المساعد الشخصي الرقمي

مشاهدة النسخة كاملة : الممرضــــــــة والســــــــــراب والهــــــــــــــوا


صالح ابوشوارب
14-07-2006, 08:31 AM
الممرضة والسراب والهوا

كنت قاعد في البيت ومنتظر التلفون يرن في اى لحظة .. وطال الانتظار .. لليوم الرابع وانا منتظر لاني كنت عيان بالفشل الكلوى .. كنت منتظر الممرضة تتضرب التلفون .. وتقول لى تعال .. الليله في مكنة غسيل فاضية ..كنت فعلا تعبان .. وكنت شارب موية كتيرة .. وبعد انتظارضرب التلفون وكانت فعلا واحدة من الممرضات .. وقالت لى تعال بسرعة في مريض اليوم غايب .. وفي لمحة البصر كنت في عنبر الغسيل .. مشيت لرئيسة العنبر وكانت غليده وكريهه وكنا المرضانيين الاجانب ما بنحبها .. وقالت لي امشي للسرير رقم 19 .. وفعلا توجهت للسرير رقم 19 .. ومن حسن حظى .. كانت الممرضة هندية واسمها جميلة .. سبحان من خلق .. كانت جميلة فعلا .. جميلة ومؤدبة .. كانت شلة الممرضات من جنسيات مختلفة .. فيهم كورية وهنديه وفلبينية وباكستانية واخيرا جابوا صينييات لكن ما ذى جميله .. كان نظام المستشفي .. الممرضة كل يومين ينقلوها من جهاز الغسيل الى جهاز تانى .. عشان مايكون هناك علاقات شخصية غير علاقة المريض بالممرضة .. جميلة قالت لى امشي معاى الميزان .. عشان اشوف وزنك زاد كم من الغسلة الفاتت .. وبعد ما طلعت الميزان .. قالت لى جميله .. آآآآآآآآآآه ليه شربت موية كتيرة .. كان وزني 87 كيلو وكنت زايد 7 كيلو عن وزني قبل اربعة يوم .. يعنى لازم جميلة تشغل مكنة الغسيل وتسحب 7 كيلو من جسمى خلال اربعة ساعات متواصلة . رجعت انا وجميلة لمكان الغسيل بعد الميزان .. جابت الدفتر وكتبت الوزن قبل الغسيل والضغط .. طبعا رقدت في السرير جنب مكنة الغسيل .. وقعدت اعاين في جميلة وهي بتجهز مكينة الغسيل .. كانت ركبت درب الغسيل في المكنة مع الفلتر وعبتو بمحلول طبي قبل ما اجى .. وقامت شالت ليها ابره غسيل .. كانت من النوع الكبير .. ممكن اقول ليكم ذى المسلة .. وجاتنى عديل ..وسحبت ليها كرسي وجات قعدت جنبى .. ومسكت يدى .. وقامت ربطت لستكة في ضراعى .. عشان الوريد يتنفخ من جرى الدم في الوريد .. وتقوم تركب الابرة الكبيرة .. قامت قالت بسم الله وضغطت الابرة .. آآآآآآآآآآخ سمعت قولة ( تق ) والابرة تدخل في الوريد جنب كفة اليد .. طبعا جميلة حنينة جدا .. كانت متأثرة .. لكن ( هذه هي ابرة الغسيل ) قالت لى معليش .. بكرة تشفي وتبقى ذكريات وركبت الابره التانية بعدها بمسافه .. قامت مشت وجابت الدرب اللى فيهو المحلول .. وركبت طرف الدرب بالابرة المركبة في الوريد .. وشغلت مكنة الغسيل .. كان منظر فظيع .. بدأ دميى يسيل عبر الدرب وهو يطرد المحلول من الدرب .. وجميلة كانت شايلة طرف الدرب التاني وبتكب المحلول في باقة بلاستيك وبعد كدا بترميهو .. كان دمي في الرحلة دى وصل الفلتر .. وبدا لون الدرب يتغير كان لونه ذى المويه وهسي لونو بقي احمر .. وخلاص كان الدرب والفلتر والمكنة جزء منى في الوكت دا .. كان الرابط بينى وبين البلاستيك والحديد والكهربا كانت الممرضة جميلة .. وصل الدم الى آخر الدرب .. وقفت جميلة الكهربا من المكنة .. وركبت الطرف الآخر من الدرب في الوريد عشان يدخل الدم بعد رحلة خارج الجسم بطول مترين ونصف .. يكون الدم مر بي الفلتر . وبعدها شغلت المكنة .. انا لحدى هسه بعاين لجميله وهى بتشتغل بحنية .. جابت جميلة الدفتر .. وكتبت الضغط والحرارة بعد بداية الغسيل .. سحبت الكرسي