العفش داخل سودانير على مسئولية صاحبة

[أبوريلان]

الأخوة الأعزاء أبناء مدينة مدنى الجميلة النائمة على أنغام سمفونية النيل الأزرق الهادئة ، أحب أن أطرح عليكم موضوع للنقاش وهو الخطوط الجوية السودانية ( الناقل الوطنى ) بتحدث من المملكة بالتحديد مدينة الرياض ولأنى أكتويت بساعات الإنتظار الدائمة والمرتبطة بسمعة سودانطير ، حديثى لايخفى عن كل شخص غضب عليه الله وركب سودانطير ، أولا تذاكر غالية جدا جدا مقارنة مع الخطوط الآخرى المنافسة مثل الأثيوبية واليمنية والخليجية والأماراتية ذات المواعيد الدقيقة والخدمات الراقية والطاقم الجميل والسعر المناسب ، حدث أن تأخرت الرحلة فى مطار الملك خالد الدولى ثلاثة أيام تقريبا قبل شهر من الآن أما عند دخولك لاتجد ترحيب بل وجوه غاضبه مكفهره لماذا؟ لاأدرى . أنا شفت مضيفات كثر بس المضيفات السودانيات كأنهم فى حلبة مصارعة الواحدة تلاقيها تحدر ليك وتحمر ليك وتديك عين من فوق لتحت كأنها مجبرة على العمل ، أمكن يكونوا رجال الله أعلم . وبعد التعب الشديد فى الزحمة وكرسينى وكرسيك وسخانة الجو لأنهم ما بشغلوا المحركات نوع من الإقتصاد للوقود تقريبا ما أكتر ، وبعد أن تجد كرسى وبعد ساعات الإنتظار التى مكثتها بمطار المغادرة تأتيك المضيفة بالوجبة الغير مشرفه والتى لا ترقى لمستوى قيمة التذكرة عادة ما تكون ملاح وطابخه عذابى جديد فى الغربة ، هل هذه المعاملة منذ الدخول للطائرة ومقابلة الوجوه العابثه الباهته والمعاملة الغير كريمة من قبل طاقم الضيافة ترقى لتكون وجه مشرق للزائر للسودان ؟ أكيد وقبل أن يصل للخرطوم يكون أخذ صورة مقلوبة عن السودان والسودانيين . مما لاشك فيه أنو السودان ملىء بالجمال والجمال المستفذ كمان لماذا لايوجد بين مضيفاتنا من الجميلات ، قصدى الجمال الطبيعى بدون حنبل المطر على الوجه ، أما الوزن ومشاكله فهذا موضوع يطول الحديث عنه لاتوجد معاملة حتى فى زيادة كيلو واحد يصروا على دفع قيمة الكيلو الواحد ، ناهيك عن ثقالة واحد أسمو عزام كلوا كوم وعزام دا كوم تانى ما لقيت لى واحد حتى تاريخه بحب عزام وكل سفرية للسودانية بدعوه لكن الظاهر عامل ليه حجبات كثيرة أصلوا هو من ناس الغرب ، ما علينا بس عندى سؤال ؟ ماهى شروط تعيين المضيفة السودانية ؟ أم الواسطة هى السبب فى المشاكل دى كلها ؟ ولماذا هذا الزى القبيح كمان لاخلقه لا أخلاق دى صور مقلوبة لازم نعدلها ولا رأيكم شنو ؟

[osmangamal]

أنا بأيد ابوريلان فى هذا الموضوع الأشار له وهذه المظاهر والسخافات موجوده بالامارات وفى أبوظبى بالذات من دخولك المطار ومقابلة أسخف شخصيه مدير المحطه (أبوالقاسم) ماعارف جايبين العينه دى من وين ؟؟؟؟؟؟؟؟؟؟؟؟؟؟؟؟؟ الظاهر ادارة سودانير متفقه ومبرمجه لجلب أشكال زى دى الله يكون فى عون الغلابه المغتربين! بالمناسبه انا أرسلت قبل فتره طويله ابميل أشكو فيه مدير المحطه (تايسون) وهذا امكن أقل وصف يوصف به من صفات التحدث مع المسافرين بالنرفزه والتكشيره الدائمه (يعنى مافى اتيكيت بالمره) .. هذا هو الفصل الاول

تعالوا للفصل الثانى - داخل الطائره - مضيفات العياذ بالله منهم معامله فيها التكشير والعين الحاره والشكل الغير لائق للمضيفات مقارنة باستاف الخطوط الاخرى ( واحده محننه والتانيه مدخنه وغايتو مافى داعى لزيادة الكلام ، اللوم يقع على الاداره عايزين حسم من الاداره .

ارجو من الاخوه المغتربين الادلاء برأيهم وبصدق وشفافيه عن هذا الموضوع الذى يهمهم ومافى مجامله ولا شنو ؟؟؟؟؟؟؟؟؟؟؟؟؟؟؟؟؟؟؟

[أبوريلان]

الأخ محمد عثمان تحياتى يعنى الحال من بعضو وزى ماقلت الظاهر المعاينة بتتم فى أختيارأثقل إنسان فى السودان عشان يتم تعيينه فى محطة خارجية ، أنا فى رأيى المسئولين فى سودانير لهم مآرب آخرى وهى إنهاء سمعة الناقل الوطنى وولوج عالم الشركات الخاصة ، الشىء المؤسف وكنت متوقع أقرأ عنه ثانى يوم بالصحف السودانية من وصولى للرياض بعد صعودنا للطائرة السودانية وبعد أن أغلقت الأبواب مكثت بمطار الخرطوم ساعتين بدون تكييف ومن شدة الحرأصاب الأطفال الرضع نوع من الهستريا البكائية ، وبعد نقاش طويل مع طاقم الضيافة ( طاقم القرافه ) لم نصل للرد بسبب التأخير ومن جانبهم برود إنجليزى وكمان جالسين ، بدأت أنا وبعض الشباب فى أخذ الأطفال للدرجة الأولى وبواسطة مغلفات إرشادات السلامة الورقية كنا نهبب الأطفال لأن الدرجة السياحية مكتظة وأنفاس الناس والحر الشديد ولما الحال أستمر على ماعليه وهب الركاب من الخلف للأمام وبدأ الصياح وتعالت الأصوات أفتحوا الأبواب نزلونا وبدأ الإلتحام بالأيدى وعندما شعروا بأن كارثة سوف تحل بهم إذ بمحركات الطائرة تعمل وبعد قليل أقلعت وجلس الكل وعند وصولنا بالسلامة ( تفتقر للسلامة ) للرياض عرفنا أن التأخير كان مقصود والسبب أنهم سمعوا بخصخصتهم لذلك كان نوع من التمرد ما ذنب الأطفال والركاب جميعا ؟