إنتحرت بسببه!!!.

[بنت الرفاعي]

أغلبنا نتحدث عن الحب الصادق (حب حبيب وحبيبه) بأنه أصبح معدم في زمننا هذا ولكن ماذا إذا عايشنا قصة حب حقيقي؟؟ مع الأسف القصة القادمة هي جميلة, ولكن نهايتها مأساوية.........
قبل عدة سنوات إلتقى علي بمها ووقعا في حب بعضهما البعض حبا صادقا وقررا الزواج,
تفاجأ علي بأن والدته لا تريدها لأنها وحسب زعم والدته تريد له فتاة أفضل حيث كان مستواهم أعلى من مستوى أهل هذه الفتاة هكذا رأت الأم الأمر, ولكن الإبن لم يرضخ لمزاعم أمه, لأن حبه أكبر من أن يرى فوارق كهذه واستمر في مايريده.
في يوم من الأيام سافر علي إلى أحد البلدان في إجازة عمل صغيرة, إستغلت الأم هذه الفرصة واتصلت بإبنة خالة مها وقالت لها (بما معناه,لأنه لايستحضرني الآن ماقالته بالضبط):
قولي لمها إذا أتاك من يريد الزواج تزوجي!
فهمت مها الرسالة حبست نفسها ,رفضت حتى الطعام, بعد يومين أوأكثر لا أذكر تحديدا,
وجدت مها في غرفتها وهي ميتة!! أتعلمون كيف ماتت أو بالأصح أنها إنتحرت.... بالصبغة.
إنتحرت لأنها أحبته بصدق ولم تحتمل هذه الصدمة.
أما هو عاد بعد فترة من الحادثة ولم يعلم أو يقل له أحد بما حدث, ذهب لزيارة مها وكله شوقا لرؤيتها, طرق الباب وسأل عنها قالوا له ألم يعلموك بما حدث؟؟ وعندها فقط علم بما حدث وكاد أن يلحقها, فعل مالم يفعله أحد من قبل وكاد أن يقال عنه مجنون, مرت الأيام وبدأ بالتعافي وتزوج وهو الآن لديه أسرة صغيرة!!!وأصبحت هذه القصة في الذاكرة.
(الأسماء في هذه القصة لا تمت لأصحابها بصلة, وضعتها لأنه بالتأكيد لن أستطيع وضع الأسماء الحقيقية)
تخريمة بالعامية: القصة مع إنها كانت محزنة ومأساوية, لكن حركة البنت دي غياظة يعني شنو أخسر دنيتي وآخرتي علشان واحد باعني(ده بفرض إنو هي قايلاهو إتخلى عنها), طيب البنت دي مافكرت تستناهو وتسألوا عن الحاصل لييييه؟؟ أسئلة كتيرة والبجاوبة إندفن تحت الأرض.
لكن برضو بنقول إنها حبتو بصدق وهو برضو حباها والدنيا ما بتقيف عند الحصل.
والقصة دي ما معناها إنو كل قصة حب بتنتهي بمأساة لأنو في قصة حب تانية توجت بالزواج وكانوا بحبو بعض من الأساس!!!تصدقوا وعاشوها وعاشه معاهم كل ناس الحي بصغاره وشبابه,
واتزوجوا قبل 3 سنوات وهم الآن في سعادة ,اللهم أدمها عليهم.
القصتين كانت هنا في السودان ده, والقصة مهداة لرضا أبو عيسى ومدنية لأنهم طلبوها وأيضا كل الأعضاء.. بس أوعى تمشوا تختاروا الشخص الخطأ علشان تحبوهو مع إنو الحب ما بالإيد لكن ممكن الواحد يتحكم في مشاعره العواطف ما كل شي.

[نزار حسن محمد]

]في يوم من الأيام سافر علي إلى أحد البلدان في إجازة عمل صغيرة, إستغلت الأم هذه الفرصة واتصلت بإبنة خالة مها وقالت لها (بما معناه,لأنه لايستحضرني الآن ماقالته بالضبط):[/COLOR]
قولي لمها إذا أتاك من يريد الزواج تزوجي!

هنا بداية المشكله الحقيقيه.. الام

[وجدت مها في غرفتها وهي ميتة!! أتعلمون كيف ماتت أو بالأصح أنها إنتحرت.... بالصبغة.

