الأغتراب والمغتربون

[عوض صقير]

الاغتراب... والمغتربون عالم تاني... المغترب يشيل شنطتو ويشرّق... قاصد ديار الزيت... يمشي هناك عشان ياخد لو سنتين تلاتة ويعرس ويشتري بيت وعربية... ويجي راجع يقعد عند اهلو... لكن يلقى نفسو ورط في الغربة... والزمن يجري بهنا وبهناك... مغتربين الخليج... ولقوانين دول القّطرة والعقال... يلقى نفسو لا هو خليجي ولا هو سوداني... يلقى نفسو حاجة كدا ما معروفة شنو... هناك لاهو مواطن عشان يقعد ويتوهّط سمح... وهنا يلقى نفسو مواطن مع وقف التنفيذ... ضايع... بين الاتنين يضيع هو... مغتربين السعودية حاجة تانية... حاجة تجنن الما يجن... خليط من الشعور بالدونية وشعور بالفوقية في وقت واحد... شعور بالدونية للبلاقيهو من الغربة... وبالفوقية لانو كان لما يرجع هنا بيتعامل كانو حاجة تانية وزول فريد في نوعو... يحيط به الناس من كل جانب... واول ما يفلس ويعلّم الله يبدو يسالوهو انت راجع متين؟... عشان يمشي يخم ويجي تاني... هذا المخلوق المغترب في حياته يمر باربع مراحل رئيسية هي المرحلة القردية... ثم المرحلة الحمارية... ثم المرحلة القُرادية... هذا المراحل لها التأثير في تكوينو الوجداني وسلوكو....



المرحلة القردية



تبدأ هذه المرحلة اول ما يبدا المغترب في اجراءات السفر... يبدا يحس انه اصبح جزءا من فصيلة المغتربين... ويتصرف على هذا الاساس... واول ما يقول بسم الله ويخت كراعو في قفص اغترابو... يبدا يحاكي من سبقوهو في الاغتراب... .يبدا يفكر يشتري عربية... ثم ستالايت في اوضتو براهو... ثم المتزوج يفكر يجيب مرتو بهناك ويقعد يجهز في البيت من العفش زي الجماعة القبالو بالضبط... من غرف نوم وعرف جلوس وسراير وموكيت وملايات امريكية وايطالية ولو في ملايات امم متحدة يشتريها زي الكبار والقدرو من المغتربين... ثم يبدأ في التوالد... التوالد هناك يتم في موسم معلوم ومعروف حسب خبرتي يتم اغلبه في فترة الشتاء اما فترة الصيف فهي للاجازات والعُمرة لمن لم يستطيع للاجازة سبيلا حكمة ربنا قعدت في منطقة حضرت فيها موسم توالد في اسبوع واحد كان هناك خمسة ولادات ضكور... والخمسة أي واحد فيهم ابوهو سماهو محمد ودا كان نتيجة تأثير المرحلة القردية... وقد حباني الله بان اتعرف على احد المغتربين في السعودية عندو تلاتة من الابناء يحملون اسم محمد... محمد سادة.. ثم محمد المامون..ثم محمد الامين... واقترحت عليه مساعدة مني في حل ازمة الاسامي ان يسمي الولد الجايي محمد وردي... ولو انزنق والحكاية جرت وورت معاهو يسمي البعدو محمد فرفور... العجيبة انو اسمو هو براهو محمد عثمان... المرحلة القردية مرحلة قصيرة الامد... والغربة والشغل وجهاز المغتربين وضرايبو والكفيل ما بيخلو أي مغترب يستمتع بهذه المرحلة... لهذا نجد ان المخلوق المغترب يدخل في المرحلة الحمارية سريع جدا...



