يا أم عمرو لك حبّى وإحترامى

[ود المطامير]

عهدى بك منذ النظرة الأولى , ذاك السهم الذى شقّ صمامات فؤادى نبيلة كريمة عطوفة حانية ورائعة فى كل شئ وأى شئ , وهبتينى من السعادة ما لا يتخيلة فكر وضميتينى تحت جناح المودّة يا( مودّة ) فى أبهى الصور , وجعلتينى من عدم ( زولاً ) يشار إلية بالبنان ورقم هام فى المجتمع تتلمزت على يديك فحفظت إنشودة ( الحب ) ويحسبون أن الحب كلمة تقال ... أحبك ... لا واللّة منك عرفت أن الحب أفعال قبل أن يكون همسة , فكم من ليلة باردة أتيتك وأنا لست بأنا (حادث السيارة)
فوجدتك أنتِ أنتِ الحب فى أجمل الصور , جميلة فى تعاملك معى وأنا ضائع , حُلوة فى تواضعك معى وأنا حاضر , فيا سيدتى الجميلة لك منى كل الحب .. كل الشكر ... على الصبر الجميل الذى إنتِ الآن تحصدين ثمارة .. حب .. مضاعف منى .. فمن مدرستك تعلمت أن أعطى قبل أن آخذ ,
وهذا هو (عمرو ) .

[رضا أبوعيسى]

...... ابو عمرو... لك مني كل الود .. ولي ام عمرو كل الاحترام والتحيه والاجلال... فهي مثال للمرأه الحانيه والعطوف ((وكل هذا من خلال وصفك لها مسافر)) ..ادام الله الحب والود والاستقرار بينكما وحفظ لكم ذريتكم وجعلها لكم خير خلف انشاء الله,,,, اللهم ارزقنا الزوجه الصالحه والذريه المؤمنه يارب

ودمت بكل خير.....

[رضا أبوعيسى]

اسمع الود دا بعاين وين...؟؟ ههههههههه

[تسنيم خالد]

مسافر ما قلت لينا انك متزوج يعني .....والله عمرو فيهو سبه منك لكن امو شكلها برضو سمحة
ربنا يخليكم لبعض

[Almostshar]

عمرو

إنته أسمك عمرو وتعال الناس بتمشي تكبر
وين الطاقية ووين السديري

وصورتك دي صغيرة ليه للدرجة دي ؟؟
وأبوك العمدة كان عمره كم الوكت داك ؟؟
والله يا أم عمرو أعانك الله على مسافر قصدي عمرو

[المسافر]

تسلم أناملك يا رائع
وحفظ الله عمرو وأم عمرو

[ود المطامير]

الحبايب الطيبين.. صباح الخير
رضا .... يالحبيب عهدى بيك دائماً سبّاق
لدعاء الخير وفى ميزان حسناتك والجنا
دا ما بتعرفو وين بعاين ؟ ما هو طالع لأبية
وتسلم لى .
الغالية تسنيم ....
قبل كدا أشرت بأنى متزوج , وفعلاً (عمرو)
بشبهنى فى كل شئ و(أمو) كلما أنظر إليها
قلبى ينطط من الفرح وأقول فى سرى بكل
سعادة وفخر ( هلا هلا دى حقتى )
وربنا يحفظك لينا يا (تسنيم ) .
مستشارى .........
اللّة يديك العافية وقالوا ود الفار حفار
والجنا دا طلع( أم سيسى ) عديل كدا
لك منى كل الود .
المسافر ...
يا تومى العزيز إن أبدعنا فهذا لأنكم
مصدر إلهامنا , فروعة المتلقى تشعل
الحماس فى صدر الذى يلقى .
وتسلم لى يا حبيب .

[وليد عمر سعيد]

( هلا هلا دى حقتى )

هههههههههههههههههههههه

هههههههههههههههههههههههههههههه

الله يخلي ليك عمرو وامو

[ود المطامير]

( هلا هلا دى حقتى )

هههههههههههههههههههههه

هههههههههههههههههههههههههههههه

الله يخلي ليك عمرو وامو
وأول شئ من زمان نفسى أسألك ( مافترتة من القعدة دى ) ؟ والبتفكر
فيهو دا لو كان حمار أبوى العمدة الراح كان إتلقى عِلا ياكن
( هلا هلا دى حقّتى ) ؟
وتسلم على الدعاء الطيب .

[وليد عمر سعيد]

اغيرا قول لي غيرا


انت لكن اول زول يشتكي منها بعدين محنتي براها شايفها كيف مازيك انت ونزار


حاجه عجيبه كدي اتمحنى وجرب

[ود المطامير]

اغيرا قول لي غيرا


انت لكن اول زول يشتكي منها بعدين محنتي براها شايفها كيف مازيك انت ونزار


حاجه عجيبه كدي اتمحنى وجرب
دى محنة شاكوش إنمّا إية !

