الجوازات

[أمير عبداللطيف]

اخوتى واخواتى الافاضل
تحياتى وسلامى

كثيرون منكم امضوا سنوات عديده فى المهجر ،، التقيتم فيها حتما بممثلى الجوازات السودانية ببعض السفارات ،،
أسالكم بكل موضوعيه عن رايكم فى التعامل وانجاز المعاملات ؟ وماهى السلبيات ورؤيتكم لمعالجتها ؟ وان كنت ترى ايجابيات يجب المحافظة عليها .. ما هى ؟؟
مع مودتى ..

[نزار حسن محمد]

من السلبيات الرسوم فى اختلاف فى الرسوم عند استخراج جواز او تجديد اوتوثيق بمعنى فى السودان بتلقى التكلفه اقل بكثير .

[الزبير محمد عبدالفضيل]

مطلوب الان من ادارة الجوازات أصدار جواز يكون اكثر امنا من التزوير ويكون بمدة خمسة سنوات زي بقية شعوووب العالم

حرية التاشيرات للمواطن السوداني تكون من خلال المنافذ . التخفيض من الرسوم في جميع المعاملات


كان عنده فكره باصدار الجواز الاكتروني اين هي ؟

[محمد حسين (المميز)]

دي بعض الأشياء اللي ياريت ينظر في امرها

**كمان شكل الجواز السوداني لازم يتطور اكتر

**يعني تنكتب البيانات بالكمبيوتر باللغتين وبشكل انيق
بدلا من خط اليد.
*************

**مدّة سريان الجواز من ناحية التجديد ياريت تكون كل خمس سنوات
بدلا من سنتين والسنتين دي زاتها تعتبر سنه ونصف لأنه الجواز لمن
يكون فاضل فيهو سته شهور لااااااااازم يتجددودي بتخفف العبئ من
ناحية الرسوم وبتدي المواطن حريه اكبر في السفر.
**************

**الرسوم ياخوانا كتيـــــــــــــره كان في الاصدار ولا في التجديد
كتيـــــره والتأشيره كمان رسومها ياخوانا خففوها.
************

**ولاّ الأورنيك كمــــــان ده حكايته حكايه هو برااااااااهو
ب15000 و18000 و..و.. على حسب الأجراء المطلوب واعتقد
مافي داعي ليهو ولاّ سووهو لينا ببلاش.
************

[خالد هاشم علي]

التحية لكاتب الموضوع سعادة المقدم / أمير عبد اللطيف من جوازات القنصلية السودانية بجدة ... وفي إعتقادي بأنها لفته بارعة من سعادته للتواصل مع المواطنين في دول المهجر والإستماع لأرائهم ومحاولة حل المشاكل التي تعترضهم بس عندي تنبيه بسيط للمتداخلين السابقين والذين سياتون بعدي...
أنوه ب:
طلب سعادة المقدم معرفة المشاكل التي تعترض المواطن في إنجاز المعاملات وتعامل ممثلي الجوازات وجاءت معظم المداخلات بالحديث عن الرسوم وتعديل شكل الجواز ومدة صلاحيته ومواكبته للتطوير ومنع التزوير وهذة الأشياء خارج نطاق صلاحيات جوازات القنصلية بمعني أصح هي من إختصاص ( مدير الجوازات و مدير الشرطة ووزير الداخلية ) فجوازات القنصلية تقوم بتطبيق ماتنص عليه القوانين الصادرة والتعليمات الموجهة إليهم من رئاسة الجوازات.
لذلك اتمني أن يحقق البوست الغرض الذي كتب من أجله وهو المشاكل التي تعترض المواطن من تعامل وإنهاء للمعاملات وخلافه...
آسف سعادة المقدم لتدخلي في خصوصياتكم لكني قصدت التوضيح للأخوة الأعضاء حتي تأتي المشاركات بالمعني المطلوب لتتمكنوا من حل المشكلات التي تعترض المواطن ( في حدود صلاحياتكم).
والله من وراء القصد.

[أمير عبداللطيف]

شكرا نزار ، السفير ، المميز ، خالد

لعل الاخ خالد هاشم قد انابنى فى الشرح والتوضيح ،، اما بخصوص بعض الملاحظات الواردة اعلاه ، فالرسوم من اختصاص وزارة المالية ولكن اذا اسقطنا مبلغ ال 100 ريال ( وهى امر خاص بالجالية السودانية بالسعودية ) نجد ان الرسوم اقل من السودن ( التجديد 115 ريال / حوالى 65 الف جنيه والجواز الجديد 240 ريال / حوالى 135 الف جنيه )
اما عن الملاحظات على الجواز من حيث الشكل ومدته وخلافها فالجهود على مستوى الرئاسة ماضية ليصدر الجواز الجديد مطلع 2007 باذن الله وتجدون فيه باذن الله كل ما ذكرتوه اعلاه ، بس اسالوا الله يكفينا شر العوارض ويكتمل هذا المشروع كما خطط له ،،
يلا ادونا تعليقاتكم فى ما عنيناه ،، ولا يقتصر التعليق على جده فكل المحطات التى يتواجد فيها ضباط جوازات على استعداد لسماعكم وهى : الرياض ، ابوظبى ، دبى ، الدوحة ، مسقط ، صنعاء ، بغداد / حاليا عمان ، دمشق ، القاهرة ، طرابلس ، بنغازى ، اسوان ، لندن ..
مع مودتى ،،،

[أمير عبداللطيف]

حتى اللحظة 41 مرور على الموضوع ولاتوجد شكاوى او اراء جديدة ،، وبهذا نفهم ان الاداء مرضى وكله تمااااااااااام التمام ،، وقالوا السكات رضا ،، لكم شكرنا ،،

مع مودتى ،،،

[شبندر]

سعادة المقدم / أمير عبد اللطيف التحية لك قبل فترة كان التعديل في المهنة في السفارات والقنصليات يتم باليد ويتم التوقيع على التعديل بأنه تم التعديل لماذا لم يغير الجواز بعد التعديل؟ وهذا يسبب مشاكل مثل التزوير . الآن يتم التعديل بالصورة السابقة أم يغير الجواز .
مع شكري

[أمير عبداللطيف]

شكرا شبندر

منذ حوالى العامين تم سحب اختام تعديل المهنة من مكاتب الجوازات والغى هذا الاجراء ، والان اى تعديل فى الجواز ممنوع ، ويستلزم اى تعديل استخراج جواز جديد ،،
بس اخوانا المغتربين كثيرا ما يلحون على ان يتم التعديل فى نفس الجواز ( عشان ما يمشى ينقل معلومات وبقية الاجراءات ) ، وقطعا ما بنستجيب ليهم عشان كده بزعلوا ويكيلوا لينا ، ،
ايدكم معانا فى نشر هذا الوعى الجميل ،،
مع مودتى ،،،

[خالد هاشم علي]

أخي أمير...
زرت جوازات السفارة في مرات مختلفة والحق يقال بأنهم مامقصرين والله في حدود إمكانياتهم... بس عندي بعض التساؤلات
1/ بالنسبة للمقيمين خارج جدة كيف يتم التعامل معهم ( هل يتم إعطائهم اولوية) لانهم في معظم الحالات يكون وقتهم ضيق لظروف العمل وعدم تمكن معظمهم من المبيت بجدة لأسباب مختلفة فماهي المساعدات التي تقدم لمثل هؤلاء.
2/ مدي التنسيق بين الجوازات السودانية والسلطات المحلية وإمكانية التدخل لإنصاف المواطن السوداني في حال تعرضه لمشكلة؟؟
3/ لاحظت ان الأرقام توزع في فترة معينة ويتم توزيعها بالكاونتر ( الأستقبال) فلماذا لا يتم فتح توزيع الأرقام مع التقيد بوقت دوام الجوازات... ولماذا لا توضع ماكينة مثل البنوك ويكتب علي الأزرار ( جوازات/ ضرائب/ توكيل وخلافه) علي أن يكون لكل جهة من هذة الجهات أرقام خاصة بها؟؟؟
اكتفي حالياً ولي عودة..