المرحلة الحمارية



تتميز هذه المرحلة بالسكون والهدوء و الطاعة العمياء... وهي اطول مرحلة من مراحل تطور المغترب... ويكون المغترب فيها حمار شغل... البيت الشغل وبالعكس... ويكون عارف من تشرق الشمش هو الليلة حيسوي شنو... وقد استفاد بعض الكفلاء من هذه المرحلة ومميزاتها الحمارية... بان يطلبوا من المخلوق المغترب... ان يشتغل أي حاجة في أي وقت... ويقوم هذا المخلوق بالعمل بهمة عالية ونفس راضية ورضى عنها... كما ان بعض الذكيات من نسوان المغتربين استفادت من هذه المرحلة والطاعة بان كانت تطلب من بعلها كل ما تتمناهو وهو ما بيقول لا... يتمنى المغترب السعودي في هذه المرحلة بان ينادوهو بابي فلان... ابو محمد.. ابو عادل... ابو فاطنة... ابو نفيسة... ابو كديسة... كما وانه تبدو عليه ملامح تقالة الدم... . بدءا من الدقن المشغنفة.. وانتهاء بالنكت البايخة التي لو استمعت لواحدة منها تقوم عليهو تعضيهو في نص قنقونو ولما تمشي البيت تقفل عليك اوضة وتقعد تبكي لمن الله يغفر ليك تبكي عشان بياخة النكتة وعشان ربنا ابتلاك ببلوة وهي عظيمة الا على الخاشعين... ايضا قد حباني الله باحد النكتنجية من مغتربي المرحلة الحمارية... يحكي النكتة ويضحك فيها هو لحدي ما دموعو تجري... حتى لو حكاها عشرين مرة في الدقيقة... وكنت لما اشوفو جايي علي اسال الله سبحانه وتعالى ان يلزمني الصبر الجميل والسلوان... وان يجعل استماعي الى نكته في ميزان حسناتي... ويتميز مغترب المرحلة الحمارية بدقة وسرعة تحويل قيمة الريال الى العملة السودانية مرورا بالدولار... تتم هذه العمليات بسرعة جدا في راسو... ويديك نتيجة تحويل أي مبلغ بكل دقة وامانة حتى الكسور ما يخليها... ايضا مغترب المرحلة الحمارية يكون شغوف جدا ومعجب جدا بكفيلو... يقعد وسط الناس ولو بيتكلمو في الكورة ينط هو ويقول يا زول ها والله الكفيل كفيلي انا... وبس... ثم يحكي عن احترامو ليهو وكيف بيتعامل معاهو مع انك تكون واثقا تمام الثقة انو نضمو دا كلو اماني... واضغاث احلام... ثم تبدأ بوادر انتهاء المرحلة الحمارية تلوح في الافق وتظهر بوادر المرحلة القرادية... بان يبدأ المغترب يفكر في البديل في حالة الاستغناء عنه... والبديل داخل بلد الاغتراب.. وتظهر عليه القرادية جلية عندما يستغنى عنه فعلا...



المرحلة القُرادية



وهي مرحلة قد تطول وتقصر حسب عمر المغترب... المصّر ان يكون قُرادة للنهاية... وهي تتميز بان يقوم المغترب بالتشبث بالشغل والبقاء اطول فترة في بلد الاغتراب... يرفدوهو من شغل يشعبط في شغل تاني... يسفروهو يكون شال معاهو فيزا ويرجع تاني.. يكشوهو يرجع عُمرة او حج ويكسر ركبة هناك... لاحظت ان هذه المرحلة ليست حكرا على السوداني... ايضا هناك القراد المصري والقراد الهندي والقراد الباكستاني... ما يميز القراد السوداني انه يتكاثر ويتوالد في العائل وهو ياخد فترة طويله متشعبط في الهدف... عكس القراد المصري الذي يكون فترة تطفله قصيرة لكنها مجزية ومضرة حد الضرر ما يقيف لو حد...



المرحلة الكلبية الاستثنائية او (مرحلة كلب الحر)



وهي استثنائية لانها تتم خارج بلد الاغتراب وداخل السودان... المخلوق المغترب يقرر ان يرجع الي السودان... مصدقا نضم الحكومة في التلفزيون بان المغتربين يرجغو والبلد محتاجة لخبراتهم وان السودان احسن بلد ممكن الواحد يستثمر اموالو فيهو... ثم تبدأ رحلة الجري... لو عندو بيت قاعد يبني فيهو يقعد يتجارا عليهو وقتو كلو ورا لواري الطوب والاسمنت... وبعد كدا يقعد يتجارا.. ثم يبدا الجري في السهلة عشان يعرف البلد والناس بتسوي في شنو؟... ويشتغل شنو؟ يجري كما يجري كلب الحر يجري عشان يشوف مدارس وجامعات لي وليداتو... ثم يستمرئ الجري قد يكون اشد عدوا من كلب الحر زاتو... ثم ... ثم بعد فترة يمشي الحج للمرة الاخيرة ثم يعمل عمليه بروستاتا... ثم يتوفاهو الله الى رحمته...



آخر الحكاية



اغمريني في كل المساحات والزوايا



اصبغي بالفرح البنفسج انوية الخلايا



كوني انتظاما



كوني انشطارا



كوني انقساما



كوني فيها



تحتويكي وتحتويها



واعبري حد النهاية



د. عادل الصادق المكي
منقـــــــــــــــــــــــــــــــــــــــــــــــ ــــــولة

[محمد حسين (المميز)]

بصراحه ياعوض
صحيح انت ماكتبتب الموضوع لكن نقلته
لكن بصراحه احس انه فيه تطاول اكتر من اللازم على المغترب
مهما كان وضعه ومهما كان تصرفه وتفكيره .