وهنا النهايه الماساويه البنت


بسم الله الرحمن الرحيم
((يأيها الناس اتقوا ربكم الذى خلقكم من نفس وحده وخلق منها زوجها وبث منهما رجالا كثيرا ونساء واتقوا الله الذى تساءلون به والارحام ان الله كان عليكم رقيبا)) صدق الله العظيم

[Madanawi]

ومن الحب ما قتل

في القصة أصبح المثل ، ومن الحب ما نحر

البت دي شفقانة ليه هو علي دا الخلقو ما خلق غيرو وبعدين هل ما زال هنالك من يعتقد انه هو قيس زمانه ومن تعتقد بانها هي ليلي زمانها؟

يا جماعة الخير الحب الحقيقي هو المنطقي والذي لا تشوبه شائبة ورضا الوالدين أعلى درجة من الحب لذلك لابد من أن يكون هنالك مباركة من الاسرة وتحديدا الوالدين قبل الاقدام على الزواج والا فقد سمعتم ما حدث!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!

[Almostshar]

السبب الحقيقي وراء انتحار الفتاه ( الجهل )
نعم الجهل بالدين والجهل فيالحياة وأيضا الجهل بالنفس

إما أنها ذات طابع وحدوي ( إي متوحدة )
أو لا سلطة لها على الاطلاق لتولي أمورها .

أتحسر على تصرف بعض الناس بهذا الأسلوب

لا سيما من كان يحسب نفسه مسلما



ولا تنسى تلك الأم معلمة الأجيال أن كذبة صغيرة أودة بحياة غالية
ولا يجدر بها مهما كلف الأمر أن تكذب ........
ونرجع بذلك إلى موضوع أخونا راسكل الذي قال أن التضحية للاب والأم
واجب حدوثها .

فليتق الله من يفكر في ذلك

[كاتم الأحزان]

بلتأكيد هذه القصة مؤثرة اخت مرام وتصف معنى الحب لاكن ليس لهذه الدرجة

ماذا كسبت (مها) سوى ان المنتحر في النار أما (علي) فهو في حياة جميلة

( الناس لايهممهم إذا كنت تضحك أو تبكي

لذى إضحك دائماً )

[رضا أبوعيسى]

مراااااااااااام .. جزاك الله خيرا.. وشكرا ليك مره تانيه لانك كتبتي القصه.... ماقصرتي تب:D .....


وفعلا القصه مؤثره... وشديد كمان.... مها او اياكان اسمها... احبت واحبت هذا الشخص بإخلاص.. وضعت حياتها رهنا بحبه ... قدمت روحها قربنا لروحه ... صحيح ان ماقامت به مخالف للشريعه.. ((روحها ماحقتها .. دي امانه من ربنا )) ... لكن الله يرأف بيها ويتولاها بي رحمتو.... لكن داك زعلني... يعني ماتت في سبيل حبو .. وداك بعد سنه او اتنين عرس؟؟؟ ياخ حرام عليك.. قدر العملتو عشانك... ماتعرس .. يلعن ابو العرس زاتو؟؟ وين النخوه وين الرجوله؟؟ وين الحب اللي كان بيحبها ليو؟؟؟:mad: :mad: :mad:

بس داير استفسر استفسار بسيط .... ياجماعه... الزمن دا الحب الصادق في ولا لأ... يعني لي الناس بقت بتحب بلا ضمير.. سواء البنت او الولد... مافي احترام للمشاعر البشريه.. مافي تقدير لكل الحب اللي بيديهو الشخص لإنسان بيحبو؟؟؟ (( مااخدتا شاكوش والله بس داير استفسر :D :D :confused: :cool: ))

[Almostshar]