[عوض صقير]

التحية لك الأخ أمير ونشكرك على أتاحة الفرصة لأبداء الراى ..... كما ذكر الأخ نزار حسن هناك فرق كبير فى الرسوم ,تجدها فى السودان أقل بكثير عن هنا وأن الفرق مابسيط ...... كان من المفترض أن تكون الرسوم موحدة ..... وعندما نتحدث عن السلبيات والأيجابيات لابد لنا من عمل مقارنة بيننا وبين أخوانا من البلدان الأخرى فنجد عندهم تسهيلات كثيرة وأهم مافيها الرسوم المناسبة , قد نكون نحن السودانيين أكثر ناس بندفع رسوم لمعاملاتنا بالسفارات والقنصليات .

[أمير عبداللطيف]

اخى / خالد

1/ لدينا مناديب فى الجاليات بمعظم مدن المنطقة الغربية ( تبوك ، تيماء ، الباحة ، الطائف ، مكة المكرمة ، المدينة المنورة ، ابها ، خميس مشيط ، جيزان ، نجران ، ينبع ، محايل عسير ، املج ، القنفذة ، وغيرها ) يستلمون المعاملات من مناطقهم ولكل منهم يوم محدد اسبوعيا لقضاء معاملاته ،، اما فى الصالة بالقنصلية لانستطيع ان نفرق بين من الذى من جده او خارجها ( ما بنقدر نميزهم وبتعمل لينا مشاكل ) لكن ننجز كل معاملات اليوم فى يومها ، وهى ما بين 200 الى 250معاملة يوميا ( يصل العدد الى 400 معاملة يوميا فى المواسم ) .
2 / لدينا بعض التنسيق مع الاخوة فى الجوازات السعودية خاصة الوافدين ،، لكن حقيقة كده اكثر من 90% من الحالات بتلقى مواطنا للاسف الشديد مخالف للنظام عن جهل او عن قصد احيانا ، ويلجأ لنا بعد ما يكون لخبط كل الدنيا وشاكل كفيله والجوازات وحتى زملائه ،، تعالوا لينا من البداية وعندنا قسم خاص لهذه المشاكل بالقنصلية ،،
3/ فى بداية مشروع النداء الالى ( الارقام ) قبل حوالى العام عملنا بالنظام الذى اقترحته فى التواكيل والتحويلات البنكية ،، وللاسف الشديد خلق الكثير من المشاكل وكلها عائده لعدم التزام المراجعين بالنظام ،، والنظام الحالى تاخذ رقم المعاملة مع استمارة تقديم الطلب ويظل معك نفس الرقم حتى الاستلام ،، وعموما لا ازيع سرا ان قلت ان القنصلية فى طريقها لمقر جديد قريبا جدا ان شاء الله ، وحينها ننظر فى التحديث .

[أمير عبداللطيف]

الاخ / عوض صقير

اولا نشكر مشاركتك ،، وموضوع الرسوم تطرقت له اعلاه ، وبالمقارنة مع السودان مع نزول الريال دا الحال ياهو

ذاااااااااااااتو ،، بس فى فرق واضح فى رسوم الجنسية ( هنا كتيييييييره ) وتعويضها فى رسوم الجواز للطالب 90 ريال وتجديده + تجديد جواز الزوجة 60 ريال ( ودى ميزه فى السودان مافى لان الرسوم هناك واحده ،، عموما معكم نقول لناس المالية خففوا على من دعموا خزينتكم بالعملات الاجنبية قبل البترول ،،

مع مودتى ،،،

[محمد حسين (المميز)]

وعموما لا ازيع سرا ان قلت ان القنصلية فى طريقها لمقر جديد قريبا جدا ان شاء الله ، .

واللـــــه يا سعــادة المقدم قلت الحاجه العاوز
أقولهــا لكن كنت متردد لأنه الحوار عن شكل الجواز وموظفين السفاره
وتعاملهم
وخايف أسأل سؤالي ده وبعدين تقولو ده خارج عن الموضوع

السؤال هو :
ليــه ياخوانا قنصليتنا حالها كده يغني عن سؤالها؟؟
يعني بصراحه شكلها حاجه غير حضاريه
من ناحية المظهر بصراحه شكل المبنى قديم ومحتاج لتجديد
من برّه ومن جوّه
حتى احيانا العلم ياخوانا بيوصل مرحله يكون اتقـّطع ولونه اتغير
حتى نفكّــر نغيـّره
لازم نصرفعليها شويه عشان تليق بشكل السودان
وبعدين اعتقد انه نحن من بين قنصليات الدول اللي فيها دخل
جيد من المواطن..

ياريت زي ماقلت يا سعادة المقدّم ونتمنى انه يكون
في مبنى جديد بمظهر يكون رائــع ..

لك كل الشكـــــر ,,

**********

[عوض صقير]

عموما معكم نقول لناس المالية خففوا على من دعموا خزينتكم بالعملات الاجنبية قبل البترول ،،

لك الشكر الأخ أمير عبداللطيف ... وعشمنا فيكم كبير فى توصيل هذه الرسالة لجهات الأختصاص بالمالية .

[خواطر]

الاخ امير انا جيت الموقع متاخر ارجو انك تكون لسة متابعه ببعض الحماس . طبعا لفتة كريمة من انك تسال ويعني كلو واحد بيعمل بي اصلوا انا عندي كتير من الملاحظات علي ضابظ الجوازات او الاخوة في الجوازات عموما او في جهاز الشرطة ارجو ان يتسع صدركم الرحب لها .
اولا تعامل ضباط الشرطة عموما دائما يكون تعامل عن تعالي وليس بفهم يعني انو الواحد مابيفكر انو هو لما اختار انو يدخل كلية الشرطة او اكاديمية الشرطة انو هو هنااختار ان يكون لخدمة الشعب وانما يضن انة لبس البدلة لكي يخافة الناس ويخدموة نحن عندما نكون في الجوازات لاناتي لكي نتسول ولاكن لان لنا مصالح نريد ان تقضي وليس ان يتم التجهم في وجهنا واقتضاب الرد حين يكون هناك استفسار عن سؤال معين.قال رسول الله صلى الله علية وسلم تبسمك في وجة اخيك صدقة .انا ماعارف الناس بتخاف تكتب لي لكن ارجو منهم يتكلمو عن الحاصل .انا احد ابنا السودان واحد ابنا مدني يعني مواطن من الدرجة الاولي ولي الحقوق التي ينص عليها القانون والدستور ولاارضي ان تستباح حقوقي ولذلك لامكان للزعل. هنالك مسئلة اخري وهي الاحضها في السفارة في الرياض وهي عدم وجود ضابط في الكاونتر الخاص بالجوازات او فرد من افراد الجوازات لوقت طويل وعندما تنظر تجدهم في المكتب بيتونسوا ويضحكو وعندما تنادي عليهم يرد احدهم علك بانتهار مالك في شنوا .؟ماتنتضرو؟ لاحقين شنو ؟ عزيزي سواء كنت ضابط او فرد او ضابط صف انت هنا لخدمة السودان وخدمة مواطن السودان فارجو انو الواحد يتذكر تعاليم ديننا السمحة وكما قلت في بداية حديثي نحن لا ناتي للشحدة ولكن لكي نسير مصالحنا وهي بالمقابل وهذا المقابل هو الذي يدفع لكم رواتبكم .
انا دا راي وعارف انو في ناس كتير ليها نفس الملاحظات ولكن مابتتكلم بيقولو ليك مالنا ومال الهوا .لكن عرف انسان مدني بعدم قبولة للحقارة .

