شكوى للمشرف نزار ضد التيمان

[ود المطامير]

يا أخوى نزار أول حاجة إنت ولى أمرى فى مدنى دى , يعنى أكان رُحت ساكت
أهلى بجوك بالسيوف , لكن ما عليك خلاص إتعلمت أقطع الظلت , التيمان ديل
خربو بيتى يا نزار أخوى , وحياتى جابو عاليها واطيها وأحكى ليك السالفة
كنت أتمشى فى بساتين مدنى الوارفة وقلت أزور حديقة أخوانى التيمان
وأغطف من الورود اللى نثروها على صفحات المنتدى , كويس معاك ؟ وفجأة
الباب ضرب وفتحتة ودخلوا جماعة من عربنا وقعدوا واحد منهم لمح المصيبة
الخاتنها التيمان فى توقيعهما على الطول قعد فى الواطة تحت الشاشة ,
_ مُحمد ألكع تعال شوف الداهية دى .
والجماعة كلهم ينتبهوا وهوا على الواطة تحت الشاشة وهم يبحلقوا فيها ذى
الشفع , وبدأ الغلاط والمغالطة .
_ دا جنا باظ جارى يشوف أمو وين شان إرضع .
_ لا واللّة دا رأس حافلة لطشها لورى فى الصنية .
_ لا دا ولا دى , دا رأس ركشة إتملص من الصندوق حقو .
وأنا بين دا ودى وداك ما عارف أعمل شنو ؟ والنقاش ولّع والكواريك ضربت
وتشابكت الأيادى والرفع عكازو والسلّ سكينو والشال سوطو , وإتلموا ناس الفريق
والحلّة , لحد ما إضطريت طلّعت الكمبيوتر برة فى الحوش , وكل واحد يجى قريب من
الشاشة ويفتى أكان راجل ولأ مَرة بنت أو ولد كبار وصغار , الحلّة كلها فى حوشى
يفتوا فى أمر المصيبة اللى خاتنها التيمان فى التوقيع , وبقت حكاية الحِلّة , وقام
ود عثمان قال ليهم ,
_ دى ما بحلّها إلا أبوى العمدة ,
وطيران إتنين من الُشفع جروا لأبوى العمدة ولمّا وصل ختيت ليهو كرسى قريب
من الشاشة وطلّع نظارتو اللى عدساتها قدر الفناجين ومسحها ولبسها وقعد يعاين
نص ساعة والناس على رؤسهم الطير والأنفاس محبوسة وأبوى العمدة يتأمل
فى شقاوة التيمان , وجيت قريب من أضانو وهمست ليهو
_ أها يا أبوى العمدة عرفتها ؟
_ بالحيل .
_ ها جماعة السكوت أبوى العمدة عرفها .
وقام على حيلو وصلّح عمّتو ولكزنى بعصاتو فى بطنى مرتين وقال .
_ الجنا الملعون دا ضحك عليكم بسوالف البندر ؟ هوووى يا ناس الحلّة الداهى
الشايفنوا دا لا جنا باظ ولا راس حافلة ولا نص رقشة ولا جن احمر !!!
شاف الناس يعاينوا ليهوا بإهتمام بالغ وإتكيّيف ,
_ الداهى دا (طاحونة) مدحرجة فى الظلت تلقوها وقعت من لورى .
اللّة أكبر هتفوا بيها الرجال والحريم ذغاريد فى السماء , وجابوا التمر وشتتوا
الكرامة وأبوى العمدة ضبح تور وعزم أهل القرى اللى حولينا .
يا النذير التيمان خربوا بيتى , كم سرير وكرسى إتكسروا ؟ الشاى بنغليهو بنص
البرميل , مخزون السنة حق العيش علية العوض , وفاتورة النيت ح تجى كم ؟
ما دام شيطان التيمان دا يتكعوج لى كدا ليل نهار , دا غير راحتى اللى بقيت
أنوم واقف , وما تقول لى ياخى إنت من جيتنا جيتنا ومخلايتك مليانة مشاكل
أها عاد أنا ذى مسخة الجنيات دى أعمل معاها شنو ؟ يا زول رسل لجنة
لحصر الأضرار علشان تسلم الفاتورة ( للتيمان حبايبى )

[ابراهيم]