وقعدت قدامي . وقالت لى شاعر بدوخة .. قلت ليها لا .. قالت لي بالله تاني ما تشرب موية كتيرة لو عطشته قرقش ليك تلج .. في اللحظة دى وانا بعاين لجميلة وهي بتتكلم اذكرت سينما الخواجة في مدني واذكرت الافلام الهندية .. وخاصة فلم جانوار والبطل شامي كابور ومعاهو البطلة ( سبنا ) وهم بيغنوا ويدردقوا في النجيلة .. وكان شامي كابور بيغنى ويقول ( ميرى محبتكهى ) كانت جميلة تشبه ( سبنا ) لكن جميلة كانت حقيقة وسبنا كانت سراب .. وفي اثناء انا ما سرحت في شامي كابور وسبنا وجميلة .. شفت في الدرب فقعات هواء وهي تدخل مع دمي بسرعة شديدة لانها مدفوعة بالمكنة .. وبكل بساطة قلت لجميلة .. ياجميلة شوفي الهواء دا داخل جسمى مع الدرب .. ما اشوف ليك البت والا جرت بسرعة البرق وقفت المكنة .. وبصوت عالى صرخت للممرضات الهنديات وقالت ليهم كلام ماعارفو شنو .. لكن الممرضات كلهم اتلموا فينى .. وقالوا كلام بالهندى .. وكانت تعابير وشهم غريبة .. رئيسة العنبر السمينة في الوكت دا .. بقت طياره .. واتصلت بالدكاترة .. حقيقة انا خفت ونسيت شامي كابور وسبنا وبقيت في روحى .. ما عارف لحصل شنو .. الممرضات كل واحدة بدت تعمل حاجة .. واحدة فكت الابرتين من وريدى وضغطت مكان فتحة الابر بشاشة .. وواحدة رفعت السرير من ناحبة رجولى .. وواحدة شالت المخدة من راسي وجميلة وشها اتغير وقالت لى بالله ارقد على جنبك الشمال .. قامت رفعت القميص .. قلت ليها في شنو ياجميلة .. قالت لى انشاء الله بسيطة .. بدا وصول الدكاترة .. وقال واحد فيهم لجميله اضربيهو في ضهرو .. قامت جميلة وهي تضرب .. جا دكتور تاني .. وقال لى اثناء الممرضة بتضرب على ضهرك .. قح شديد . بصفة متكررة .. ضرب جميلة ما عجب الدكاترة .. كلمو رئيسة العنبر تقوم بالضرب على ضهرى .. ومن فترة لاخرى يقول لى الدكتور شاعر بدوخة او اى حاجة .. اقول ليهو ابدا . مافي حاجة .. الحكاية استمرت لربع ساعة .. الدكاترة قالوا خلاص الازمة راحت .. ورفعوا السرير ذى ما كان .. لكن جميلة كانت متأثرة جدا .. وخاصة عندما فكت الدرب والفلتر من مكنة الغسيل وهم مليانيين من دمي ورمتهم .. وقالت لي انا آسفة .. قلت ليها مافي مشكلة .. فداك دمى .. سالت جميلة قلت ليها الحصل شنو .. قالت لي ربك ستر وكتب ليك عمر جديد .. فعلا في هوا دخل دمك .. وكنا خايفين من الهوا يوقف جريان دمك او يعمل ليك جلطة او كمية الهوا يقيفوا جوه قلبك .. عشان كده كنت بضرب في ضهرك في اثناء انت ما بتقح .. عشان الهوا يتحرك مع دمك حتي يصل لمنطقة الرئة وهو عابر قلبك .. والحمد لله الآن قلبك سليم ما فيه هوا .. ووزعت لي البسمات وانا راجع البيت لكن مع شوية هوا و7 كيلوا مويه
عزيز عيسى
14-07-2006, 09:15 AM
والله يا صالح إفتكرت نفسي دخلت فيلم هندي..
قصتك دي بس فاقدة صاحب البطل الراجل (العوير)..
7 كيلو موية.. إنت كنت شارب بالجردل http://www.asmilies.com/smiliespic/psmilie/032.gif (http://www.asmilies.com)
لكن إستمتعت بالسرد الجميل..
وألف حمدلله على السلامة..
وفعلا ربنا كتب ليك عمر جديد..
وإن شاء الله ما تشوف شر..
يا صالح ما ضبحت كرامة؟
Jamal Elmahi
14-07-2006, 01:17 PM
أبشوارب أأأأأخوي يعني بعد الغسيل شرّوك لامن ضربك الهوا ونشفته عود حتي بعد داك كووك..ألهوي أأأبوي ضربك مرتين ..أثناء الغسيل وبعدو...والشرّه الحمدلله البقت في حبل غسيل ما في نشّافه كان لي هسه تكون لافي...الهوا دا أأألعشّاي الاّ يكون في شكل فقاعات...؟؟؟

