ضّل الضحى

[haroun ahmed]

&&&&&&&& ضّل الضحى &&&&&&&&
ضّل الضحى الرامى والشمس شتوية دفاية
وريحة البن لما تفوح فى قلاية
فريق جدى وصورة جدى وكتين جيت امد ايدى
جدى ادينى تعريفة
بتقراء الحمدو يا المبروك
بقراها وبجود فى القراية كمان
عشان تعريفة القاها
صور محفورة فى التاريخ
صور محفورة جوايا
سبحة بت الفكى والطورية والواسوق
وسعف حبوبة والكورية والحنكوك
وصوت سعدية بت جيرانا بتشحد ليها فى طايوق
وصوت عرفة لما تخمج الدلوكة غناية وغناية
والله زمان يا يمة والله زمان
مشتلق يمه لى ملاح النعيمية
وريحة طاجك المحروق لما تسوى طعمية
غباشة روب وعنزة حلوب
بدور ارحع اجيكى هناك يايمه
بعد الحىّ هناك
بدور اتمسى بى عيونك
واصابحك يا حبيبتى انا
صباح الخير على عيونك
اترى الدنيا من دونك شينة ما بتندار
دى مرّه حاره زى النار
ولو بتدورى احكيلك كيف احوالى فى البندر
من وين ابداء ليكى من وين
مو شيتاّ غريب وعجيب
دا شيتا كلو شين فى شين
هنا الزول العديل ونصيح
يعيش يوماتى بى وشين
وزولتى الحتى حبيتا
لقيتا بلاى تحب زولين
والله زمان يايمه .. والله زمان
$$$ &&&& @@@@
حقيقتا اعجبتنى هذه المقطوعة منذ عام 93 وحفظتها من الشريط
ولكن لم اعرف هل هذه الكلمات صحيحة الكتابة ام مختلفة .
واريد ان اعرف من شاعرها ومن مؤديها من الفنانين واسمها لكى
ازود معلوماتى عنها.. ارجو تصحيحى .
ولكم خالص شكرى واحترامى لكم .

[سواااح]

هارون احمد ..

علي ما اعتقد
ان صاحب هذا النص
هو الاستاذ / التجاني حاج موسي
وارجو من الاخوان كذلك تاكيد المعلومة
ان كان ما ذكرته صواب ام خطا

دمــــــــــــــت ،،

[معتز تروتسكى]

خالص التحايا
الزميل العزيز
haroun ahmed

نعم هو كما ذكر الصديق "سواح" فهى "للنجانى حاج موسى" وغناء "محمود عبدالعزيز"..
ارجو ان تقبلها كهدية تطفى اليك بعض الذكريات الحُلوة والجميله..
فكلماتها فعلا معبرة...اضاف عليها اداء محمود روعه ..فتكاملت اللوحة...

http://tabatpeople.com/songs/sudan/mahmood/dhulaldiha.ram



التحايا النواضر..

[haroun ahmed]

الاخوان / سواااح / معتز تروتسكى
لقم خالص شكرى وقد عرفتونى على كاتب القصيدة .
وهذا ابداع متك اخى معتز والف شكر لهذى الهدية القيمة
التى قدمتها لى وبصوت الفنان الذى يؤديها والله اعجز عن شكرك
ودمتم لمساعدتنا دوما ووفقكم الله وسدد خطاكم والله لا يحرمنا منكم
ولكم كل التحايا والاحترام ...............

[تومى]

لك التحية هارون على القصيدة الحلوة المعبرة دى .
وزى ماقالو الاخوان الكلمات للاستاذ الشاعر الكيبر التجانى حاج موسى والمطرب هو الشاب محمود عبد العزيز.
وشكراص اخ معتز على الملف الصوتى لتكتمل الروعة

[haroun ahmed]

الاخ تومى
لك التحية على المرور على هذى القصيدة الرائعة
وفعلا كنت بنتظرها انا من زمن وها اخى تروسكى
حققها لى فالف تحية لكما جميعا .