لست مؤهلا للرد على استفساراتك ولكني
أستميح عذرا من كا تب المقال للرد على هذا الاستفسار
الحب بطبيعته يتغير مع الوقت والزمان
ويتأثر بطبيعة البلد والمكان
ولا شك في ان المجتمع الذي يعيش فيه ومقدار الإنفتاح
يتسبب في خلق ضعف روحي للحب وبذلك ينعدم الحب الصادق
لا نجد في مثل زماننا عنتر وعبلة ولا قيس وليلى
بل حب المكان والجلسة والجيب الملان
تعال نتمشى جمب المساطب وانته روحي ومن الكلام العسل ده
بعد يومين كل واحد طابق زول وماشي في نفس المكان وبيقولوا نفس الكلام
وعلى العليه بيسلموا على بعض كمان
الحب عملة نادرة وكلامة ماكل زول بيعرفوا ممكن نعيش قصة حب أكيد . حتستمر كم يعني سنة سنتين لو وصلت ثلاثة سنة حقوا نسويليها عيد عديل . لازم يكون فيها زعل لازم يدخل عنصر النكد فيها ، بس أستمرار الحب الحقيقي ، نادر ما شفناه إلا عند الناس الكبار جدودنا ،، الواحد بحب طول عمره وصادق في حبه . أما عصر النت والعالم غرفة واحدة . الحب بيكون بكل اللغات ولكل الأشخاص ، يعني مرتك في البيت تحبها وفي النت تشاغل فلانة . وفي الشارع إلا توصل فلانة ، وقعدت السوق شوف ديك ياحلاته . وجنى الوزين . ومن الكلام داك التقيل . وما بنسى قعدت النسوان البجيب جردل الجبنة وهاك يالقطيعة فلانة وفلانة . ولا تلقاها حايمة في الشارع من بيت فلانة لبيت فلانة ،،، وما بتقابله إلا بليل ،،، ولا يومك كيف قضيتو ... بس شد البطانية وادخل تحتها .... وفي الناس الما كان سلم عليها ما بطلع من بيتوا . وفي البقول الحب بعد الزواج ..... شليل وينو ... يجو شوفو الكلام ده ....
أعتذر عن إطالتي فبدون إحساس مني ذهبت أصابعي تداعب أطراف لوحة مفاتيحي بما أنساب من ذلك العقل الجامد والفكر ( المتهضرب ) ...
ودمتم

[بنت الرفاعي]

أخي المستشار البوست ملك للجميع وهو لإبداء الأراء ,وبما إنك ذكرت إنو لولقيت قصة حب تدوم أكتر من سنتين أو تلاتة تعمل عيد, حتقول شنو لو قلت ليك قبل 3 شهور تقريبا قصة حب دامت لمدة سبع سنوات برضو توجت بالزواج,دي طبعا غير عن القصة القلتها, نحن بنقول هو نادر, وشكرا على ماخطته أصابعك, ورد زي ماعايز مامشكلة.
أخي نزار هو فعلا الخطافي ده كلو راجع لأمه أولا بعدين يجي خطأ البنت.
والله يا مدناوي تقول شنو بس!,والحصل ده رغم فداحته ورغم مأساويته إلا إنو ببين لينا مدى حبهم ومدى صدقه,والولد هوحباها وكان عايز يتزوجه.
وشكراليكم مشرفنا ومستشارنا ومدناوي.

[بنت الرفاعي]

عارف ياكاتم الأحزان مرات الواحد لما يكون عايش وهو عندو امل في شي ويجي فجأة يعتقد إنو الأمل ده إتلاشى بيجيهو إحباط وكراهية للدنيا أنا مابدافع عن تصرفه لأنها بالغت في ردة فعلها ,وهي برضو غلطانة لأنها زي ما قلت ماسألت علشان تفهم الحاصل, وكانت النهاية.
على فكرة نصيحتك دي مية مية وعن نفسي ماشة بيها من زمان, وإلا ماكنت لأعيش بأفضل حال والحمدلله.
يارضا هي ماحبتو وبس هو برضو حباها, لكن هل الحياة بتقيف طبعا لأ, هو ماقصر برضو كان حيجن بس لحقوهو, وبعدين هي غلطت وأغضبت ربها هو كمان يغضب ربه, الله هداه والحمدلله, عارفين لو ياليت لوكان بإمكاني أسأله هل هو لسة عايش على ذكراها بس ما بقدر لأنو شي حساس للغاية.
وبرضو هي الحياة ماشة, بحلوها بمرها ماشة, رضينا مارضينا برضو ماشة, أما نحن...... فعلينا بالرضا وبس, اللهم لاإعتراض على أمرك.
وشكرا لكم كاتم ورضا. على فكرة يا رضا ما شرط الواحد يدوهو شاكوش علشان يفهم الحب والخيانة ,ممكن تكون عايشته قصص ومنها عرفت وفهمت.