[خالد هاشم علي]

اولا تعامل ضباط الشرطة عموما دائما يكون تعامل عن تعالي وليس بفهم يعني انو الواحد مابيفكر انو هو لما اختار انو يدخل كلية الشرطة او اكاديمية الشرطة انو هو هنااختار ان يكون لخدمة الشعب وانما يضن انة لبس البدلة لكي يخافة الناس ويخدموة نحن عندما نكون في الجوازات لاناتي لكي نتسول ولاكن لان لنا مصالح نريد ان تقضي وليس ان يتم التجهم في وجهنا واقتضاب الرد حين يكون هناك استفسار عن سؤال معين.قال رسول الله صلى الله علية وسلم تبسمك في وجة اخيك صدقة .انا ماعارف الناس بتخاف تكتب لي لكن ارجو منهم يتكلمو عن الحاصل .انا احد ابنا السودان واحد ابنا مدني يعني مواطن من الدرجة الاولي ولي الحقوق التي ينص عليها القانون والدستور ولاارضي ان تستباح حقوقي ولذلك لامكان للزعل. هنالك مسئلة اخري وهي الاحضها في السفارة في الرياض وهي عدم وجود ضابط في الكاونتر الخاص بالجوازات او فرد من افراد الجوازات لوقت طويل وعندما تنظر تجدهم في المكتب بيتونسوا ويضحكو وعندما تنادي عليهم يرد احدهم علك بانتهار مالك في شنوا .؟ماتنتضرو؟ لاحقين شنو ؟ عزيزي سواء كنت ضابط او فرد او ضابط صف انت هنا لخدمة السودان وخدمة مواطن السودان فارجو انو الواحد يتذكر تعاليم ديننا السمحة وكما قلت في بداية حديثي نحن لا ناتي للشحدة ولكن لكي نسير مصالحنا وهي بالمقابل وهذا المقابل هو الذي يدفع لكم رواتبكم .
انا دا راي وعارف انو في ناس كتير ليها نفس الملاحظات ولكن مابتتكلم بيقولو ليك مالنا ومال الهوا .لكن عرف انسان مدني بعدم قبولة للحقارة .[/QUOTE]

الأخ خواطر ...
لك التحية والتقدير... لكن أسمح لي بأن أختلف معك كثيراً فيما ذهبت إليه... فقد عممت رايك في كل ضباط الشرطة ووصفتهم بالتعالي وخلافه وهو كلام منافي للحقيقة فجهاز الشرطة مثله مثل أي جهاز او اي مصلحة فيه المبتسم والمتجهم والعاجباهو نفسه والمتواضع والبشوش فهو مجتمع كامل متكامل مع الأخذ بعين الإعتبار ضرورة فرض هيبة السلطة في معظم الحالات.
ذكرت في مداخلتك بأنك مواطن من الدرجة الأولي ودعني اٍسألك ... هل هناك مواطن درجة أولي ودرجة ثانية ودرجة مية؟؟؟؟.
أوافقك بأن بعض منسوبي الجوازات والشرطة لا يملكون فن التعامل مع الجمهور لكن هذا لا يجب أن يعمم علي الكل.
ثم ثانياً مافي واحد بخاف من زول سواء كان شرطي ولا خلافه .. بعدين نخاف ليه؟؟؟؟
الحاجة التانية منو القال ليك إنو رواتب الجوازات بتدفع من المقابل الذي تدفعه؟؟؟؟ ده جهاز يتبع لوزارة الداخلية ورواتبهم من الوزارة ولا علاقة لها بماتدفعه اللهم إلا إذا عممت ماتدفعه علي كل قطاعات الدولة.
ختاماً ياأخي ماهكذا يكون النقاش والأخذ والعطاء فالأخ أمير ( فتح قلبه) وطلب أن نتناقش لوضع آلية مناسبة لحل المشكلات التي تعترض المواطن من خلال مكاتب الجوازات بالسفارات المختلفة ولسنا هنا بصدد تبادل الإتهامات وأنه ناس البوليس حقارين ولا خلافه.والله من وراء القصد

[أمير عبداللطيف]

اخى / خواطر

لك التحيه والشكر على المساهمة ،،،

نعم الشرطة فى خدمة الشعب ، وهو شعار ( موجود على ارض الواقع ) كان ولا زال وسيظل باذن الله تحافظ عليه الاجيال المتعاقبه فى الشرطة ، ولا ينكر احد ( الا مكابر ) ان الشرطة فى خدمة الشعب ،،،

لن نقول بان ضباط وافراد الجوازات ملائكة او رسل مبرأين من كل عيب ، فنحن بشر والكمال لله ، ولكنى اقولها وبالصوت العالى ( ان من يتم اختيارهم من الشرطة للعمل بالسفارات فايتين الناس مسافااااااااااااات ) ،، وكم كانت دهشتى عندما ضربت المثل بالجوازات فى سفارتنا بالرياض لعلمى التام بان الضابطين الذين يتناوبان العمل بالكاونتر وغرفة العمليات هما اكثرنا هدوءا وصبرا واقلنا حديثا واكاد اجزم ان الذى رد عليكم ليس احدهما ،، وبعدين هل تعلم اذا مرض احدهما او حدثت له اى ظروف يعمل الاخر بالكاونتر فترة ثم يدخل ليكمل الاختام والتوقيع على المعاملات التى صدق عليها ثم يعود للكاونتر مرة اخرى ؟؟؟

لم يقل لكم احد بانكم تاتون الينا متسولون !!! ولم ننفى وجود مصالح لكم عندنا وما جئنا هنا الا لقضائها !!!
فيأخى المواطن درجة اولى ( لينا بحالك ) لعلك ( مثل كثيرين ) تحضر لقضاء معاملاتك بالجوازات وعقلك الباطنى يغلى ويحدثك عن المساهمة الوطنية ومساهمة الدفاع والرسوم وتكلفة المشوار للسفارة + ضغوط العمل ومشاكل الكفيل ( وامكن المدام كمان ) وغيرها كتيييييييييير ،،، وتلقى ضابط الجوازات فى وشك يصدق ليك المعاملة ( وتنسلخ ) وتجى طوااااااااالى تقيف ليه وتقول ليه ( ادينى جوازى ) ناسى انه الجواز دا عنده دورة مستنديه بالداخل وتسجيل بالحاسوب وفحص وطباعة ولصق و تختيم وتوقيع ؟؟؟
ويأخى ذى ما ليك حقوق بتطالب بيها ،، برضو عليك واجبات اولها احترام ( اخوك ) الضابط دا لانه جاء لخدمتك !!! وبعدها اداء واجب الوطن فى الالتزام بمساهمته الوطنية وتنفيذ قوانينه ولوائحه ،،
ونحن رجال خدمة عامة نواجه جمهور فيه العالم والجاهل ،، والمتواضع والمفترى ،، والصادق والكاذب ،، ووووالخ لذلك تجدنا ( نجتهد ) لارضاء الجميع رغم تاكدنا من استحالة ذلك ، فمن نرضيه نحمد الله ، ومن لايرضى نسال الله فيه اجر الاجتهاد ( ويبدو انك واحد من ديل !!! ) ،،
يؤسفنى جدا ان اجد ابنا من ابناء ودمدنى مدينة العلم والثقافة والابداع والجمال والابتسامة يعرض رأيه ومساهمته بمثل هذه الطريقة وهذا الاسلوب فى الكتابة فى منبر ومنتدى راقى كهذا !!!!!!!!!!!! ( ومع كده الله يسامحك ، وساوصل رايك بالنص للاخوة فى الرياض ليستصحبوه فى مسيرتهم ان شاءالله ) ،،
وحاجه اخيره ،، لو رئاستنا خلت رواتبنا على دفعكم دا كان اسرنا اتشردت !!! عليك الله اجمع ليك عشرة من جماعتك وشوف كم واحد فيهم ملتزم بسداد الضربية ؟ وكم واحد فى مهنة ووظيفة عالية وجوازه بمهنة عامل وما عاوز يغير المهنة عشان يدفع للبلد اقل مساهمة ؟؟؟ مع تقديرى لعدد مقدر يؤدى ما عليه بانتظام لاجل الوطن ،،

*** شكرى لاخى خالد هاشم على للتوضيحات البتشبه ناس مدنى ، ويا خواطر خالد دا من اسرة قدمت شقيقه النقيب عصام الدين شهيدا ولا زال شقيقه المقدم على يحمل الراية ( فى خدمة الشعب ) ،، عشان ما تقول الزول دا اسى مالو ؟

مع مودتى ،،،

[خواطر]

الاخ الامير والاخ خالد هاشم عندما طرحتم الموضوع للنقاش في المنتدي كان لاخذ الراي والشكاوي والمقترحات رغم النعوت التي وصفتموني بها كتر خيركم وانا يا اميرو اتحداك ان تجدي علي اي مخلفات مساهمة وطنية وخلافة و كما انوة انوا انا قد اكملت الخدمة الوطنية للبلد وليس العكس اما ان تقول لي انو فلان اخو شهيد ولا اخوة بيخدم لرفع لواء السودان وانا ابن عميد متقاعد افني حياتة في خدمة هذة البلد ورفع رايتها واعلم ان لكل واحد منا مهنة او حرفة اختارها ليرفع بها لواء الوطن في كل المجالات وانا عندما تكلمت رايت بام عيني ولم يحدثي احد وحدث معي شخصيا فلا احتاج لتبرير اما عن كفيلي فانا ادعو لكل سوداني بان يكون لدية مثل كفيلي الذي هو بمثابة اب ثاني بالنسبة لي

[أمير عبداللطيف]

أخى الفاضل / خواطر

رمضان كريم وتصوم وتفطر على خير ،، يا عزيزى اين هى تلك النعوت ؟؟؟ كدى عليك الله اقراء كلامى تانى

بالراااااااااحه كده وبعد الفطور عشان الصيام فى بدايته شويه مؤثر ،، لازلت ادعو للطرح الموضوعى وقد أوصلت

حديثك نصا للاخوة فى الرياض ليراعوه ،، لك شكرى على المداخلة ،، وتحية خاصة جدا وتعظيم سلام لسعادة العميد.