مشاققه...
أرح أأأبوي ألحق طلّع لينا من الحاجات الظريفه دي قبّال ما جهاز الامن يرجع لقواعدو سالم...
والبلقي هبوبو بضرّي...وأتا تحمد سيدك لاقي هبوبك ...ضرّي ساي ...هبوب في الغسيل وهبوب فك الترلّه...

مسارقه...
الغسيل مشيت ليهو بي تحرمني منّك؟؟ أتا ماشي غسيل ولاّ غسيل...؟؟

ود الماحي
راشد خضر
14-07-2006, 02:02 PM
وانا بعاين لجميلة وهي بتتكلم اذكرت سينما الخواجة في مدني واذكرت الافلام الهندية .. وخاصة فلم جانوار والبطل شامي كابور ومعاهو البطلة ( سبنا ) وهم بيغنوا ويدردقوا في النجيلة .. وكان شامي كابور بيغنى ويقول ( ميرى محبتكهى )

يا أبو شوارب نسأل اللّه لك الشفاء العاجل . بس ياخي إنت في شنو والحسانية في شنو هههه :p هههه
دا وقته ؟ غايتو جميلة كسرت فيك ضلعة ، ها كانت لحظة عابره ولّـه عملت تواصل ؟
صلاح ودالطاهر
14-07-2006, 07:29 PM
يديك العافيه اخوي وربنا يتم شفاك القصه بعيدة المدي وانا حاكلم ................................... اعمل حسابك
نور العيون
14-07-2006, 10:08 PM
الأخ صالح أبو الشوارب



http://www.asmilies.com/smiliespic/FAWASEL/001.gif (http://www.asmilies.com/)

الله يديك العافيه على الفيلم الهندي د و يحميك من كل شر و يبعدك عن الغسيل و الكلام الطويل د و الله يمد في عمرك
سوار الياسمين
14-07-2006, 11:05 PM
القدير صالح ابو شوارب