[بنت الرفاعي]

إذا كنت بتتكلم عن الحب بصفة عامة يا رضا فهو موجود وأقرب شي حب الأم لأبنائها, أما إذا كان على الحب بنت وولد,ده تقول عليهو شنو, وهو الحب الصادق في ونادر لكن مرات الزمن بيجور والظروف ليه عامل في إفساده وتبييخه على أصحابه, لكن مرات في حب بيكون من طرف واحد وبيكون صادق جدا جدا ولكن ...... مشكلته ومع الأسف حب من طرف واحد, والناس اليومين دي بقت مظاهر في أي شي حتى في الحب.
وشكرا ليك أخ رضا وكاتم الأحزان.

[المسافر]

الاخت العزيزة / مرام

بداية تحياتي ومشكورة على هذه الواقع المعاش وده من ناحية كلام ( الأم ) وإنما من ناحية الحب وزي ما قلتي قد يكون شبه مستحيل .

قد يظن الكثير من الناس إنهم يحبون بجنون وحب مبالغ فيه ولكن في الواقع هو عبارة عن ( إعتياد ) أو (ترتيب الناس على شخص معيين ) وهذا ما حصل إلى ( مها ) لأن الحب معناه شامل لكل الحياة والحب هو طهارة للقلب والروح . فطالما حبها دفعها إلى ذلك الفعل الشنيع . . . فتأكدي إنه ليس بحب !!!!

ودمتِ بألف خير

[بنت الرفاعي]

أخي المسافر إنت قلت شبه مستحيل يعني برضو نادر,
طيب لو ماكان حب حيكون شنو ؟؟؟؟؟؟؟؟
وشكرا لك على إبداء رأيك.

[المسافر]

الاخت / مرام

زي ما ذكر علماء النفس بأن هناك إختلاط كبير بين ( الحب ) و( الإعتياد ) !!!

وطالما هو ليس بحب فأكيد ( أعتياد )

وسلمتِ

[بنت الرفاعي]

إعتياد ده لو كان هي عايشة معاهو من زمان دي حاجة والحاجة التانية ممكن تكون هي حبته لدرجة إنها اعتادت عليه, بعدين الحب ده شعور لا إرادي, وما بإيد الزول زي ما أظن, هو ممكن نتحكم في المشاعر لكن أحيانا الأمر بيخرج عن السيطرة.
وشكرا ليك مرة تانية.

[مدنيّة]

واولله يامرومة ياحبيبتي البت دي كترت المحلبية حبتين ومالها حق في عمليتها اللي عملتها دي لاته دا قنوط من رحمة الله وعذابها ح يكون عظيم جدا وفقدت دنيتها واخرتها عموما ربنا يغفر ليها ويرحمها وعلي فكرة مافي وجهة شبه بين القصة دي وبين قصة ( مات من اجل الحب ) لانه في القصة التانية فضل الابتعاد بكل الامه وعذابه عنها من حبه ليها فضل يتعذب لوحده ما يعذبها معاه المهم ياغالية تشكري علي القصة وما قصرتي ابدا والله

رضا اخوووي الحب الزمن دا هو يمكن زي ما قال اخونا المسافر ( اعتياد ) لانه عادي جدا تلقي قصة حب كبييييييييييييييييرة وتنتهي بزواج احد الطرفين من اخر واهو اللي حصل في القصة دي خير دليل وحدة انتحرت عشان واحد هو بمنتهي البساطة بعد فترة من الزمن مشي يتزوج هسي عليك الله انا البت دي لو في وحدة صديقتي قدمت لي روحها تاني الدنيا بضوق ليها طعم !!!!!!!!!!!!!!!

[بنت الرفاعي]

الشبه بين القصتين هو الحب دي حاجة والحاجة التانية القصة دي والبعديها كانوا علشان التساؤلات اللي انطرحت عن الحب وهل هو موجود بحق.. ومازال النقاش قائم.
بالمناسبة هو مابكل بساطة إتزوج عانى بسببه كتيير حتى إتزوج.
وشكرا ليك يا مدنية ويدك العافية.

[ود المطامير]

لا حول ولا قوة إلا باللّة
لا حبيب فى الدنيا لقتة
ولا نعيم فى الاخرة رايحة تلقاة
إنشاء اللّة

[بنت الرفاعي]

شفت كيف يا مسافر ضيعته على روحه.
شكرا لك ويديك العافية.