[شبرقية]

حقتك وبتستاهلا
الله يخليها ليك ويخليكم لعمرو ويخلي ليكم
ولسه في انتظارا
وطال انتظارنا
وخنفضل منتظرين

[مرتضى يوسف العركي]

الاخ ود المطامير :
السلام عليكم ورحمة الله
ربنا انشاء الله يحفظك ويحفظ ام عمرو وعمرو ويديم المعروف والعشرة وكم اخذني هذا
الطرح الجريء والساحر حقيقي بالذات لمان يجيء طواعية مننا نحن معشر السودانيين العاملين فيها عينهم حمرة وشرارة وياولية والطنطنة والكواريك وكلمة حلوة منو ما تجي لمان يموت ناهيك عن مشاعر معلنة للملاء طواعية احسبه درس بقيمة عالية جدا
لك التحيةوالاحترام

ــــــــــــــــــــــــــــــــــــــــــــــــ
كلمة طيبة كغيث أصاب أرضا طيبة فأنبتت كلأ وعشبا كثيرا

[بنت الرفاعي]

الله يفظها ليك هي والاولاد ويحفظ كل الوداد البينكم انشاءالله.

[ود المطامير]

حقتك وبتستاهلا
الله يخليها ليك ويخليكم لعمرو ويخلي ليكم
ولسه في انتظارا
وطال انتظارنا
وخنفضل منتظرين
تسلمى أختى شبرقيه وربنا يخلى ليك كل عزيز وغالى
وإن شاء الله لن يطول إنتظارك .

[ود المطامير]

الاخ ود المطامير :
السلام عليكم ورحمة الله
ربنا انشاء الله يحفظك ويحفظ ام عمرو وعمرو ويديم المعروف والعشرة وكم اخذني هذا
الطرح الجريء والساحر حقيقي بالذات لمان يجيء طواعية مننا نحن معشر السودانيين العاملين فيها عينهم حمرة وشرارة وياولية والطنطنة والكواريك وكلمة حلوة منو ما تجي لمان يموت ناهيك عن مشاعر معلنة للملاء طواعية احسبه درس بقيمة عالية جدا
لك التحيةوالاحترام

ــــــــــــــــــــــــــــــــــــــــــــــــ
كلمة طيبة كغيث أصاب أرضا طيبة فأنبتت كلأ وعشبا كثيرا
وعليكم السلام حبيبنا الحلامابى
ولك منى كل الشكر والتقدير على هذا الثناء والمدح الطيب لشخصى
وصدقنى ما طرحته طرحته من القلب ورغم إحساسى أنه قطره من محيط
فى حقها وجمائلها التى لا تعد ولاتحصى علىّ
وإنى أفتخر بها بينى وبين نفسى وبين نفسى والناس لعلى أرد لها ولو
جزء يسير من ديونها علىّ
وصدقت نحن السودانين نكتم مشاعرنا ونموت بها بصفه عامه بس أنا
بغرد خارج السرب ليس إلا .

[عماد عبدالشكور]

حبيبنا ود المطامير
اسمح لي ان اهدي هذه الكلمات عبر موضوعكم هذا لام ولدي
وبهديها بلسانك لام عمرو

دى السمحة ام ولدي بتشيل قفاي سندي
دى السمحة ام ولدي بتشيل قفاي سندي
بتعيش معاي راضية الله الله كان عندي وما عندي
دى السمحة ام ولدي
الحسيسة العشورى السامية في شعورى
الحسيسة العشورى السامية في شعورى
ماجابت ملامة الله الله وماقطعت الشورى
دى السمحة ام ولدي
الحسيسة الخدومة ماصارة قدومة
الحسيسة الخدومة ماصارة قدومة
ست بيت منجرية الله الله احماها مذمومة
دى الرايقة ام ولدي
راضية بالعيشة كان كسرة كان عيشة
راضية بالعيشة كان كسرة كان عيشة
وان مافي ماقالت الله الله ياناس د ماعيشا
دى السمحة ام ولدي
ما مرقت من جوى وماسوت العوى
مامرقت من جوى وماسوت العوى
ماليها بفلانة الله الله وفلان عمل سوى
دى السمحة ام ولدي
حكامة كان فتا رباية كان متا
حكامة كان فتا رباية كان متا
بتعيش وليداتا الله الله ماتجيهم الحتة
دى السمحة ام ولدي
كريمة يابنية كان جو ضيوف مية
كريمة يا بنية كان جو ضيوف مية
بالجود موجودة الله الله لو مافي بالنية
دى السمحة ام ولدي
ملساء ماغبشاء,ناعمة ماغبشاء,نايرة ما غبشاء
في راسي ماغدرت الله الله وما سوت الدوشة
دى السمحة ام ولدي
بتصلي صلواتا الخمسة في اوقاتا
بتصلي صلوتا الخمسة في اوقاتا
مانامت بعشاها الله الله لا يوم صبح فاتا
دى السمحة ام ولدي
دى الرايقة ام ولدي
الاصيلة ام ولدي
حامدة ما جاحدة الله الله كان عندي وما عندي
دى السمحة ام ولدي