مع موتى ،،،

[خواطر]

مع موتى ،،،
رمضان كريم وتصوموا وتفطروا علي خير والله انحنا موتك مادايرنو لكن دايرين مودتك

[حاج]

رمضان كريم ومن الصائمين القائمين إن شاء الله

أولا شعار الشرطة في خدمة الشعب ده شعار ساي وما عندو أي علاقة بالسودان بل الشعار الحقيقي هو الشعب في خدمة الشرطة ولو عايزين أدلة بديكم بس ما دايرين نطلع من الموضوع.

الغالبية العظمى ما راضية عن السفارة في الرياض لأنو الناس بنظروا إلى علاقتها مع السودانيين علاقة ريال فقط. فعلى ذلك نقيس الموظفين بالداخل سواء كانو شرطة أو غيره

[أمير عبداللطيف]

خواطر ،، لك مودتى ،،،

يا حاج : حج ،، وصلى على النبى ،، وأرجع لموضوع البوست واستعين بشرح الاخ خالد هاشم

مع مودتى ،،،

[عبدالمنعم الصديق(خدرا)]

الاخ الغالى امير عبداللطيف
لك تحياتى ايها الرايع روعة مدنى واهلها
واتمنى ان يديم الله عليك نعمته ويحبب لك عمل الخير وقضاء حوائج الناس
ولا اجاملك اذا قلت لك ان جوازات السفاره فى جده واجه تشرف اى سودانى اتى اليها
ولا اعرف شيئا عن جوازات الرياض لاننى لم اتشرف بالحضور اليها ولكنى احسبهم
مثل اخوانهم فى جده ولكن اخى ان كان هناك ماخذ عليكم فهو مدة الجواز القصيره
ولى سوال اتمنى ان اجد له اجابه وانا لك من الشاكرين
لماذا لا يمكن تعديل مهن السودانيين فى الاقامه كبقيه خلق الله ؟؟
سمعنا ان المنع من حكومة السودان وليس من جوازات السعوديه
هل هذا الكلام صحيح وكيف يمكن تعديل المهنه فى الاقامه وليس فى الجواز؟؟
اخى امير عذرا اعلم انك لا تعمل فى الجوازات السعوديه ولكن سيد الرايحه يعمل شنو؟؟؟
مع حبى لك اخى الغالى ولكل ناس مدنى
سوال اخير اخى هل يمكن استخراج بطاقه شخصيه من جوازات القنصليه ؟وكم مبلغ رسومها
علما بان شهادة الجنسيه فى السودان؟ولك حبى اخى الغالى ثانية

[همس الشوق]

السلام وعليكم ورمضان كريم بعد الزحمة

طبعا السلبيات كتيــــــــــــــــــــــــــرة وما اظن تتحصر غايتو حكاية تجديد الجواز كل سنتين دي حكاية غريبة والاغرب انو ما بي اشرو ليك من السودان لوباقي في جوازك اقل من 5 شهور يعني التجديد بقى كل سنة ونص.
اما الرسوم ده موضوع تاني
وفي حاجة اسمها كرت سفر للشباب
والتأشيرة بقت ورقة يدوك ليها في يدك عشان تضيع وتطلع واحدة غيرا
غايتو الحاجة الممكن تعتبرا من الايجابيات انو ممكن تاشر من مدني
طبعا السفارة السودانية هي السفار ةالوحيدة البتلقى جنبها زحمة وفوضى غريبة

[اللمسة الساحرة]

السلام وعليكم ورمضان كريم بعد الزحمة

طبعا السلبيات كتيــــــــــــــــــــــــــرة وما اظن تتحصر غايتو حكاية تجديد الجواز كل سنتين دي حكاية غريبة والاغرب انو ما بي اشرو ليك من السودان لوباقي في جوازك اقل من 5 شهور يعني التجديد بقى كل سنة ونص.
اما الرسوم ده موضوع تاني
وفي حاجة اسمها كرت سفر للشباب
والتأشيرة بقت ورقة يدوك ليها في يدك عشان تضيع وتطلع واحدة غيرا
غايتو الحاجة الممكن تعتبرا من الايجابيات انو ممكن تاشر من مدني
طبعا السفارة السودانية هي السفار ةالوحيدة البتلقى جنبها زحمة وفوضى غريبة
__________________

[صالح ابوشوارب]

مرحب بي سعادة / المقدم امير
آسف لتأخرى في المداخلات والاسئلة لانو كانت عندى ظروف . والحمدلله زالت بخير
هل يوجد قنصل عمالى ( متفرغ لمشاكل المغتربين وخاصة الحقوقيه ) مثل بعض دول شرق آسيا ؟
هل لديكم احصائية بعدد المساجين و المسجونات من ابناء السودان في سجون المملكة والذين صدرت بحقهم الاحكام ونوعيتها ؟
هل هناك رعاية لاسر المساجين والذين لازالوا في المملكة بحجة متابعة القضية او انتهاء السنة الدراسية ؟
هل هناك مانع بان يقضي المسجون بقية محكوميته في السودان بالاتفاق مع السلطات السعوديه ؟
لماذا بعض المهن لاتتغير في الجوازات السعودية للسودانيين وهي تربية مواشى / سائق خاص ؟
لست ضد الفن ولكن يوجد فنانات سودانيات ( ذات الخطرات الحمر) من النوع البنزل دساتير في حفلات الاستراحات بمناسبه او بدون مناسبة ديل انتو كسفاره بتعملو ليهم شنو ؟ ديل احرجونا مع اخوانا ناس الامر بالمعروف والنهي عن المنكر
هناك اشخاص ضعيفي النفوس يقومون باعمال لاتشبه السودان ولا السودانيين مع كفلائهم من هروب ومعهم عهده ماليه . هل تساعدون الكفيل من استرداد امواله عن طريق وزارة الداخليه ؟ وكيف تكون الاجراءات في مثل هذه الحالات ؟ ( بالمناسبه عندنا قصه بخصوص هذه المشكله سوف اخبر خالد يخبرك بيها لاني اخجل ان اكتبها هنا )

مشاققه ( طبعا ود هاشم محتار في اسئلتى دى

[همس الشوق]

سمعت لي شمار وعايزه اتأكد منو؟؟؟؟؟

قالو السفاره السودانية اكتر سفارة بدخل قروووووش من بين السفارات


ياربي السفاره االسودانية في الرياض دخلها كم في اليوم؟؟؟؟؟؟؟؟؟

[التيمان]

تقولى انتى كممممممممممممم

[أمير عبداللطيف]

اخى / عبدالمنعم

تحياتى و رمضان كريم وشكرا على المداخلة ،،،

كل الدراسات والمقترحات التى قدمتها الاداره العامة للجوازات اوصت بتعديل مدة تجديد الجواز ،، ونحمد الله ان هذا ما سيتم فى الجواز الجديد ان شاء الله وهو غالبا كالجواز الاماراتى ( دبى ) ونتوقع تنفيذه فى 2007 م باذن الله ،،،

تعديل المهنة يتم عندنا فى الجوازات بعد ابراز المستندات المطلوبة فى دفتر جواز جديد ( لايتم التعديل فى نفس الجواز ) ،،، وبالمنطق كده اذا السفارة بتغير ليك المهنة كيف توصى بعدم تغيرها لدى السلطات السعودية ؟؟؟ دا نظام دولة لا نتدخل فيه ،، واشير الى ان عدد من الحالات مرت على فيها تعديل مهنة حتى من عامل تربية مواشى !!!