[Almostshar]

الحب أنواعه كثيرة ومشتتة

وكل واحد بيظهر بالمظهر البناسبة أو من واقعة

يعني تتضارب القصص في الحب

وكل قصة أحنا بنقول نفس الواقع مع إنو تفاصيلها مختلفة

وحب رضا ولا حب مها بختلف عن حب علي وحب ربى

[سواااح]

مرام ..

الامر ليس ملامة
ليس غضب وحزن
هناك اساسيات لكل علاقة
هناك امور لابد من توضيحها من البداية
حتي يكتب لهذه العلاقة النجاح
لابد من وجود التفاهم بين الشريكين
لابد من اتفاق الاسرتين
لابد من اتفاق الوالدين
وان لم يكونوا احد منهم موافق
نجلس معه .. ونقنعه باللين والرفق والمنطق
ليس الامر غصب واجبار
والامر المهم الرضا بالمكتوب
فهل تعتبرين قتلها لنفسها حل للمشكلة
دعونا لا نعالج كل امورنا ومشاكلنا بالعاطفة
حتي الحب دون تحكيم العقل فيه يعتبر ناقصا
اكرر لابد من العقل .. فلا نظلم العقل
علي حساب القلب
ولا نظلم القلب بتحكيم العقل فقط
هي موازنة ومعادلة لابد فيها
من تكافؤ الفرص والاطراف
وعودة اخري للبقية التي في نهاية القصة
هل الحب حين يطرق باب القلب
يخيرك بين من تحبين ؟؟
اليس هو الميل القلبي وما قاله عنه
الرسول صلي الله عليه وسلم
" اللهم لا تلمني فيما تملك ولا املك !! "

دمــــــــــــــت ،،

[بنت الرفاعي]

أخي المستشار نحن بنتكلم عن وجود الحب مهما كان هل هو موجود وهل هو صادق أم أصبح قصص نتناقلها عن السابقين ونتمنى حدوث نفسها!!!
وشكرا لك.

[مزوني]

( الناس لايهممهم إذا كنت تضحك أو تبكي لذى إضحك دائماً )

كلام عين العقل يا مذيعنا وحبيبنا

وفعلا مثل ناجحح جدا جدا والبنت جد عمليتها غريبه جدا جدا

وبعدين الزول ما اتولد عشان شخص بي عينو ,,, أقل حاجه الواحد يخاف ربو

على حقوق الوالدين عليه ,, هم يتعبوا ويسهروا لحد ما يكبرونا

واحنا ننتحر عشان شخص تاني !!!! عجيبه والله

تسلمي كتير اختي مرام وما عدمناك

[زيكو منيب]

]في يوم من الأيام سافر علي إلى أحد البلدان في إجازة عمل صغيرة, إستغلت الأم هذه الفرصة واتصلت بإبنة خالة مها وقالت لها (بما معناه,لأنه لايستحضرني الآن ماقالته بالضبط):[/COLOR]
قولي لمها إذا أتاك من يريد الزواج تزوجي!

هنا بداية المشكله الحقيقيه.. الام

[وجدت مها في غرفتها وهي ميتة!! أتعلمون كيف ماتت أو بالأصح أنها إنتحرت.... بالصبغة.

وهنا النهايه الماساويه البنت


بسم الله الرحمن الرحيم
((يأيها الناس اتقوا ربكم الذى خلقكم من نفس وحده وخلق منها زوجها وبث منهما رجالا كثيرا ونساء واتقوا الله الذى تساءلون به والارحام ان الله كان عليكم رقيبا)) صدق الله العظيم

و الله ياخوي نزار وفيت و كفيت و ما عندي شي اقوله غير شكر الاخت مرام على موضوعها الرائع ده للاخذ النظر في كل هذه المسائل.

[بنت الرفاعي]

معك حق يا أخوي مزوني , والناس مرات مابتفكر في كل الإتجاهات بس إتجاه واحد,
ولو كل الناس بتفكردائما صح وفي كل الإتجاهات لكانت الدنيا بخير و كلها وتمام, بس ده هو حالنا ونحن بشر نخطيء المهم نتعلم من أخطاءنا وأخطاء الغير,(مع إنها أخطأت وخطأ كبير وماعندها فرصة علشان تعرفو وتصححوا)!
وشكرا لك وشكرا لك زيكو منيب وتسلموا.

[شاكسس]

والله كلام غريب

ربنا يشفيهم الناس ديل

تحياتى،،