لك مني كل تقدير واحترام وربنا يديم عليك الصحة والعافية

طبعا موضوعك قتلني من الضحك الزاد عليه تعليقات عزيز عيسى وود الماحي

رجاء بس ما تقطع وتبخل علينا من قصصك ده

تحياتي ليك
معتز حمدتو
15-07-2006, 01:44 AM
العزيز ابو شنبات
كفارة او سلامتك والف عزيز كرامتك . وان شاء الله اجر وعافية.
ان الله جميل يحب الجمال ولو كانت المعاك من الاول البابور جاز كان تكون في خبر كانه لكن لتقيمك للجمال ربنا اداك عمر جديد .
تعرف كل مااعدي في اجازه جنب سينما الخواجة واحكي لزوجتي ونحن صغار عن السينما و الافلام ونحن في معيه العم العزيز عبدالعظيم حمدتو المعروف بولعة للافلام الهندية وبمجرد ذكرك للسينما وسبنا فتذكرته بالخير .
لك الود عزيز والف سلامه ليك .
معتز حمدتو
الزبير محمد عبدالفضيل
15-07-2006, 03:39 AM
العزيز ابو شووووووووارب كفارة او سلامتك والف عزيز كرامتك . وان شاء الله اجر وعافية.
ان الله جميل يحب الجمال ولو كانت المعاك من الاول البابور جاز كان تكون في خبر كانه لكن لتقيمك للجمال ربنا اداك عمر جديد .
ابراهيم
15-07-2006, 08:08 AM
عمنا ابوشوارب ..
القصة ممتعة شديد وزي ما قال عزيز كأنك في فلم هندي ..
والحمد لله ربنا كتب ليك عمر جديد ..

على جنب:


كانت شلة الممرضات من جنسيات مختلفة .. فيهم كورية وهنديه وفلبينية وباكستانية واخيرا جابوا صينييات لكن ما ذى جميله


غايتو الحمد لله وقعت في جميلة الهندية لو كان وقعت في صينة او كورية ديل صعبين قرايب جاكي شان ديل لكن الهنود حنونين.
بس عندي سؤال:
جميلة دي مرتبطة ولا على قيد الحياة:confused:
صالح ابوشوارب
15-07-2006, 12:02 PM
والله يا صالح إفتكرت نفسي دخلت فيلم هندي..
قصتك دي بس فاقدة صاحب البطل الراجل (العوير)..
7 كيلو موية.. إنت كنت شارب بالجردل http://www.asmilies.com/smiliespic/psmilie/032.gif (http://www.asmilies.com)
لكن إستمتعت بالسرد الجميل..
وألف حمدلله على السلامة..
وفعلا ربنا كتب ليك عمر جديد..
وإن شاء الله ما تشوف شر..
يا صالح ما ضبحت كرامة؟

الاخ عزيز شكرا لمشاعرك الطيبة . طبعا سرد هذه القصة حتى يعرف الناس معني الصحة وسوف اواصل كتابة ما يعانيه مريض الفشل الكلوى . مع اقحام ممرضة اخرى حتى يرتاح القارئ .. لكن خايف الناس تنسي 7 كيلو موية وتمشى للهوا هههههههههههه
صالح ابوشوارب
15-07-2006, 12:11 PM
مشاققه...
أرح أأأبوي ألحق طلّع لينا من الحاجات الظريفه دي قبّال ما جهاز الامن يرجع لقواعدو سالم...
والبلقي هبوبو بضرّي...وأتا تحمد سيدك لاقي هبوبك ...ضرّي ساي ...هبوب في الغسيل وهبوب فك الترلّه...

مسارقه...
الغسيل مشيت ليهو بي تحرمني منّك؟؟ أتا ماشي غسيل ولاّ غسيل...؟؟

ود الماحي

العزيز ودالماحى
على قولك وزارة الداخلية مافي وخلينا نشاقق ونعمل مسارقات .. لكن تأكد معاناة مريض الفشل الكلوى وهو مرتبط بمكنة يحلم بيها فى الاكل والشراب .. وشكرا يا لحبوب
أبوبكرحامد
17-07-2006, 02:39 AM
قالت لى معليش .. بكرة تشفي وتبقى ذكريات
. وقالت لى شاعر بدوخة .. قلت ليها لا ..
.. والحمد لله الآن قلبك سليم ما فيه هوا .
. ووزعت لي البسمات

هسى قصة بكرة تشفى وتبقى ذكريات دى ... الهندية قالتا ليك كيف ، وبرضو تقول لى ماشعرتا بى دوخه ، ده انتا أحمد الدوخى نفسو هههههه، وبعدين عبارة قلبك سليم دى صحيحة ، وصحيح مافيهو هوا ، بس فيهو هوى ، غايتو نهدى ليك اغنية ميرغنى المامون وأحمد حسن جمعة :
هوى ياجاهلة وطيبك عبق
سنِّك برَّاقا إسوِّى بق
Jamal Elmahi
17-07-2006, 12:01 PM
أبشوارب أخوي...
أنا غسيل الكلاوي سمعته بيهو ..وغسيل الكمونيه برضو سمعته بيهو ...بس أنا لازمني غسيل فشفاش بس ما بي أبغازيه وبشرط تسويهو لي زي
جميله ومستحيله...أي بابور جاز أختاني بعملوا لي جلطه وسكته وأنا ما لازمني أيّ سكوت...
بس زي جميله حتي لو دخّلت لي كتاحه مش هوا...