ماكل الناس بالمستوى ده ولعلمك الرجل السوداني المعروف عنه مابيقبل الاهانه
الاّ من رحم ربي.

******************

[سواااح]

عزيزي عوض صقير ..

نحن لا ننكر ان الاغتراب له مساؤيه
ولا ننكر انه يخلق فجوة بيننا بين اوطاننا
ولكن اليس من حق المغترب ان ينال نصيبه من الاهتمام والرعاية
ليس هناك منزل او اسرة سودانية تخلو من مغترب
وهناك الكثيرين من من وهبوا سنينا طوالا من اعمارهم لاهاليهم واسرهم
وعندما انتبهوا لانفسهم كان او كاد ان يعدي عليهم شبابهم
اليس يجب ان يعاملوا بشئ من الانصاف والعدل
عند حضوره الي الاجازة يعامل بنوع من الكبرياء والانفة الزائفة
الكل يطمع في ما لديه
مع العلم ان الكثيرين من من لم يغتربوا اصبح حالهم افضل كثيرا من المغتربين
لا اقول ان كل الاسر تتعامل بهذا الاسلوب لكنه الاسلوب الشائع
والان اصبحت هناك هجرة عكسية بصورة مبشرة
* بلادك حلوة ارجع ليها

دمــــــــــــــت ،ن

[عوض صقير]

الأخوان .. المميز ... وسواح .. أشكركم على التعليق وأضف أليكم الآتى :

أولا وقبل كل شىء أنا شخصيا مغترب
وثانيا هى مجرد محاولة لعكس مايخطه الآخرون عنا .... وفعلا ماكل الناس بالمستوى ده ... ولكن وللأسف هناك شريحة كبيرة وكبيرة جدا من المغتربين تفوق هذا المستوى ....

[mohammed ahmed]

سلملم
بالله يا أخوانا خلونا نجلبق في الساحل ومافي داعي نخش في الغريق لأنو اليومين ديل البحردميرة وبشيل معادة الأخضر واليابس .. بس أحب أقول مقتطفات مختصرة جدا عن المغترب يا حليلك ... والعجب عيالو شايلين ليهم دفتر جواز يبين جنسيتهم والله أعلم مدى إنتمائهم الحقيقي لجنسية الوطن المعني لأنهم :
(أ) الآباء والأمهات بالسنوات محرومين من هواء الوطن وما عندهم غير زكريات .
(ب) الأبناء هم المشكلة الحقيقية إتولدوا وإتعلموا في أحضان الغربة القاسية وبقي ماعندهم أى إحساس بقيمة العم والعمة والخال والخالة... فما بالك بقيمة الأوطان .. ياسلام والعجب لما يحس إنو بعاملوهم كفئة أقول إيه... من الدرجة ( ثانية ) في المؤسسات التعليمية وغيرها .. والله ضايعين مساكين يعني ما لاقينها ( المواطنة ) في بطن الفصول ببلاد الغربة ولا في المدرجات بالجامعة في الوطن ( الوهمي ) عندهم.
عاوزين علماء نفس يناقشو الموضوع ده ( مش لأبناء المغتربين بس وللمجتمع بالدخل برضو )
ومالو ... بس عاوز أعرف المغترب ده جاء من وين ماهو أخوك وأخوى وأختك وأختي و.... و .....
وبس مالو .. عاوز أعرف ليه يعامل المعاملة دى ( مرطب وعندو قروش كضابين والله بتحسبو في اليدين ) بس كلهم فيهم شهامة السوداني الأصيل وأصدق دليل أنهم مرقوا من بلدهم شايلين معاهم هم الأهل والوطن وأمسك أى واحد فيهم تلقاه أكرم ممن بالداخل ) وأسألوا أهل المغتربين .... في واحدين قالوا إنهم حناكيش لا يا أخوانا إنتو ماعارفين الحناكيش وين والله هم في وسط البلد قاعدين متحكرين ........
والبقية جاية ....