البطاقة الشخصية لاتصدر خارج السودان ،،

مع مودتى ،،،

[أمير عبداللطيف]

همس الشوق + اللمسة الساحره

سلالالالالالالالالام ومرحب بيكم كتير

مدة التجديد فى طريقها للحل كما ذكرت اعلاه ،، الرسوم دى حقت وزارة المالية ( ونسال الله لكم التخفيف بعد الغاء الضرائب ) ،، كرت السفر خاص بالخاضعين لقانون الخدمة الوطنية وهناك قانون جديد او تعديل فى طريقه للاجازة من الجهات المختصة لمعالجة هذه الاشكاليات ،، بخصوص (التاشيرة البقت ورقة ) بعد اكتمال الربط الالكترونى ستختفى الورقة ان شاء الله ( حاليا فى جوازات المغتربين بقت ختم ) والعافيه درجات ( وانتو سارحين وين لمن الورقة تضيع !! ما تركزوا معانا شويه ياناس ،، ولا شنو ؟ ) ،،

التاشيرة من مدنى دى خطوة اتاخرت كتير ونحمد الله على اكتمالها وعقبال كل محليات الجزيرة بل وكل السودان ،،

بخصوص الزحمة و (الفوضى ) بجوار السفارة ،، نحن شعب فيه كثير من البساطة وشئ من الامية وكميااااات من عدم النظام والانضباط ،، والناس العاملين المنظر دا قلة تداوم على هذا الفعل ، ورغم كل الجهود التى بذلت للقضاء على هذه الظاهرة الا ان الحال لم ينصلح كثيرا ، وبقى امامنا علاج ( الكى بالنار ) يبدو اننا فى جدة سنلجأ اليه مضطرين ،،

قصة اننا اكثر سفارة بتدخل قروش دى عاوزه مراجعة ! وكيف الوضع بعد الغاء الضرائب ورفع نصاب الزكاة ؟؟

شكرى على المداخلة ، ورمضان كريم ،،،

مع مودتى ،،،

[أمير عبداللطيف]

صالح ابوشوارب / التيمان

شكرا على المداخلة ،، وساعود للرد

[أمير عبداللطيف]

ابوشوارب

تحياتى ،، الحمد لله على تحسن الظروف ،،

لايوجد قنصل عمالى متفرغ بالمعنى الذى فهمته ولكن لدينا نواب للقنصل العام يتابعون قضايا السودانيين بالمحاكم وجهات الاختصاص المختلفة ،،
تغيير المهنه تناولته اعلاه واكرر اننا لانمانع فى ذلك بل نقوم بتغيير المهنة فعليا فى جوازنا السودانى ،،
بخصوص المساجين نقوم بالمرور على السجون لتفقد السودانيين بها ومعالجة ما يواجهونه من اشكاليات ،، اما اسرهم فاننا دائما ننصح بمغادرتها للسودان ونتكفل بتزاكرهم ومصاريف سفرهم ،، لاتوجد حاليا اتفاقية امنية مفعله ليقضى المحكومين مدة سجنهم بالسودان ،، الفنانات ذات الخطرات الحمر الله يكفينا شرهم وقدر ما اشتغلنا فيهن ونسفرهن بالتنسيق مع السلطات المختصة يجن راجعات ( برفقة ازواجهن ) وازواجهن دى تحتها مليون خط !!!!!!!!! ،،
اما عن ظاهرة الهروب التى ظهرت مؤخرا باموال الكفلاء فمكانها القضاء السعودى وطلب الاسترداد عبر الانتربول السعودى والسودانى ،، وخالد ما ادانى الموضوع لكن ممكن نتباحث فيه وتقديم الممكن ،،
اكرر شكرى على المداخلة وربنا يصلح الحال ،،
( انا قاصد ارد عليك باللون الاحمر )

مع مودتى ،،،

[صالح ابوشوارب]

شكرا يا جنابو على الاكله الدبلوماسية .. لكن ما شبعت .. بالله لو في وصله بالبريد الخاص

[أمير عبداللطيف]

التيمان

تحياتى

كم فى الخط ؟؟؟


مع مودتى ،،،

[أمير عبداللطيف]

كل عام والجميع بخير ،، وربنا يحقق الامانى ،،


مع مودتى ،،،

[أمير عبداللطيف]

ومرت حوالى 3 سنوات !!! هل من جديد ؟؟؟

[ابو لوزة]

الاخ العزيز امير عبد اللطيف
ذهبت للقنصلية منذ اسبوع لتجديد جواز المدام
الموضوع اشبة ببسيط وهو عبارة عن استيكر
وختم ,تصور الاجراء
0 اخذت رقم الساعة 9:30 صباحا لما وصلت الشباك
الساعة 12:30 ظهرها وده كلو عشان الضابط يوقع بس
واذن الظهر صلينا وتاني صف طويل عشان تسديد الرسوم
وبس يعني الجواز سلمته الساعة 1:20 ظهرا قلت خلاص بعد مافي شي
كلها نص ساعة ويندهو اسمي تصور ان الناس الكانو بعدي جوازاتهم وصلت
انا جالس حتي الساعة 3:45 عصرا حتي تم استلام الجواز
دي واحدة من الشكاوي

[esmat]

جوازاتهم وصلت

الواسطة شيء اساسي في السفارة

[أبوريلان]

الأخ أمير عبداللطيف
فائق تحياتي

سعادتك عندنا في الرياض ، وأنت داخل السفارة بتمر علي الإستقبال وتدفع (3) ريال مقابل الأورنيك وهي بدون إيصال مالي ( سرقة مقننة ) 3 × عدد المراجعين اليومي = 3200 ريال تقريباً ، وين بتمشي ؟ وهل وزارة المالية لها علم بهذه السرقة ؟ هل هذه ( العوائد ) تذهب لخزينة الدولة ؟ سبق أن سألت هذا السؤال للسيد/ كرار التهامي عند تكريمه من قبل جميعة ود مدني بالرياض ، وقد إستغرب هذا الحديث !
أما موضوعك وعن مدي تقبلنا لممثلي الجوازات بالقنصليات والسلبيات والإيجابيات التي تواجهنا ، فأسمح لي كيف نقابلهم وكل الأشخاص المسموح لنا بمقابلتهم وتسليمهم أرواحنا وجيوبنا وجوازاتنا بالكاونتر (موظفين ) هم البستلموا ، وهم البدفعوك الرسوم ، وهم ...... وبعد كل هذه المرمطة تجلس لحين ينتهي المسئول من شراب الشاي والقهوة والدردشة مع الزملاء وتجهيز معاملات معارفه وأصحاب النفوذ ، أما إذا كان هناك جنس لطيف فسوف تنتظر حتي نهاية الونسة لينظر الي طلبك ، آخر مرة يا جنابو ذهبت وكنت مبيت النية أن لا أدفع لحكومة السودان مبلغ (100) اللهو بدفعوك ليهو + 115 ريال بتاعت التجديد ليصبح المبلغ الإجمالي بالإيصال 215 ريال + 3 ريال الأورنيك في الإستقبال = 218 ريال سعودي ماعارف الآن تسميتها شنو ؟ ولكن مباريانا منذ زمن طويل ، أعلم بأن ليس لها أي معني غير زيادة أعباء علي كاهل المغترب ( البقرة الحلوب ) ، لا بترول شبعهم ولا .......... مناصب ولا ...... المهم ، وصلت للشخص الصاري وشو ( معروف لكل ناس الرياض ) وكأنو أنا داير أشيل منو فلوس وليس أدفع فلوس يقابلك بهذا الوجه العبوس وكأنك قتلت أبوهو ... أها عمل لي فورم كده وجاب لي مبلغ مالي التقول أنا مهرب مخدرات .... قلت ليهو يازول ده شنو قال دي الضريبة بتاعتك + الذكاة ، قلت ليهو أنا دافع كل شي في فرعكم بمدني بس داير أجدد جوازي فقط قال لي عندك إيصالات تثبت ذلك ، طبعا أخوك دقس وما جاب معاه الإيصالات لأنو الجية كانت غير مبرمجة نسبة لتوقيف حسابي البنكي لحين تجديد الجواز ، فلم يسعفني الزمن للذهاب للبيت وأخذ الإيصالات المالية ، أها رديت عليه الحل شنو ، قال ماعندي ليك حل تدفع أو ترجع ، رديت عليه بأن يكتب لي في الإيصال قصاد هذا المبلغ الخرافي رسوم تجديد جواز فرفض لأني كنت داير أوكرو لو كتب رسوم تجديد جواز لاكمل المبلغ ، أها قلت ليهم داير أقابلك القنصل ، وفعلاً دخلت علي القنصل وكان معه تلفون ، وضع السماعة ورحب فيني وقال أقدر أخدمك ، لم أقابل شخص مسئول بالسفارة طيلة فترة إغترابي في مثل هذا الشخص المهذب المحترم المهتم بالمواطن والمتفهم لمشاكل الناس غير هذا القنصل بالسفارة ، رديت عليه بأن يخلص مكالمته ، فرد بأنه هنا لمساعدتي أنا وطلب من بالتلفون أن يتصل بعد قليل من الزمن حتي يفرغ نفسه لخدمتي ، ذهلت لما سمعته من هذا الإنسان ، فشرحت له الموضوع ، فقال لي وبالحرف الواحد بأن الموظفين بالكاونتر غير متفهمين لطبيعة عملهم ، وطلب مني ماذا أقدر أن أخدمك ، قلت له أنا طالب أجدد جوازي فقط لأني دافع كل ما علي من ضرائب وذكاة بفرعكم بمدني وليس لي ذنب أن لا يكون عندكم شبكة مع فروعكم بالسودان ، وفعلا بطيب خاطر قال ما مشكلة هات الفورم ، كتب عليه إستلام رسوم تجديد جواز ، ذهبت للشخص الصاري وشو تاني ، طبعاً زاد في الصرة شوية كوني دخلت علي القنصل ، وبعد قراءته لمذكرة القنصل كتب لي إيصال آخر الرسوم +100 ريال تبرع + الذكاة ، رديت عليه يا أستاذ أنا مشيت للقنصل وكتب ليك رسوم تجديد ، هنا وضع الفورم وقال لي أنت ما داير معاملتك تمشي !!!! قلت ليهو جيب المعاملة هنا وشلت الأورنيك وتاني دخلت علي السيد القنصل ووجدته في مكالمة آخري وبنفس الروح الطيبة أوقف المكالمة وقال لي أها ما خلصوا ليك ، قلت ليهو فعلاً ما فاهمين عملهم ، قال الحصل أيه ؟ رديت بأن أضافوا لي مبلغ 100 ريال وأنا ماداير أدفع لحكومة السودان أي شيء زيادة علي رسوم التجديد لأني لم أجد أي خدمة طيلة سنين إغترابي ، الرجل إبتسم ، طلبت منه أن يضيف بعد جملة تسديد رسوم تجديد جواز كلمة ( فقط ) حتي لا تضاف لي أي أتعاب أخري فكتر خير هذا الإنسان كتب ما أمليته عليه وقال لي أي خدمة أخري فشكرته وخرجت ، سلمت الشخص الصاري لي وشو الأورنيك ومعه مبلغ 500 ريال قال لي عندك فكة رديت ( لا ) فصرف لي باقي المبلغ وسملني إيصال بمبلغ 115 ريال وهو المبلغ المفترض يدفعه كل مراجع لتجديد جوازه وحققت هدفي وجددت جوازي وخرجت منتصراً علي هذا الشخص الحاقد علي المغتربين .