غايتو انا بعد فكرت وإتأملت
الحصل شنو
تعبت من التفكير في الشي بتاعة التيمان دي
آخر ما توصلنا ليهو قلنا نكون لجنة من المكنيكية وعلماء النفس والتفشقية وعلماء الدين
شان يفتو لينا في المصيبة الجهجهة افكار المجتمع في الالفية التالتة
انت يا مسافر
نعلك ما سافرت بالمذكور أعلاه

[نزار حسن محمد]

والله يامسافر وناسى هواك اروحنا وقلوبنا معاك ... الاضرار الماديه مقدور عليها يابوى.. المشكله فى الاضرار النفسيه ..عشان كدى انا رسلت وفد من اعمامك الكبار لشيخ ابراهيم العمده الكبير .
وعمدتنا عنده أرى متعدده انت كدى شوف البعجبك .. وكان على التيمان قالوا الطاحونه دى جابوها عشان عرس مشرفنا سواااح للسيره ..لكن ناس النظام العام قالوا بتصنع شربووووت....
وانا منتظر راى الخبير ابوعلا فى امر التيمان وطاحونتم...

[المكاشفى]

يامسافر روبرتاج جميل وسيناريو
قاطع لاكن مصايب التيمان مابقدر
عليها إلا التيمان ربنا يلزمك الصبر
والجاتك فى مالك سامحتك

[Madanawi]

والله يا مسافر قصتك تبكي وحزينة عدييييييييييييييييييل كدا.

أنا شايف انه الامم المتحدة لازم تعمل لجنة لتقصي الحقائق لانك من اول يوم دخلت الملجة شكلك داخل على طمع ، ما ممكن من تاني مشاركة تطلب تعويض يعني اسبوعين تاني حا تجيب لينا سلاح وتقول حنتوب تبعكم ونعمل وثيقة نيفاشا و 50 % من ايرادات الكبري لي ناس الشرق وبعد شوية تقول الدباغة و عترة تبعكم. الحذر يا ناس مدني انا شامي لي ريحة تمرد!!!!!!!!!!!!!!!!!!!!!!!!!!!!!!!!!

[كاتم الأحزان]

قبل التعويض وحصر الأضرار انت قلت الشغلانية بقى فيها

تمر وكرامة وتور .و و و و

وين الحاجات دي كلها

[abu_ola]

ها ناس ها اللمة شنو آآ جنيات

الجنا دا خبارو مسوي ليكم غلبة

و الناس تقوم و تقع

أول التبادي كدي غسل كرعيك ديل من غبار السفر

و خت عكازك و مخلايتك دي في الواطة

و حط رحالك بين أهلك و حبايبك ناس مدني السمحين

و قول بسم الله بدينا أن شاء الله مليــنا


ولا المعنــي داير تكون مسافر طوالي

عشان تقصر الصلاة

و رمضان منو العوض و عليهو العوض

و تمرقنا ساااكت من غير ضحية


النصيحة لله عرفت تعزل تب

أخونا ود حسن دا ياهو شيخ الفريق

و هو البحل الشبك و المشاكل

و كم لله مشكلة عويصة اكبر من مشكلتك دي

شيخنا حلاها و هو واقف على فــت كراع

حرم آآجنا مرات مرات وقكت يكون مشغول

شيخنا ود حسن برسل مركوبو و كلمة و غتايته

كان تلقي أهل الدم عفوا و قالوا الميت ولدنا و الحي ولدنا

زي مشكلتك دي آآ الخرزين

ود حسن بحلها نأيـــم

و بجيب ليك حقك تـــــب أرقد قفـــا

و كان هو ما جاب ليك حق من الجنوي ديل

يبقي المسألة باينة و ما دايرة ليها كلام

بعد داك انفخ ســدرك و برم شنبك

و شنق طاقيتك و اركز على عكازك

و أعصر على ضراعك سااااكت

و حقك ما تخليه تب لي زول

خبارك بتفوت حقــك لي الرجال

و اتحزم و ارجي الجاياك

اليــوم واحد و الروح في يد الخالق

و الموت في شان الحق ... حق

أها أنا بمشي و أجيك

كان لقيتك حي

يا ني ضراعك اليمين من اليوم دا

و كان صاحب الأمانة أخـــد أمانتو

العفو لله و الرسول آآ ود عشاي

[خالد أحمد الصول]