[امل حياتى]

هههههههههه والله عسل يامنقة كل كلامك حقيقى يا عوض يا صقير وانا هسى طبعت مقالك ده وماشى اركبه فى بورت النادى السودانى هنا فى الامارات عشان يشوفو كلامك ده حاصل فيهم وهم ما حسين بروحهم وياريت اصلا" لو عندهم شىء ينوموا عليه كلها اكل وشراب وايجار

تسلم اخوى عوض صقير على الموضوع الاكثر من رائع

[امل حياتى]

سوف يتفاجأ كبير مشرفين المنتدى العام الاخ نزار ود حسن بهذا المقال على النادى السودانى

[عوض صقير]

أشكرك الأخ أمل حياتى على المداخلة الظريفة

[معتز حمدتو]

عوض صقير
تصنيف ولا اروع وحقيقتا الغربة اخذت اكثر من ما اعطت ولكن ليس كل ما يتمناه الانسان يدركه ، وفي جماعه عرفوا الموضوع مطرشق وقاموا احسن لالوب بلدنا ولا تمر الناس ..
ونسال الله ان يرد غربتنا الي اوطاننا ونحن في احسن حال اخي عوض ولك الود

[نزار حسن محمد]

الاخوان الحبان ... لكم التحايا.. اولا تحيه خاصه وشوق كتير للاخ العزيز دفعه عوض صقير والله ياعوض لك وحشه وياحليل ايام زمان ...
نرجع للموضوع .. والله كل المراحل المذكوره دى حقيقه واتفق مع الكاتب بان مغتربى المملكه العربيه السعوديه تنطبق فيهم هذه المراحل بكل تفاصيلها لكن ياعوض صدقنى بتختلف من بلد لى بلد وتحديدا هنا فى الامارات الموضوع بختلف شويه من باقى دول الاغتراب وده برجع لى قوانين اهل الامارات وانا باعتبر دولة الامارات هى الدوله الوحيده الممكن نقول عليها نوعا ما بتحترم المغترب .
الحبيب ياسر (امل حياتى ) ياخى خلى الموضوع انا داير اقابلك قبل كل شى عشان نحول النادى السودانى لمنتدى ودمدنى رايك شنو . ياحبيب لك ودى
محمد احمد..... سلملم .. تحليلك جميل وحقيقى تسلم ياسلملم
عوض بالله ماتنقطع وسوف تجد تلفونى فى رساله خاصه...و لك ودى... اخوك نزار بركات

[عوض صقير]

الأخوان معتز حمدتو ونزار لكم التحية ومشكورين على المداخلة
الأخ العزيز نزار حسن ... جد مشتاقين وفى أنتظار رسالة خاصة منك

[أبو الزيك]

الأغتراب أصبح مشكلة حقيقة تشكل هاجس لكل شخص والكلام القلتو هو عين الحقيقة مع إضافة أنه أصبح مجهول هوية وأصبح الشعور بعدم الاستقرار يشكل بعبعباً مخيفاً لك مغترب فنسأل الله لهم العون وحقيقة أي مغترب ممكن نقدم ليهوالتعازي على ماضاع منه في الغربه بغض النظر عن الأشياء المادية التي اكتسبها فهي لا تساوي عشر ما أريق من عمرة وشبابه وأعصابه والذي يسلم منهم بيطلع بي سكري أو ضغط

[بسأل عليك]

كلامك في محلو ما نقصت منه وكمان مازدت فيه لكن في حاجة صغيرة لو ما المغتربين ديل بالمراحل الأربعة المذكورة كان في ناس جنو عديل في البلد تذكر ياعوض طابونة جعفر عمك الكان شغال فيها له الرحمة توفي وهذا بعد أمر رب العباد بسبب حقن تكلفتها أعتقد كانت 600000 ألف بس ما عندو حقها لو عندو مغترب أنشاءالله في تشاد كان وكان وكاااااااااااااااااااااااااااااااان بس ربنا يرحمه ويرحمنا ونساعد مثل هؤلاء نحنا المغتربين .

لك حبي أظهر علينا يا أستاذي أشتقنا لي شوفتك معقولة بس ........

[الزبير محمد عبدالفضيل]

غللللللللللللللط ياعوض تصف الناس بالحيوانات والله عز وجل كرم بني ادم عن سائر المخلوقات

[عوض صقير]

الأخ السفير عفوا ... هذا تشبيه ببعض صفات الحيوانات .... منها التقليد وكثرة العمل وقوة التحمل ... وكثير جدا هناك من يشبه بالأسد للقوة والشجاعة .... وهناك أسماء مشتركة بين الأنسان والحيوان .... فهد ... نمر ... صقر .... وهذا مالزم توضيحه .... مع شكرى وتقديرى .

[عوض صقير]

العزيز ياسر الريح أشكرك على المرور الكريم ...... بالقبه أوروبا ذكرتنى بأخونا محمد عوض سابق ( الجنجين ) , لنا لقاء قريب أن شاء الله