[esmat]

العزيز ياسر
المعمة بتاعت التجديد دي ان شاء الله بنخش فيها
قريب اول مرة انتبه انو جوازي انتهى ليهو كم يوم

[خطاب العبيد]

السلام عليكم ياسعادة المقدم ودى براهاماهينة كونك تفتح باب للنقاش بالنسبة لمشاكل وهموم الموطن السودانى وتعامل موظفين السفارات خارج الوطن

اول شيء انامقيم بدولة قطر
الشيء الثانى من المشاكل البتواجه المقيمين بالخارج فى السفارات واقرب مثل سفارتنافى الدوحة .

1 - بداية الدوام 8:30 ص الموظفين بحضرو9 - 9:30 السفارة بتقفل 11:30 ظهرانااواى حدتانى بياخداذن من مكان العمل لمدة ساعة او ساعتين .
لتجديدالجوازاذاجيت الساعة 7ص لازم تنتظرالى الساعة 8:30 - 9 ولماتسلم الجوازللتجديدبقولوليك تعال الساعة 12ظهر او الساعة 2 ظهروالاهم من دابتلقى موظف واحدبتجاوب معاك والباقين الله اعلم الحاصل عليهم شنو .

2 - عندنافى قطرلم تنقل كفالة بطلبو منك شهادة حسن سيرةوسلوك من بلدك كل السفارات الاجنبية وفرت الخدمة لمواطنيهاالانحن تتلتل براك ترسلهاوقوماوقعدة بتاخد3-6 يوم فى السفارة بعددفع الرسوم بتاخدشهرواحتمال تضيع .

3 - المشاكل البتواجه السودانين مع كفلائهم سواءكان الكفيل شخصى او شركة من المعروف انو المشاكل دى من إختصاص السفارة هى تتدخل لحل المشكلةواذافرضناانوهناك بعض الاخوان هم البيخلقوالمشاكل دى لانفسم لكن هناك الكثيرمن الذين لايملكون حول ولاقوة والسفارة تتفرج وانت واحدمن رعاياهاطيب ليه خاتين مبنى للسفارةوقنصل وسفيروماقادرة تعمل اى شيء .

مثال بسيط اذا خادمة فلبينية حصل ليهامشكلة مع كفيلهابتتدخل السفارة بتاعتهاوتتولى القضية الى ان تحل وتاخذبحق الخادمة الى اخرمليم تتطلبومن الكفيل .
السفارة السيرلانكية وووو الخ .

مع العلم باننى كمواطن سودانى اقوم بكل التزاماتى المالية تجاه الوطن ومن حقى ان اجد الاهتمام والرعاية اياًكانت وفى اى مكان كان .

مع العلم هناك تقدم فى بعض النواحى للسفارة ولكن بسرعة السلحفاء .




هذه بعض همومى وهموم الكثيرين مثلى نرجوان نصحى فى يوم من الايام ونجدانناسواسيةمع باقى الدول التى تقدم ارقى الخدمات لموطنيهاعبرسفاراتهافى الخارج .



لك كل الاحترام والتقديراخى سعادة المقدم .

[محمد عبد الله عبدالقادر]

سعادتو امير - سلامات
قد تتباين وجهات النظر والحكم على موظفي واجراءات الجوازات بالسفارات من شخص لاخر حسب تجربه كل منهم ، ومن خلال تجربتي الاخيرة في تجديد الجواز بالقنصليه في جدة( قبل قرابه الثلاث اشهر) كانت على احلى ما يكون من ناس الجوازات والضرائب والزكاة وما اخدت زمن كتير

بس اعيب عليهم في عدم ربط الضرائب والزكاة وجهاز المغتربين في مدني والخرطوم بشبكة واحدة مع السفارات الخارجية فمن غير المعقول اعمل برنت للضرائب والزكاة يطلع لي معلومات سنه 2000
ودمتم

[محمد النويري-الفقراء]

سعادتو / امير عبد اللطيف انا للاسف جيت متأخر على هذا لبوست واجمل ما فيك صراحتك وبساطتك وطرح موضوع مهم زي دا لانو قليل من يكون على رأس المسؤولية ويتحلي بتلك الصفات الجميلة من بحث مردود خدمة يقدمها هو للشعب لبنظر تبعاتها من محاسن او مساوي. هسي انا مستعجل بجيك راجع برواقة

[مازن الجمّال]

مدة صلاحية الجواز البتنتهي زي حلاوة قطن

[صابرحسين]

شي جميل سعادة / المقدم أمير أن تعيد هذا البوست الذي أسأل الله أن يعينك في تحمل حرارة بعض المداخلات فيه ، وكل هذا كما تعلم ناتج من العشم في أن تجد هذه الصرخات المعالجات ، لأن الداخل إلى مباني السفارة بيعتبر هذا المكان هو المكان الحقيقي الذي ينتمي إليه في بلاد الغربة السفير سوداني ـ القنصل ، رجل الشرطة ...إلخ فلذلك مقياس الأشياء عنده له شكل خاص وحساسية عالية جداً حتى عن الأخطاء الفردية أو الصغيرة ، ونفس التصرف في آي دائرة حكومية في البلد المضيف قد لا يسبب التوتر والضيق .
تشكر على هذه الروح العالية
وتقبل تحياتي

[أمير عبداللطيف]