[ابودجانه العباس]

ترا رن ...ترا رن ..
ترا رن ...ترا رن..

*****
ألووو :

ألوو:

إزيك يا عمرو.

أهلن يا عمو.

إنت كويس.

آاي كويس.

شاطر يا عمرو ممكن تنادي لي أمك؟

حاضر...ماما في راجل عايزك في التفلون.

ألو ..السلام عليكم يا أم عمرو..

أهلن وسهلن مرحبتين..معاي منو؟

أنا...مبعوث من منظمة حوش القرقراب
وشد الكراب..ممكن تشرفينا شويه..

أشرفكم وين يا أخوي بررري أنا راجلي
ما برضي إني أطلع من غير ما أكلمو..

هههههههههههي والله تكلمي بالحوش
علا يقوم جاري مسكينه إنت ما عارفاهو
بعمل في شنو في الحوش داك..

سجمي بعمل في شنو؟؟؟؟

غيتو ما عارف قبل شويه كان تايه
وهيمان مع بت جيرانم إسمها وجدان..

شويتين كدا وبي قدرت قادر..
إتغيرت لي واحده تانيه إسمها عبير..
وما أدراك ما عبير...نجفه بس..
نار الله الموقده...علي كل حال هو هسع
قاعد بي هناك كان دايره تجي مرحب بيك
كان ما شالك الحوش تشيلك رؤوسنا..
وكمان إذا ما جيتي الفاس بتقع في الراس
وبعدين تقعدي تسكلبي...قيتو أنا كلمتك..

(وقد زعجر من بعجر)...

كك كرك..توت.. توت ..توت

ألو ..ألو ..قفل الخط..

كدي النقوم أشوف الحكايه دي شنو؟؟

[ود المطامير]

يا عمده لكن ما تقول لى صوتك رهيب
وبكره ما شى للغسيل والمكوه وح أغنيها
ليها وأنا وهى نتجارا بين الشجر فى الحوش
عليك أمان الله فلم هندى بس .

[ود المطامير]

_ ألو .. أم عمرو
_ أيوه يا أبو عمرو
_ فى زول ضرب ليكم تلفون هسى ؟
_ لا مافى
_ ولا أبولبان ؟
_ لا
ولا التايه الدعايه ؟
_ لا
_ ولا عشه الفتانه
_ لا
_ الحمد لله
_ مالك فى شنو ؟ مخلوع كدا مالك ؟
_ لا بس .. خلاص أصلو هسى ... مع السلامه

[خالد هاشم علي]

إنت يا ود المطامير عبير دي منو ؟؟؟؟؟؟؟؟؟؟؟؟؟؟؟؟؟؟؟؟؟؟؟:D

[نزار حسن محمد]

هى عبير براها ياخالد ...عبير وشذى وكلتوم وفاطمه ومحاسن وندى وكتيره وزهور ومى ورزاز وعائشه وموده وسهير ووووووووعيكـــــــــــــــــــــــــــــــــــــــ ـــــــــــــــــــــــــــــــــــــ ماتعد .. وخشمك عندك ياود المطامير ..وين مدناوى اظهر بسرعه الكلام دخل الحوش والصوره يازول يافرده باسرع فرصه ،،،الجنى مايشرد وانا حارسه بعكازى.. وانتى يام عمرو ليك على بجيب ليك حقك بس اصبرى لى...

[صالح ابوشوارب]

الاخ ود المطامير
تحية لك وانت تفصح امام الناس بحبك لام عمرو .. فربنا يخليها ليك ولى اولادك

عمك ابوماجــــــــــــــد

[Madanawi]

تحية وأحترام لهذا الكلام ...

جميل أن نعترف بحبنا لمن نحب ..

والأجمل أن يحمل هذا الحب بين طياته الوفاء وحفظ الجميل

ربنا يحفظ ليك عمرو وأمه .. ويجعل الهناء وسادتكم

والسعادة عنوان بيتكم

والوفاء رسالتكم للجميع