ود الماحي
ياسر فقيري
21-07-2006, 03:18 PM
[لكن جميلة كانت متأثرة جدا .. وخاصة عندما فكت الدرب والفلتر من مكنة الغسيل وهم مليانيين من دمي ورمتهم .. وقالت لي انا آسفة .. قلت ليها مافي مشكلة .. فداك دمى ..

العزيز الغالي أستاذنا أبو شوارب .. ألف حمداً لله على سلامتك ..
وعلى الرغم من معرفتي الآن بشفائك التام الذي من به الله علينا وعليك لكن أثناء ما أنا بقرأ في القصة كنت خايف عليك وكل شوية يحصل لي كدا :eek: :p :confused:
محمد حسين (المميز)
21-07-2006, 09:11 PM
مشيت لرئيسة العنبر وكانت غليده وكريهه وكنا المرضانيين الاجانب ما بنحبها .. وقالت لي امشي للسرير رقم 19 ..
ضرب جميلة ما عجب الدكاترة .. كلمو رئيسة العنبر تقوم بالضرب على ضهرى .....
----------------------------------------------------------

طبعا دي لقتها فرصة ادتك علقه تمااااااااااام..
الله يديك العافيه وحمدالله عالسلامه,,,
صالح ابوشوارب
27-07-2006, 02:18 PM
[QUOTE=راشد خضر]يا أبو شوارب نسأل اللّه لك الشفاء العاجل . بس ياخي إنت في شنو والحسانية في شنو هههه :p هههه
دا وقته ؟ غايتو جميلة كسرت فيك ضلعة ، ها كانت لحظة عابره ولّـه عملت تواصل ؟[/QUO+TE]

شكرا الاخ راشد خضر

قصة غسيل الكلى ربنا ما يوريها حبيب ... لكن لو تعرف الحسانية الكانوا بيغسلوا معاى .. كان الواحد جايب ليهو كيس بطاطس وتسالى رايك شنو .. مش احسن اخوك قاعد يتامل
صالح ابوشوارب
27-07-2006, 02:22 PM
يديك العافيه اخوي وربنا يتم شفاك القصه بعيدة المدي وانا حاكلم ................................... اعمل حسابك


شكرا لك الاخ الاستاذ ود الطاهر تحياتي لك وللعائله بالمناسبة الداخليه في اجازه
صالح ابوشوارب
27-07-2006, 02:27 PM
شكرا جزيلا نور العيون وشكرا للورد الجميل .. انشاء الله نقدم ليك باقة الورد يوم فرحك
صالح ابوشوارب
27-07-2006, 02:34 PM
القدير صالح ابو شوارب

لك مني كل تقدير واحترام وربنا يديم عليك الصحة والعافية

طبعا موضوعك قتلني من الضحك الزاد عليه تعليقات عزيز عيسى وود الماحي

رجاء بس ما تقطع وتبخل علينا من قصصك ده

تحياتي ليك


شكرا سوار الياسمين وانشاء الله من فترة لاخرى نكتب من الذكريات الحلوة والمريرة
صالح ابوشوارب
27-07-2006, 02:43 PM
العزيز ابو شنبات

ولو كانت المعاك من الاول البابور جاز كان تكون في خبر كانه

تعرف كل مااعدي في اجازه جنب سينما الخواجة واحكي لزوجتي ونحن صغار عن السينما و الافلام

معتز حمدتو

شكرا معتز لشعورك الطيب
لكن فعلا كان في بوابير في العنبر توديك في خبركان .. وفعلا يا معتز الافلام والسينما كانت برامجنا .. والصفافير اذا الفلم انقطع في ....... والناس تقبل ناحية اللوج
waheeb
28-07-2006, 05:00 AM
ألف مليون حمد لله علي سلامتك عمنا ابو شوارب وربنا يديك لينا الصحه والعافيه.. حقيقه ديل ملائكة الرحمه ....
سواااح
28-07-2006, 09:45 PM
استاذ صالح ..