يا زول دي أحسن حاجة تحصل ليك بس أنصحك كلم حمد العوير يلف الحلة و يقول يا ناس الحلة الحاضر يكلم الغايب الداهية الفي كمبيوتر مسافر دي أي بت تشوفها و تقرأ أيه الكرسي بعرسوهل بعد سبعة يوم و المكاضب يسأل بت عثمان و بت عبد المولي و بت ود ابو الحسن و بت نفاع ... يقومن البنات يجنكم كارات كارات تقول كدة و تكلم بدر لبط و تقول ليهو مافي بت تدخل كان ما ختت 5 الف و يدخلن بالدور و ما في حاجة إسمها بت خالتي ولا بت أخوي كلو لاذم يدفع و بعدين الما حافظة آية الكرسي و المابتعرف تقرا تدفع الفين جنيه و يقوموا بتلقينها يا زول بي حسبة بسيطة كدة الشهر بعمل ليك 20 مليون و بعدين الفكرة دي حتصدرها لي عموم القري المجاورة و لمان ناس مدني الشفوت يعرفوا و كلهم يجيبو كمبيوتراتهم في سوق تمبول و أي واحد يعمل ليهو كشاشة بتاعة شوالات و مدور الجنريتر مشغل بيهو الكمبيوتر تقوم تعمل إشاعة بواسطة حمد العوير يقول الواحدة لو مشت لي ناس مدني بجيها عريس عب

[راسكال]

والله التيمان ديل حيرو السمبر

[ود المطامير]

شيخ أبراهيم فى بيتى ؟ ها جنا جيب الخروف زارتنا البركة واللة , ومعاة كل الحبايب
أبقوا لاداخل , واللّة ياشيخنا أنا فرحان بزيارتك لينا شديد وعليك اللّة سرعوا لينا عمل
اللجنة شان نعرف الحاصل , لكن ياشبخ أبراهيم , أسافر بيها كيف ؟ وأنا لما شفتها أول
مرة قعدت ساعة أعاين ليها مستنيها تقع ولليلة جارية ... و...شرّفتى ... بزيارتك لى .
نزار .... عمى كيف حالك , أها شيخنا أبراهيم هسّى كان معاى وكلمتو ووعدنى خير
بس إنت رسل الشيك والباقى خليهو عليهو .. ومستنيك .
المكاشفى ... أول شئ أدينى الفاتحة وأنا أخاف أمشى للتيمان ويعملوا فينى مقلب
أكبر من دا . وتحياتى لك .
مدناوى ... ها زول ها إنت مالك متلحنى كدا ؟ محل ما أمشى ناطى لى فى حلقى !!
المحرشك على منو ؟ وتحرش الجماعة على !! أصبر لى وبوريك نططان الحلق الما
بتعرفو .. هوووى ياناس مدنى الزول دا أدانى فكرة وأنا هسّى بدرس فيها .
كاتم الأحزان ... إنت همّك فى بطينتك دى ؟ قرب تعال الزريبة مليانة خير .
abu_ola ... قلت مسوّى ليهم غلبة ؟ يا زول أنا لسّة مابديت وقصر الصلاة
وحكاية رمضان , الظاهر إنت كنت مبارينى من بعيد لبعيد وودحسن تب ما قصر
لكن لو حرّت بحتاج لضراعك السوّيتو لى يمين وتشكر عليهو .
صول سودان .. إنت طلعت لى من وين؟ عملت بنصيحتك وأول بنت بعد إسبوع
ماتت ودى براها سالفة .
راسكال .... إحيروا السمبر وبس ؟ ديل يحيروا بلد بحالو ..
وجميعا لكم محبتى وتحياتى ....

[بنت الرفاعي]

والله يا أخونا عندي ليك حل لكن ما تقول انا القلتو ليك علشان التيمان ماحايخلوني,
طبعا عارف بيتهم في شندي فوق بتلقى دكان جنبو مسجد أسال وبتلقاهو أهم شي يكون جاي بعربية ,بعد داك دق الباب حيجيك شافع صغيروني كدة اسألوا أول شي إنت أخو التيمان أكان قال ليك آي,طوالي تركبوا وتسوقوا وتخلي رسالة مع سيد الدكان تكتب فيها (إذا عايزين أخوكم تجيبوا المبلغ الوريتكم ليهو قبل اليوم,وأديكم اخوكم) تبقى زي الفي الافلام, بس أوعى يقولوا إرهابي, أكيد هم بيحبوه فطوالي حاتلقاهم عندك ومعاهم القروش.أكان عشرة مليون ولا عشرين, بس إنت أعمل إحتياطاتك الأمنية ولم رجال الحلة بالعكايز جنب الكبري وهم يسلمو أول حتى إنت تسلم, اهم شي مايكلموا الشرطة, ماتنسى أكان أدوك القروش أنا في الحلة الجنبكم إنشاءالله كان الربع ماعندي مشكلة والكلام ده يكون سر,إتفقنا؟؟؟