الاخ العزيز امير عبد اللطيف
ذهبت للقنصلية منذ اسبوع لتجديد جواز المدام
الموضوع اشبة ببسيط وهو عبارة عن استيكر
وختم ,تصور الاجراء
0 اخذت رقم الساعة 9:30 صباحا لما وصلت الشباك
الساعة 12:30 ظهرها وده كلو عشان الضابط يوقع بس
واذن الظهر صلينا وتاني صف طويل عشان تسديد الرسوم
وبس يعني الجواز سلمته الساعة 1:20 ظهرا قلت خلاص بعد مافي شي
كلها نص ساعة ويندهو اسمي تصور ان الناس الكانو بعدي جوازاتهم وصلت
انا جالس حتي الساعة 3:45 عصرا حتي تم استلام الجواز
دي واحدة من الشكاوي


تحياتى ابولوزه ،،

طبعا انا غادرت جده فى فبراير 2009 وعدت للسودان ، اتصلت بالاخ العقيد / التوم احمد محمد مدير جوازات القنصليه بجده ناقلا له شكوتك ،، خلال الفتره من 1/6 وحتى الان لديهم ضابط فى اجازه للزواج واخر وقع فانكسرت يده اليمنى ، وظل العمل بضابطين فقط واحد بالكاونتر واخر بالداخل لغرفه العمليات وهو المدير نفسه ،، ورغم ذلك استغرب ان تستغرق معاملتك كل هذا الوقت ، وبحكم خبرتى فى جوازات القنصليه بجده فان الامر لا يتطلب كل هذا الوقت ،، عموما تقبل اعتزارهم ، ونامل ان لا تتكرر مع سواك مع تهانينا للعريس وسلامات للضابط للمكسور .

[أمير عبداللطيف]

أخي / ياسر عبدالرحمن ،،

لك التحيه والتقدير ،،

بخصوص الرسوم ،، نحن كجوازات لاعلاقه لنا بها ،، وهى من اختصاص وزاره الماليه ويمثلها المدير المالى بالسفاره وتحت مسئوليه السيد السفير ،، دور الجوازات ينحصر فى العمل الهجري الفنى ( يصدق ليك الضابط المعامله فى الكاونتر ، وتمشى لناس الماليه للضرائب والزكاه والخدمات تساوى معاهم امورك ويسلموا المعامله لقسم الجوازات لانجازها ) ،، ونحن الجهه الوحيده الماعندنا موظف او صف ضابط بتعامل مع المراجعين فى السفارات بل ضابط فى وظيفه دبلوماسيه ( نائب قنصل ) او ( قنصل ) .
مشكله عدم الربط مع مكتب مدنى او دنقلا او الخرطوم نفسها مسئوليه جهاز المغتربين ، وتابعوهم للمعالجه لانه الايصالات ممكن تضيع ؟؟؟ وربنا يسهل عليكم ،،

[أمير عبداللطيف]

العزيز ياسر
المعمة بتاعت التجديد دي ان شاء الله بنخش فيها
قريب اول مرة انتبه انو جوازي انتهى ليهو كم يوم


ياحبيب ،، الواسطه دى موجوده فى كل الدنيا ، ولكنى واثق من ان معاملتك (الهجريه ) ما محتاجه لاي واسطه داخل او خارج السودان ، بس الامور الماليه دى ما عندنا معاها شغله الا فى اطار المسئوليه التضامنيه بالسفاره ،، عموما لو شعرت بان معاملتك قد تاخرت بعد سدادك للرسوم فلا تتردد فى العوده لضابط الجوازات بالكاونتر وتقدم له شكوتك وباذن الله تجد المعالجه ،،

[أمير عبداللطيف]

السلام عليكم ياسعادة المقدم ودى براهاماهينة كونك تفتح باب للنقاش بالنسبة لمشاكل وهموم الموطن السودانى وتعامل موظفين السفارات خارج الوطن

اول شيء انامقيم بدولة قطر
الشيء الثانى من المشاكل البتواجه المقيمين بالخارج فى السفارات واقرب مثل سفارتنافى الدوحة .

1 - بداية الدوام 8:30 ص الموظفين بحضرو9 - 9:30 السفارة بتقفل 11:30 ظهرانااواى حدتانى بياخداذن من مكان العمل لمدة ساعة او ساعتين .
لتجديدالجوازاذاجيت الساعة 7ص لازم تنتظرالى الساعة 8:30 - 9 ولماتسلم الجوازللتجديدبقولوليك تعال الساعة 12ظهر او الساعة 2 ظهروالاهم من دابتلقى موظف واحدبتجاوب معاك والباقين الله اعلم الحاصل عليهم شنو .

2 - عندنافى قطرلم تنقل كفالة بطلبو منك شهادة حسن سيرةوسلوك من بلدك كل السفارات الاجنبية وفرت الخدمة لمواطنيهاالانحن تتلتل براك ترسلهاوقوماوقعدة بتاخد3-6 يوم فى السفارة بعددفع الرسوم بتاخدشهرواحتمال تضيع .

3 - المشاكل البتواجه السودانين مع كفلائهم سواءكان الكفيل شخصى او شركة من المعروف انو المشاكل دى من إختصاص السفارة هى تتدخل لحل المشكلةواذافرضناانوهناك بعض الاخوان هم البيخلقوالمشاكل دى لانفسم لكن هناك الكثيرمن الذين لايملكون حول ولاقوة والسفارة تتفرج وانت واحدمن رعاياهاطيب ليه خاتين مبنى للسفارةوقنصل وسفيروماقادرة تعمل اى شيء .

مثال بسيط اذا خادمة فلبينية حصل ليهامشكلة مع كفيلهابتتدخل السفارة بتاعتهاوتتولى القضية الى ان تحل وتاخذبحق الخادمة الى اخرمليم تتطلبومن الكفيل .
السفارة السيرلانكية وووو الخ .

مع العلم باننى كمواطن سودانى اقوم بكل التزاماتى المالية تجاه الوطن ومن حقى ان اجد الاهتمام والرعاية اياًكانت وفى اى مكان كان .

مع العلم هناك تقدم فى بعض النواحى للسفارة ولكن بسرعة السلحفاء .




هذه بعض همومى وهموم الكثيرين مثلى نرجوان نصحى فى يوم من الايام ونجدانناسواسيةمع باقى الدول التى تقدم ارقى الخدمات لموطنيهاعبرسفاراتهافى الخارج .



لك كل الاحترام والتقديراخى سعادة المقدم .


أخى / خطاب ، تحياتى لكل الاخوه بقطر ( عندنا ضباط كتااااااار معاكم لهم التحيه )

رغم ان عدد السودانيين بقطر كبير وفى زياده مستمره الا ان المصدق للجوازات ضابط واحد فقط ؟؟؟ هو الذى يقابلك للتصديق وهو الذى يتابع العمل بغرفه العمليات وهو الذى يوقع المعامله ويختمها واذا كان جواز جديد يغلفه فى الماكينه ، واذا جنسيه يتحري معاك ويصدقها ويبصمك وبعد التسجيل يختم ويوقع ويغلف ؟؟؟
وبشتغل احيانا لناس البحرين ؟؟؟
هذا بجانب تاشيرات الدخول للسودان ، وعمله الادارى ، ومايكلفه به السفير من عمل دبلوماسي عام ؟؟؟
عليك الله ما كتير الكلام دا عليه ؟ وهو واقع الحال فى كل السفارات عدا السعوديه ومصر وليبيا والامارات ،،
ومع كده ساحيل ملاحظاتك للاخ الكريم سعادة العقيد / عمر بالسفاره بالدوحه ، اعانه الله واياكم ،،

[أمير عبداللطيف]

سعادتو امير - سلامات
قد تتباين وجهات النظر والحكم على موظفي واجراءات الجوازات بالسفارات من شخص لاخر حسب تجربه كل منهم ، ومن خلال تجربتي الاخيرة في تجديد الجواز بالقنصليه في جدة( قبل قرابه الثلاث اشهر) كانت على احلى ما يكون من ناس الجوازات والضرائب والزكاة وما اخدت زمن كتير

بس اعيب عليهم في عدم ربط الضرائب والزكاة وجهاز المغتربين في مدني والخرطوم بشبكة واحدة مع السفارات الخارجية فمن غير المعقول اعمل برنت للضرائب والزكاة يطلع لي معلومات سنه 2000
ودمتم