حمدا لله علي سلامتك

وبعدين بيني وبينك انا جنبي في الشغل مركز صحي

ومعاهم واحدة هندية نضاجة

وبحاول دائما اني اكون موجود وقت نهاية الدوام

هناك اناس مجرد رؤيتهم من البعد لها اثرها

مع انه لا تعرفهم ولا يعرفوك

لكن من ملامح وجهها تحس البراءة والطيبة

ولا تنسي هناك ممرضات فعلا ملائكة رحمة

وهناك من لا تدري كيف سمحوا لهن بالعمل

لا جمال ولا اخلاق ولا حسن معاملة

ادام الله عليك الصحة والعافية

دمـــــــــــــت ،،
اميمه عشريه
30-07-2006, 07:49 AM
تحياتنا يا راجل يا ذوق والف سلامه ليك وما تشوف شر ...
من حسن حظك انهم ما فكو فيك الممرضه الكريهه ديك كانت هسه فكت ليك القفص الصدري كلو ضلعه ضلعه .. دي عنيفه بشكل .. الله سلمك ياخي
تومى
14-08-2006, 01:59 AM
الأخ ابو شوارب لك تحية وامنيات بالشفاء انشاء الله .
طبعاً كنت مشدود معاك بس مش عشان جميلة لانه انا كنت بشتغل فى مستشفى الجزيرة لامراض وجراحة الكلى قسم المعلومات والبحوث يعنى قريب من الغسيل والبحصل فى الغسيل وربك لطف بس مفروض جميلة الكسرتك دى تكون اشد حرص على التأكدمن الماكينه قبل التركيب .
عموماً دعواتنا ليك بالشفاء انشاء الله .
طبعاً المستشفى ده فى مدنى وعلى مستوى عالى من الرعاية والأمكانيات وبه طاقم طبى وفنى وأدارى على مستوى رفيع التحية لهم ايضاً ولك الود والأمنيات
HaSsOoN
14-08-2006, 02:22 AM
عاطر التحايا ليك ياصالح ابو شوارب ...وخليتنا نندمج في القصه وحسستنا كانو قاعدين نحضر في فيلم هندي .....بالجد سردك للقصه جميل جدا وكتر من قصصك دي ...والله يديك الصحه والعافيه
دموع القمر
14-08-2006, 06:15 AM
ربنا يديك الصحة والف سلامة عليك
بت الشبارقه
25-03-2007, 07:42 PM
اسفه لدخولي المتاخر على هذا البوست ولكن حقيقه كنت منجذبه شديد ما عشان جميله لكن كنت شغوفه لمعرفة ما جرى لك
الله يديك العافيه ويحميك من كل شر يا غالي علينا ... انشاء الله صلاح ما يكون وصل الخبر؟
صلاح ودالطاهر
26-03-2007, 01:37 AM
اسفه لدخولي المتاخر على هذا البوست ولكن حقيقه كنت منجذبه شديد ما عشان جميله لكن كنت شغوفه لمعرفة ما جرى لك
الله يديك العافيه ويحميك من كل شر يا غالي علينا ... انشاء الله صلاح ما يكون وصل الخبر؟
بت الشبارقه شكرا اولاانك ذكرتيني بالموضوع ثانيا براك تفتشي للمحن حسع الوداك تنكتي الموضوع دي شنو وانا الصباح اتصلت بابوشوارب وهو عايزني اليوم مادخل المنتدى ... تاري انت بحتي الوطه واهلنا قالوا في المثل البلدي المحن يلولي صغارهن تشكري اختي
صالح ابوشوارب
02-08-2007, 01:23 AM
الاخوات والاخوان
HaSsOoN
دموع القمر
بت الشبارقه
صلاح ودالطاهر

