نحااول بقدر الامكاان نصلح فيها

دمتي .. وتسلمي على الموضوع:)

[ابورجاء]

بتي تسنيم الرائعة
يا بتي بتنكتي الحاجات دي من وين
خليك زي مزوني ده انتي لسه صغيرة
على السياسة والكلام ده...
لكن برضو برافووووووووو...
اولا البطالة مشكلة العالم اجمع
يعني في السودان ما شئ جديد ولا
حتكون قديمه في يوم من الايام لا بد
يكون في بطالة عشان الكون يمشي صح
يعني في شغل لازم بطالة ....
وعمرو ما كان البترول عصا موسى السحرية
وعندنا اقرب الامثلة دول الخليج بيها من البطالة
لو ما اخاف الكذب بنسبة اكبر من غيرها من الدول النايمة
ايوه نايمه وبتشخر كمان ...
يعني عشان يستفيد الشعب من البترول عايز قرون
وما تعيشوا على الاوهام سنين بسيطه ونكون في بحبوحة
كذبة يناير ...
ودوما في رعاية الله وحفظه...
مع كل الود باقة ورد....

[تسنيم خالد]

تسلموا كتير علي المرور والمشاركات بس انا بتفق مع ابو رجاا في انو نحنا ما ننتظر
نشوف نتيجة من نتائج البترول علي المدي القريب اللهم الا السفلتة الزغللوا بيها عيون
الناس ود كلها عبارة عن مخلفات واشياء لا تذكر بس مافي تغيير جوهري كلها سطحيات
عندنا العوامل الاساسية العيش الكريم للبني ادم مافي...

لكم كل المودة

[محمد السر احمد]

الاخت تسنيم البلد طلعت بترول لكن نحنا كشعب تعبانين وجالون البنزين بدل ينقص راد والحرب وقفت وقلنا الحمد لله لكن لسه بقول انو الميزانية العامة لدولة معجزة دا كوم نجي نشوف الدهب دا كمان نحن ما عارفين عنو حاجة والعارف يا رايت يورينا
وشكرا اختي تسنيم

[ود المطامير]

خلاص يا تسنيم انا ح أخمخم الوليدات ويالالسودان جوك أولاد المطامير
لكن حرّم لو لقيت الحال غير الحال الوليدات و أمهم و أبوهم فى صوبك !!!!!

[المسافر]

تشكل البطالة في السودان واحدة من أهم مشكلات التنمية الاقتصادية، لكن السنوات العشر الأخيرة شهدت تفاؤلاً من بعض قطاعات المجتمع السوداني بتحسن الوضع الاقتصادي وخلق فرص عمل جديدة للشباب، وذلك بعد البدء بتصدير البترول وتوقيع اتفاق السلام الذي أوقف حرباً استمرت لأكثر من عقدين في جنوب البلاد.
البطالة هي السبب الذي دفعك للهجرة ..هي من بعدك عن اهلك واحبابك ..
ما هي اسبابك التي دفعتك للهجرة؟؟
وانتو يا القاعدين في البلد وعارفين الوضع هل صحي انو البترول اضاف شئ ليك وحسيت انو في
تنمية حاصلة ؟ وهل الخريجين لقوا الفرصة للتوظيف كما يقول هؤلاء؟
لو عندك تجربة توصل الفهم اضيفها لينا عشان نعرف الحقائق
دمتم


سألت نفسي هذا السؤال مرات عديدة وكنت بهرب من الإجابة حتى لنفسي . . .
أنا غربت في زمن السودان كان فيه العيش شبه مستحيل بالرغم من إنني وجدت فرصة جيدة للعمل في السودان لو ظللت فيها حسب الحساب المادي أمكن قد يكون الوضع أفضل قليلاً وأكيد حيكون المكسب الكبير هو أنني حأكون بين أهلي وأحبابي . . . إلا أن فكرة الغربة كانت معششة وكنت مخدوع بها بسبب الرواج الذي أخذته من قبل السودانيون .
إن الشيء الوحيد الممكن يعتبر مكسباً حالياً بعد الإغتراب . . . أنني أصقلت مهنتي بشكل كان صعب جداً أن أقدر عليه في السودان . . .