مساحة لذكرياتك

[Bet-alsudan]

مساحة لذكرياتك

ذكريات لا تنسى .. ومواقف مضحكة :D .. محزنة .:( . جادة :confused: .. جميلة:p .. لا بد انا هناك ذكريات في حياتكم .....أغمضوا عينيكم وتذكروا جيدا ماذا حدث ؟؟ كم كنت أبلغ من العمر ؟؟ أين كنت ؟؟ في أي سنة حدث ذلك الموقف ؟؟ مع من ؟؟ هل تعلمت منه ؟؟ هل افادني أم أفدته انا ؟؟


اجعل مساحة لذكرياتك وانطلق بعنانك الى اوسع المواقف التي مرت بك في حياتك والتي جعلت منك شخصا اخرا
احبتي في الله .. ادع لكم هذه المساحة لتسطروا لي بأقلامكم احلى الذكريات واجمل المواقف التي تركت لك انطباعا خاصا لن تنساه مهما طال الزمن

فقط اكتب التاريخ وصف لنا هذا الموقف وما تركه من تاثير في حياتك
ابحروا بأقلامكم النيرة فنحن هنا نرى


أول ما يسطرة قلمي في صرحكم الرائع :o

دمتم احبتي

[ابراهيم]

الذكريات صادقة ونبيلة
ومهما تباعدنا ...
بنقول حليلة ..
يا حليلة ..

محزنة:
صديق عزيز لي ... طولت منه زمن ما قابلته .. لاقيتو مرة بالصدفة في مكان بعيد من الاماكن التي عشنا فيها الصداقة سلمت عليه واول شيء خطر ببالي كان عنده اخوه ظريف وخفيف الظل اي زول يلاقيه يشعر بالإلفة والحميمة فقمت سألته عن أخوه قال لي اتوفي انا كنت سعيد باللقيا حد السعادة فجأة ابدلت ملامحنا فكان موقف محزن من المواقف الحزينة القابلتني.

موقف مضحك:
مرة وانا ماشي في السوق العربي لاقاني واحد وقفني وسلم علي سلام كتيير بالاحضان وانا بيني وبين نفسي بقيت افكر يا ربي الزول دة منو وفي نص تفكيري قام سألني ليك قال لي شكلك ما عرفتني
قلت ليه لا
قال لي ولا انا ومشى عدييييل بي دربو خلاني واقف مندهش

موقف جاد:
دة اظنو موقف الحصاحيصا
بالغتي يا بت السلطان حسي دة اجيبو ليك من وين وانا ما شغال

موقف جميل:
مرة كنت راكب مواصلات الدرجة جاي من المدرسة وقاشر آخر قشرة لكن المشكلة في جيبي كان في فت اتنين جنيه وقاعد في مقعد النص فجأة وبدون مقدمات اشوف ليك جنبي بت خالتي ومعاها صاحباتها سلمت علي ومعاها صاحباتها برضو زي خمسة بنات .. واخوك طبعاً عرقت وبقيت افكر في التخارجني شنو .. والكمساري بدا يطقطق بس واحد ثبتوا ليك قال ليهو احسب الركاب كم قام حسبهم صاحبنا دفع للدفار كلو فكان موقف جميل منو:D

موقف صعب:
مرة جاي من الجامعة ومعاي زميلاتي فجأة برضو وبدون مقدمات ظهر مجنون شايل عصاية ماااكنة وعامل رعب في الشارع العام .. وانا طبعاً معاي جكس اصلو الجكس بودي في 60 داهية قمت عملت فيها الاسد النتر الناس كلها شتت من المجنون الا انا ... لكن الساعة النزل ليك العصاية في ضهري يادوب الوقت داك عرفت قيمة الاسودية جد جد لا عرفت اضارب المجنون ولا عرفت احك الضربة فكان
موقف صعب ..:D

بت السلطان مرحبتين حبابك الف
ونورتي المنتدي:)
معليش لو كترنا من المواقف باقى الواحد فينا عامل زي الكمساري

[Bet-alsudan]

مواقف جميلة ورائعة ( خصوصا الموقف المضحك بتحصل كتيير ههههههههه)
اخي ابراهيم.
سعدت بقراءة مواقفك الجميلة واتمنى لك حياة مليئة بالذكريات الرائعة التي لا تنسى
شكرا على مرورك .. ادهشتني بحماسك في كتابة المواقف اشكرك مرة اخرى ;)


دمت سالما

[محمد حسين (المميز)]

انا مواقفي بحكيها ليكم بعدين
لكن هسه بس حبيت اسلم على ابراهيم ده
وحبيت اعلق على بت السلطان دي

البت اسمها يا ابراهيم بنت السودان
وانت شابكها يابنت السلطان يابنت السلطان
سلامت النظر يا هيمــــه

***********

[سواااح]

ابراهيم ..

موقف صعب:
مرة جاي من الجامعة ومعاي زميلاتي فجأة برضو وبدون مقدمات ظهر مجنون شايل عصاية ماااكنة وعامل رعب في الشارع العام .. وانا طبعاً معاي جكس اصلو الجكس بودي في 60 داهية قمت عملت فيها الاسد النتر الناس كلها شتت من المجنون الا انا ... لكن الساعة النزل ليك العصاية في ضهري يادوب الوقت داك عرفت قيمة الاسودية جد جد لا عرفت اضارب المجنون ولا عرفت احك الضربة

يا زول يجازي عمايلك
كان في داعي للرجالة دي !!

[سندان]

الاخوه الكرام سلام الله عليكم اود في البدايه ان اشكركم جزيل الشكر للموافقتكم على انضمامي الي منتدكم الرائع والرائع جدا
اما بخصوص المواقف التى مررت بها فهي لا تعد ولا تحصى وتخونني ال\اكره احيانا كثيره في استحضارها ولكن اود ان تكون ه\ه المشاركه واحده من المواقف الجمييله التي لن انساها
ومرة اخرىلكم جزيل الشكر