شكرا لتواصلكم
وربنا لايريكم شر
ونأسف للتأخير

ابو الله جابو
ابوالنور
02-08-2007, 03:26 AM
نصيحه ...لا أستطيع أن أطبقها دائما... حنيني إلي ذكريات في الماضي جميله يجعلني أحزن أنها مرت... أنظر للمستقبل وفي قلبي خوف منه... ولكن فعلا الحياه أقصر مما نتصور... ... ولكن من منا يمتلك هذه الحكمه ليحيا سعيدا... البوست جميل
والاجمل من البوست هذا السريد العظيم الذي اتي خلف البوست
ما تنقطع مننا يا صلاح ونتمني نشوف هذه القمة التي خلف البوست
وكنو دايما هكذا لكي نصير نحن خلفكم وصدقني بجيك تاني وتالت ورابع
أبو مهدي371
02-08-2007, 08:33 AM
اخي صالح القصة بقدر ماهي مسرودة بنص درامي مضحك الا انها والله في غاية الالم لمن هم علي سرير المرض والذين يعانون من هذا الداء اللعين نسأل الله مخلصين له ان يتم شفاك باسرع وقت .
ولكن قصة جميلة الهندية دي دخلت في قلبك الهوى وليس الهواء انت شرقت من الهوى ياحبيبي وحات الله ربنا صحي ستر عليك وكتبلك عمر جديد بس جميلة بادلتك الشعور بتاع هواك دا السؤال ؟؟؟ .
وبالله سلم لي علي جمييييييييييييييييييلة شديد .
وان شاء الله ماتشوف شين .
صديق بلال
02-08-2007, 10:50 AM
الأخ القدير صالح أبو شوارب...
الله يعطيك الصحة والعافية...
أنا أريد أن أعرف شئ واحد فقط...
هل القصة التي رويتها حقيقية أم من وحي الخيال...
حتى نستطيع بناءا على إجابتك للسؤال التعامل مع القصة بما هو يليق بها من جديتها أو غير ذلك...
أرجو الرد علينا لو تكرمت...
ولك منا خالص التقدير والإحترام...
ابوزيد محمد نور
03-08-2007, 09:15 PM
عمنا صالح أبو شوارب...
الله يعطيك الصحة والعافية...
قصة جميله واقـترح منى لو القصة اتحولت لى فيلم وانا المنتج رايك شنننننننو
ولك منا خالص التقدير والإحترام...
صالح ابوشوارب
03-08-2007, 09:27 PM
نصيحه ...لا أستطيع أن أطبقها دائما... حنيني إلي ذكريات في الماضي جميله يجعلني أحزن أنها مرت... أنظر للمستقبل وفي قلبي خوف منه... ولكن فعلا الحياه أقصر مما نتصور... ... ولكن من منا يمتلك هذه الحكمه ليحيا سعيدا... البوست جميل
والاجمل من البوست هذا السريد العظيم الذي اتي خلف البوست
ما تنقطع مننا يا صلاح ونتمني نشوف هذه القمة التي خلف البوست
وكنو دايما هكذا لكي نصير نحن خلفكم وصدقني بجيك تاني وتالت ورابع


شكرا أبو النور للضوء الذي نشرته على هذا البوست ودائما نحن في انتظارك
صالح ابوشوارب
03-08-2007, 09:29 PM
اخي صالح ولكن قصة جميلة الهندية دي دخلت في قلبك الهوى وليس الهواء انت شرقت من الهوى ياحبيبي وحات الله ربنا صحي ستر عليك وكتبلك عمر جديد بس جميلة بادلتك الشعور بتاع هواك دا السؤال ؟؟؟ .
وبالله سلم لي علي جمييييييييييييييييييلة شديد .
وان شاء الله ماتشوف شين .


الأخ أبو مهدي
شكرا لتفضلك بالتوقيع على هذا البوست وكما ذكرت أنا لا أحب الحزن ولذلك جعلت الممرضة جميلة ترافقني في هذه الجلسة خلال أربعة ساعات متواصلة وثلاثة مرات في الأسبوع
فجميلة أدخلتها في هذه الجلسة حتى أتخلص من الهواء اما الهوى اللعين عندما تحرك من قلبي عن طريق شراييني فوقع فريسة لمكينة الغسيل فتم غسله وراح الهوى وخلانا
صالح ابوشوارب
03-08-2007, 09:31 PM
الأخ القدير صالح أبو شوارب...
الله يعطيك الصحة والعافية...
أنا أريد أن أعرف شئ واحد فقط...
هل القصة التي رويتها حقيقية أم من وحي الخيال...
حتى نستطيع بناءا على إجابتك للسؤال التعامل مع القصة بما هو يليق بها من جديتها أو غير ذلك...
أرجو الرد علينا لو تكرمت...
ولك منا خالص التقدير والإحترام...