أخى / محمد عبدالله ، تحياتى ووينك ياراجل ؟ حليل جده ههههههه

بيحكوا عن مغترب طول من البلد ، رجع السودان وطلع من المطار مع صلاة المغرب لقى الشوارع كلها ناس فارشين بروشهم ويصلوا ، قال والله ماشاءالله التدين فى السودان بقي عالى جدا ( انطباع ) ،، وواحد تانى برضو عاد بعد غيبه طويله وطلع من المطار الساعه 10 مساء لقى الحفلات مدوره فى كل الانديه والاحياء هجيج تقيل قال والله البلد خربت بقت كلها غناء ورقيص ( انطباع )
ونحن مع البروش والصلاه وكمان الفرح ( بدون انطباع )
شكرا لمرورك ، وان شاءالله دائما نوفق لارضاء مواطيننا ،، ولحدى ما الجهه المختصه تربط الداخل بالخارج خلى ايصالاتك معاك ،،

[أمير عبداللطيف]

سعادتو / امير عبد اللطيف انا للاسف جيت متأخر على هذا لبوست واجمل ما فيك صراحتك وبساطتك وطرح موضوع مهم زي دا لانو قليل من يكون على رأس المسؤولية ويتحلي بتلك الصفات الجميلة من بحث مردود خدمة يقدمها هو للشعب لبنظر تبعاتها من محاسن او مساوي. هسي انا مستعجل بجيك راجع برواقة


ومنتظرين عودتك يالفقير ود الفقراء

[أمير عبداللطيف]

مدة صلاحية الجواز البتنتهي زي حلاوة قطن


ههههههههه حلوه حلاوه قطن دى يامازن ،، بس ما قالوا ليك الجواز الجديد شغال فى السودان ؟ الكترونى ومدته خمس سنوات ،، وربنا يسهل ويعمم على الولايات والسفارات .

[أمير عبداللطيف]

شي جميل سعادة / المقدم أمير أن تعيد هذا البوست الذي أسأل الله أن يعينك في تحمل حرارة بعض المداخلات فيه ، وكل هذا كما تعلم ناتج من العشم في أن تجد هذه الصرخات المعالجات ، لأن الداخل إلى مباني السفارة بيعتبر هذا المكان هو المكان الحقيقي الذي ينتمي إليه في بلاد الغربة السفير سوداني ـ القنصل ، رجل الشرطة ...إلخ فلذلك مقياس الأشياء عنده له شكل خاص وحساسية عالية جداً حتى عن الأخطاء الفردية أو الصغيرة ، ونفس التصرف في آي دائرة حكومية في البلد المضيف قد لا يسبب التوتر والضيق .
تشكر على هذه الروح العالية
وتقبل تحياتي

وانا واخوتى ضباط الجوازات فى كل السفارات ، ، على استعداد لسماع اى راي او نقد حتى لو طرحه صاحبه بطريقه غير لائقه ، فما بعثتنا الشرطه الا لمعالجة اموركم الهجريه ، وقضاء حوائجكم ،، شكرا اخى صابر لمرورك الراقي .

[محمود (أبو وضاح)]

اسال لجنابو (أمير عبداللطيف) لو سمحت :-
هل الجواز الالكترونى الجديد والذى تم التسويق له مؤخرا ضمن برامج التحديث بوزارة الداخلية السودانية ، هل يحتوى على معلومات المهنة ؟ فهناك جوازات العديد من الجنسيات لا يشار الى المهنة من قريب أو من بعيد ، فقط المعلومات المهمة :-
الاسم ، الميلاد ، مكان الميلاد ، تاريخ الاصدار ، وانتهاء الصلاحية ، العنوان بالوطن الأم ، الخ .....
ولكم الشكر ،،،
محمود أبوالكيلك - الدمام - المنطقة الشرقية

[أبوريلان]

أخي / ياسر عبدالرحمن ،،

لك التحيه والتقدير ،،

بخصوص الرسوم ،، نحن كجوازات لاعلاقه لنا بها ،، وهى من اختصاص وزاره الماليه ويمثلها المدير المالى بالسفاره وتحت مسئوليه السيد السفير ،، دور الجوازات ينحصر فى العمل الهجري الفنى ( يصدق ليك الضابط المعامله فى الكاونتر ، وتمشى لناس الماليه للضرائب والزكاه والخدمات تساوى معاهم امورك ويسلموا المعامله لقسم الجوازات لانجازها ) ،، ونحن الجهه الوحيده الماعندنا موظف او صف ضابط بتعامل مع المراجعين فى السفارات بل ضابط فى وظيفه دبلوماسيه ( نائب قنصل ) او ( قنصل ) .
مشكله عدم الربط مع مكتب مدنى او دنقلا او الخرطوم نفسها مسئوليه جهاز المغتربين ، وتابعوهم للمعالجه لانه الايصالات ممكن تضيع ؟؟؟ وربنا يسهل عليكم ،،


شكراً كتير سعادتك لإستقطاع جزء ثمين من وقتك للتفرغ لحل مشاكل الناس رغم بعدك عن جدة ، ومازلت أمير أسم علي مسمي تهتم بالمواطن بالداخل والخارج والفقير قبل الوجيه ،
أخي أمير عندنا كما ذكرت لك لا يوجد ضابط في الإستقبال لكي يصدق لك معاملتك ، يوجد شخص صاري وشو وأنا مصر علي صاري وشو دي بالذات ويبدأ بمطالبتك بمديونيتك وبعد أن تدفع تذهب معاملتك للضابط المسئول وهو بداخل مكتبه بالممر الذي خلف الكاونتر مكتب ( كبير) ويا حليل زمن العقيد الرشيد موسي الزين الرجل الهميم كتلنا فوقوا .

[أمير عبداللطيف]

اسال لجنابو (أمير عبداللطيف) لو سمحت :-
هل الجواز الالكترونى الجديد والذى تم التسويق له مؤخرا ضمن برامج التحديث بوزارة الداخلية السودانية ، هل يحتوى على معلومات المهنة ؟ فهناك جوازات العديد من الجنسيات لا يشار الى المهنة من قريب أو من بعيد ، فقط المعلومات المهمة :-
الاسم ، الميلاد ، مكان الميلاد ، تاريخ الاصدار ، وانتهاء الصلاحية ، العنوان بالوطن الأم ، الخ .....
ولكم الشكر ،،،
محمود أبوالكيلك - الدمام - المنطقة الشرقية


يا ابو الكيلك ، الجواز الجديد فيه الاسم / مكان وتاريخ الميلاد / تاريخ الاصدار والصلاحيه ( 5 سنوات ) فقط ،، باقى المعلومات من مهنه وعنوان وخلافه موجوده بالشريحه الالكترونيه الموجوده داخل غلاف الجواز ، وتقرا بواسطه جهاز خاص ،،

[أمير عبداللطيف]

شكراً كتير سعادتك لإستقطاع جزء ثمين من وقتك للتفرغ لحل مشاكل الناس رغم بعدك عن جدة ، ومازلت أمير أسم علي مسمي تهتم بالمواطن بالداخل والخارج والفقير قبل الوجيه ،
أخي أمير عندنا كما ذكرت لك لا يوجد ضابط في الإستقبال لكي يصدق لك معاملتك ، يوجد شخص صاري وشو وأنا مصر علي صاري وشو دي بالذات ويبدأ بمطالبتك بمديونيتك وبعد أن تدفع تذهب معاملتك للضابط المسئول وهو بداخل مكتبه بالممر الذي خلف الكاونتر مكتب ( كبير) ويا حليل زمن العقيد الرشيد موسي الزين الرجل الهميم كتلنا فوقوا .


الضابط لايوجد بالاستقبال بل بالكاونتر المواجه للصاله وانا زرت الرياض وشفت طريقه عملهم ، بعد ما تمشي للضابط ويصدق ليك المعامله حتى تمشي لزولك الصاري دا وهو مفروض يكون المحاسب او مسؤل الضرائب ،،
الراجل الكلس الرشيد موسي الزين ترقي لرتبة العميد شرطة وتم نقله هذا الاسبوع مديرا لجوازات العاملين بالخارج ( جوازات المغتربين ) ،، بختكم ،،

[أبوريلان]

آسف سعادتك أقصد كاونتر السفارة وليس الإستقبال مكان تحصيل الـ 3 ريال
وألف ألف مبرووووووووووووووك لسعادة العميد الرشيد موسي الزين وهو أهل لها
ومكان ما يوضع هذا الرجل يكون بلسم للمواطن .

أشكرك أخي أمير وآسف لو طولنا عليك الحديث .