[ود المطامير]

عفارم عليك , خُطّة مسبّكة ونفذتها بالحرف الواحد
ونجحت نجاح باهر , وأهى القروش فى جيبى والنص
بالنص لأنو من اليوم ح نشتغل سوّى , أنا أتشعبط
وأتلصق فى ناس مدنى بأى مشكلة والتخطيط عليك
وأنا أنفّز , يلا هاك حقك وخلينى أمشى أشوف لى
مشكلة تانية , لكن بصراحة خايف من الجنا( مدناوى)
يكشفنا أصلو عينو على .
وتحيّاتى

[بنت الرفاعي]

ياسلام ياراقي النص كمان الله يديك العافية وما قصرت,واتفقنا, وأكان على الجنا مدناوي ده مامشكلة أكان كشفنا خليهو علي أنا أكان الحنك ما مشى معاهو, الطرق كتيرة وإنت عارف ده كويس.

[ود المطامير]

لا لا لا لا , لا الحنك ولا غيرو خلية على أنا بأدبو تمام
واللّة خسارة فيهو نظرة منك المطرطش دا , والعملية
الجاية راح تكسبنا دهب , إتفقنا

[شاكسس]

الشرطه جااااااااااااااااااات

تخطفوا ود النقيب

لا اله الا الله




والله انتهيتوا الليله دى تمشوا

انت عارف يامسافر انت ومرام دى محكوم عليكم بالاعدام غيابيا

اليله دى ربنا يحلكم

ولا تسلموا الولد ومعاه خرووف العيد ولا

ننفذ الحكم

[بنت الرفاعي]

ألحق يا مسافر ده بيهددنا:eek:!!!
قال أبوهو نقيب أنا أبوي الرئيس.:D

[Jamal Elmahi]

حباب المسافر...حبابو الخزين مو نافر...
حبابو ركب عربية التيمان بلا تذاكر...

المسافر أتا في عربية التيمان ولاّ في حصان أبو علا...حصان بي كراعين وبدون شكمان ...كاسح فلللي ...عمود تشوف عشره ماتشوف....أشر تشوفو جرجير...
كدي شوف عمدتكم يقول في الحصان شنو...بس أختا الطاحونه والبعاتي....

ود الماحي

[شاكسس]

والله انتو الجبتو لى نفسكم

ربنا يعينكم؟

تحياتى

[التيمان]

لا الهلا الله


ناس شلافين شلف غريب


وانت ابووووك رئيس الحرص بتاع الهيلتون

[شاكسس]

ههههههههههه

والله ياناس الهيلتون عامله ابوك ريس
فى الفاضى

[التيمان]

ههههههههههههههههههههههههههههههههههه

[ود المطامير]

هووّى يا جنيات يعنى عشان أنا مشيت يومين وديت
البهايم الجزيرة تاكل باقى الفول والقطن أرجع ألقاكم
دورتوها وراى مع شريكتى مرام ؟ هوووّى يا مرام
الحكاية جابت ليها نقيب وذى ماورطّينى فكّينى منّهم .
jmal elmahi ... شكرا ليك كتير وهسّى الجماعة
شغالين يفحصوا فى الحصان
ولكم تحياتى

[نزار حسن محمد]

والله يا مسافر انت الجبتوا لى نفسك انا كنت داير احل الموضوع دكاكينى كده بعد صلاة المغرب لكن بعد عمك ود الماحى عرف بالموضوع ... ياااابوى انكرب ساكت وارج الراجيك .. وخليك زول حاره ساكت وارفع راس ناس الشرق .. سمعت ياأأأبوى ..وماتخاف باب التوبه مفتوح.. انا بمشى وبجيك وزارع الله فى البوينج بتقوم...