اخى العزيز صديق بلال
شكرا لمرورك
طبعا هي قصة حقيقية 100% .. كنت أعانى من الفشل الكلوي (أتمنى أن لا يصاب كل مسلم ويشفى جميع المسلمين بهذا الداء ) والآن والحمد لله قمت بزراعة للكلى
وكتابتي لهذا النوع من المعاناة إنما هو جزء بسيط من معاناة مريض الفشل الكلوي وسوف اكتب نوع آخر من المعاناة في المرة القادمة .. نسأل الله العافية للجميع
عثمان جلالة
03-08-2007, 11:10 PM
الرائع أبو شوارب ... شكرا لكم .. وشكرا .. لجميلة .. وشكرا ... لماكينة الغسيل ... وكفاك الله شر الهواء ... والهوى ... صورت لينا في إبداع معاناتك مع الغسيل ... شفاك الله ... وجعل كل أيامك جميله .. بس بدون غسيل ... وندعوا المولى ان يشفيكم ويشفي مرضى الكلى ... ويجعل أيامك ... إنتظار لتلفونات .. جميلة بعيدة كل البعد عن .... مكان فاضي في مستشفى ... وتكون كلها محبه .. وتبريكات بالشفاء .. لك الود والقرنفل ... وكل حب الأغاني .. الهندية :p
صالح ابوشوارب
03-08-2007, 11:24 PM
عمنا صالح أبو شوارب...
الله يعطيك الصحة والعافية...
قصة جميله واقـترح منى لو القصة اتحولت لى فيلم وانا المنتج رايك شنننننننو
ولك منا خالص التقدير والإحترام...



بسرعة بالله يا ابو زيد اخوك خارج الخدمة ليهو زمن .. بس حتعرض الفلم ده وين . لانو الافلام اليومين ديل عايزة كراتيه .. والفيلم بتاعى ده فيلم هندى ناقص شامى كابور
معتز الريح
03-08-2007, 11:47 PM
الأستاذ صالح أبو شوارب ..
قبل سنوات عايشت مع أحد اقربائي معاناة غسيل الكلى بمستشفى الملك فهد بجده .. كنت انتظره أثناء الغسيل .. وفي أثناء جلوسي كنت أراقب وجه مرضى الكلى وهم يدخلون على أجهزة الغسيل .. يالله ..
وجوههم تحكي معاناتهم .. لا تحتاج ليحكوا لك عن آلامهم فسيماهم في وجوههم ..
حمد لله على سلامتكم .. ونتمنى شفاء كل مريض ..

تخريمة :
Janwar و mother India .. أجمل ما قدمته السينما الهندية ..
صالح ابوشوارب
06-08-2007, 08:22 AM
الأستاذ صالح أبو شوارب ..
قبل سنوات عايشت مع أحد اقربائي معاناة غسيل الكلى بمستشفى الملك فهد بجده .. كنت انتظره أثناء الغسيل .. وفي أثناء جلوسي كنت أراقب وجه مرضى الكلى وهم يدخلون على أجهزة الغسيل .. يالله ..
وجوههم تحكي معاناتهم .. لا تحتاج ليحكوا لك عن آلامهم فسيماهم في وجوههم ..
حمد لله على سلامتكم .. ونتمنى شفاء كل مريض ..

تخريمة :
Janwar و mother India .. أجمل ما قدمته السينما الهندية ..


شكرا معتز الريح
فعلا معاناة لاتوصف اثناء ساعات الغسيل .. وخاصة عندما يموت احد المرضى اثناء الغسيل وهو بجانبك
****
انت يا معتز من زمن جانوار Janwar
معتز الريح
06-08-2007, 08:45 AM
****
انت يا معتز من زمن جانوار Janwar[/CENTER][/COLOR][/SIZE]

والله يا أستاذ صالح انا بعد الزمن داك بشوية ..