[ود المطامير]

محال ,, إحنا بنشتريك ..... واللّة ما بايعنك
وماسكين تب فى طرفك....... وأصلو ما فاكنك
وين ما تمشى إحنا ........ ذى الضل مبارينك
قبيل أبوى وصانى وقال ...لى...... نزار دا عمك
بس قلت ألعب على الحبلين
وأكسب من ابراهيم العمدة ومنك

[ود المطامير]

حرّم ما تقول حاجة ديل حق الضحية

[نزار حسن محمد]

الحبوب مسافر انا رسلت لى عمك ابوعلاء وهو من دربه داك طلع لعمك ود الماحى ومحلوله انشاءالله
بس بندور لدينا شربووووت عشان حديث النم داير العنقريب الهبابى وسجاير البرنجى ..

[ود المطامير]

يا عمى عارفك ما بتقصر
عِلا الشربوت إحنا عملناهو على وصفة التيمان
وجربناهوا فى أبوضراع اللعرج هداك راقد إسبتاليا
ليهو يومين , إتسمم وقال النار قايدة فى مصارينو
بنفع معاك إرسل ليك ؟

[شاكسس]

ياخى رسل لى منو؟

انت كده100فى100 انا بديكم

شهاده توزيع

ههههههههه

[بنت الرفاعي]

:cool: شفت يا مسافر التيمان ديل عاملين لي فيها تفتيحة وشفتين ماعارفين مع منو بشكلو هووووووووووووي وتاني هووووي ابوي الرئيس ماحا اقول ليكم رئيس شنو علشان ما تتراجعوا أبوي براهووأنا براي.:D

[بنت الرفاعي]

شنو يامسافر اثبت شوية شنو جاري بس خليك معاي وحقك باخدوا ليك من التيمان ديل.
بس خليك قوي.

[شاكسس]

ابوك ريس الهدف ولا شنو؟


انتى زعلانه مالك

هو سكت انت مالك؟

ولا دايرها معانا

[ود المطامير]

أنا قلت أجس النبض ولقيتك تملى العين
واللى جايات أكتر من الرايحات
وتحياتى

[ود المطامير]

يا خوى أنا سكتنى الشديد القوّى , جهازى ضربو فيروس
خلّى ليك برنامج الحماية ذاتو يعطّس , واخر حمّة لمّا
بقى يهضرب وهو مقفول , ويا دوب شمّى العافية
وجيييييتكم .

[بنت الرفاعي]

أها كدة خلوين وتمامين.
وشريكي جاااااااااااااكم.

[ود المطامير]

هم التيمان ذى عربيتهم , ينططوا فى كل مكان .

[بنت الرفاعي]

يعرفوهم كيف لكن؟؟!:d

[شاكسس]

حبى واحد

خخخخخخخخخ

[ود المطامير]

واللّة فعلاً يعرفوهم كيف ؟ وسمعتى شاكسس
قال شنو ؟ يلآ ردّى علية , عارفك ما بتقصّرى

[شاكسس]

الله يخليك


لى الحاجات دى

امكن توافق انت مالك

[ود المطامير]

كيف أنا مالى ؟ وكيف توافق ؟
ها زول إنت جنيت ؟؟؟

[شاكسس]

والله دى قصه غريبه

انت اخوها ولا ود عمها

اها انا مشى لى اهلها

اطلبها عديل نشوفك تانى تسلم عليها ساى

[ود المطامير]

المشى ساهل لكن كعب الشاكوش !!!!

[نوار مصطفى]

صراحة كدة احترنا انا بقول زي الزول الفوق داك ونعمل لجنة تقصي حقائق
باشراف الامم المتحدة واسامة بن لادن والقاعدة كمان
لكن داير اسالكم البتاعة الوقعت دي لسة ما اتعرفت ؟؟؟؟؟

[مرتضى ساتى]

كويسه معاك يا نزار الضحيه جاتك هديه من الارباب مسافر
بس لازم تقسم للتيمان معاك ولكن السوال يا مسافر خرفانك دى استرالى

[ود المطامير]

عاوزين تجيبوا الأمم المتحدة ؟ خلاص ألحقوا كوفى عنان
باقى ليهو أربعة أيام ويفرفر , والمكعوجة بتاعة التيمان
مستنينها تقع ؟ دى ح توقعنا كلنا وهى لا لا لا !

[ود المطامير]

هو برضو عّمى نزار بتاع استرالى , لا الاسترالى
خاتية لناس شاكسس .

[شاكسس]

جيبو


نحن راجنو

خخخخخخخ

[ابوشوتال]

المسامح كريم